رواية اشتغاله الفصل العاشر 10 - بقلم ليل أدم

يوم المزاد وأثناء الطريق. جوده: زين المزاد ده لو خلص أكتر من عشرين مليون هيتخرب بيتنا فيه تمام. زين: خلاص يا جوده فهمت، آخرها عشرين مطلعش عن كده. عرفت يخربيتك لتات. جوده: ربنا يستر، مش عارف مش مرتاح. زين: يا عم في إيه؟ هو أول مزاد، أنا عايزك تهدأ كده وتتعلم. جوده: ماشي، أما نشوف. في جانب آخر. طارق: كامل المزاد ده بتاعي، الناس اللي موجودة دي كلها ضيوف شرف زي ما قلت.

كامل: محدش هيرفع على كلمة حضرتك، الموضوع خلصان من قبل ما يبدأ. مفيش بس إلا رجل أعمال نازل المزاد لسه اسمه منزلش. طارق: فكك منه، كده كده المزاد خلاص هيبدأ وهو لسه مجاش، شكله خلع. كامل: طبعاً يا مستر طارق، هو في حد يقدر يقف قصاد حضرتك. في جانب آخر. جوده: المزاد بدأ على فكرة. زين: لا تقلق، إحنا وصلنا خلاص، وحد انت بقا. جوده: وربنا الثقة الزيادة دي هي اللي قلقاني منك. زين: انزل. جوده: ياله. (وماشي ورا زين)

زين: عشرين مليون وجنيهين. خسرنا، انت فاهم. طارق: ١٧ مليون جنيه. المتحدث: ١٧ مليون طارق بيه، ١٧ مليون جنيه طارق بيه. زين: ٧٠ مليون جنيه. طارق وكل الحضور، حتى جوده، في صدمة. المتحدث: ٧٠ مليون جنيه مستر زين، ٧٠ مليون جنيه. زين: يا عم قصر، محدش هيفتح بوقه. جوده: يارب حد يفتح بوقه. المتحدث: مبروك يا مستر زين. زين: الله يبارك فيك. طارق: كامل، زين ده بتاع البورصة صح؟ كامل: هو إيه الدخلة دي؟ ٧٠ مليون إيه؟

طارق: الواد ده مش هيدفع المبلغ ده من فراغ. (وقام من مكانه راح ورا زين) جوده: انت كنت مطبق؟ سلام يا صاحبي، إيه القرف اللي عملته ده؟ انت ضيعت خمسين مليون جنيه. زين: بس إيه رأيك؟ خدنا وقت. جوده: يا ريتنا خدنا وقت، يا ريتنا ما جينا أصلاً. وعمال تقولي اتعلم اتعلم، دا انت اللي قالك إنك رجل أعمال ظلمك. زين: اركب بقا يا جوده. طارق: (حط إيده على باب عربية زين) في حد يخسر نفسه كده خمسين مليون على الأرض مرة واحدة يا مفتري؟

زين: انت شغال مع عمال المزاد صح؟ طارق: عمال المزاد؟ زين: آه. طارق: لا، أنا طارق رجل أعمال. (ومد إيده يسلم على زين) زين: معلش، متوضي. خير، عايز إيه؟ طارق: مبروك. زين: اركب يا جوده. طارق: مستر زين، هو الموضوع شخصي ولا حاجة؟ زين: أنا جايلك من المستقبل وبقولك العالم هينتهي يوم الاتنين. الحق ريح ضهرك ساعتين. رجلك بقا علشان نمشي. طارق: اتفضل. (ومستغرب من كلام زين، ليه اتعامل معاه كده رغم أن دي أول مرة يتقابلوا مع بعض)

في جانب آخر. جوده: خمسين مليون جنيه، يا اللي منك لله. أنا حاسس إن قلبي هيوقف وربنا. زين: بس خدنا، أوعى تنكر. جوده: خدنا، إلا خدنا، دا إحنا خدنا لحد ما أقولك إيه بس. زين: ما تشغل أغنية حلوة نسمعها. جوده: ليك عين تسمع حاجة؟ زين: حاسك زعلان. جوده: هنجلط يابني، هو عشان ربنا وسع علينا نرمي الفلوس؟ زين: هصالحك الوقتي حالا، انزل. جوده: على فين؟ زين: يا عم انزل بقا يا لتات. جوده: نزلت.

ودخل محلات أزياء مع زين، وكان محل عالي جداً. زين: لو سمحت عايز عشر بدل. العامل: تحت أمرك يا فندم، ممكن تتفضل معايا. زين: لا، مش ليا، للراجل ده. جوده: راجل إيه؟ هو في إيه يا زين؟ زين: يا عم ادخل بقا، وجعت قلبي. جوده: (دخل مع العامل، شاف البدل وشاف الأسعار، خرج جري على زين) زين: في إيه؟ يخربيتك خضتني. جوده: إحنا هنمشي من هنا حالا، انت عارف البدلة بكام؟ زين: عارف، في إيه مالك؟ ادخل كمل.

جوده: يابني أدم، أنا مش بلبس بدل. يوم ما ألبس بدلة، ألبس بدلة بـ ٦٧ ألف جنيه. زين: بس إيه؟ هتعمل منك إنسان. العامل: كده الأوردر كله كامل يا زين بيه، تحب تراجع حاجة في الألوان؟ زين: لا، تمام، أنا اخترت الألوان بنفسي. جوده: خلي بالك من بكره، أنا مش معاك، انت هتفرسني. زين: بره ياض وخد البدل معاك. بعد خروج زين. أثناء الطريق. زين: هتفضل قالب وشك كده؟ جوده: يا عم انت حر، أهي فلوسك. زين: عايز أعلمك حاجة. جوده: والله؟

زين: آه والله. جوده: خير. زين: انت زعلان عشان قيمة المكان تسوى عشرين مليون، صح؟ جوده: صح. زين: بس قيمة المكان عارف في إيه؟ جوده: إيه؟ زين: اسم زين كامل. جوده: يعني إيه؟ زين: يعني يا جوده، أهم حاجة ممكن تعملها، تكسب منها أحلي فلوس، تحول اسمك من اسم لـ براند. حتى لو كنت عامل، حب شغلك، ادي كل وقتك ومجهودك لحد ما اسمك يبقى براند. تلاقي واحد يقولك أنا عامل بيتي عند فلان الفلاني. هل معنى كده إن فلان ده أحسن واحد؟

أكيد لا، في ناس أحسن منه مليون مرة، بس هو عمل من اسمه براند، خلاك عايز تجيبه عشان بس تقول أنا اللي صممت بيتي فلان الفلاني. جوده: وده إيه علاقته بالموضوع يا زين؟ زين: إيه ده؟ ملوش علاقة. جوده: لأ. زين: طب ما نكمل كلامنا فوق في مكتبي ولا إيه؟ جوده: ماشي. زين: هات البدل معاك. بعد طلوع زين إلى الشركة. ياسمين: مستر زين، جلسة التصوير جاهزة.

زين: ياسمين، أنا عايز جوده نجم سينمائي وغلاف كل الصفحات. عايز النهارده مصر كلها تنام وهي بتتكلم عن رجل الأعمال الجديد المليونير جوده السيد. يخربيت اسمك شحات. جوده: زين، انت عايز تحبسني. زين: ياض عيب بقا، أنا معاك، خش. ياسمين: جوده، خش مع الاستايلاتست والمصفف، هما عارفين شغلهم كويس. زين: ياسمين، تعالي معايا. ياسمين: تحت أمرك يا مستر زين. بعد الدخول إلى المكتب. ياسمين: تحت أمرك يا مستر زين.

زين: شوفي يا ستي، أول حاجة عايز حد من الشؤون القانونية ينقل ملكية الشركة بتاعة ريهام لجوده ويعمل توكيل يخليه معايا. ياسمين: تمام. زين: ثانياً، عايز السجل الضريبي بتاع ريهام مكمل في التعاملات مع البورصة زي ما هو، بس باسم جوده. ياسمين: تمام. زين: ثالثاً، عايز قيمة الصفقة اللي هي ٧٠ مليون جنيه، يتعمل على ١٠٠ سهم ويطرح في البورصة، بس قبل طرحه أكون عارف. ياسمين: تمام، بس السهم في شركة إيه؟ بيبيع إيه؟ جوده؟

زين: منا بقولك يا ياسمين، بنفس بطاقة ريهام الضريبية، يعني شغال في المقاولات والأسهم بتتباع على أنها شركة مقاولات. ياسمين: آه، تمام، تمام. زين: قصادك قد إيه وتخلصي؟ ياسمين: بكره. زين: تمام، نص ساعة يكون كل ده خالص. شغلي مكتب المحاسبين كلهم معاكي. زين: فين مدير الشؤون القانونية؟ ياسمين: لسه مبلغهوش. زين: طب ياله يا ياسمين. باب المكتب فتح. جوده: أنا لو اتحبست دلوقتي مش فارق، كفاية إني شفت نفسي نضيف.

زين: اترزع أما أشوف هعمل معاك إيه. باب المكتب بيخبط. زين: ادخل. أستاذ خالد: تحت أمرك يا مستر زين. زين: اتفضل يا أستاذ خالد، ياسمين فهمت حضرتك أنا عايز إيه. أستاذ خالد: بتقول حضرتك عايز عقود ملكية ورد ملكية. زين: بالظبط. طلع بطاقتك يا جوده. جوده: خير يا زين، هو أنا هقسط البدل دي ولا إيه؟ زين: يا عسل، أنجز، قصادي ساعتين ولازم أكون عند ريهام. جوده: تمام، خلاص خد. أستاذ خالد: امضي هنا يا أستاذ جوده. جوده: أهو.

أستاذ خالد: مستر زين، امضي هنا. زين: تمام. أستاذ خالد: تمام، باقي العقد هنفذه في مكتبي. مستر زين: تمام، تقدر تشوف شغلك يا أستاذ خالد. خالد: تمام، بعد إذنك. جوده: أنا مش فاهم حاجة. زين: بقيت صاحب شركة يا معفن، أي خدمة. جوده: زين، انت بتعمل إيه؟ هو في إيه بجد؟ أنا مش فاهم حاجة. جوده: منا لما حبيت أفهمك اتريقت عليا. ياسمين: مستر زين، تمام.

زين: برافو عليكي يا ياسمين، عايز بقا حملة إعلانية على كل المواقع، عايز صور جلسة جوده تلف السوشيال ميديا كلها. ياسمين: اعتبره حصل. زين: تمام. جوده، أنا ماشي، عايز تيجي معايا؟ جوده: لا، أنا الحق أروح لـ أسماء تشوفني بالشياكة دي قبل ما الهدوم تتكرمش. زين: تتكرمش يا عربجي؟ انت عارف انت لابس ماركة إيه؟ جوده: مش عايز أعرف، كفاية سعرها اللي كل ما افتكره أبقى مش طايقك. زين: والخمسين مليون إيه؟ نسيت؟

جوده: هقولك إيه بس، منك لله، هنرجع نشحت تاني وبكره تقول جوده قالها. زين: صحيح يا جوده، أمك بطلت تعمل شكشوكه ولا إيه؟ جوده: مش كانت وحشة؟ دلوقتي بقت حلوة. زين: طب والله نفسي فيها بقالي كتير. جوده: هقولها لما أروح. زين: لا، بكره هاجي أفطر معاك الصبح. جوده: خلاص، ماشي، اهو بالمرة تاخدني في سكتك بدل ما أتمرمط في المواصلات. زين: إيه ده؟ لا، مش هينفع، انت بقيت وجهة. جوده: آه، إيه رأيك؟

زين: كتك وكسه. المهم بتعرف تسوق أصلاً؟ جوده: لأ. زين: خلاص، انزل لـ عم محمد، هقوله يعلمك علشان تاخد عربية من الجراج، خليها معاك، روح وتعالى بيها. جوده: يا عم خف دلع بقا علشان لما نرجع نشحت نعرف نعيش من غير ما ننتحر. زين: متقلقش، سلام. جوده: سلام يا برنس.