رواية اشتغاله الفصل الحادي عشر 11 - بقلم ليل أدم

مساء الخير للجميع الجزء ١١ من روايه (أشتغاله) وبعد مرور أسبوع من طرح أسهم الشركة كان موقع الساحل الشمالي الخاص ب زين تم بيع جميع الوحدات بالكامل. في جانب آخر. كامل: مستر طارق جبت لك البيانات اللي طلبتها. طارق: كويس جدا وريني كده الورق ده. كامل: اتفضل. بعد ساعه من متابعه الاوراق الخاصه عن زين. طارق: يعني إيه مفيش دخل ندخل عليه بيها؟ معندوش سغرة نمسكها عليه.

كامل: ماشي دوغري لدرجة إن مفيش عليه جنيه واحد ضرائب. أسعار الطرح والبيع والشراء اللي في العقود نفسها عند الضرائب يعني مش سايب غلطة. تحس إنه كان عارف إنه طالع للعالمية من أول ما بدأ. مفيش غلطة واحدة. طارق: كان نفسي موضوع طرح أسهم شركة جودة يفوت عليها يوم واحد من غير ما يكون اعلان الشركة بتبيع. أي كنت خربت بيته. كامل: مش واحد زي زين اللي يغلط الغلطة دي يا مستر طارق.

طارق: غلطة الشاطر بألف. والشركة دي أنا مش هسيبها لو حصل أي والله ليبيع هدومه. كامل: للعلم يا مستر طارق بعد متابعة أحوال زين المالية اكتشفت إنه بيلعب معانا بـ 200 مليون جنيه. أما عن المستقبل فـ زين معاه 400 مليون جنيه في البنوك محدش يعرف عنهم حاجة. طارق: 200 مليون! ابن الجاحد بيلعب وسطنا بميزانية مش مع أقوى رجل أعمال فينا.

كامل: وهو ده سبب تميز زين إنه بيلعب حرفياً في البورصة. بيرمي فلوس تبان للكل إنه لو خسر وقع. إنما هو حرفياً بيلعب وسطنا مش أكتر. تسالي يعني. طارق: طب والدولة تعرف إن عندها واحد معاه الفلوس دي كلها ولا الفلوس باسم حد تاني؟ كامل: مفيش جنيه باسم حد تاني غيره. يعني واضح للجميع. دا غير إني عايز أوريك حاجة تربط معاك الدنيا ببعض. طارق: وريني.

كامل: دي مجلة طرحت عدد كان غلافه الصورة اللي تحت دي. مستر زين و ريهام. وبعد ساعة العدد اتشال من السوق ونزل مكانه الاعتذار ده. وده يعرف حضرتك ليه مستر زين صمم على شركة أستاذة ريهام. طارق: الله! كمان حبيب. (وبيضحك) في جانب آخر في شركة زين. زين: جودة إنت مش ناوي تشوف شغلك ولا هتفضل قاعد كل يوم في خلقتي كده؟ جودة: أعمل إيه منا مش عارف. زين: إنت مش صاحب شركة؟ ما تروح تشوف شغلك يا بني آدم.

جودة: ياعم اقعد بلا صاحب شركة إنت مش بعتها. زين: يا متخلف. أنا بعت أسهم من الشركة مش ملكية الشركة. والموضوع انتهى. واللي دفع فلوس خد قصاد منها عقارات يتاجر فيها والكل طالع مبسوط. جودة: يعني إيه؟ يعني الشركة كاملة بتاعتنا؟ زين: لا طبعاً. جودة: أما إيه؟ زين: بتاعة ريهام. أنا بوقف شغل ريهام على رجله تاني وبعد كده كل حاجة ترجع ملكيتها لـ ريهام. باب المكتب بيخبط. أستاذ خالد: مستر زين العقد الجديد جاهز.

زين: تعالي اتفضل يا أستاذ خالد. أستاذ خالد: بطاقة جديدة مفيش عليها أي حساب قانوني باسم الأستاذ محمود سالم. (ومد ايده بالبطاقة لـ جودة) جودة: إيه ده؟ دي صورتي. هو إنت مزور بطاقتي ليه يا زين؟ زين: حط البطاقة في جيبك يا لوح. كمل يا أستاذ خالد. خالد: وده عقد نقل ملكية من أستاذ جودة لـ ريهام عبد الحافظ. زين: تمام. كمل.

خالد: وده عقد مضروب يثبت أحقية أستاذ محمود سالم لشركة ريهام حافظ. عقد مضروب بس علشان تثبت محتاج حاجة من الاتنين. زين: اللي هما؟ خالد: تلف لفة حلوة حوالين البلد علشان كل عنوان من بيانات مستر جودة متطرف في آخر البلد. زين: والحل التاني؟ خالد: يكون معاك الورقة اللي مع زين كامل. (وطلع ورقة يديها لـ زين) زين: برافو عليك يا أستاذ خالد. جودة: إنت بتعمل إيه؟ هي وصلت للتزوير؟ هنبيع سلاح إمتى؟ زين: بس يا لوح. باب المكتب اتفتح.

ياسمين: نيفين السكرتيرة بتاعت أستاذة ريهام فاكرها؟ زين: آه مالها؟ ياسمين: عايزة حضرتك ضروري. زين: خليها تدخل. ياسمين: تمام. خالد: بعد إذنك يا مستر زين. زين: اتفضل وتسلم إيدك يا أستاذ خالد. نيفين: أنا جايه أسمع منك حاجة واحدة. زين: اتفضل يا أستاذ خالد. اقعدي يا نيفين. نيفين: عايزك لوحدك. زين: منا لوحدي. نيفين: والاستاذ؟ زين: إنت لسه موجود يا بني آدم؟

هو أنا مش قولتلك إن صفيت كل تعاملاتي معاك ومن النهارده مش عايز أشوف وشك تاني. إنت إيه مش بتفهم؟ جودة: (بص حوليه) أنا يا زين؟ زين: لا. دا إنت معندكش دم بقا. من عيني يا ياسمين. ياسمين: تحت أمرك يا زين بيه. زين: طلعي الأمن ياخد الكلب ده بره. جودة: على إيه يا عم؟ أنا ماشي تمام أوي على كده يا زين. زين: في داهية. جودة: (خرج من المكتب مش فاهم حاجة ومش مصدق اللي حصل) زين: خير يا نيفين.

نيفين: إنت مش خدت شركة ريهام علشان ترد الشركة ليها تاني؟ زين: أيوه. يعني إيه المطلوب؟ نيفين: إنت طمعت في الشركة وخدتها لنفسك. زين: صاحب الشركة هو الحيوان اللي لسه خارج قصادك الوقتي. والمحاكم بيني وبينه علشان ضحك عليا وخد شركتي وجاي يساومني عليها. ياخد عشرة مليون مقابل الشركة وأنا والله ما هيطول مني جنيه. نيفين: آه. قولتلي. تمام. ماشي. ظلمتك. زين: بعد إذنك يا نيفين علشان أنا على أخري. مش عايز أقعد مع حد الوقتي.

نيفين: تمام. تمام. بعد إذنك. زين: اتفضلي. بعد خروج نيفين. زين: الو. جودة: نعم يا زين. عايز إيه تاني مني؟ زين: إنت فين يا لوح؟ جودة: في الطريق مروح. زين: بطل كدب. عربيتك واقفة قصادي تحت. جودة: لا ياعم. دي عربيتك. أنا مش عايز منك حاجة. زين: جدع يا حمار أمك. عملت الشكشوكه ياض. جودة: ياعم إنت مجنون؟ هو إنت كل شوية بحال؟ زين: انزل من العربية على أي جمب و استناني في الشارع. جاي آخدك نتغدا بره وهفهمك.

جودة: على جمب ياسطا. لما نشوف الجنان اللي إحنا فيه ده. زين: لسانك يا حيوان. وابعتلي لوكيشن. سلام. جودة: سلام. في جانب آخر كانت نيفين نزلت من مكتب زين على طارق. كامل: مستر طارق. نيفين عايزة تقابلك. طارق: خليها تدخل. نيفين: أنا معايا خبر يساوي 12 مليون جنيه. عشرة لـ جودة واتنين لـ حبيبة قلبك. طارق: مش فاهم. نيفين: أحكيلك. في جانب آخر. زين: اركب يا لوح. جودة: ركبت. وبعد إذنك كفاية ضحك. أنا مش صغير علشان تبهدلني كده.

زين: في حد يصبغ شعره أحمر يا لوح؟ جودة: (بيضحك) ياعم اسكت بقا. زين: نتغدا ومن هنا ورايح كل يوم تروح الشركة تقعد على مكتبك. فين البطاقة اللي خدتها من خالد؟ جودة: في البيت. زين: تروح تجيب البطاقة وتمشي بيها. وعايز كل الناس تعرف إني أنا وانت وقعنا في بعض وقعه كبيرة. وإنت ناصب عليا في شركتي. جودة: ليه كل ده؟ زين: علشان كمان ساعة هيكون طارق موجود على مكتبك يتفاوض معاك تسيب الشركة وتاخد العشرة مليون اللي طلبتهم من زين.

جودة: أنا طلبت منك عشرة مليون؟ زين: آه. جودة: خلاص ماشي ياعم. فهمت حوار يعني. زين: بالظبط كده. جودة: خلاص هقوله 11 مليون و آخد المليون جنيه حلالي. زين: ولو طلبت أكتر هيقولك موفق علشان يعلم على زين كامل في السوق. جودة: دا إنت مش إنسان يا جدع. زين: ياض أنا ناعم زي الشامبو بس مع الناس المحترمة. إنما عندي حتة شيطاني كده للي يلعب معايا. جودة: طب سؤال وجودي. زين: قول.

جودة: هيا نيفين اللي دخلت وعملت قصادها كده كان طارق باعتهالك؟ زين: طبعاً. جودة: وعرفت منين؟ زين: ياض أنا بشم الناس العرة. والبت دي من أول ما شفتها في مكتب ريهام وأنا عارف إنها تبيع أبوها لجل الجنيه. جودة: طب ما كنت طردتها. زين: علشان عبيط. جودة: ليه؟ زين: علشان دي اللي هتكلبش طارق على خلف خلاف. جودة: طب إنت جبتني هنا ليه؟ مش هنتغدا؟ زين: مفيش وقت. عايز أروح أجيب ريهام. اطلع على مكتبك. طارق زمانه جاي.

جودة: طب أكلمك أي وقت عادي؟ زين: أهم حاجة محدش يعرف إننا بنتكلم ومفيش بينا مشاكل. وصلت؟ جودة: وصلت ياعم. تمام. زين: سلام. جودة: سلام. بعد وصول زين إلى المصحة. زين: ياعم الكسلان. قوم. الساعة بقت تلاتة العصر. ريهام: صباح الخير يا زين. أنا زعلانة أوي. زين: خير يا قلب زين مالك؟ ريهام: مش لاقية زين من امبارح وأنا زعلانة. هو راح فين؟ زين: في العربية عندي. ريهام: بجد؟

زين: آه والله. وامسكي التليفون ده عليه رقمي. تكلميني منه أي وقت وأكلمك منه. ريهام: إزاي؟ زين: كده اهو. تدوسي هنا وبعدين هنا تلاقي زين بيقولك ألو. ريهام: وريني كده. زين: اتفضلي. ريهام: (بتتصل على زين) زين: الو. ريهام: الو. زين: إنتي فين يا رورو؟ ريهام: قدامك اهو. زين: لا بجد. ريهام: (بتضحك) زين: أنا النهارده فاضي. إيه رايك نروح الملاهي؟ ريهام: موافقة طبعاً.

زين: طب ياله قومي جهزي نفسك. بس المرادي بقا مش هنده أسماء. أنا عايزك تلبسي لوحدك. اتفقنا؟ ريهام: اتفقنا. في جانب آخر. أسماء: جودة. في واحد عايزك بره. جودة: هو علشان خطيبتي تقوليلي جودة من غير بيه من غير مستر جودة كده حاف؟ أسماء: بقولك إيه؟ أنا على أخري. أنجز. أدخله ولا يمشي؟ جودة: دخليه. دا إنتي بومة. أسماء: ماشي يا إبراهيم يا سعيد. جودة: الصبغة الحمراء دي مسمعاني الكلام أوي. باب المكتب اتفتح.

طارق: مساء الورد يا جودة بيه. جودة: أنا شوفتك قبل كده. طارق: حصل في المزاد لما كنت مع زين. جودة: إنت طارق. على صح؟ طارق: بالظبط.