رواية اسمي جميله الفصل العاشر 10 - بقلم حروف كاتب

هاااتشو. خرجت العطسة القوية من جميلة. ضحكت فاتن. فاتن: خدي يا جميلة اشربي ده. مسكت جميلة الكوباية وقالت: إيه ده؟ فاتن: ده مشروب مخصوص للبرد. جميلة: لا ريحته وحشة جدا. فاتن: جميلة ارجوكِ، انتي مبترضيش تاخدي الأدوية ولا بترضي تشربي حاجة، انتي كده صحتك هتدهور، ومتنسيش انتي لسه في فترة النقاهة. جميلة: دوا إيه؟ أنا عمري ما أخدت أدوية، أنا بيجيلي البرد يبهدلني وبعدين أقوم منه زي الحصان.

فاتن: حضرتك انتي كده بتخالفي قوانين الطبيعة. جميلة: نعم؟ ضحكت فاتن. جميلة: ماهر فين؟ فاتن: ماهر بيه مش شوفته بعد الفطار، بتهيألي هيبقى في المكتبة. جميلة: المكتبة؟ عندكوا هنا مكتبة؟ فاتن: طبعًا فيه. جميلة: طب أنا عايزة أروحه. فاتن: لا مينفعش، لازم ترتاحي الأول. جميلة: فاتن. فاتن: اشربيه ده الأول وبعدين نبقى نشوف الموضوع ده. خدت جميلة الكوباية. جميلة بخبث: أنا مش فاهمة انتي خايفة عليا كده ليه؟ انتي كنتي بتكرهيني زمان.

فاتن: ياه، انتي لسه فاكرة؟ جميلة: وأنسى ليه بقا. فاتن: أنا مكنتش بكرهك، كنت بس بضايق من تصرفاتك الهبلة، بس خلاص بقا، ميبقاش قلبك أسود. جميلة: ودلوقتي وقعتي في دباديبى مش كده؟ ضحكت فاتن. فاتن: أنا هنزل بقا عشان ورايا شغل. اشربيه كله هاه. جميلة: حاضر حاضر. *** في بيت ماجد. راح ماجد يفتح الباب وفجأة لقى سارة في وشه، منهارة من العياط. ماجد: سارة. من غير ما ترد، وقعت سارة بين إيديه. بعد ما فاقها ماجد. ماجد: انتي كويسة؟

سارة: أيوه. ماجد: مالك في إيه؟ رجعت سارة تعيط تاني. سارة: محمود طلقني. ماجد: إيه؟ سارة: طلقني يا ماجد ورماني في الشارع. ماجد: ومروحتيش عند بابا ليه؟ سارة: أنا مشيت من عنده بمزاجي، تفتكر هيوافق أرجع تاني؟ وزادت دموعها وعلي صوتها أكتر. ماجد: اهدي. سارة: خد مني كل حاجة، العربية والبيت وكل حاجة، بعد ما أقنعني أكتبهم باسمه. وعارف إيه كمان؟ يصلها ماجد باهتمام.

سارة: خطب بنت جديدة وذلني ورماني بشنطة هدومي. معنتش عارفة أعمل إيه. طبطب ماجد عليها. سارة بعصبية: متلمسنيش. وبعدت عنه وقالت بنفس العصبية: انت السبب في كل ده، لولا إني حاولت أساعدك عمري ما كنت همشي من البيت. أنا مش عارفة أعمل إيه، مش عارفة. ماجد: هتنحل يا سارة، هتنحل. سارة: انت كداب، هتحل إيه ولا إيه. ماجد: متقلقيش، أنا هتصرف. *** في القصر. فاقت جميلة. جميلة: أنا فين؟

وقامت من مكانها ودخلت خدت دش، وبعدين لبست فستان جميل. وسرحت شعرها. جميلة: يا ربي، حتى مهما عملت هفضل زي ما أنا. خرجت برا الأوضة. جميلة: ودلوقتي المكتبة دي فين؟ مي: جميلة. لفت جميلة وشها. جميلة: عمتو. مي: شايفة إنك اتحسنتي أوي. جميلة: الحمد لله. عمتو متعرفيش ماهر فين؟ مي: بتهيألي في المكتبة. تحبي تروحي له؟ جميلة: أيوه. وصلتها مي. مي: أنا هسيبك بقا. انبهرت جميلة. كانت مكتبة كبيرة وبابها مرصع زي الدهب. فتحت جميلة الباب.

وانبهرت برفوف الكتب. جميلة: واااااااو. ولقت ماهر قاعد على مكتب. جميلة: مااااااااهر. ماهر: جميلة، انتي هنا؟ جريت جميلة وقفت جمبه. جميلة: بتعمل إيه؟ ماهر: انتي إيه اللي قومك من السرير؟ جميلة: زهقت، بقالي أسبوع قاعدة فيه. ماهر: أيوه بس. جميلة: أنا كويسة، أنا صحتي أحسن منك لعلمك. ضحك ماهر. جميلة: انت بتعمل إيه؟ ماهر: بقرا. جميلة: بتقرا؟ ماهر: أيوه. شافت جميلة الكتاب.

جميلة: آه ده زي القايمة اللي أدهالك الجرسون في المطعم لما كنا في إنجلترا. ماهر: متجيبيش السيرة دي تاني يا جميلة، مش عايز أفتحها. جميلة: زي ما تحب يا حبيبي. وانصدمت ووشها احمر. ماهر: قولتي إيه؟ جميلة باحراج: مقولتش حاجة. ماهر: لا قولتي. جميلة: لا مقولتش. بقولك إيه، ما تعلمني. ماهر: انتي بتهربي بقا. سكتت جميلة من الكسوف. ضحك ماهر وقال: اقعدي اقعدي. قعدت جميلة. جميلة: انت بتعرف تقراها؟

ماهر: أيوه، دي زي القراية بالعين، بس الفرق بتقرا بصوابعك. انتي بتعرفي تقري مش كده؟ جميلة: طبعًا بعرف، انت فاكرني جهلة؟ ماهر ضحك. جميلة: أنا هروح أجيب كتاب من فوق. ماهر: بس خدي بالك. جميلة: حاضر. وقفت جميلة على الكرسي وبدأت تفتش في الرفوف. جميلة: يا ربي، كله إنجليزي كده. وفجأة لفت نظرها كتاب بني شكله قديم. جميله: أيوه، أنا عايزة ده. ومدت إيديها تجيبه وفجأة اختل توازنها ووقعت على الأرض. جميلة: آي آي آي.

قام ماهر من مكانه. ماهر: جميلة، انتي كويسة؟ جميلة: أيوه، متقلقش. وشافت الكتاب اللي وقع جمبها. كان مكتوب عليه "ألبوم". جميلة: ألبوم؟ خدت الكتاب وفتحته. واتفاجأت بأول صورة. كانت صورة عيلة ماهر كلها، أمه وأبوه وهو وطفل صغير. جميلة: الصورة دي هي هي اللي في الصالة. وقلبت صورة كمان. لقت صورة لماهر مع طفل صغير عمره تقريبًا 3 أو 4 سنين. جميلة: يوغتيي. وقلبت الصورة وقرت اللي في ضهرها. "ماهر وزياد". جميلة: زياد مين؟

زياد ده وراح فين؟ وكملت تقليب، كانت صور عائلية كتير. وفجأة. شافت صورة. كانت لماهر باصص للارض بحزن من غير أي حد من أفراد عيلته. جميلة: ماله ماهر هنا. وقلبت لقت ماهر بس مع جده. وبعدين مع عمته. جميلة: هو ليه متصور معاهم من غير عيلته؟ "ماهر قتل عيلته". نفس الصوت اتكرر في ذاكرتها وافتكرت كلام فاتن. "الكلام عن اللي حصل لعيلة ماهر وليه مجرد الكلام جريمة". جميلة: معقولة. وخلصت الصور. آخر صورة كانت لماهر وهو كبير لوحده.

بنفس البصة الحزينة. جميلة؟ فاقت جميلة على صوت ماهر. ماهر: انتي لسه هنا. جميلة بصوت خايف: آه، أنا هنا. ماهر: طب إيه مش يلا نمشي، بتهيألي معاد الغدا قرب. جميلة: آه طبعًا طبعًا. حطت جميلة الألبوم في مكانه. وراحت تسند ماهر وفي دماغها ألف سؤال وسؤال. *** قامت سارة من السرير. كانت عيونها متورمة من العياط وحالتها حزينة جدًا. سارة: ماجد. اتاكدت إنه مش هنا وراحت عند المطبخ. وطلعت السكينة.

سارة: باي باي يا ماجد يا بابا يا عيلة النمر. باي باي يا دنيا. ومسكت السكينة ووجهتها ناحية قلبها. مباشرة!!! *** في قاعة الطعام. قعدت جميلة وماهر. ماهر: جميلة مفيش حد معانا مش كده؟ جميلة: لا، عمي وعمتو مي مشيوا من بدري. ماهر: تمام. اصلي عاملك مفاجأة. جميلة بدهشة: مفاجأة؟ وفجأة ارتفع صوت أطفال كتير. وانفتح باب قاعة الطعام. ودخل 3 أطفال وهما بيصرخوا: جميييلة. جميلة بفرحة: معقولة. كان الأطفال

التلاتة إخوات جميلة: ندى وفاطمة وسالم. بعد أحضان كتير قالت جميلة بدهشة: انتوا جيتوا إزاي؟ ماهر: أنا اللي جبتهم. بصتله جميلة بدهشة. كمل ماهر: لما عرفت إنهم وحشوكى قولت أجيبهم يقعدوا معاكي شوية. طلبت من مامتك تيجي لكن قالت مش هتعرف تيجي. جميلة: أشكرك إزاي مش عارفة. ندى: فاطمة، سالم هو ده الأمير بتاع أختي. الاتنين في دهشة: الأمير. وجريو عليه حضنوه. ماهر بضحك: براحة شوية هتموتوه. هتموتوا الأمير بتاعي، يخربيتكوا. ***

في أوضة جميلة. كانت جميلة بتحكي لإخواتها حكاية. بعد ما خلصوا. سالم: جميلة عايزين نستحمى. فاطمة: أيوه يا جميلة عايزين. جميلة: طيب يلا هحميكوا كلكوا. سالم: عايزين نستحمى كلنا سوا زي زمان. احمر وش جميلة. ماهر: كنتوا بتعملوا إيه؟ جميلة باحراج: دول بيخرفوا. فاطمة: والأمير كمان يستحمى معانا. جميلة: أبييييييييييييييه. ضحك ماهر. جميلة: متضحكش يا أكبر المنحرفين. قوم يلا منك ليها، روحوا ناموا في أوضتكم. ندى: هنام معاكي.

جميلة: مينفعش. ندى: ليه؟ جميلة: عشان مش هينفع. ماهر: وماله، ننام كلنا سوا. جميلة بفرحة: انت بتتكلم جد؟ ماهر: أيوه بتكلم جد. جميلة واخواتها في صوت واحد: هيييييه. ضحك ماهر. *** رجعت مي وبسيوني بعد سفر يوم كامل. دخلت مي الصالة ولقيت المنظر التالي. كل الفرش واقع على الأرض. اللوح المتعلقة مرمية. إخوات جميلة التوأم بيتخانقوا. ندى الكبيرة مبعثرة ورق ملون في كل مكان. مي: إيه اللي حصل هنا؟ فاتن: مدام مي دول إخوات جميلة.

مي: ده بركان ضرب البيت ولا إيه؟ عجز بسيوني عن النطق بعد المنظر اللي شافه. 😂😂😂😂 نزلت جميلة بسرعة وشافت الكارثة. جميلة: يلهوي. أنا آسفة أوي يا عمتو يا عمي. وصرخت واتحولت فجأة: تعالوا هنا كلكوا. جمع التلاتة وانضربوا تلات أقلام معتبرة. جميلة: نضفوا الكوارث دي سامعين. هز التلاتة راسهم ووسط ذهول الكل رجعت الصالة زي ما كانت. جميلة: شاطرين يا حلوين. ضحكت مي وقالت: انتي إيه، إزاي قدرتي تسيطري عليهم كده؟

جميلة بثقة: حضرتك أنا كتالوج في التعامل مع الأطفال. مي بضحك: ماهو واضح. بس إخواتك جم منين؟ جميلة بخجل: ماهر طلب إنهم يجوا امبارح. لو عاملين إزعاج أنا ممكن أمشيهم. مي: لا لا بالعكس، دول رجعوا للبيت جو البهجة تاني. يظهر إن كلكوا كده. جميلة: كلنا إيه؟ مي: أول ما الواحد يشوفكوا يفرح. سبحان الله. ضحكت جميلة بخجل. *** وقفت جميلة في الجنينة وقالت: ياه، أخيرًا حبة هدوء. وفجأة جه حد من وراها وحط إيده على عينيها.

جميلة: ماهر مش كده؟ جالها صوت خشن بيقول: للأسف لأ. ارتعبت جميلة وبصت وراها بسرعة. لدرجة إنها وقعت على الأرض. جميلة برعب: انت مين؟ ضحك الراجل بصوت عالي أوي. ومدلها إيده وقال: أنا بخوف أوي كده؟ هاتي إيدك أساعدك. قامت جميلة لوحدها وقالت: انت مجاوبتنيش. قالها الراجل بثقة: أنا ماجد عم ماهر، مش فاكراني يا جميلة. انصدمت جميلة وقالت: انت كداب، أنا شفت ماجد عم ماهر في الفرح ومكنش شبهك. ماجد: أيوه، لأني كنت متنكر.

جميلة بضيق: طيب فرصة سعيدة، عن إذنك. ومشت بسرعة. بصلها ماجد بصة خبيثة. *** في الصالة. قعدت الأسرة كلها. جميلة حوالين إخواتها. بسيوني بيشرب قهوته. ماهر بيقرا حاجة. ومي بتغزل حاجة. وفجأة دخل ماجد. ماجد: يا سلام على المنظر، لمة عائلية. وللأسف ناقصاني. اتصدم الكل ووقع بسيوني قهوته وقام من مكانه وقال بغضب: ماجد. ماجد: ليك وحشة كبيرة. وكمل بخبث: يا بابا.