رواية اصوات الحب الفصل الثالث 3 - بقلم فاتن جمال

فرح بابتسامه: اي رايك يا هنومه في اكلي. هنيه بتوتر: حلو جوي. فاطمه خدت بالها من الكلمة: جوي؟ انتي بتعرفي صعيدي. هنيه بتوتر: لا بس صحبتي من قنا ودائما كانت بتتكلم صعيدي وانا اتعلمت منها كام كلمه كدا. فرح براحه: اه طيب ياله كملي اكل. فاطمه بسخرية: قوليلى يا فرح. فرح كانت لسه هتاكل: خير يا حبيبتي. فاطمه بسخرية: هي الشربة دي المرة دي دلعة شوية يعني قصدي كل مرة بيكون عليها كيلو سكر المرة دي عليها يجي نص كيلو بس.

فرح بصدمه: تاني، بقولك اي انا زهقت معنتش هعمل شربة تاني. وبعدين بصت على هنيه اللي كانت بتاكل عادي. فاطمه: بصي دي بتاكل عادي. فاطمه: هنيه هو الاكل حلو. هنيه بتلقائية: اه مسكر مش عارفه لي، بس أكيد دي أكله جديدة صح. بصراحة مقدرتش انا وفاطمه نمسك نفسنا من الضحك لحد ما هي كمان فضلت تضحك علينا.

بعد ما خلصنا اكل عرفتها اوضتها وفاطمه دخلت اوضتها وانا دخلت اوضتي بما أن الشقة تلات أوض علشان دايما مريم بنت الحاج جمال كانت بتحب تبات معانا علشان ملهاش إخوات غير معتز ولما والدتها الحاجه وفية سافرت تعمل عمره فضلت قاعدة معانا ودلوقتي الأوضة بقت بتاعة هنيه. خبطت على باب اوضتها علشان أقولها على مواعيد الشغل. هنيه: مين. فرح بهدوء: أنا فرح.

هنيه بابتسامه قامت فتحت الباب واتفجئت من البيجامة اللي لابساها دي زي اللي نفسي فيها حرير طبيعي بصراحة رجعت في نظرتي وافتكرت أنها قالت إن دي تقليد. فرح: معلش صحيتك. هنيه بابتسامه: ابدا تعالي انا كنت برتب هدومي. دخلت وبدأت أرتب معاها. هنيه بابتسامه: فرح ممكن تقبلي مني البيجامة دي انا بصراحة لسه جايباها من المعرض اللي كنت شغاله فيه بس لقيت المقاس صغير عليا وانا بصراحة اعتبرتك انتي وفاطمه أخواتي.

فرح بابتسامه: حبيبتي شكرا ليكي بس مش هقدر آخدها منك واوعي تفكري إننا عايزين منك حاجة، احنا كنا زيك لما جينا القاهرة. هنيه باستغراب: انتوا مش من هنا أصلا. فرح بهدوء: بصي انا بجد ارتحت ليكي علشان كده هقولك على حاجة محدش يعرفها غير الحاج جمال ومعتز ومريم أخته والحاجه وفيه وفاطمه أختي. هنيه فضلت مركزة في كلامي. فرح: بصراحة اسمي شهد وأنا وفاطمه لينا أهل بس احنا هربنا منهم علشان كانوا عايزين يموتوا أنا وفاطمه.

هنيه فضلت مركزة في كلامي وهي مش عارفة لي خايفة من باقي كلامي. فرح بهدوء: هنيه انتي كويسة. هنيه بتوتر: اه كويسة كملي كلامك. فرح بتنهيدة: إحنا من الصعيد من عيلة كبيرة أوي اسمها آل الشيخ تسمعي عنها. هنيه فجأة وقفت قصادي. وأنا استغربت وقمت. فرح: في إيه مالك. هنيه بصدمه: ها.. لا مفيش بس فكرة صحبتي اللي قولتلك إني اتعلمت منها كام كلمة تقريبا قالت اسم العائلة دي قدامي المهم هربتوا لي.

فرح بحزن: أنا وفاطمه توأم ملناش إخوات تاني بس لينا ولاد عم مش فاكرة منهم غير مالك وأخته هنيه على نفس اسمك أنا وهي وفاطمه قد بعض ومالك أكبر منا تقريبا بخمس سنين وفي يوم لقينا جدي أبو أمي بيقولنا إن عمي ماهر اتقتل وإن مالك راجع يقتلنا أنا وفاطمه علشان فاكر إننا اللي قتلنا وجدي ركبنا القطر وجينا على مصر نمنا في الشوارع كتير ونسينا أهالينا ولما عرفنا الحاج جمال وقف معانا وراح لما بقيت في ثانوي يشوف اللي حصل زمان في الصعيد اتنسى ولا لسه بس رجع من هناك وهو بيأكد على فاطمه إن ابن عمنا مستني رجعنا علشان ياخد تار أبوه، أنا مش عارفة قولتلك لي بس حاسة إنك شبه هنيه أنا مش فاكرة شكلها أوي بس هي كانت شبهك كده كنت بحبها أوي ودائما أقولها ياختي.

هنيه دموعها نزلت وهي مبسوطة إن ظنها طلع صح وطلعوا ملهمش ذنب في موت أبوها وقربت حضنت فرح. فرح باستغراب: هنيه انتي كويسة. هنيه بابتسامه: بقيت كويسة أوي دلوقتي أنا بحبك أوي يا فرح. فرح بابتسامه: وأنا كمان بحبك علشان انتي شبه هنومه. هنيه وهي بتكلم نفسها: لازم أكلم مالك وأعرفه كل حاجة.