تحميل رواية «اسرار قدس» PDF

تصيح الحاجة ومنجدتنا على أبو راح يكضبون ريسان.

بداخلي فرحت، بلكي الله يكضبوه ويجتلوه مثل ما الأمريكان جتلوا أخوي مروان.

الهوسة برا.

أدحك عليهم، فد واني واكفة شو جعت.

دخلت والهوسة عالكة برا، ناس تصيح، ناس تلطم، ناس تبجي.

أني فتحت الجدر، خذيت من مركة التبسي بماعون وجريت كرصة خبز وكعدت بالكاع وأقمس.

"يولي صدك تحجين؟ ريسان شرد من الشرطة وانت جاية تعلفين."

"عجل يابه جعت شسوي."

"أبرد ما بقلبج يولي، أحَر ما بقلوبنا، ضاربة الدنيا بعرض الحايط وكاعدة تغمسين بالتبسي."

ما رديت عليها، استمريت آكل وأدحك من الباب تا المحهم وأسمع شيصير وياهم.

"هسه لو عدنا ثلاجة ونضمه هذا التبسي ياهو البيه حيل يطبخ باجر؟"

"حنكة صدك، لحم الضمته الحجية وينو؟"

"ضمته عد الجيران يم صاحبتها أم رسول، نودي يمها."

"ياريت خاطر باجر ما نطبخ."

"والله تعبنا، كبل أميرة وعواطف شايلات من الشغل، هسه بس أني وياج منلحك لشي. زين أميرة ليمتى تضل حزنانة على ابنها واحنا نخدم؟"

"شمدريني، شو أني ما انكسر كلبي عليها من مات ابنها."

"يولي شينكسر؟ هي التخاف على ابنها تهده وتروح، وشفتيها حطتني كمش ياهو الجاي تكله أمنته يم عفاف وصعدت وهي عافته الجلبه، انت شردتي واني حايرة بروحي وجهالي والجيلات رشك فوكنا وتريدني أحتار بأزرها."

"أني أحس كلبي صاير أسود."

"لا جاي أنقهر على سراب، لا على أميرة، لا على ريسان."

"كلهم يمثلون يولي، ياهو الينقهر على الثاني، كلمن يصيح يا روحي، بس كدام الناس عو شوفوني واني وياج صايرني سبيل، انتهينا من الشغل والله. أروح أفرش الجهالي أخير لي، خلصي الأكل وشوفي لج واحد يضم الأكل عد أم رسول."

مشت وخلتني.

دخلت أميرة منكبة ولابسة أسود وتمشي محني ظهرها وتحجي مبحوح صوتها: "ييمه استرنا ييمه."

دحكت بيه جاي آكل، حجت بصوت محبوح: "جاي تاكلين واحنا هاذ حالنا، ما عدج مستحى؟ ما تشعرين شحالج وانت تاكلين والدنيا مكلوبة؟"

"ما تعشيت التهيت بالناس."

"كليتي سم وزغنبوت، كون ابني جوا التراب وانتن لا بعينجن ولا بحاجبجن متشفيات بيه، كل وحدة منجن تصيح حوبتي."

"فد أني ما حجيت ولا عيرت أحد."

"الله يشوفجن الشفته بجاه كلمن عده جاه، حتى تعرفن بالجاي أمر بيه شنهو، ابني جوا التراب وانت تعلفين، ياخذجن الله ولا يراويني وجوهجن."

دحكت عليها الناس تصيح برا وهي جاية تتكاون وياي كون آكل. حجيت واني أقمس: "ما طول بيج حيل تكاونين، عجل يرجع الشقل مالنا على ٣ وانت عليج البيت باجر تنظفي."

شو حجيت وهاي فزت علي: "انتن ما تحسن بيه، الله لا يوفقجن، انهد حيلي على ابني وانتن تتشمتن بيه وتريدني أشتغل، حيلي راح على ابني ومحد بيجن توكف وياي، كلاص ماي ما تطني وتريدني أشتغل فوك مصيبتي."

هرجتنا هرجة.

جو من كرابتهم على حسها يصيحون شكو.

وهي كامت تولول وتشكي حالها وتشكي علينا وتصيح: "ضرايري يدكن على صوابي، ابني تحت التراب وتكف بعيني تكلي نظفي، تعبنا منج."

فازت عفاف تريد ماي لجهالها، سمعتها تشكي. وكفت بعينها: "وشني ابنك تحت التراب؟ نكعد نخدمج احنا هم؟ لا بيها ولا عليها، تفشخت روسنا واعظامنا تكسرت من طكت المكوار وحيلنا بايد من المصايب التكع فوكنا وهالتشوفينا ليل نهار نفر جنه مصرع. كافي خلص عزا ابنج كومي ويانا نضل نخدم بيج ونحط الأكل جدامج على يا مال."

كامت تتحاجى وياها وحدة من كرابتها وتكللها: "حرام، عجل حت لو ضرتج كدري حزنها وكسرتها أعلة ابنها، الشغل ما يموت أحد، عيب توكفين وياها على شغل وهي بهالحال، كولن يا الله شلون الله يرحمنا واحنا ما نرحم أحد."

قدس: "عجل من ماتت عواطف عليش ما حزنت؟ شو احنا جنه نبجي وهي تقني الجو بديع وتضحك علينا وتكفخ فوك راس سراب ونور تريدهن يكضن شقلها. من تسوي هي مو حرام واحنا من نشيل عنها ٣ أيام ونريدها تكوم تعاونه نطلع ما عدنا رحم."

جاي أحجي دحكت خطاب يمد أيده بالبرميل ياخذ ماي موجود.

ردت عفاف: "الله ما يطك بحجار."

ومشت تترس ماي.

وأميرة تنوح وتكلهن: "جذابات وبخت الله، عواطف حسبة أختي بجيت عليها ليما خويت، أني ما أبجي عليها، أني بس ضيم كلبي ومصيبتي على ابني."

وحطت ربطتها على وجها وكامت تهز أكتفها من البجي.

حجت المرة: "والله بعد ما أدري شو انتن واحد ماكل الثاني، ما ينعرف صدكجن من جذبجن."

أجت مرت أخو أميرة خذتها للهول ومشن كلهن كعدن.

أني بعدني أقمس. أجا خطاب كمبص وجر الخبزة مني وحجه: "يولي هم صايرة أسطة بسوالف الصراير وشادة حيلج تتكاونين."

"عجل شني متنا والله؟ راسي مفشوخ، رجلي أعرج عليها مورمة، جسمي مزورق من أبو وهب ومكيار الهدن علينا. تعبت وأميرة."

أحجي وأشر بيدي وهو يقمس بالماعون يتبسم.

دحكت بيه. دفعته: "انت شعدك يمي؟ لا يشوفك أحد، كوم."

رجع ليورا من الدفعة وكضب بالرف: "هاي دفعتيني."

"سراب منيشنتك بناظور، هسه تشوفك كاعد وتروح تفتن للحاجة."

"ليش سراب شعدها وياي؟"

"انت اعرف."

كمت منه وهو ضل كاعد ياكل، ردت أشيل الگدر اندرتله: "أصبلك بعد؟"

"اي والله. ما بيها لحم."

"هي أمك تخلي لحم ضامتو بثلاجة بيت أم رسول."

"المن ضامته؟"

"عجل ماتلنا بعد واحد هم نروح نشتري لحم قير كون متحضرين."

اندار يضحك: "يولي انت هم صايرة تصنفين."

"من ضيم أمك كطعت كلوبنا، والله كبل جنت يومية أروح للمراح ألكي الدجاج مبيض، وإذا ما مبيضة أكضبها أعصرها، حيلي تذبلي البيضة بحضني وأتريك ٤ بيضات وحدي، شو جيت هين الشعب العراقي كلو أبيضتين، ولو تكرمت أمك تطينا الثالثة."

ضحك: "من تشتهين شي بس كليلي، أشوي كلبي وأحطه كبالج."

تبسمت: "خطاب لا تحاجيني هيج."

سكت. تنهدت وشلت الجدر.

شكثر جنت مهدودة وأكاون على الشقل وشايلة همه، زعم تعبت، فد بكلمتين أحس روحي صرت خفيفة وكلبي علك.

طلعت واني شايلة الجدر وأمشي ما منتبهة للهوسة.

صاحت الحاجة: "وين مولية بالگدر يولي؟"

"يا گدر؟"

"ول صكعة التصكعج يولي.. هذا البيدج شنهوو؟"

"گدر."

"أنومه براسج وأفتك منج، هرجتنا هرجة وانت حايرة بالگدر."

"عفاف كالت خل نضمه ببيت أم رسول باجر نحمي ع القدا."

"شو جيبي."

جرت الجدر وهي تولول وأدحك بالمركة وتميلها منا وتردها منا.. خاف بيها لحماية. اندارتلي: "أمشي أنا أضمها."

عفتها ورديت لكيت سراب واكفة وخطاب جاي يكرم من الأكل. دنجت شلت الماعون، مصته ووشلته ومشيت لقرفتي، لكيت سراب ونور فارشات بيها وفد نور متمددة.

ما حجيت. تمددت أرتاح.

شوية واجت سراب: "عمتي تريدج."

"شتريد بعد؟ أريد أنام، تعبت."

"مدري، روحي شوفيها."

"باجر أشوفها عود."

"تريدج أكلج."

"ما بيه حيل، جسمي يوجعني، العده شي يجي يسعلني، ما أني الأروح."

اندرت لفيت راسي وجاي أنام، فاتت الحاجة دنجت عليه وشلعتلها ذرة من زندي، فزيت بسرعة: "اااااااي."

"ووجعاي كون وجعاي، من أصيحج عليش ما تجين؟"

"شني؟ والله تعبت من الفجر أشقل، كاااافي."

"أصفكج على وجهج وأعميج."

اندارت على نور كالتلها: "روحي غاد."

كعدت من فراشي تعدلت ونور طلعت.

أدحك الها بتوتر. اندارت: "صدك، أمس سراب كضبتج ويا خطاب خاتلة وياه بكفا الباب."

"لا، فد راد يسألني ليش أبجي."

"وشكتيله؟"

"كتله من المصايب الجاي تكع."

"ما حجيتيله على المصيبة البطنج؟"

دنجت: "لا."

"لو سمعت عده خبر، وابخت الله لا آكل اريسان واخليه ينحر ركبتج. ولو شفتج صافه ويا خطاب، هذا الله كاتبه عليج."

"ماشي."

"احسبي حسابج، نكف هالهوسة ونشوف صرفة للي ابطنج، يكع ويموت، ما يضل هالجاهل، ما يجي للدنيا، لو على كص ركبتي ما يصير. لا ابالج تخلي وتعلكي براس ريسان وتشبجين لحية بلحية من ورا الدود مالج من نمتي تحت رجال مو رجالج، يالنكسة."

سكتت وهي دفعتني وكامت.

كل ما أتعب وأحاول أبعد روحي من التفكير باللي ابطني والهي بمصايب قيري، تذكرني بمصيبتي المالها حل.

بعدني صافنة، رجعت سراب تتمدد بفراشها.

حجيت: "قرفة أمجن مو فارغة، وحت قرفة الحجية عليش مجابلتني؟"

"وانا نايمة بغرفته الخلفج، غرفة أبوي وحتى جانت غرفتنا."

"أكلج انت شبيج وياي؟ شكلب حالج؟ ترا تريدين خطاب ما كاضبته أني ولا مانعتج."

تروحين تفتنين يم الحجية. شتريدين مني؟

والله مثل ما كتلتن امي فلا اخليجن ترتاحن.

واني ياهو مالتي بجتلة امج جاي تفريها علي؟ ذيج اميرة وروحي ذبي حيلج عليها ترا البية كافيني.

كلجن نسوان ابوي والله فلا اخلي وحدة منجن.

اي خوش عجل اطلعي من قرفتي خل انام.

انام وين ما يعجبني افتهمتي. ما عاجبج انت انكلعي.

لا والله ما انكلع. الحاجة حاطتجن هين خاطر تراقبني. اني عرف.

اي تعرفين روحج مو خوش.

ضليت ادحك عليه.

ما بيه حيل اتكاون وياها وامها توها ميتة حاكدة علينا كنه.

جريت الجرجف وتقطيت انام. ذبيت روحي مثل الميتة من التعب.

بالليل هم مناطرين شنهو اليصير. ريسان وخايفين لا تكضبوا الشرطة. شو ما يحسون ب١ باليل الا وريسان داش عليهم.

تلكته عفاف والحاجة واميرة كاعدة.

كاللهم: رحت تعشيت يم زلمة صاحبي وكلت لليل اجي لهين ما عليه.

من متطمنين عليه والكل موجود سعل عني. كالوله (نايمة).

اجا لقرفتي فتح الباب. سراب بعدها كاعدة. فد اني ونور بسابع حلم. من لاكي البنات يمي. ساد الباب ورايح لقرفة عفاف نايم.

ثاني يوم من قبشة كعدت. جاي اخبز. هو كعد وكض على راسي: شجاي تسوين؟

انت اجيت شو ما ادري.

امس بالليل اجيت ولكيتج نايمة انت والبنات. كومي صبيلي الماي خل اغسل.

كام ليف روحه واني اصبله الماي.

كمل كال: بسرعة سويلي ريوك خل اطلع كبل لا يطلع الصبح.

طكيتله بيضتين ورحت جبتله الخبز الضال من امس. كلاه وراد يطلع كال: اني رايح للاردن اسبوعين شهر وارد كلي لحاجة وبلغيها.

خوش.

طلع. اجت اميرة كوة تفتح عيونها مورمة: وين راح ريسان؟

يكول للاردن ما اجي اسبوعين شهر.

عجل والزلمة الجتلو امس؟

ما ادري عنه.

هم هو يشرد واحنا النكع بيها.

مدري.

اني اروح لاهلي لا الي غرض بيكم ولا بهوستكم. عسى ناركم تاكل حطبكم.

عافتني ومشت واني ذبيت البتيتة ع النار تنسلك وطلعت اقسل الكراج. دحكت قرفة خطاب ما هو. مدري يمتى طالع لشقله. خلصت ورجعت شنكت العجين وطلعت اخبز. اجت الحاجة ادحك على خبزي وتكلب بيه: ريسان كعد.

كال طالع للاردن عده شقل يرد بعد شهر يمكن اسبوعين.

عجل وخطارنا الرايح والجاي ياهو اليكف فاتحة ابنه ما وكف بيها لا فاتحة مرته كلها على خطاب. شنهي ابتلى خو ما ابتلى.

ما ادري.

بس زين ما طوله ما موجود نخلص شغلتج ونفتك من البطنج خاطر لا يسال ولا يدري بشي.

جاي تحجي وياي وما تحس الا صياح سراب بكل حيلها.

هدت من ايدها وركضت. اني صليت اخبز. كمت حتى مت تصير هوسة وصياح ما افز. اكول ياهو مالتي اهم شي ابعد روحي. هم كوناتهم ما تفض. واحد ياكل باللاخ.

خلصت الخبز ودخلته بالهول.

لكيت سراب جاتلها وهب داكها دك.

رحت للمطبخ سالت عفاف كالت: يولي ذوله ما تخلص مشاكلهم. سراب غالطة على اميرة وهي جاي تغسل واميرة راحت ندهتلها وهب كام كتلها خل نكضي شغلنا.

صبينا الريوك وسراب تبجي وتشكي للحاجة.

والحاجة ساكتة من الاثنين. عن اميرة وعن سراب. وفد تحجي على وهب تكله: سوالف النسوان لا تحط روحك بيها. حاجيني وانا احل امرهن.

ووهب يرادد ويصيح بالبيت.

بعدنا بهالهوسة اجو ناس كرابتهم يعزون.

ما لحكنا حتى نتريك. سوينا لفات للجهال. ونحن ع الواكف.

هوسة وناس بعدها تجي.

وعمهم الجبير اجا يستفسر عن ابو وهب. لان اهل عواطف مجتول منهم واحد ومتصوبين اثنين ورايدين يهدون والناس موكفتهم. من كون طالت وماتوا هواي. راد فد ابو وهب خاطر يكعدون ويفصلون بس ابو وهب ما هو. احتاروا شلون يحلون الموضوع.

اخيرها عمهم شال ايده وبلغ الحاجة كاللها: انا راح اكتب وثيقة بابو وهب. عجل نحن النكع بيها ونفصل وهو ما يدري عن هوى داره. لا وكف بعزى ابنه لا بثاره. بس احنا نجاتل. شنهي ما رايدين ولدنا؟

كتلهم ثاركم تاخذوا من ابو وهب. واحنا عمامه وعشيرته متنازلين بدمه. بس ما نرضى تهدون على البيت. عجل بس حريم وجهال وولده زغار ما يتفاصلون. وخطاب زلمة غريب مو من عشيرته. يصير ابن اخته. وحتى تبرى من خاله وكال اني ما اشيل اثم خالي. حكم من ريسان تاخذوا.

هدت الثارت وبعد محد جا ودك بابنا.

وحت الخطار خف باليوم. كام لو واحد يدك الباب لو ما يجي احد. رجعنا لايامنا العادية.

نحن الضراير حياتنا شقل وكوان ونوم.

وخطاب ياخذه الفجر ويرده العصر.

سراب ونور هن واميرة ضراير اكثر من عدنا. اني وعفاف مرات مالن خلك كوان ونتعدى الحجي ويا اميرة. فد سراب شايلة علينا كلنا واميرة حاقدة جيف ابنها ميت.

الحاجة رادت تفك من اميرة وكوانها ويا سراب.

حجت ويا خطاب وكالتله: عدي سالفة وياك.

عد ما حجت اني جنت بالمطبخ اسمعها. كال الها: خير؟

سالفة تفيدك.

والله يايمة اشك تجيني فايدة منج.

عدوتك انا يول.

والله لو عدوتي ما تسوين سواياج وياي.

وشنهي سوايتي؟

هسه عوفي هاي واحجيلي شنهو الرايدته.

ليمى تضل هيج؟

شلون هيج؟

مفرد وكارص بغرفتك.

وشنهو الاسوي عكب سوايتكم وياي؟

انا رايدتلك الخير.

وشنهو الرايدته؟

رايدة ازوجك.

ما رايد اتزوج.

والغرفة البنيتها فوك؟

ما عاد لي نفس بيها.

ليش مالك؟ بت خالك حلوة وما ناكصها شي وتحبك.

بت خالي ياهي؟

سراب.

سراب تحبني؟

اي تحبك.

يمتى حبتني ذاك اليوم تحب اخوي.

هذا حجي مو تمام. البت رايدتك وراضية بيك.

دحجي يمه هالجلمة حجيتيها مرت اللخ لا تسمعيها الي.

عجل...

اسمعي اسمعي... انا ما راح اتزوج غير قدس.

من حجه هالكلمة نفض كلبي.

سكتت هي شوية وردت حجت: يول انت مجنون لو رايد تجنني.

اعتبريني الاثنين. مو انا الاغم الينوخذ حكه ويسكت.

وشنهو الرايدة تاخذ مرت خالك؟

ما راح تضل بذمته.

خطاب يمه جوز من حجيك هاذ ولا توجع كلبي.

انا جايز من الحجي. بس انت الردتي تحجيني وياي وعرفتي جوابي.

تهد بت خالك الرايدتك لجل وحدة بت شارع.

بت خالي جانت تحب اخوي. لا تضنين بيوم احطها على بالي. السكنت كلب اخوي ما تسكني. حت لو هي نست انا ما انسى.

تصوري يرد ويلكاني ماخذ الجان يحبها؟

اخيك ما يرد.

اذا انت ام وايس كلبج منه. انا كلبي ما يايس من ردة اخوي. ما طوله بيه روح.

لا تحط اخوك حجة لهالفاينة. جاي تكولها.

هاي مو فاينة يمة. بت عاشكها وجمعت الفلس فوك الفلس خاطر اكون روحي واشتريها لروحي. ويجي خالي على غفلة ياخذها مني ويحطها كبالي وما يريدني اكطفها.

تكطفها شنهي المرة مرت خالك.

ولو ضل خالي.

رايد تموت خالك.

اوعدج ما ادمر ايدي بدمه.

شنهو الناويله يخطاب؟

السوالف التظل بكلبك تتنفذ. فخلي الناويله بگلبي.

الحاجة انجت من سمعت حجيه ونيته.

كامت ادك على راسه. ضنت خطاب جاز مني. فد عرفت هو ما جايز. كامت تلوب.

عافها وكام. وهي اجتني ترعد: اليوم تنزلين البطنج.

وشلون انزله؟

تجتلينه. تجتلين روحج. البطنج ينزل اليوم. ولو ما نزل يول اهد البيت فوكج. ادفنج وانت حية. احركج حركة. عواطف واوج بيج النار. يولي ما اخليج. ما اخليج.

ولي يمصكوعة. شلاعبة براسه.

شحاجية وخليتي يردلج؟

ما حاجيتو بشي.

ندستني حيل وكرصتني: يولي لا ما خليتج بندامه اعلى امرج. ما اطلع ام خطاب ولا ناكلته ابطني. يولي لاعبة بعكل ابني. وانت اعلى ذمة اخوي. ول ما خفتي ربج. ما استحيتي على دمج. ما عرفتي التربية. ما تعلمتي الحرام.

اني ما حجيتلو شي. ولا حاجيته. هو الحجه وياي.

حضري روحج باجر نروح للجدة. ولو شردتي لو ما رضيتي تروحين الا اكصبج.

فد تسويلي بنج.

تسوي كوا*** يم الزلم.

عافتني ومشت.

واليوم كله تتحسبلي وتهددني.

ساعة اكصبج. ساعة اجتلج. ساعة تدعي عليه وعلى امي.

سراب واختها ينامن بقرفتي.

عرفت الحجية حاطتهن يراقبني. خاف يجيلي خطاب لو اشوفه بالليل يحجلها.

سراب على دهلة. ما عادت اطيكني ولا تكابلني.

ساعة ووكت. هي والحجية كاعدات جوا. تعبي بروسهن علي.

ثاني يوم الصبح. كعدت من قبشة.

فد كلبي ناقزني. خايفة من الحجية حيل.

مستعدة تجتلني لو ما رضيت اروح وياها.

كضيت الشقل. كالت: حضري روحج يلا خاطر نروح.

فدوة فد لا بدون بنج.

خزرتني.

ضليت واكفة. صاحت: امشييي.

فد صاحت عليه. خطاب دخل الهول.

الحاجة ما حسبالها هو موجود. حجه: شكو؟

انت شني ما عندك شغل شو كاعد اليوم؟

جمعة اليوم.

ما راح تطلع.

يدحك بعيوني ما جاوبها. رد سال: شكو؟

مالك غرض. عدها سالفة مال نسوان متوجعة ورايدة اخذها للدكتور.

اي زين انا اوصلكم.

لا شتوصلنا. احنا نروح منا.

وعليش تفرفرين بالسيارات بهالحر. اني اخذكم.

لا جريبة ما يعتاز نفرفر.

عجل اخذكم اوصلكم واتانيكم لما تكملون. اردكم. ما عدي شي.

سكتت.

ندستني: انزعي ما نروح.

كلبي يخفك من الخوف.

اريد اخلص من اللي ابطني. فد اخاف اتوجع.

حايرة بامري. والحجية تفتر عليه. تريد بس خطاب يفك خاطر تاخذني.

خطاب كعد فد كعدة. عد ما شافني بهالمنظر.

ونحن بهالحال ما نحس الا ابو وهب مثل طب. ومستعجل: يلا يلا يلا.

صرخت الحجية: شكو؟

لمن شعدجن بسرعة وكومن.

عليش؟

ما عدي وكت. كومن بسررررعة.

انخبصنا واحد ينطك بالاخر. ما نعرف شنهو الموضوع. الحاجة تصيح: شنحضر؟

اخذن علاكة اهدوم الجن واصعدن بالشاحنة.

يا شاحنة؟

سليمة. ما ضل وكت. بسرعة اكلج.

كل وحدة بينا لمت هدوم بعلاكة بسرعة وطلعنا. وهو يوصي عفاف. خبز طحين شعدج جيبي.

وهو يصيح على وهب وولده يشيلون كواني الطحين والتمن.

صعدوا كلشي بلحظة ومشينا. نريد نطلع. ومحد بينا مفتهم السالفة شنهو.

أبو وهب كال: "ما أرد بشهر ما صار له أسبوع يرد."

ندحك شاحنة جبيرة، مفتوح باب واحد منها. صعدنا بيها.

الشاحنة صايرة مثل القرفة، كلنا بعبينا صعدنا.

والحاجة تكول: "شنهو الراح يصير ابني هين؟"

كال الها: "ابنج لو رايد روحه، خل يجي ويانا."

نزلت تركض لوهاب تتوسل بيه يمشي، وذاك معاند يريد يعرف شنهو ورا هرجة خالو هاي.

رضت وصعدت وياه. انطلقت السيارتين من بيت أبو وهب، طلعت بالظهرية الحمرة.

باب الشاحنة مقفول وتحس كاعد بنص صوبة، انصلبنا صلب من الحر.

وكفت الشاحنة وفتح الباب كال: "نزلو."

نززلنا من الشاحنة. أدحك: "هذا بيت الجول مالنا!"

صاح: "دخلوا هين بساع."

صف سيارتوا خطاب ونزلت الحاجة وخطاب مستقرب. بعدني جاي أدحك بخطاب وأشوف وجهه شلون معبس وهو رايد يفتهم شصاير.

طلعت أمي من الدار وهي تصيح: "كل الهلا تفضلوا، الدار دار أهلها."

"أمي!"

عرفت كلبي عليش نقزني.

كلبي حس هكو مصيبة راح تصير.

و آنـة ذاك الـ ظلت عيونه تلاحگك وما گدر يخطيلة خطوة.

دحكت متعجبة، أبو وهب شعندو جابنا لبيتنا القديم؟

وأمي شلها بالسالفة وشعدها؟

أكو رجال جان واكف، لحيتو عالية ولابس عركجينة ودشداشة ويلگ ودشداشتو كصيرة وداير ظهرو ليقاد، وابو وهب يقزرنا ويصيح: دخلن دخلن بسع الزلمة منا فوتن.

فتنا، فد خطاب ما رضى يدخل.

صاح على امه: يمه أنا ما أظل هين، تجين وياي لو تظلين هينا وأنا أرد للبيت.

أبو وهب: إن جنت زاهد بروحك رد، أكول أركد ولا تثقل أمك بيك.

الحاجة: وكعدتنا هين تطول لو شنهو يبو وهب؟ أنا ما أطيك أدوس عتبة وسام وأتنجس بدارها.

وهب: راح نظل هين، راح نظل. هدوا عنكم المكاون والحزازيات وأركدوا هين. الأيام الجاية صعبة اتجرعوها خاطر تكضي بخير بعز الله.

خطاب: يما عجل أنا أروح لبيت عمي أضل غاد.

ريسان: أكضبي أبنج وحطي عقلوا براسه أحسن ما يروح وما يردلج مثل أخوه.

واكفة وأدحك عليهم من باب المدخل وناطر أفتهم شنهو الصاير. أندار علي أبو وهب وزكح: فوتي يولي لا بارك الله بغيضج، خشيييي.

حجاها ومشى، وأنا تنحنحت من بكاني. فد ضليت أدحك ورا خطاب خفت يروح خاف صدگ قاد خطر ويتأذى.

ضل واكف وأمه اتناحر وياه وتتكاون، يحاجيها بعصبية ويحذرها تضل ويا أبو وهب ويكللها خلنا نبعد عنا ليش رايدة تورطينا بمصايبه. امشي وياي وخلينا نروح منا.

لا تذبين روحج وياه.

وين نمش؟ ما تسمعلا يكلك ذيج الديار صعب ما يصير نتخطاها. بسك عناد ابني وأركد هين وأصبر نفهم شنهو تالتنا. أنا مثلك ما أحمل شوفة وسام، بس لو جانت روحتنا بيها خطر على روحك. أكعد يما برضاي عليك لا تفجع كلبي.

أندارلها يتكاون وأنا أدحك. رد راسو منها يستقفر. صدت عينو بعيني، ظل يدحك بيا. تنهد أندار وهو يحير بامره شيسوي.

فتت أتفكد أركان البيت.

شكثر ما جان سجن اليه، حنيتله.

حنيت لايامي ذيج من جنت على لاهيتي أرعى بالحلال وأكل أكلي وأنام ما عندي هم بالدنيا قير الخبز يكفي عشا لو أعجن للعصر وأتعاجز من الخبز العصرية.

شيردني لروحي ذيج؟

شيردني بلايا هموم. مشيت على قرفتي أنا وأخواني.

ع المطبخ، صدت أمي كبالي: أنت راح تضلين هين.

عجل وين أروح؟

يم نهلة وبناتها.

ما صلت نهلة.

عليش؟ شجرالها؟

صاحت الصايحة وهجت ببنات أخوج، بس أنا ما أهدها.

وشتريدين تسويلها؟

السوالف هواي. خليج لاهية بمصيبتج البطنج ومالج غراض بسوالفنا. شسويتي عليها؟

نصي حسج راح تشهريني.

كومي عاد خايفة دلنج. لو خايفة ما ذبيتي روحج بهيج مصيبة. بس عليمن؟ إنطلعين؟

حجتها وأندارت للحاجة فاتت للبيت. تلكتها وهي تكللها: هلا هلا ومرحبا بام خطاب أبيتي. أحسبي الدار دارج وصرحي على راحتج.

ردتها: ساعة الكشر الأشوفج بيها. بس يا حيف الدنيا التذبنا وتغصبنا نجابلج.

عبرتها وفاتت على قرفة نهلة جانت كاعدة بيهن عفاف وأميرة وكل وحدة بيهن تكول هاي الغرفة الي ولجهالي. كعدت الحجية. أندارتلها عفاف: شني؟ ما سالتي أبو وهب مطولين هين؟ ليمتى نضل هينا؟

علمي علمج.

أميرة: الزلمة الواكف ياهو شكله مو عراقي هيج حسيت.

الحاجة: يمكنه أردني. سمعته وهو ينادي أعلا أبو وهب. لاهي خليجي ولا هي سوري.

عفاف: بس كونها تكضي على خير. والله طكت أرواحنا. هسه لو ماخذنا لاهالينا مو أخيرلنا من الهجولة. هاي جايبنا مكعدنا بنص هالهيمة.

الحاجة: كلها جم يوم وتكضي. لا تزنين وتونين بروسنا.

أميرة: ونظل هيج؟ شلون نسوي أكل؟ الجهال جوعانين.

كومي وأحجي ويا ذيج الوحدة الما أحب أطري اسمها.

كامت أميرة وهي تتفقد البيت. لكت قدس مامددة بغرفتها القديمة وصافنة بالسقف: يخاتون ما كضيتي صفنتج؟

شكو؟

المطبخ منين نريد نسوي أكل لجهال؟ سالي أمج.

كمت من مكاني. أمي ما هي كاعدة. كعدت الزلم بالدوانية.

طلعت برا. خطاب كاعد ليقاد ووهب وخالد واكفين يمه يسولفون وهو كاضبله عودة يكشر بيها بالخنجر.

صحت: وهب.

أنداروا كلهم: صيح أمي.

ندهلها. اجتي: ها.

يريدن يركبن مسواك؟ اكو؟

كومة زلم هين. دزوا واحد يجيب وياه مسواك.

البامية لكطتيها من الكاع؟

بعتها ومشت. يا بامية التسولفين بيها.

أخوتي وينهم؟

بالموصل.

و راح تظلين وحدج هين؟

لا. أنتم هين. ولو راحن هن. أنت ما أخليج ترحين. أكضي أيامك هينا لين ما تحطين البطنج.

أحط البطني شلون؟

أمشي هسه وعودك بعدين نكعد ونحجي.

مشيت لكيت أميرة حاجية ويا أبو وهب على المسواك. وهب وأخوته نزلوا من السيارات وكمنا طبخنا النكدر عليه. فد بيتنا مو مثل قاد بيت أبو وهب. قاد عدهم بوري. هين ما عدنا بوري. برميل نترسه ونشتقل بيه لكلشي.

وكفت عفاف تريد ماي تقسل ابنها. الماي كاضي. كالتلها أمي: خذي سطلج واطلعي للجول أترسيه وردي.

يااااا. ونظل هيج.

واحد منكم يروح يترس البرميل بالعربانة ويرد. ما ينرادلها هرجة.

أميرة: شحالكم غدي؟ شيلحك البرميل؟ طبخ تنظيف غسل؟ شني اليريد يغسل يمسح بسفنجة.

وسام: هذا الموجود. أميرة خاتون اعذرينا. ما حنه مثل قصر أهلج الخير يسفي. حالنا على كدنا بهالهيمة.

تنهدت ومشت عن أمي.

وأمي كاعدتلهن بالهول ع الزردوم. شكو وحدة تفج حلكها اداهرها. جنها وحدة جانت ضايجة. والله جاب هالوادم اتسلى بمداهرهم.

وهب وأخوته راحوا ترسوا ماي وكوة كضينا اليوم. بعدهم ما متعودين على عيشة الجول. وحدتهن على كثر ما تنحست وحجت اليسمعها يكول جانت عايشة بقصر شعشوع مو بيت أبو وهب ومكضي أيام الله بتيتة صبح وليل.

لليل فرشن شلون ما جان بالهول ونامن.

أنا تمددت بقرفتي القديمة. فد أسمعلهن الحاجة تحجي تكول: جدرنا ظل عد ام رسول. مالت نودي واحد عليها أيجبه النا.

عفاف: دخيل بختج! تلاكي عفن وذبته! منيلها الوادم كهرباء وتضم أكلج!

يا ظنج ذبت اللحيمات مالتنا؟ أنا أمك يخطاب يمه.

تبسمت وانداريت أنام.

لهناك.. ما أحس إلا سراب تصرخ وكلنا فزينا على صرختها. حتى أبو وهب ع الصريخ أجا من الديوان لهين. كلها تكضب بيها وتريد تعرف شجالها. تصرخ وتصيح: شفته شفته.

الحاجة تصيح وأبو وهب والكل. وهي تصيح: شفت جني مو بشر. والله أني متأكدة شكله مو مالت بشر. يابه رجعنا ما أريد أظل هين فدوة.

كلهم استهزئوا بيها وكاموا يصيحون عليها وردوها وكالولها فززت الوادم على ظنونج. ما تستحين؟ والله متحلمة بجني.

رزلوها والكل رد ينام.

ضليت أدحك عليه البنية صدگ خايفة. لا هي نايمة ولا هي كاعدة تتلفت يمنه يسرى وتكعد باختها وحنين تجر الجرجف وتكمل نومتها.

ما أدري إذا صدگ لو جذب. فد أنا عشت كوم هين. ما فد يوم شفت شي يخوف. يمكن صدگ متحلمة.

عفتها ونمت. فد ظلت كل شوية تفزز الوادم والحاجة تزكح بيها وتكلها: انجعي أشو انطمري منجديتنا بهالليلة. وهي تبجي لحد الفجر. من طلع الضوا يلا هودت ونامت.

الفجر فجت عيني. كمت من الفراش.

مريت ع البيت. الكل نايم. لبست ربطتي وطلعت للمراح. فتحت المراح. الهوايش والصخول موجودات. بس الدجيجات ما هن. ضجت عليهن.

رعيت الحلال وردته الماي وكعدت أنظف بالمراح والكل نايم. حسيت اكو أحد يدحك علي. أنداريت ماكو أحد. كملت. لهناك وهم حسيت واحد وراي. التفتت شفته بسرعة انجر. ما عرفت ياهو.

حسبته خطاب. مشيت دحكت من برا المراح ماكو أحد!

رديت كملت بسرعة ودخلت للبيت. شو بعدهم محد كاعد.

مشيت للمطبخ حطيت البتيتة ع الجولة سلكتها. لما كعدوا تريكنا وكضينا اليوم. واحد ما طايك الاخر والكل تدرم. وأمي متونسة عليهن اداهرهن بخلك أطول من يوم الجمعة.

ثاني يوم. نفس الشي. أكعد الصبح وأحس أحد يراقبني.

ثالث يوم نفس الحالة. قررت أحاجي خطاب خاطر أعرف عليش يراقبني.

الظهر وأني أودي القدا لوهب وخطاب. وهب جان رايح يتقوسل وفد خطاب كاعد. حطيت الأكل وحجيت: شعدك تراقبني؟

ياهو؟ أنا؟

أي.

يمتى مراقبج؟

أني دحكتك.

وين شفتيني؟

بالمراح.

شوكت؟

الصبح.

يولي أنا كبل شوي أجيت.

وأمس.

ما أبات هين. بس على مود أمي أجي الضحى.

يومية؟

أي.

ظليت أدحك بيه دايخة: عجل ياهو هاذ اليتلحكني؟

الصبح.

أي.

ما شفتي منه شي؟

عفته وفتت جوا. ضليت أحجي ويا روحي ودايخة. ياهو هاذ؟ بعدين كلت أنا شبيه متعبة عمري بالتفكير. الراقبني والما راقبني. هن حلال أرعاهن وأرد للدار. خوما عاملة جريمة.

خطاب ضلت هالسالفة أباله مالت أحد يراقبني.

يومها ما راح بات برا. قرر يبات هين بالچول. للمقرب سعله أبو وهب: راح تضل هين؟

خطاب: مو رايح.

صارلك من يوم الجينا ولليوم أنت ما تركد هين. شصار وقررت تظل تبات؟

من شنهو خايف خالي؟ أحجيهن.

يخسى اليخوفني. أنا أبو وهب أرعب أمه بحالها ومحد يهز مني أشعرة.

طالما هيج عليش خايف من ضلتك هين؟

من عبن لضلتك أسباب مو خالية.

اجت أم خطاب: شنهي خوية سالفتك؟ عجل وين تريده يبات؟ أنا الردته هين.

ابنج هاذ لو فچ حلكه ما يلوم إلا روحه.

يفچ حلكه بيش؟

هو يفهم أنا شقصد. خليتي حاطلج كدر ولهساع متحمل ابنج.

أنت المتحملني لخاطر أمي.

انت تعرف متحملني ليش وما اريد اكول ليش خلي السوالف مجودرة.

– شنهو التقصدة يخطاب.

– لو تكدر تكتلني جان كتلتني من زمان بس انت تعرف شنهو الكاضبك.

– تهددني ولك ابن *****.

بس فشر على ابوه خطاب فز وتلازم ويا ابو وهب.

وام خطاب ذبت روحها بيناتهم تفازع. وهب واخوته جروا ابوهم والحاجة جرت ام خطاب وهي تكله: ادخيلك وادخيل الله يمه امش من هين ولا تظل.

بعدها من عنده وطب بالبستان لحكته: كل يوم انت ما تبات هينا شنهو الجرى اليوم وتريد تبات ما اريدك تضل جدام عين ربعة.

– لا هو ولا ربعة يكدرون يطخون شعرة مني.

– شنهو الضامه ولك خطاب يمه لا تورط روحك ويا ذول ما تكدرلهم.

– نشوف منهو الما يكدر لمنهو.. ابعدي وخليني بروحي.

– يمه خطاب اروحلك فدوة اكصي الشر وعوفهم.

بعد امه منه وراح لوحده.

ما عرفت شبيهم وشنهو الوراهم جني اطرش بزفة.

نمت ومثل كل ليلة تعودنا سراب تخبص ليلتنا هذا اجا شفت واحد وتتخيل جن كبالها.. فد محد يصدكها كلها تصيح عليها.

كعدت الفجر ضنيت محد كاعد.

جاي امشي حجت امي: كعداتج هاي ما راح تجنين عكبها غير المصايب.

– يمه اروح اسرح بالمراح.

– واليناظرج برا المراح مكيفتله.

– ياهو.

عدلت المخدة واندارت للجهة الثانية تنام.

عفتها وخذيت ربطتي لبستها وطلعت خذيت سطلت الماي ترستها ومشيت للمراح فكيت الباب ووردتهن.. وكعدت انظف مجانهن. دحكت من بعيد خطاب واكف ليقاد يراقب. ما فهمت شنهو امره. فد لا هو كرب ولا اني كربتله.

ظليت اشتقل وكل شوي ادحك عليه.

دنجت للصخلة احل عكدة بجدمها. شلت راسي خطاب ما هو.

تعجبت كبل لا ادنج هو موجود. طلعت اتفكد ما هو.

وين راح.

مشيت للبيت تفكدت الكل نايم.

دحكت من برا على الديوان الكل نايم حسيت بحركة يم الجول وشي طاح بالكاع. اندرت بسرعة جاي امشي للجول. انصاح من وراي: تعاي جاي.

انداريت خطاب: شجاي يصير.

– ادخلي ومعليج.

اتعداني وهو يروح للجول: شنهو.

– ردي للدار.

جاي الحكه وكف وخزرني: جاي تسمعين الاكوله لو لا.

– شنهو الصاير.

جا عليه بهمة كضبني من زني حيل وحجه وهو صاك على اسنانه: طلعة من هالدار ما اريدج تطلعين. ابالله لو شفتج رحتي للمراح مرت اللخ لا اكصهم لجدامج.

دفعني. ضليت ادحك عليه بخوف وعجب.

هذا شجراله؟ وشجاي يصير؟

مشيت واني ادحك وراي.. على خطاب وين راح اندرت وما احس الا امي بملابسها سود وشيلتها سودة وعيونها من الكحل السايل سود واكفة جدامي اجيت انضرب بيها فزيت من كل حيلي من شفتها: شبيج يمه خذيتي حيل حسبالي مدري شنهو متت خوف.

ظلت ادحك عليه واني اتعديتها وفتت للهول جاي افوت للقرفة.

ورد شي قريب ( غريب ) اني بحلم لو جاي اتخيل.. انداريت امي نايمة بمكانها وعلى حطتها كبل لا اطلع للمراح ونازعة شيلتها ونايمة. فد اني هسه شفت امي جدامي.

هي جانت واكفة.

شجاي يصير؟

مشيت بس يا ثكل خطواتي من الخوف.

رعب سراب وتخيلاتها كلها جت بمخي.. بسرع ورد ابالي الجاي تشوفه سراب حقيقة هي ما جاي تمثل هي صدك جاي تشوف اشياء.. امشي والخوف يسري بكل جسمي واحس على يا ساعة راح انصدم بشوفة ما اطيكها.

تفكدت الهول كلشي ما بيه.

المطبخ القرف مظلمة ما شفت منهن شي.

طلعت للكراج خطاب جان راجع بهمة وعصبي. من شافني: انت ما تنردين يولي؟

– اني شفتي شي.

– دخلي جوا.

– والله شفت شي ما اعرف شنهوة يعني اني شفت امي واكفة فد هي نايمة.

عكد حاجبه وهو مستغرب من كلامي. اشر براسه على ناحية المراح مشيت جدامه. وكفنا قاد حجه: شجالج يمرا.

– من صحت علي وردت افوت شفت امي واكفة فد لابسة شيلة سودة وصاحبة ادحك.. دخلت للهول شفت امي نايمة.

– يولي لا تصكعيني.

– والله ما عدجذب هذا اللي شفتا.

– تتخيلين.

– انت ما جاي تصدكني.

– مو مهم اصدكج المهم لا تطلعين للمراح.. جوزي طلعت الصبح يولي كل الصار بيج من هالطلعة.. لا تطلعين.

– عجل ياهو اليورد الحلال.

– الحلال بيج وبلاياج اكو اليسرح بيه هذه مو شغلتج يا مرا.. لا تطلعين واذا ردتي اطاعين اطلعي بوكت الكل كاعد ومنتشر بالبيت مو غبشة.

– عليش.

دحك بوجهي تنهد: شبالية كلبي يولي.

طلع جكارة من جيبه وكعد يورثها: الشفته صحيح لو اني جاي اتخيل.

– اسألج سؤال.

– شنهو.

– مرة كلتي اني اشك ابو وهب رجل امي صحيح.

– كبل جنت شاكة هيج.

– شنهو الخلاج تشكين هيج.

– هواي امور.

– منها؟

– هذا البيت اله ومكعدنا بيه وجان حاكمها وتمشي بامره.

– وبعد.

– بعد هواي امور ما ترضى احد يحجي عليه لو احد يجيب سيرته. ووكت اليجي جانت تحكمني ما اكعد بالليل ولا اطلع من قرفتي.

– اي.

– واكو بعد شقلة.

– شنهو.

– كبل لا يجي جانت تفرك سنونها بديرم.

– بس.

– اي يمكن بس ما ادري فد هاي اكثر شي.

– شكج ما جان غلط.

– يعني شنهو.

– ما اريد ادوخج بس هالجول عالم من الاسرار وانت مثل الغركان بهالعالم بس ما يعرف عنه شي.. تاكلين اكلج وتشربين شربج وتنامين وعلى ربج حسابج.

– قصدك امي جانت مرته لابو وهب.

خطاب: اكو امور ومواضيع لو ما نفهمها احسن. مرات نبقى جاهلين افضل مما نفتهم لإن الفهم راح يأذينا هواي.

– شتقصد يعني.

-ارجعي ولا تفكرين بشي التفكير يتبعج قدس. ريحي بالج انا صاحيلهم.

ضليت ادحك عليه اول مرة اشوف خطاب بهالغموض.

حسيته واحد ثاني.. فد راسي انفر شنهو امي جانت مرت رجلي السالفة منين ما اريد اعقلها ما تنعقل.

شلون تطيني لواحد جان رجلها؟

خطاب قلطان اكيد. هو لو رايد يشاقى وياي لو.. ما ادري ما ادري معقولة يتشاقى.

احجي ويا روحي وامشي للبيت فد ابد ما خاشة السالفة بعقلي.

كلش دوختني سطرتني سطر.. رديت اكضي شقلي فد عقلي مشوش فرد نوب.

كضيت شقلي ومشيت لسراب.. جانت عتقسل بالمواعين وصافنة. حجيت: اني اليوم شفت شي.

– زلمة عيونه سود وجنهن بيهن كحل مو.

– لا.

دحكت بوجهي: عجل اشفتي؟

– شفت امي فد هم عيونها مكحلة وتخوف ردت انطخ بيها خليتها وراي وفتت بس عد ما دخلت الهول لكيت امي نايمة مفرعة انداريت ماكو واحد وراي.

– اني الجاي اشوفهم جثيرين مرة جاهل مدمى مرة زلمة عيونة كايلة ليبرا.. ومرة.. سكتت.

– شنهو.

– جاي اشوف واحد يشبهج فد زلمة مو مرة.

– شلون يعني.

– ما عرف حسب ما شبهت هيج.

– لا تخوفيني ازود هو اني هيج جاريتها تحتي.

– الليل ما جاي انامه كل يوم بهالبيت جاي ياخذ من حيلي وصحتي ما جاي احس نفسي مثل كبل على طول خاملة وحيل ما بية والجاثوم كل ليلة يكضبني ياخذ ثلثين حيلي.. غير الافز والكا الوجوه فوك راسي واليكتلني من اصرخ وافزع اهلي محد منهم يصدكني وضالة علتي نايمة بكلبي.

تنهدت: كلش احتاج امي.

احتاجها تسمعني اطمني تمسح على راسي تقرا قران اهود بحضنها.. حيل جاي افتقدها.

حجت ودموعها صبن.

كمت اربت على رجلها واكلها: ميخالف الله كريم الله ما ينسى عبد.

– قدس رايدة منج طلب.

– شنهو.

– اني ادري تريدين خطاب وادري خطاب رايدج. الاريدج تايسي منج وما تكربين منه.

– اني ما كاربتله وادري بدربي ودربه مستحيل. فد هو متأمل هواي.

– كطعي الأمل اني من بعد الله ما الي غير خطاب يسندني يتيمة ومالي احد خليني اكسبه الي سند وامن روحي بيه.

– عجل اني كاضبته اني مالي غرض.

– الاريده منج تكرهينه بيج كون يبزع كل ما تشوفينه تغلطين عليه ترزلي تكليله شنهو لازك بيه ما تحس ما عندك كرامة هو راح تلعب روحه منج ويكرهج.

– فد اني ما اكدر اسوي هيج.

– وليش ما تكدرين؟ تعرفين بس تتمسكنين جدامه وتتنخين بيه.

– ولا متنخية بيه اني فد معليه بكلشي ما كاربه صوب احد هي المصايب تجرش فوكي ليوحدها.

– كولي رايدته لا تتحججين.

سكتت عنها وگمت.

ثاني يوم كعدت من الفجر فد ما طلعت للمراح ظليت كاعدة بمكاني.. عد ما حسيت اكو حركة برا طلعت لكيت خطاب يفتر. كربت منه ظل يدحك عليه كربت احاجي بسالفة امس بعدني ما حاجية سبكني وكال: يولي مكورشة.

حجاها وتبسم.

عكدت حاجبي وظليت ادحك لبطني.

هالمصيبة نسيتها ابطني.. لا اصلا ضعفانة.

تبسم وكال: اي صحيح جاي اتشاقى وياج. تسمنين تضعفين انت حلوة.

– خطاب بيش متأمل؟ احنا ما نصير عليش توهم روحك وتوهمني.

– تصيرين.

– ومنين اجتك هالثقة خاطر تكول هيج.

– الالي ما يصير لغيري والايام راح تشهد.

– لا تشهد ولا هم يحزنون خلينا لا نأذي ارواحنا.

– انا لا كاربج ولا واصل صوبج خاطر لا اذيج بس اني ما ناسي حكي ولا ساكت عنه.

– ما اجيت احاجيك بهالسالفة.

– عجل شنهو.

– سالفة امس.

– شبيها.

– انت متأكد من الحجيته.

– شراح يفرق وياج.

– هي امي شلون تطيني لواحد جان رجلها ما يصير.

– كل الجاي يصير ويانا بالاحلام ما يصير عليش مستغربة هالسالفة هاي.

– ما تنعقل.

– عجل لا تعقليها انا كتلج التفكير الزايد بالامور ياذي انسي وجنج ما سامعة.

– ما اكدر اعيش جاهلة.

– الجهل الج رحمة احسن ما تعرفين شي عن هالجول.

– اني فد رايدة افهم شنهو سر هالجول سنين عايشة بنصه وما اعرفه شنهو.

– مو اذا حجيتلج شي اخر.. راح اتعبين اكثر.

– لا اني اريد اعرف ما اريد اضل نايمة على اذني.

– شنهو التريدين تعرفين عن هالجول.

-شنهو سره.

– اول سر بهالجول هو مو جول.

– عجل شنهو؟

– مقبرة جماعية.

سكنت وظليت ادحك بوجهه. كمل: وكل الداير ما دايرج هم اموات وناس اندفنوا غصب.

– جنت شاكة هيج الوضع فد هسه من اتاكدلي ما ادري احس جلدي كشعر.. شلون الواحد يهج من هالجول.

– الميت بهالجول ما ياذي مثل الحي.. شفايدة تهجين من الجول واهل الجول مرافكينج.

– منهمه؟

– خالي.

-خالك القدر الما منه مهرب.

مقدر علي

- القدر ما يمشي إنت تمشينه.

- إنت تحجي بزود عبن زلمة. جرب تحط روحك مكاني مرة. لا حول ولا قوة. ما تعرف كاعها من سماها. لا تعرف أصلها ولا فصلها. ولا تعرف كل شي عن نفسها.

جاي أحجي، طلعت أمي من البيت. ظلت تدحك ع البستان. شافتنا. عفت خطاب ومشيتلها.

- ما تخافين أبو وهب يطلع ويشوفج وياه؟

- هم يسهرون الليل كله. محد بيهم يكعد الصبح.

- وشرايجج ما يكعدن؟

- يمه شنهو اليربطج بأبو وهب؟

- شنهو سؤالج هذا؟

- آني فد رايدة أعرف إنت شلون تعرفتي عليه وشنهو الگلالچ هيج.

- هيج شنهو؟

- مثل الأسيرة عده. بحيث يجي يستحل بيتج هو وأهله وربعه. وإنت حرف ما تفكّين.

- لا تدخلين روحج بسوالفج تضرج.

حجتها ودارت عني. حجيت وراها:

- صدك جان رجلج؟

وكفت:

- الجلمة انكالت لو انعادت يا ويلج يا قدس.

مشيت من ناحية الجول. عين وما تمد. هيمة. ماكو أحد. فد هواها يخنك. رقم هي هيمة ومساحة مفتوحة. بس من تجر نفس تحس النفس يخنكك. ما يريحك. هالنفس الأجره من ريت هالموته. أبو وهب الكتلهم لو أمي لو إخوتي لو منهو.

هواي أسرار بحياتي. شوكت أعرفها. وشلون. الكل يهددني وينهرني خاطر لا أعرف شي عنها. تنهدت. بيمن أحتار. بالمصيبة اللي ببطني لو بأسراري.

مضيت ومضت أيامي. يوم يصعب على يوم. وإحنا بهالجول. ليش ما نرد. ما نعرف. حالنا كل ما جاله يسوء أكثر. كل واحد بهالجول محد طايك الآخر. واحدنا كوة عايش ع الآخر. ولو تكع الفرصة بيد أحد. يكضي ع الكل. الكره لامنا مو الحب.

من بعد فترة. حالنا مثل ما هو. وربع أبو وهب كربوا يسافرون. دخل أبو وهب وصاح:

- يا حاجة.

- أمر يبو وهب.

- جهزي سراب لرجلها.

- رجلها. شنهو رجلها؟

- أبو مصعب تكدم لها. وبحيل الله الليلة ملجتهم. ومن صباح الله تغبش ويا زلمتها.

اصطكينا كلنا. حجت سراب:

- منهو هذا؟ ياهو. أنا ما أعرفه. ما أريد أتزوج. ما أهد إخوتي.

أبو وهب:

- ووكت الأجي وأكلج راضية لو لا. أطي رايج. لجن هالساع محد ماخذ رايج. تنفذين وتجهزين روحج الليلة.

اندار علينا:

- سمعتن. البت عروس الليلة بإذن الله. جهزنها لرجلها. ياله.

صرخت وكامت تبجي وتلطم على وجها. وتصرخ ما تريد تعرس. كامت تحبحب بادين الحاجة. وتتوسلها تقنع أبوها ما يطيها. بس أبو وهب جان ماخذ قراره. ورايد يطي بنته لواحد. حتى مو عدنا. لجن ما جان يعرف المطلوب مو بنته.

اني الفتّشوا كلبه ولكوك ابخير

ولكوني بكلبك أصلآ ما مخليني

أميرة: عاد بلاه هوسة وعيارة وخبصة هذا مصير كل بنية شتريدين تضلين موغفة على كلوبنا اولج وتاليج للرجال .. جهزي روحج وفكينا يلا

أمي كاعدتلهن ع الزردوم .. متجاية ع الحايط وادحك بهوستهم من سمعت أميرة ردت سراب وصريخها جيف ما تريد تعرس .. مدت رجليها وعدلت ثوبها

حجت أميرة: خوش تحجين يالمسعدة .. بس ما عرفنا تاليج لياهو؟

شو حجت أمي هيج وأميرة انفعلت على غير عادة مدري شنهو النزها بحجاية أمي ونزلت تصيح عليها: انت خليج مكدرتج ومحترمة شيباتج لا وحك هو الله العب بيج جولة

تبسمت أمي وهي تكللها: أعصابج عيني أعصابج شقلنا لا تزعلينا شقاي ثكيل ..

دارت وجهه عنها وهمست: بس فعايلي أثقل

بين صياح سراب وأميرة أني أدحك بامي أحس كل نبرة منها وكل حجاية لغز كاعدة أدحك بيهم وجنها كاشفتهم كلهم .. وماخذة بروحها مقلب وتلعب على أعصابهم

كامت من مكانها .. وأني أفكر صدك جانت مرت أبو عمر؟

شي ما يخش بالعقل لو جان صدك رجلها ما تطيني اله .. تطلك منه وتروح تطيني اله أصلاً ما تصير

تنهد وهو شنهو اليصير ومعقول وياهم .. كل سوالف أبو وهب ما معقولة ما تخش بعقل مرته ووراها ابنه احتركوا ونارهم كلتهم ما انكسر ولا اهتم .. الناس كلها وكفت بفاتحتهم وهو عايف الدنيا وراه ولا هي ويا ربعه خاتل وينصبون بهالمفخخات .

البيت كلو على بعضو كايم وشي ما راكب على شي

مدري شلون عايشين ... طكيتهم بطاكية ورحت أتمدد بالقرفة ظهري هالايام كاعد يثكل ووزني يزيد كمت أتعب أكثر من أول أرتاح من أتمدد .. توني تمددت وكضبت هالراديو أكلب بيه

تطلع أغاني وأستمع ..

فاتت أميرة عليه للقرفة: انت هين ما تحشمين أحد

أنداريت لها: شكو؟

– مطلعة أغاني وأبني ما صار على مصابه شهر

– واني ياهو مالي شني أرجعو لابنج لو شسوي؟

– من حشيمة هالبيت تبطلين هالراديو وتنجعمين

– وأبو وهب ما حشمج لو حشم مصاب ابنه ومرته من يريد يسوي يعرس بته وما صار على مصابهم شهر؟

– وانت تحطين روحج ويا أبو وهب؟

– انت ما لكيتي واحد تتكاونين وياه رديتي عليه؟

– اسمعي لج تكضبين أمج عني لا وتراب ابني وروحه الما حويتها لا أخليكم وصل أن جان انت وأن جان أمج

– ها هين سالفتج ما كدرتي لامي رديتي علي .. روحي صفي حسابج ويا أمج كافيني وجع راسي مالي خلك سوالفج والله

– اكضبيها عني أحسن ما أحجي العدي واذا حجيت العدي أول راس يطير راسج

– وليش يطير راسي شنهو عاملة جريمة؟

– انت جنتي حاسبتني بهيمة وما صاحيتلج غلطانة أعرف بسوالفج وأعرف بمصيبتج اللي ابطنج وكل واحد سره جوات كتره .. فخلي الأسرار مجودرة أحسن ما تنكشف ونروح بيها كلنا

حجتها ومشت

كعدت لحيلي بسرعة: يا يمة صخام بعيني تعرف أني حبلى!

جاية تهددني

حطيت ايدي على حلكي أتلفّت: شلون لو حجت لأبو وهب؟ يكصم راسي والله من صدك يطير

كمت من حيلي طلعت من القرفة لكيت أمي كبالي: يمه رايدتج

أمي على كعدتها تناظرهم اندارتلي بغير اهتمام: ها

كربت يمها وهمست: أميرة جاي تهددني

عكدت حاجبها: وبيش تهددج؟

دحكت عليهم ورجعت همست: يمكنها تعرف أني حبلى

باوعت بعيني .. كملت: شلون لو حجت؟

– منين عرفت؟

– ما عرف

– ما راح تكدر تحجي هدج منها

– ولو حجت؟

– وأنا موجودة ما راح تفج حلكها ولو تكدر جان فجته من كبل بس ما تكدر تعرف تهبد روحها لو حجت تكع بيني وبين خطاب وأمه .. ننهش لحمها ونكشفها

– هي شنهو عاملة؟

دحكت عليه بأستخفاف: روحي شو روحي مني حيري براديوج وشلون تشبعين كرشج هالامور أكبر منج

– شبيج يمه وياي جاي أحاجيج؟

– يولي فريخ هاكداته ابطنج ما عرفتي تضمين سره أطيج أسرار غيرج وأنت أسرارج بايعتها شو فاركي لا أركعج بالنعال .. يلا فاركي

كمت منها متضايكة: شبيها وياي؟

كعدت على صفحة . أمي وهي كاعدة امددة، مدة رجل فوك رجل ومدت أديها تفرك بيهن وتصيح: أي أم خطاب شنهي سالفة الرعنان شو كايمن يهددون بظهورنا .. عجل شنهي ما عدنا وجوه ويجون يهددون بوجنا

أم خطاب: انت بالخصوص ما اطيك أسمعج ولا أسمع سوالفج .. فكيني روحي واصلة لهين

– دامها واصلها عجل كليلها نازل وخلنا نفتك

ضحكت عفاف وأمي اندارت متبسمة وأم خطاب انهدت: يولي يالركطة عليش ما تسكتين عني ليش تخليني أكوم أنوم ضيمي بيج

وسام: شنيهاي شو ياهو الكام وكعد يهدد يفرغ ضيمه شو بالله ما تكعدون وتحجولنا ضيمكم عليش كل واحد ضام همه بكلبه .. كاشفونا وكلنا نتجابل وجه بوجه عليش هد واني أهد

أميرة طبت للهول وأمي كلتلها: مو هيجه أميرة؟

– شني؟ شرايدة؟

– أكول لو بلا النهديد نكعد هيجه كعدت حبايب وناسامر ونطرح أسرارنا .. ولو أنا ما عدي سر مضموم الرايد يحجي أسراري .. أتبرعله بيهن بس لو تبرعت هواي الينضرون .. وأولهم، اندارت على أم خطاب

أتضايكت الحاجة حيل: سفاهتج ما راح تكضي يالسفيهة كاعدة تتسلين بغثتنا .

– والله عاد الما عده شغل وعمل شيسوي؟ يلعب ويتلاعب بيكم مو أخير ما أتلاعب بغير أمور …

حجتها وفشرت .. وضحكت جاي تستفزهم وهم كل واحد بيهم يدحك بيها وبنظراته تحس يريد يشرب من دمها

دحكت عليه وحجت: إذا ضلت مركة صبيلي وحطيلي وياها خضرة .. جنه اللعب ع الأعصاب جوعاني

كمت منها وهن يتداهرن .. رحت صبيتلها ماعون مركة وخضرة وخبز وحسبت حسابي وياها أكل .. حطيته وكعدت جاي تريد تكعد من شافتني كابلنها: يولي انت ما تشبعين مو كبل شوي أكلت

– اي جعت شسوي

– مهروشة يويلي .. ولو المثل حالج تجوع هواي .. مو أم خطاب

ما دارتلها صاحت عليها: صحيح لو مو صحيح يسليمة؟

– يولي جوزي عني

– قدس جاي تجوع هواي حكها لو موش حكها

– جوع الربوع وكسر الضلوع أنا ياهو ماتي بكح….ج .

ندستها: يمه كافي شنييية راح تشهريني؟

– وعليش أشهرج .. الشهيرة أعلى الرايد الشهيرة .. أشبعي كرشج شو أشبعي هو انت (أكله شربه نامه ز…) كل فايدة ما بيج أكلي

– اييع يمه دبس

كامت تقمس وتأكل .. كلت وياها وأحس الكاعدين كلها تدحك علينا بنظرات مسمومة .. محد طايك أحد الله سبحانه شلون جامعنا مدعرف

للعصر وسراب تبجي وتنحب ما خلت أحد ما شكتله وتوسلت بيه خاطر يساعدها ويتوسطلها يم أبوها .. فد محد بيده شي إذا أبوها مقرر ومخلص .

حيل لنكسر خاطري عليها وكمت أدعيلها ما بيدي عليها غير الدعاء .. خطاب ما جان هين فد أم خطاب راحت لأبو وهب كالتله: أنا رايدة سراب لخطاب ما أرضالك تطيها

كاللها: أطيت كلمة للزلمة اليوم هي عروسته .. شنهي رايدتني أتفشل ويا ربعي وأطلع جدامه واحد ما عد كلمته .

– بس البت رايدة خطاب ما رايدة هالفش صاحبك

– رايدة شنهو أنا عدي بت أتريد .. شنهي يسليمة صايرة تك*** على بتي لابنج؟

– يا اسم الله من لسانك شنهي هالحجي .. بت أخوي وأنا من زمان كايلتلها محد تصير جنتي غيرج شنهي هاي جزات الرايد بتك وما يريد تروح للغريب تحاجيني هالحجي الماصخ

– البت اطيتها يحاجة وحجايتي ماني راجع بيها جهزيها وما أريد أسمع حس أحد عكبها .

كام منها وما سمع الها وهي حايرة ويا سراب شلون ترد أبو وهب عن قراره .

أجا الليل وسراب ناصبتها مناحة وتبجي ما خلت تمليخ ما ملخت روحها بجي صياح .. ما نفع باقي لملجتها ساعة ولازم نجهز روحها

عفاف صاحتني وكالتلي: وج يولي كومي عاونيني أبو وهب يكول جهزنها وهي ما ترضى تكوم إذا أجا ولكاها على هالحال الأ يكصبنا

– عجل شنسوي؟

– أكضبيها وياي خاطر أنظفها

– دجاجة هي وأنظفها أتركيها هيجي

– عزا العزاج يولي وشلون لو راد يكربها رجلها واشفها جنها كرد

– هي ما رايدته بلكت يشوفها كرد ويهرب منها

– أي ويكل لأبو وهب وأبو وهب يجي يكصبنا

– شيكلو بتك ما هالسة دعوفيها هي بيا حال

– يولي خاف احنا النكع بيها

– ياهو مالتنا لو رادت تكع نكول حاولنا وما رضت

– ومو جذب صالي ساعة أتوسل وما ترضى

– عجل هديها

– شيردنا ليغاد والله متنا هينا اختنكنا مشتاقة لأمي أهلي شلون بالله

– وهو أبو وهب شوكت يناوي يرجعنا؟

– والله ما مسولف برجعة ماخذ راحتنا ولا مباوع بحالنا واحدنا جتله الوصخ من جلة الماي نشحد الماي شحادة لو يجر صوندات وينصبلنا ماطور

– جاية تحجيلي أني شبيدي حالي من حالج وضعي أكسف

– شلون جنتو عايشين متكلولي ارد أفتهم

حجتها وكامت .. تنهدت

مليت هلكد ما عايرني بهالعيشة اليكول أني جنت عايشة هين برضاتي .. جبت عمري مسيرة وعايشة بكيف واحدهم شلون ما يريد أنام وشلون ما يعجبه أحيا .

كمت وياها رحت خاطر أشوف سراب ..

دخلت للقرفة وهي متمددة وكاضبة بشيلة أمها وتبجي وتكللها: ليش يمه حركتي روحج وعفتيني يمه دتشوفين شديصير بيا .. أبوي مو بس ظلمج ورد عليه يظلمني ..

اخذيني يمج ما اريد اعيش ويا ابوي خلصيني فدوة يمه.

كمنا نبجي اني وعفاف على بواجيها.

كعدت عفاف يم راسها: سراب كافي يولي هاي قسمتج ارضي بيها. كلنا مثلج وما رضينا الزواج اول يوم وخفنا نروح بغير بيت اهلنا، بس هاي الحياة شنسوي مو كلشي نتمناه يجرى.

كومي يمه مسحي دموعج واتحضري وادعي الله يهدي هالزلمة الغريب الج ويعوضج عن كسر ابوج وظلمه.

– اني ما اتحمل اعيش ويا غير احمد ما اكدر.

قدس: احمد لو خطاب كبل امس تريدين خطاب حتى حرنا نبجي وياج لو ندوخ بيج.

– اني اشوف بخطاب احمد محد يعوضني عن احمد غير خطاب اموت وما اصير لغيره.

عفاف: وشني تذبين روحج خطاب لا داري عنج ولا رايدج ومن زمان الحاجة حجت وياه بسالفتج كال لا تحجين ولا تسولفين ما يريدج عجل هي زور لو كوة دكومي امي وسمي باسم الله واتعوذي الشيطان.

قامت تبجي وتنوح. كومتها عفاف تريد تلبسها وهاي فزت وتصرخ: احرك روحي ما اعيش والله ما اعيش احرك روحي لو اطيتوني.. يمه اخذيني ويااااج يمه.

بصريخها هاذ وما نحس الا ابو وهي فات من نصنا وكضب بشعرها سحلها سحل من بيناتنا وانولاها جتل ودفرات تراكضنا وراه نريد نخلصها من بين اديه ما كدرنا.

لحد ما تخربطت بيده.

كمنا نتصارخ. عفاف تصرخ: جيبو الماي ماتت البنية الماااي.

اتراكضنا اني وحنين ترادمنا واخوتها راحو يجبون ماي واميرة تصيح: يهالصكعة الما تخلص والافلام الهندية.

الحاجة تصيح: يتيمة وزت ظليمتها شتكل الربك ريساااااان جتلت البنية لجل صاحب يمممممممه.

من شافها لا حس ولا نفس هدها.

واحنا تراكضنا للبنية نكعدها نطك نريد انولينا لحد ما فجت.

شربناها الماي وركدت بحضن الحاجة تبجي بهظيمة.

ابو وهب اضطر يعتذر ما صاحبه وكاله: البت معسرة وما راضية الليلة خلها على ليلة الباجر باذن الله تملج عليها.

خذينا سراب ودخلنا بالقرفة لين ما هدت ونامت.

الكل هود والارواح تعبت من ضيم ابو وهب. كلنا ركدنا ضليت وياهن بالقرفة قفيت. لشوية قاد انتبهت: امي من هالهوسة كلها ما هي وينها؟ ما شفتها كلش! ما تفوت هيجي حوادث حامية لا ما تكعد تتفرج.

شلت راسي الكل معود وبطل النار بزاوية القرفة.

كمت لحيلي شلت البطل وطلعت. صاحت عفاف: وين يولي.

– فد رايحة اشوف امي.

– عوفي البطل لا يكعد واحد من جهيلنا رايد حمام لو شي شيات منين نندل الدرب.

رديت البطل وجريت الربطة من البسمار لبستها وطلعت انده: يمه.. وينج؟ يمااااااا. كعد وهب على حسي كال: امج حدرت من الجول ورا البستان.

ضليت ادحك على حدرت الجول.

الحكها او ارد للبيت. ردت ارجع فد ضل ابالي افتهم شعدها بالجول. ردت امشي تذكرت حجاية خطاب من كال: الجول كله مكبرة. كشعر جسمي خوف فد كلت اريد الحك امي اشوفها وين هي.

حدرت من البيت ونزلت للجول.

عكبت البستان ورحت امشي ادورها هيمة وظلمة هندس ما يبين شي. بس اكو قرفة مهجورة بعيدة شفت من بعيد ضوا بكفاها رحت اتكرب منها.

اتكربت واسمع اصوات وصريخ مو عادي قريب: غريب.

تكربت اكثر ودحكت للغرفة المهجورة وما اشوف الا امي عالكة نار وحاطلتها عظم جدامها وصورة اخوي الانجتل وتصرخ وتولول. ظليت ادحك بثول ما عدفتهم شديصير.

ما احس الا وادير وجهه بلوفة سريعة.

يمه الكحل واصل نص وجهه وعيونها مو طبيعية وخازرتني.

جفلت جفلة الا الجاهل اللي ابطني انشلع من مكانه. ارتديت على دربي اركض واتعثر واسمي باسم الله ومدري شقروا وشذكر كل الاتذكره اصيح: يا الله يا ربي يا الله.

اركض بظلمة واحس شي لاحكني. ولا جني هذا ثكلي ركضت ركض رجعت للبيت برمشة عين. طبيت البيت اعربد بالبيبات وادور قرفتي اختل والبد من الشفته.

طبيت للقرفة النايمين بيها الكل مهود دحست روحي بنصهم وغطيت راسي بالعباية فد جسمي كله يرعش مثل السعفة واسنوني من الخوف سن يطك بسن اريد اكضب روحي ما بالكيف الخوف كلاني اكل احس واحد جاي يراقبني لو واكف فوكي.

اريد اخلص من هالاحساس معدكدر.

بهالحال وما احس الا واحد كضبني. لا هنا زعت العافية.

صرخت صرخة جفل منها كل النايمين وهم يصرخون: هااا.

ادحك الا سراب كاضبة بيدي.

صاحت الحاجة: شجالج يولي.

ادحك بسراب اكول هاي بشر لو شنو.

ادحك بيهم وكأنما كلهم اشباح مو بشر. حجت عفاف: هو هيج اليحلم يا قدس حتى الجهال فزوا استغفر الله ربي شوكت نفتك والله تعبنا نايم يمه دنااام.

رجعت تهود على ابنها.

والحاجة رجعت وسراب بعدها يمي. جريت ايدي منها: شرايدة؟

– سمعتي اللي سمعته.

– ما سمعت شي نامي.

– وين جنت.

– ما جنت ميلي وعوفني بحالي اني ما اعرف شي ولا شايفة شي.

اندرت عنها ادعك راسي بالمخدة حتى اوخر الشوفة الشفتها من بالي. انحشكت وياي ونامت بصفي. فد من نامت بصفي كيفت اقلها احس احنا اثنين مو وحدي اخاف.

فد ضل بالي يم الباب اكول على يا ساعة وامي اطب النا من الباب. الشرفة الشقت امي بيها اعوذ بالله منها.

ساعة واني بفراشي عايشة الرعب.

خف الخوف بكلبي همدت شوية فد ضليت افكر امي شدا تسوي؟ وهاي امي لو شبحها.

ضليت اتمرجح بين تفكيراتي واظنوني لحد ما سنحت ونمت.

ثاني يوم كوة كعدتني عفاف تريدني اعاونها بالشقل.

كمت لحيلي اعاونها.

مدنجة جاي ابزل التمن. دحكت اطراف ثوب امي.

شلت راسي اباوع بوجهه ما جن اكو شي حتى كمت اشك بروحي الشفته امس حقيقي لو جنت اتحلم؟

هدرت التمن. رحت لها ادحك بيها حجت: طكنا الجوع شنهي ما مجنج اكلة نترس بطونه منها.

ضليت مدحكة بيها: شجالج يولي مبحلكه بيه مضيعه اهلج بوجهي.

– الشفته امس مو حلم متأكده.

– وشنهو الشفتي.

– شفتج.

– يا صباح الابيض صدك شفتيني اي ما طولج شفتيني دصبيلي ماعون بطني كامت تصوفر من الجوع.

– شفتج ورا الجول.

– شفتيني ورا الجول.

– اي.

– شبيج يمه صايب عكلج شي.

– يمه عليج الله انت لو مو انت.

– هو شنهو الانه لو مو انه يمتى شفتيني يولي.

– امس بالليل عكب الهرجة مالت ابو وهب وسراب.

– يولي شصاب عكلج كبل الهرجة اني نايمة بغرفتج القديمة انت واخوتج.

– بس اني شفتج.

– يهيييي راح نظل احنا يولي روحي جيبلي شي اسد جوعي بي وعوفي احلام العصر.

– يعني جنت اتحلم.

– وانا شمدريني بيج شتحلمتي دمشي.

رحت اصب الها تمن وفوكو مركة ومحتارة شني معقولة الشفته حلك مو حلم اني متأكدة مشيت مو حلم.

احجي وادرم ويا روحي.

حجت عفاف: شبيج تحاجين روحج.

– امس بالكونة امي وين جانت.

– وانه شنهو راعية بامج.

– لا فد اسأل.

– ما ادري عنها.. اكضي شغلج وخلينا نصب للزلم تعبنا يمعودة يلا.

صبيت لامي جاي اروح اودي حجت عفاف: اتذكرت امج امسج جانت بغرفتج متغطاية بعبايتها ونامت.

– انت شفتيها؟

– اي ردت مخدة لجهالي وطبيت للغرفة ولكيتها.

ظليت مبحلكة ما اعرف شلون افكر عفاف تكول شفتها واني هم شفتها. اتذكرت الشوفة الشفتها الفجرية. شجاي يصير.

معقولة صدك هي جانت نايمة.

حطيت الاكل كدامها.

مدت ايدها تاكل واني ادحك بيها.

خاف صدك اتخيل. حرت شلون حيرة.

تعوذت من ابليس وجذبت روحي. ورحت اكضي شقلي خاطر اتمدد.

للعصر شبه اقتنعت الصار امس حلم اني تحلمته مو صدك.

ما معقوله الصار صدك عفاف تكول شافتها بقرفتي وعفاف اعرفها ما تجذب لو اميرة اكول ملعوب بس ما عفاف.

تعديت السالفة وجذبت روحي.

يمكن بس حتى ما اخاف واضل عايشة الرعب كلت الشفته حلم.

دخل ابو وهب للقرفة سراب كاعدة.

حجه: والله بالله اليوم لو ما جهزتنها وعدت على خير تالله لا كلكم تجتلون مو بس هي. تصير السبعة الكاها جاهزة وكسرن كلمتي وطلعن عن امري وشوفي شجري بحالجن.

يهدد واحنا الكل سكوت.

طلع. كامت عفاف زمخت: كافي عاد مو فوك ضيمنا بهالجول تزيديها علينا ارضي بقسمتج وبسج صياح وبجى سايرناج امس كلنا خطية اليوم والله لو ما اتجهزتي اني الاكتلج.

سراب بس الدموع تجري وادحك بالحاجة.

والحاجة دايرة عنها. حاولت تتصل بخطاب بس خطاب من امس واليوم ما بين.

صاحت عفاف عليه اجيب ماي للحمام خاطر تقسل سراب.

اني ثكل ابطني ما اكدر اشيل الماي فطلعت ادور واحد من الولد يشيل عني سطل الماي. عد ما طلعت بسع خطر ابالي حجاية وهب: امج حدرت للجول. يعني وهب شافها ما بس اني شافها مشت للجول.

دحكت وهب رحتله بسرعة نسيت سالفة السطل جلبت بالجول اسأله: اكلك عليك الله امس شفت امي نزلت للجول لو اني جنت احلم.

– اي بالليل شفتها.

– يعني اني ما اتحلم.

– شبيج هييي.

– يمتى شفتها.

– ويا الهرجة.

ضليت ادحك بيه بخوف: عليك الله صدك.

– اكلج ترا الله شايفة بعيني دوخري.

عافني ومشى: حنكة صدك صدك فد تعال شيل السطل اني ما اكدرلو ودي للحمام.

– شوفي غيري.

– قيرك منو دكوم هو لاختك.

ما رضى يشيل رحت ادور صفاء شاله.

سبحت وتقوسلت وجهزت روحها. لليل احنا كلنا ناطرين الملجة وهي هلكد ذبت ادموع تكول السما بشهر كانون مو عيون.

خلصوا عشاهم وصاح ابو وهب: يلا يابه اكربي.

وكفت ادحك بينا واحد واحد هلبت الله واحد منا يخلصها بس محد جان بيده شي.

مشت ورا ابوها ونحيبها ينسمع. اندار لها خازرها: اسمعي يولي لا تفشليني ويا الزلمة قسما بالله اكصبج واذبج بهالجول واخليج تلحكين امج.

سكت نحيبها بس شهكت صدرها جانت ما بالكيف.

دخلت وامي والحاجة تبعنها واحنا البنات وكفنا على اعتاب الدوانية نستمع.

عد ما كعد الزلمة الاخر يريد يملج الرجال مبحلك بيها ومستقرب. حجه: البنت الطالبها سمينة عودها خشن ضعفتها ولا وش حالها.

ابو وهب: هنه النثاية بليلى ويوم يكشن على اسم الله نملج.

– لا اكف. ما هي البنت.

ابو وهب: هذه بنتي الجبيرة اللي انت خطبتها مني امس.

– لا ما خطبت هذه خطبت الثانية بنت كذا تكون مليانه.

– ما عدي بت مليانه.

– البنت هذه ما هي الخطبتها ردها ان جنت عاز علي الرادة ماني رايد شي.

– ما عاز عليك وحدة لجن بناتي الكبار ثنتين هاي والاخرى اصغر منها وانحف.

– عيل الغي الملجة ما لازم.

كام من الكعدة راد يطلع.

لكى جيش نسوان بالباب تدحك واني من بينهم.

عد ما دحكناه تطشرنا وركضنا صار بفلس وحدة ترادمت بالاخرى وطاحت وتعثرت وكامت وهربت.

طلع ليبرا وسراب دخلت فرحانه.

حجت : الحمدلله ربي والشكر، ألف الحمدلله افتكيت، عمة افتكيت. ما رايدني الزلمة، يربي أصلي لك صلاة الشكر على هالنّعمة هاي.

الحاجة : يولي شو سكتي؟ الزلمة هاذ صكعنا. شيكصد وشرايد؟

حجت أمي : يا خوفي لا رايد البالي.

ضحكت : ههههههههه، والله يا أبو وهب دشوف شلون تحلها. رده وانهره عن مطلبه لو كدرت.

عفاف : يعني شكصده؟ رايد منهو؟ حنين؟

الحاجة : أيييه، ما أدري عن شي. أنه كلها ظنون، والله يكول: "الظن ما يغني عن الحق شي".

مدري؟ أكلج يا حاجة، لا تستعجلين رزقج. يا خبر اليوم بفلوس، باجر بلاش. بس أنا أكول، تهيري لضيم ابنج.

ابني ماله؟

مدري. أروح أنام، عيني كامت تغفي. الضلة ورا صاحب صاحبكم ميتة، مثل كاع صبخة، لا تثمر ولا تطلع الخضرة.

عافتهم وراحت للقرفة.

وأبو وهب لحك الزلمة خطاره، ورايد يفهم شنهو رادته.

الزلمة : البنت الذي أنا ردتها كانت موجودة بجمعة البنات على الباب. أنا شوفتها.

ياهي منهن؟ ما عدي بنية سمينة، بس بناتي الثنتين.

كلت لك، إن كنت عازها علي، أنا ما بحال مرا. راح أصير لي شهر هينا بدون مرا. ما يختلف شي لو تحملت الجمن يوم لي ما أرد لداري.

بالله العظيم، والله يشهد إنك ضيفي وعلى راسي وتأمرني وتتخير بناتي كيف ما تحب. أذب حنه جدامك لو ردت. إلا ضيف عدنا مكرم ما يطلع وهو زعلان. لجن أنا ما عرفت الرايدها، وإلا جان جبتها وخليتك تملك عليها الليلة.

البنت ذي شفتها الصبح وهي تراوح عند الحيوان ترعاه. سمينة راهية عن بنات حلها.

صفن أبو وهب : أنت تقصد قدس!

ما عرف اسمها. أنا شفت شكلها وردتها منك بشرع الله ورسوله.

بس البنت هذه مو بنتي. قدس مرتي الرابعة...

چان وجهك

اول ولايات عمري

و آخر دروب الضياع

و چانت عيونك سما لجنحان حلمي

تيهتني و من هذاك اليوم أدور

ما لگيت لحلمي گاع .

دخل أبو وهب مفتر راسه ما يعرف شنهو يسوي.

نده على وسام وكاللها: رايدج إحدري هين.

راحت نزلت وياه من البيت للجول: الزلمة ما رايد بتك رايد مرتك.

اندار لها: عندج علم؟ حاجيلج؟

– وعليش يحجيلي؟ اذا هو حجه بتفاصيلها جدامنا.

– رايد قدس.

– وانت شنهو الاستفاديته من قدس؟

– واطي مرتي.

– عجل اطي عمرك.

– شنهي الحجي هاذ؟

– الزلمة راد منك مرة وقدس ما صارت مرتك.

– شلون ما صارت مرتي؟ الحرمة حرمتي.

– صارلك شكثر من خذيتها؟ اسالك بلا حيا جم مرة واطيتها؟

سكت: من يوم الخذيتها ما تهنيت.

– من كون ماخذها منفوسة.. طلكها واطيها.

– بلا عدة.

– انت كاربتها.

– المرة حرمتي.

– اذا قدس هالكثر عزيزة عدك خليها، بس اعرف توالي هالمعزة ضيم.. عبن هالزلمة لو رديته ما راح يخليك بحالك.. راح تضيج كاع الله وسماه عليك وعلى عيالك. بيت الجول صار مكشوف.. وبيتك لكطوه.. وين تطي وجهك بكومة هالعيال؟

– عجل انا المن صحتج هالدايخ بيها؟ السالفة اشبه بالواحد البين نارين لا كادر ارده واعمي على روحي ولا انا اكدر اطي بوحدة من حريمي.

– وحدة اهون عليك من روحك وبقية عيالك.

– كولتج اطيها.

– هذا افضل حل.

– وعدتها.

– كول عد ما لكيتها ماخوذه ما كربتها. كشت روحي منها. صح البت خسرت عذرتها بحادث بزغرها. بس انا روحي ما ودتها بعد.. وطلكها.

ضل واكف متبسمر ما يعرف شيريد.

هدته وسام بحيرته ودخلت جوا.

راحت لكت قدس جاي تفرش.. اشرتلها.

قدس ظلت ادحك: ها؟

– اكربي رايدتج.

– شنهو؟

مشت وقدس لحكتها دخلت للغرفة وصكت الباب: شني يمه؟

– انت مو رايدة الفكة من أبو وهب؟

– اي.

– عجل تهيري وتحضريلج علاكة وضمي بيهن الخفيفات اليطلعن بيدج وتعتازينهن وغطيهن عن العين.

– عليش؟ وين راح اروح؟

– ظلي وراي ولا تسولفين لاحد.

– فد وين اروح؟

– يولي ع اكلج ضلي وراي ما تفهمين.

– ضليت وراج وهذا حالي. انا رايدة افهم شني.

عافتني ومشت. ما ردت علي. فد ضجت عبن ما فهمت شي.

شني الفكة من أبو وهب وشنو اهيرلي علاكة قراض؟ ضليت ادحك وراها. صفنت: خاف تطلع مو امي النوب. اني يمكني طكني فيوز براسي من كون عكلي ما احسه بمكانه ومعداعرف اشون افكر.

بس للاحتياط حضرت علاكة وخليت بيها دشداشة وملابس داخلية وكم قرض. تانيت يصير شي على حجاية امي. فد ما صار شي قوي. عادي شفتها تمددت بالهول ونامت. ولا كن صاير شي. اطمنت ونمت.

فد سمعت حس خطاب جا بالليل. يحجي ويا امه.

طلعت من القرفة عد اطمش عليهم. امه خزتني بعيونها. هو ما دحك عليه. ابتعدت منهم. فد ضليت ادحك عليه ما اندار ولا راواني وجهه. رقم شاف امه خزتني.

اندرت ورجعت. حت هو ما عد يهتملي.

فد هذا الاحساس ضوجني. ما جاي احس لاحد مهتملي واني هذا حالي. عجل باجر عكبة لو كبرت بطني شلون بيه؟ واخاف اضل ورا امي. خافها مو امان. اني ادري امي ما حبتني ولا عمرها ودتني. فد شلون راح تشيل حملي؟

نمت واني افكر ابطني. فد حيل اتضايكت واختنكت وبجيت. احس حمل بطني حيل ثكيل علي. لا اني الكدر اخلص منه ولا اكدر اجيبه.

نمت والحسرة بگلبي.

ثاني يوم كعدت الصبح لكيت سراب كاعدة من الصبح. مدري شعجب. كتلها صباح الخير.

بسع افترهت وكالت: يا صباح الخير. ما تتصورين شكثر فرحانة. ما نايمة ليلي من الفرحة.

– عليش؟

– جنت اضن خطاب راح يهدني انخطب لهذا الما ادري منين. بس ما هدني.

– وشسوا؟

– امس عمتي حجتلا شلون ابويا رايد ينطيني لهذا الغريب. وهو كلش صار عصبي وما قبل وكال الها مستحيل ارضى سراب تصير لواحد غريب.

– فد القريب ما رادج وانتهت السالفة.

– منهو كال انتهت؟ يمكن يقنع اليوم ويودي شمدريني.

– وتالي؟

– خطاب حجه لامه تحاجي ابوي بموضوع خطبتنا.

حسيتها صكعة على راسي بهالصبحية. مثل كراكيع وصابت گلبي. تخضخض حالي. ما عرفت شحجي. كتلها: عادي شكو بيها؟

– ما فهمت شنو يعني شكو بيها؟ ليش عدج اعتراض؟

– اعترض عليش؟ واني ياهو ماتي حتى اعترض.

– عجل ليش ما تباركين بدل ما مصكوعة هيج ومغثوثة؟

– لا مقثوثة ولا شي. الله يهنيكم.

عفتها ومشيت. فد اختنكت حيل.

صدك ضاكت كاع الله وسما بهالساعة.

طلعت طحين وعجنت خاطر افضي قهري بالعجن وادعك بيدي قوي. فد ما بالكيف. عيوني كامت تهمل.

حسيت اني لا شي بهذا الوجود.

شايلة ابطني حرام. لا اني لرجلي ولا اني للهواه كلبي.

وامي ما اعرفها بشر لو مس من نار. ومعداعرف ارضي من سماي.

رديت القطا على العجين ودثرته وطلعت للمراح.

ارعى الحلال بضيجة نفس. حسيت احد كرب يدحك بلا ما ادير. صحت: اليدحك عليش ما يكرب ويحجي العدا. خايف مني؟ لا اهش ولا انش. فالحة اذلع ضيجة خلكي بهالحلال.

اجاني صوت: وليش كذا معصبة؟

اندرت بسع عد ما سمعت اللهجة. ادحك واشوفه الزلمة الخطب سراب: ما تستحي تفتر ابيت كلو حريم.

– بغيت ادخن هالسيجارة وشفتج مريتي.

– ومن مريت اطيت لنفسك حك تتبعني.

– بالهداوة يا مرة. لو ما جنتي مرتاحة هينا اكدر اخذج بعيد.

– اني اكول لو تروح للعيد وتعوفني بحالي.

– حالك وانت معصبة كذا اجمل بكثير من انت وهادية.

– انت منهو؟

– امس لما كنت خاطب من ابو وهب كنت خاطبك.

– وانت اللي جنت تراقبني كل هالمدة؟

– انا.. بس.

وسكت.

– بس شنهو؟

– ما عليه. انت لو بغيتي تروحين معاي وتتركيني الديرة هينا. انا كلي تحت امرج.

– انت تدري اني متزوجة.

– امس ابو وهب وهبج لي. وكال زواجكم حجي شيخ ما كاربج.

– وهبني الك.

– وش رايج؟

– وهو منهو الماخذ رايي خاطر تسألني عنه.

انداريت منه. شلت السطل شمرت الماي خاطر اطلع من المراح. وهو واكف كرب خطاب وهو يزكح ويصيح: انت هين شعندج هينا؟

وكف ويا الزلمة وكاله: ان جنت خطار خالي. فانت مالك كدر عندي. فارك من هينا.

الزلمة تقبلها بصدر رحب. هده ما تناحر وياه ومشى.

عد اريد امر اطلع. كضبني من من ايدي بكوا: شنهو الموكفج وياااااه؟

– وانت شلك غرض؟ ياهو الجا وحكمني ووهبني على كيف كيف. انت تحب وتهوى وتهون وتعوف على كيفك. وابو وهب ياخذني ويتزوجني ويوهبني على كيفها. واني متفرج. لا الها حس ولا الها راي بيه. واني يا مسكين الك الله. من ايد لايد مثل السبية.

– دحكي هين.

– لا رايدة ادحك ولا رايدة اسمع شي. هدني بحالي. لان والله روحي طلعت وما عدت احمل روحي.

جريت روحي منه واني احجي.

اني بشر ما لعبة باديكم تلعبون بيه. محد بيكم يخاف الله. والله تعلت منكم. الله ياخذكم كلكم. صارت بوجهي ام خطاب: ها يبومة الشر شجالج؟

– ابعدي من عدي. لا والله اطك بيه. افضح عن اللي ابطني وافضحكم. وما مستعزة بروحي. خلي اليجتل يجتل. واليتناحر بالموت هو والتناحر وياه.

دفعتها من عدي وفتت جوا.

بس النار جانت مستعرة بكلبي. اول مرة اوصل لهالمرحلة من العصبية. فد غيضي وصل حده. وما عدت احمل يوهبني واني مرتا. واللاخ يخطب ولا حاطني ابالي. اني شنهو من بينم؟ عليش هيجي يلعبون بحالي. لين ما عدي السان وادافع. لين ما اعرف اشكف ضيمهم عني. ما عدت اطيك الحال. كلش فاض بروحي الهم.

كعدت بالقرفة ابجي. ما طلعت ولا حجيت ويا احد للعصر.

ومحد حتى ذكرني. لو اهتملي. لو دحك علي. لو كالي تعاي تريكي. تقدي. ولا حت امي. صدك هانت روحي بعيني.

شايلة طفل ابطني. وين اريد بيه؟

اني ومحد بحالي ومحد دايرلي بال. عجل لو جا للدنيا شلون؟ واني ما مدبرة ادير روحي واحميها منهم. شلون اجيبه وشلون اخلص منه؟

كضيتها بجي وكطعت الاكل والشرب. صدك بلكي اموت وافت. كلش هانت روحي علي. لليل طلبني ابو وهب. ما طلعتله. جا للقرفة يكلي: انا ما ندهتج. عليش ما تجين؟

– توهبني لزلمة ما اعرفه ولا يعرفني. ما مرتك اني. ما انت الخذتني واتكفلتني. توهبني له وكني سلعة مو بشر. ما عندك قيرك انت. ما تستحي على دمك؟

فد كلتها. انهد عليه يطكني. وتولاني بعوجيته على راسي.

دخلن هن يحاملي من عده. رمى يمين الطلاك علي وكال: مطلكة مني بالصلاث. لا بارك الله بعمرج. من يوم الشفتج واجبلتي ما شفت غير المصايب. بيتي انهدم يوم الدخلتي. وما ارتحتي الا تهججنا. خلنا اخلص من هالوجه النحس. تفوووو عنج وعن حالج. طالك يالنحسة.

ما رديت ولا حجيت. فد دموعي ضلت وحدة ورا اللخ تكت.

شكثر حسيت بروحي رخيصة. وما قالية عد احد. وجهي نحس.

عليش يكول بيه هيج؟ اني شنهو السويته؟ شلون اخلص من روحي واموت؟ والله ما اعرف بيا طريقة اموت. اتمنى اكتل روحي بهالساعة وافتك.

دورتلي على شي اكتل روحي بيه واكتل البطني وافتك. فد ما لكيت. اذب روحي من سطح. سطحنا ما عالي. اطيح وانكسر واضل عالة وازيد على روحي. سم ما عدنا. سجينة ما عدي جرأة ادج روحي. واخاف ادجها. وفد يطلع دم ما اموت.

صفنت بروحي ليا حال وصلت؟

ادورلي طريقة اموت بيها.

شنهو ذنبي؟

كل الصار بيه ذنبهم.

واني نايمة بالليل. ندهتني امي.

– يولي اكعدي. قدس احاجيج. اكعدي شني دثو ونايم؟

– شرايدة؟

– كومي اكلج.

– شنييييه؟

– وشنانه التشنج؟ هششش راح تهيضين الكوم.

كومي كامت روحج

– شرايدة مني

– البسي ربطتج وعباتج وانكابج واطلعي

– وين

– لمجان مالو رده

– ما اروح لمكان ما اعرفا

– عجل ضلي روحي ويا هالگوره الوهبج اله خله يتمتع بيج جم يوم ويوهبج لغيره وعلى هالحال واردى عسنج

عافتني ورادت تكوم كضبتها: يمه عليج الله كليلي وين تريدين بيه بس تعبت

- يولي ظلتج هين وروحتج ويا هاذ معناتها جتلتج نسيتي اللي الطنج لو حد درى بيج حبلة يولي يشج راسج نصين كومي ولا تسولفين .. كومي

كومتني بسع لبست الربطة والنكاب والعباية وخذيت العلاكة وطلعت اتختل .. طافية الكهرباء انسليت منهم وطلعت ليبرا لحكتني امي تحاجيني: طري هالبستان هاذ راح تلاكين سيارة تنطرج صعدي بيها

– ووين راح تاخذني

– امشي وبعدين تعرفين

طريت البستان وعبرته صدك لكيت سيارة ركبتها .. جان زلمة ما اعرفوا نايم بيها .. عد ما ركبت فز ما حجه وياي ولا نطق فد شافني حرك السيارة ومشى

الدنيا ليل وظلمة والدنيا تخوف كلها تسليب وكتل هيمة ماكو ناس عينك وما تمد كاع مفتوحة .. والجو جنه كاسر بيه لسعة برد

ظل يمشي بيه ما يقارب ثلث ساعات طرت الشمس يلا حطني اباب بيت .. نزل من السيارة وكال: انزلي

نزلت وياه وهو فات للبيت

عد ما فات تلكته مرة كالتله: ها اجت

وصرت كبالها كالتلي: هلا بيج تفضلي

حجتها بس مو من هواة ما ادري ليش حسيت البنت ما رايدتني

دخلت للقرفة وكعدت اتاني

شوي واجت جايبتلي جودلية وقطا وكالت: نامي اذا تريدين

– اني وين

– انت بخير ما عليج شي

– شتعودين لامي

– وهي منهو امج

– ما تعرفيها

– ما اعرف احد احنا مامورين نامي ولا ادوخينا

عافت الفراشات ومشت ظليت ادحك منا منا

اني وين ظليت ساعات فد اريد اعرف حالي شنهو ووين ما عرف.

صحت اميرة وهي تغسل فروخها بس خلص الماي وهي جاي تغسل ندهت على قدس تعرفها تكعد كبل الكل صاحت: قدس كاعدة قدس جيبيلي الماي

من ما ردت راحت جابت ماي وعسلت الهم ومشت لغرفة قدس: قدس

انصدمت ما هي: وينها هاي

دورتها بالبيت تفكدت المطبخ محد عاجن

راحت للمراح مقفول بعده محد كاربه: وينها هاي

دورتها بكل مكان ما هي صرخت: يبوووووووووووووو

والكم الحكولنا البت ما هي شررررررردت ريسان اكعد ريسااااان

فز البيت مله على صريخ اميره: خير

– يا خير اليجي من هالسمينة .. البنت ما هي

سليمة: وينها

دخل خطاب: شنهو

دخل وهب .. وريسان اجا يركض واميرة تصرخ

صرخ خطاب: وينها شنهو الماكو دورتيها

ريسان: يا هي احجو منهي الشردت

اميرة: قدس ما هي ريسان تصخمت روسنا شلون بيك والزلمة مواعدة تطيها اله انولينا ييمة

خطاب – يطيها المن شوفيها يمكن فوك لو نايمة بفد مكان لو نازله الجول وهب تعال وياي خل ندور الجول

ريسان: شردت شنهو الزلمة واعدتة شلون تشرد وينها دوروها

الحاجة: عسى البين كارفها دام افتكينا منها شلنا بيها

انهد ريسان على غرفة وسام يكللها: اصحي بتج وين

فزت وهي تصرخ يمه وين بتي

ريسان: مسوية روحج ما تدرين عنها هسه اطلعيها الا ادفنج بمكانها اليوم تطلع ابتلي بيكم والله

كامت تصرخ وتلطم وسام: صخام ييمة بتي ما هي

كامت تركض ورا خطاب ووهب وتصرخ: يمه بتي ما هي

الكل يدور والبيت اختبص وابو وهب انصكع على راسو عد ما تنازل عن مرته وطلكها في سبيل ما ينضر من هاذ الغريب وقدس دكت بيه وشردت وخلته بحال اسوء ويا هالغريب

سليمة ما خلت حجاية ما حجتها على قدس ودعت

واميرة تحرض وتكله: اذا جنت مصدك بامها جاي تغشم روحك .. الدك والمدكوك يم امها هي الشردتها قدس بطيخة بيضة لا نفع ولا دفع ولا يطلع منها هيج فكرة وتشرد بهالحول بالليل السالفة لامها

بهالاثناء دخلت وسام وهي تصرخ ريسان كاعد ريسان البت ما هي وانت كاعد امشي كوم شوفلي وين حالها بتي ما هي

صاحت اميرة: ومن يمتى همج امر بتج وهيج كاتبه روحج عليها لو ما جاي تمثلين نجلاء فتحي ما تلحكج بالتمثيل شردتي بتج وعفتي الضيم على روسنا احتا الراح ننضر ونتهجول

فز ريسان يصرخ: لو دريت الج ايد بشردة قدس يا وسام تحكمين على روحج بالاعدام

– اشردها واني النصحتك تطلكها وتوهبها وما تضر روحك وعيالك تالي تعبي وياك هيج يريسان تصدك بالحية تختانك بظهرك ويا بزرك وتجذبنيييي

صفكت اخدودها اميرة وهي تكللها: عمت عين كلبج اتهميني هالتهيمة يا باطلة

كام يصيح ريسان وهو يكللها: شنهو قصد جلمتج يوسام احجي

– اميرة خل تحجي سر بتها وفضيحتها حبلانه من ابن اختك وجاية تتهمني حسبالها كل الناس مثلها ومثل بتها لا شرف ولا دين

صرخت ام خطاب ولطمت على صدرها وصرخت: يظالمة يمفترية اطيحين بين الخال وابن اخته يا ما تخافين من الله خذاج الله كون

ووسام تكللها: اتهمين بتي يحية يركطة يهجامة البيوت ساعة ووكت تتخوتلين ويا ابنه وتردين على قدس الما تعرف ذيلها من كفاها … يولي اليوم ابرد نار كلبي بيج

عدت وسام على اميرة والحاجة تصرخ وتعيط عليها وريسان يصيح ويريد يفهم ومحد منهن بحاله تلازمن وصارن دمايا كضب عوجيته وتولاهن رايد يفهم منهن شهالمصايب الجاي يحجنها

اميرة: يجذبن عليك ذني رايداتلك الضر جيف اني مرتك والساندتك وواكفة بظهرك تاهماتني بشرفي عساهن بحظهن وابختهن على هالتهيمة هاي

وسام: يولي لو ما شفتج بعيني

– حرام عليج والله حرام ولو المثلج تعرف حرام لا تصدكها والله بتها حامل ومن خطاب .. خطاب هو الكرب قدس كبلك ما مثل ما كالتلك صاير وياها حادث وهي زغيرة

الحاجة: ابني ما يسويها يا جليلة الاصل ولج ما تخافين ربج تهجمين بيوت بس مو جذب اني جم مرة شفتج ما تجوزين من وهب الولد يكلح ابعدي اخاف من ابوي وانت لازكة لواحد بكد بزرج اكول باجر تعكل عكبها التوب ب الماي يروب والك ما اتوب

ابو وهب: يولي انعل ابيجن لابو توالي الخلفوجن شنهي قدس حامل من خطاب شنهي اميرة خاينة ولجن هيدة هيدة رايد افتهم اليوم اركجن حرك كلجن

طب خطاب وهو يكله: قدس ما هي

كضبه ريسان من هدومه وكلاله: البت عدك ماكو غيرك ماخذها تدكها وياي خطااااااب

تلازم وياه خطاب وذبت روحها سليمة بنصهم وهي تكله: تصدك هالحية وتجذبني لو هاوي قدس ورايد يدك وياك ما يخطب بتك ورايد يناسبك خطاب ربيب ايدك يريسان لا تصدك يخونك

خطاب: تحاسبني وانت الخذيتها مني وجاي تتهمني وياااااها انت السبب بضيعتها هاي لا خليتها الي ولا انت الراعيتها طلكتها ووهبتها وخليتها تشرد البنية ضاعت بسبببك

تكاونوا وصريخ وهوسة وعفطزة

وما تعرف ياهو اليحجي وياهو اليصرخ .. عد ما التفتوا هيج وهم يصرخون وسام كالت: اميرة وينها

اندار ريسان يدورها

طلع راد ما هي حتى جهالها ما هم حجت حنين كالت: شفت وهب خذاها وطر بيها البستان

انجن ابو وهب كضب اسلاحه وسيارته وطر الجول

وخطاب هد على امه جرها وكاللها: ضامه عليه قدس حامل

– هش ولك لا تبليك

– البت حبلى مني وتكليلي هش باليتها بحملي وانا اخر من يعلم انت منهو الوكلج عني وخلاج تتصرفين انا زهكت تصرفاتج واسلوبج مرمرتيني

– وشرايد يولو تجيب جاهل وتعلكه براس خالك ما كفاك سراد وجهك البليانا بيه وفوك شينك كوات عينك ورايد خلفتها

تكاون خطاب وياها وتناحروا هو وامه والبيت شب نار

خطاب وامه وريسان راح يهد ورا اميرة .. وسراب انجنت من سمعت الصار وخطاب يتناحر ويا امه لجل قدس

هنا وسام كعدت واخذتلها صفنة وهي تتبسم بخبث وتكله: بعدك يريسان ما شايف مني شي لا ما خليت نارك واصلة السماك مثل ما سسمتني ابزري وخليت نار ابني شاعلة بكلبي ما اطلع انا وسام .. ثار ابني اخذه منك ومن عايلتك والا اهجمها فوكك وما يشفي دمي .

ابو وهب طلع .. رجع لكى خطاب ما هو متكاون ويا امه و طالع واميرة ووهب ما كضبهم .. رد وهو يصرخ ويتكاون ويا ام خطاب ويكللها: ابنج هرب عكبهم يسليمة كل هالمصايب جارينها من تحتي وانا ما ادري ابني ويا مرتي وابنج كارب قدس كبلي ومحبلها

– جذبت وخاب جذبها ابني ما هرب ولا بعمره راح يهرب ابني سبع ويوكف بوجهك ويواجهك لو عده شي وياك .. لجنه راح يدور هالعايبة ويردها خاطر لا ننضر من كون مضرتك ما تضرك وحدك كلنا ننضر يريسان انا بناتك جهالك مرتك .. كلنا نروح بيها راح يدورها بلكت الله يلاكيها ويشعفها من راسحها ويجرها سحل لهين وتطيها الهالضيم ونفتك

ضل ريسان متزوهر ما يعرف يدور قدس ويطيها لو يدور اميرة وابنه وينحرهم .. يروح ويجي ويدك على راسه ويغلط عليهم ويصيح: لا بارك الله بعمركم يولووو ول كل هالمصايب امشيها من تحتي وانا لاهي وما ادري عنكم اكضبج يقدس واطيج لو ما اكضبج .. واخ يا اميرة انت اصلبج بجهنم وما افتك منج اعذبج بيدي … جنتو تدرون بيها خاينتني وساكتيييين راضين بعاري وبجرمها وجرم وهب

سليمة: جان بودي اكلك بس خوفي على وهب هو الكضبني الولد جاهل وهي لاحسه عكلو مرا بكبر امه مستغلتو بالفلوس والمداراة ومخليتو الها عشيك لا خافت ربها ولا استحت .. خفت اكلك ويروح هالمسجين بجرمها

وسام: انا اول امس شفتها وياه وخفت احجي واطلع هجامة بيوت بس عد ما شفتها تتهم بتي وتظلم بختها لا والله ما اسكت قدس لا تهش ولا تنش ولا تعرف هالدروب بت بريه وما يطلع منها هالفعل .. وانت تعرفها شلون هوش الله بارض الله

كامت تخزها الحاجة وكومة ساكتة عن حجيها بس وسام زادت وداست ابطن الحجية: شكثر رادها خطاب شكثر رغباها تشرد وياها شدت رايتها وكالتله ما اخون زلمتي حتى جتل راد يجتلك وانت مريض وهي الما رضت ودفعت الموت عنك .

فزت الحاجة وهي تصرخ: ايا الركطة يالسمة اتذبين بسمج على ابني شرايدة

وسام: شنهي باطل انكري وكولي موش هو الفجر السيارة وراد جتلة خالة

– لا مو هو

– كعدي ابنج وشهدي اذا نكر حجيج هاذ لو ما نكر .. الضيم ضيم هالدثو الاطيتها وذبيتها بينكم وهي لا فهم ولا علم وتورطت بيكم

كام ريسان يصرخ ويغلط عليهم وهو يكللهم: بسكم مني ولكم فكووووني وحدة وحدة علي بالمصايب راح يكف مخي ولكم انتم بيا طريقة انتقم منكم احط جيلة براس كل واحد منكم .. لا والله اربطكم واعلكهم واشعل النار تحتكم واشويكم وما ايبرد دمي منكممممم

جاي يحجي .. جا خالد كاله: يابه ابو مصعب طالبك

دحك على وسام وراح

– ما فهمت

– البنت شردت

انتفض ابو مصعب وهو يكله: الفلم هذا ما يمشي علي كول ما رايد انطيك البنت وعزيت عليك هالمرة …

– تالله ان طلكتها امس لجلك لجنها صبحت شارده انا وولدي من الصبح ولهساع ندورها وما هي

ما صدكه هاذ وتكاون وياه وطلع منه وهو يتعودله وغضبان منه .. ريسان طب للبيت وهو يدك على راسه ويكللهم: ضاكت الكاع بيه وين رووووح يولي وسام بتج لعبت بحالي وساااام .. يولي شسوي بحالكم اخ الله

ولكم جابلوني وكلولي شسوي

الكاع غاد ما نكدر نواطيها بس نكرب ننمسك ولو ضلينا هين ما نسلم منهم ..

الحال شلون كلولي راح أتخبل يولوووو

وسام: كلهم يلمون غراضهم وامشوا

- نمش وين؟

- للمحمودية

- وياهو النا غاد؟

- أعرف ناس يطونا بيتهم، أخوي غاد كاعد، بس هالفعل له نصيب

- وشنو النصيب؟

- تنحرلي نهلة وإخوتها وتجيب لي جهيل ابني منها...

نحن العراقيين حين نعبر عن فرحنا بشيء ما نقول عنه "يُرد الروح" وهذا تعبيري عندما رأيت وجهك أول مرة.

قدس: ذبيت روحي فرد دور على النوم، عبن الليل ما شافت عيني نوم. والمرة شعلت لي مبردة، صالي كثير ما نايمة عليها ببيتنا، ما نجيبها لين جو والجو ما كلش حار، النسيم يلعب بالبيت لعب من كل صوب والمروحة مشتعلة. وهم ماي ماكو، نترس مبردة كل شوي، يا دوبك للسبح وبالتواسيل يلا واحدةم يجيب لك سطلة ماي. عقب هالعيشة الكشرة نمت بهالمكان نومة هنية، لحد كعدني لحد صحاني مشغلين هالمبردة والجو فيه برودة ومتقطية بالبطانية ومدثرة أدثر، وما بودي أفتح عيني وأقوم، كلش أرتاح من أشم ريحة المبردة.

فكيت عيني ثقلانة كلش ومتوثة نوم. دحكت الساعة جدامي بـ 4:30. دحكت الغرفة فيها ضوء خفيف، عصر هذا أو فجر. حسيت اكو حركة يم راسي، فزيت من مكاني بسرعة واندريت.

إلا خطاب كاعد: أنت شجابك هين وأني وين؟

ـ يولي فززتيني، نعلة على غيرتك.

ـ أنت متفق ويا أمي؟

ـ ارتحتي بنومتج؟

ـ أنتم شرايدين مني؟ والله ما عدى أفهم.

قام من مكانه، فزيت بسرعة كضبتوا ومنعته يقوم: وين وين وين؟ هسه تكلي أني وين؟

ـ أنت بأمان هين.

ـ أي فد كلي أني وين.

ـ وشيفرق عندج إذا كتلج؟

ـ أكلكم أني مو حيوان، بشر مثلكم وأريد أعرف شدا تسوون بيه، كافي محد جالي منه خير، كلكم شفت الضيم منكم.

ـ أنا؟

ـ أنت أول واحد.

ـ وشنهو الضيم الشفتي مني يولي؟ لو ما أنت اللي دكيتي بيه ورديتي لأبو وهب؟

ـ ما تتصور الشفته منك شنهو، حجاية اللسان سهلة.

رجع لمكانه ودحك بيه: قصدج اللي حملتي بيه ببطنج مني.

اندريت بسرعة: شمدريك؟

ـ انكشف كلشي والدنيا تلايمت وراج. بس ليش ما كتيلي؟ ليش شلتي حمله وحدج؟ لو واحد منهم فضاحج كدام أبو وهب؟ شنتظرتي يعدمج وأجي أكف على كبرج؟ لو شتانيتي؟

ـ أمك ما رضت أحجي، لعبت بحالي لعب وأني أخاف منها.

ـ وما خفتي تكتلج؟ غير تكليلي أتصرف. اسمعي يولي بعمرج لا تثقين لو تسمعين من واحد غيري لو ما أنوجدت. اسمعي لصوت راسج واعملي، لا تمشين بشور أحد لأن محد غيري يهمه أمرج لو يهتملج. كلّمن راح يمشيج حسب مصلحته.

ـ وأنت شنهو مصلحتك بيه؟

مد إيده لخدي: لتفكرين واتعبين روحج بالتفكير، منا وجاي ما أريد منج غير ترتاحين وبس. أنا موجود.

ـ بس ما كالتلي أني وين.

ـ هذا بيت أختي سهاد، أني بالعادة أبّات عندها. شاركت رجلها بالإيجار وأجرت الطابق الفوك، عبارة عن غرفة وحمام بس أحسن من ماكو لبين ما أدبر أمري. بهالوضع لازم تبقين هين خاطر محد يشك بوجودج.

ـ وسراب؟

حسيته تجاهل الجواب وكام: وين راح تروح وتعوفني؟

ـ ما عايفج، بس انده على أختي تسويلنا مجال خاطر نصعد فوك.

راح صاح: يا الله.

أخته صاحت: هلا بيك، تعال، عثمان نايم جوه.

ـ الفوك محد بيه مو؟

ـ أي اصعد.

رد للدوانية: لفي حجابج عدل وخل نصعد.

بسرعة دنبست، ربطت وشديتها ليورا وجريت العباية خليتها على جتافي وكضبتها وشلتها ومشيت وراه. تعديت من المرة، لا هي حجت ولا أني سلمت لو حجيت، مدري جن بلساني عظم، أستحي من أي أحد ما أعرفه، ما أعرف أسلم.

صعدنا فوك، البيت ما كلش حلو، تعبان. الدرج صبابة ومعرج، باية عريضة، باية كصيفة. صعدنا، وفوك غرفة جبيرة ومنور صغير مسكوف بـ "جينكو" هو وحمام. دخلت أدحك بالحمام، كال: هين مو مثل غاد، يمتى ما ردتي بس افتحي البوري واسبحي. اكو تانكي فوك وأختي يومية تترسه.

ـ أنت راح تعيش هين؟

ـ مو مهم أني وين أعيش، المهم أنت تكونين بمكان آمن وترتاحين لحد ما تقومين بالسلامة.

ـ يعني ما أنزل الجاهل؟

ـ وعليش تنزلي؟

اندار وهو يشرح لي: دحكي هذا أول أمس سكفته هين، رايد أحطلج ميز وأجيبلج طباخ منضدي صغير على كدج ودبة غاز، بس كون الله يمكني. لأن هسه وشلت اللي عندي ذبيته، ع الغرفة كشرتها وصبغتها وسكفت هذا ودفعت الإيجار.

هو يحجي وأني أدحك على المكان: وإذا لقاني أبو وهب شراح يسوي بيه؟

سكت ونزل إيده وكف شرح: لا تحطيه على بالج، شيلي من حساباتج.

ـ فد ما راح أرتاح... قاطعني بعصبية.

ـ هالكلمة لا تحجينها وأنا موجود، كل السويته واللي جاي أسويه لخاطرج، لو ما محسّب لأمري ما أذبح هيج.

سكتت. أخذ نفس ومشى شوية دخل الغرفة حجة: دحكي هين هالساعة بس البوفية عدج، حطي بيها أغراضج وأفراش أختي راح تطيج وهاي مبردة.

ـ راح تضل هين؟

ـ راح أجي وأروح، لين أمي بعدها غاد، ما أكدر أعوفها وهم خاطر لا أحد يشك بكعدتي هين. أنت العليج ارتاحي هينا وأي شي تحتاجين كلي لأختي، راح تساعدج.

حجاها وهو يتفقد الصبغ.

اندار: محتاجة شي هسه؟

ـ راح تروح هسه؟

ـ أي، لازم أرجع خاطر محد يشك بيه.

ـ ما معتازة شي، فد رايدة أعرف صدك راح تخطب... قاطعني قبل لا أكمل.

ـ هسه ضلي هينا ولا تشغلين بالج بهالأمور.

عافني ونزل. ظليت أدحك وراه. جاي يتهرب من الحجي. يعني السالفة صدك وما يريد يكولها. ضجت حيل وكعدت بالساعة صافنة. قمت أتفقد المكان. لشوي حسيت بروحي خرطت من الجوع.

نزلت أسأل أخته على شي آكله. صحت لها: يبنية.

صاحت: هنا تعاي.

رحت للمطبخ كاعدة وتكشر بتيته: فد جوعانة أريد شي آكله.

دحكت عليه من جوه لفوق بس بنظرة واحد ضايج منك وأشرت براسها للطبخ: ذاك الأكل صبي واصعدي.

مشيت خذيت ماعون من السلة وخليت تمن وفوكه "مرق". اندارت أدحك عليها، حجت: راح تظلين هنا لو تاخذج أمج؟

ـ ما أعرف.

ـ لا تظلين ويا خطاب حتى لو يكلج ضلي، خالي ما ينحمل، لا تجيبيله الأذية. خلصج وفكج من ضيمج، شوفيلج معبر لو درب وخلصي روحج.

ـ وين أروح؟

ـ كاع الله وسيعة، شني الواحد ما يعرف يدبر روحه.

ما جادلتها، خذيت ماعوني وصعدت. فد عرفت هي ما رايدة كعدتي. كليت وكمت، غسلت الغرفة والسطح. صعدت كالت: خلصتي التانكي؟ ما يصير هيج، هو الماي وينه وتغسلين بالصوندة.

ـ ما أدري هيج، حسبالي ما يكضي. بعد ما أغسل.

ـ دسدي البوري، سدي.

سديته ونزلت متضايكة. تنهدت: يربي وين ما أروح عاوجة وياي. هاي عود كلي فد ارتاحي. منين ألكي الراحة وأني بكل مكان يطلع لي واحد يدوس بمصراني. بس شسوي، جان لازم أتحمل.

ضليت هينا يومين، حاربتني حرب نفسية دمرتني. فد تسمع أفتح الماي صاحت: ما مليتي من الماي؟ خلص عليج، بسج. الأكل انزل مرة آخذ أكل وأستحي، مدري أخاف أنزل مرة لخ وأطلب. خطاب بالليل يجي وأني ونايمة فد ألكاه نايم بالسطح، ما بالقرفة. ويحط يم راسي جيس بيه لفتين فلافل وجبس وشربت لو نستلة. فد أفرح من أكعد والأكي ذني يم راسي، بسع أكعد آكلهن كلهن فرد مرة، فلا أحسب حساب وأكول أبقى للنهار، من أشوف أكل أفقد. آكلهن كعدة وحدة وأمل من الكعدة وأنام. ومن أكعد ثاني يوم الصبح ألكي خطاب طالع. والأكل ما أكلته وأرجع أتحرمص شلون أجيب أكل وأخته ما تطيك تشوفني.

ثالث يوم كاعدة الظهرية، جانت الكهرباء طافية، فد الجو ما كلش حار كسر. أجا خطاب وهو شايل تلفزيون صغير يصعده، كمت من مكاني بسع خاطر أتلكاه من إيده. زكح بيا: دوخري يمعودة، شتشيلين.

ـ فد أشيله عنك.

ـ يولي مو حبلى أنت، دوخري.

ركضت بسرعة فتحت له باب الغرفة، نزله وكال: أكعده ع البوفية مو أحسن.

ـ بكيفك.

جر البوفية وكعده وظل يشتغل بالوايرات ويصعد للطابق الفوك ويرد. أنوب كالي: طبي للحمام.

جاب رجل أخته وكاموا يشتغلونه. ليقاد كملوا وصاح لي: يول دبة تعاي هين.

طلعت من الحمام: منهي الدبة؟

تبسم بتعب: جبتلج التلفزيون هذا وجريتلج واير من الصحّن مال الجيران.

ـ يعني بيه أفلام؟

ـ أي، بيه فوك المية قناة.

شال الريموت وهو يكلب بيه: هاي روتانا سينما، كلها أفلام. راح أخليها الج رقم واحد. يعني دحكي بس أدوسين على هذا الواحد، هي تطلع لج بسع. خوش.

ـ خوش.

سواها. حجيت: أبو وهب شسوى؟

ـ محتار بروحه، أبو مصعب طلع من الجول غضبان ويريد ينفذ بروحه بأسرع وقت.

ـ أنت جنت متفق ويا أمي؟

هز راسه وكال: كون حجيتي شي لأختي؟

ـ لا، فد هي ما حابتني.

ـ معليج بيها، ما قاعدين عليهم، جاي أطي وياهم إيجار وفلوس مولد.

ـ ما أدري، ما ترضى أفتح الماي.

ـ هسه أنا أحاجيها. محتاجة شي هينا؟

ـ رايدة تضل هينا، جاي أخاف وأضوج وحدي.

ـ بالوقت الحالي ما أكدر. إذا تحتاجين شي خابريني منها.

ـ ما راح ترضى تطيني أخابرك.

ـ عود كلي لي إذا ما رضت.

ـ أروح أفتن وتكرهني بالزايد. أنت يومية تعال.

تبسم وبأصبعه طخ خطي: مرتاحة؟

ـ أي، أحسن من العيشة كاد.

ـ والحمل خو ما مأذيج؟

ـ ما متعودة أحد يسألني عني هواي، لا تعوديني وبعدين تعوفيني وأنقهر.

ـ أعوفج ليش؟ من كل عقلج تظنين بيه هيج؟ ما وعدتج أخلصج منه وخلصتج؟

هزيت راسي وما حجيت. جنت أقصد غير شي، مادري فهمه وتجاهل لو ما أعرف شنهو وضعه. ما حجه أي ولا حاول يعرف ليش كتله هيج. غير الموضوع وكال:

ـ تدرين شلون؟ اليوم راح أضل وياج للصبح يلا أروح.

تبسمت له. جر الصوندة وبلل حيطان الغرفة من برا وكالي: امسحيها خاطر نكعد.

مسحت وشعلت المروحة وجاي أكعد كال: شتريدين أجيب عشا؟

- لو عدنا جولة جان أني ركبت.

- بس خلي الله يرزقني أروح أجيب طباخ ودبة بس الغاز غالي حيل يمكن أجيب جولة ندبر نفسنا بيها لحد ما شوية الله يرزقني وأجيب. هسه كليلي شتريدين أجيب؟

- تذكر اللفة الكليناها كبل البيها لحم حامض.

- كص.

- أي عفية لحد هسه طعمه بحلكي شكدشتهيته وأني أتنسى فد ما كلت لأحد.

فتح محفظته حسب فلوسه وكال: تريدين شي ثاني وياه؟

- إذا ما عندك عادي جيب فلافل هم طيبة.

تبسم: ول يدبه خايفة علي وما تريدين تكلفيني.

- لا تكلي دبه.

ضحك: - الأ دبه ونص يولي.

- والله حرام عليك لا تقلط.

- يول يدبه هو أنا شمولول گلبي بيج غير الدبدبة مالتج والقلقلة البالسانج نايمة بكلبي.

سكتت: - أروح أجيب الكص لابني وأجي.

- ابنك ياهو؟

- حمودي اللي ابطنج.

تبسمت وهو قمزلي وكام. تنهدت: شكد حلو وجوده.

من هو موجود كلش ارتاح ما أكوم أتضايك من شي أحس هو يشيل عني هم التفكير بكلشي. وأكثر كلمة تهيم گلبي من يكلي ( أنت بس ارتاحي) ويدور راحتي. أول واحد بعمري يهتم بيه ويهتم لأمري ويفكر عنني كل عمري منسية محد حاطني على بالو.

فد يضوجني من يكلي دبه.

يعني صح سمنانة كلش على الحبالة فد ما يصير يعيب عليه.

هو مو يحبني. دبه. شني دبه؟

شلون أضعف يا الله والله ما أعرف أضعف.

راح ورجع جايبلي لفتين كص هينا أني نسيت الدبة وفتت باللفتين كول. بعدين دريت هو جايب لفتين لفة الي ولفة إله فد أني حسبالي بس الي لحد ما شفت يدحك عليه ومتبسم.

- شبيك؟

- بقى الطرشي تريدي؟

- لا أكله أنت شني ما تشتهي؟

شو أني حجيت هيج وهو طك من الضحك: - يولي أتعشى طرشي أبخت الله.

- عجل ليش ما جبتلك عشا؟

ضحك: - نسيت.

- فد لا اللفة الكلتها الك.

ضحك: - هههههههههههه ألف عافية.

- والله حسبالي بس الي هسة شلون؟

- هسه أنزل أخلي أختي تسويلي فد شي لا تهتمين ألف عافية أببطنج وعلى اللي أببطنج.

- يعني تريده الطرشي لو أكله؟

ضل يضحك بقوة وانطانيه قد يريد يسكت ما يكدر: - عفية والله أني أحب الأكل أكثر شي أحبه بحياتي الأكل فد يعني أكل أنسى روحي ما حسبالي تريده.

- يولي دكلي ألف عافية هسه أنزل أجيب بعد وأجي.

نزل يضحك واني ضليت مركزة ويا الفلم صعد أخته مكليتله طاوة طماطة ومتروسة زيت دهينة ولاجعة وريحتها طكت بعظم خشمي.

كال: - تريدين؟

- لا فد أشرب جاي عادي.

- دكومي لج دبه كومي كابليني.

ضحكت وكعدت أكل وياه بالطماطة وجاي وهو يشرحلي ع الفلم ويسولفلي ضلينا نطمش ومندمجين.

دك تليفونه. دحك. حجيت: - منهو؟

أشرلي أسكت ورد: - الو.

وهب: - هلو خطاب أني وهب.

- شرايد ولك؟

- عليك الله اسمعني أنا أورطت روحي وتورطت أدري بس والله ما عندي مكان أروحله ولا أدري وين أروح وأبوي إذا يكضبني يكسم راسي عليك القرآن ساعدني والله صارلي 3 تيام بالشارع.

- وأميرة وينها؟

- وصلتها لبيت واحد من كرايبها.

- ارجع للبيت القديم.

- ما أكدر عليك بروح أحمد ساعدني خطاب بروح أحمد إذا تعز أحمد صدك بالقران بالشارع.

يحجي وبجى.

سكت خطاب: - لا تحلفني بروحه يول وانجب. وين أنت هسه؟

- بالطارمية.

- اخذ سيارة وتعال للدورة.

- أنت بالدورة؟

- أني الاكيك هناك.

سد التليفون: - راح تجيبه لهين؟

- ما أدري والله بس حلفني وخطية أميرة غوته وأبوه إذا كضبه بدون تفكير يفرغ شاجور براسه.

- فد وهب مسموم منهو الكال إذا عرف بيه هين ما يفتن لابوه.

- وشحده يكرب أبوه إلا ما رايد روحه.

كام من مكانه وطلع مستعجل خطاب شكثر ما هو نشمي وأخو خيته ووكف بوجه خاله وما خاف بس عيبه طيبة كلبه بسع ينقهر على الواحد ويفزع. وراح يفزع لوهب يركض.

جابه ب2 بالليل.

وهب جان مكسور وحالته حالة ويبجي ومنقهر كعد بالنص ساعة يبجي. حتى أني انكسر خاطري عليه. كتله: - لا تهتم ماكو واحد ما يقلط عيفها وابتعد منها وضل هينا بلكي الله يتحسن الحال ونطلع من بغداد ونروح نعيش بمكان بعيد عن العين ونكف على حيلنا.

حجه خطاب: - هو أني كلت بس شوي أوكف على حيلي نطلع للموصل لو للشركاط غاد عندي عرف.

وهب: - والله أصيرلكم خادم بس لا ترجعوني لأبوي والقرآن يذبحني إذا كشفني.

خطاب: - ضل هينا هالفترة يم قدس ودير بالك عليها لحد ما الله يفتحها ونشوف وين ننتقل بس كبل هاي لازم أقنع أمي تجي ويانا.

قدس: - أمك ما أطيكني ولو درت بيه وياك تفتن علي.

- أمي تكرهج بس ما تضرني ولو فتنت عليج تضرني والا جان فتنت عليج من كبل يم خالي وخلته يذبحج بس تخاف علي. لا تفكرين بامرها بس خل أقنعها بالاول ويصير خير.

- ما راح ترضى.

- ولو ما رضت شسوي أذبها؟ أمي مجبور بيها الرضت بيج والما رضت مجبور أتحملها وأتحمل غيضها وأنت هم تتحمليها وياي.

سكتت اندار لوهب: - هالفترة لا تطلع أبد.

فترة أدبرلك شغل بمكان تشتغل من الفجر لحد المغرب ترد هينا حتى نتساعد أني وياك ونطلع من بغداد بأسرع وقت.

- والله مستعد بس الكالي شغل أشتغل حتى لو أدري أطيك فلوس الشغل كله بس بروح أحمد لا تفتن علي يم أبوي.

- يولي شفتن أني أفتن عليك بس أنت اركد هينا الباب لا توصله احتمال يطلع خالي يراقبنا. أني من كبل كاعد هينا وما دامني رايح جاي مو غريبة الصورة.

كعد وهب وضلينا نتابع الفلم.

أني سلمت أول وحدة وهم طلوا سهرانين يتابعون.

خطاب للفجر نام كعدت الصبح اثنينهم نايمين للظهر خطاب راح. جان يوم جمعة.

أبو وهب والعايلة قاد كلهم انتقلوا من بيت الجول للمحمودية.

وكعدوا غاد. خطاب رايح جاي.

ووهب كاعد يمي اليوم كله.

بأسبوع خطاب كدر يجيبلنا جولة ودبة نفط.

ونقللنا قراض من ذاك البيت بالخفية. بردات فراشات مروحة كاعية بطانيات. وراها بأسبوعين دبرلنا سنك من جماعتة بس حديدة وبواري وكعده ونصبله بوري هو ووهب شدوه. حيل فرحت من سوا السنك أول مرة بحياتي أقسل مواعين وأني واكفة خلصت من كسرة الظهر كاعدة وأجلف.

كال: - بعد بس غسالة هدوم إن شاء الله أدبرها والكا بسعر مناسب.

ورا شهر كدر يدبر قسالة مال هدوم.

هينا أخته سهاد تضايكت حيل لأن هي ما عدها قسالة: - كالتله تجيب للغريبة وتحط وأني أختك كاعدة وياك ما فد مرة جبت وحطيتلي.

كال الها: - كدامج يمتى ما ردتي اغسلي بيها.

كاللها كدامج جن كاللها الج شحدني أشقلها تكوم تصيح وتصعدلي من فوك: - يومية مشغلتها راح تخرب أنت ما تعرفين تحافضيلج على حاجة.

أكلها: - سبحت وأريد أقسل ثوبي.

تكلي: - بالحمام وأنت تسبحين أخضه وأطلع الثوب وياي وأشره لو إلا غسالة متعلمة على غسالة بت الجول ما تغسل ثوبها إلا بغسالة.

وبعدين شعدج هلكثر تسبحين أنت حتى عقد ما عاقد عليج أخوي شني جاي يكربج؟

- عيب ترا وهب هينا خطاب يجي ويطلع ما بيناتنا شي فد بطني كبرت وجاي أحتر حيل من أشتقل أطب أسبح.

- فرحانة بطني كبرت مخلفة من الحرام ومفتخرة يولي المثلج أطم روحها وأنت لا حيا ولا مستحى مسعدة وهالمصكوع على راسه يجيب ويحطلج حطاج سنك وتلفزيون وغسالة عاي كله وما معرس عليج عجل لو عرستو شني ينام على شليلج. الله يعلم أنت وأمج شلاعبات براسه وهيج فاراته.

- أكلج هسه أني نازلة يمج محاجيتج جايتج حتى أكل ما عدت أنزل وأخذ عدنا مسواك أسوي ما عدنا أتاني خطاب ليما يجي.

- وشني شايفة روحج علي بخطاب تراه أخوي وكله هذا خير أخوي أنت مكانج الجول وزايد عليج هم.

ما رديتها عفتها شسويلها أني حملت قاد جيش من نسوان أبو وهب لبناته تعجز عليه هاي. وعازلة منها فد تشمر علي. هينة أتحملها شلون ما جان.

كام خطاب من يجي بالليل يجيب النا وياه اليكدر بيده يوم بيذنجان طماطة خيار على نص كيلو نص كيلو فد البتيتة والبصل يجيب هواي جيف ما يخرب بدون ثلاجة.

وانضل اليوم أطبخ أسوي مرك وتمن أني ووهب وناكل.

صح العيشة هينا هادئة وما مثل كبل متعلعلة فد كمت أحس أمور مو زينة. وهب ما مرتاحة لوجوده. روتانا سينما كله اطلاع أفلام مصرية والمصري متروس شقلات سخيفة بوس وحضن وسوالف من هيج. أني أكوم من تصير لقطة هو ما يدورها ولا يقير الإذاعة يضل يدحك مبحلك باللقطة ويكوم يسوي أفعال ما حلو أضطر أنحبس بالحول يم الطباخ وأسوي روحي الهي نفسي بشي.

فد مرة مدنكة على الجولة أقلب بالتمن طكيت المس بالجدر وحطيته جاي أندار لكيته يدحك عليه من ورا بنظرات ما حلوة.

حجيتله: - شبيك؟

- لا ما بيه شي بس صبيلي إذا خلص بعدني جوعان.

- بعده ما خلصان.

- أي زين دكملي شغلج.

- شتريد؟

- ما رايد شي أكلج.

رديت الباب مال القرفة اللي المطبخ يصير جدامه وسديته صاح: - ليش؟

- هوى جاي يجي للجولة ما عد يستوي التمن.

سكت فد كلش تضايكت.

كمت أتغاضى منه. صح أضوج بس شيوي مجبورة أتحمله بهالحالة.

مشت الأيام ويوم على يوم كامت بطني تكبر والهدوم تضيق عليه وجسمي يبين من ورا وأستحي أطلب من خطاب هدوم لأن هو كوة مدبرها العيشة ووهب كاعد وساكت يمي لا أشتغل ولا طلع يخلص الليل سهر والنهار نايم.

تحججت بالجو وكلت لخطاب: جاي أبرد أريد قمصلة فد طويلة تصل لركباتي وكون عريضة رايدة أتدفى بيها.

راح خطاب للبالة جابلي دشداشتين قديفة من البالة عربضات وروب شتوي قديفة ينلبس كامل حيل فرحت بيه كمت ألبسه كل الوكت.

مرت الأيام والأسابيع.

وخطاب ما كل الأيام يجي هينا بسبب أمه ما ترضى تهد أبو وهب وخطاب عجز بيا طريقة يقنعها لا بكدر يعوفها قاد ويجي هينا ولا يضل يمها ويعوفنا ضال رايح جاي.

كمت الح على خطاب يطلع وهب للشغل.

كال: - بس أريدله شغلة زينة ما جاي ألكا.

كتله: - أي شي حتى لو عمالة شني أنت متحمل كلشي وهو أكل ونوم.

- ليش مضايقج بشي؟

- لا مو هيج فد ماخذ التلفزيون خاوة بالليل بيده وبالنهار نايم لازم ما أعلي خاطر لا يزعجه شني مليت أني هم أريد أطمش.

- سهلة.

صح عايشة عد خطاب فد خطاب حبه اتحول فد اهتمام أبد حتى عين زايقة ما شفت منه حتى ما فد مرة ضايكني لو دحك بنظرة مو زينة. عيشة والسلام بس وهب عينه كلش ماصخة.

لكاله خطاب شغلة صانع عد واحد من الستة الصبح لل٦ العصر.

هم ياله افتكيت شوية وافترهت. من يرجع بالليل أكون مخلصة كل شغلي ومسوية العشا نتعشا سوية وأني أندثر بفراشي وهو يندثر بفراشه.

أبو وهب ما بطل يدور ورانا أنا وأميرة.

فد كرايب أميرة مفتنين عليها ورايح أبو وهب ع البيت شاردة وعايفه جهالها.

ماخذ الجهال وذابهم على عفاف وضال، كل وكته بس يدور على اميرة، اكثر شي عبن جانت هي اكثر وحده يحبها. حيل أذته من درى بيها ويا ابنه، كل اليريده يكضبها.

حتى ما ضيع وكته بالدوارة علي بكثره. لين ما صدك جذب اميرة من تهمتني ويا خطاب، واصلا هو طلكني ورمى يمين الطلاك، ما أهمه بكثر اميرة.

فد مرة واني نايمة بالليل، صوت الفلم عالي وصوت الهام شاهين والممثل مدري شلونه. شلت راسي، اللقطة مو زينة، ووهب بسرعة فز من مكانه وتقطى.

صحت: نصي شني، اريد انام.

- أي.

نصاه ورجعت نمت، فد كلش طالعة روحي من الحالة، مدري شلون راح اخلص منه.

مرت مدري جم دقيقة وما احس الا وهب يحشك روحه وياي بالفراش، بسرعة انتفضت وكمت: شعدك يمي.

- باردة وكلت اجيب الغط ونتغطا بثنينهم حتى ندفى بدل ما كل واحد بطانية.

- دوخر قاد روح.

- هسه بيش مضايقج، دنامي.

- شني ما احب احد ينام بفراشي، دكوم.

- هسه نامي، ما راح ادنى يمي.

- شيل فراشك روح هناك.

بعد فراشة مسافة شبر. حجيت: وهب رد لمكانك، لا والله احجي لخطاب عليك.

- شتحجيله، بتل بتل ن**** اني.

- لا تفشر، عيب عليك.

- دولي جاية تستشرف براسي وهي *****.

- واذا اني هيج، شعدك كاعد وياي.

- مو كاعد ابيت الخلفج، خلف الله على ابن عمتي لفاج انت والنغل اللي ابطنج، انا منه اخذ الاريده واذبج للجلاب تاكلج وتشبع باللي ابطنج.

- دكوم مني، لا اصيح وابليك، والله ولي مني.

تفل عليه وكام من عدي.

سابقني ورايح لخطاب يكله: قدس صايرة كلش، لا تسويلي اكل، ارجع انام جوعان، وكله بس تنتر وتزمخ اليكول عايش عدها، وكل ساع تكول ما تروح تشوفلك مكان تعيش بيه، شنو ابتلينا بيك احنه.

خطاب ما مصدكة وجاي عليه كايلي: شبي وهب وياج.

- شبي.

- اجاني يشكيلي منج.

- يشكيلك، والله ما مسويتله شي.

- صاير شي بيناتكم.

- لا والله، فد اكله نصي التلفزيون ما ينصي و يعني.

- شنو الصاير، اكو شي احجيلي.

- خطاب الافلام المصرية كلها لقطات سخيفة، ومن تطلع لقطة واني كاعدة ما يدورها، اتكاون وياه اكله ديرها، يضل يطمش ويضحك وما يرضى يطني الجهاز.

ضل يدحك عليه: بس هذا قدس.

- أي.

- متأكدة.

- أي.

كام خطاب وحط البوفية برا وحط التلفزيون عليها. من اجا وهب لكا خطاب حاط التلفزيون بالمطبخ ونايم بالقرفة. اجاني: عجل ليش شايله هينا.

- مو اني اريد اشوف الفلم وهو يريد ينام، فشاله وخلاه الي بالمطبخ حتى اطمش واشتقل.

- ها.

سمعها فد ما صدكها، بلعها بس عرف وضعه هنا ما مطول. كام يشتغل ويرجع ساكت. ما صرفله الوضع، يريد كلشي على كيفه وهنا ما يكدر. التلفزيون بالمطبخ وما يكدر يكعد بالمطبخ ولا يحجي ويا قدس لان سوا ويا موقف ما حلو. من انحصر.

قرر يخلص روحه ويطلع منها. من الشغل جمع فلوس واشترى كارت رصيد ومعبي بتليفون ابو ابشغل ومخابر على ابوه.

رد عليه. الو.

رد عليه ابو وهب: الو.

بجى وهب. حجه ابو وهب: ياهو.

وهب كام يبجي بقوة.

- منهو انت احجي.

- يابه.

- منهو انت وهب يول، اكضبك يول اكطع راسك نذل، وين انت.

- يابه والله غلطت ووغوتني، حاولت ابعدها مني هواي بس هي جانت تهددني بيك وما ادري شلون.

وغص بالبجي يبجي من كله كلبه ويكله: يابه راضي حتى لو تذبحني، حتى لو تكص راسي، اني استاهل على السويته بيك، كلشي استاهل بس ما اتحمل ابعد عنك، انت عدي بعد الله، من ابعد منك اموت، والله صارلي اشهر الموت شايفة بعيني لان هيج سويت وياك، كاتلني الندم.

- كاتلك الندم ك**** تكرب حريمي يا جلب.

- والله زلة يابه واني اكلك اكتلني، ما رايد اعيش، الندم كتلني، اكضبني واكتلني بس لا تعوفني هيج متعب، راح يدمرني عذاب الضمير، خليني اموت على ايدك وانت راضي عني ولا اموت بعذاب الضمير.

- والله ان كضبتك لا املص راسك هالجلب.

- استاهل والله استاهل، وكلنا نستاهل اني وخطاب وقدس واميرة، كلنا نستاهل تذبحنا لان ما قدنا نعمتك وغدرناك، ما نستاهل نعيش، والله نستاهل تذبحنا.

- خطاب وقدس شني ولك.

- عايشين سويا وهي حامل منه من جانت على ذمتك، وهسه على وجه جيابه.

- حامل منه.

- أي، وفاتحيلها بيت وعايش وياها.

- خطاب عايش ويانا هينا، هو ببدالي يم الحريم.

- يوهمك هو غاد حتى لا يخليك تشك بيه، هو بس رايد يضبط اموه حتى يطلع من بغداد ويبعد عنك.

- وين انت يول. احجي يمهم انت.

- لا والله وروح امي مو يمهم، اني جاي اشتغل وانام بالشغل، بس عذاب الضمير كتلني، راسد بس تسامحني، والله بس تسامحني ادليك عليهم كلهم خطاب واميرة وقدس والكل، اصير خادم عدك يابه بس سامحني.

وسام: الجاهل غاد جوا مو بيدي أطلعه.

- أنت وسام لو ردتي تطلعين الحية من زاغورها يعصى عليج جاهل بكاروكة.

- ولو كضبوني وأنا أطلعه.

- يمج أنتِ تخيّري ابنك لو ابن قدس، ياهو الأعز عدج.

حجاها وسد التليفون، ظلت تناظر. قدس نايمة بعدها ما فاكة، زارات عمليتها، والجاهل بالخدج.

اتصلت بابنها يوسف، ما هو.

ردت اتصلت بالآخر كال لها: يمه يوسف أجاكم ليغاد، كال أشوف أمي وأجي، ما أدري عنه.

تسودنت من عرفت ابنها قريب من أبو وهب.

ضلت محتارة شلون تطلع الجاهل وتخلص ابنها من إيدين ريسان.

وكت ما شافت ماكو مهرب من أمر ريسان.

قررت تنفذ رادته. كامت تراقب قدس وتراقب جية خطاب.

وتراقب حركة الممرضين، شوكت يكعدون شوكت يفترون.

جا خطاب. هي جانت تناظر الممر: بشري.

- الحال نفسه.

- الدكتور كالي الجاهل ما يعيش.

- أخير له يموت، شعده يجي لهالدنيا بوجه ما مقبول.

- أمر الله مو إحنا نرضى بخلقته لو نرفضها، إذا كاتبه علينا نرضى بالمقسوم، بس قدس راح تتأذى جثير، حيل تعلقت روحها بهالجاهل.

- العمر جدامها وتسوي غيره.

- الشالته كل هالشهر وتعبت بيه هالتعب ما تفكر بغيره، تضل أم.

تبسمت واندارت تدحك على قدس: أي يا عطا تجي وتشوف بتك الهديتها. كبرت وصارت أم لجن أم... جزاك ما عداها وبتك جاي تدفع أثامك وياي.

عكد حاجبه خطاب: تدفعه أثامه عليش؟

- هيج سوالف قديمة.

- أنا رايد أعرف هالسوالف.

- اللعب بأوراق الماضي مثل اللعب بجمر هايد تشوفه مطفي، لجن عد ما تهيجك يحرقك ويعميك بثعوالته.

- وشنو الصار بالماضي خاطر هالكثر وراه أسرار وثعاويل تعمي عيون.

- الصار أصعب من أحد يصدكه لو انحجت سالفته، الكلعة أعلى بشر يهز له إيدك ويكلك امش الله بنطيك. هالسوالف بالأفلام الهندية ما تصير، لجن الصار بالكلعة هدم كل شي، حتى الشعور.

- وشنو الصار؟

رادت تندار وكفاها: أنا رايد أعرف أسرار قدس وكل شي يخصها، رايد أعرف شنو الوصل هالبت لهالمواصيل.

- لو جنت رايد تفتح أسرار قدس، ملزوم بزيارة الكلعة.

- ووين صايرة هالكلعة؟

- بسهل نينوى، كلعة كشرة ما خط أحد عتبتها، لا ما جالها ضيمها. بيها تنكشف كل الأسرار، بس لو عرفت هالاسرار راح تأذي روحك حيل وتهدر دمك.

- لهالدرجة سرها ما ينحجي؟

- وأكثر.

- بس أنا رايد أعرف هالاسرار. رايد عنوان الكلعة تكتبي بحيل الله بس تكوم قدس بسلامة، أروحلها. اكو أحد عايش بالكلعة اليوم؟

- أي اكو فرد من آل خشان عايش غاد، عده كل أسرار الكلعة، لجن حذرتك تدش زاغورتها، ولو حطيت رحلك بيها لا تلوم أحد عكبه.

ضل يدحك بيها وما رد عليها.

هدته ومشت وهي تتفكد حال الجاهل وتنطر فرصة تنفذ الراده منها ريسان.

لثاني يوم كال لها: العصر الجاهل يمي، ولو ما أجا...

قاطعته: يجي بس عقب العصر، آخذ ولدي وأهج لديرة، لا تشوفني عقبها ولا أنا أشوفك.

- نفذي الأريده وهجي وين ما تريدين تولين.

سدت الخط من عنده وحجت ويا الممرضة وكالت لها: لازم نطلع حتى لو على مسؤوليتنا. صارت مصيبة غاد عدنا وكرايبنا مات، ما نكدر.

سجلت على الخروج وكملت كل الإجراءات، وأخذت الجاهل من الخدج على مسؤوليتها وطلعت بالجاهل وعافت قدس نايمة بالمستشفى.

قدس: كعدت أمي ما هي، فد نسوان قريبة.

ردت أكوم واني سمينة وعمليتي صعب أكوم منها، عانني أكوم للحمام. رديت وأمي ما هي، حتى ما كالت راح أروح.

ظلت كاعدة أنطرها ما اجتي.

خطاب كل يومية يجي الصبح وبالليل، خلال النهار ما يكدر لين عده شغل. مرت ساعات وأمي ما هي وتليفون ما عندي.

اجت الستر تطي الدوا شافتني كالت لي: شعدج هنا مو طلعتوا؟

- لا الدكتور ما كتبنا نطلع بعدنا.

- يمعودة أمج وقعت على خروج على مسؤوليتكم وأخذت الطفل وراحت.

- يعني هسه الجاهل ما موجود جوا؟

- لا ماكو، أمج خذته.

- وين خذته؟

- أدري عنها، خابريها واعرفي وينها. من زمان طلعت، معقولة ليش عافتج وأخذت بس الطفل؟ ما كالتلج؟

- لا.

كلبي كام يلعب، اشتعلت نار ما أدري ليش خفت.

أني ما أمن أمي، بس من جلة حيلتي مالي غيرها يضل وياي.

مرت الساعات وأمي ما هي وكلبي وجر، وكلها تكلي اتصلي واني ما عندي تليفون أخابر. طلبت من الستر تلفون أخابر خطاب.

اني حافظة رقمه عالقيب. أطتني دكيته بتليفونها وخابرت.

طلع لي: الو.

- خطاب تعال بسرعة.

- شنو يولي شصاير؟

- أمي خذت الجاهل وقامت.

- شني خذت الجاهل؟ وين خذته؟ ويييين أنت؟

- أني بالمستشفى، تعال الحك لي فدوة بساع، كلبي اشتعل نار، فد لا تسوي بالجاهل شي.

- ما سألتي الدكاترة؟ أكيد ما يخلون الجاهل يطلع هيج.

- كالو وقعت على خروج وماخذة الجاهل ورايحة.

حجيت وبجيت.

حجه هو: لا تخافين، مسافة الطريق واني يمچ.

سديت الخط من وفد أبجي وأطكطك بصابيعي وما عرف شنو أسوي وشتصرف. أحس روحي مقمضة بهالعالم، خطوتين ما أعرف أخطيه. نطرت خطاب يجي يتصرف، أني فد كاضيتها بجي.

مخابرها لحد ما مال، ما رادة جا خطاب وحجه ويا الدكاترة وتبين صدك ماخذته ورايحة. كمت أدك وألطم وأكول: خطاب ابني راح يسوون بي شي، هو مريض ما يتحمل، راح يكتلو.

- لا تأذين نفسج، ينلكي ضلي هين، أنا أروح لبيت أبو وهب وأرجع.

- لا ما أضل، ما أضل، أخذني وياك، عليك الله ما أتحمل.

- يولي عمليتج، بس خل الحك أشوف الموضوع وأجي.

ما رضيت إلا أروح وياه، عاد خابر أمه يستفكد أمي هين لو طالعة. كالت له: ما هي.

اندار لي: عدها مكان ثاني غير البيت الكاعدة بيه؟

- ما عرف، هي كاعدة ويا أبوك.

- بيت مرت أخوج تندلي، عدج رقمها؟

- أمي ونهلة صايرة مكاطف بيناتهن وحرب، ما تروح لها.

- عجل وين تروح؟

- أني بروحي ما أعرف أمي ولا أعرف أسرارها ولا شي عنها، شلون كلي ابني شلون بيه.

احتار هو كلش، احتقن، كام يتكاون ويا المستشفى لين كتبوا خروج بدون علم واحد من عدنا. عافني وراه وراح لبيت أبو وهب، لا لاكي أمه ولا أبو وهب، فد عفاف وأمه.

مصيح بالبيت مكسر، خابصها ورايح لبيت الجول، لاكي خاله.

خابر على أبو وهب، تليفونه مقلق.

رد عليه، أخذني بنص الليل رجعني للبيت، فد البيت بعده ما كامل وفراشات ما بيه والجو كلش بارد، واني عملية.

حط لي فراش وقطاني ببطانيتين، فد ما تدفيت، البيت حيل بارد.

كمت أطك سن بسن والوجع مال العملية موتني، الليل كله أجي من الألم وهو احتار، ما خلى شي من الملابس ما جابوه وحفاني بيه حتى أتدفى، وبعده الألم ما يروح. احتار شيطعمني ووين يروح الساعة ٣.

كام يولوم عليه: مو كالك ما تطلعين من المستشفى غاد أحسن لج؟ مو حجيت؟ هسه شسوي؟ فهميني، لا أكدر أطلع أدور الجاهل الشردت بيه أمج، ولا أكدر أعوفج. طيني شسوي يولي؟ تربطت.

فد كمت أبجي، انصكع على راسه، ما عرف شيسوي وشيصرف.

لحد ما طلع الفجر، أني تعبت من الألم وغفيت. هو ظال كاعد يم راسي والدنيا فارته فر، ما خلى أحد ما خبره، ما خلى بيت ما دوره، وين يروح.

كعدت الصبح.

خطاب ما هو، العملية مخيطتني تخيط، لا أحد يمي، لا أحد يعيني، وصدري يدر حليب، ما عندي شي أنشف الحليب بيه، هدومي متنكعة.

حاولت أكوم، أني ثقيلة وكومتني صعبة بالموت، يلا كدرت أكوم من الفراش وأروح للحمام، وكل شي صعب، كومتي، كعدتي، الحمام، المشية، والبرد على العملية ذبحني ذبح.

تانيت أحد يجي، ماكو.

لا خطاب، لا أحد يمي. كلت لو الله ياخذ أمانته بهالساعة وأفتك من هالدنيا الما شفت منها بس التعب والألم.

جا خطاب، وجهه أسود من التعب، لا نايم ولا مرتاح، لا مخلي مكان ما دوره. جاي وجايب لي أدويتي من المستشفى، اطانياها واطاني أكل، وكال: أنام ساعة وكعديني.

- والجاهل خطاب، كلبي نار عليه، راح يموت.

- يولي ما خليت مكان ما دورته، ما خليت أحد ما رحت له. نامي والعصر آخذج أمنج يم بيت عمي وأروح.

- ما أريد أرد ليغاد، رايدة ابني، خطاب، الكالي ابني.

- يولي لكيته وضميته عليج، ما تشوفيني ليلي ونهاري مثل الجلب أصول وأجول، طلعت روحيييي، تعبببببت، منين أتلگاها؟ من أمي؟ من خالي؟ منج؟ كااااافي.

سكتت عنه، فد دموعي كامن يجرن بالزايد من صيح عليه.

اندار بس يريد ينام. سمع أجر بخشمي من البجي.

كام من مكانه واجاني: يولي والله من تعبي صيحت، اعذريني، والله حيلي انهد، ابني من صفحة وأنتِ من صفحة، ومالي معين يساعدني ويركض وياي لو يداريج.

- يمكن هاي جزات الحرام.

- يا حرام؟

- الجاهل جا بحرام، ما اتهنينا من ساعة الحرام ولا اتهنينا بيه، قضينا وقتنا خايفين ونتشرد.

- الله كريم، الله أرحم الراحمين، الجاهل ماله ذنب بينا، وكل ذنوبنا سببها أمج وأبو وهب، لو من البداية خاطبج إلي وما دنت نفسه على النويتلها، جان كل هذا ما صار.

تنهد ودخن جكارة، فد الدمعة بعينه من الضيجة الهوى بيها.

لا بيدي أهون عليه ولا أكدر أعينه.

جسمي مخيط وصدري يدر ابني ما هو

اندرتله: خطاب راح نعيش؟

اندار: شجاي تحجين

- ما اضن احنا نعيش ولا نرتاح فد يوم

تقرب مني: لا تحجين هيج فترة وتعدي ووهد مني شاربي مو علي اذا خليتج بعوز بعد لو اعرف اكص من روحي وما اخليج تنضامين بس هالفترة تحملي وياي نعقد ونتزوج وتصير سوالف

- واذا ما صارت

- اذا فد يوم افترقنا راح تكونين انت السبب من ناحيتي انا ما اهدج

ضليت ادحك بعيونه

اندار طفى جكارته وخلى راسه على مخدتي وتقطى شوية من قطاي وغمض عيونه ... بجيت عبن ما جاي نلكه الراحة تعبنا حيل ومالنا احد بهالدنيا .. بس اصبر الروح بجلمة ( الله موجود وما ينسى احد)

ضليت كاعدة ما اجاني النوم والم العملية خف عدي

باجر موعد افتح خياط العملية بلكي ارتاح من المها

صفنت بامي شنهو تريد من ابني وليش خذتو من عدي .. ليش هيج ما بيها محنة عليه كلبي نار على جاهل ما شفت وجهه الا مرة وهي كلبها ولا يمن ولا جنها ام ... عافتني بهالحال وخذت ابني وشردت

ساعة ابجي ساعة اواسي الروح واقويها .. لخاطر خطاب تعب حيل وياي ماكو احد بكثره تعبلي

للظهر .. دك تليفونه فز بسع ورد .. حجه شوية وكام

يتفكد محفظته ويريد يروح: ها اكو خير عن الجاهل

- لا فد امي واختي راح يجن يمج هين حتى اطلع ادوره

- ووين راح تدوره؟

- ما ادري المهم ما اضل كاعد هيج لازم اعرف امج وين خذته

راح قسل وجهه ورجع فتح تليفونه وحابر ما ادري المن

ورد كعد يدخن جكارة

دحك: خذتي دواج

هزيت راسي: خطاب راح يجيبو ما

ضل يدحك بوجهي: بحيل الله

دك تليفونه طلع يدلي امه واخته ع البيت جابهن وفاتن للبيت اول ما شافتني صاحت: البومة وجه الشوم من يوم الشافج ما شاف الراحة هالولد .. هدي ما فكيتي ياخذه منه شوفي وجهه شصاير بالله شمحصل منج ومن النغل الحلفيتي وهجت بيه امج لعبتن بحاله لعب من الله لا يطيجن ولا يوفقجن يا كحا*

كام يصيح خطاب وهو يحاول يسكتها: يمه يممممممه

ردته: وعلة بكلب عدوك يولي اشايف بيها وشحصلت هده يولي شوف روحك شصاير بحالك على يا مال والمن متحمل الضيم هذا كله من وراها وورا امها راح يكتلنك ذن مالهن امان ولك اسمع مني عليش ما ترد فتيت كلبي ولك خطاب

تحجي وهو يصيح واخته تحاول تهدي بينهم .. اخر شي كاللها: اذا جاية تعينيني وتضلين يمها لين ما اشوف الجاهل وين صفى بيه الدهر خير ما تريدين تضلين امشي لا انا الطالبح ولا رايد منج شي الله لا يعوزني البشر

- يا ما يعوزك ولك يمه حيلك منهد ووجه صاير هاطولاته من الضعف المن وياهو اليستاهل تهد حيلك لجله ولك يمه جاتلني تعبك هاذ ولك خطاب يمه

- ومت الاشكيلج احجيلي هالحجي هاذ اذا نا عدج حجاية زينة تطيبين كلوبنا بيها لا تحجين بس البينا كافينا تتحملين تصلين هين لبين ما اروح ضلي ما تتحملين عوفيها وامشي ادبر غيركم يساعدني

كامت تصفك على اديها وتكول

مدري شمسوياتله هالولد هاذ وكاتل روحه بف بالون مدري اشايف بيها

روح ييمه روح اشوف توالي هالروحه وين تصفى امشي وانا ضالة هين

- ما تجين يم قدس ولا تاذيها البنية مسوية عملية يمه اذا مو الها لله

- وهي تعرف الله خاطر اخاف الله بيها؟

- يمه خافي روحج بالله لا تخافي بيها لا تزيدين تعبي

- روح يبمه الله يشيل تعبك ويزتو على الزاد حملك وتعباك روح يولو دا اشوف شتجني من بنات الجول

جا عندي وكال: انا راح اروح ادور امج ومجبور اخليج ويا امي واختي ادري ما يحبوج ولا راح يداروح ويمكن يحاولن يهججنج لو شيسوون بيج بس ما بيدي غير امنج يمهن واروح ادور الجاهل

قدس انا طالع وجلمتي بهالمكان لا تنسيها وخليها ترجية باذنج شيكللج لا تسوين وشيطلبن منج لا تنفذين وشيحلجن لا تصدكين اذا ردتي تحافظين على روحج لبين ما ارد كل التسوي تسدين اذانج وحلكج وعيونج لا تسوين شي بدون علمي

- ميخالف

- الحجي لا تنسي وديري بالج على نفسج

اطاني الفين دينار وراح

ظليت كاعدة بمكاني ما تحركت

اندارت عليه امه وكالتلي: تريدين ابنج صدك لو تبكبك مال عيارة

- ليش تدرين عنه وين؟

- يولي من اسالج جاوبي لا تتفلتين

- والله اريده فد... قاطعتني

- الجاهل موجود واذا توعديني من هالساعة تروحيله وما تردين لخطاب اكلج مكانه وين

- وين

- اوعدين تروحيله ونا تردين لخطاب ولا تخبري ولا توصلين هين بعد

- فد خطاب ما يرضى

- يولي لا تستكح*** براسي تريدين ابنج لو لا

- اي

- عجل اختاري ابنج لو خطاب؟ اذا اختاريتي ابنج هسه تمشين ويطوجياه وتروح بعيد وتراحين غاد انا اكلج

بس لو اختاريتي خطاب راح تضلين هذا حالج معلعلة انت وياه ومشردة من بيت لبيت ما اخليج ترتاحين وياه ولا هو اريحه ما طوله ماشي وراج

- ليش هيج تكرهيني اني شسويتلكم والله العظيم ما اذيت احد كلكم اذيتوني فد اني ما جست احد بيكم ليش هيج تعاملوني

- مو ذنبج ننب امج

- وامي شسوت؟

- دوري سر امج بروحج واعرفي ذنوبها شنهي لا تسعلينا بيهن .. وهسه تخيري تروحين تشوفين ابنج لو تظلين هاي ظلتج

بدون تفكير ولا وكفت على عقلي ودانشت امري كتلها: اريد ابني

كامت واجرتلي سيارة من راس الشارع وركبتني بيها واطت للسايق العنوان .. ركبت السيارة ومشت بيه وانا ما عرف وين اروح .. كل الفكرت بيه كلت الكي الجاهل واخابر على خطاب يجيني .. فد اني دوم ما اعرف ادير الامور ولا اعرف شمضممولي ولا عرف ايد روحي وشتصرف

وصلت قاد نزلتي ابو السيارة بمكان هيمة ما بيه احد فد عمود كهرباء مكطعة وايراته كاتبته الحاجة اله بالعنوان .. عافني ومشى واني بطرك العباية وكاضبة عمليتي والجو بارد يمص كص

بالنص ساعة ماكو احد

حاولت امشي ادير العين ادحك ماكو احد

لا بيت جريب لا ناس لا اوادم اخابر خطاب منهم.. عمليتي شلتني شل من الوجع .. كمت ارص عليها حيل وابجي وكفت بمكاني بعد ما بيه اتحرك من مكاني

كعدت اصرخ وابجي بصوت عالي بلكي احد يسمعني ويجي

عرفت ام خطاب ذبتني وبعدتني من ابنها ويمكن ودتني بهالمكان الما بيه احد خاطر اموت لوحدي هين

خطاب وصاني وما مشيت بوصيته كالي لا تسمعين ولا تنفذين شبيه مشيت بحجيها .. وشلون راح اضل هين الهوى عالي والعملية مثل الخنجر نابت بلحمي هيج وجعها ادحك هين وهين وماكو احد

الدموع هماله وتتامل واحد يمر ويخلصها من هالموقف

شديت حيلي وكمت كوة اجر بخطواتي وامشي اريد اوصل لمكان بيه بشر افزعهم .. بس بالساعتين وماكو احد

وصلت مرحلة من الوجع والبرد استيأست وكلت هي جابتني عين خاطر اموت .. رادت تخلص مني .. كعدت واستسلمت لروحي اموت واخلص من هالدنيا المالي ثمرة اعيش بيها

تجيت روحي وكعدت انوح ومنتطرة يخلص صبري وتنتهي خبزتي بهالدنيا خاطر اموت وارتاح ... واني بهالحال طبكت سيارة

فزيت من مكاني وعنت نفسي اريد الحك السيارة الطبكت وااحشمها تفزعلي

واني كاضبة عمليتي ورايدة الحكها ما احس الا ابو وهب نزل من السيارة وملثم روحه باليشمغ الاحمر ولابس دشداشة سودة وعليها قمصلة جوزية .. طبك الباب وهو يدحك عليه بخزرة

عين اني كلت حانت ساعتي

تصنمت بمكاني خوف وبرد ورهبة واستسلام

جا عدي اول شي سوا كضبني من راسي: تشردين مني يولي؟

على ذمتي تنامين ويا غيري وتخلفين وتريديني اخليج

تعرفين انا ياهو لو لا؟

تعرفين ريسااااااان منهوووووو

نص كلمة ما راددته حتى الدمعة غابت من عيني فد فاتحة عيوني حيل صدمة وخوف جسمي كله يرجف منه

جرني للسيارة وذبني ليورا عمليتي احسها كامت تنزف وشخط السيارة حيل كمت اصرخ من عمليتي

وصلني لبيت مهجور ما شايفته كبل ولا عرف وين مكانه

دخلني الهالبيت مهدم ومزرف ما ادري شجاريله كضبني من راسي وجرني لمكان بيه عمود خشب

سحبني اله وربطني بيه

كمت اصرخ واكلو: حط جيلة براسي وافتك مني لا تخليني تعبت من الوجع عليك الله بس عووووفونييييي

عافني مربوطة ومشى

كمت اصرخ ابجي اصيح محد اجاني

واني مربوطة ادية تجرحت والخشب مالت العمود طب بادية من انهد حيلي واريد اكعد وما اكدر .. كلش تعبت وكتلني البرد ما اعرف شلون جسمي لحد هالساع مكاوم وما متت .. هم فكري

من الصياح والبجي والعياط كلش انتهيت

كعدت بمكاني وادية مربطة ليوره .. بالساعة ومحد اكو

رد ابو وهب والجاهل بيده

فتح كماطة جدامي وخلاه مفتوح للهوى كبالي .. الجو بارد حيل والجاهل ما بيه حركة

كمت اصرخ واكلو: اكتلني فد لا تسوي بيه هيج حرام عليك الجاهل شسوالك راح يمووووت قطي راح يمووووت عوفه عليك الله والله حرام باردة راح يموووت

ادحك بالجاهل ازرك صار وهو يفتر داير ما دايري ويكلي: هاذ الاطيتي روحج لخطاب وخنتيني هذا ثمرة خيانتج .. يولي انا الحسبتج دكرة وما تفتهمين شي ثاريج منغلة من وراي ورايدة تخلي بركبتي .. اني تلعبين علي

يحجي ويكضب براسي ويخزر بيه .. واني فد اريده يكتلني واخلص من الجاي يسوي بيه وبالجاهل

كاضب راسي يحجي بعصبيه واني اصرخ واجر براسي منه واكله ( راح يموت اكتلني وهو عوفه والله خطيه ما سوا شي وهيج تعذبه قطي فد قطي راااااح يمووووت )

احجي وهو بعده يهدد ويتوعد من حركة دمي كمت وفلت بوجهه وهو يحجي .. فز مني غضبان: اتفلين بوجهييييي

دفرني بخاصرتي احس العملية طكت

كمت اصرخ من الوجع وابجي كام يضرب ويصفك بيه واني اكلو: اكثر زيد مووووتني اريد امووووت

ابتعد مني ويكلي: كل عكلج اريحج وتموتين هيج

طلع من المكان وراح جاب كرك حسبالي راح يضربني لو يضرب الجاهل بيه

فد ما تكرب الما كام يحفر بالتراب المكابيلنا

اني فد ادحك بالجاهل صار اسود من البرد فد ما بيه صوت ابد لا حركة ولا حس .. احجي واكله كله من وراي جبتك لهالدنيا كله من ورااااي اني العذبتك وجبتك لو راضية اسوي العملية بذاك اليوم وميته وميت وياي ولا الجاي يصير بينا

كافي تعبت ارحمونا اكتلني اني وياه وخلصنا كافي تعذب بينا والله كتلني الوجع عوفنا ابوس ايدك والله تعبت

جاي حاجيه تقرب من عدي حسبالي يريد يطكني بحركة سريعة درت وجهي منه فد ما طكني اندرت شفته جاي يشيل الجاهل كمت اصرخ: رجعههههه عوووووووفه لا تكتله لا تكتله اكتلني كبله حرام عليك لا تكتتتتتتله

ذبه ذب بالحفرة ما جنه روح .. فد جنه ذبني مو ذب ابني كمت اصرخ وافز من كل حيلي عليه واريد بس افك روحي من العمود

كام يهل عليه التراب كدامي

فقدت ما ادري شكمت اصرخ وشكمت احجي

دفنه كبال عيني انتهيت احس كلبي صار فارغ انذبح من مكانه

هذا جان اخر شي اتذكره من هالمكان بعدها شصار ما اعرف

بلحظة فقدان وعي اني ما صاحيتلها ولا انذكر شوكت فقدت الوعي .. بس الاتذكره دفن الجاهل كبالي وما اتذكر بعدها شي

فتحت عيوني ... اني بالسيارة

كل الم ماكو .. كل وجع ما احس بيه

ما انذكر شصاير وياي اني وين شديصير

ما اتذكر اني منو.

الحسيته حركة جسمي ثقيلة. أصابيعي رجلية مو بسيطرتي، ما اكدر أتحرك.

دحكت أشوف أني مكبعة، فد اكو شي مربوط عليه.

دحكت للمكان. سيارة؟ شنو هاي السيارة؟ وليش أني هيج؟

أكو ناس تروح وترجع. فد ما جاي أستوعب شكو؟ ليش الناس تمشي؟ ليش محد جاي يشوفني؟ أني شنو؟ يمكن ميته؟

لا مو ميته. أني جاي أحس بروحي لابسة عباية ومتغطاية.

جاهدت روحي حتى أتحرك.

الحسيته اكو أجهزة داير ما داير بطني وملبسينّي جو العباية مثل اللي بيه وايرات هواي.

لحظتها ما جنت أستوعب الموقف اللي أني بيه.

بس العرفته في ما بعد إنّي لابسة حزام ناسف وموعد العملية الانتحارية الساعة ١١ الصبح والساعة حالياً بـ ١٠ وثلث، ونص هيج شي.

أمّي جانت تدري أبو وهب راح يذبني بعملية انتحارية.

ومنطيني حبوب ما أعرف شنو هي، بحيث مخليتني ما أعرف اسمي ولا أحس على اللي دا أسويه.

ما أدري شلون الله هداها وبلغت على مكان العملية ونوع السيارة.

وانطت عنوان أبو وهب وصورته ومكان بيته وكل الأماكن اللي ممكن يتواجد بيها.

وانطتهم رقمه وأرقام كل اللي يتواصل وياهم وممكن يروح عدهم.

هذه هم جانت عملية انتحارية من أمّي جازفت بيها بأبو وهب، لو ينفذ منها ويكتلها لو يروح بيها وتنجي هي ويفتكون إخواني منها، ويمكن أني.

وأني بهالحال كانما بس عيون مفتحة، الاستيعاب صفر.

انفتحت باب السيارة. أصوات مفارز شرطة ورتل أمريكي وتطويق وأسلحة موجهة عليه وتصيح: بس تتحرك نرميك.

أسمعها الكلمة أعرف أرددها بس ما أعرف أستوعبها.

حالة عجيبة، عقلي مو بيدي، ما أكدر أتحكم بيه حتى أستوعب الكلام اللي ينكال وسامعته وأعرف بس مجاي أعرف أفسره.

أكو كلام أمريكي.

وأكو حجي عراقي وواحد يصيح: مرة اللي بالسيارة، مرة.

تقربوا من السيارة بحذر وخايفين.

يشوفوني مفتحة عيوني بس ساكتة وهذا اللي خوفهم.

حسبالهم منتظرة يتقربون حتى أفجر نفسي.

بس ميعرفون إنّي ما جاي أكدر أفتهم شي ولا حتى شلون أتحرك.

عقلي فقدته، أحس أخذت منوّم للعقل بس كل جسمي صاحي، حتى وجع مال عملية ماكو.

عشر دقايق وهم يحاولون يحجون وياي ويحاولون يخلوني أستسلم، وأني بمكاني ما أتحرك.

حسبوا من الواحد للـ ٣ وهدوا اثنين منا ومنا، صعدوا لزموا أيديه.

وكلبوهن ليورا وهم يصرخون: أي حركة نكتلك.

كلبوا أيديه وجروني من السيارة نزلوني.

العجيب أكدر أوكف عادي.

وكفوني على صفحة ويخابرون ويتصلون.

والسيارة يتفقدوها ويفحصوها إذا مفخخة.

اجوا اثنين واكفين يمي يحجون وياي. فد أداحك بيهم.

كاله: مطيها حبوب ما جاي تستوعبنا، لازم نفكك المفخخة.

الثاني كالو: اخذها بمكان بعيد عن السوق لازم.

الثالث يكله: ما عدنا وقت، احنا راح نشتغل ونحاول نفككها هنا وأنتم فرغوا المكان وخلو الناس تبتعد.

صاحوا بالناس: مفخخة الشارع! ما بيه ولا بشر بعد.

حتى الشرطة نفسهم ابتعدوا كلهم، ضلوا كم واحد اختصاص تفكيك متفجرات.

يشتقلون وهذا اليصيح: دخيلك يا الله.

وهذا اللي يكول: يا بو الحسن.

وهذا اللي يقرأ قرآن.

والأمريكان مطوقين المكان.

والثالث بعده يحاول وياي ويسألني منو حطلي هذا الحزام.

باخر سبع دقايق كدروا يفككون الحزام من جسمي.

فرحوا وكاموا يصيحون: انفك انفك يا الله يا ااااااااالله.

وواحد من عدهم سحبني وانسحب من المكان كله.

من جرني حيل وسحبني هنيه مدري شصابني وكعت وما حسيت شصار بيه عقبه.

فكيت عيوني. صوت جهاز مال كلب الاسمعه بالأفلام.

وأجهزة طبية محاوطتني بكل مكان وجسمي حيل ثكيل من الوجع.

فد هي رجعتلي استيعابي واستوعبت الصار بيه وشلون دفن ابني بالجولة.

كمت أبجي وأصيح وأون.

التموا عليه الدكاترة واني أبجي وأصيح: ابني كتلو، ابنييييي، كتلوووه، دفنو، مااااات، مات، كلو مني انكتل بسببي، ماااااات.

أبجي وأصرخ، انطوني إبرة بالمغذي واني بعدني أصرخ.

شوي شوي هدى صوت البجي مالي، كمت بس أنحب وأون.

وأكللهم: شيلو الأجهزة مني، عرفوني أموت لا تنقذوني، مالي عيشة بهالدنيا، موتوني عفية والله ما أريد أعيش.

ظليت بالساعتين أنحب وأتوسل بيهم يكتلوني.

أجا واحد كال: شسمج؟

بصوت نحيب جاوبته: قدس.

ـ شسم أبوچ قدس؟

ـ ما أنذكر، فد أريد تكتلوني.

ـ احجيلينا الصار وراح نساعدج.

ـ كتلو لابني، دفنو جدام عيني، مات، كتلوه.

كمت أبجي بقوة.

ـ منو اللي كتل ابنچ؟

ـ أبو وهب، دفنو جدامي، دفنووووو.

ـ لا تبجين واحجي ويانا حتى نكدر نساعدج. أبو وهب نفسو ريسان عبد الجليل.

ـ أي هو.

ـ تعرفين بيه إرهابي؟

ـ أي.

أحجي وأشهك من البجي.

ـ جنتو تشتغلين وياه؟

ـ لا، جنت مرته.

ـ جنتي... وطلكج لو شنو الصار؟

ـ طلكني، راد ينطيني لواحد إرهابي صاحبو، فد أني هربت.

ـ تعرفين صاحبو الإرهابي؟ شايفته؟ توصفيلنا شكلو.

ـ شايفته وما أعرف اسمه، فد أعرف اسمه أبو مصعب ومو عراقي.

ـ شنو جنسيته؟

ـ ما أعرف من وين، فد مو عراقي.

ـ وين شفتيه؟

ـ عاش ويانا يمكن شهر مدري شهرين.

ـ عاش وياكم؟

ـ أي فد بالدوانية هو وأبو وهب، ضل فترة ورادني من أبو وهب وأبو وهب طلكني خاطر يطيني الو، وأني هربت. أمي هربتني.

كام يحجي ويا البصفه ويناقشه باسم الإرهابي اللي ذكرته.

ويتناقشون. أني غمضت عيوني.

رجع يسألني ع البيت وجابوتو ع البيت اللي بالجول، سالني ع المنطقة ما عرفتها.

ضل يسأل واجاوب، كلش تعبني.

اعتذر وكال: عندج أحد تخابري يجي يعرف مكانج؟

اطيت رقم خطاب.

أقل الساعة وخطاب أجا، فد ما خلوه يجي يشوفني.

كضبوه تحقيق يخص أبو وهب، لأن خاله ما خلوه يوصلني لو يكرب.

الثاني يوم يلا كدر يشوفني.

أجا طبلي حيله مهدود.

ما حجه ولا نطق كلمة، حط راسه ع راسي وكام يبجي من كل كلبه.

كمت أبجي وأكلو: كتلو ابني، دفنه كبال عيني، أمي وأبو وهب متفقين، باكت ابني وانطتو الو، كتلا خطاب، كتلا.

هز راسه: يتعوض إن شاء الله، المهم انتي بخير.

ـ انت حذرتني واني ما خذيت كلامك، كل الصار من وراي، أني ما سمعت حجيك، ابني راح.

ـ سهلة، لا تأذين روحج، المهم انتي بخير وهذا كافي، كلشي غيره سهل.

ـ والجاهل أكلك مات.

ـ الدكاترة بنفسهم كالو ما يعيش لأن مو كامل ومشوه. عسى الله يجعله طير جنة، يشفعلنا غاد يم الله ويغفرلنا لأجله.

ـ أمك هم مشتركة وياهم؟ هم كتلته؟ هي الودتني لذاك المكان؟ هي الأطت العنوان للسائق؟

ـ كل واحد اشترك بأذيتنا ما راح أخلي يتهنى. كلهم دمهم عندي ثمن. وعد ومصابج هذا، لا أجرجرهم كلهم وأدفعهم الثمن غالي حيل وأغلى من اللي دفعناه أنا وياج. من اليوم أسحق كلبي وأشيل ثاري على ظهري وما أتهاون ويا كل واحد ما تهاون بأذيتنا. والله لا أدفعهم الثمن كلش غالي وأولهم أبو وهب.

ـ وشلون راح تكضبه؟

ـ كضبت وهب وراح أخلي هو اليجرجر أبوه.

ـ شلون صبرج وراحتج؟ وكل واحد أذاج ينال أذيته.

باس راسي وطلع برا يكملون تحقيق.

أطوه وهب للشرطة يجرجرون أبو وهب بيه.

بهالوكت العصب ولما الكل وكف ضد أبو وهب.

مخابرته أميرة. وملفيته عدها بالبيت، وهو لأن ملاحكيه رضى يعفي عن أميرة ويضل عدها لبين ما يشوف صرفة يكدر يطلع بيها من العراق.

وهب درى بأبوه عد أميرة.

وخطاب درى بس ما يندلون مكانها وين.

دبروا حيلة لوهب حتى يأمن لابو طريق يطلع بيه من العراق.

ووهب خابر على أبوه وكاله على هذا الزلمة.

أبو وهب ما صدك وهب.

ورفض يطلع ويا واحد يجيبه وهب يخاف منه جيف غدره بمرته، يخاف يغدره بغيرها.

بس من بعد ٥ أيام خابر على وهب وكاله: تجيب هذا الزلمة بس للمكان اللي أنا أحدده والساعة اللي أنا أحددها.

كاله وهب: هسه أخابره وأكلك إذا يرضى.

أجا لوهاب كاله: يكول الزلمة أريد دفترين قبل الطلعة ودفترين بعد ما أحطه ع الحدود.

رجع خابر وهب على أبوه كاله: ما عندي ٤ دفتر، كل العندي ٣ دفاتر وانت لا تكله ٣ دفاتر، كلو دفتر، يرضى لو ما يرضى.

حجه ويا خطاب، خطاب اتفق ويا الضابط مال التحقيق، خلو واحد يحجي وياه بحيث الواحد هذا يحجي معلك كأنما زايد عليه، يطلع أبو وهب ما استقتل عليه. لأن يعرفون أبو وهب هو الرايد يطلع، وإذا شك لمجرد شك الرايد يطلعه يقنعه بالطلعة ويتساهل وياه، يشك كاعد يستدرجوه.

اتفقوا بمكان وعلى يوم الطلعة.

جنا نظن أبو وهب ما يوكع بيها وأشطر وما راح يجي.

بس المفاجأة صدك سواها واجا ع الاتفاق وثق هذا الزلمة راح يطلعه، بمجرد ما راد يصعد السيارة، اتجافتت الشرطة من كل مكان وكضبوه وكيدوه.

خطاب جان رايد كتله، بس الشرطة ما خلت خطاب يوصله ولا حتى يحجي وياه. كالوله: مل لازم يموت ولا ينمس، عنده معلومات خطيرة عن شبكة إرهابية كلش خطرة بالعراق وهو راس خيط نكدر من خلاله نطيح ببقية الشبكة.

وانمسك أبو وهب ودخل السجن.

ما برد دم خطاب ولا ثاره من أبو وهب وضل متوعدله يكتله. بس ما دام وكع بيد الشرطة.

انتقل هنا حتى ينتقم من أمي.

بس هي جانت مثل العصفور وانكطع خيطه، مالها أثر.

بلغ عليها وانطى كل المعلومات عنها، بس يعرف القانون كلش ضعيف، لا أحد راح يدور عليها ولا أحد راح يلزمها، مجرد اسم مطلوب للعدالة، هذا كل اليكدرون يسووه.

وأبو وهب نفروا جهود بالقبض عليه، لأن إرهابي نافذ واله أكثر من ٧ عمليات إرهابية نافذة ببغداد وبعموم العراق.

أني خلال هالمدة كلها بالمستشفى.

نهلة هي اجتني واتفقدتني وظلت وياي. ما أعرف خطاب شلون اندلها ووصلها بس ما عافتني.

ظليت بالمستشفى أكثر من ٢٥ يوم.

تعافيت ووكفت على حيلي بس الصار وياي طفاني.

مو ذيج نفسي اللي كل همه بطنها وضاربه همومه بعرض الحايط.

منظر الجاهل وهو يندفن انحفر بذاكرتي مثل الحفر بالحجر.

هالموقف ما جاي يفاركني.

جسمي تعافى بس كلبي وعقلي كلش تمرضوا وما جاي أكدر أتعدى الصار.

كل يوم أصرخ وأبجي كأنما ديدفنه جدامي.

طلعت من المستشفى. وخذتني نهلة يمها.

وجانت قصة نهلة أمضى من قصتي. أمي بايكة بنتها، عجزت نهلة وين تدور بنتها؟ بس ماكو.

كل وحدة بينا قصة، أنا ونهلة. وحتى بت نهلة.

أساس قصصنا وضيمنا أمي. اللي ما فهمت موضوعها شنو وشنو سرها. حتى أعرف سري.

السمعته من القرايب إن أمي بالموصل.

بلغت خطاب وكالتله: وسام بالموصل.

خطاب كاللها: لو للسما هم أتبعها وأجيبها وما أعيفها، وراها وراها.

شدوا رحلهم وأجروا سيارة وطلعوا من بغداد للموصل.

وهنا جانت نقطة تحول بقصتنا.

رجعت لأصلي ورجعت لمكاني ولسري.

ما راح أعرف أدير أمري لو أعرف أصلي إذا ما أرجع للقلعة وأكشف أسراري وأسرار أمي كلها حتى أفهم ليش كل هذا الصار وياي وشنو سببه.

فقررنا أنا وخطاب نروح للقلعة خاطر نكشف الأسرار.

خذتنا نهلة ومشين للقلعة.

عد ما وصلت السيارة ووكفت قريب من القلعة نزلنا.

أداحك بيها.

كلعة حيل قديمة يرجع أصلها للزمن العثماني، بس لحد هالساعة موجودة بالموصل وسرها أعمق منها.

انفتحت أبواب الكلعة جدامنا. دحكت لخطاب بخوف. أشرلي أدخل. دخلت جدامه وأنا أدحك باركان هاي الكلعة المتهالكة، شضامة تحت هالجدران من أسرار؟ وليش حياتنا ما جاي تصفى بسببها؟

استقبلتنا مرة جبيرة ودخلنا على قرفة حيل قديمة. جان بيها رجال جبير. سلم عليه خطاب وسلمت وأنا أدحك بالمكان.

حجه وياه خطاب وكاله: "أنا جاي لهين وأريد أعرف قصة هالكلعة وشنو الصار بهالكلعة. كالولي سرها وكل أسرارها عدك. رايد أعرف قدس منو وبت منهو وشنو أصلها وعليش عاشت بالجول وسام ياهي وعليش سوت كل هذا وشنو التريده من عدنا؟"

"لا هي جنة ولا هي نار."

"لا هي برد ولا هي صيف."

"لا هي كاره ولا هي محب."

"شنو سرها؟ المرة هذي كلفتني هواي ورايدة ورايد أرسلها ودورت عنها هواي ما حصلتها وكالولي سرها عدك."

– "القصة ما تبدي من وسام ولا هي أصلها."

– "عجل منين؟"

– "الصار بهالكلعة ما نحب نذكره ولا نحب أجيالنا تحيطه. هذي الكلعة شر الكلاع. اندفنت بثنياها جثير أوادم راح دمهم هدر. كلاع تضر تضر بكل بشر حاط رحله بيها."

"قصة هالكلعة جديمة حيل جديمة من وقت كلش بعيد."

"أحجيلكم وأنا فرد من خشان آل عگاب."

"أحد أولاده، والشاهد على مصايب الگلعة (القلعة)."

"تبدي السالفة من جدنا عگاب."

"أزلمة أبوي. عنده حلال جثير ويرعى ما بين الأوطان. سوريا ومملكة الحجاز والعراق. ووين ما اكو عشب وخضار يحط الأهل وينصب الخيم ويهجد بهالبكان فترة وياخذ الحلال ويروح لغير بكان. وهاذ حال البدو الرحالة."

"مرة وأهو جاي ع العراق."

"خيم جريب من كلعة صاحبها يشتغل بالجيش العثماني اسمه (زيدان). وجدي بحلاله يرعى. تعرف على صاحب الكلعة (القلعة) وصارم صدقان. بعد فترة جدي خطب بت صاحب هاي الكلعة وأبوه وافق بخير."

"عد ما عرس، طابتله عيشة الريف."

"وترك ضيم البدو والرعيان خلف الحلال بين البلدان."

"وويا ما استقر هين. أخوان وعمام جدي إجوا سكنوا جريب من كلعة جدي. وصارت هاي الديرة جثير ما تضم أهلنا وكرابتنا وعمامنا."

"عاشوا بهاي الديرة وسكنوا بيها."

"ومشوا بعاداتم وتقاليدهم."

"ابن العم ياخذ بت العم بلا مهر."

"لجن لو راد ياخذ من غير عشيرة لزوم يطي مهر ومهر غالي. وأهل قبل أكثرهم فقرة. فاعلى السهولة ياخذون من بنات عشيرتهم وعمومتهم."

"عگاب ماخذ ثلث نسوان وعنده ولد وبنات جثيرة. لجن ما خلف من مرته بت الكلعة غير خشان. فعد ما ماتت جدتي. خشان ورث الكلعة من أمه وصارت له. لجن أخوانه وعمامه وكرابته اللي بناله بيت طين والما عنده ظل أعلى خيمة الشعر."

"كبر خشان."

"ومات أبوه عگاب. وصار هو راعي الكلعة."

"أخذ ثلث نسوان. لجن كانت خلفته شحيحة (قليلة)."

"خلف من الأولى ولد واحد."

"ومن الثانية اثنين بنات."

"والثالثة ما خلفت. ومرت سنوات ونسوانه ثلاثتهن شحت خلفتهن وما عاد يبزر."

"اللي يكله مسحور."

"واللي يكله عليك عين."

"واللي يحجيله ما يحجيله من خرافات أهلنا."

"بس هو يريد له خلفة. وما يريد يظل بطرك هالولد. وجاي يشوف الخلل مو بنسوانه. زعم ثلاثتهن يبزرن ووكفت بزريتهن!"

"ذيج الليل خشان طر الصحرا بحصانه."

"نزل الليل وهو بالصحرا. عرضتله وحدة عمرها يخش ب90 بنص الصحرا مخيمة. جيم نار وكعد يسامر وياها. وشكاله شحة خلفته."

"كالتله: ترد الديرة وتدورلك بت عينها صفرا وشعرة راسها حمرة وكون عمرها ما يتعدى العشر. تحطها ببيتك وجدام عينك وتنطرها لحين ما تلحق. وعد ما تنظف من الحاكها (دورتها) بنفس الليلة تواكعها (تتقربلها). وبهالليلة تنفك جبستك وتذر بزريتك."

"رجع خشان للديرة وهو يدورله بت عينها صفرة وشعرة راسها حمرة وعمرها ما يتعدى العشر خاطر ياخذها. دور أهله وكرابته والداير ما دايره من الدير. لجن ما وجد هال مواصفات."

"مرت السنة."

"والسنتين. والثلاث وخشان لا لاكي مواصفات هالبت. ولا وحدة من نسوان بزرت."

"وعقب ثلث سنوات."

"جان مار بسوق المدينة آهو وابنه."

"طرت جدامه لمة. زلمة مبسط بثلاث بنات من بناته يبيع بيهن. والناس تحجي وياه وتحاول ترده عن بيعتهن ومساجين بعدهن صغار."

"اغتاض عد ما شاف أبو يبيع بناته بالسوق."

"وكف عن الكلام وكاله: هذه البت ابيش تبيعها؟"

"عد ما حجه. البنية رفعت راسها تدحكله وعيونها مدمعة. الناس استغربت اشلون زلمة مثل خشان يشتري بت بدل ما يصحي أبوها ويرده عن فعله."

"حجه أبوها وانطاه سعرها."

"رجع سأله عن سعر البنات الثانيات. انطاه سعرهن."

"دفع سعر الثلث بنات. وأخذ بس الجاهلة أم عين صفرة وكاله (اصحى اعلى زمانك ورد بالبنات لأمهن وهالبت من اليوم ملك يميني)."

"أخذ بيد البنية. وطلع بيها للكلعة."

"وعد هالخذوة تبدي سالفتنا ومصايب أهلنا بالقصة (النهاية)."

هنا ونتوقف بقدس ويصير لازم علينا ندخل القلعة ونكشف أسرارها وبلاويها ونعرف شنو الصار بالقلعة.

على حسب أبطالها قصة القلعة راح تنذكر بوقائع حقيقية 100%. حتى مكان القلعة ما غيرته لأسباب. وكل كلمة وحدث راح ينذكر بقصة القلعة هي حقيقية مية بالمية بدون أخفاء أو تغيير. فقط الأسماء راح تتغير لا غير.

مستعدين ندخل القلعة؟