رواية بداية حياة الفصل السابع 7 - بقلم سلمى أشرف

نها: عملت أي يابني مع خالد؟ عمر: ولا حاجة عادي. المهم زينة فين؟ نها: بتغير هدومها وطالعة تتغدى معانا. عمر: ماشي، أنا في أوضتي. نها: زينة أدخل؟ زينة: تعالي يا نها. نها: مالك بقي في إيه؟ زينة: أخوكي بيتعصب عليا، وهو أصلا اللي غلطان ومقموص عشان جيت مع خالد ومقلتلوش ييجي ياخدني. نها بجدية: بس انتي غلطانة في دي يا زينة. مينفعش تخلي خالد يوصلك وعمر موجود! حتى لو زعلانين من بعض، ده ميمنعش إنه يوصلك. زينة: موجود!!!

واضح عشان كده بقاله أسبوعين مبيهتمش بيا ولا بأي حاجة بعملهالي. نها: انتي عارفة إن عنده ضغط شغل.. وأهو خلص المشروع اللي كان واخد كل وقته وفضيلك. زينة: أيوة يعني كل ما يبقى عنده مشروع بيشتغل عليه يهملني بالشكل ده!! ده في أيام مكنش حتى بيشوفني نهائي. نها: أنا عارفة إنه غلطان، بس يمكن مثلاً كان بيبعد عشان يعرف غلاوته عندك. وعموماً انتوا لازم تتكلموا وتتفاهموا. زينة: إن شاء الله. يلا عشان نتغدى.

نها بخبث: طب روحي ناديه لحد ما أرص الأكل. زينة بتوتر: لا روحي انتي. نها: لا يختي، يلا قومي. مشيت بتوتر وهي بتفرك في إيديها، وخبطت على أوضة عمر وفتحت الباب لما مسمعتش صوت. زينة: عمر! فجأة اتخضت لما الباب اتقفل. بتبص وراها لقت عمر. عمر بابتسامة باهتة: وريني بقي هتهربي مني إزاي. زينة: عمر مينفعش كده، افتح الباب. نها بره تقول إيه؟ عمر: هي عارفة. زينة بتوتر: اتفضل، عايز تقول إيه؟ عمر بغيظ: بتقفلي في وشي السكة؟

زينة بدموع: أنا مقصدش، انت اللي دايقتني. عمر وهو بيحاول يتحكم في أعصابه: اممم، والهانم زعلانة مني ليه؟ زينة: اسأل نفسك. عمر بعصبية: زينة اخلصي، أنا عملت إيه؟ زينة بعياط: اوعي، أنا مش عايزة أتكلم معاك. عمر مسك إيدها وقعدها على السرير: أهدي يا زينة كده براحة، وخلينا نتفاهم. احكيلي ي حبيبتي زعلانة ليه. زينة حكتله.

عمر: بصي يا زينة، أنا لما بشتغل على مشروع بتضغط غصب عنك، فمقصتش أبعد عنك. وكمان حبيت أبعد شوية عشان تتأكدي من مشاعرك ناحيتي ومتحسيش إني بقيت مسيطر عليكي، فهماني؟ زينة هزت راسها بحزن: بس أنا محبتش إنك تهملني كده. عمر مسك إيدها وباسها: حقك عليا وهعوضك عن الفترة اللي انشغلت فيها دي. زينة اتكسفت وابتسمت: خلوصة. عمر: يلا عشان نتغدى بقي. عدى شهرين وجه معاد كتب الكتاب.

زينة قبلها بأسبوع كانت زعلانة أنها هتقضي الأسبوع ده عند قرايبها ومش هتشوف عمر لمدة أسبوع كامل. ورغم أنه كان بيكلمها ويرن عليها، بس كان واحشها. لبست زينة فستان أبيض سيمبل وفيه فصوص فضي صغننة من فوق وسادة من تحت وبينفش بسيط في الآخر، ولفت حجابها ولبست تاج صغير وميكب خفيف. وعمر لبس بدلة زرقا وقميص أبيض وظبط شعره ولبس الساعة اللي زينة جابتهاله في عيد ميلاده وملبسهاش من وقت ما هي جابتها عشان كان حابب يلبسها في كتب كتابهم.

حمزة: يلا ي مولانا اكتب الكتاب. المأذون: طيب، نادوا العروسة عشان ناخد رأيها. حمزة بغيظ: رأي إيه؟ دي هي اللي جايباه. عمر حاول يداري ضحكته: قلبك أبيض بقي خلاص، أنا هبقى جوز بنت أختك. حمزة بتنهيدة: نادوا زينة. دخلت زينة بطلتها المبهجة، وعمر اتصدم. مكنش متخيل أن الفستان هيبقى حلو كده عليها. هو جابهولها وكان متأكد أنه هيبقى حلو عليها، بس مش بالشكل ده.

كتب المأذون الكتاب بعد مشاكسة طويلة بين حمزة وعمر. "بارك الله لكما وبارك عليكما وجمع بينكما في خير". عمر قام ومسك إيد زينة وباس راسها. عمر بص لها بنظرة فرح: وعد مني هعمل كل اللي أقدر عليه عشان أفرحك. زينة عيونها كانت بتلمع من السعادة، وعمر شالها وحضنها. عمر: تعالي بقي، لازم نرجع إسكندرية. محضرلك مفاجأة. حمزة: إيه؟ تروح فين؟ لا طبعاً. خالة زينة بضحك: سيبهم يا حمزة، ما خلاص بقت مراته واطمنا عليها. ربنا يسعدهم يا رب.

حمزة بغيظ: طيب، خد بالك منها ولو زعلتها هـ... عمر بضحك: متقلقش والله، دي في عيوني. قامت زينة حضنت حمزة أوي. حمزة: ربنا يسعدك يا حبيبتي. زينة: مش عايزك تزعل مني على أي تصرف عملته دايقك. أنا فعلاً لما رجعت من السفر عرفت أني في الأول والآخر انتوا أهلي بردو، وانت في مقام بابا. قامت خالتها حضنتها وباركت ليها. وبعدها خدها عمر وركبت العربية، وباباه خد والدته وأخته معاه في العربية ومشوا.