رواية بديت أنساك يا لون السعاده الفصل الحادي عشر 11 - بقلم ضاقت أنفاسي

نزلت بابتسامه باتجاه الصاله : صباح الخير
ام صقر والتعب والارهاق باين على وجهها : صباح النور
ياسمين جلست جنبها : تعابنه ؟
ام صقر: ما نمت الليل من القهر
طول الليل اتصل على جواله يمكن يفتحه وابرد حرتي فيها
ياسمين : يعني وش رح يطلع بيده الحين ؟؟
وبنبره استهزاء اكيد رح يقول لك سالفه وانتهت
ام صقر استبعدت الفكره : نايف ما يعملها ورح يحصل حقنا من زوجته
واهلها المتخلفين
ياسمين بلامبالاه : نشوف وش يطلع بيد حفيدك
ام صقر وهي تناظر للبعيد : رح تشوفين وش رح اعمل
**
**
**
**
**
**
واقف عند الشباك يكلم بالجوال ويعتذر : والله نسيت الجوال مقفل
ام صقر بغبن : لا الظاهر نسيتنا ولا عدت تعرفنا
نايف باعتذار : الله يسامحك انسى نفسي ولا انساكم
ام صقر بزعل : ايه واضح
والدليل اخذت عروستك وحنا مو موجودين ولا انتظرت حتى نشوفك ونسلم عليك
نايف رفع حاجب : انا الي لازم ازعل
ادخل عند عروستي وما أشوف أحد منكم
وكأني مقطوع من الشجره
ام صقر  بحده: قول لأهل زوجتك دخلوك ولا أحد خبرنا
استغلوا الفرصه بعد سواد وجههم
عقد حواجبه باستغراب : سواد وجههم ؟!!!
ام صقر  بقهر: ايه سواد وجههم ما قالت لك حرمك المصون إنه أهلها ضربوا زوجه عمك ساري ؟؟
قاطعها بعدم تصديق : وش تقولين ؟!!
متى صار هذا الكلام ؟؟
وناظر شوق الي وجهها الوان واقفه تناظره وهو يتكلم
كملت ام صقر : اذا مو مصدق
المعازيم كلهم
قاطعها : مصدقك يمه
واعطى شوق نظره توعد
وتابعت ام صقر كلامها : ويا ليت بس كذا عملوا...
جدتها وامها وخالتها تخيل شتمونا قدام المعازيم
وما احترمونا !!
وجدتها كبت المويه علي قدام المعازيم
رجع ناظر  شوق بنظرات توعد ما عنده خبر بشيء!!
بلعت شوق ريقها وهي تشوف نظراته
غبيه نسيت تخبره بالموضوع بطريقتها!!
وما تدري وش هببت ام صقر عليها
بس الظاهر ملحت وبهرت على كيفها
عضت على شفتها ورفعت نظرها
لنايف وهو يكلم امه : وش صار بعدين
ام صقر بانتصار وصلت لمربط الفرس : و زوجتك المصون تقول حنا حثاله
وقامت تردح لنا وتبغى تضربنا
فشلتنا قدام المعازيم
خلتنا بحجم النمله قدام الناس!
فتح عيونه بصدمه وناظر شوق
بنظرات ناريه  متوعده.....
نطق بضيق: طيب ليه ما احد خبرني ؟؟
ام صقر نطقت بقهر من البارحه وهي تبغى توصل له: جوالك مغلق
قاطعها بتذكر: ايه صح
ام صقر بانتقام تبغى تبرد حرتها : والحين
بس انقطع صوتها وتكلم محمد بعد ما سحب منها الجوال : اخبار العريس؟؟
ابتسم نايف بدون نفس : الله يسلمك
محمد ينهي المكالمه : يلا ما نبغى نطول عليك ننتظرك عالغداء
نايف بهدوء : ان شاء الله
قفل الجوال وناظرها بحده : وش الي سمعته ؟!
شوق فتحت فمها بحركه غبيه : هاه
وش سمعت ؟!
نايف بنبره حاده : البارحه
حكت شعرها بتوتر وتكلمت ما تدري  كيف ترقع: ما غلطنا على أحد اهلك هم
قاطعها بعصبيه : لا تقولين اهلك فاهمه ؟
اكره ما علي هالكلمه
جهزي نفسك الحين نروح عندهم
ورح تعتذرين لأمي عن تصرفك السخيف فاهمه ؟
طالعته ورفعت حاجب بعد ما تكتفت : بس انا ما أدري إمك بأي مقبره مدفونه علشان اعتذر منها
طالعها بعصبيه قاعده تتمسخر عليه : اتوقع إني اتكلم عن أمي أم صقر وهذي السخافه ما لها داعي
ردت شوق بكره وحقد : بس هي مو أمك هي
جدتك
قاطعها بحده : امي غصب عن الكل
وبأمر بسرعه جهزي نفسك
رفعت اصبعها على رقبتها ومررته وهي تناظره بعناد : لو تقص رقبتي ما اعتذرت من احد
رفع حاجب  : مصممه على رأيك ؟
هزت شوق راسها بثقه مستحيل تذل نفسها  لأهله : ايه
طالعها بتوعد : براحتك بلاه تعتذري
بس انا رح يكون لي تصرف ثاني
حركت شفايفها بعدم اهتمام
انقهر من حركتها ومسك نفسه قبل ما يمسح فيها الارض فوق غلطها تعاند ...
زم شفايفه بعصبية وتركها وهو ناوي يطلع هالحركه من عيونها
**
**
**
**
**
ام صقر وهي تحوس وتفكر : نفسي اعرف وش عمل فيها ؟
ياسمين بملل: وش رح يعمل فيها يعني ؟؟
ام صقر  وقلبها متشوق يشفي غليلها من شوق: متشوقه اشوفها ووجهها
الوان ومنتفخ
وابرد حرتي فيها واجلس اضحك بصوت عالي عليها
اخخخ بس متى ييجون ؟
اسراء بتفكير : اذا صارت بينهم مشكله
يمكن ترفض تيجي هنا
ام صقر ناظرتها بسخريه :تراك ما تعرفين نايف
تراه رجال وما تغلبه حرمه
من شعرها يسحبها ويجيبها تحت رجليني تعتذر ورح تشوفون
ياسمين باستبعاد : والله ما ظنيت
جيل اليوم كلهم يركضون خلف حريمهم ويبيعون اهلهم..
قاطعتها ام صقر ما عجبها الكلام : إلا نايف غير تربيتي
**
**
**
**
**
وقف عند باب الغرفه بهدوء : بسرعه
ناظرته شوق وكل الوان الطيف بوجهها : دقيقه
تقدم خطوه وبصوت آمر: بسرعه امسحي الي بوجهك
عفست ملامحها باعتراض : لي ساعه وتبغى بذي السهولة امسحه ؟
رفع اصبعه بتهديد : شوق لا تخليني استخدم معك اسلوب ثاني
اقولك خلاص لا تكشفي عن وجهك وتغطي قدام اعمامي وانتهينا
حطت يدها على خصرها : يا سلام
وليه ياسمين ما تتغطى ولا حتى اسراء الكل يكشف لما يطلع
وانا تبغى كمان بالبيت تضغطني
رفع حاجب : بس ياسمين
محتشمه باللبس
لبسها واسع ومجرد كحله ما تحط وتطلع ...واسراء مثلها
شوق ما عجبها الكلام : طيب وانا وش لابسه حتى تقول هالكلام
وبعدين خلاص انا ما أبغى اتغطى
ناظرها باستصغار : وليه ما تبغين تتغطين ؟؟
وما ترك لها فرصه تجاوب : انا رح اختصر الموضوع من بدايته...ما لي خلق  اطولها وهي قصيره ...ما تبغين تتغطين براحتك بس بشروط عبايتك هذي ما تمشي معي تلبسين واسع
ومجرد كحله ما في
قاطعته بتمرد : والله ؟!
تنرفز من ردها : وعله تجيك من عند الله
انقهرت من رده ... وبداخلها  تدعي على ام صقر كيف هالفتانه قلبت حياتهم لنكد ..دوبهم سمن على عسل ومن بعد اتصالها قلبت كل شيء ..وبقهر نطقت : مو انت من الصبح زعلان وما تكلمني
والحين على هذي السالفه كلمتني وتتأمر بعد ؟!
رد بهدوء : وللحين ما اكلمك لكن
مثل هذا الامر مضطر اكلمك
قاطع كلامه رنين الجوال ناظرها قبل ما يرد عندك خيارين اما تغسلين وجهك او تتغطين وما تكشفين حتى قدام اعمامي
وتركها وما ترك لها مجال للاعتراض
ضربت الأرض برجلها بقوه من القهر
ما تقدر تمسح المكياج لازم تكون حلوه
وما رح تسمح لسميه واسراء يغطون عليها
عضت على شفتها بقهر وهي ناويه بعد الزواج تترك ما تغطي وجهها...
وتصير تكشف علشان تقهر فارس
جلست على طرف السرير وهي محتاره بين الامرين
...
**
**
**
**
**
طول الطريق ساكت وما كلمها
ولا كأنها موجوده...وقلبه يغلي غليان منها ...لو اهلها الي غلطوا كان اخف عليه وما يقدر يحاسبها على اغلاط غيرها ..اما انها تشتم اهله وتردح لهم ...ما يقبل بهذا الشيء أبدا....رح يعلمها كيف تحط حدود للاحترام وما تتعداها!!
تنرفزت شوق  من سكوته .. نطقت بقهر : وبعدين ؟؟
ناظرها بطرف عينه ولا كأنها تتكلم ورجع عينه عالطريق
شوق بعصبيه : سبحان الله سمعت من جدتك السالفه ولا كلفت تسمع مني
بدون ما يناظرها : امي ما تكذب...ولز كان الكلام مو صحيح كان مباشره انكرت ....
وخلاص قفلي على الموضوع ما أبغى افتحه!
ردت بقهر : اوكي مثل ما تبغى رح اقفل عليه
بس ابغى اسألك  سؤال ...بالله عليك جدتك خبرتك إنهم من اول ما وصلت جدتي طردوها
قالت لك انه ياسمين ضربت خالتي
قالت لك انهم ما قصروا فينا ؟!!
اكيد لا
بس نقلت وش كانت تصرفاتنا
سبحان الله الانسان مستحيل يحط الحق على نفسه
بس جدتك تبغى سالفه علي علشان تطلقني لأنها ما تحبني وانت تعرف هالشيء
وإلا حرمه كبيره بالسن تدور علشان تطلق وحده يوم الصباحيه !!
اعطيني سبب مقنع يخليها تعمل كذا فيني
والا البارحه قدام المعازيم تقول تبغى تناديك علشان تطلقني ؟!!
هذا كلام ينقال ؟!
اكيد انت مو مصدقني ..لكن حتى تتأكد اسأل بنفسك ورح تعرف اني صادقه وما كذبت عليك
وبصوت باكي : خلاص اذا لذي الدرجه كارهيني من الحين طلق
خلاص وانتهينا
قاطعها بعصبيه : وش طلق هذي ؟؟
انتم ما عندكم الا طلاق ؟؟
مسح على وجهه بيده واستغفر بصوت مسموع
وبعد صمت دام لدقائق تكلم بهدوء وهو محتار بينهم كل وحده تقول سالفه هو متأكد انهم ما قصروا ببعض : خلاص قلت لك قفلي عالموضوع
شوق بقهر ناظرته : كيف أقفل على الموضوع وانت ما تكلمني ؟؟!
ناظرهابهدوء : خلاص اعتبريني رضيت اتفقنا
وقفلي على السالفه وانتهينا
ابتسمت شوق من تحت الغطاء ابتسامة نصر
وقف السياره لما وصل البيت وقبل ما ينزل ناظرها : غطي على عيونك
و قبل ما تعترض نطق : هذا الاتفاق
هزت راسها بالموافقه وغطت على عيونها
ونزلت بهدوء
**
**
**
**
ام صقر وقفت لما سمعت إنهم وصلوا
والفضول ذابحها تشوف شوق
ناظرتهم وهم داخلين واحتقن وجهها قهر
وهي تشوف شوق ماسكه يد نايف
وحفيدها راسم ابتسامه عريضه
تحس كل مخططاتها تبخرت بالهواء
اقترب منها وسلم عليها بفرح
بادلته السلام ببرود وكأنها بعالم اخر
تقدمت شوق تسلم على ام صقر بعد نايف
بس تفشلت لما اعطتها ام صقر ظهرها و جلست على الكنبه
ونفس الحركه عملتها اسراء وياسمين
طالعت نايف وجلست جنبه ولا كأنه صار شيء
همست له : شفت بعينك
همس لها : علشاني طنشي
سكتت وما ردت
ناظرتهم ام صقر وهم يتهامسون وانقهرت بزياده
ياسمين : كيف الزواج ؟؟
نايف بابتسامه وقبل ما يرد عليها
دخل محمد
وقف نايف وسلم عليه بحراره
وبعدها جلسوا
وبارك محمد لشوق وردت عليه بصوت منخفض الي يسمعه ما يصدق انها شوق
ام صقر تناظر محمد : وين اخوك تأخر ؟؟
محمد بهدوء: على وصول
وابتسم لما شافهم داخلين
ووقف حتى يسلم عليهم
دخل ساري مبتسم وسلم على الجميع
وجلس وجنبه سميه
نايف بهمس لشوق : ليه ما سلمت على سميه
انقهرت شوق : دوبهم اهلك ما سلموا علي ما شفتك قلت
قاطعها بهمس : بعدين نتفاهم
ساري يناظر نايف بمحبه : مين توقع انه انا وانت نتزوج بنفس اليوم
نايف بابتسامه : مع اني دائما اقول رح اتزوج قبلك
ام صقر بنغزه : الحمد لله ساري ربنا
رزقه زوجه خلوقه مؤدبه ومحترمه وحلوه
وبنت عالم وناس واهلها يشرفون مو يفشلون
انقهرت شوق وهي تحس انها تقصدها
تبغى تردها لها بس ما تدري كيف
عضت على شفتها وهي تشوف احمرار وجه سميه
انقهرت شوق بزياده وهي تشوف جمالها زاد
اسراء بابتسامة : تسلمي يا خالتي
وساري ما شاء الله عليه
ناظرتها شوق بكره نفسها تمسح فيهم الارض
محمد يغير الموضوع ما عجبه الكلام ما له داعي ضرب الكلام : وين البنات يا ام فيصل ؟
اسراء : للحين نايمات ما ناموا إلا بعد الفجر
ساري : لكم ساعه عجلوا عجلوا ودكم تتغدون
وقفت ياسمين : جاهز يالله
شوق وقفت جنب نايف وبصوت ماكر : انا ونايف حطي لنا صينيه لوحدنا نبغى نتغدى بالجناح مع بعض
ام صقر خلاص انفجرت حركت شفايفها تتكلم بس
سبقها محمد ينهي المشكله : عجلي يا ياسمين بسرعه حطي لهم
ياسمين ناظرته وهي رح تنفجر وهي تحس نفسها خدامه عند شوق
بس ما علقت وتوجهت للمطبخ
توجهوا للمطبخ بهدوء
نايف ناظر شوق وهي مو باين منها شيء : انتظري شوي اجيب الاكل
هزت راسها وهي تحس نفسها تبغى تضحك بصوت عالي على اشكالهم
**
**
**
**
ام صقر بزعل بدون ما تناظره : روح عند حرمك المصون من اول يوم فضلتها علينا
نايف زفر بضيق من هالحاله
محمد : يمه الله يهديك زوجته متغطيه
كيف تتغدى معنا اكيد ما تقدر تأخذ راحتها
ام صقر : بس انا كنت مخططه نجتمع عالغداء مع بعض
ونلتم مو تيجي ذيك الحيه وتفرقنا
ياسمين بقهر : لا وبعد تتخدم علينا
نايف بصدق : وليه فهمتي قصدها إنها تتخدم عليك ؟!
تراها اول مره تدخل هنا كيف تبغينها تدخل وتطو
قاطعته ام صقر بعصبية : وصرنا ندافع عنها
خلاص روح لها الحق علينا
اقترب منها وقبلها على راسها : والله ما اطلع وانت زعلانه علي
وهذي قعده
وجلس على طاوله الاكل وبدأ يتناول من الغداء والكل يناظره
ضحك محمد على تصرفه وبعدها تكلم: قوم قوم روح عند زوجتك
ترى امي تمزح معك
اعطته ام صقر نظره قويه
وجلست وهي ماده البوز
نايف بضيق : طيب قولي وش الي مضايقك ؟؟
ام صقر ناظرت محمد وشافته زعلان من تصرفها...
زفرت بضيق : خلاص روح عند حرمك المصون
مو زعلانه
وقف نايف : متأكده إنك مو زعلانه
ام صقر بمجامله : الله يوفقك ويسعدك
نايف بابتسامه : امين

**
**
**
**
**
**
حط الاكل على الطاوله وناظرها وهي تنزل الغطاء ومكشره
رفع حاجب : وش فيك ماده البوز ؟!!
لوت بوزها : ولا شيء
وبعدها طالعته وهي تقرص عيونها : لا تقول الاكل تحت عند اهلك كل يوم ترى
قاطعها : ترى الأكل الحين رح يبرد
تعالي تغدي
والاكل هنا بالجناح لا تخافي
لوت بوزها مو عاجبها شيء
وجلست مقابل له وبقهر : وسميه واسراء ليه ما يتغطون عنك ؟!
ابتسم وهو يشوف غيرتها : بكيفهم
وش رأيك اروح اقول لهم تغطوا عني ؟!!
وبعدين وش فيها لو كشفوا عادي
لوت شوق بوزها بقرف : قله ادب
فتح عيونه بصدمه سبحان الله مين الصبح الي كانت ما تبغى تتغطى
الحين صارت قله ادب
ارخى ملامحه شوي : لا تتدخلي بأحد خليك بنفسك
شوق بقهر وغيره من جمال سميه : هذي سميه ما دخلت راسي شايفه حالها
زفر بضيق : انا وش قلت لك ؟!!!
شوق وللحين مقهوره :شفت اهلك كيف يفرقون بيننا ؟
ما احد سلم علي
اما سميه
قاطعها : يعني البارحه متهاوشه معهم وش تبغينهم يأخذونك بالاحضان
وبنرفزه
خلاص قفلي عالموضوع قلت لك
قسم بالله تسدون نفس الواحد عن الاكل
ناظرت شوق الأكل نصه راح ويقول
انسدت نفسه عن الاكل وهي بعدها كم لقمه !!!
**
**
**
**
**
فاطمه بهدوء قفلت الجوال وهي منقهره من ام صقر
نزلت تحت وجلست بهدوء
ناظرتها الجده : اخبار شوق ؟
فاطمه وهي تحاول تخفي الضيق : الحمد لله بخير
دانا : وين رح تقضي شهر العسل
فاطمه ما عجبها السؤال : اجلوه بعد فتره
لانه جدته ما لها فتره متوفيه
شريفه : الميت الله يرحمه بس المفروض
فاطمه بنرفزه مو طايقه تسمع شيء : المفروض ما تتدخلون لأنها مو من خصوصياتكم
راحت اجت ما يعنيكم هالامر
الجده ناظرتها باستغراب : وش فيك
هبيت فينا ما قلنا شيء
فاطمه تحاول تكون طبيعيه : بس بعض التدخلات تنرفز
دخل وليد وجلس جنب امه وبرجاء : يا يمه قولي لابوي اقنعيه
شريفه بضيق من تصرف فاطمه : انا ما لي دخل
روح لابوك وقول له
الجده بنصح : يا وليدي وش تبغى بذي الطلعه ما ييجيك منها الا وجع الراس
دانا : شوف فارس يتوسط لك عند ابوي ترى كلمته
وليد قاطعها : اخخخخ من هالفارس
اقنع ابوي ما نروح مع انه ابوي كان
مقتنع
ما ادري وش يحس فيه هالفارس
يتحكم بحياتنا ترانا ما عدنا صغار
خالد دخل بتأييد: صادق حنا مو صغار حتى فارس يتحكم فينا
الجده : وش فيكم تراه اخوكم الكبير
قاطعها خالد بعصبيه : مو اخوي
ولا له كلمه علي
هذا الناقص ولد عمي يتحكم بطلعاتي
فارس واقف ويسمع كلامه وبابتسامه قهرت خالد : هذا الي اجاك
مو عاجبك روح  للمحكمه اشتكي
وليد بعصبيه : ترى مو ناقصك فاهم
شريفه اعطت وليد نظره قويه : تكلم اخوك الكبير كذا ؟
ما تستحي على وجهك ؟
خالد بقهر من تعظيمهم لفارس : كبير على نفسه
قاطعهم دخول ياسر وناظرهم باستغراب : وش فيه صوتكم طالع ؟؟
وناظر امه حاطه يدها تحت خدها وتناظر الموقف بصمت
الجده تنهي الموضوع : ما في شيء
ياسر هز راسه بهدوء وهو اصلا عارف الساالفه وصوتهم طالع لبرا
ناظر وليد وخالد وابتسم : صحيح
ترى ابوي وافق على الطلعه
وقف وليد بلهفه :قول قسم
ضحك ياسر : وقسم بالله وافق
ومن الحين لو تبغون تطلعون
خالد بفرح : ايوه كذا
هههههههه
فارس وهو يناظرهم بقهر وشاد على قبضه يده
وده يمسك ياسر ويكسر راسه
اخذ نفس وطلع لجناحه وهو يتوعد فيهم
**
**
**
**
••
**
ثاني يوم
طلعت من المطبخ ومعها القهوه
وسرعان ما شدت على  الدله بقهر
وهي تشوف نايف وشوق طالعين
من البيت
وماسكين يد بعض
ونايف صوت ضحكته طالع
بعد ما طلعوا توجهت للصاله
وجلست بقهر وحطت الاغراض على الطاوله بقوه
وصارت تهز رجلينها بقهر
هذا الي ما حسبت حسابه
انه يصير خاتم بإصبعها
مستحيل تتركها تأخذ حفيدها وهي جالسه تتفرج
**
**
*
فاطمه
فتحت الخط وبصوت متعب بائس :الو
ابعدت السماعه عن اذنها شوي من العاصفه الي هبت عليها : ليه ما تردي على الجوال ؟!!
قولي انه الزفت مانع تردين على امك ؟
وينه هالخبيث خليني اعرفه قدره الي ما يسوى نعال
زفرت بضيق مقاطعه أمها : الجوال بالغرفه وما سمعته
ام عمر بتهجم : ايه وش تبغين بالجوال دام زوجك الزفت عندك
وكأنه ما عندك أم تتصلين فيها تشوفين أخبارها
فاطمه بنبره حزينه : حقك علي يا يمه وانا اسفه
ام عمر بعصبية : وش ابغى بأسفك حسبي الله على زوجك
وقفلت الخط بوجه فاطمه
ناظرت فاطمه الجوال وهو مقفل اخذت نفس
عميق لعله هالهموم الي كاتمه على نفسها تروح
ما تدري وش تعمل أمها الي ربنا أنزل بالقران البر فيهم وزوجها الي امر الله بطاعته
هي ما بين أمها وزوجها وكل واحد يضغط عليها
حتى يقهر الطرف الاخر
وهي الضحيه ....

**
**
**
**
**
**
**
ام صقر تناظر سميه بمحبه : الله يوفقك ان شاء الله
سميه بابتسامه : الله يخليك يا خالتي
ساري بسعاده انه امه راضيه عن زوجته : وأنا ما لي دعوات
ام صقر ناظرته : احد ما يدعي لروحه
الله يوفقك يا وليدي ويسعدك ويرزقك الذريه الصالحه
ساري زادت ابتسامته : الله يخليك لنا
قاطعه نايف وهو داخل ويده بيد شوق : اشوف الدعوات لناس وناس
ساري ضحك بخفه وبعدها تكلم : الظاهر ورقتك طايحه
وحرك حواجبه يقهره
نايف يجلس وشوق جنبه وبثقه : بأحلامك
وناظر ام صقر صح يمه ؟!
ام صقر بقهر : والله الي يسمع كلامي ما تطيح
ورقته
نايف سكت بعد جوابها ورجع ناظرها : وفي أحد ما يسمع كلامك يالغاليه
ام صقر ناظرته بنغزه: باين
واعطت نظره لشوق الي مو باين غير عيونها
ساري متضايق من شوق بعد سالفه الحفله
وكيف ضربوا زوجته..وتكلمت بوقاحه عليهم ...ما يدري كيف نايف يناظر بوجهها ..لو كانت عنده كان علمها أن الله حق ...
ابتسم على كلام امه وخاصه انه حس انها شوق فهمت مغزى امه
نايف يغير مجرى الحديث ويكلم سميه : الله يكون بعونك على ساري
تراه غثيث
سميه تناظر ساري وابتسمت : قول هالكلام من غيرتك
نايف بابتسامة : انا اغار من هذا؟
وليه اغار ؟
ام صقر بضربه لشوق : تغار لأنه ما شاء الله عليه
دكتور ومعاه فلوس وزوجته ملكة جمال
وبنت حسب ونسب وفوق هذا متعلمه ومعها ماستر
مو أميه وغبيه وما تفهم وما تحترم الي اكبر منها
سكتت ام صقر وهي تشوف ساري
يضحك بصوت عالي
ساري ما قدر يمسك ضحكته وهو يسمع نغزات
أمه
بس بلع ضحكته وهو يشوف نظرات نايف
المعصبه
ساري وهو يأخذ نفس : تذكرت نكته الحين
نايف طنش كلام امه وهو يحس انه شوق
مولعه من كلام ام صقر
سميه ببراءه : طيب قول النكته وضحكنا معك
ام صقر : تراك طيبه يا سميه وعلى نياتك
معقول ما
قاطعها نايف قبل ما تزود الكلام امه وهو يناظر ساري : ترى نسيت تقول أمي اني احلى منك
وحرك حواجبه يقهره
ساري زم شفته : وش ابغى بالجمال اهم شيء الدراسه والتفوق العلمي
شوق بنغزه ما قدرت  تسكت: مو شرط التعليم
عندك ناس يكون معهم شهادات بس الحمار يفهم اكثر منهم وعندك ناس ما كملت تعليمها بس تكون حياتهم اكثر تفاهم من المتعلمين
ساري تضايق من كلامها ومتأكد انها قاصديتهم بالكلام نطق  بحاجب مرفوع: مو شرط
بنفس الوقت عندك كثير من الي ما كملوا تعليمهم ما ينجحون بحياتهم اليوميه
وحتى عيالهم غالبا يطلعون فاشلين مثل أهلهم!!
ام صقر تقاطعه بخبث وتمثيل متقن : يا حسرتي عليك يا نايف وش رح يطلعون عيالك وامهم ما وصلت الثانويه
شوق وهي ماسكه نفسها ما تمسح فيهم الارض ... بس مستحيل تسكت لهم تعرف كيف ترد لهم الصاع صاعين ... نطقت بكذب: صحيح ما كملت تعليمي
بس روحي شوفي شهاداتي كل سنه اطلع بشهاده تقدير ومن الاوائل
ام صقر بعدم تصديق :وليه ما كملت تعليمك ؟!
شوق وهي تنفخ ريشها بالكذب : بصراحه ما لي خلق للدراسه
والبنت اخرتها للزواج
ما رح تفيدها الجامعه بحياتها الزوجيه
الأهم تهتم بزوجها وعيالها
مو تكون مشتته بين الدراسه والوظيفة والزواج والعيال
سميه بطيبتها صدقتها : وكيف ابوك وافق تطلعين من المدرسه ؟
شوق تكمل كذبتها : زعل بالبدايه مني ورفض بشده
وقال لي حرام هالذكاء يروح وما تستفيد منه هالبلد
ساري حسها تبالغ بس ما علق على الموضوع
ام صقر وكل هالكلام مو داخل عقلها : وامك وجدتك مزنه وش قالوا ؟!
شوق بابتسامه خبيثه بانت من عيونها : جدتي انبسطت من طلوعي من المدرسه بس انقهرت بنفس الوقت
لانه تقدم لي عرسان كثير مهندسين ودكاتره ومعلمين ورفضتهم ما ابغى الزواج
تغير وجه ساري وهو يحس انها قاصديته لما خطبها و رفضته
ونفس الوقت إحمر وجه ام صقر بالقهر كيف شوق تنفخ ريشها وتضربهم بالكلام إنها رفضت ساري
قاطعها نايف وما عجبه كلامها لانه ما له داعي وخاصه لما شاف وجه ساري وام صقر : يالله يا شوق نطلع فوق جوالي ما فيه شحن
شوق بعدها ما كملت كلامها انقهرت ووقفت وهي تتوعد بنظراتها ام صقر بالايام الجايه
وطلعت مع نايف بهدوء
أم صقر بعصبية بعد ما طلعوا : هالخبيثه
ساري بضيق بس ما يبغى يظهر انه فهم شيء من مغزى كلام شوق : وش فيك يمه ؟؟
ام صقر وهي تعض على شفتها : هالكذوب
قال دكاتره ومهندسين
مين الغبي الي يطلع بوجهها ويوافق عليها
ساري وهو يحاول يكون طبيعي : حفيدك طلع غبي وتزوجها
ام صقر بقهر : لأنه مشفوح زواج ولو شافها قبل الملكه ما رح يرضى فيها
سميه بدفاع : حرام عليك يا خالتي والله انها حليوه
ام صقر بمكابره : الكل يقول عنها حلوه الا انا ما اشوف جمالها
ساري بتحليل : لانك ما تحبينها
ام صقر لوت بوزها بقرف : ولا رح ييجي اليوم الي احبها فيها
ساري اشر لهم يسكتون : كأنه صوت نايف طالع
ام صقر ترفع يدينها وتدعي من قلب : يا رب يطلقها ونفتك منها
ساري : حرام عليك يمه بعدها عروس
لفت وجهها ام صقر بعدم اهتمام لكلام ساري
**
**
**
**
**
**
نايف بعصبيه : الظاهر لسانك يبغى له قص
شوق عفست ملامحها بعصبيه : والله ؟!
نايف بصرخه : انكتمي
شوق وهي تحط يدها على خصرها والشر يطلع من عيونها : ما رح انكتم
نايف والشرار يطلع من لسانه : خليني اسمع سوالفك التافهة تتكرر مره ثانية ورح تشوفين وش رح يصير
خفف من نبره صوته وهو يقلد صوتها بسخريه : خطبني دكاتره ومهندسين بس رفضت
مالت عليك وعلى الي خطبك واولهم انا
شوق لوت بوزها وبصوت هامس ما يسمعه : مالت عليك لوحدك
لأنه ما خطبني غير انت وعمك الغبي
طالعها وهي جالسه تهمس بخفوت : اشوفك تتهامسين سمعينا
شوق بتذكر ابتسمت بغباء وبنفسها وابن خالي خطبني
اقترب واشر بيده قدام عيونها : الظاهر انجنيتي تبتسمين مع نفسك
ناظرته بابتسامه وسيعه بانت فيها الغماز وتكلمت بطريقه غبيه :هاه
طالعها بعصبيه هو مولع وهي تبتسم مع نفسها: وعصاه
وتركها وتوجه للغرفه
وهي جلست على الكنبه وهي تحس بالسعاده انها قهرت ام صقر
**
**
**
**
**
باليوم الثاني
جالسه مع امها وجدتها ومبسوطة
بتواجدهم عندها
الجده  مزنه : الله يرزقك الذريه الصالحه
شوق بابتسامه : انا ونايف اتفقنا نجيب عيال
بعد سنه
دخلت ام صقر على جملتها وحاست بوزها : وليه ان شاء الله بعد سنه ؟؟
شوق رفعت حاجب وهي تشوف ام صقر تسلم على امها وجدتها وتكلمت بدلع : نبغى نعيش حياتنا بدون ارتباطات
ام صقر جلست بعد السلام وبنغزه : الرجال ما يمشي معهم هالكلام
الجده بتأييد : صادقه
كله هذا خرابيط
شوق وقفت لما سمعت صوت نايف
وتوجهت لجهة الباب ناظرته وسرعان ما رجعت
للخلف لما نهرها
اخذت العبايه وتغطت وطلعت من جديد
واقتربت منه
نايف بعصبيه مكبوته وبصوت منخفض : كيف تتطلعين بدون
قاطعته بدون مبالاه : نسيت
تضايق من عدم مبالاتها تكلم بدون نفس : مره ثانيه انتبهي
ولما اناديك تيجين تسلمي على اهلك بالمجلس
شوق باعتراض : وليه ما اطلع الحين واسلم عليهم
ترى صار لهم وقت جالسين مو حلوه للحين ما سلمت عليهم
نايف بصوت حازم : مو الحين
وتركها وتوجه للمجلس
انقهرت من تصرفه وتقدمت خطوه تدخل لمجلس الرجال بس سرعان ما تراجعت خافت يكون في احد غريب بالمجلس علشان كذا قال لها ما تدخل
عادت ادراجها عند امها
**
**
**
**
**
**
ناصر ما عجبه صار لهم وقت جالسين وما طلعت لهم شوق ناظر نايف: وين شوق علامها ما دخلت تسلم علينا ؟!!
نايف وهو يتوعد كل الحركات ايام الخطوبه يطلعها من عيونه رد بابتسامة خبيثه : الحين تيجي مشغوله
داخل عند الحريم
ناصر هز راسه وما علق
وليد  زم شفته: والله صارت حركات شوق يعني تتغلى
عبود : ربع ساعه ما اجت حنا طالعين ورانا اشغال
سكت لما اعطاه ناصر نظره اخرسته
ياسر ابتسم نص ابتسامه : صاير مشاغل يا عبود وش عندك
خالد بسخريه : عنده شركات كبيره يا دوب يلحق عليهم
عبود ما رد وهو يشوف نظرات ابوه المعصبه
مر نص ساعه والوضع ما تغير ..والملل يعم المجلس ...
ناصر بغيض حاول ما يظهره وهو متأكد حركة نايف
مقصوده : نادي شوق خلينا نسلم عليها ما في وقت
نايف بابتسامة قهرت ناصر : ان شاء الله
طلع من المجلس وتوجه لمجلس الحريم ونادى شوق
بعد دقايق طلعت متغطيه : تعالي سلمي على اهلك
هزت راسها ومشت معه وهي متضايقة من تصرفه... دخلت المجلس وما كان فيه احد إلا إخوانها كشفت وسلمت على ابوها واخوانها من امها بحراره
اما عبود ووليد سلمت عليهم ببرود
وقبل ما يسألها ابوها عن حالها واحوالها
ناظرها نايف : خلاص روحي عند الحريم
عمي ساري يبغى يدخل ويسلم
شوق باعتراض : بس بعدني
ناصر وقف وهو مقهور  من حركه نايف : خلاص ما في داعي حنا طالعين
وناظر شوق قولي لأمك وجدتك تطلع
وما ترك فرصه للاعتراض
طلع من المجلس وهو معصب ..وكاتم قهره من نايف بصعوبه!!
شاف ساري قريب منه سلم عليه والضيق باين
بملامحه
التفت للمجلس وكان قريب منه وهو يسمع
صوت شوق واصل لعنده
استغرب هالشيء وبسرعه توجه للمجلس
بدون ما يعير اي اهتمام لساري
دخل المجلس وشوق تتكلم بصوت عالي وتصرخ : مو على كيفك فاهم
والحين راجعه مع اهلي
وتقدمت بقوه عين لما شافت ابوها داخل
ناصر حس بمويه بارده انكبت فوق راسه
وين ترجع معه وهي ما كملت اسبوع عند
زوجها تكلم بصوت متردد : وش فيه صوتكم طالع ؟؟
شوق صوتها يلعلع : راجعه معكم لو على جثتي ما اجلس دقيقه
خالد  بشر: ومين قال انك رح تبقين عنده
لانه واحد واطي
نايف رفع اصبعه بتهديد باتجاه خالد : احترم نفسك والمكان الي انت فيه
احسن ما امسح فيك الأرض
وليد بحميه تقدم باتجاه نايف ونبرة تهديد : اشوف كيف رح تمسح فيه الارض
علشان ادفنك بمكانك
ناصر بضيق ما يبغى تكبر المشكله : اسكت يا وليد
عبود بطيش وحميه عن خالد غافل الموجودين
ومد يده باتجاه نايف حتى يضربه
الكل اندهش من تصرفه
ومن رد فعل نايف لما مسك يد عبود قبل ما توصل لخده ولفها للخلف بقوه حتى اصدرت صوت طق
صرخ عبود بوجع من الالم : فك يدي يا حقير
خالد ووليد بنفس الوقت تقدموا
والشر بعيونهم ....
نايف استعد وهو ناوي يمسح الارض فيهم ..وقلبه مليان عليهم ...
وليد تقدم باندفاع نحو نايف
التفت بعصبيه للخلف لما اوقف حركته يد
امسكت بقميصه من الخلف
وليد والشرار يطلع من عيونه والحركه نرفزته بزياده : ياسر اتركني خلني اعرفه قدره
ياسر بعصبيه ناظره : انت ما تستحي على وجهك
تتهجم على رجال في بيته !!
تكتف نايف وهو يشوف رد فعل ياسر لوليد ولوى شفايفه بسخريه واخيرا شاف احد بالعائله يفهم
وسرعان ما فتح عيونه وهو يشوف خالد
ينهال عليه بالضرب وهو يصرخ : هذا يبغى له واحد يكسر راسه
تقدم ياسر يساعد نايف بس مسكه سامي ووليد صرخ ياسر بقهر : خالد اترك الرجال
نايف وهو يمسك بيدين خالد ويبعده عن رقبته
الي تحول وجهه وصار احمر من قبضة يد خالد
شاف عبود وهو يمسك طاوله صغيره وناوي
يضرب فيها نايف
ضرب  نايف بكل قوته بوكس ببطن خالد الي ارتخت يدينه
وبسرعه حرر نايف نفسه من خالد
ناصر الي صرخ على عياله يسكتون بس ما احد
رد عليه
جلس على الارض بتعب وهو يحس الضغط ارتفع عنده وصار يتنفس بصعوبه
نايف رجع واشتبك مع خالد
شوق تناظر بندم وهي تشتم نفسها انها السبب بالشجار
وقع نظرها على ابوها الي تحس انه شبه فاقد الوعي
توجهت له بسرعه ومعها كأس مويه وصارت تمسح على وجهه بيدين مرتجفه خايفه
ناظرت اخوانها وصرخت باعلى صوتها : خلاص كافي
انتبه ياسر لابوه وحاول يفلت من اخوانه وبصرخه : ابوي يالغبي اتركني
وسرعان ما حرر نفسه وتوجه لخالد وسحبه من نايف وبدأ يضربه بقوه ويصرخ : الله يأخذك انت واخوانك
فضحتونا
وبعد ما طلع حرته منه تركه متوجه عند أبوه
بدأ ناصر يحس بتحسن ناظر عياله فوق راسه
وبصوت متعب : حسبي الله على عدوكم
نايف اقترب خطوه وهو يمسح وجهه بتعب
وملابسه معفوسه
ياسر اسند ابوه ووقفه بعد ما طلب منه
وقف ناصر بصعوبه وبصوت اقرب للهمس : نادي جدتك وامك تأخرنا
شوق وهي تبكي : يبه
خالد وحالته حاله : امشي معنا يا شوق
شوق رجعت للخلف بخطوات دلاله على الرفض
ناصر بحزم : اجلسي عند زوجك
ياسر بهدوء ظاهري وبداخله نار من همجيه اخوانه : يالله يبه تأخرنا
واشر لاخوانه يطلعون
مسك نايف نفسه قبل ما يقول لشوق انقلعي مع اهلك بس مسك لسانه ما يبغى يتسرع
ويندم بعدين
شوق وهي تناظر ابوها واخوانها طالعين
لفت للخلف وشافت نظرات نايف لو كانت نظراته
تقتل لقتلتها
تكلم من بين اسنانه : روحي خلي امك وجدتك يطلعون
وتركها وطلع
تنهدت براحه لبضع ثواني ورجع لها الخوف
بعد ما ودعت امها وجدتها احتارت وين تروح ؟
خافت إن طلعت للجناح يستفرد فيها ويلعن خيرها
وان جلست تحت مع اهله تخاف يفشلها
قدامهم
قررت تجلس بالصاله وهي تحاول تظهر عدم المبالاه

****
**
**
**
**
نايف واقف برا وداخله نار ما برد حرته فيهم
كيف في وسط بيته يعتدون عليه بالضرب
لازم يطلع هالحركه من عيونهم
وقهره ناصر ما كلف نفسه يعتذر او يخلي عياله يعتذرون
ساري وهو واقف جنبه : وش صار داخل صراخ عيال ناصر طالع ؟؟
نايف زفر بضيق : ولا شيء
ساري بعدم تصديق وهو يشوف شكل
نايف معغوس : من متى تخبي عني ؟!!
نايف ما له نفس يتكلم : اتركني لوحدي الحين
وتركه نايف قبل ما يفتح تحقيق معه
***
***
***
ياسر بعد ما رجعوا البيت وقف مع ابوه وبضيق : عجبك يبه تصرف عيالك ؟!
ناصر عفس ملامحه : ياليتهم للحين يطقونه
فتح ياسر عيونه بصدمه : وش تقول؟!!
ناصر يكمل كلامه وهو قابض يده بقوه : والله
لولا كلام الناس ما تركتها عنده دقيقه
ما شفت حركته الي عملها
ياسر بترقيع : حرام تظلمه يمكن الرجال مو قصده
ناصر هز راسه : انا متأكد لولا خوفي انه يطلقها
وهي ما كملت اسبوع عنده والا كان لي تصرف ثاني عنده
عموما لا تجيب سيره قدام احد وانسى الموضوع
هز ياسر راسه بضيق ما يبغى تصير مشاكل من اولها
***
***
ام صقر باستغراب وهي تشوف شوق جالسه معهم من وقت ما طلعوا أهلها وما طلعت للجناح
اسراء باستغراب وهي تناظر شوق : وين نايف من وقت طلع وما رجع ؟!
ساري ناظر شوق ينتظر الاجابه على نار يمكن
يلاقي مبرر للموقف الي شافه
بس كشر وهو يسمع رد شوق : ليه تسألين عنه ؟
اسراء هزت كتوفها : بس ابغى اطمئن عليه
شوق وهي ما لها خلقها : امه والا اخته وانا ما أدري ؟!
اسراء ما عجبها رد شوق : ايه اخته عندك اعتراض ؟!
شوق لفت وجهها عنها وتكلمت من رؤوس خشومها : بس زوجي ما عنده إخوان ولا أخوات
سميه : حنا نحسبه مثل اخونا
شوق باسلوب اقرب للسخريه : طلعي جوالك واتصلي عليه علشان....
قاطعتها ام صقر بحده : اعوذ بالله اكلت الحرمه
بلسانك وهي ما قالت شيء !!!
شوق بضيق : يعني مو سامعه كيف فتحت تحقيق
تبغى تعرف وين زوجي !!
وشهوله تسأل عنه ؟!
زوجها مو موجود معنا اجي واسالها وين زوجها ؟!
وش هاللقافه هذي ؟!!
ساري انقهر منها ومن اسلوبها
وحس إنها منفعله زياده عن اللزوم اكيد صار شيء
بالمجلس بس وش صار ما يدري
عم الصمت لدقائق وقطعه دخول نايف
رد السلام بدون نفس وجلس جنب شوق
ام صقر وهي تناظره: علامك ماد بوزك شبرين ؟
والا مو عاجبك الجالسين ؟!
نايف ماله مزاج للكلام : ما في شيء بس تعبان
الظاهر لوزي رح تنزل
ووضع اصابعه على حلقه يتحسس برفق
اسراء بابتسامة تكلم نايف حتى تقهر شوق : دوبني اسال عنك استغربت عدم تواجدك
نايف سكت لثواني وبعدها تكلم : عزمني واحد من الربع اتقهوى عنده
ساري ناظره وهو نفسه يعرف وش الي صار وقلب حاله
انقهرت شوق من نايف كيف يبرر لاسراء عدم تواجده
وبنفس الوقت قلبها يدق بقوه خايفه منه
وخاصه للحين ملامحه ما تبشر بخير
دخلت شمس وخلفها اختها قمر معهم عصير وحلويات
شمس بابتسامة : يا هلا بعمي ساري وعروسته
خالتي سوسو
ساري ضحك ضحكه قصيره : الله اعلم وش عندك بعد هالترحيب
شمس خزته بعيونها : الحق علي ارحب فيكم
قمر ابتسمت وهي توزع العصير : انتبه يا عمي اكيد عندها مصلحه
شمس حاست بوزها بطفوله : الله يسامحك يا عمي
سميه : ما عليك منه يا احلى بنوته بالعالم
اسراء بامر : اقول وزعي الحلو بلا كثره حكي
لوت بوزها : ان شاء الله
شمس مدت الصينيه باتجاه شوق
ردت شوق بحركه بيدها دلاله على الرفض
شمس ما عجبها تكلمت : ليه يعني تقرفين من عندنا
ناظرتها شوق بكره وهي ماسكه نفسها ما تبغى ترد عليها وتزيد المشكله خلها بالاول تنتهي من سالفه اخوانها وبعدها تتفرغ لهم
سميه : لا تضغطيها يمكن علشان النقاب ما رح تعرف تأكل
شمس تحكي بترفع : يا اختي شيلي هالنقاب
لا تخافي ما أحد رح يطلع بوجهك وكل هالجمال موجود
واشرت براسها على امها وخالتها سميه
سرعان ما حطت يدها مكان الكف وفتحت عيونها بصدمه
صرخ بعصبية : اقسم بالله لو أسمع كلام سخيف مثلك ما يصير خير
واحترمي نفسك فاهمه !
احسن ما اكسر راسك
هذي الي مو عاجبيتك احسن من امك وخالتك وكل اهلك بالف مره
وزفر بغضب وبعدها نطق: قلة ادب
ناظرته بعصبيه كيف يمد يده عليها
ويكلمها بذي الطريقه
صكت على أسنانها وبكل قوه رمت الصينيه على شوق وصرخت : الله يأخذك انت واياها
وبسرعه تركت المكان تركض بسرعه
مطنشه ساري وهو ينادي عليها
**
**
**
**
**
**
**
فارس بغضب من حركه نايف كله ولا ناصر ما رح يسكت : كيف يسمح لنفسه يعمل كذا ؟!
يقال ابوي ناصر يبغى يجلس معه
وليد بقهر : نفسي للحين اضربه قهرني
خالد : قهرنا يبغى يبعدها عنا وما نشوفها
فارس هز راسه
كمل عبود : ما ذبحنا الا ياسر محامي دفاع عنه
وليد : خاف تكبر المشكله وتصل للطلاق وهي ما كملت الأسبوع عند زوجها
فارس باستفسار : والحين ابوي ناصر وين ؟؟
وليد هز كتوفه : ما ادري شفته كان واقف مع ياسر
عض فارس على شفته بغيره من ياسر
وهو يحس روح الانتقام فيه بدأت تنمو بداخله
**
**
**
**
**
**
**
جالسه بالغرفه وزادت عيار الالم حتى ينسى
نايف سالفه اخوانها
نايف ناظرها : يوجعك كثير ؟
شوق تبغى تضحك على اهتمامه واصلا ما يوجعها شيء يستاهل
وبنفس الوقت تبغى تبكي وهي تشوف اهتمامه
فيها
وكيف يحاول يداوي جراحها
ودافع عنها وقف ضد اهله
عكسها وقفت مع اخوانها وخلقت مشكله
وما دافعت عنه
حست بالخجل من تصرفها
نزلت راسها وهي تمسح دموعها وبدأت دموعها
تنزل
نايف باستغراب لموجه البكاء : يوجعك شيء ؟!
اخذك للمستشفى ؟!
هزت راسها بالرفض
نايف جلس على الارض بضيق من تصرف شمس
وكلامها الجارح ناظرها وهي تبكي : لا تهتمي لكلام شمس
تراك والله احلى منهم كلهم
بس هي مغروره بنفسها عالفاضي
وتحب تتفلسف يقال انها تكلمت بعدها صغيره
شوق تذكرت كلام شمس وانقهرت كيف تقول
لها هالكلام قدام ساري
الحين اكيد يقول عنها انها بشعه
رددت بنفسها حسبي الله عليك يا شمس
***
***
***
***
***
ساري بعصبية : تصرف شمس غلط
اسراء بقهر : بس ما توصل فيه ويضرب البنت كذا !
واحرجها قدام الجميع !
ابوها ما يضربها ييجي هو ويضربها ؟!
ام صقر : صادقه ما يصير يضربها
وين حنا علشان يضربها ؟!
ساري بحق : يا يمه شمس الي تعدت بالكلام
والحرمه ما غلطت ولا تكلمت عليها
وما اكتفت حضرتها تقوم نضرب الحرمه فيها ؟!
والله عيب
ام صقر بشماته : تستاهل ويا ليت انكسر راسها هالشوق
تراك ما تعرفها اعوذ بالله منها
ما تطلع انيابها قدامكم
شوف كيف سحبت ولدنا مننا وابعدته
قاطعها نايف وهو يدخل : ما عاش من يبعدني
عنكم
وبعدين ليه هالكلام ؟
مو كأنك شفت الموقف بعيونك وكيف تعدت
شمس عليها ؟!
ام صقر : اشوف حطتك محامي دفاع عنها؟
ساري بضيق : يمه وبعدين ؟
اسراء بقهر : ليه تضربها ؟
نايف طالعها والضيق باين بملامحه : علميها
توزن كلامها وبعدها اعترضي
وقبل ما تقاطعه كمل : الله يرضى عليك تراني خلقي ضايق ما ابغى اتكلم بكلام واغلط فيه
بحقك
وانت مثل اختي
ساري : صلوا على النبي
عم المكان بالصلاه على النبي
جلست ام صقر بعد ما توجه نايف للمطبخ
وبعدها بدقائق طلع ومعه صينيه عليها اكل
وطلع لجناحه
حاست بوزها ام صقر وهي تشوف اهتمامه
فيها
استأذن ساري وطلعت معه سميه
زفرت ام صقر بضيق وناظرت اسراء بحده : ترى شمس زودتها
والغلط راكبها الحرمه قالت ما تبغى تأكل بقلعتها
ليه الكلام الزائد ؟
اسراء بتوعد: خليها لما اطلع يصير خير
واذا ما خليت محمد يمسح فيها الارض ما اكون اسراء
ام صقر : الله ستر لو صار بالحرمه شيء وش يخلصنا من اهلها
اسراء : قولي وش يخلصنا من زوجها العاشق الولهان
ام صقر هزت راسها :بهذا صدقت
ناظرت جهة الدرج وهي تسمع صوت الصراخ
وقفت على حيلها وهي تردد الله يستر
**
**
**
**
**
**