رواية بديت أنساك يا لون السعاده الفصل التاسع 9 - بقلم ضاقت أنفاسي

جالسات بعد العصر بالصاله يشربوا شاهي
واغلب الاعين مسلطه على  الجده الي تتكلم ومندمجه بالكلام...
وشريفه تهز رأسها تسمع بإنصات
اما دانا تسمع جدتها وتطقطق بالجوال
اما شوق حاطه يدها تحت خدها وملامح الملل كلها
مرسومه على ملامحها وهي تناظر جدتها!!!
قاطع حديث الجدة رنين جوال وليد وهو داخل
الصاله
طالع الجوال وابتسم وضغط على الزر الاخضر وحط الجوال على إذنه وتكلم وهو يمشي بشويش : هلا والله براعي الصوت ......الله يحييك ......ههههه الله يسلمك ....والله الكل بخير
جلس وليد جنب امه وهو يكمل محادثته والكل بالصاله يناظره بصمت حتى الجده
ابتسم وليد وهو يتكلم : الله يخليك ........ يعني نص ونص .......ههههه والله ما ادري ....يعني مو عاجبك ......ههههه خذها هذي هي جنبي
وناول امه الجوال
تهللت ملامحها بالفرح والسرور لما سمعت
صوته الي يرد لها الروح
ما يسعدها بالدنيا الا لما تشوف السعاده مرسومه
على ملامحه
مستعده تذوق العناء بس تشوف ولدها مبسوط
له ميزه غير عن باقي عيالها ردت بلهفه وعيونها تلمع بالدموع : هلا والله بقلبي .......كيفك يا ولدي ان شاء مرتاح ....الله يريح قلبك ......الحمد لله كلنا بخير ......ناقصنا شوفتك
ومسحت دمعه نزلت على خدها
طالعتها شوق وبنفسها الاخت حساسه ومشاعرها مرهفه ياي
هذا الي ناقصنا شوفته الي تجيب المرض
على وش تبكي يا حظي ؟؟!!
ولدها ما يسوى فلس واحد والحين عامله فيلم
وحالتها حاله
انتبهت شوق على شريفه لما قالت : هذي هي عندي تبغى تكلمها
ناظرتني ووقفت ومدت الجوال
انا هنا حسيت ضربات قلبي تدق بقوه
مو متوقعه يكلمني
من لما سافر ما كلمته ولا كلمني
وييجي الحين يطلب يكلمني !!
وش يبغى مني ؟!!
لو يموت ما كلمته هذا الناقص علي
رفعت راسي بحده علشان اقول لها قولي لولدك يقفل الجوال لانه لو يموت ما اكلمه
وقبل ما احرك شفايفي
تناولت جدتي الجوال والابتسامة شاقه حلقها
عاد دوروني ما تلاقوني وانا احس بالفشيله
حسبي الله على عدوها شوشو ظنيتها تقصدني
وعينها علي
بس انا جالسه جنب جدتي من هبلي فكرتها تكلمني
مالت علي
من زين خشتي حتى يكلمني او من الحب الزايد
طالعت جدتي وهي تكلمه والفرح يشع من عيونها
حسسوني انهم يكلمون شخصية بارزه
وبعدها انتقل الجوال لدانا حامت كبدي من دلعها
ادري فيها تتعمد تعمل كذا علشان تقهرني
بس لا هي ولا عشره يهموني
تشاغلت بالجوال وانا بداخلي اغلي مو حباً فيه
بس موقف سخيف قدام اعدائي
لا يسأل عني ولا كأني خطيبته
اخخخخ يالقهر
ليتني روحت مع امي واخواني احسن من مقابلة شريفه وعيالها
الله يسامحك يا يبه رفض قطعيا اروح معهم
والي يقهر ياسر الي وقف مع ابوي وحرضه ما يرسلني معهم
كان نفسي اخنقه قهروني
ناظرت بطرف عيني دانا لما قفلت الجوال
واحس بنظراتها الشماته
استغفرت للعشره وانا ماسكه نفسي ما أقوم
واقطع شعراتها
الجده  بشوق له: الله يرجعه لنا بالسلامه
شوق طالعتها وبداخلها تتمنى العكس
شريفه وهي تمسح دموعها : امين يا رب
ورجعت الجده تكمل سالفتها
مستحيل تترك السالفه وما تكملها لو بعد اسبوع الا ترجع تكملها ...
ناظرت وليد بعد ما اخذ جواله وجلس جنب امه وعيونه ...بالجوال ما انكر انه إنسان طيب ومرح
وكثير مواقف كان يحاول يزيل الحواجز بيننا
بس انا حقدي دائما يعميني
كنت اصده وأناظره بإحتقار
مو بيدي ما أقدر اتقبلهم
وأتعمد أزور الحقيقه حتى اقهرهم واظهر لهم مدى حقدي عليهم
اذكر بيوم كنت طالعه من غرفتي وشفته داخل
غرفة مريم وبالصدفة سألني ابوي عنه وقلت له
انه بغرفة مريم
وقتها ما كنت ادري انه دينا بالغرفه
بنفس اللحظه واحد من البزران قال انه دينا بالغرفه
صرخت بدون وعي وانا مستنكر تواجدهم لوحدهم... وش يعملون لوحدهم
وقتها صارت الاحداث بسرعه
وتوجه ابوي بسرعه للباب ويدق بقوه..وفهموا الموقف غلط !!
تقريباً بعد اسبوع علشان اقهر وليد دخلت عنده الغرفه
وقلت له سالفه تأليف من عندي وكلها كذب ...
من وقتها ما يكلمني ولا كأني موجوده وحتى عبود
صار مثله واذا تكلم بس انتقاد
الظاهر انه وليد علمه بالسالفه وكرهوني
كل يوم عن يوم تزيد اسماء الي يكرهوني
يمكن تصرفاتي غلط وتعاملي غلط
بس مشكلتي انفعل واعصب بسرعه
او تقدروا تقولون اي شيء يقرب لشريفه
احقد عليه مو بيدي من صغري انزرع بغضتهم بقلبي
ومع الأيام صارت تكبر أكثر وأكثر
ويمكن لانهم السبب الحين ببعدي عن جدتي ام عمر
من بعد سالفة الخلع ما دخلت بيتها
منعني ابوي عنها
وحتى ياسر ما عاد يزورها احس بينهم سر
بس ما احد علمني فيه
تيجي تزورنا هنا بالبيت وما ترجع لبيتها إلا لما
تسمع جدتي وشريفه كم كلمه
واذا كان أبوي موجود تلاقينهم يتبادلون نظرات ناريه
ما ادري وش سبب هالعداوه بين ابوي وجدتي
معقول كل هالعداوه لانه تزوج على أمي ؟؟!!
أحس فيه سبب ثاني
حتى ياسر الثاني هجرها ومشى مع ابوي ليه ؟؟؟
رجعت على الواقع على صوت وليد يتكلم من رؤوس خشومه : نعم مضيعه شيء بوجهي !!
الظاهر طول الوقت وانا نظري مثبت عليه
سبحان الله مغير الاحوال كيف صار وليد يتعامل معي
رديت ببرود : ايه مضيعه نعالي
قاطعنا دخول ابوي والظاهر انه معصب باين من لهجته : ما في احترام وكلام مثل العالم والناس
وإلا لازم لسانك يكون مثل لسان النع
وسكت بقهر وما كمل كلامه
اخذ نفس وبكلام لامست من نبرته الوعيد : كلمي اخوك زين وباحترام والا رح يكون لي معك كلام ثاني
دانا وهي تحشر نفسها بكل شيء : والله يبه شوق ما تحترم احد ولا
قاطعها ابوي : انت ما احد طلب شهادتك
ابلعيها وخليها لك
أنا أكلم اختك وما طلبت شهادتك
فخليك برا الموضوع أحسن
ناظرت دانا بعد ما طاح وجهها من الفشيلة... ايوه كذا تستاهل...تحشر خشومها بكل شيء
صارت تفهم بالاحترام هالزفته
طالعت جدتي وهي تكلمه علشان تهديه : يا ولدي
علامك معصب تراهم يمزحون مع بعض
قاطعها بحده وهو يناظرنا : لا مزح ولا جد
غير الاحترام بينهم ما أبغى
سواء شوق وإلا غيرها ما أبغى أسمع واحد يقلل
من قيمة اخوه
تراهم كبار مو صغار لازم الاحترام يكون موجود
وطالعنا بنظرات ناريه
وطلع لفوق
يا لطيف يا لطيف كل هذا علشان قلت نعال
دوم ما نشوفه الا بالمناسبات اليوم علشان هذي الكلمه ...الي قلتها حظي انه اليوم راجع على البيت
اففف صاير ابوي عصبي بشكل كبير...وما نشوفه الا بالمناسبات...
متأكده انه سبب عصبيته التعب والارهاق...
ناظرت وليد الي رجع يطقطق بالجوال
وشريفه وجدتي رجعوا يكملون سوالفهم
وما فتحوا الموضوع اختصار للمشاكل
بسبب تواجدي انا ودانا
اما دانا لوت بوزها ولفت وجهها عني بقرف
يقال ميته عليها
لكن يصير خير اذا ما خليتها تندم هالزفتة!!
**
**
**
مر يومين بهدوء كانت جالسه جنب ابوها
الي يشوفونه بالقطاره مندمج بالشغل والسفر
وما يشوفونه الا بالمناسبات
ناصر والي تغير كثير ما يتكلم الا بالقطاره
وان جلس بس تثبيت وجود وبعدها يطلع من البيت
بحجة الشغل
طالعته الجده بلوم : وينك ما تنشاف ؟؟
زفر بضيق ناصر : الشغل يمه يا دوب ألحق عليه
الجده بنصيحه : العمر يخلص والشغل ما يخلص
غريبه تارك الشغل وجالس معنا اليوم!!
رد بهدوء : الحين تعرفين سبب جلوسي
وابتسم لها وملامح التعب والارهاق واضحه عليه
كانت شوق تتابع الاحداث بصمت
وشريفه نفس الشيء ...وش السبب الي يخليه يجلس بالبيت!!
بعد لحظات دخل وليد بابتسامه وصوته يلعلع بالصاله : نورت نورت يا مرحبا
شهقت شريفه وبسرعه ركضت باتجاه ولدها
وحضنته وهي تبكي وتلوم فيه ليه ما اعطاها خبر
بعد ما بعدت عنه ...اقتربت الجده وبدأت بفيلم ثاني وهي تحضن فيه وكأنها تتذكر فيه ولدها محمد !!
وبعدها فارس سلم على ناصر بفرح وشوق!
وناصر يناظره بفخر بعد ما كمل مرحلة الماجستير
اما شوق كانت بمكانها جالسه
وتناظر الموقف ولا كأنه الموضوع يخصها من الظاهر!!
ناظرها فارس بهدوء وهو يشوفها جالسه ولا على بالها تسلم!!
انتبه ناصر على حركتها ... وبنظرة انتقاد نطق : شوق سلمي على فارس
انقهرت شوق من ابوها تاركها فارس قريب 3 سنوات
وما سأل عنها والحين تتحمد له بالسلامه ؟؟
وش هالعادات الغبيه
تكلمت من رؤوس خشومها وبصوت منخفض : الحمد على سلامتك
وبداخلها تردد الله لا يسلم فيك عظمه
ناظرها ناصر وهو ما سمع شيء بس شفايفها هي الي تتحرك
فارس زم شفته بسخريه : الله يسلمك
مع اني ما سمعت وش قلتي
ناظرته شوق وبنفسها احسن جعلك للطرش
ما انتظر منها اجابه والتفت على امه ومسك يد امه وتوجه
للكنبه وجلس عليها : اشتقت لك يا قلبي
وش اخبارك عساك مرتاحه ؟؟
شريفه تناظره وتبغى تدخله داخل قلبها : الحمد لله
وبنبره عتاب ليه ما اعطيتنا خبر برجوعك اول امس مكلمني ولا اعطيتني خبر
ابتسم فارس : ما ابغى اشغلك وانت تنتظرين
كذا احسن مفاجأه
ناصر طالعه بافتخار ومحبة : واحلى مفاجأه
وعلى شرف رجوعك عملت عشاء
قاطعه فارس ويحس راسه كبر بزياده وهو يشوف
ملامح شوق والضيق باين عليها : تسلم ما تقصر
الجده بلهفه : وكيف الدراسه ؟؟
ابتسم فارس وهو يرد على اسئلتهم
ناظرتهم شوق وتحس نفسها رح تتفجر بأي لحظه
وتكلم نفسها ...حشى حسسوني انه جاي من القمر
والشاطر يبغى يسأله
والغبي مصدق نفسه يجاوب وكأنه في مقابلة صحفيه
مالت عليك من انسان غثيث
تبغى تطلع من الصاله ما عادت تطيق الجلسة
بس خايفه ان طلعت ينقد عليها ابوها ويحرجها
قدام فارس
بس سرعان ما اتسعت ابتسامتها وهي تشوف الجوال
يرن فتحت خط وطلعت من الصاله بحجة انها تكلم بالجوال....
دخل ياسر الصاله وابتسم وهو يشوف فارس موجود
اقترب منه وسلم عليه بابتسامة واسعه...
اما فارس سلم عليه وهو يتكلف الابتسامه
حتى ما يظهر شيء قدام الموجودين
ولو كان بيده ما حط يده بيده وهو يتذكر انه هو الي
راح للمحكمة يخلعه ..للحين حاقد عليه!!
لولا انه خايف على مشاعر ناصر كان خلع فك ياسر
على هذا التصرف
لكنه سكت لانه نوى يكون انتقامه مع الايام
جلس ياسر بعد ما سلم على فارس وبملامح طيبه : مبارك التخرج
فارس بثقل : الله يبارك فيك
وبنغزه كان ودي اقول عقبالك بس ما عندك شهاده ثانوي ناجح
قاطعه ياسر بدون اهتمام لنغزته وانه يقصد انه ما نجح من الثانويه رد بابتسامة : عقبالي ابدع بمجال عملي العسكري
ناظر ناصر ياسر بفخر : ما شاء الله عليه ياسر يرفع الراس
بمجال عمله وينشد به الظهر
ابتسم ياسر وهو يشوف مديح ابوه من زمان كان ينتظر
يسمع كلمات المديح من ابوه تنهد وهو يتذكر ايامه
عند جدته وبنفسه الله يسامحك يا جدتي وناظر ابوه والابتسامة مرسومه على ملامحه : الفضل لك بعد الله هز راسه ناصر وردد بصوت مسموع : الحمد لله
قاطعهم وليد وهو يطالع فارس : صحيح تذكرت وين
هديتي ؟؟
طالعه فارس بنص عين : هذا الي هامك هديتك
ياسر بابتسامة : بعد السلام والترحيب يبغى لها هديه
وانا بعد وين هديتي ؟؟
طالعه فارس ببرود : ما جبت لكم هدايا
الواحد فيكم طول الباب وتتراكضون خلف الهدايا
مثل البزران
وليد بمزح : اذا طالبنا بهديتنا صرنا بزران
خلاص اعتبرني احلى بزر بس اعطيني هديه
فارس رفع حواجبه وناظر امه : شفتي ولدك وش يقول ؟؟
الحين صار بزر !!!
شريفه ابتسمت : تراكض خلف كلام هالمخبول ؟؟
وليد اتسعت عيونه وهو يمثل الصدمه : انا مخبول ؟؟؟
فارس وهو يبتسم لما شاف دانا داخله : خلاص لا تموت علينا
هدية ولد دانا اعتبرها لك
دانا بإعتراض : لا والله هديه ولدي ما نفرط فيها
وليد كش عليها وهي تسلم على فارس : مالت عليك وعلى ولدك
طنشته دانا وهي تسأل فارس عن حاله واخباره
***
***
***
قفلت الجوال بعد ما كملت كلام مع امها وخبرتها
عن رجوع فارس
حطت الجوال على السرير ووقفت باتجاه الشباك تناظر للخارج
لفت نظرها فهد ومريم ولين وهم داخلين
ولين تتدلع عليهم بفستانها الاحمر
وتحرك راسها بالرفض وشعرها يتحرك مع حركه راسها بخفه
وفهد يطالعها ومبتسم اما مريم تمشي بشويش
من الحمل
اخذت نفس عميق وهي تتخيل نفسها لو تزوجت كان هي الحين مكان مريم وابتسمت ابتسامه باهته لما تذكرت حركتها الي عملتها قبل سنوات وضربت عليهم علبة المناكير
خطرت لها الفكره تعيدها مره ثانيه
بس سرعان ما طردت هالفكره من بالها
وراح فكرها لعمرها الي ضاع وهي تنتظر الفارس المقنع
ثلاث سنوات وهي مربوطه له لا درست ولا عملت شيء مفيد
حياتها كانت كلها ملل ونفس الروتين
زفرت بضيق وهي متأكده انه ما سافر يدرس الا
علشان يقهرها ويتركها معلقه
يمكن ما تكون نيته كذا
بس وش الي جاء على باله يكمل دراسه ؟؟!!
ما تدري يمكن هج منها يبغى يرتاح منها قد ما يقدر
حتى يتأخر الزواج
تفكر معقول يحصل شيء ويخلصها منه وتنتهي من هالرباط
وتشوف حياتها من جديد بنفسيه جديده
لانه نفسيتها تحطمت خلال هالفتره الماضيه وهي تشوف
صديقاتها مبسوطات وعايشات حياتهم الا هي
مربوطه بشخص لا يسأل عنها ولا مفكر فيها
وفوق هذا ما يواطنها
بالله كيف رح تعيش معه ؟!!
واي حياه تعيسه تنتظرها ؟؟
يقولون ما بعد العداوه الا المحبه
بس مستحيل ييجي اليوم وتنمحي العداوه بينها وبين فارس
ما تقدر تستوعب هذي الفكره !!
شيء واحد تستوعبه وما تفهم غيره
وهو الانفصال عن فارس بالتي هي احسن
بس كيف ؟؟ ومتى ؟؟؟

**
**
**
قفلت فاطمه الجوال بعد ما كملت الاتصال مع شوق
ناظرتها ام رائد وبتساؤل : وش فيك وجهك قلب ؟؟؟
زفرت بضيق فاطمه بعد ما جلست على الكنبة : شوق تقول فارس رجع اليوم
عقدت حواجبها ام رائد : صدق
فاطمه وهي متضايقه : هذا اليوم الي خايفه منه
والله ما ادري وش اعمل ؟؟
كل هالزواج مو داخل مخي لا البنت تبغاه ولا هو يبغاها
ام رائد بقهر : كله بسبب هالنواف
يا ثقل دمه ورط شوق بالموضوع
فاطمه بضيق على حال شوق : بعد زواج مريم بفتره
طلع بسالفه الدراسه وسافر من هنا حتى ما ودعها
وطول دراسته ما كلف نفسه يتصل فيها
يا أختي يكره شوق بقوه كيف تبغوني ازوجه ابنتي واطمئن عليها ؟؟
نزلت دمعه من فاطمه ومسحتها وكملت بنبره
باكيه : حرقت قلبي شوق لما انخطبت دانا
طول الوقت تكلم دانا خطيبها بالجوال وتلاقينها تتكلم قدام شوق
وتتعمد تظهر وش جاب لها هدايا خطيبها
علشان تقهر شوق
ومع ذلك تحقرها شوق وما تهتم وانا متأكده انها من الداخل تشتعل
ولما تجلس مع اميره ومنال نفس المشكله
كل وحده تقول خطيبها وش قال لها وش جاب لها
وهي ولا كأنها مخطوبه
انقهر لما اشوف شوق كذا
ما ابغى تكون ناقصه عن جيلها
والفتره الي تركها فارس.... مو قليله والبنت صغيره اكيد تبغى اهتمام وحب من زوجها
يا خوفي اذا ما حصلت حب وراحه عند فارس تنحرف للطريق الغلط
ام رائد باستبعاد لكلام فاطمه : ما ظنيت شوق كذا احسها عاقله من هذي الناحية
فاطمه : هذا الزمن يخوف والنفس أماره بالسوء
ام رائد بتفكير : طيب اقنعي ناصر انهم ينفصلون
فاطمه هزت راسها بالرفض : تنفصل عنه بعد هالسنوات ؟؟
لا
وش رح تقول الناس عن شوق ؟؟
الناس ما ترحم بكلامها
وعضت على شفتها بقهر
ام رائد بضيق :، ان شاء الله ربنا يعوضها ما تدري
يمكن تتغير مع الايام حياتهم
فاطمه بيأس : ما اظن لانه فارس نسخه من خالته ام فهد... وشوق عندها صفات من امي
وانت ادرى بأمي وكيف تحقد
ام رائد زمت شفتها بضيق: لا ما ظنيتها وصلت درجة امي
على سيره امي قبل شوي اتصلت وانت تكلمين
شوق
فاطمه بضيق : الله يستر وش تبغى ؟؟
ام رائد ابتسمت : ولا شيء تتطمئن على الاوضاع
وسألتني عنك لمتى رح تجلسين هنا
وبدأت التحقيقات كيف ناصر وافق انك تيجين تجلسين عندي ومن هذا الموال
فاطمه هزت راسها : وش قلت لها ؟؟
ام رائد وهي ترجع خصله من شعرها خلف اذنها وابتسمت : قلت لها وافق لانها حاله انسانيه
وما عندي احد خاصه بذي المنطقه والشغاله
ما تفيدني
قاطعتها فاطمه : قولي تبغين حد يونسك ويقوم بالبيبي
ام رائد خزتها بعيونها : الي يسمعك يقول مقطعه نفسك شغل
هلكتيها للشغاله وانت تقولين لها جيبي وانت قاعده بمكانك ما تحركتي
فاطمه رفعت حاجب : يا زينك وانت ساكته
احمد ربك اني وافقت وجيت هنا بمنطقه بعيده وتارك عيالي هناك
ام رائد رفعت حواجبها : الي يسمعك يقول هالعيال
ياسر بالدوام وخالد وسامي معك هنا
ما بقى الا شوق
ما ينخاف عليها جنيه ولسانها بشعبتين وتأخذ حقها
وزياده
فاطمه ابتسمت : ادري انها قوية بس اشتقت لها
صار لي اسبوعين ما شفتها
ام رائد خزتها : مو شايفيتها و الا مو شايفه ناصر
وبعدين ابوها عندها
تنرفزت فاطمه من ذكر ناصر : اسكتي الي يسمعك يصدق
تراه ما ينشاف
تقول شوق ما تشوفه الا بالمناسبات كل وقته بالشغل
ام رائد رفعت حاجب بخبث : شغل ؟؟!!
اي شغل يالخبله ما تدخل العقل انسان طول وقته بالشغل واهل بيته ما يشوفونه
يا خوف قلبي جاب الثالثة ويا غافلين لكم الله
فاطمه بدون اهتمام : ان شاء الله الرابعه
حركت ام رائد شفايفها تتكلم قاطعها
دخول الزوج الثلاثي : سلااااااام
ام رائد شدت على اسنانها : قصروا حسكم
خلي الولد نايم
رائد تقدم خطوات وهو نافش ريشه : من الصبح  جالسات حش بخلق الله
والحين لما دخلنا قصروا حسكم قصروا حسكم
يا خوف قلبي الحين لما يصحى تكون نغمةبكائه : واع حفصه زوجها طلقها واع حرمة ابو علي ولدت واع
قاطعته فاطمه خزته بضجر ما رح يكبر هالولد : سخيف
ما ادري يا اختي على وش متوحمه فيه
اشك انك كنت بمصنع ساردين
الله يكون بعونك عليه
ام رائد عفست ملامحها : بعين الله
طالعهم وهو يقرص عيونه وتقدم وهو يناظر اخوه باللفه ونايم جلس جنبه : ما رح ارد عليكم
لا يضر السحاب نبح الكلاب
وبلع ريقه وهو يمسح على راسه بطريقه غبيه
ام رائد ضربته بالخداديه وبعصبيه : صدق انك ما تستحي
الحين حنا كلاب ؟؟
خالد وهو يناظرهم ويبتسم : تستاهل ما حصلت
يا رائد هههههه
رائد طالعه بتوعد : رح تندم بدل ما توقف معي
يا لئيم
سامي وهو يوقف بصف اخوه : والله ما قال لك خالد
ما تمسك لسانك وتقط حكي هنا وهنا
رائد وهو يمثل الحزن : شفتي يمه انا وحيد ما لي اخو
يوقف معي
متى يكبر اخوي ويدافع عني
وغطى وجهه بيدينه وهو يمثل البكاء
هزت ام رائد ثيابها بيدينها : اشق الثوب واطلع منه
فاطمه : الله يكون بعونك عليه هالمخبول
وما في ذره عقل فيه
الله يعوضك بالبيبي الصغير
احسن احل خليه يروح يعيش عند امي
وريحي مخك منه
ام رائد بفقدان امل : يا حسره مو راضية امي انه
يعيش عندها
تقول ما بقى الا هالفتان والمخبول تحط عندها
اذا قعد عندها يومين رفع لها الضغط ودخلت المستشفى
خالد وهو يبتسم : خلاص خليه ييجي يعيش عندنا
ورح يرجع لك رائد المؤدب
فاطمه بفزع : لاااا دخيلك انا ما صدقت تخلص هالايام وارجع للبيت واخلص من ثقل دمه
حرام عليك تخليه 24ساعه بوجهي
وبعدين تبغى ناصر يطلقني ؟؟
ما لنا دخل امه وتتحمله
طالعهم رائد : الي يسمعكم يقول ميت علشان اجلس عندكم
وبعدين ماما ما بتستغني عني
كل كلامها من وراء قلبها
صح مامي
فاطمه وقفت : افففف لاعت كبدي من دلعه الماصخ
رائد عفس ملامح وتكلم بصوته الطبيعي : ناسيه ولدك كان
دلوع جدتي وش طوله ويتدلع
فاطمه رفعت حاجب : هذا انت قلتها كان
والحين بسم الله عليه ولدي رجال
ام رائد : ايه والله اشتقت له هالياسر ولا يزورني
من بعد ما رحلت هنا
فاطمه : مشغول وبعدين بالاجازه يبغى يرتاح ويزور ربعه
وانت بعيده
هزت راسها ام رائد بتفهم

**
**
**

بعد المغرب كان البيت مقلوب فوق تحت بمناسبة
العشاء
دخل ياسر المطبخ وباستعجال : خلصونا تحركوا بسرعه
دانا بضجر : ترانا حنا قاعدات نشتغل
روح شوف اختك الي بعدها ما نزلت عامله حالها برستيج
شريفه وهي تجهز : دانا اسكتي وكملي شغلك
دانا وقفت وناظرت امها مو عاجبها الكلام : انا قاعده اشتغل وتارك ولدي
وهي ليه ما تنزل وش عندها معتكفه فوق
شريفة طالعتها : الحين تنزل انت مشي اخوك وبلا كثر كلام
ياسر طالع دانا : انت جهزي لوقت رجوعي... الحين اطلع اناديها تساعدكم
لف وجهه يطلع شاف شوق بوجهه لوت بوزها : ما في داعي تغلب نفسك
وطالعت شريفه بحقد : ما في داعي ترسلين جدتي
انا اذا بغيت انزل رح انزل بمزاجي
دانا والشرار يطلع من عيونها : لا يا حلوه مو بمزاجك
غصب عنك تنزلين
دامك عايشه بالبيت متى ما انقلعت منه
قاطعهم دخول فارس الي استطول ياسر وما رجع : وش فيك تأخرت يا ياسر
وانت دانا ليه صوتك طالع ؟؟
وهو ينتظر الاجابه طالعته شوق بقرف ولوت بوزها
وطلعت من المطبخ كله وتوجهت عند الحريم
دانا بعصبية : وقسم بالله اذا ما ساعدتنا
ما لي دخل ....تراها زودتها
ياسر يتأفف : خلصوني يا جماعه اخرتوني
شريفه طالعت دانا بنرفزه : خلاص إلحقيها
واجلسي انت واياها وخلصنا
دانا بقهر بنظرها امها سلبيه : لمتى تسكتين لهاا
ما شفتيها كيف اول ما دخلت كيف تناظرك وتكلمك وكأنك
قاطعتها شريفه : خلاص يا دانا مو وقته هالكلام
فارس وماسك نفسه ما يدخل ويمسك شوق من شوشتها ويمسح فيها الارض
بس مو وقته الحين رح ينتقم منها بطريقته الخاصه
اخذ نفس وتوجه لامها وهو يمسك الاغراض
وأشر لياسر يساعده
وبعدها طلع بهدوء
دانا كملت شغلها وهي تبربر ودها تنفجر من شوق
وشريفه تجهز ولا كأنه صار شيء
**
**
**
جلست بالمجلس ما في الا حريم اعمامها
وبناتهم ما في احد غريب
كانت ساكته وتحس بالنصر بعد ما قهرت دانا
بالجهة الثانيه كانت ام فهد تناظر شوق وبعد لحظات وجهت الكلام لشوق : اشوفك جالسه هنا بدل ما تساعديهم
قاعده لطق الحنك
ناظرتها شوق بعد ما حطت رجل على رجل : هذاك هو باب المطبخ قشمري عن ذرعانك وادخلي ساعديهم
يا ام النخوه
قاطعتها الجده بنهر : شوق وش هالكلام ؟/
عفست شوق ملامحها : ما سمعت وش قالت
اذا خايفه ينقص كيلو من وزن اختها من الشغل تروح
تساعدها
يمكن تنقص كل وحده منهم نص كيلو
تدخلت ام مهند تنهي النقاش : خلاص يا جماعه صلوا على النبي
اللهم صل على سيدنا محمد
عم الهدوء والصمت بعد الصلاه على النبي
دخلت دانا تخبرهم العشاء جاهز
وعيونها على شوق تبغى تأكلها اكل
وقفت شوق جكر فيهم ..وكانت اول المتقدمين لصالة الاكل
مرت من جنب دانا الي همست لها : جعلك بالسم الهاري ان شاء الله
ابتسمت شوق بعد ما لعبت بحواجبها : محتره
وتركتها وطلعت تاركه خلفها بركان رح ينفجر بأي لحظه
**
**
**

في اليوم الثاني نزلت على وجبه الغداء
رفعت حاجب ونزلته لما شافت ابوها موجود
تقدمت وردت السلام بهدوء
وبدأت تتناول وجبة الغداء بهدوء ...تحس كبدها حامت من الاهتمام الزايد بفارس
وكأنه كان بمجاعه ورجع الحين
شريفة باهتمام زايد : ما رح تقوم الا اذا كملت صحنك
فارس طالعها : لا تخافي ما رح اقوم الا لما اكمل 5 صحون
الجده بابتسامة : بالعافيه يا ولدي
وليد وهو يخزهم بعيونه : لنا الله
حسستوني انه طالع من مجاعه ونازلين دعم له
شوفي ترى خدوده كأنهم وحدتين مغذي
طالعته شوق تبغى تقوم تبوس وليد على راسه
وكأنه قاعد بعقلها ويفكر نفس التفكير
فارس وهو يحرك حواجبه : قول انك محتر
وطالع امه : يا خوفي يصيبني تسمم
ناظرته شوق و بنفسها جعلك بالسم الي يسمك
عبود بلقافه : لا ما توصل التسمم بعدين عريس
مو وقت دخول المستشفيات
ناصر بهدوء طالع عبود : تعرف تكمل اكل وانت ساكت
وطالع وليد وانت الثاني كمل اكل بدون صوت
رد وليد وعبود بصوت واطي بعد ما تفشلوا : ان شاء الله يبه
طالعهم فارس ورسم ابتسامة شماته لهم
طالعه وليد بنظرات توعد ما يقدر يرد
عليه لانه ناصر موجود
بعد وقت قصير انسحب وليد وعبود
وتبعهم ناصر
وشريفه وبعدها الجده
شوق
كنت اتناول الاكل بالرغم انه معدتي مليانه
والاكل متأكده واصل لنص حلقي
لو افتح فمي تشوفون الاكل ومع ذلك احس شيء
بداخلي يخليني جالسه
ما ابغى اقوم عندي فضول اتواجد لاخر لحظه
بعد ما طلعت جدتي ما رفعت راسي وعيوني
بالصحن
وما انكر عقلي المشوش الي كل شوي
تفكير شكل
قررت اناظره بطرف عيني واشوف وش يعمل
ما له حس
صاير هادي
وبحركه سريعه وبخفه ناظرت مكانه بطرف عين
حددت نظري على جهته وانا اشوف مكانه فاضي
متى قام من مكانه ؟؟
ما سمعته ولا حسيت بحركته ؟؟
وين عقلي كان ؟؟
اخخخخ يالغباء
بس لحظه ما ادري ليه كنت احاول اتأخر بالجلوس
وش ابغى فيه ؟؟
بقلعته هو وامه واخواته واخوانه
غبيه غبيه وش الي خلاني اجلس لهذا الوقت
الحين يظن علشان اجلس معه
مالت عليه هالغثيث
بس لحظه حاس فيه شيء تغير
نفضت هالافكار من راسي وقمت عن الاكل وانا معصبه من هالتصرف السخيف الي عملته
**
**
**
من بعد حركتها السخيفة اعتكفت بالغرفه
وما تطلع الا بالقطاره
صار لها يومين بالغرفه قررت اليوم تطلع تشوف وش
الاخبار والمستجدات
طلعت من الغرفه وتلاقت معه عند الدرج
بس مشى ولا كأنه يعرفها
ولا قط عليها كلمات مثل زمان
الهدوء الي نزل عليه اتجاهها محيرها
تحس هالهدوء الي قبل العاصفة
الله يستر وش مخبي لها
كملت نزول وعقلها يحلل تصرفاته
بس قبل ما تدخل
سمعت جدتها وشريفها ويتكلمون عن زواج
فارس
بعد اسبوعين وعن التجهيزات
حست الدنيا لفت فيها ورجعت ادراجها للغرفه
وهي تحس بالضيق
اسبوعين وتعيش مع فارس
مو قادره تتصور الفكره بعدها ما جهزت ولا شيء
متأكده سكوته كله رح يطلعه من عيونها
يوم الزواج
قررت تتصل بأمها وتخبرها بالكلام الي سمعته
اتجهت للجوال وقبل ما تمسكه
رن جوالها وكانت اميره ردت عليها بهدوء
**
**
**
بعد مرور اسبوعين
زواج فارس
ياسمين  بابتسامة: ما شاء الله عليها العروس حلوه
ام صقر وهي تناظر العروس : ناعمه بس فستانها عاري شوي
ياسمين وهي تناظر البنات الي بالحفله : كل البنات الحين كذا يلبسون
اسراء اشرت بعيونها : شوفي أخت العريس وش لابسه استغفر الله...البنات ما في حياء اليوم
ياسمين بتساؤل: وش عرفك فيها ؟؟
اسراء : سمعت وحده من الحريم تتكلم وتقول انهم
اخوات العريس
واشرت بعيونها على مريم ذيك اخت العريس الثاني لباسها عادي مو عاري
بس تجنن مع انها متينه شوي
ام صقر هزت رأسها : اكيد من الحمل شوفي بطنها
الحرمه حامل
اسراء اشرت بعيونها : وذيك الواقفه عند اخر طاوله
ابنة عم العريس
واتوقع انها الي دلونا عليها علشان ساري
ام صقر وهي تناظرها بتقييم : اممم عاديه
ما ادري وش عاجب جدتك فيها
وطيرت الولد عليها
ياسمين بابتسامة : العروس احلى منها لو خطبناها
اسراء لوت فمها بغرور : كلهم عاديات
ياسمين وهي تناظرها : اكيد مقارنه معك
عاديات ههههه
اسراء بابتسامة غرور : احصن نفسي قبل ما تصكيني عين
ياسمين بابتسامة : لا تخافين عيني بارده عليك
المهم خلينا نتأكد انها هذي الي رح تخطبونها لساري
ام صقر كل الموضوع مو داخل راسها : اتوقع هي
نفس المواصفات
ياسمين باحباط : لا والله المواصفات احسن
توقعتها ملكة جمال العالم واجمل من اسراء
بس طلعت اقل اقل اقل من عادي
ام صقر بهدوء : حنا بعيدين عنها
خلينا نقرب ونشوفها عن قرب
اسراء : صادقه خالتي يمكن البعد له دور خلينا نقرب
**
**
**
جالسه بهدوء وتطالع بنات عمها وبحياتها المتقلبه
ناظرت امها الي وقفت عندها وبصوت هامس : وش فيك ؟؟
طالعت امها بعيونها المكحله : ملل
فاطمه بأمر : لا تجلسي لوحدك قومي وقفي عند بنات عمك
شوق بهدوء : الحين اروح خلاص اسبقيني
هزت فاطمه راسها : لا تتأخرين
واقتربت منها وهمست لها : ترى ام صقر موجوده
حاسبي على تصرفاتك
لوت بوزها بكشره : هذا الي عندي الي مو عاجبه الباب يوسع جمل
فاطمه زفرت بضيق : استغفر الله
وش فيك مزاجك مثل الزفت ؟؟
متضايقه على فارس ؟؟
ردت بقرف : ما بقى الا هو اتضايق علشانه
فاطمه : ما في تحليل لتصرفاتك الا كذا
قاعده وماده البوز اكيد الكل رح يفكرك متضايقه على سالفة فارس
ردت بهدوء : خلاص يمه الحين اقوم وانا ما يهمني احد
وانت تدرين اني كنت ابغى اي طريقه واتخلص منه
هزت راسها فاطمه بتفهم وغادرت المكان
تنهدت شوق واخذتها الافكار قبل اسبوعين
"سمعت دق على بابها
وبعدها فتح الباب و دخل بشويش
استغربت تواجده عندها بالغرفه بس ما تكلمت
دخل بخطوات هاديه وجلس على الكرسي مقابل السرير ...واشر لها تجلس على السرير
زادت حيرتها ومع ذلك جلست بدون اعتراض
وناظرته وهي تنتظره يتكلم
طالعها لثواني وهو يرتب الكلمات وبصوت هادي : اسمعيني يا شوق زين
انا ادري انك ما تبغين فارس وانجبرت عليه
والظروف جبرتكم على هذا الزواج وما كان مخطط لهذا الشيء من قبل
واكبر دليل لما رحتي على المحكمه تخلعين فارس
لو كنت تبغينه ما قدمت على هذي الخطوه بدون علمي
صح كلامي ؟
ناظرت الارض وهي تحس بالتوتر وقلبها يدق
بقوه كأنها فهمت لمحه عن الفكره الي يبغى يوصلها
له بس ما حبت تستبق الاحداث
وردت بصوت منخفض على ابوها تسايره بالكلام حتى
تعرف سبب هالمقدمه : ايه صح
تنهد ناصر وهو يشبك اصابعه ببعض وبنبره هاديه كمل كلامه :علشان كذا انا فسخت زواجك من فارس
لانه كله غلط بغلط لا انت رح ترتاحين ولا هو رح يرتاح
الله يسامح الي كان السبب
انا ادري فيك الحين مبسوطه انك ارتحي من فارس
ما اقول الا الله يعوضك بالرجال الي يسعدك
رفعت راسها بتردد وللحين مصدومه
وباستغراب مع انها توقعت هالسبب : بس انا سمعت جدتي قبل شوي تتكلم
انه زواج فارس بعد اسبوعين
هز ناصر راسه بتفهم : ايوه بعد اسبوعين انا خطبت له
ابنة عمك ابو فهد خلود والاسبوع الجاي رح نملك عليها
والي بعده رح يكون الزواج
هزت راسها وداخلها بركان من القهر
مو هامها فارس بس الي قهرها
خلود
ليه خلود بالذات خطبوها ؟؟
تكرهها تكرهها وما تواطنها كيف يجيبونها تعيش هنا عندها بالبيت...
وابوها ليه يتصرف على راسه كذا المفروض شاورها
ما تدري ليه تضايقت مع انها كانت تنتظر الساعه الي تتخلص منه بس
يمكن لو تزوج وحده ثانيه كان اهون عليها من خلود
الزفت
قاطع قهرها لما كمل ناصر كلامه : ادري انه
مو وقته كلامي الحين
اممم ابغى افاتحك بموضوع ثاني
هزت راسها بدون ما تتكلم حتى يدخل بالموضوع
اخذ نفس وبنبره هاديه : تعرفين عمة ابوي الله يرحمه ؟؟
هزت راسها بالرفض
ناظرها وهو يحاول يخليها تتذكر : حرمه كبيره بالسن
اكثر من مره زارت جدتك اكيد شفتيها عندها
طويله ونحيفه
قاطعته وهي تهز راسها بالرفض ما تبغى توجع راسها
بالتفكير وش تبغى فيها
كمل ناصر كلامه : المهم اليوم إلتقيت فيها
وجلست معها و اثناء الكلام قالت لي انها تتمنى تخطبك لواحد من احفادها
وللصدفه كان فارس مكلمني بموضوعك قبل ما اجلس معها
علشان كذا انا قلت لها ان شاء الله خير
حبيت استشيرك بالموضوع
وفكري زين وصلي صلاة الاستخاره
وان شاء الله ربنا يكتب لك الخير
انا الرجال ما اعرفه صراحه ولا اتذكر اني قابلته
اعرف اخوه الكبير رجال ما شاء الله عليه
ورح اسأل عنهم واكلف ياسر
الحين فكري واعطيني الجواب براحتك
ولا تخلي موضوع فارس يؤثر عليك
بعدك صغيره والعمر قدامك فكري بمستقبلك
يمكن ما يعجبك تصرفي بالخطبه وخاصه انه دوبك
انفصلت عن فارس
وبنفس الوقت ما اقدر ارفض على كيفي
وبالنسبة لفارس خلاص تتغطين عنه ما عاد يحل
لك
وسكت ما يدري وش يقول
وقف وهو يردد بصوت منخفض : الله يكتب لك الخير
طلع من الغرفه بهدوء...وشوق كلامه يتردد بإذنها
ولفت انتباها جمله قالها ابوها بدون ما ينتبه
« وللصدفه كان فارس مكلمني بموضوعك قبل ما اجلس
معها »
قعدت تفكر بالجملة وتكررها بعقلها
فارس الي كلمه بموضوعي مو ابوي الي كلمه
اخذت نفس وهي مقهوره من داخلها
نار
تحس الموضوع مو مثل ما قال لها ابوها
عضت على شفتها بكل الحالات النتيجه
وحده كانت
الانفصال
تحس خلاص الرباط الي يجمعها بفارس
انقطع
كل شيء انتهى
وكل الكوابيس والهواجس الي كانت خايفه
منها انتهت"

فتحت عيونها وهي تنفض الافكار من راسها
شافت اميره جالسه عند طاوله واشرت لها
هزت راسها دلاله إنها شافتها
وقفت وهي تفكر بموضوع خطبتها مر عليه
اسبوعين وهي للحين ما اعطتهم جواب
وما زالت تفكر
خايفه يكون اختيارها غلط بس بنفس الوقت
لما تشوف كل البنات حولها متزوجات
تحس قلبها يطير تبغى تخطب وتتزوج مثلهم
لكن بداخلها تردد من خوض هالتجربه
ذبحها التفكير
ومو قادره توصل للبر
تنهدت ومشت خطوات وهي تناظر لجهة اميره
ومنال....وقع نظرها على ثلاث ازواج عيون يناظرونها بتقييم
عفست ملامحها بكشره
اكره ما عليها نظرات التقييم وخاصه انها شاكه انها ام صقر احساسها أكد لها انها هي
لفت وجهها عنهم وتوجهت باتجاه اميره
جلست على الطاوله الي جالسات عندها وبدون نفس : هاي
اميره بابتسامة : هلا وش فيك طاسه هناك لحالك جالسه
وكأنه معك مرض معدي
لوت بوزها شوق : يا اختي ملل
منال نغزتها بخصرها وهي تغمز لها : وش صار بعريس الغفله ؟؟
لا تقولي بعدك تفكرين !! لو انا مكانه صرت ذابحك
ابتسمت شوق لها : سايبه حتى يذبحني
ترى عندي سند يذبحه
اميره بلقافه : طيب الخلاصه موافقه ؟؟
شوق ابتسمت وهي تبغى ترفع ضغطهم : امممم
بعدني افكر
ضربتها منال على كتفها بخفه : يا شيخه طيري
حسستيني انك شيء كبير
تراك تشبهين شغالتي ما يفرقونك عنها هههههه
اميره وهي تضحك : لا والله تشبه سواق بيت خالي
ههههه مع هالغماز
لعبت شوق بحواجبها بدلع : محترات لاني احلى منكم
منال حطت يدها على صدرها : يا قلبي لوعتي كبدي
بدلعك
اميره بضحكه : انتبهي اذا جلست مع ساري تتدلعين لانه رح يهج
حطت شوق إيدها تحت خدها بملل : اضحكي وش عليك
اميره بابتسامة : يا اختي وافقي خلينا نفرح فيك
وبعدين شوفي ام العريس والي معها يطالعونك
بدون ما تناظر لوت بوزها : يقال رايقه لهم
ورفعت نظرها وشافتهم يناظرونها لوت بوزها وطالعت منال : يناظروني وكأنهم مضيعات شيء بوجهي
ابتسمت منال : وش عرفك يمكن مضيعات نعال
ويدورونه بوجهك هههه
شوق خزتها بعيونها : يا جعل النعال يتطرق على ظهرك
اميره بجديه وهي تناظرهم بطرف عينها : بس احس انهم مغرورات
وبتفكير
تدرين يا شوق اتوقع انه ما رح يصير نصيب
وانصحك تغدي فيهم قبل ما يتعشون فيك
وارفضي الموضوع
رفعت منال حاجب : وليه ان شاء الله ترفض ؟؟
اميره : شوفي ام العريس نظراتها باين انه مو عاجبيتها شوق
نظراتها تقول كذا
واكيد رح تقول لولدها انها مو حلوه ويرفضك
قرصتها شوق بفخذتها : مو حلوه يا زفته
اميره وهي تفرك مكان القرصه : حسبي الله على عدوك
حشى يدك ثعبان اعوذ بالله
منال طالعتهم ؛ صحيح كلام اميره
نظراتها تقول كذا انه مو عاجبها
وبعدين شوفي الي معها تجنن ما نيجي ربع جمالها
واكيد يبغون وحده بجمالها
ناظرتها شوق وتنهدت : صادقه تجنن وعيونها
تسحر
بس وش تقرب له معقول اخوها ؟؟
اميره بابتسامة : يا عيني لو كان يشبه لها
يا حظك يا شوق تتزوجين واحد بهذا الجمال
شوق فتحت عيونها باندهاش : معقول يشبه لها تدرين اذا طلع مثلها
خلاص موافقه
منال ناظرتها بتفكير ؛ تدرين انصحك ترفضين
اذا كان مزيون باكر يشوف نفسه
عليك ويقول انا بالجمال هذا ومتزوج جيكره
خزتها شوق بعيونها : تراكم زودوتها
حسستوني اني مخلوق بشع تراني احلى منك
اميره : يا الخبله انت حلوه بمقياسنا
بس اذا قارنتي نفسك بذيك الحلوه
تطلعين صفر عالشمال
لوت شفتها شوق بغيره : صحيح حلوه بس جسمها مليان
منال : اسكتي اسكتي قال جسمها مليان
اخخخخ لو انا بربع جمالها
يا حظ زوجها فيها
قاطعتهم ام مهند لما وقفت عند الطاوله الي جالسات
عليها وبانتقاد : جالسات ولا كأنكم من اهل العريس
والعروس
منال بابتسامة ؛ وش تبغينا نعمل خلينا جالسات ونحش
احسن لنا
ام مهند : جالسات مثل العجايز ومندمجات
وش هالموضوع الي مشغلكم ؟؟
شوق بابتسامة : سوالف بنات
خزتها ام مهند ؛ سوالف بنات
وبجديه لازم تشاركوا بالحفله ما يصير
كذا
اميره : ما له داعي خلاص الحين تطلع مع زوجها
خلينا مع بعض نسولف زمان عن هالجلسه
وباكر تتزوج هالدبه وزوجها يمنعها عنا ونصير نشوفها
بالقطاره
شوق بغرور : يخسى يمنعني عن احد
انا متى ما اشتقت ما تشوفيني الا فوق راسك
ام مهند بتساؤل : انت وافقت على العريس
شوق فتحت فمها بطريقه غبيه : ها
لا ما وافقت
قاطعتها ام مهند : يخلف على ام جابتك
والكلام الي غردتي فيه
اميره وهي تغمز لشوق :هذا الكلام في حال وافقت
يعني مجرد احتمال
طالعتهم ام مهند وتركتهم مو عاجبها كلامهم
شوق وهي تناظر عمتها لما غادرت : عاجبني لون
جلابية عمتي لونها هادي
منال وهي تدق على صدرها : اعجبك اشترتها امي
على ذوقي
اميره : مع انه ما يعجبني اللون النهدي ودرجاته
بس اليوم اكتشفت انه في لون اخس منه
اللون المشمشي يقرف وطالعت شوق بطرف عينها
وهي كاتمه ضحكتها
طالعتها شوق وهي تقرص عيونها : اقول لو تحطين
لسانك بحلقك يكون احسن
منال بتأييد ؛ صحيح كلام اميره وش عاجبك باللون هذا ؟؟
شوق ناظرتها من فوق لتحت : احسن من فستانك
الي يشوفه يفكره من التراث القديم جايبيته
منال فتحت فمها بصدمه : حرام عليك
دفعت دم قلبي عليه وانت تقولين من التراث القديم
شوق وهي تحط اصبعها على راسها : انا عاجبني هذا اللون كيفي
اميره كشت عليها : مالت عليك
انا ابغى مصلحتك تراه مو مناسب لك ابد
منال باندفاع : يا غبيه عارفه انه ام صقر رح تكون موجوده
المفروض اخترتي فستان احلى من هذا وعملتي مكياج وتسريحه احلى من كذا
علشان تكونين نجمه الحفله
شوق بقلب ميت : ما ابغى لا نجمه ولا شمس
يا اختي اعتبريني كوكب الارض معتم ومحفر
منال ضحكت بخفه : كوكب الارض ؟!!
هو فعلا يشبهك وخاصه مع هالفستان وكأنك طالعه
من القبر
ما ادري كيف اخترتي هالفستان ؟؟
لو ادري كان طلعت معك وانا اخترت لك الفستان
قاطعتها شوق وهي تبتسم : ومين قال لك اني اشتريت فستان
هذا الفستان اشتريته قبل خمس سنوات
قاطعتها اميره وهي تبغى تضربها :غبيه
وقبل ما تكمل قاطعتهم ام احمد لما خبرتهم انه العروس
رح تطلع للعريس علشان يروحون يسلمون عليها
وقفت مع البنات وتوجهت للكوشه علشان تسلم
على اكره مخلوقه على وجه الارض
طالعتها خلود بنظرات انتصار وانها تزوجت فارس
طنشت نظرات خلود وتقدمت وسلمت عليها
وهمست لها بهدوء « بقايا الذئاب لا يأكلها الا الكلاب »
وابتسمت ابتسامه جانبيه اغاضت فيها خلود
ونزلت من الكوشه
وهي راسمه على ثغرها ابتسامه نصر بعد ما شافت نظرات القهر بملامح خلود
**
**
**

ام صقر لوت بوزها : ما ادري وش عاجب جدتك فيها
عاديه واقل من عادي
ياسمين  بنظره تقييم: حتى ما اتوقع تعجب اخوي ساري
ام صقر زمت شفتها بقهر: دام جدتك موجوده رح تقنعه فيها
وانا الغبيه مخططه انه يتزوج ابنه الجيران
يكفي انها متعلمه فهمانه
قاطعتهم ام عصام وهي تسلم على ام صقر
وجلست معهم على نفس الطاوله بعد السلام
ام صقر بابتسامة : اخبارك ؟؟ واخبار العيال ؟؟
ام عصام : بخير
وانتم وش اخباركم ؟؟ زمان ما زرتونا
ام صقر : انت تدرين بالمشاغل بس ان شاء الله بأقرب فرصه
ازورك
وباستغراب اشوفك جايه للعرس ؟؟
ام عصام : اعرف ام العروس وعزمتني وما حبيت ارد عزيمتها
وحتى ام العريس شريفه اعرفها
ام صقر  هزت راسها: شريفه اعرفها قبل ما تتزوج ناصر
شفتها مره وكان ولدها صغير
ام عصام : نفسه العريس الحين
ام صقر بتعجب : ما شاء الله الايام تمر بسرعه
وش يشتغل ؟؟
ام عصام : يشتغل بالتجاره وقبل فتره رجع من الخارج بعد ما كمل الماجستير
وخطب ابنه عمه ابو فهد بعد ما طلق ابنه عمه
وقبل ما تكمل اشرت بعيونها شايفه ذيك الي لابسه فستان مشمشي هذي كانت خطيبته
وانفصلوا قبل اسبوعين
ام صقر وتحس القهر بداخلها اخر هالعمر تزوج ولدها
مطلقه بس ما اظهرت شيء وسألت بهدوء : وليه انفصلوا ؟؟
ام عصام : سمعت انهم مو متفاهمين وسمعت انه هي الي طلبت الانفصال تحسه مثل اخوها وعاشت معه مثل اخوانها
بس انا ام فهد قالت لي البنت قويه كثير وما تحترم لا كبير ولا صغير
وحطت المر بحلق زوجة ابوها واخوانها وللحين مو معترفه فيهم
وحتى فارس ما تركها من وسع يقول ما تحترم امه
ولا اخواته ولا هو تحترمه
ولما طلبت الطلاق ما تردد ولا دقيقه وكأنه الفرصه جاءت له على طبق من ذهب
وطلقها وخطب على طول
الله اعلم بالصدق
اسراء رفعت حاجب: للبيوت اسرار يمكن زوجة عمها
ما تحبها وتحاول تشوه صورتها
ام عصام هزت كتوفها ؛ يمكن الله اعلم بالحق
هذا انا الي سمعته
سكتت ام صقر وهي بداخلها تغلي تبغى ترجع
وتنهي هالمهزله
كيف ولدها يتزوج مطلقه ؟!
مستحيل تقبل بهذا الوضع مستحيل
**
**
**
ناصر
بعد ما انتهت الحفلة طلب من ياسر يرجع
شريفه وفاطمه وشوق للبيت
وتوجه لسيارته وهو يحس نفسه مخنوق
حرك السياره وهو يتذكر لما دخل عليه فارس
المكتب
زفر بضيق والموقف يتكرر قدام عيونه
;
;
;
منشغل بالملفات لما دخل عليه فارس عالمكتب و علامات التردد واضحه على ملامحه
رد السلام بهدوء وجلس امام المكتب
ناظره ناصر باستغراب وهو حاس انه في شيء
فسأله حتى يتأكد من حدسه : فيه شيء يا فارس ؟؟
اخذ نفس فارس وهو يرتب الكلام وتكلم بتردد : اممم بصراحه ابغى افتح معك موضوع
بس خايف تزعل علي
ناصر عقد حواجبه باستغراب : ازعل؟!!
وليه ازعل ؟؟
انت مثل عيالي ومستحيل ازعل عليك وانت تدري
بمنزلتك عندي
هز فارس راسه : لاني اعرف مكانتي عندك علشان كذا
متردد من الي ابغى اعلمك فيه
ناصر قاطعه : لا تتردد ولا تشغل بالك وخليك دوم صريح معي
واشر له يتكلم
هز فارس راسه وبهدوء وهو يرتب الكلام : اممم بصراحه انا ما ابغى استمر مع شوق
لأني أحس انه زواج فاشل من بدايته
طالع عمه وهو يتابع كلامه: يمكن تتضايق من قراري بس انت ربيتني
واهتميت فيني وما قصرت ربي يجزاك كل خير عني
ومن باب اولى ارد لك الجميل اني احفظ شوق واراعيها ومن هذا الباب
بس انا احس ما اقدر امسك نفسي حتى اكون معك صريح
البنت ما تطيقني لا من باب ولا من طاق ولسانها
طويل
وانا ما اضمن اني اتحمل اي كلمه
منها
وما اضمن النتائج حتى
علشان كذا خلينا على البر احسن لي ولها
وانت شفت يبه يوم رجعت من السفر ما كلفت نفسها
تسلم علي
غير نظرات الكره والحقد الي تناظرني فيها
وكأني قاتل لها قتيل
وحتى..
اشر بيده ناصر وهو يحاول تكون ملامحه هاديه : لا تكمل
انا ما رح افرض البنت عليك وبما انك اخترت الانفصال
ما رح اجبرك تغير رأيك
وتقدر الحين تروح للمحكمه وتطلقها ويا دار ما دخلك
شر
هز راسه ومد ورقه بيضاء لعمه : وهذي ورقتها
تناول الورقه وهو يحس وجهه صار احمر من القهر
فتحها وهو يناظر محتواها بتمعن
وضعها على الطاوله وبصوت باين فيه الضيق : هذا انت مجهز كل شيء بنفسك ومستعجل على الطلاق
نزل فارس عيونه للارض باحراج وما قدر يرد بكلمه
كمل ناصر بعد ما زفر بضيق : ترى كلامك كله حشو
ما هو منطقي ابدا
الحرمه اذا طال لسانها الرجال يقدر يقصه لها بطريقته
بدون ما يتطرق للعنف
وما تقدر تحكم على الحياه الحين لانه الايام تغير النفوس
يمكن تقول بنفسك اني مع طرف ابنتي
وبكل صراحه اقول لك ايه انا مع شوق
لانه الغلط راكبك من راسك لأسفل قدميك
اذا انت ما تبغى البنت ليه تربطها اكثر من ثلاث سنوات ؟؟
ليه ما تركتها تشوف حياتها ؟؟
انا ما افسر تصرفك هذا إلا تصرف بزران
تبغى تقهرها ؟!
تاركها معلقه  طةل هالسنوات ...وبعد وقت ترميها
رمية كلاب
فارس باحراج وتوتر : ءء انا
ناصر كمل كلامه : لا تبرر موقفك
لو تعزني ولي مكانه عندك كان فكرت فيني
وش تقول الناس عني ؟؟
طلق ابنته بعد سنوات !!
ما شاء الله !!
وبعصبيه وقهر : ليه ما طلقتها من البدايه او قبل ما تسافر ؟!!
فارس اخذ نفس : بس انت قلت انك ما رح تزعل
واشوفك الحين
قاطعه ناصر بعصبية : اكيد رح اتضايق هذي ابنتي
شوق وانت تعرف وش عندي شوق
تبغى اصفق لك مطلقها بعد سنوات وعلى اسباب ما تسوى تتكلم فيها
وش تبغى يكون رد فعلي ؟؟؟
تكلم !!!!
فارس بندم : انا اسف وخلاص اعتبر الموضوع ما صار
وانا مستعد ارجعها لذمتي
قاطعه ناصر بحده : مستحيل
طلقتها وكل شيء انتهى
انسى بيوم ترتبط فيها كل واحد بطريق
فارس ووجهه احمر من الفشيله : اشرط علي وانا انفذ
تكلم ناصر بصوت متضايق : اسمع ما ابغى انسان يدري
انك انت الي طلقتها فاهم
عقد فارس حواجبه مو عاجبه الكلام بس ما علق على الموضوع اكتفى بالسكوت
تابع ناصر كلامه : انا رح انشر قدام الكل انه شوق
هي الي طلبت الطلاق وما تبغاك
قاطعه فارس بانزعاج : يبه وش تقول ؟
مو حلو بحقي انها هي الي رفضتني وطلبت الطلاق
ناظره ناصر بحده : يعني حلو بحق شوق انك رفضتها وطلقتها بعد هالسنين ؟؟؟؟
اذا انت رجال مو قابلها على نفسك تبغى اني اقبلها
لابنتي
مستحيل
فارس والقهر باين بوجهه : طيب خلاص قول انك انت
الي فصلتنا عن بعض
قاطعه ناصر بحزم : انا رح اقول اني انا طلبت منك الطلاق
بس قدام شوق اما الباقي رح نقول انها شوق الي طلبت الطلاق
وغير هالكلام ما عندي
واذا تبغى تكسر كلامي بكيفك روح قول الي تبغى
وخلاص انتهينا
فارس ناظره وهو يعض على شفته وتكلم بعد تفكير : انا موافق على كلامك ومستحيل اكسر كلمتك
بس لي شرط واحد يضمن لي انك مو زعلان
ناصر بدون نفس : وش هو ؟؟
فارس بهدوء : تخطب لي ابنه عمي ابو فهد خلود
هز راسه ناصر بدون اهتمام : خلاص مثل ما تبغى
اخطب لك خلود
بس إياك اسمع انه الكلام الي صار بيننا طلع من المكتب
هز فارس راسه : لا تخاف ما رح اتكلم
زفر بضيق ناصر لما تذكر هالموقف للحين ضايق صدره لما يتذكره
استغفر بصوت منخفض وكمل طريقه
وهو يحس الضغط عنده مرتفع

**
**
**
**
طلعت من القاعه مع امها وهي ترتب النقاب
وقفت امها لما شافت فهد وردت عليه السلام
فهد باحترام : وعليكم السلام
كيف حالك يا خالتي ؟؟؟
فاطمه بهدوء : الحمد لله بخير
وش اخبارك يا ولدي ؟؟
فهد بهدوء : الحمد لله بخير
وطالع جهة شوق : اخبارك يا شوق ؟؟
طالعته شوق نظرات حاقده وفتحت الشنطه
وتشاغلت فيها
حس فهد بالفشيله من تصرفها
وناظر فاطمه وهو يرسم الابتسامه بعد ما تفشل : علامها ما تسمع ؟؟
فاطمه منحرجه من تصرف شوق : يمكن ما سمعتك
منشغله تدور على ..
قاطعها فهد ؛ عادي مو مشكله
تعالوا للسياره ارجعكم معي
فاطمه : ربي يجزاك خير
بس ما له داعي تكلف على نفسك الحين نرجع مع ياسر
فهد  ابتسم: غلبتكم راحه وبعدين
ياسر راح يوصل جدتي والي معها
ورح يطول حتى يرجع لكم
وانا ما معي الا مريم وخالتي شريفه
قبل ما ترد سبقتها شوق وهي ترد من رؤوس خشومها : اقول تيسر من هنا
ما نبغى نطلع معك
قاطعتها فاطمه بنهر : شوق وش هالكلام ؟؟
فهد يكلم فاطمه : تفضلي خالتي على السياره
ما نبغى نتأخر
فاطمه بهدوء : ان شاء الله
واشرت لشوق تلحقها
وقبل ما تعترض اعطتها نظره قويه
وتوجهت للسياره
لما شافت امها راحت ومعها فهد
وطنشوها ولا كأنها موجوده
اضطرت تلحق امها وهي معصبه
وما خلت شتيمه الا قالتها بحق فهد بقلبها !!
**
***
***

في اليوم الثاني جالسه بغرفتها
وياسر فوق راسها يزن : اففف تراك طفشتينا
وحنا ننتظر الجواب
قولي اما يس او نو
طالعته شوق وهي رافعه حاجب : اشوف صاير تتكلم اجنبي
ياسر وهو يميل شفايفه : يا شيخه هالكلمتين
بس حافظ
احمدي ربك عليهم
والحين لا تغيري الموضوع وش ردك
ترى صار لك اسبوعين تفكرين
شوق لوت بوزها ؛ يعني كيف اعطي رأيي على موضوع بالنسبة لي مجهول
يعني ما اعرف عنه شيء كيف اوافق ؟؟
ياسر وهو يخزها بعيونه : اعطيناك موشح كامل عنه بكل شيء
وش الي تبغين تعرفين عنه ؟؟
شوق وهي تلعب بطرف البلوزه : اممم قلت لك من قبل
ياسر بتأفف : ياهوووووو على هالسؤال
بالله يعني لو طلع مو حلو بترفضين؟؟
وش تبغين بشكله الحين ؟؟
وبعدين قلت لك ما اعرف الرجال
لما جاء وخطبك كان عندي دوام
وسألت ابوي عنه كيف شكله
طالعني ورد علي بسخريه وقال رجال يعني كيف رح يكون شكله !!
زفرت بضيق شوق : بالله هذا جواب ؟!!
اشر ياسر لها على الباب : تفضلي روحي اسألي ابوي عن شكله
طالعته بتصغير : ما اسخفك
بالله انا اتكلم جد المفروض جبت لي صورته
مسكها ياسر من اذنها : يوم الشوفه الشرعيه
بتشوفينه
وغير هالكلام ما عندي
الحين اعطي موافقه اوليه وبعدين تشوفينه
اذا كنت خايفه من الشكل
وبعدين حطي في بالك الشكل مو شرط للسعاده
يعني البنات تدورون على الرجال المزيون
اهم شيء عندكم
مع انه يمكن تعيش بتعاسه مع هالمزيون
الجمال مو شرط
والحين قولي لي رأيك !
شوق طالعته من فوق لتحت : انت وش دخلك ؟
انا اعرف الام هي الي تسأل البنت وتأخذ الموافقه
منها
قاطعهم دخول فاطمه وهي تتكلم : وهذي الام جاءت لعندك تأخذ موافقتك يا عروس
خلصينا يا شوق ترى ما صارت
شوق ابتسمت لامها واشرت على ياسر : يطلع
استحي اتكلم قدامه
وصارت تعمل حركات انها مستحيه
ياسر جكر فيها جلس على السرير وتربع : جكر فيك مو طالع
ورح تقولين رأيك غصب عنك
والا اقول لابوي عن اسئلتك البايخه
وخزها بعيونه
شوق كشت عليه : خلاص اجلس
امري لله
ابتسمت فاطمه وهي تناظر ياسر وشوق
وجلست على الكرسي
تسمع رأي شوق
**
**
**

ام صقر بعصبيه : قلت لك تتصل الحين
وتلغي الخطبه
ساري بهدوء : طيب اعطيني سبب مقنع علشان اروح
وألغي الموضوع كله
ام صقر وهي تناظره والشرار يطلع من عيونها : تدري انها البنت مطلقه من ابن عمها
ساري وهو يحط يده تحت خده بهدوء : ايه ادري
قال لي ابوها
وش المشكله بالموضوع ؟؟
لو متزوجه كان فيها نظره
ام صقر قاطعته بعصبية : قلت لك لا يعني لا
انا كل البنت مو داخله مخي
ولا عاجبيتني
ولا تنسى جمالها مو ذاك الزود
رد بهدوء : مو شرط يمكن تكون بعينك مو حلوه
بس انا تكون بعيني حلوه يعني مو مقياس
وبعدين انا اعطيت الرجال كلمه ومستحيل اتراجع
عنها الحين
اذا رفضت البنت تكون جاءت من عندها
واذا وافقت في شيء يسمونه الشوفه الشرعيه
اروح اشوفها واتكلم معها عجبتني تممنا على خير
ما عجبتني كل شيء بدار اصحابه
ليه انت معصبه لذي الدرجه مو عارف
ام صقر هدأت شوي : طيب نشوف وش رح يطولنا من هالسالفه
لو انك تسمع كلامي
جلس جنبها وابتسم : يا يمه تدرين انك غاليه
عندي واي شيء ارد عليك
بس هذا الموضوع طلع خارج عن يدي
يعني جدتي كلمت ابو البنت بدون علمنا
كيف تبغين افشلها وارفض
وبعدين انا مو حاط بنت معينه في بالي
رح اجلس معها واشوف
لا تحكمي على البنت من اول نظره
انت ما جلست معها ولا كلمتيها حتى تحكمين عليها
صح ؟
هزت راسها بعدم اقتناع
وتكلمت ياسمين : بس سمعنا انها قويه وما تحترم
لا كبير ولا صغير
زوجة عمها شاكيه منها وحتى خطي..
قاطعها ساري بضجر : تراكم وجعتوا راسي بالموضوع
خلاص
وبعدين مع ذي السالفه ؟؟!!
ام صقر بزعل وهي تناظر ياسمين ؛ شفت من الحين قلب علينا قبل
ما يتزوجها باكر اذا تزوجها ما رح نشوفه ابد
ابتسم على كلام امه ؛ يعني مو كأنكم انتم طفشتوني من اول ما جلست
احمدي ربك اني بعدني جالس
ام صقر : لا تلومني ترى هالبنت مو داخله مخي
ساري تنهد وناظر امه : والله الف حرمه ما ابديها عليك
وخلاص يوم الشوفه ... رح اجلس واتكلم معها
واحكم عليها بنفسي
واذا ما عجبني اي شيء رح انسحب وما اكمل
ويا دار ما دخلك شر
ام صقر وهي خايفة يقع النصيب : ان شاء الله
يصير شيء ويلتغي الموضوع كله
ابتسم لأمه على كلامها وهو مو مهتم صار النصيب
او لا ...ما يعرف البنت ولا شيء ..فما يهمه الموضوع من الأساس!!
**
**
**
فاطمه هزت كتفوفها بقلة حيلة : والله ما ادري وش تفكر فيه هالشوق
الجده مو عاجبها رفض شوق : طيب حاولي فيها
تفكر مره ثانيه قبل ما ناصر يرد لهم الجواب
فاطمة حركت راسها بفقدان امل : ما ظنيت توافق
تقول هالموضوع
ما تفكر فيه ابد وانا بلغت ناصر برفضها
الجده عفست ملامحها : يعني ولد عمها فارس
وانفصلت عنه ما تبغاه وهو كل الحريم تتمناه
قاطعتها شوق وهي داخله : الا انا ما ابغاه
الجده تناظرها : فارس ما يعيبه شيء ليه تطلبين الطلاق ما ادري عن ناصر تاركك على راحتك
شوق وهي تجلس وتناظر جدتها : يا جده افهمي
ترى حفيدك هذا ما اطيقه ولا اقدر ابلعه
التقت عينها بعين شريفه وهي تخز فيها
طنشت شوق نظرات شريفه ورجعت تناظر جدتها
كملت الجده كلامها : طيب والعريس ليه رفضتي ؟
شوق وهي تلعب بخصله من شعرها : مو مرتاحه
لأمه وأخواته
انا طبعي اذا ما ارتحت للأم مستحيل اوافق
واعطت نظره لشريفه وكأنها تقصدها بالكلام
فاطمه تضايقت من شوق ما تحب نغزاتها
بالحكي حتى لو كانت ضرتها تكلمت وهي
تناظر شوق بحده: عمرك ما وافقت
خلاص قفلوا الموضوع
قاطعها دخول وليد وهو مبتسم : نقفله بالمفتاح
والا بالسقاط
ابتسمت فاطمه له : الي تبغى بس ارتاح من هالسيره
طالعها بعد ما جلس مقابل لها : وش هالموضوع الي تبغين تقفلينه ؟؟
فاطمه بدون نفس : عريس شوق
الجده وهي تؤشر على شوق : شفت اختك المخبوله رفضت العريس
وليد ناظر شوق للحظات وبعدها ناظر فاطمه : تدرين
يا خالتي احسن شيء رفضته لاني
بصراحه مو مرتاح لهذي العيله ومتأكد رح تتغلب
معهم شوق...وما حبيت اتدخل قلت يمكن ...
قاطعته شوق وهي تتخصر بعد ما وقفت : انا اعرف انك ما تتمنى لي الخير
وفرحان لاني رفضت واكيد غيران من ساري
لانه احسن منك بكل شيء
وتحلم توصل لظفره
لكن انا جكر فيك موافقه
وصارت تتريق على كلامه «تدرين يا خالتي احسن شيء رفضته »
وناظرته بعصبية : انت وش دخلك وافقت او لا
والا لازم تحشر خشومك بكل شيء
كان الموجودين يناظرونها بصدمه من الموقف
ما قال شيء وليد علشان تهب فيه
كذا
عدل وليد ملامحه ورسم ابتسامه وهو رافع حواجبه : ما رح ألومك على كلامك اكيد نفسيتك
متحطمه لانه شيخ الشباب تزوج وطار لشهر العسل
وعلشان كذا رفضت اكيد تبغين تعيشين على ذكراه
وتركهم وطلع
تارك خلفه شوق نار مشتعله
طالعته وهو طالع وبصراخ : تخسى انت واخوك
وطالعت شريفه بحقد وسحبت نفسها وطلعت
وهي مو شايفه قدامها من العصبيه
**
**
**
ياسر وهو يدق بأصابعه على الطاوله : اكيد انهبلت
ليه هي لعبة بزران ساعه موافقه وساعه رافضه ............ابوي يدري عن السالفه .......خلاص انسي وقفلي على الموضوع ......ما ادري هي غبيه والا ايش ترجع توافق
جكر بوليد .........لا خلاص الموضوع تقفل حتى ابوي خبرني انه اتصل بالجماعه وخبرهم بالرفض ......لا والله ما يصير وليد ما قال شيء علشان ترد عليه
كذا ..........ما ادري عنها .............مثل ما قلت لك يمه لا تجيبي سيره لابوي .....ان شاء الله مع السلامه
قفل الجوال ووضعه على الطاوله وهو يفكر بوضع شوق
تقرر بدون تفكير ومشاعرها هي الي تحركها
رفع نظره لنواف وهو يحرك إيدينه قدامه : وين رحت سرحان بعد المكالمه ؟؟
وش قالت لك عمتي ؟؟
طالعه ياسر بهدوء : سوالف عاديه
طالعه نواف وهو يقرصه بعيونه : اااااه سوالف عاديه
المهم ترى جدتي هاليومين جايه عليكم
بعد ما سمعت انها شوق رح تخطب
ياسر رفع حاجب وكأنه مو عاجبه قدومها : يعني تبغى تبارك ؟!!
نواف ابتسم : لا يا شاطر جايه تقيمها على رؤوسكم
وخاصه ابوك
وتقول تبغى تسحب شوق عندها
ابتسم ياسر بملل : تراها واثقه من نفسها
عموما خبرها انه التغى الموضوع
قبل ما تتعب نفسها وتيجي مو ناقصنا وجع راس
طالعه نواف بعد ما حط يده تحت خده : غريب يا ياسر تغيرت
ما كنت كذا مع جدتي وش الي غيرك عليها ؟؟
حتى زياره ما عدت تزورها !!
ياسر ما يبغى يخوض بهذا الموضوع : مشغول مو فاضي احك راسي
سكت نواف للحظات وهو يحس ياسر ما يبغى يتكلم : طيب وشوق ليه رفضت ؟؟
ياسر هز كتوفه بلامبالاه : بكيفها
طالعه نواف وما تكلم
وبعدها دخل ياسر بمواضيع ثانيه ....

**
**
**
ام صقر ونار بصدرها : كيف ترفضك وانت الف بنت تتمناك ؟!!
ساري وهو يتصنع البرود  وبداخله قهر كيف ترفضه: والله ما ادري روحي اسأليها عن السبب
ام صقر وهي تعض على اصبعها لعلها تطلع حرتها : اخخخخ لو انها قدامي
فوق ما وافقنا عليها وهي مطلقه
تيجي ترفض
اسراء بهدوء : ليه يا خالتي متضايقة مو انت كنت ما تبغينها
هذا هو
انلغى الموضوع بكل اريحيه
ام صقر بقهر : حنا نرفضها مو هي ترفضنا
كله بسبب جدتك والا انا ما ابغى هالنسب كله
شمس باستغراب : يعني يا جده هي حلوه كثير علشان كذا شايفه عمرها وترفض
ام صقر بكره : الا مثل الغراب استغفر الله
اسراء بهدوء ناظرت شمس : انا وش قلت لك ما تتدخلين بسوالف الكبار
شمس بتبرير : بس ماما
اعطتها نظره واظطرت شمس تسكت
ياسمين بتفكير عميق ؛ يمه وش رايك نخطب
قاطعها ساري بحده وللحين مزعوج من رفضها : تقدري تقفلين الموضوع كله الحين
ام صقر وهي تحاول تمسك اعصابها وترجع لنفس الموضوع :وش ينقص ولدي حتى ترفضه ؟؟
اصلا الظاهر انها وحده لعابه والا ولد عمها خاطبها
اكثر من ثلاث سنوات وعند موعد الزواج ترفضه !!
نعمه وشكر من الله انه انتهى الموضوع
ياسمين نطقت بملل من الموضوع كل شوي تعيده: خلاص يمه انسي الموضوع ولا تضايقي نفسك
الحين يرتفع عندك الضغط
ام صقر هزت راسها : احاول بس مو قادره كل ما اتذكر
انها هالزفته رفضت ولدي تطلع لي قرون
حسبي الله على عدوها رفعت الضغط عندي
ياسمين طالعت ساري : اشوفك ساكت وما علقت على الموضوع
حط يده تحت خده بملل : يعني وش تبغين اعمل
اروح انتحر ؟؟!!
البنت حره باختيارها ويمكن استخارت وما ارتاحت
كل واحد حر باختياره
شمس بابتسامة ؛ يمكن يا عمي شافت جني او شبح بالحلم
ام صقر خزتها بعيونها بحده : اقول جني يركب يهودك وش شايفه ولدي علشان تقولين عنه كذا ؟؟
وش حلاته يجنن وما شفت بزينه
همست ياسمين لساري : تراها امك تبالغ فلا يكبر راسك
ساري ابتسم : محتره لاني احلى منك
لوت ياسمين بوزها : نعم ؟؟!!
لا بالله عنست اذا انت احلى مني
ام صقر بدفاع عن ساري : ايه احلى منك
مو ناقصه شيء
وان شاء الله ربنا يرزقه العروس الي تسعده
**
**
**
دانا بهمس بعد ما لوت بوزها : قال رفضت تحمد ربها
انها لقت واحد يطالع بوجهها
مريم وهي تمسح على بطنها بخفه : ما يصير كلامك هذا
وشوق مو ناقصها شيء
دانا  بقرف: ناقصها كثير
شوق تختلس النظر لمريم ودانا وهم يتهامسوا
...تحس انهم يتكلموت عليها
صارت تلعب بأظافرها وأذانها عند دانا ومريم
تحاول تسمع وش يقولوا
مو قادره تسمع وش يقولوا بسبب صوت امها
وجدتها وام مهند
شوشوا عليها
عفست ملامحها بضجر وناظرت عمتها الي وجهت الكلام لها : سمعت انك رافضه ابن ام صقر ؟!!
شوق ابتسمت بخبث : ايه رفضته
ام مهند تتكلم بهدوء : وش السبب ؟؟
شوق تكمل بخبث : بصراحه انا من النوع الي ما اوافق على العريس بسرعه
مو مثل ناس من اول عريس على طول وافقوا
حتى بدون استخاره وكأنهم مشفوحين عرسان
وطالعت بطرف عينها دانا وهي تبتسم بخبث
احمر وجه دانا وهي عارفه انها تقصدها
لما انخطبت
بس دانا قاعده لها بالمرصاد ردت بدقه وهي تناظر عمتها : يمكن رفضت شوق خايفه يرفضها
يوم الشوفه
واعطت نظره شماته لشوق
طالعتها شوق وهي ماسكه نفسها تبغى تقوم وتكسر الدنيا فوق راس دانا
وقبل ما ترد شوق وتبرد حرتها تكلمت ام مهند : ما شاء الله عليها شوق مو ناقصها شيء حتى تنرفض
رفعت عمتها من معنوياتها بس للحين ما بردت حرتها
ردت دانا وهي تمثل البراءه : انا مو قصدي شيء يا عمتي
بس اكيد شفتي كنتهم تطيح الطير من جمالها
واكيد يبغون وحده حلوه مثلها
شوق والغيره ولعت بقلبها لما تذكرت
الحلوه الي كانت بالحفله وطلعت كنتهم
طالعت دانا والشرار يطلع من عيونها ؛ خلي عنك يا ملكة جمال العالم
الي يسمعك تتكلمين عن الجمال يصدق
تراك تشبهين القرد انت وابنك المقرود
احمدي ربك لقيتي واحد اعمى وتزوجك
ولو عنده نظر كان هج من نفس اللحظه
دانا ولعت من العصبيه : قصدك مثل فهد لما شافك وهج
حست شوق انه دانا ضربت الوتر الحساس
وما تبغى عمتها تدري انه فهد شافها ورفضها
وللحين متأثره بذاك الموقف
واقتربت منها وشدت شعرها بقوه
دانا وهي تحاول تفلت شعرها وتشتم بشوق
ودموعها على وشك النزول
والحريم يحاولون يفكونهم بس ما في فائده
شوق وهي تشد بشعرها وتتكلم من بين اسنانها : انا اراويك يا زفته
دانا وهي تقرص بكتف شوق والدموع تتزل من قوه الشد : اتركيني يا .....
شوق وهي تشد بأقوى ما عندها
صرخت دانا من الوجع
بعد لحظات تركتها وخلال ما رفعت دانا راسها
ضربتها شوق كف على وجهها
وتراجعت خطوتين للخلف لما سمعت صراخ ابوها : شوق
بلعت ريقها وطالعت ابوها وبسرعه ركضت
باتجاه الدرج مطنشه نداء ابوها عليها
ناصر عصب عالاخير وهو يشوف كيف طنشته ولا كأنه موجود
وفوق هذا هاجمه على اختها
توجه خلفها باتجاه الدرج بس وقفته فاطمه وهي تمسكه من كتفه : ناصر
ابعد يدها عنه وما سمح لاحد يتكلم وتابع صعوده للدرج بعد ما اعطى تهديد لفاطمه : يا ويلك اذا لحقتيني
فاطمه بضيق وتوجهت للجده : خالتي اطلعي انت
اكيد ما رح يردك
قاطعها صراخ ناصر : والله للي يلحقني صدقوني ما يصير خير
وتركهم
ام مهند بلوم : الله يصلحكم ما له داعي النغزات بالكلام
هذا وانتم اخوات !!!
دانا وهي تعدل شعرها : هي الي بدأت
قاطعتها مريم : خلاص اسكتي
دانا بعصبية وهي تمسح دموعها : والله ما اسكت لها تفكر الدنيا سايبه عندها
دخلت شريفه من برا وكانت بالمجلس الخارجي سألت باستغراب وهي تناظر دانا وشعرها معفوس : وش فيه صوتك طالع ؟؟/
ومين عمل فيك كذا ؟؟
دانا بحقد وكره : مين غيرها الزفته
والله ما اسكت لها والحين تشوف
مسكت الجده يدها قبل ما تتحرك : وين رايحه يا بنت ؟؟
دانا وهي تفلت نفسها من جدتها : الحين رح اخلي
زوجي يحط لها حل
الجده شهقت : تبغين تفضحينا عند العرب ؟؟
اقعدي لا بارك الله بإبليسك
والحين ينحل الموضوع
دانا بعناد : ما رح اسكت
فاطمه كتفت يدينها وهي تناظر دانا : خلها تروح تقول له
وش بيطلع بيده ؟؟
يعني ييجي ويضرب شوق والا وش رح يعمل ؟؟
دانا بتوعد : الحين تشوفين وش رح يعمل
مشيت خطوتين بس وقفها صوت ناصر الحازم : دانا
وقفت وناظرت ابوها
تابع ناصر كلامه وهو ينزل عن الدرج : الظاهر انه ما عندك عقل تفكرين فيه ؟
وش للي تهددين شوق بزوجك ؟؟
انت ما تستحين على وجهك ؟!!
دانا بقهر من كلام ابوها : بس
ناصر بعصبيه : لا تبسبسين تجلسين هنا باحترامك
وتحترمين اختك تراها اكبر منك
والا انا الي اكلم زوجك واخليه يقص لسانك على الكلام الي قلتيه
فاهمه
واعطاها نظره قويه خلتها تبلع ريقها
وطلع متوجه للمجلس
دانا التفتت على امها : شفت يمه كيف قلبت ابوي
علينا وهو شافها بعيونه لما ضربتني
اكيد كذبت عليه من خرابيطها المعروفه وصدقها
لكن انا الغبيه اذا شفتوا وجهي بعد اليوم وخلي
الزفته الي فوق تنفعكم
تحركت تطلع من الصاله بس مسكتها شريفه وبجزم : والله ما تطلعين
واذا طلعت من البيت لساني ما يناطق لسانك
دانا بضعف : يعني ما شفت ابوي
سكتتها شريفه وسحبتها وجلستها على الكنبه : خلاص انسي لمتى انت واياها توم وجيري
هذي مريم اختك
دانا بقهر : اذا مريم هبله وما تأخذ حقها
انا مو مثلها
وبتشوف شوق والله لاخليها تندم ويصير خير
طالعتها فاطمه وهي كاتمه ضحكتها على شكل
دانا بس ما علقت على كلام دانا
لانه بنظرها اخوات وطول عمر الاخوات مضاربه
**
**
**
شوق
دخلت وقفلت الباب وانا ابتسم لما سمعت كلام ابوي ورد دانا كيف انفعلت
جلست على الارض واسندت ظهري على السرير
والموقف لما دخل ابوي يتكرر بين عيوني
دخل معصب والشرار يطلع من عيونه
انا لما شفته كذا حسيت نفسي رح اعملها على نفسي من الخوف
وصار قلبي يدق طبول
يمكن اول مره اشوفه بالعصبيه هذي
وبدون شعور صارت دموعي تنزل من الخوف
تكلم وهو يشد على اسنانه ؛ انا لما انادي عليك ليه ما تردين ؟؟
انا لساني حسيته انعقد وش اقول وش ابرر
اقول له سمعتك بس طنشت وانا اعمل حالي سوبر مان
علشان يدفني بمكاني
ما لقيت جواب ابرر فيه تصرفي الغبي
فكرت الهروب ثلثين المرجله
ما توقعت توصل العاصفه لعندي للغرفه
وقبل ما ارد اصلا ما عندي رد
انتقل لسؤال ثاني : ليه ضربت اختك ؟؟
ما قدرت انكر لانه شافني بعيونه واذا قلت هي الي بدأت بالضرب اكيد رح يسأل تحت ويقولون اني الي ضربتها بالاول
ووقتها رح اسقط من عين ابوي زياده ولو اقول له هذي القبله ما رح يصدقني
وخلاص اصير بنظره كذابه
وحتى لو كان الموقف لصالحي ما رح يصدقني بشيء
قررت اقول له السالفة وهو يحكم بيننا وعلى مين الحق
وبصوت مرتجف تكلمت : ضربتها لانها احرجتني قدام
عمتي ام مهند
رفع حاجب وهو مكشر ؛ احرجتك ؟؟
وانا امسح دموعي تكلمت : ايه احرجتني
تقول لعمتي اني رفضت العريس لانه اذا شافني
رح يهج مثل ما هج فهد
لولا اني ضربتها والا كان قالت قدام عمتي سالفه فهد كامله وانه
شافني وما عجبته ورفضني
وش تتوقع مني اعمل وهي تتكلم عني كذا ؟؟
واذا مو مصدقني اسال جدتي وعمتي ومريم وامي جالسات وشاهدات
هدأت ملامحه شوي : وانت رفضت العريس لهذا السبب ؟؟
سكتت وما رديت لانه بصراحه هذا السبب
خفت يشوفني وما اعجبه ويهج على كلام دانا
وقتها وين عيني من دانا وخلود رح يتشمتون فيني
انا خلاص قرفت الزواج ما ابغى اتزوج واحرج
نفسي
واخلي العذال يتشمتون فيني
رفعت عيوني بعد ما حسيت ابوي ما تكلم
التقت عيني بعينه واحسه مخنوق
تبدلت ملامحه عكس لما دخل علي كان الشرار يطلع
من عيونه
بس الحين احسه لان واشوف بعيونه الشفقه
وكأني كسرت خاطره
شفتم صرت اكسر الخاطر :/
اخذ نفس وتكلم : ليه ما عندك ثقه بنفسك ؟؟
جمال الانسان بروحه مو بشكله
بصراحه ضحكني ابوي الي يسمعه يقول عن جمال روحي خليني ساكته احسن
تابع كلامه : اسمعيني يا شوق
ومسكني من يدي وتوجه للمرايه
وتكلم بهدوء : شوفي شعرك الله اعطاك شعر ناعم وحلو
غيرك يتمنى يكون عنده شعر او حتى يكون ناعم
صح او لا
هزيت راسي وانا ماسكه نفسي ما اضحك وانا اناظر المرايه
تابع كلامه بجديه : شوفي حواجبك مرسومات
في بنات حواجبهم غلاظ وملتقيات
شوفي عيونك ما شاء الله حلوات
انفك مناسب لوجهك فمك سبحان الخالق ابتسامتك
لون بشرتك
غيرك يتمنى هالبشره
ناظري وجهك واحمدي ربك واشكريه على هذي النعم
وسالفه فهد لا تخليها تؤثر عليك وبعدين وقتها كان وجهك متأثر من الضربه اذا تتذكرين
وهذي السوالف لا تهتمي لها
وهذي دانا انت احلى منها ومع ذلك تزوجت
فكبري عقلك ولا تصغريه
وحركات الزعران بالبيت ما ابغى حنا وين حتى تضربيها ؟
حتى لو مهما صار تراها متزوجه وعندها بزر
المفروض تحترميها
هزيت راسي مثل البغبغاء
بس سرعان ما عفست ملامحي لما شد اذني وتكلم بتحذير : اول مره واخر مره لما اناديك
تسحبين علي ولا كأني انادي احد
فاهمه
فكيت يده عن اذني وانا اهز راسي : فاهمه
طالعني وابتسم وطلع بهدوء
ابتسمت وانا الحين اتخيل شكل دانا وهي معصبه
سبحان الله سول الشيطان لي و ذكرت كلام
دانا وما ذكرت نغزاتي عليها
دوم الواحد يحاول يحط الحق على غيره
نادرا ما يقول الحق
يا ليت عندي الجرأة واقول ترى انا قلت لها كذا وكذا
طلعت مني تنهيده وانا مو عاجبيتني حياتي
اقدر اكتب الملل عنوانها ...وقلة الادب والحقد
زفرت بضيق من سوء اخلاقي ..اتمنى اني اتغير بس ما ادري كيف البداية!!