رواية بديت أنساك يالون السعادة~للكاتبة ضاقت انفاسي الفصل التاسع عشر 19 - بقلم BlackButterfly002

البارت 19

xxxx
xxxx
xxxx
xxxx
xxxx

زفر بضيق من هالموقف قهره ناصر ناظر عمه محمد يتكلم : طيب وش السبب انهم يبغون يعجلون بالزواج
نايف للي ضايق صدره وما قال لام صقر انه ناصر
طلب الانفصال خاف تفتح موال الطلاق رد بتحرص : ما ادري بالضبط ما يبغى الناس تتكلم اذا طالت الخطوبه
ومن هذا الكلام
ام صقر بعصبية : اتصل فيه وقل له زواج ما عندنا
وحنا للي نقرر موعد الزواج
عجبه حياه الله
ما عجبه من باكر ترسل ورقة الطلاق
قاطعها بضيق من هالكلام : يمه اذا لي خاطر عندك لا تتطرين الطلاق
وبنبره ضعيفه
لاني اذا انفصلت عنها رح اموت
قاطعته ام صقر وهي فاتحه عيونها بقهر : ما ادري وش معلقك فيها
ما صار لك فتره خاطبها هذا وانت خاطبها تقول كذا
بعد الزواج اذا شفناك نحمد ربنا
الظاهر هالبنت خلتك مثل الخاتم بإصبعها
مسح على وجهه بضيق من كلام جدته
ناظره ساري وحزن عليه وهو يشوف كيف متعلق بشوق تكلم يحل الموضوع حتى ما توصل للطلاق : خلاص الشهر الجاي انا وانت بنفس اليوم
حرك نايف شفتيه يقاطعه
بس كمل ساري وهو عارف وش يبغى نايف يقول : والتكاليف سواء تزوجت او لا انا دافع دافع
فما رح تزيد تكاليف وين المشكله عندك ؟!!
واذا على تكاليف زوجتك انا مستعد اعطيك
قاطعه نايف بضيق : وش جابرك تدفع عني
قاطعه ساري : لا تخاف دين وترجعه لما يتحسن وضعك
وغمز له
ابتسم نايف وهو مهموم : انا عندي فلوس بس ما ابغى افرط فيهم
عندي مشاريع ولازم يكون عندي
قاطعه محمد : وحنا وين موقعنا اذا ما نساعدك بوقت الضيق
متى يعني ؟؟
اي شيء انا وساري موجودين واعتبره دين وتسده على راحتك اتفقنا
هز راسه وابتسم براحه
وسرعان ما انمحت ابتسامته لما شاف ملامح ام صقر
المعصبه
تكلم بتردد : ي يمه
وقفت ام صقر بعصبية : وحطبه
وطلعت من الصاله
ابتسم ساري يخفف عن نايف : طنش باكر ترضى
ساعة زعل
و تعرف انت بالذات ما تقدر تزعل عليك
زفر بهم ورسم ابتسامة مجامله لاعمامه

xxxx
xxxx
xxxx
xxxx
xxxx
xxxx
شوق برفض : مستحيل كيف بعد شهر ؟؟
نايف طالعها ؛ عادي معك شهر تجهزين نفسك
شوق حاست بوزها : شهر ما يكفي
وليد عفس وجهه بقرف : انتم البنات عليكم خبال زايد
للي يسمع يقول جالسه في بيت ابوها عريانه
والحين تبغى تشتري من الصفر
طالعته شوق بحقد ناظرته ورجعت ناظرت نايف : طيب بعد 3 اشهر
خالد وهو متكتف : اعترضي من هنا لباكر ما رح حد يسمعك
خلاص ابوي وافق واتفق مع نايف
طالعه نايف وبنفسه كثر منها وافق مو كأنه جبرني بعد شهر ابتسم مجامله : اي شيء تبغينه بس اتصال
عبود وهو مرتكي على يد الكنبه : لو تعملونه الاسبوع الجاي يكون افضل
شوق بكره : لو تسكت لمده اسبوع يكون احسن
وناظرته باحتقار
طالعها عبود وعفس ملامحه بقرف

نايف بابتسامة: بما انه العرس الشهر الجاي تقدرون تعطونا مقفاكم
خالد وهو يلعب بحواجبه : نو نو
لاخر لحظه رح نبقى نحرسكم لباب الفندق
نايف انقهر من الحراسه المشدده : تدري لو تعملها الا بشعرك ارميك خارج المنطقة كلها
خالد بابتسامة طالع شوق : شوفي زوجك وش يقول ؟
اشوفك ساكته
شوق بابتسامة ؛ عادي بيطلعله يقول للي يبغاه
وحركت حواجبها تجاكره
وليد ناظرها : توقفين مع الغريب ضد اخوانك
شوق بابتسامة تقهره ؛ هذا زوجي مو غريب
انقهر عبود من ردها : هذي نفسها للينجرها للمجلس علشان تجلس والحين اشوف لسانها مترين زوجي وزوجي
نايف بابتسامة وهو يشوف شوق بصفه : هذي الزوجات والا بلاش
عبود بصوت هامس : مالت عليك وعليها

xxxx
xxxx
xxxx
xxxx
ثاني يوم نايف بهدوء يتكلم بالجوال عن تجهيزات العرس
شوق باعتراض : لا ما ابغى هذي القاعه
نايف وهو رافع حاجب : وليه ان شاء الله ؟
شوق : كذا مزاج ما احبها
نايف : بس القاعه مختارها عمي ساري وحجز كل شيء
شوق قاطعته باعتراض : يا سلام وعلى اي اساس يختارها عمك ؟!
واكيد الحين خطيبته هي للي اختارتها !
وانا ليه ما يطلع لي اختار ؟
والل شايفني ناقصه عن جيلي ؟!
ابعد السماعه شوي عن اذنه من صوتها وبعدها رجعها وللحين يتكلم بهدوء : يعني وش تبغين اروح اقول له إلغي الحجز ؟!!
شوق : ايوه بالضبط
نايف ببرود ؛ بأحلامك يا حلوه
مستحيل اعمل هذا الشيء
شوق بعصبية : اقول لك خلاص انسى موضوع الزواج ما ابغى اتزوج
قاطعها بهدوء : شوق وبعدين معك ؟؟
هي لعبه بزران ؟
شوق وبنفس العصبيه : زواج ما ابغى اتزوج وخلصنا
وقفلت الخط بوجهه
ناظر الجوال ووجهه احمر من العصبيه
ناظره ساري للي كان جالس قريب منه وصوتها كان طالع من الجوال تكلم بهدوء : خلاص ما في داعي للمشاكل ألغي حجز الصاله
قاطعه نايف بضيق لما عرف انه سمع المكالمه : ما له داعي عمره ما يعجبها ان شاء الله
وقسم بالله اذا زودتها الا اخذها من بيت ابوها بعباتها
ساري يهدي فيه : ما توصل الامور لذي الدرجه
نايف بقهر : بس ما يصير انت للي تدفع وحنا للي نتشرط
خطيبتك اولى منها تختار
وبعد ما تختار نلغيه علشان ما عجب حرمي المصون
لا تهتم ما عليك منها
طالعه ساري : بعين الله
اعطيتها المهر ؟
نايف : ايه اعطيتها
ساري : ان شاء الله يكفي وما تطلب زياده
نايف عقد حواجبه : وليه ما يكفيها ؟
اصلا المبلغ يكفي وزياده
قاطعهم دخول ام صقر وبسرعه قفل نايف على الموضوع

xxxx
xxxx
xxxx
xxxx
مر اسبوع وشوق ما تكلم نايف واذا اتصل ما ترد عليه
قاعده وتفكر وش رح يصير بسبب عنادها
ما تبغي تهدم بيتها من اوله وتخلي للي حولها يتشمتون مسكت الجوال بقهر
وقبل ما تتصل نور الجوال بإسمه انتظرت
كم رنه وقلبها يدق طبول وبعدها فتحت خط وردت بهدوء : الو
_ هلا وغلا بغيت اجيب جاهة علشان تعبريني وتردين
المهم اخبارك
شوق بهدوء : الحمد لله اخبارك ؟/
_ مطنشيتني اسبوع وتسأليني عن اخباري ؟
شوق تبغى تعتذر عن الموقف : انا
قاطعها وهو يتكلم : اتصلت فيك علشان نروح نحجز قاعه لاني اجلت الزواج بعد اسبوع من زواج عمي
بس حضرتك ما رديتي
واليوم اتصلت بعمي ناصر علشان تروحين معي نحجز
بس للاسف الاجابه المعروفه ما عندنا بنات يطلعون مع الخطيب
شوق بتأفف : يعني ما في طلعه
نايف : لا
طيب خلاص قولي اسم القاعه للي تبغينها وانا احجزها
يصير كذا ؟؟
شوق مو عاجبها : اوكي
نايف : لا تقولين اعطيك وقت تفكرين لانه الوقت ضيق واكيد مخططه لقاعه معينه يلا قولي اي قاعه ؟
شوق : اممم قاعه (.......)
قاطعها نايف : لا انسي هذي القاعه
شوق عفست ملامحها : وليه ان شاء الله ؟
نايف بكل صراحه تكلم : عمي تكفل بالقاعه على حسابه
وهذي القاعه اسعارها مره غاليه فأنا ما احب اكلف احد معي
شوق مو عاجبها : وانا وش دخلني ؟؟
تبغى نتزوج بقاعه مثل الزفت علشان توفر على عمك
دامه مو قد كلمته ليه يتعهد بالقاعه
انقهر من كلامها على عمه رد بعصبية : اقول لك انسي موضوع القاعه ورح نتزوج مع عمي بنفس اليوم وبنفس القاعه للي حجزها
قاطعته بقهر : روح تزوج لوحدك انا
وسكتت لما قفل الجوال بوجهها

انقهرت من حركته ووقفت وهي تبربر عليه
xxxx
xxxx
xxxx
xxxx
ياسمين باستغراب : وبعدين معكم ساعه تقول الزواج مع ساري
وساعه تقول اجلتوه بعد اسبوع والحين تقول
مع ساري ؟
اثبت على موعد واحد
نايف ما له خلقها : وانت وش مضايقك بالموضوع
ام صقر دخلت وهي رافعه حاجب : وقسم بالله للي رفع سبع سماوات اذا حجزت لها قاعه ثانيه
لساني ما يناطق لسانك
طالعها باستغراب وش عرفها بسالفه القاعه
ناظر ساري بشك بس بادله ساري بنظره انه ما تكلم
تابعت ام صقر كلامها بعد ما جلست : حضرتها تتشرط علينا للي يسمع يقول ميتين عليها
ساري قاطعها : ما له داعي هالكلام
نايف بضيق : يمه خلاص انتهينا من هالموضوع
والزواج مع عمي ساري
طالعته ام صقر وهي تغلي من الداخل : طاوعني وطلق الحين
وانت الربحان
وقف نايف بدون اهتمام لكلامها : يمه قلت لك من قبل تبغين اتخلى عن روحي
قاطعته ام صقر بعصبية وهي تشوف تعلقه بشوق : خلاص حفظنا هالموال
لكن لا تيجي يوم و تشتكي عنها فاهم
نايف بابتسامة : لا تخافين ما رح ييجي ذاك اليوم
وتركهم وطلع
xxxx
xxxx
xxxx
xxxx

فاطمه خزتها بعيونها : تدرين انك ما تستحين على وجهك
قاطعتها شوق بدفاع : من حقي اختار مثلي مثل باقي البنات والا انا ناقصه يد والا رجل
طالعتها فاطمه من فوق لتحت : ناقصك عقل
شوق فتحت عيونها بصدمة : يعني انا مجنونه ؟!
فاطمه ؛ ايه مجنونه وحده تخرب بيتها علشان قاعه !!! قاعه يا متخلفه ؟؟
شوق بقهر : يمه لو سمحتي عن الغلط
وبعدين اخوه معه فلوس ما تأكلها النار وش فيها لو دفع لنا قاعه
فاطمه : وليه ما فتحتي عقلك واخذتيه ابو فلوس للي
النار ما تأكلها
شوق لوت بوزها : موضوع وانتهى
خلينا الحين بالقاعه
فاطمه وقفت وناظرتها بتحذير : اتصلي فيه وحلي الموضوع
قبل ما يصل الموضوع لابوك لانه اتوقع رح تشوفين ورقتك بيدك
فاختصري المشاكل
شوق باستبعاد : وليه رح يطلقني منه ؟
فاطمه تدق الوتر الحساس : لانه ابوك
وبعدها سكتت
خلاص انسي واتصلي بنايف انا نبهتك
وتركتها وطلعت
ضربت الارض تحتها بقوه من القهر
وتوجهت للجوال وفتحت على اسمه وبتردد
ضغطت على زر الاتصال
ما رد عليها انقهرت من تطنيشه
ورجعت اتصلت مره ثانيه وبأخر رنه وصلها صوته البارد : الو
شوق توترت: هلا
رد ببرود : اهلين
سكتت شوق ما تدري وش تقول
نايف بجفى : تبغين شيء لاني ما عندي وقت
قاطعته بقهر : ليه تكلمني كذا ؟
نايف : إسألي نفسك يا حرمي المصون
شوق حاست بوزها : زعلان
نايف : يهمك يعني ؟
شوق باندفاع : اكيد يهمني
نايف بابتسامة : لا مو زعلان انت زعلانه ؟؟
شوق : لا
نايف بتردد : والقاعة ؟؟
شوق بقهر من هالموضوع بس مجامله : لو تختار خيمه بالبر بدال القاعه رح تعجبني دامك اخترتها انت
خلاص موافقة على القاعه للي اختارها عمك
نايف بابتسامة : يا عيني عليك
وبعدين كل هذا مظاهر علشان كم ساعة ندفع هالمبلغ
وفي ناس مو لاقيه لقمة العيش وحنا نسرف بهذا الشكل
ولا تنسين الحفله من باب اعلان النكاح لانه جدتي ما لها
وقت ميته وما يطلع بيدنا نعمل رنه ورقصه
قاطعته بقهر : لا والله ؟
هو عزاء ولا فرح ؟؟
نايف وهو ماسك نفسه : فرح بس فيه شيء اسمه احترام
شوق باعتراض : لو جدتي انا توفت رح تعملون رنه ورقصه وما رح تحترمون ميتنا
اما انتم لازم نحترم ميتتكم
وش هالتفكير هذا ؟؟
نايف بنفاذ صبر : شوق وبعدين ؟؟
شوق بقهر : يعني وش رايك ألبس اسود علشان يكون عزاء اصلي
نايف وهو يتعوذ من الشيطان : شوق لا تعملي مشاكل
اهلي ما يبغون هذا الشيء فما له داعي للمشاكل
وخلي هاليوم يعدي على خير
شوق برفض : مو على كيفكم يكفي القاعه وقفلت حلقي وسكتت
اما توصل لذي الدرجه خلاص
قاطعها قبل ما تكمل : خلاص انسى الزواج
مو هذا الموال للي حافظيته ؟!!
وبعصبية وقسم بالله لو تعيدين هالكلمه الا فعلا ألغي الزواج وكل شيء ينتهي
وقفل الخط بعصبية
ناظرت الجوال بقهر تبغى تكحلها عمتها
رجعت تتصل فيه بس كان مقفل عصبت ورمت الجوال
على السرير وتوجهت تغسل وجهها علشان تخفف الغليان والقهر للي بداخلها وتفكر بروقان
xxxx
xxxx
xxxx
xxxx
xxxx

مرت الايام وما بقى على العرس الا يوم ونايف مقفل جواله تتصل فيه بس ما في فائده
ما خبرت امها مو ناقصها محاضرات
ما تدري كيف تتواصل معه
وفجأة لمعت بعقلها بفكره وبسرعه اتصلت
وبعد كم رنه وصلها صوتها البغيض : الو
شوق : مرحبا
_ اهلين مين معي ؟؟
عفست شوق بوزها مو مخزنه رقمها عندها مالت عليك : معك شوق
_ مين شوق ؟؟
انقهرت شوق من ردها وحست انها مقصوده وبنفسها شوق للي رح تحط المر بحلقك بس اصبري وردت بدلع تقهرها : شوق خطيبه نايف
ام صقر عفست ملامحها وردت بدون نفس : نعم ؟
بغيتي شيء ؟
شوق بنفسها بغيت تموتين وارتاح من خشتك
اخذت نفس وتكلمت بنفس الدلع : اتصل بنايف وجواله مقفل
ام صقر بقرف تتكلم : يمكن يبغى يرتاح من صوتك
علشان كذا قفله
انقهرت شوق من ردها وتمنت لو انها قدامها عضت على شفتها بقهر للحظات ورجعت لنفس الدلع : نو نو نايف ما يعملها اذا ما سمع صوتي قبل ما ينام ما يعرف ينام
قاطعتها ام صقر بقهر وعصبيه من كلامها : خلصيني وش بغيتي ؟
لا تقولين داقه علشان تسمعيني هالكلام التافه
شوق بنفسها انا كلامي تافه يا سخيفه اذا ما خليتها تندم : لا اتصلت علشان تقولين لنايف يرسل لي «...» عندي اغراض ما كملتها
وضروري اشتريها قبل العرس
وبس هذا للي بغيته سلام
قفلت الخط وعفست ملامحها بقرف انقهرت من ام صقر تتكلم معها وكأنها شحاده جالسه عند باب البيت
وسرعان ما ابتسمت لما تذكرت شهقتها لما قالت المبلغ
عدلت جلستها وهي تنتظر اتصال نايف لانها متأكده
لما يسمع بالسالفه رح يتصل فيها
xxxx
xxxx
xxxx
xxxx
xxxx
xxxx
ام صقر بعصبية : تفكر انه جالس على بنك لحضرتها
وش تبغى بالفلوس ؟؟
دخل نايف وصوت ام صقر طالع لبرا رد السلام باستغراب
ام صقر بعصبية : من وين ييجي الخير وانت رح تتزوج
للي ما عمرها شافت خير
جلس على الكرسي بتعب وعرف لوحده المقصوده بالكلام رد بهدوء : وش فيه ؟؟
ام صقر : حرمك المصون اتصلت فيني تبغى
فلوس
تقول الفلوس ما كفوها
محمد : طيب يمه ما فيها شيء يمكن الفلوس ما كفوها والحين كل شيء غالي
ام صقر ناظرته : تدري المبلغ للي طلبته كم ؟؟
ناظرها وهو ينتظر يسمع
كملت ام صقر :تبغى «...»
محمد رفع حاجب : من جدها تبغى هذي الفلوس
وناظر نايف ترى خطيبتك مو صاحيه !!
الظاهر تبغى تشتري السوق كله
ابتسم نايف وهو يناظرهم
ام صقر بقهر لما شافت رد فعله : اشوفك تبتسم ؟!!
نايف بابتسامة عريضه : وش تبغين اعمل ؟!،
ام صقر ؛ واكيد رح تروح تعطيها الفلوس
نايف : ومين قال لك انها تبغى فلوس ؟؟
ام صقر : انا سمعتها بإذني
نايف وقف بتعب وراسم الابتسامه : يا يمه هي مو قصدها فلوس
في بيني وبينها موضوع وهذا الرقم للي طلبته تقدري تعتبريها رساله مشفره
وعلشان جوالي كان مقفل اتصلت فيك تبلغيني بالرسالة
ام صقر بقهر : والله صارت اسرار ورسائل خاصة
لعبت بعقلك هالبنت
ابتسم لها وطلع بدون ما يرد
محمد ناظر امه : الله يهديك يمه وش تبغين فيهم ؟
انت من وحدك المفروض عرفت انه في موضوع بينهم
وهذي كلمه السر
والا عروس تجهز وترجع تطلب هالمبلغ
ام صقر حركت حواجبها : كل هالموضوع مو داخل راسي

xxxx
xxxx
xxxx
xxxx

xxxx
اول ما رن الجوال فتحت خط وردت بلهفه : الو
ابتسم ورد : هلا
شوق : واخيرا فتحت خطك كل هذا زعل
ضحك ضحكه قصيره : لا والله مو زعل
لو اني زعلان كان ما كلمتك
شوق بحيره : طيب ليه مقفل الجوال ؟؟
رد بابتسامة ؛ قفلته علشان ما تتطلبين طلبات غريبه
و نفترق بسببها
علشان كذا قفلته
وكأنه تذكر الفلوس ارسلها مع السواق
قاطعته بابتسامة : وش رايك تجيبهم ونطلع نتسوق
قاطعها : وناصر يدري ؟
شوق بابتسامة : امزح معك اصلا كملت كل شيء
نايف : خلاص انا اوصلك باكر لعند الكوافيره
شوق بتردد : اشوف ابوي وارد لك خبر
عصب نايف : وبعدين مع ذي السالفه
ترى ابوك زودها
خلاص ما بقى فيها باكر العرس
شوق باستسلام : هذي الاوامر
نايف بقهر : يصير خير
xxxx
xxxx
xxxx
xxxx
xxxx
xxxx
xxxx
xxxx
طلعت شوق من المطبخ وهي متغطيه
شافت فارس جالس بالصاله لفت وجهها وتوجهت باتجاه الدرج وهي تسمعه يتكلم : الحمد لله جاء من يقص لسانك ويخليك تمشين مستقيم
استفزها كلامه و ردت تقهره : لانه رجال قدر يمشيني مستقيم
وعضت على شفتها بندم على طول لسانها
لانه نايف منبه عليه مجرد السلام ممنوع ترده على فارس
عصب فارس من كلامها وما رد وهو يشوف ناصر دخل البيت
قبض يده بقوه وهو منقهر من ردها
لكن حلف الا يخليها تندم
xxxx
xxxx
xxxx
xxxx
xxxx
دخلت غرفتها وطنشت الموقف وتوجهت تجهز نفسها
قبل وصول نايف علشان يوصلهم للكوافيره
بعد ما جهزت نفسها توجهت لجناح امها علشان تروح معها
دخلت الجناح بعد ما استأذنت وجلست على الكنبه تنتظر امها تتجهز
شوق وهي تناظر امها رايحه جايه تكلمت بضيق : يعني ضاقت عليهم يعملون عرس عمه معنا
فاطمه : وش مضايقك انت ؟؟
شوق بقهر ؛ يمه خطيبة ساري مثل اختها تجنن
اكيد رح تغطي علي
فاطمه : خلي عندك ثقة بنفسك
وبعدين وش تبغين فيها اهم شيء نايف
تأففت وقلبها طبول : لما اتذكر الزواج قلبي
يطق طبول من الخوف
فاطمه وهي تلبس بالشيله ؛ توكلي على ربك
شوق : والنعم بالله
تدرين يمه مستغرب كيف ابوي وافق انه نايف يودينا
فاطمه بابتسامة ؛ بما انه اليوم الزواج انرفع عنكم الحصار وياسر تدخل بالموضوع
شوق لوت بوزها : بعد ما نشفتم ريقه

xxxx
xxxx
xxxx
xxxx
واقف ينتظرها بالسياره ويدندن بفرح مسك جواله واتصل عليها ...هلا ومرحبتين .......خذي راحتك .....وش عندي ههههههه........مستعد انتظرك الف سنه على مهلك يا حلوه ..... لا والله خايف ييجي ابوك ويغير رايه هههههه...... انا ابغى اتغلب لعيونك ......ههههه يلا سلام
بعد لحظات نزلت وهي وامها وركبوا السياره ونايف
الابتسامه شاقه حلقه

xxxx
xxxx
xxxx
xxxx
xxxx
خلود لوت بوزها بقرف : لولا انه خالتي شريفه لزمت علي احضر والا كان ما رحت ولا شفتها بعيني
دانا : نفسي تطلع مثل القرده علشان تنكسر خشومها
خلود بابتسامة شماته : لا تخافي لو طلعت حلوه
معها خطيبة ساري تقول للقمر انزل واجلس مكانك
فأكيد رح تغطي عليها
ناظرتهم مريم وما شاركتهم بالكلام
دانا : شفت زوجة محمد بعرسكم تجنن
خلود : ايه وانا شفتها ويقولون خطيبة ساري أجمل منها
دانا : يا حظهم
مريم ناظرتها ؛ لازم تحمدي ربك على خلقتك
غيرك يتمنى
قاطعتها دانا وهي تمسح وجهها بيدينها ؛ الحمد لله والشكر

بسم الله

بارت 19.2

قاعده بغرفة العروس وعافسه ملامحها بقهر : والله ما اطلع ولا انزف
فاطمه فتحت عيونها باستنكار : وش تقولين ؟تبغين تفضحينا ؟
شوق ردت وعلامات القهر بملامحها : جكر بأهله ما رح انزف ولا ابغى اشوف احد
الجده تحاول تحل الموضوع وبنبره حانيه مسكت يد شوق : تعوذي من الشيطان يا شوق وخلي هالليله تمر على خير
شوق قاطعتها بغضب مكتوم : ما كلفن خاطرهن يدخلن هنا ويباركن لي
جالسات بغرفه خطيبه ساري وانا ولا كأني عروس عندهم
فاطمه تهدي الوضع : وش عليك منهن
شوق قاطعتها : مو طالعه
ورح افشلهم قدام المعازيم
تأففت فاطمه من عناد شوق وبنفس الوقت ما عجبها
تصرف اهل نايف ولا كأنه عندهم عروس ثانيه
فاطمه بنفاذ صبر : الحين رح
اتصل بنايف ييجي يتصور
قاطعتها شوق بضيق : لا اتفقنا ما في صور
طالعتها فاطمه مو عاجبها شيء : انا اليوم جلطتي على يدك
ونفضت يدينها بقهر
الجده تنهدت بقهر وباستسلام : خلاص اتصلي بياسر خلي نايف ييجي يأخذها وانتهينا
فاطمه بقهر : يا خالتي الحفله بعدها ببدايتها
كيف يروحون الحين ؟؟
والمعازيم للي ينتظرون يشوفون العروس
قاطعتها شوق : للي يبغى يشوفني ييجي يسلم علي هنا
ام رائد بهدوء : شوق اختصري
فاطمه بعصبية : وش رايك ادخل كل المعازيم هنا ؟
الجده بهدوء : خلاص خبري بنات عمها وام مهند وحريم اعمامها ييجون يباركون لها هنا
وخلي هالليله تعدي على خير
فاطمة بضيق : كيف تطلعين والحفله بعدها ما بدأت
وليه من الاصل تيجين على القاعه كان رحت على بيتك احسن لك
كذا تفشلينا مع الناس
شوق بعناد ؛ يمه اختصار للشر ما اطلع قدام الناس
لاني ما اضمن نفسي
وبما انه المعاريس ما رح يدخلون فما له داعي دخولي اصلا
خزتها فاطمه بتوعد : وقسم بالله لولا انه اليوم عرسك
والا كان لي معك تصرف ثاني
شوق بلامبالاه : خلاص يمه قفلي على الموضوع
الجده اختصار للمشاكل : خلص يا فاطمه اتركيها على راحتها وقولي لربعنا من الحريم يباركون لها هنا
فاطمه زمت شفايفها بقهر ومشت خطوتين بس وقفت لما شافت ام صقر داخله ومعها ياسمين
رجعت للخلف خطوه وناظرت شوق والجده بدون ما تتكلم
ام صقر دخلت وهي رافعه خشومها
وسلمت على فاطمه والجده ببرود
وتقدمت ومدت يدها باتجاه شوق
رفعت شوق نظرها ورفعت يدها حتى تسلم وهي جالسه وماده البوز
ام صقر تحس ببركان رح تنفجر باي لحظه وهي تشوف نظرات شوق
ياسمين سلمت بهدوء وباركت لشوق
حست بالفشيله لما طنشتها شوق وما ردت عليها
ناظرت ام صقر ياسمين واعطتها نظره شماته
حاست ياسمين بوزها وطنشت نظرات امها وتكلمت تبغى الحفله تمر على خير : يالله ما بقى شيء على الزفة
فاطمه ردت بسرعه لما شافت ملامح شوق المعترضه : بس دقايق
ياسمين : ان شاء الله
دخلت مريم واميره ومنال بابتسامه
اميره ناظرت شوق : يالله عجلي ما بقى وقت على الزفه
منال مسكت يدها وسحبتها برقه وما تركت لها مجال للاعتراض
ام صقر وهي تغلي من الداخل
وهي تناظر شوق
اما شوق حاسه بنظراتها بس طنشتها
وزادت من عيار الدلع حتى تقهرها
.....
....
.....
....
جالسه على الكوشه وهي تحس بالاحراج والحريم عيونهم
متوزعه عليها وعلى خطيبه ساري
تحس نظرات الإعجاب كلها متسلطه
على خطيبه ساري
تحس دمعتها بطرف عينها
هذا للي كانت خايفه منه
ناظرت خطيبه ساري
عيونها واسعه ملونه انفها صغير ،
فمها متوسط، شفايف مليانه ،
وجهها دائري، بيضاء
عضت على شفتها بقهر ما في وجه
مقارنه بينهم
سميه وكأنها لعبه
اكيد رح تجلب انظار الناس لها
رفعت نظرها على صوت اميره : ابتسمي يا قمر
ابتسمت شبح ابتسامه واتبعتها بزفره ضيق
رجعت نظرها وهي تشوف ام صقر
عند خطيبة ساري وما عبرتها
هزت راسها بتوعد الا تطلع كل هالحركات من عيونها
شريفه بابتسامة فرح اشرت لشوق تبتسم
ناظرتها شوق ولوت بوزها بقرف وكأنها ناقصيتها
شريفه حست بالفشيله وما تدري لمتى تعاملها شوق بذي الطريقه
وقفت فاطمه وهمست لشوق : وش فيك بوزك شبرين ؟؟
شوق بنفاذ صبر : خلاص زفه وانزفيت ابغى اطلع
فاطمه : بس شوي وتطلعين
وبهتت ملامحها وهي تشوف للي متوجه باتجاه الكوشه
ناظرت ام رائد وبلعت ريقها
**
**
**
**

توجهت لجهة الكوشه والهدوء يغلب على القاعه الا من همسات الحريم
ما في رنه ولا رقصه
وقفت على الكوشه بعصبيه وصوتها يلعلع : حشى حنا داخلين على عزاء ؟؟؟!!!
بسرعه شغلوا خلينا نرقص ونفرح
هذي حفيدتي ولازم افرح فيها غصب عن الراضي والزعلان
واقتربت تسلم على شوق
ناظرتها ام صقرباحتقار وبنفسها مالت عليك وعلى حفيدتك
ام عمر ناظرت ام رائد : وين العريس ؟؟؟؟
ما اشوفه هنا
بسرعه اتصلي فيه ييجي ابغى اشوف زوج حفيدتي
فاطمه تحس بالاحراج قدام اهل العريس
تكلمت بنبره رجاء ضعيفه : يمه
ناظرتها ام عمر بخيبه : انت ؟!!!
حسبي الله عليك
يالعاقه ...
تزوجين شوق وما تخبريني ؟!!!
توصل فيك الحقاره لذي الدرجه !!!
انا أمك ما تعزميني !!!!
ترى السواق والشغاله هالايام ينعزمون ...
وانا امك اخر من يعلم!!!
كل هالمعازيم الموجودين اهم مني تعزميهم !!!
يقولون امك ثم امك ثم امك
وانت ما كلفت نفسك جوال تتصلين فيني وتعزميني !!
ما ابغى تيجي البيت وتعزميني
على الاقل اتصال يا قليله الاصل
انا امك من لحمك ودمك
تعملين فيني كذا ؟؟!!!
هزت راسها باسف انا ادري كله من تحت راس الخبيث ناصر
مسكتي فيه وتركتيني خله ينفعك
يا خساره الحليب للي رضعتك اياه
لو شربتهن للكلب رح يكون اوفى منك
ام رائد باحراج : يمه مو وقت هالسوالف
طنشتها ام عمر وناظرت سميه : هذي عروسه عم العريس ؟؟
الجده بقهر ناظرتها بعد ما تكلمت على ولدها ناصر : ايه واسمها سميه
لوت ام عمر بوزها بقرف : وش هالاشكال للي مناسبينهم ؟!!!
ام صقر تقدمت خطوه وبعصبيه : احترمي نفسك واحترمي المكان للي واقفه فيه فاهمه
ام عمر حركت راسها باستهزاء : لا مو فاهمه
ام العروس بحده : احترمي شيباتك
قاطعتها فاطمه بعصبيه والدموع بعيونها : إلزمي حدك
كلمه وحده عن امي اقلب القاعه فوق
رأسك
ام صقر : شوفي امك بالاول خلها تثمن
كلامها وبعدها ..
قاطعتها شوق وهي واقفه والشر بعيونها ناويه تمسح الارض بأم صقر
وتستغل الفرصه بوجود المعازيم حتى تفشلها : جدتي تعرف تحترم للي يحتاجون احترام
ام عمر نفخت صدرها : عفيه عليك
ام رائد خافت تصير مشكله وما تحمد عقباها : شوق اختصري و ارجعي مكانك
شوق وهي راكبه راسها : ما ابغى اختصر واتركيني اراوي هالحثاله قيمتهم
ام صقر والشرار يطلع من عيونها : صدق انك ناقصه تربيه يا حقيره
ياسمين بعصبيه : ما احد حثاله غيرك
الجده تناظرهم ما تدري وش تعمل
وهي تشوف نظرات المعازيم عليهم
ام عمر وهي تحط يدها على خصرها : اقول تلايطي من هنا احسن لك شكلك مثل المومياء
شمس بردح : انقلعي برا والله ما احد
غيرك مومياء
ام عمر : هذا الناقص بزران مالت عليك انت والازرق فوق عينك كأنه ملاكم ضاربك
شوق وهي تردح : انت للي تنقلعي فاهمه
ام صقر بتهديد : الحين رح اتصل فيه
وخله يتفاهم معك
مو يتفاهم خله يطلقك
قبل ما ترد شوق سحبتها ام مهند وبعصبيه : يكفي فضايح
ام عمر تبغى النار تولع تناولت كأس مويه وكبته بوجه ام صقر
صرخت ام صقر بعصبية وكل المعازيم يناظرون واكثرهم كتم ضحكته
ياسمين طلع لها قرون من وقاحة ام عمر
اقتربت منها تبغى تضربها
وقفت ام رائد بوجهها وبتهديد : مدي يدك اشوف علشان اكسرها
ياسمين والغضب اعمى عيونها ضربت ام رائد على وجهها : خذي امك العجوز وانقلعي برا
شوق تبغى تقوم بس عليها حراسه مشدده من ان مهند ومنال واميره ومريم
ام صقر وهي تحس نفسها احتاست من المويه : تستاهلين
وسرعان ما صرخت لما شافت ام عمر هجمت على العروس سميه تضرب فيها
ومسكتها من التسريحه
ابعدوا ام عمر عن سميه بعنف
وام عمر تتحسب عليهن
والعروسه سميه تبكي كيف خربوا حفلتها
تدخل اطراف خارجيه وابعدوهم عن بعض
وكل عروس دخلوها غرفه تنتظر العريس
اختصار للمشاكل

...
...
...
...
...

ام رائد تهمس لفاطمه : شفتي امك خربت العرس وهربت
فاطمة عضت على شفتها بقهر: اقسم بالله شيء يقهر
المشكله ما تقدرين تشوفينهم يبهدلونها وتسكتين مع انها الغلطانه
هزت راسهاام رائد بالموافقه
وناظرت الجده للي تكلم شوق : ما تستحين على وجهك ؟؟
تراك عروس وتقومي تردحي
لو وصلت السالفة لنايف صديقيني الا يطلقك وانت على الكوشه
شوق بقهر : مين ماسكه الحين ييجي ويطلق
ام مهند بحده : وش هالكلام ؟؟
تخسرين زوجك علشان كلام مثل هذا
ولا تنسي ترى جدتك هي للي بدأت بالغلط
المفروض كنت محايده تراك عروس مو من المعازيم

سكتت شوق ما عندها شيء تقوله

قاطعهم دخول مريم وهي تتكلم : العريس وصل
صار قلب شوق يضرب طبول من الخوف
والافكار السوداء عشعشت براسها
اكيد جاي يطلقها
بعد ما سمع الكلام ...
غمضت عيونها مو قادره تتحمل الطلاق بهذي اللحظه
وش يقولون الناس عنها ؟!!!
دخل نايف بخطوات متزنه ومعه ياسر وناصر
وقف جنبها بعد ما سلم عليها وعيونها بالارض ومشاعرها مختلطه بين الخوف و الحياء
طالع نايف الموجودين واستغرب ولا في احد من اهله
موجود بالغرفه حزت في باله وحطها بقلبه حتى لو جدته ام صقر ما تحبها على الاقل علشانه تحضر وتيجي تبارك له
وكأنه مقطوع من شجره
تنهد وهو يناظر ناصر للي يوجه الكلام له وبحرص : حطها بعيونك تراها غاليه علي
رد نايف مجامله وهو اصلا ما يطيق ناصر بس مجامله : ان شاء عمي
ياسر بابتسامة : خلاص ليه واقفين خذ عروستك
ومع السلامه
واتبع كلامه بضحكه قصيره
رد عليه نايف بابتسامة وما تكلم
تنهدت شوق براحه وهي تحس انه نايف ما عنده علم بالسوالف
وقررت تقلب الموقف لصالحها

**
**
**
**

دخلت السياره بمساعده نايف وياسر بعد ما سلمت على اهلها وعملت فلم وهي تبكي
ما توقعت بيوم تبكي علشان رح تفارق اهلها
كانت تستغرب تصرف البنات يوم العرس لما يبكون
بس الحين ما تدري غصب عنها شيء خلاها تبكي
كيف تفارق اهلها عاشت معهم 20 سنه والحين
تنتقل لحياه جديده
جالسه بالسياره تنتظر وهي تسمع توصيات ناصر وفاطمه عليها
وكل شوي فاطمه ترجع توصيه على شوق ودموعها اربع اربع
تأفف نايف بقلبه من هالتوصيات حتى لاخر لحظه مصرين يغثوه
ما خلص من توصيات ناصر وفاطمه الا يبدأ بالموشح مره ثانيه ياسر ووليد وخالد وسامي
كان يهز راسه علشان يخلص منهم قرفوه لاخر لحظه
فتح عيونه بفجعه لما قال ياسر ؛ يالله علشان نوصلكم للفندق
قاطعه بفجعه الحين وش يخلصه منهم عند الفندق رح يعملون فلم التوصيات مره ثانيه رد بسرعه : ما له داعي
تراني ادل الطريق
ضحك ياسر على رد فعل نايف وبعدها سلم عليهم نايف بسرعه وركب السياره وحرك بسرعه
قبل ما احد يوقفه
**
***
**
ام صقر بقهر باين على ملامحها وللحين مقهوره من اهل شوق : كيف كذا تطلع من القاعه بدون ما احد يدري او تخبرونا ؟؟
الجده مو عاجبها تصرفات ام صقر مع شوق : تتكلمين وكأنه مهتمين كثير لامرها
دخلتم عند سميه ولا عبرتم شوق
خليني ساكته احسن
طالعتها ام صقر وملامحها معصبه وتركتها وهي تبحث عن اسم نايف وسرعان ما اتصلت فيه
عفست ملامحها بقهر لما اعطاها مغلق
توجهت لاسراء : حسبي الله عليها فشلتنا بالحفله
و الحين سرقت منا نايف حتى ما تركت لنا مجال نبارك له ؟
اسراء بهدوء ناظرتها : عادي الحين اتصل بمحمد يأخذك للفندق وتباركين له
ام صقر بحقد : الله يأخذها ويريحني منها
حسابه بعدين نايف اخذها وحنا يا غافلين لكم الله
اسراء بهمس : الحين مو وقت تصفية حسابات
هزت راسها ام صقر وبداخلها بركان
ناظرت فاطمه وهي داخله وهي ماسكه نفسها ما تروح وتمسح فيها الارض تحس بيوم وليله اخذوا حفيدها قلبها منهاحتى وصل لدرجه يغادر القاعه بدون ما يباركون له اخذت نفس عميق تخفي قهرها
**
**
**
دخلت خلود القاعه وهي رافعه حاجب بعد ماراح المعازيم وجلست عند اول طاوله وطالعت دانا للي جلست مقابل لها : الحمد لله انقلعت
دانا لوت بوزها : بقلعتها مع اني كان نفسي اشوف شكلها كيف طلعت
مريم من خلفها سمعت كلامهم جلست معهم و بانتقاد : ترى ما حد ينقد عليك لو باركت لاختك
جالسه بغرفه ثا
قاطعتها دانا مو ناقصها فلسفه زايده : انا ما اطيق وجهها علشان اروح ابارك لها
خلود بشماته : سمعت انها رفضت بالبدايه تنزف اكيد رفضت تنزف علشان ما تضحك الناس عليها
مريم ناظرتها وهي رافعه حاجب : ليه تضحك الناس عليها؟؟
ما شاء الله عليها مثل القمر
قاطعتها خلود : ما اتوقع توصل لزوجة ساري
دانا بسخريه : وين وجه الشبه بين الثرى والثريا
مريم زمت شفايفها بضيق : على الاقل شوق اذا ما وصلت لجمال خطيبه ساري
للمعلومه تراها احلى منكن والكل يعرف هالشيء يعني
ما له داعي هالكلام السخيف
الله يوفقها ويسعدها
خلود ناظرت مريم وحاست شفايفها ما عجبها الكلام
بس اضطرت تسكت لانه كلام مريم صحيح
قاطعتهم اميره وهي تجلس على نفس الطاوله
وناظرت دانا وخلود باستغراب : ليه ما باركتم لشوق وما حضرتم الحفله
وبنغزه
فاتكم لو شفتوها ما شاء الله تجنن
يا خساره هالجمال ما شفتوه
خلود ودانا ناظروا بعض وما عجبهم الكلام بس ما علقوا
اميره وهي تناظر مريم : اول ما دخلت غرفة العروس دخلت ادور على بنوته لابسه بيجامه بيتيه ههههه توقعت شوق تعملها وتلبس يوم عرسها كذا هههه
بس بصراحه انذهلت لما شفتها تبارك الرحمن
ابتسمت مريم بنعومه : الله يوفقها
وقفت اميره ومسكت يد مريم وسحبتها برفق : تعالي نروح عند منال
تنتظرني
وابتسمت
ردت مريم لها الابتسامه لاميره ووقفت معها
مريم بهمس بعد ما ابتعدوا : عجبتيني بكلامك تستاهلين بوسه على راسك
اميره بضحكه قصيره : ههه
حبيت اقهرهم مو لذي الدرجه الحقد !!!
خاصه دانا هذي اختها ؟!!!!
مريم بنبره هاديه : الله يهديها
اميره بهدوء : امين
***
***
***
***
***
محمد بعصبية : وين تروحون الحين ؟؟
ام صقر بعصبية اكبر : اقول لك وصلني للفندق وما عليك
محمد بعناد : لا
ام صقر بقهر : وديني خليني اقول له
عن بطولات زوجته بهدلتنا قدام المعازيم هي وجدتها
محمد حرك السياره بهدوء : يمه كلام حريم لا تتدخلينه بحياته الجديده
شي صار وانتهى
ام صقر بتوعد : لا ما انتهينا انا وشوق والزمن طويل
زفر بضيق من كلام امه: الحين خلينا نرجع للبيت وبعدها يحلها ربك
ناظرته تعترض تكلم قبلها : لو على جثتي ما اروح الفندق الحين
طالعته بقهر ولفت وجهها لجهة الشباك

ناصر بعصبية : وقسم بالله لو امك تكرر هالحركه ما يصير خير
ياسر يهدي الوضع : خلاص يبه حصل خير
ناصر بعصبية اكبر: اي خير ؟؟!!
ربك لطف والا كان رجعت اختك اليوم مطلقه
والسبب جدتك
فاطمة بقهر حتى لو كانت أمها غلطانه ما تحب احد يتكلم عليها
لانها بتبقى امها : خلاص سالفه وانتهت ..
ليه نعيد ونزيد فيها ..
وانت وش عرفك بسوالف الحريم ؟!
والا حاطين جواسيس علينا ؟!
ناصر وهو يمسك نفسه : اختصري يا فاطمه
ترى الغلط لابسك انت وامك واختك
فشلتونا عند الجماعه
ناظرته بصدمه : الحين انا واهلي فشلناكم ؟!
ياسر متوهق بينهم : يمه ابوي ما يقصد
شيء
فاطمة بقهر ناظرتهم وتركتهم وطلعت على جناحها
مسح ناصر وجهه بيدينه بعد ما زفر بضيق
فارس بهدوء : تعوذ من الشيطان
ولا تلوم خالتي فاطمه تراها تبقى امها
وانت تعرف ام عمر غنيه عن التعريف
الشر والفتنه يمشي بعروقها
اعطى ياسر لفارس نظره قويه وتركهم وطلع لغرفته لأنه لو جلس ما يضمن نفسه لأنه رح يمسح الأرض بفارس
الجده جالسه تناظرهم : وبعدين مع هالنكد للي ما يخلص ؟!!
طالعها ناصر وما رد وطلع لفوق
اما فارس توجه لعند جدته وامه وجلس عندهم : كل هالمشاكل بسبب هالشوق
وعفس ملامحه بقرف
الجده : فارس ما له داعي هالكلام
شريفه للحين مقهوره من حركه شوق فيها بالحفله : سبحان الله احس شوق وام عمر فوله وانقسمت نصفين
الجده بترقيع : بعدها شوق صغيره باكر تعقل
فارس قاطعها : دوم ترقعين عنها
وكأنك ما تعرفينها الحقد يسري بدمها
الجده بنغزه : لا تتكلم عن الحقد
شوف زوجتك واختك دانا ما حضروا الحفله وش تسمي هذا التصرف ؟؟
فارس ابتسم :حريه شخصية
ما يبغون يحضرون ويغثون انفسهم
بشوفتها
طالعته الجده وما عجبها رده
وقفت ولوت بوزها : الحكي معك ضايع
وتركهتم متوجه لغرفتها
شريفه ناظرته : خف على شوق شوي
قاطعها : ما رح ارتاح الا لما اذوقها المر
واخليها تدفع الثمن غالي

**
**
**
**
**
**
نزلت بابتسامه باتجاه الصاله : صباح الخير
ام صقر والتعب والارهاق باين على وجهها : صباح النور
ياسمين جلست جنبها : تعابنه ؟
ام صقر: ما نمت الليل من القهر
طول الليل اتصل على جواله يمكن يفتحه وابرد حرتي فيها
ياسمين : يعني وش رح يطلع بيده الحين ؟؟
وبنبره استهزاء اكيد رح يقول لك سالفه وانتهت
ام صقر استبعدت الفكره : نايف ما يعملها ورح يحصل حقنا من زوجته
واهلها المتخلفين
ياسمين بلامبالاه : نشوف وش يطلع بيد حفيدك
ام صقر وهي تناظر للبعيد : رح تشوفين وش رح اعمل
**
**
**
**
**
**
واقف عند الشباك يكلم بالجوال ويعتذر : والله نسيت الجوال مقفل
ام صقر : لا الظاهر نسيتنا ولا عدت تعرفنا
نايف : الله يسامحك انسى نفسي ولا انساكم
ام صقر بزعل : ايه واضح
والدليل اخذت عروستك وحنا مو موجودين ولا انتظرت حتى نيجي
نايف رفع حاجب : انا للي لازم ازعل
ادخل عند عروستي وما اشوف احد منكم
وكأني مقطوع من الشجره
ام صقر : قول لاهل زوجتك دخلوك ولا احد خبرنا
استغلوا الفرصه بعد سواد وجههم
عقد حواجبه باستغراب : سواد وجههم ؟!!!
ام صقر : ايه سواد وجههم ما قالت لك حرمك المصون إنه أهلها ضربوا زوجه عمك ساري ؟؟
قاطعها بعدم تصديق : وش تقولين ؟!!
متى صار هذا الكلام ؟؟
وناظر شوق للي وجهها الوان واقفه تناظره وهو يتكلم
كملت ام صقر : اذا مو مصدق
المعازيم كلهم
قاطعها : مصدقك يمه
واعطى شوق نظره توعد
وتابعت ام صقر كلامها : ويا ليت بس كذا عملوا
جدتها وامها وخالتها تخيل شتمونا قدام المعازيم
وما احترمونا !!
وجدتها كبت المويه علي قدام المعازيم
رجع ناظر بنظرات توعد
بلعت شوق ريقها وهي تشوف نظراته
نسيت تخبره بالموضوع بطريقتها
وما تدري وش هببت ام صقر عليها
بس الظاهر ملحت وبهرت
عضت على شفتها ورفعت نظرها
لنايف وهو يكلم امه : وش صار بعدين
ام صقر بانتصار وصلت لمربط الفرس : و زوجتك المصون تقول حنا حثاله
وقامت تردح لنا وتبغى تضربنا
فشلتنا قدام المعازيم
فتح عيونه بصدمه وناظر شوق
بنظرات ناريه