رواية بنت بنوت الفصل الخامس 5 - بقلم محمد مالك

شيماء: أنا عاوزة أعرف أنت أخدت مفرش السرير ده إزاي؟ حجازي: ما أنا قولت لسيادتك إني لقيته جوه كيس الزبالة، عدم لا مؤاخذة، اللي الباشمهندس مدحت جوز حضرتك أدهولي. شيماء: الكلام ده كان يوم الصباحية، صح؟ حجازي: أيوه. حتى أنا بصراحة قولت أرزل وأخبط عليكم يوم الصباحية، يمكن العملية ترزق ببحتة جاتوه، بحتة لحمة من بواقي الفرح. ولما

خبطت فتح الباشمهندس وقالي: "جيت في وقتك، خد الكيس ده وعاوز الدبان الأزرق ما يعرفلوش طريق". بصراحة أنا استغربت، وفي نفس الوقت قلقت. قلت لنفسي: هو الكيس ده جواه إيه بالظبط عشان الباشمهندس يقولي أخفيه بالطريقة دي؟!!

وأدالي 200 جنيه مرة واحدة. بس أنا بصراحة مرمتش الكيس زي ما قالي. أخدته وروحت على البيت وبفتح الكيس لقيت مفرش السرير ده. وساعتها استغربت أكتر. هو ده اللي الباشمهندس عاوزني أخفيه والدبان الأزرق ما يعرفوش طريقه!! قلت يمكن بيهزر ولا حاجة. بس أخدته وفرشته على السرير زي ما حضرتك شايفة. شيماء: أنت غسلت المفرش ده؟ حجازي: آه طبعًا. شيماء بغضب: ليه يا غبي!! حجازي: أومال لا مؤاخذة أفرشه على السرير من قبل ما يتغسل!! إزاي يعني؟

شيماء: أنا مستقبلي كله كان في المفرش ده!! حرام عليك بجد.. حرام. حجازي مندهش: مستقبلك في المفرش؟ أعدم لوزة لو كنت فاهم حاجة!! ع العموم لو عاوزة حضرتك المفرش اتفضليه، المفرش سليم وربنا وما اتفرش غير مرة واحدة بس. شيماء بحزن شديد: أنت حمار ومش فاهم حاجة. حجازي: طب فهمني يا دكتورة، ينوبك ثواب. شيماء: هو فيه حاجة تاني كانت في الكيس غير مفرش السرير؟

حجازي: الحقيقة آه.. كان فيه ورقة مكتوب فيها كلام كده، بس أنا عدم لا مؤاخذة لا بعرف أقرا ولا أكتب. شيماء: فين الورقة دي؟ حجازي: امممم.. تقريبًا أديتها للبت لوزة تلعب بيها. يا بت يا لوزة. لوزة: أيوه يا با. حجازي: فين يا بت الورقة اللي أديتهالك تلعبي بيها امبارح؟ لوزة: ورقة؟ حجازي: أيوه الورقة يا بت الكلب اللي طلعتها من الكيس الأسود مع مفرش السرير. لوزة تخرج ورقة ممزقة من جيب البنطلون الذي ترتديه. لوزة: أهه. شيماء تمسك

بجزء الورقة وتقرأ ما فيها: "أقر أنا مدحت بأن زوجتي شيماء…" شيماء: زوجتي شيماء إيه؟!! شيماء تتذكر شيئًا ما ثم تقول بلهفة وتوتر: أنا عاوزة باقي الورقة دي ضروري.. فين باقي الورقة دي؟ حجازي: هو إيه المكتوب في الورقة دي، عدم لا مؤاخذة؟ شيماء: وأنت مال أهلك!! ثم تنزل إلى لوزة وتخاطبها بكل لين: لوزة يا حبيبتي قوليلي باقي الورقة دي فين وأنا هاجيبلك هدية كبيرة أوي. لوزة: بجد يا طنط؟ طب أنا عاوزة طيارة.

شيماء: هاجيبلك طيارة كبيرة أوي وهدوم كتير، بس قوليلي فين باقي الورقة دي. لوزة: باقي الورقة دي. شيماء: أهـــــــــــــــــــــــــــــــــــــــــــــــــــــــــــــــل. لوزة: اممممممم.