رواية بنت بنوت الفصل الرابع 4 - بقلم محمد مالك

شيماء وصحبتها ريم يذهبان إلى منطقة لتجميع القمامة. ريم مندهشة: إيه المكان اللي انتي جايباني فيه ده؟ الريحة وحشة أوي هنا! شيماء: ده المكان الوحيد اللي ممكن ألاقي فيه حجازي. ريم: مين حجازي ده؟ شيماء: حجازي ده الزبال اللي بيجي عندنا في البرج. ريم: وإنتي عاوزة إيه من حجازي ده؟ شيماء: ألاقيه بس وهتعرفي كل حاجة. ريم: أعرف إيه بس أنا حاسة إني هرجع من الريحة الفظيعة دي! شيماء تستوقف أحد الزبالين: لو سمحت حجازي فين ألاقيه؟

الزبال: حجازي مين عدم مؤاخذة؟ هنا فيه تلاتين حجازي. حجازي محمود، حجازي عبد السلام، حجازي أبو نورة، حجازي متقال، هههههه وغيرهم كتير. شيماء: أنا عايزة حجازي بتاع برج الأندلس اللي في الهرم. الزبال: آه.. يبقى إنتي عاوزة حجازي أبو لوزة. شيماء: أيوه هو ده. أبو لوزة فين بقي؟ الزبال: وعايزاه في إيه عدم مؤاخذة؟ شيماء: وإنت مالك بقي! عايزاه في حاجة وخلاص. الزبال يفرك في رأسه: أها.. هو لطش منك حاجة ولا إيه؟ شيماء:

يا عمي مالطش مني حاجة. أنا عايزاه في موضوع كده. الزبال: إيه هو الموضوع ده بالظبط؟ هوانم شيك زيكم كده يعوزوا زبال معفن زي ده في إيه؟ أكيد سرق منكم حاجة. ريم: هو إنت رزل كده ليه يا أخ انت؟ قولنا هو فين وخلاص. الزبال: على مهلك طيب متزقيش! هو عامل حادثة ومتجبس وقاعد في البيت مبيخرجش. ريم: طيب ما تقول كده من الصبح.. وساكن فين أبو لوزة ده؟ الزبال: تعالوا معايا. وعندما يصلون إلى المنزل. شيماء بتعجب: هو ساكن هنا؟ الزبال:

آه.. عدم مؤاخذة المنطقة مش قد المقام.. معفنة زيه.. ما هو زبال بقي.. ههههههه.. يا بت يا لوزة.. إنتي يا بت يا لوزة. لوزة فتاة صغيرة عمرها ٥ سنوات تنظر من شباك صغير. لوزة: أيوه يا عم سيد. الزبال: أبوكي متلقح فوق؟ لوزة: أيوه. الزبال: طيب الهوانم دول عاوزينه.. اتفضلوا يا هوانم.. إنستوا وشرفتوا. شيماء: إنت رايح فين؟ الزبال: هطلع معاكم. شيماء: لا شكراً اتفضل حضرتك. الزبال:

ليه ما أطلع معاكم.. لأحسن الواد حجازي ده رزل أوي ممكن يرزل عليكم ولا حاجة. شيماء: لا متقلقش.. اتفضل. ثم تعطيه بعض النقود. الزبال: من إيد ما نعدمها يا ست هانم.. اتفضلوا وأنا هستناكم تحت. ريم: إنت مصمم بقي؟ وتصعد شيماء وريم إلى منزل حجازي. وبمجرد دخول الشقة تصطحبهما لوزة إلى غرفة والدها حجازي الذي يرقد على السرير. حجازي: اتفضلوا يا هوانم. حجازي يرتبك عند مشاهدة شيماء. حجازي: ست شيماء! شيماء: إزيك يا حجازي أخبارك إيه؟

حجازي: أنا.. أنااا.. أنا تمام زي الفل.. اتفضلوا.. اتفضلوا.. هاتي كرسي يا بت يا لوزة. شيماء: ألف السلامة عليك يا حجازي. حجازي: الله يسلمك يا ست الكل.. حادثة بسيطة كده الحمد لله.. تشربوا إيه؟ شيماء: ولا حاجة. شيماء تلمح الملاءة المفروشة على سرير حجازي. شيماء: إيه ده؟!! حجازي: إيه يا ست الكل.. فيه حاجة ولا إيه؟!! شيماء: الطقم ده بتاع السرير بتاعي كان مفروش عليه ليلة دخلتي!