رواية بنت فوق الثلاثين الفصل الأول 1 - بقلم ميرفت السيد

عديت التلاتين. قالي: بتتعوجي ليه انتي فوق الـ 30؟ حدفته بأقرب حاجة لايديا، دباسة الورق، ومجتش فيه. سحبت شنطتي وقلت له: ليك عين تعايرني؟ عالأقل أنا باكافح باحترامي وشرفي، وانت بقى مراتك ست جميلة ومحترمة وانت شغال بفلوسها ياخاين! عاوز تتجوز عليها وتقهرها؟ ربنا ياخد أمثالك. ده انت قد أبويا، عيب عليك. روح حج يا أبو البنات، خليته فرجة للناس. رد عليا: قلت له لا، أنا اللي سايبالك.

وسبت شغلي اللي كان ساند معايا، ولأن معاشنا قليل، بس أمري للّه. اتجوزتش، وإيه يعني؟ عادية. هو الهدف من الحياة بنظر الناس عبارة عن جوازة وبس؟ الستر جواز، النجاح جواز. طب ليه نحشي عقول البنات إن ملخص وهدف حياة البنت جوازة، وياريت لو تبقى عريس غني؟ أنا بقى دماغي مختلفة. بابا تعب، كنت باراعيه لحد ما ربنا أراد إنه يختاره يرتاح من الحياة وتعبها. الله يرحمه. كان حنين. إخواتي متجوزين، بييجوا زي الضيوف. فاضل أنا.

وأخ صغير لا يعتمد عليه. دلوقتي ماما تعبانة، مين هايرعاها لو أنا اتجوزت؟ هي نفسها تفرح بيا، ولكن أنا عقلي هو اللي بيتحكم بحياتي. مافيش عريس بييجي ويخليني أحس إنه هايقدر ظروف أمي ويخليني أراعيها، ويقدر إن شخصيتي قوية. الكل عاوز يحجر عليا ويتحكم، وأنا لا. بارفض، بارفض، بارفض إني أكون مجرد زوجة والسلام. أنا عاوزة حد يشاركني، يعيش معايا، نتفق أو نختلف، بس نتناقش. محتاجة حد يكمل معايا الحياة ونكمل بعض. أعرفكم بنفسي.

أنا زينة، 33 سنة. بيقولوا حلوة وأقدر أتحمل مسؤولية، وتعليمي متوسط. بابا كان مطحون بجوازات إخواتي لحد الثانوي وقالي: كفاية، دي مقدرتي. اشتغلت، واديني أهو سبت شغلي في المعرض بتاع السيارات لأن صاحبه عاوزني زوجة تانية. وأنا ماشية وسرحانة وبافكر هعمل إيه لآخر الشهر، حسيت إني طايرة من عالأرض. وفجأة... حصل اللي هايغير حياتي.