رواية بنت غير شرعية الفصل الخامس 5 - بقلم سمسومة

نضت الصباح على 7 باه نقرى. شعلت فيا ماما: وين كنتي وقتاش دخلتي؟ قلتلها: مع الفجر. قاتلي: كلبتي علاه راجل نتي باه تدخلي هذا القيس؟ قتلها: وأنا علاه هذا شالقيت؟ قاتلي: واش لقيتي؟ ومنيش مأمناتك بلي خدمة. دعوة الشر إذا كاش ما راكي ديري، والله نغضب عليك ليوم الدين. قتلها: والله فالخدمة وراني نخدم في ريسطورون سرفوز. وكي نكملو نغسل الماعن ونسيق ونبلع ونجي.

وأنا في قلبي: يا ربي اغفرلي ويا ميمتي اسمحيلي، علابالي كون نقولك الصح متخلينيش. قاتلي: كيفاه هذي بزاف ونتي طفلة مجاياش تدخلي مع الفجاري؟ واش تهدر الناس؟ قلتلها: خليهم يهدرو لي بغاوها، مكاش لي راه يعطيلي ولا يصرف عليا. المهم أنا نخليكم، عندي قراية ديجا راني روطار. وخرجت رحت قريت. مع 2 تلاقيت سهام. قاتلي: واش درتي فيها؟ قلتلها: سافا، فاتت وقيلا قدرت نقنعها.

كملت القراية ورجعت للدار مع 6. جيت خارجة مخلاتنيش ماما. بقيت نحاول فيها. قاتلي: دعوة الشر فيك إذا راكي ديري في عملة خارجة الطريق. شعلت فيها: قتلتلها راني تربيتك، مكيش ثايقة فيا؟ وزعفت وخرجت تاني. حتى 9 فاتت ليا دلال وسهام رفدوني. قاتلي دلال: علاش تستناي هنا؟ حكيتلها قاع واش قلت لماما، ولازم نخرج على 6. كون نخلي ل 9 تفيق بيا. قاتلي: خلاص، مشات.

مع الوقت تعلمت الخدمة وعاونتي دلال وسهام. عطاوني حوايج من عندهم. تعلمت نمكيج وليت حتى ندخل للخدمة نلبس ونستيكي روحي كيما هوما. وكي نكمل ندوش ونلبس ونروح للدار. ماما مع الأول مخلاتنيش، بصح ممبعد اقتنعت، سيرتو كي سقسات عليا في الريسطورون لي قلتلها نخدم فيها وقالولها: ايه تخدم هنا.

أنا مكذبتش، بعثتني دلال عند واحد يخدم ثما. وليت على 6 نروح عندهم نغسللهم الماعن. والوقت لي نكمل 9 ولا 10 نشد طاكسي للبار نكمل خدمتي للصباح. نروح للدار نرقد هذوك الساعتين ونرجع نوض نروح نقرا.

خلاص قتلني التعب، بصح كي نشوف بلي الحمد لله مصروفي في جيبي، دوا ماما حاضر، مصروف الدار كاين. حتى خالتي بختة وحبست الخدمة فالديور. راها تتعاون هيا وماما يفتلو الطعام، يخدمو مسمن فطير كسرة ويحطوها عند واحد السوبيرات. الحمد لله يدخلو منها شوية مصروف.