رواية بنت غير شرعية الفصل السادس 6 - بقلم سمسومة

عندي قريب ستة أشهر خدمة فالبار، الحمد لله مازلت محافظة على روحي. مالقري الكلاب والطماعين بزاف، لقيت دلال في كتافي، معاونتني بزاف، يعطيها الصحة. شهور فاتوا الخدمة كانت قيس، تكثر غير فالويكاند ولا المناسبات، بصح دوكا دخل الصيف الخدمة يوميا تقريبا، من 11 نتاع الليل لـ 5 نتاع الصباح نبلعوا. دايرين دي قروب، كل قروب فيه 4 خدامين، فيه 3 بنات وولد. كل مرة دالت قروب، يبقى يفرز وينقي الحالة، يبلع ويروح للدار.

في هذي الفترة كان واحد الجون، فالحق يبان كبير شوية، ممكن حتى في الأربعين هكا، مرة مرة يجي تما يعمر راسو حتى يطيح، وما يقبل غير دلال تخدمو. يشرب حتى يولي يترامى، مرات جون يهزو يديه، مرات ميدو يشوفلو طاكسي يوصلو. كان ديما على هذا الحال.

اليوم جا، شرب شرب حتى طاح كاو فوق ذيك الطابلة. كملنا خدمتنا، ومن زهري القروب نتاعنا اليوم ينقي. لحقت 5، الناس كل خرجت غير هو طافي. عيينا نوضو فيه والو. قلنا خلي نقو ونخرجوه معنا برا، يندب راسو. شدينا كل واحد خدمتو. مع الديجي كان حبس، السكات ولى. التيليفون يصوني، شفنا لبعضانا، مش نتاعنا. عرفناه نتاع السيد، بقى غير يصوني وحد 10 مرات. راحت دلال جبداتو، لقاتو مكتوب "ميدو". هزت عليه، قال لها: "واش يوسف، وين راك؟

راني غير نعيط." جاوباتو دلال، قاتلو: "راه فالبار الفلاني وراه طافي." ولى يحاول فيها: "عيشي، إذا كاين كيفاه توصلوه لوطال الفلاني؟ قاتلو: "مانيش عارفة، اصبر نشوف." قال لها: "غير وصلوهلي، والله نخلصك لي حبيتيها." جات قاتلي: "وصلييه." قلتلها: "خليني منو." قاتلي: "هيا صحا ختي، هو داير معايا شحال من مزية." قلتلها: "على جالك برك هدرت مع هذاك." قال لها: "خلاص، شوية نعاودلكم."

وعيطت لميدو، هذا طاكسيور يخدم معانا، جا تعاونو. ركبوه وركبت. حنا فالطريق عاود صونا التيليفون، هذا يوسف. رديت، قتلو: "قريب نوصلو." قالي: "كي توصلي، حوسي على واحد واسمو عمر، فالغيسابسيون، قوليلو أنا لي بعثني سي محمد." قتلو: "صحة." غير وصلنا، دخلت وحوست على عمر. قتلو: "بعثني ليك سي محمد." قالي: "وينو سي يوسف؟ قتلو: "ها هو فالطاكسي." خرج، خلص ميزو، وخرج يوسف. جيت رايحة نركب. قالي: "مدام، وين؟ قلتلو: "رايحة، خلاصت خدمتي."

قالي: "لالا، قالك سي محمد استناي." قلتلو: "معندي علاش نستنى." بقى يحاول فيا: "صحة ختي، متلعبيليش بخبزتي، والله يحاوزوني على جالك." هو صح، يبان مدرهم. كان كي يجي عندنا ديما من وراها تخرجني دلال نفطرو، نشرو حوايج. تقولي: "تهلى فيا، مالقري جامي طلب منها." بقى يحاول فيا: "صحة ختي، متلعبيليش بخبزتي، والله يحاوزوني على جالك." هو صح، يبان مدرهم. كان كي يجي يوسف عندنا، دلال ديما تخرجني نتغداو ونشرو الحوايج.

تقولي: "يوسف، تهلا فيا." مالقري ولا مرة طمع فيها ولا دومونداها باه تبات معاه. طلعناه لسويت نتاعو. دخلناه. فوتو عمر طول للدوش، وحل عليه الما باش يفطن شوية. قالي: "راني رايح، ونتي استناي معاه." قلتلو: "حبس، كيفاه نستنى معاه؟ قالي: "متخافيش، ضوك يجي سي محمد، وأنا شوية ونجي. ضوك نبعثلك قهوة شربيهالو." هو خرج، وأنا بديت نضرب في راسي. يا ربي شا هذا النهار؟ راه باين من صباحو. راه قريب 7، وينتا ندخل للدار؟

بقيت نفرغ عليه فالما باه ينوض. شوية سمعت الباب تفتح، جريت حسبت عمر رجع. لقيتو جون طويل أبيض، عينيه بنيين، شعرو أسود ممشوط على الشعرة. لابس سروال جين وشوميز بلون شباب. قاع شا كاين، فوطو كوبي نتاع هذا يوسف برك. يوسف قرونطاي، وهذا رقيق شوية. سقساني: "وين راه؟ شريتلو بيدي الدوش، دخل عندو. بدي يكفر ويسب فيه: "على جال قحبة هايم من بار لبار، هي زوجت وفرخت، ونت شاطر على جالها؟

نوض يا فرخ، راه عندنا رينيون مع الطاليانيين على 9." وطايح فيه ضرب ويقيس عليه فالما. بالسيف لاناض، يداوح منا ومنا، جا فوق السرير وتسطح. عاود عيط عليه محمد: "نوض، راها 8." قالو: "ضوك النوض." حتى لمحني. قالي: "شكونك؟ متقوليليش بايتة معايا البارح؟ واش حشمت من خوه. فتح قجر بحذاه، جبد دراهم، رماهملي. حسيت روحي رخيسة، منسواش. هزيت ساكي وجيت خارجة. شدني محمد من يدي، لقى دموعي. قال لي: "اسمحيلو، مهوش واعي." جا يمدلي دراهم.

قلتلو: "لالا، صحا، درت مزية لصحبتي، مش ليكم." قال لي: "صحة. هاكي كارط فيزيت نتاعي، إذا احتجتي أي حاجة عيطيلي." خرجت نجري من اللوطال. حسيت روحي مخنوقة، مجيفة. جيت على الطريق ونشم فالهواء، وريحة البحر، ودموعي يسيلو. مزية صباح بكري مكاش الناس، الطريق فارغة.