رواية بنت غير شرعية الفصل السابع عشر 17 - بقلم سمسومة

نسقم في الفراش، قالي: "هيا نهبطو، ممبعد كملي." هبطنا، من زهري لقيناهم كامل تم. النساء. سلمت على الكبار وعلى أميمة وهذوك. لالا، ذيك مروة، هي وريتاج رافدين روسهم لفوق لفوق، تحسب حاشاكم ميخراوش. وهذيك أمال غير نتفادى فيها، كل مرة تشرلي وأنا مطفية. قاتلي دلال: "اخطيك منها، حابة تشريلك المشاكل مع يوسف." مالا درت عليها ومطفيتها. حتى نطقت عجوزتي الصغيرة زينب: "الناس كي جي خارجة تقول رايحين لبلاصة فلانية باش منتقلقوش عليكم." قاللها: "تقلقي على ولادك، ياسر عليك. عندي ميمتي وعلابالها وين كنت." حتى نطقت مرت عمو سليمة: "نتا علابالنا خدام، وهذي علاه ديتها معاك؟" قاللها: "هذي مرتي، وين نكون تكون. ومعندك مدخل. عسي بناتك بزاف عليك." يا حوجي، كيفاه يهدر معاهم! ديما يقصفهم، بصح هما والو ميحشموش. كمل، قالي: "اطلعي لبيتك." قاتلو سليمة: "علاه، خليها راها قاعدة معانا، مراحش ناكلوها." شاف معايا، قالي: "بيتك، مكالاه نعاود." طلعت، وهو خرج.