رواية بنت غير شرعية الفصل الثامن عشر 18 - بقلم سمسومة

طلعت لبيتي لقيت الخدامة دخلت عندي. قالت لي: "نغسل الحوايج الموسخين؟ قلت لها: "دي غير حوايج يوسف وحوايجي، خليهم ذوك نغسلهم." قالت لي: "يا مدام، والله راكي تصعبي فيها عليا. كون تدّي مدام زينب ولا مدام سليمة، يحاوزوني." قلت لها: "ما عندهم واش دخلهم. إذا كاين أومو بزيادة، جيبي لي باش نغسل، وإذا كاش ما قالولك، أنا نهدر معاهم." راحت جابت لي أومو. دخلت الدوش وغسلت حوايجي. دخلت عندي عجوزتي الكبيرة نصيرة.

قالت لي: "علاه مخليتش الخدامة تغسلك حوايجك؟ قلت لها: "ويديا وينهم؟ وزيد عيب تغسلي وسخي وهي أكبر مني." (حسيت بيها خاطر أنا جوزتها هذي الإهانة) حتى قالت لي: "وهذو اليدين يعرفو يطيبو ولا غير يغسلو؟ قلت لها: "شوية شوية." قالت لي: "مالا نتكل عليك طيبينا العشا اليوم." قلت لها: "إن شاء الله." كملت حوايجي ونشرتهم. عيطت لماما هدرت معاها. مبعد قلت لها: "قالولي نتي طيبي." قالت لي: "ايه، وري لهم شطارتك وحمري لي وجهي."

قلت لها: "إن شاء الله." هبطت تغديت. يوسف مهوش يجي للغدا. ورجعت قيلت. وليت دايتها غير راحة ورقاد. ماندير والو. مع العصر هبطت لعجوزتي. قلت لها: "واش ندير للعشا؟ قالت لي: "لي تعرفيها ولي تحبيها." دخلت أنا وياها للكوزينة. بقيت نوجد فالدوزان. قاتلي: "إذا كاش ما احتجتي، تروح كريمة (الخدامة) تشري لك." خممت واش ندير ودرت ليست. مديتها لكريمة. راحت شرات لي. وأنا هذا الوقت تقهويت. كي جات فرزت صوالحي واتكلت على الله.

عاونتني كريمة وفاطمة (خدامات نتوعهم) وعجوزتي قاعدة مقابلتني. شوية جاو الشيبات الثانيين. معجبهمش الحال. نطقت سليمة: "قالت لها زينب اليوم نباتو بلا عشا." وقيلا محبيتش كامل نرد عليهم. كملت طيابي. قلت لكريمة توجد الطابلة. وطلعت درت دوش، مكياج خفيف، لبست سروال سليم مع شوميز غوز. درت كوشوفال وهبطت. جمعت معاهم فالصالون. غير شوية دخل يوسف ومحمد. ناضت أميمة عنقت محمد وسلمت عليه. عاندتها حتى أنا. سلمت على يوسف.

بقى غير يشوف معايا خاطر ديما يلقاني فشومبرتي. قعدنا على الطابلة. حتى شيخي قال لهم: "الريحة راها زاكية. باينة نصيرة دارت العشا." قال له: "ذوق ورد خبر." درتلهم حريرة الله الله، محمر، زيتون، وسلاطة مشوية، ماسيدوان، بوراك. تعشاو وعجبهم العشا كامل. حتى قالت لهم عجوزتي: "عروستي دارت العشا." تخلعو. قاتلي أميمة: "بسمة صح؟ هزيت لها راسي. الحق كامل شكروني. شحال فرحت. كملنا العشا وطلعنا أنا ويوسف. غير دخلنا للشومبرة.

قالي بالزعاف: "علاه طيبتي؟ علاه درتي العشا؟ دهشت. قلت له: "يماك قاتلي." قالي: "آه صحا. معليش كي تقولك يما على حاجة ديريها." "بصح إذا قالولك الآخرين لالا. مكيش خديمة عندهم. ردي بالك ديري واش يقولولك." قلت له: "أوكي." حتى قالي: "والحوايج يتغسلو قاع عند الخدامة؟ مالا علاه راني نخلصهم؟ قلت له: "عيب يغسلولي حوايجي." قالي: "خدمتهم. وزيد ضوك تولفيهم. غدوة كي تدخلي تقراي، شكون يغسلك؟

قلت له: "فكرتني. القراية كيفاه رانا فسبتمبر. ضوك تفتح الجامعة." قالي: "سيبون. درت لك تحويل. كي تفتح تدخلي تقراي نورمال." ياه واش فرحت. هم ونزاح. شحال من مرة نبغي نجبد معاه السوجي نتاع القراية ونخاف منو. الصباح نضت فطرت مع يوسف. كيما ديما. هو راح وأنا رجعت للشومبرة. سمعت رنيم تبكي. رحت عندهم. بقيت نحكي مع أميمة. قلت لها بلي راح ندخل نقرى. قاتلي: "منك صح؟ قلت لها: "ايه. ديجا هذا عامي التالي. إن شاء الله ونتخرج."

قاتلي: "ياه والله مليح. أنا لحقت غير للباك. عاودتو مرتين مجبتوش. بردت على القراية. وزاد واش ندير بيها. ربي يفضلي بابا وراجلي مميخليني نحتاج والو." قلت لها في قلبي: "عندك الحق. نتي ولدتي وفي فمك ملعقة ذهب كيما يقولو. كون تميزرتي كيما أنا تعرفي واش معناتها القراية." حتى قاتلي: "حنا لولاد صح كامل قراو. بصح لبنات مكاش آمال عند الباك وحبست."

"مامبا مفوتاتوش وأنا كيما قلت لك. مروى صح تقرى فالجامعة. بصح باش تجيب الوقت برك. مزالت غير ف 2 دور. كون راها تخرجت. وريتاج ختي هذا عامها الأول وراها حابة تروح لايطاليا مع يوسف وخاوتو." قلت لها: "شكون خاوتو؟ قاتلي: "أيوب ومصطفى. متعرفيهمش؟ قلت لها: "لالا."

حكات لي بلي يوسف بعد ما راح لايطاليا دار الطريق لخاوتو. مصطفى كمل قرايتو وتزوج قاورية وعايش ثما. وكريم راح غير على جال القراية. قاري صيدلاني. وحتى هو نورمالمو عامو التالي هذا ويرجع. زادت قاتلي: "حنا لبنات تخلقنا باش نصرفو الدراهم. مش باه نجيبوهم." بقيت نضحك معاها. قاتلي: "هيا نخرجو نشرو حوايج ليك تقراي بيهم. ديجا بدى يبرد الحال. وأنا مشريت لكش حوايج خشان." قلت لها: "منعرف. خلي نسقسي يوسف قبل."