رواية بسمة مدفونة في خيالي الفصل التاسع عشر 19 - بقلم ضاقت أنفاسي

أب يطعم ابنته ساندويتش و بحطلها كاتشب بكل لقمة بتاكلها ..
صارت البنت الصغيرة  فتح_فمها_وتبكي 😭😭
والأب بيصرخ عليها و بيحكيلها : 😡😡
السندويشة باردة لا تمثلي رح تاأكليها يعني رح تاكليها ..
و بعد ما خلصت السندويشة أجت أ مها أخذت البنت و نامت البنت بحضنها_الدافي 😔😔
بلّش الأب ينظف الأكل وفتح الثلاجة ليرجع علبة الكاتشب ..
تفاجأ الأب إنو ساحب علبة الشطة بدل علبة الكاتشب !
و البنت كانت عم تبكي و هو كل فكرو إنها كانت عم تبكي من سخونة_السندويشة 👉
راح لعندها ومسح على راسها و هي نايمة وحكالها
آنا_أسف_يا_بابا
ما_حسيت_بوجعك_لإني_ما_ذقتوا !!

كم مرة حرقتوا غيركم بأفعالكم ونزلتوا دموعهم وبتحكولهم : يوقفو عن التمثيل ؟!

كم مرة خليتو غيركم ينام وهو عم يبكي ؟!

كم مرة جرحتوا حدا بدون ما تعرفوا ؟!

كم مرة فكرتوا إنو كلامكم بلسم وبالحقيقة هو نار_بحرق_القلب ؟!
(( لو كل أنسان ذاق الكلمة أو الفعل قبل ما يوجهوا لغيره لتحولت_الحياة_لجنة👌
#راقت_لي #منقول

التفتت لما سمعت طرقات على الباب ...صدت لجهة الشباك ما لها خلق لأحد ...زادت الطرقات على الباب ...لحظات فتح جراح باب الغرفة وناظرها واقفه عند الشباك ولا كأنه الباب ينطرق ...هز رأسه بضجر من تصرفها ...توجه للباب وهو يسأل: مين!
فتح الباب لما وصله صوت فياض ...وبترحيب: هلا
فياض بملامح عابسه دخل وخلفه الجازي !
غمضت عيونها للحظات تحاول تشحن نفسها بطول البال وهي تسمع صوت فياض الناقد: واقفه عند الشباك كذا وانت كاشفة !
جراح بهدوء: بالنهار ما أحد يشوف !
تقدمت بضيق وما نطقت بحرف واحد ....سرعان ما عفست ملامحها من كلام فياض: وش تنتظرين للحين ليه ما حذفت الزفت !
رونق رفعت حاجب من عصبيته هي للحين ما تعرف وش هي المقاطع ...شافت المقطع الي مده لها جراح لما كانوا بالسيارة بس !،
فياض بغضب وخاصة إنه واحد من المقاطع ظهرت الجازي بلمحة وهي كاشفة بالرغم إنه التصوير بعيد وما هي واضحة الصور ..نطق بغضب: لا تناظريني كذا هاتي الزفت!
جراح اشر له يجلس:هدي أعصابك
فياض بنبرة غاضبة وهو يوجه الكلام لها : انت وش تبغين منا ؟!
وش هدفك من ذي الحركات!
عقدت حواجبها بسخرية والضيق باين بملامحها: هدفي!
الجازي بضيق من تصرفها: ليه تعملين كذا!
وانت تعرفين فياض ما يحب هذه الأمور ليه
جراح يهدي الأوضاع : ترى
فياض بغضب من جراح: يا اخي انت دمك مويه!
زوجتك تعدت كل الحدود
قاطعته رونق بقهر : ما أسمح لك تتمادى
قاطعها وهو ماسك نفسه ما يضربها: انت انكتمي !
أنا الحق علي يوم دبست جراح فيك وظلمته وكل أملي أغطي على ماضيك المشرف ...قلت إن أخذت جراح أكيد رح تصير بنت عالم وأصل لكن عمر ذيل الكلب ما ينعدل!
فتحت عيونها باستنكار من كلامه حتى فياض يشوفها بهذا الانحطاط...ناظرت جراح الي يناظر وكل علامات الاستفهام فوق رأسه من ماضيها الي الكل ينغز فيه!
فياض يعني استغله وفي ماضي عن رونق ما يعرفه!
قطع أفكاره وهو يناظر رونق تتكلم بصراخ مع فياض: انت اصلا واحد غدار إذا صديقك طعنته بظهره كيف يوثق الواحد فيك!
الجازي بانتقاد : رونق عيب
رونق بغضب : رونق عيب !
ما سمعتي كلام زوجك؟!!
جاي ثاير علي كل هذا علشان بلقيس انتشرت صورها على النت !!!
والا ذبحتك الغيرة لأنه جوادوووو شافها
قاطعها فياض وهو ينقض عليها ...ضغط على فكها بقوة: اوقح منك ما شافت عيني
أبعده جراح بقهر من تصرفه : اتركها!
الجازي تحس كل شيء فوق رأسها رونق من جهة وفياض من جهة..نطقت باختناق : فياض لا تق
قاطعها وهو عافس ملامحه من الغضب : تراك من طيبة قلبك يا جازي ما تشوفين حقد هالبنت ....كان عندي أمل إنها تتغير وتصير أفضل بكثير لكن بنفس الوقت أعطيك عذر ما لقيتي أحد يربيك ....ما اكتفت بكل شيء وتمادت وهي تحاول تسحب وسيم لمستنقعها .. أصلا مين سمح لك تنزلين صور وسيم!!
رونق بدأت الصورة تتضح أمامها ...اكيد وسيم هو الي عمل كذا لأنها ما نزلت أي صوره ...مطت شفتها بسخرية ودموعها تلمع بعيونها: تتكلم عن التربية؟!-
روح ربي ولدك تراه هو الي نزل المقاطع
ضحك بقهر : تصدقين حلوه هذي!
الحين بعد ما تورطتي تبغين تحطينها برقبة وسيم !
وبنبره آمره فيها تهديد وهو يتابع كلامه: هاتي الجوال خليني احذف المقاطع أحسن ما أكشف المستور أفضل لك !
ناظرت جراح الي يناظرهم وهو يحس نفسه وقع بفخ بقوة ...فياض ورونق ضحكوا عليه وأوقعوه بالفخ وهو مثل الغبي... وبحدة ناظر فياض: الي يحلم يفسر !
وش هالمستور؟!
لا يغركم سكوتي وهدوئي تقولون هذا أهبل وغبي.... وعبيط ترى ورب الكعبة إن عرفت إنكم
قاطعته رونق بخذلان ...على طول صدق فياض ....ودموعها بدأت تتراقص بعيونها من القهر والخذلان الي تعيشه : وانت صدقته من أول ما بدأ يرمي كلامه ؟!
ما تثق فيني !
يلا يا فياض طلع المستور أشوف !
هزت رأسها بحسافة وهي تتابع كلامها : ما توقعتك كذا يا فياض توصل فيك تفتري علي حتى تنتقم ؟!
ما اكتفيت بانتقامك لما زوجتني من جراح والحين جاي تدمر حياتي!
رفع حاجب باتهام : لا تنكرين تراك وافقتي على جراح حتى تنتقمين من اهلك بعد معاملتهم لك لما كنت على ذمة نايف!
زمت شفتها بحسافة : ايه وبعدين كمل !!
زفر فياض بضيق وهو يحس إنه تسرع بالكلام لكنها تستفزه بقوة ..مسح على وجهه بيدينه وبعدها نطق : أعطيني الجوال خلينا نحذف المقاطع ويا دار ما دخلك شر !
عفست ملامحها بتعجب: بعد كل هذا تقول ببساطة يا دار ما دخلك شر!!!
جراح بغضب منهم : خلاااااااص كافي!
عندك شيء قوله مباشرة لا تجلس ترمي كلام .....رونق ما
فياض زفر بضيق وتكلم بمقاطعة: رونق بالرغم من اعمالها السيئة إلا إنها من ناحية الشرف والأخلاق ما عمري شفت عليها الشينة فلا يروح ذهنك لبعيد أنا ما افتريت عليك يا رونق ...انا اتكلم عن تصرفاتك الطائشة
ناظرته بكره مهما رقع ما تضبط معه نطقت بأسف : أنا أكرهكم كلكم ...قرفت الحياة معكم ...وما رح احذف شيء!
تركتهم وتوجهت للغرفة وقفلت الباب بالمفتاح ...تحس بالاختناق آذاها فياض بكلامه كثير ....مسحت دمعه متمردة على خدها ..وهي تشوف موقف أمها السلبي!
توجهت لحقيبتها تشوف الجوال...وش المقاطع الي عملت كل هالضجة!
عقدت حواجبها باستنكار الجوال ما هو موجود ! فرغت محتويات الحقيبة على الأرض والرعب دب بقلبها !
ما له اثر ....بلعت ريقها وهي ترجع الأغراض للحقيبة بعشوائية !
وقفت وهي تحاول تتذكر مكانه ....من لما رجعت ما لمسته !
يمكن وضعته بغرفة النوم ...بسرعة توجهت للباب وفتحته لزوم توصل للجوال قبل جراح ...
فياض وجراح وأمها ما لهم أثر بالمكان ...توجهت لغرفة النوم مثل المجنونة تبحث هنا وهنا !
لكن ما في أثر للجوال ..وقفت برعب لما حست بحركة جراح بالغرفة !
تحركت بهدوء حتى تطلع من الغرفة ..وقفها وهو يمسكها من يدها بجمود: أعطيني الجوال خلينا نخلص من هالسالفة
أبعدت يده عنها بقوة...ما هي طايقه تشوف أي أحد ..تحركت بدون أي كلمة!
قفلت الباب وهي تحس بمصيبة حلت على رأسها وين الجوال!
المشكلة ما عليه قفل .... أكيد الي سرقه هو إلي نزل المقاطع !
رددت بداخلها «يا رب»
يا فضيحتها إذا نشر صورها !
لازم تتحرك لكن كيف!
المشكلة إنها واقعة بين ناس ما عندهم تفاهم لو يعرفون إنه انسرق إلا يحرموا عليها تحمل جوال !
اليوم اكتشفت انه جراح مثلهم عصبي !-
كيف تحل المشكلة ؟!
لحظة رح تدخل حساباتها عن طريق اللاب وتحذفها وبعدها تفكر بطريقة الي تسترد فيها جوالها ....
فتحت الباب لازم تتصرف ...بلعت ريقها وهي تشوف جراح بوجهها ...ناظرته للحظات وبعدها صدت عنه ..سرعان ما التفتت عليه برعب لما نطق: أعطيني جوالك
حاولت تحافظ على ملامحها وتكون هادية ما رح تخلي أحد يعرف إنه الجوال ضاع منها : خلاص أنا احذفهم الحين
قاطعها بحزم : الحين قدامي
سكت لما رن جواله ...رد بهدوء: هلا....وش صاير ....طيب الحين جاي!
قفل الجوال وناظرها بتحذير : أنا طالع الحين تحذفيهم ما هو ناقصني وجع رأس ...ولما أرجع لي كلام معك !
تركها وغادر بهدوء ...تنفست براحة لما طلع ...توجهت بسرعة فتحت اللاب وبحركات سريعة حذفت المقاطع ...غيرت بإعدادات حسابها ..وبعدها قفلته نهائيا !،
مضطرة تعمل كذا ....لزوم تعرف مين اخذه!!
معقول وسيم؟!
بس وسيم ما تظن إنه ينشر مقطع وجه أمه فيه ظاهر !
بس ليه صور وسيم منشورة ؟!
وقفت وهي تفكر بذي المصيبة كيف تتخلص منها ..تذكرت الواتس تخاف ينشر السارق عليه صورها ....حضنت رأسها بيدينها من هالمصيبة الي حلت عليها !
**
**
**
**
فياض بغضب: قلت لك خلاااص
الجازي بقهر،: ما يحق لك تمنعني من ابنتي، وما اسكت لك على أسلوبك وتعاملك كذا معها
ام فياض واقفه بينهم بضياع : حسبي الله عليها من بنت خربت الدنيا !
الجازي ناظرتها بقهر:وليه تتحسبي عليها ترى حذفتهم وخلصنا
فياض والشرار يطلع من عيونه بداخله قهر من تصرفات رونق: ما شفتيها كيف تتحداني وتقول ما رح تحذف شيء.. أوقح منها ما شافت عيني!
قاطعته الجازي بغضب: خلاص كافي ...اترك هالبنت بحالها !
بغيت تخرب بيتها بكلامك
فياض : ما عادت تفرق لأنه خلاص طق قلبي من هالبنت !
الجازي ناظرته بقهر ...وبعدها غادرت المكان لأنها ما تضمن نفسها تشتبك مع فياض وعمتها!
ام فياض مطت شفتها: يا هذه البنت ما دخلت قلبي من أول ما شفتها ....انت كيف طاوعك قلبك ودبست جراح صاحب القلب الطيب فيها !
فياض بغموض: ندمان على هذا التصرف وبأسرع وقت رح أصلح هالغلطة !
ام فياض عقدت حواجبها : كيف؟
ترى ام راكان تقول انها حامل
عفس ملامحه باستنكار: حامل؟!
ام فياض باستفسار: وابنتها رح تبقى هنا
فياض بحزم : قدر عندي وما رح تطلع من هنا ..انا اتفقت مع نايف إنها تعيش عندي ،
ترى هالبنت ضحية حرام تعيش عند رونق لأنها رح ينولد بداخلها عقد نفسية ما لها علاج !
من البداية قلت للجازي يراجعون بها عند دكتور نفسي لأنها مريضة وكل يوم تزيد حالتها سوء !
لكنها تكابر خلينا نشوف آخر هذه المكابرة !
**
**
****
***
جراح مستند على الجدار بضيق وهو يناظر جدته الغاضبة: مستحيل أقبل بهذا الشيء!
هذه البنت عندها حس إجرامي كبير وش يضمن لي ماتذبحني! أبدا ما رح أقبل !
راكان بإقناع : يا جدتي ترى جراح معها ..وليه تذبحك ؟!
ام ناصر برفض قاطع: قلت لا يعني لا ...انزل انت ومريم عندي وخلي جراح يسكن فوق!
زياد بسخرية:تبغين الحرب العالمية الثالثة تقوم !
جراح يناظرهم كيف رافضين وجود رونق معهم ...ما يشوفها بهذا السوء الي يتكلموا عليه ..بالعكس إنسانه تدخل القلب من اول ما تشوفها..معقول حبه لها معمي على عيونه !
تنهد وتكلم بهدوء : مشكورة يا جدتي على الطردة ..ازعجتك
قاطعته وهي تشوف الزعل بملامحه : خلاص تعال
راكان بسرعة استغل الفرصة وهو يشوف جراح ناوي يطلع وما يبغى يسكن هنا: جراح يلا نمشي خلينا نبدأ من الحين بنقل الأغراض قبل زواج زياد تكون مستقر هنا!
قبل مايعترض تكلم راكان : انت ما تبغى تصلح الوضع بينك وبين امي ؟!
ناظره بضيق:ايه بس
قاطعه وهو يسحبه للخارج : لزوم تتنازل عن كرامتك مقابل رضا أمك !
الحين ترجع للشقة تجهز الأغراض وانا بعد ساعة اكون عندك نساعدك!
هز رأسه على مضض ...وتوجه راجع للشقة !
**
**
**
**
جالسة على الكنبة بالصالة وحاضنة رأسها بيدينها وهي تفكر بالمصيبة الي حلت على رأسها ...هذا سبب تساهلها المفروض وضعت رمز حماية للجوال على الأقل تحمي محتويات الجهاز ..المشكلة ما هي قادرة تتذكر آخر موقف كان معها الجوال !
اخخخخ من ذاكرتها المعطوبة !
دخل بهدوء وناظرها وهي متكورة على نفسها ....رق قلبه لها ...مهما عملت لها مكان بقلبه ....معقول عيون الغزال تحمل كل هالإجرام ....هز رأسه بالنفي مسستحيل ....اقترب لما رفعت رأسها وناظرته بذبول بدون ما تنطق بحرف واحد !
سأل باستفسار: ليه جوالك مقفل ؟!
رفعت حاجب وهي تردد مقفل ؟!
راودها أمل إنه وقع منها وللحين ما أحد لقاه بما إنه مقفل !
استغرب سكوتها وسرحانها: رونق أنا أسألك
ردت تحاول تغطي على سالفة الجوال: ليه اتصلت؟!
تكلم بهدوء : تعالي نجهز الأغراض اليوم رح ننتقل لبيت جدتي
فتحت عيونها باستنكار: الحين
ناظرها وهو رافع حاجب: ايه الحين
قاطعته بقهر: بس انت قلت نهاية الأسبوع
رد بلامبالاة: اليوم أو نهاية الأسبوع ما تفرق !
تكلمت بهدوء ظاهري وداخلها رح تنفجر : طيب بالأول أبغى اروح لبيت فياض أبغى قدر خلاص كافي جلستها هناك !
جلس بعد ما زفر بطول صبر : بس انت عندك دوام وأنا دوام وين تبقى لما ترجع من المدرسة؟!
تبغى لقمة تأكلها رح تكوني طول الوقت قلقانه عليها!
وبعدين لا تنسين قدر متعلقة بديما وخالد لدرجة ما هي معقولة وانت شفتي كيف عملت لما قلت لها إنك
قاطعته وهي عارفة كلامه مضبوط قدر مبسوطة عند الجازي كثير وكأنها ابنتها لكن مقهورة من فياض وتصرفاته وما تبغى قدر تعيش معه : بس
قاطعها بهدوء : بالعطلة تنام عندنا وايام الدوام رح تكون عند أمك اتركينا من هذه السالفة !
خلينا بسالفة انتقالنا
قاطعته وهي عارفه وش رح يقول ...نطقت بمرارة: أنا ما اغلط على احد وما اتدخل بأحد ..لكن بنفس الوقت الي يغلط علي ويهيني ما رح اسكت له ...ولا تقول
قاطعها بنرفزة من كلامها:: ما احد رح يقولك شيء بس انت خلي كلامك دافئ!
لا تخربين مخططاتي بتسرعك أنا أبغى ابني بيتنا ويكون عندنا أطفال ونعيش بسعادة وبنفس الوقت أمي تكون راضية عني!
لا تصعبين علي الطريق يا رونق
قاطعته وهي تناظره بخيبة،: أي أسرة وانت ما تثق فيني
رد بتبرير: انا اثق فيك ...بس أنا بشر وانتم كلامكم كان فيه نغزات ...بس فياض لما طلعنا خبرني إنه يقصد فعايلك بأهلك وتكلم كذا يضغط عليك حتى تحذفين المقاطع
انت ليه كذا عنيدة ؟
ومن الأصل ليه تنزلينهم ؟!
انت
قاطعته بقهر : خلاص ترى قلبي طق منكم...وما يهمني كلام فياض وما انتظر منه يبرر موقفه قدامك حتى حضرتك تصدقني ...
قاطعها انتقاد: وانت ليه تكلميني كذا ؟
يعني فوق غلطك وتراددين!
خلاص انا مليت من تصرفاتك وعنادك !
حست كلامه كسر أشياء بداخلها ...نطقت بخذلان :مليت مني!
حركت شفتها تتكلم ..سرعان ما تنهدت بضيق تحس ما في كلام يصف هالموقف....وبهدوء وملامح الضيق ما قدرت تخفيها : تقدر تأخذ أغراضك وتنتقل لبيت أهلك ... أنا رح أروح لبيت جدي وليد
قاطعها وبدأ يتنرفز : رونق ترى واصله هنا!
اخزي الشيطان وتحركي معي
حركت رأسها برفض: ما رح اطلع معك دامك
قاطعها وهو يتكلم بحده: انا رح أجهز الأمور والله ما يحصل طيب إن ما
عفست ملامحها بسخرية وهي تقاطعه : ترى
قاطعها بغضب وعصبية اول مرة تشوفها: رونق لا تختبرين صبري تحركي ترى واصلة هنا!
تحركت لا شعوريا ما هو خوف منه لكن عصبيته تلقائيا أجبرتها تتحرك!!!

**
**
**
**
واقفه تناظره وهو يحمل الأغراض و تفكر بالحال الي وصلوا له ..... مقهورة من فياض لما راحت تأخذ قدر احتد النقاش بينهم حتى كان له رد فعل ما هي حلوة حلف يمين بالطلاق على أمها ما تتواصل معها 3 اشهر!
جلست بتعب من كل شيء !
دخل جواد وهو يتكلم بالجوال...قفل الخط وناظر المكان: رتبتي الأغراض
ردت بهدوء ظاهري ومن داخلها جالسه تحترق : ايه
هز رأسه وهو يشوف ضيقها لكن بداخله فرحة انها ساكنة قريب منه !
تقدمت قدر : ماما
رونق ما لها خلق لشيء ردت : هممممم
قدر وهي تتناول لعبتها عن الارض: عمي جراح يقولك تعالي رتبي أغراض
قاطعتها رونق ما لها خلق لأي شيء: بعدين !
جواد وهو يتوجه لغرفة جدته وما علق على شيء!
طلع جراح بهدوء بعد ما انهى نقل الاغراض وصار هالمكان بيتهم ...توجه لغرفة جدته تحت أنظار رونق!-
تحس الدموع تتجمع بعيونها وخاصة بعد كلام قدر وهي تتكلم بضجر: ما أبغى اعيش هنا!
أبغى ماما جازي!
رونق بصوت مخنوق: وأنا تتركيني!
قدر بعبوس : ازورك يا ماما أبغى أروح عند ماما جازي عند ديما!
زفرت باختناق وهي تشوف حتى قدر تخلت عنها وهي للحين ما عرفت الحقيقة!
وقفت متجاهلة قدر وهي ترتجيها حتى ترجعها لبيت فياض ....توجهت ترتب الأغراض وهي متجاهلة بكاء قدر !
اه من قدر تغيرت ما عادت الطفلة الي تخاف من كل شيء وما تشوف إلا حضن أمها هو الامان!
الحين تبغى تهرب من أحضانها!
كتمت ضيقها وهي تسمع صوت جدها لما دخل ويتكلم مع زوجته ...وبلمح البصر دخلت المطبخ أقرب لها..ما لها خلق لكلامه وانتقاداته!
**
**
**
**
جالسه بهدوء تلعب بأظافرها بملل ...رفعت رأسها تناظر جدتها تسبح بالسبحة ...نطقت من باب الواجب: جدتي تبغين
نقزت ام ناصر بخوف كانت سرحانه وبنبره غاضبة ردت: ما ابغى شيء!
رفعت رونق حاجب بتعجب ما قالت شيء ليه صرخت بوجهها كذا؟!
بلعت غصتها وهي تحس بالغربة ...جراح من بعد ما كمل ترتيب الأغراض ما شافته .وقدر من بعد البكاء والنكد اخذها نايف لبيت فياض .. ناظرت ام ناصر وهي تتصل بالجوال وملامح الخوف واضحه عليها : الو ...انتم وينكم تاركيني وحدي..... أقول بلا هذره زايده تعالوا هنا ترى والله ....انتظرك...قفلت الخط، وهي خايفه من وجود رونق تحس إنها مجرمه وما في بقلبها رحمة !
غطت وجهها لما حست بحركة الباب...دخلت ام جواد وهي ترد السلام ...
جلست وهي تناظر رونق بانتقاد: جيت أنا وجدك اليوم وما شفناك!
رونق بهدوء: كنت بالحمام!
ام ناصر ارتاحت لوجود ام جواد: أم راكان الحين نازلة
ام جواد ناظرت رونق: طلعت على ام راكان وسلمتي عليها؟!
رونق رفعت حاجب: يا جدة تتكلمين وكأنك ما تعرفين
قاطعتها : مهما كان هذه ام زوجك واحترامها من احترام جراح الحين تطلعين
سكتت لما شافت ام راكان داخله ويا ارض اشتدي وما عليك احد قدي!
ناظرت رونق جدتها ام جواد وهي تؤشر لها بعيونها علشان تسلم على ام راكان.....
تكتفت رونق وهي جالسة لما شافت ام راكان راحت للجهةالثانية مباشرة وما لها نية تسلم على رونق!
رونق بضجر من جدتها الي تناظرها بحده !
طنشت نظرات ام جواد ورجعت تلعب بآظافرها وهي تفكر بحل للجوال!..ما هي مستعده تتنازل لأحد حتى يرضى بوجودها ...عمرهم ما تقبلوها ...خلاص ملت من كل شيء. ... وما لها قلب تجامل!!
رفعت نظرها على دخول جراح المبتسم لأمه ...جلس جنب أمه مقابل لها بالجهة الثانية : كيفك يالغالية؟!
ام راكان بثقل ما ردت عليه !
قبل جبينها بمحبة: ربي يطول بعمرك !
التقت عينه بعين رونق للحظات وبعدها ناظر جدته ام ناصر: كيفك الحين يا جدتي!
ام ناصر مطت شفتها : كنت بخير بس انتم رح تجيبون اجلي !
فهم نغزتها وناظر أمه الي نطقت : ربك كريم يا خالتي!
مطت رونق شفتها بألم وهي متأكدة إنهم يقصدونها !
ام جواد تغير السالفة : وكيف يده لؤي الحين !
ام راكان اندمجت وبدأت تتكلم عن هالموضوع بالتفصيل!
يتكلمون وعيونه على رونق ...منزله رأسها وتلعب بأظافرها ..متضايق من وجوده هنا بس مضطر حتى ينال رضا أمه !
وبنفس الوقت يخاف تقوم الحرب العالمية بين اهله ورونق!
مط شفته بضجر وهو يشوف أخواته دخلوا وبناتهم معهم !
ما عجبه تصرف اخواته ما سلموا على رونق ..لازم يتصلح الوضع بينهم : الظاهر ما شفتم رونق
سعاد مطت شفتها: ترى نظرنا 6/6 شفناها وما نبغى نسلم عليها!
ام جواد ما عجبها الكلام مهما كان تبقى رونق حفيدتها وبحدة نطقت: وليه ما تبغين تسلمين عليها؟
ام راكان رفعت حاجب: والله عاد بكيفها
ام لؤي : جدتي صفية اتصلت تقول هاليومين جايه تزورنا!
رونق عفست ملامحها وبداخلها يا ليل ابو لمبة!
وانتقل الكلام والحديث عن صفية .... رفعت نظرها رونق لما أشر لها جراح بعيونه حتى تلحقه !
وقفت وطلعت خلفه ....وقف وابتسم لها: كيفك؟! إن شاء الله عجبك المكان !
ردت ببرود ظاهري : عادي!
تكلم وهو يسحبها بخفه: تعالي نجهز ضيافة
توجهت خلفه بهدوء ...جلست على الكرسي وهي تناظره يجهز الضيافة بنفسه !
جراح يتكلم وهو يجهز : أدري إنه اليوم صارت اشياء ازعجتك بس وش نعمل ؟! يعني الواحد لما يعصب يمكن يحكي كلام بدون وعي ...فياض ترى ما هو قصده ترى رجع واتصل واعتذر
قاطعته بروج ميته: ما يهمني!
سأل بتوجس: أمي سلمت عليك ؟
مطت شفتها بسخرية : بالاحضان تقابلنا وبصعوبة حتى تركتني!
رفع حاجب: يا سخفك لماتجلسين تتريقين!
رونق حاولي طنشي علشاني أنا !
ممكن تعملي هالشيء علشاني؟!
زفرت رونق بهدوء: ان شاء الله !
**.
*
ام ناصر بقهر: حسبي الله يوم تركتوا هالمجرمة عندي ما أقدر أنام او تغفى عيني
ام جواد بضجر: ترى تبالغين حسستيني إنها من عصابة المافيا!
ترى لو دققتي تراها نفس قوة حنين
ام ناصر ما عجبها الكلام: تخسين ...تشبهين هذه بحنين؟!
حنين وش زينها بس انت تبغين الفرصة حتى تنقصين من قدر حنين !
ام جواد بانفعال: وحفيدتي وش ينقصها حتى تقولين هالكلام؟؟!
ام راكان بتدخل : أنا اقولك وش ينقصها!
ينقصها التربية والأداب والأخلاق ...وفوق هذا مريضة نفسيا ومكانها ما هو هنا !
وفوق هذا متزوجه عمها وعندها بنت من عمها ومطلقة وشينة ...وما احط بذمتي يقولون تتعاطى مخدرات ...وتسألين وش ينقصها يا أم راكان وكأنك ما تعرفين أكثر منا!
وفوق هذا ساحره ولدي !
ولدي الف بنت تتمناه يتزوج هذه القروية!
ترى بداخلي قهر ما يطفيه الا طلاقها
ام جواد بضيق من هالكلام: يا اختي ترى البنت ما هي من الشارع ما تبغونها نشوفكم بالمحكمة وما له داعي هالكلام الزايد!
واقفه وبيدها الضيافة وجراح وجه بالألوان وهم يستمعون لحديث ام راكان وام جواد!
حاولت تتحكم بملامحها ...ما قدرت تتكلم بحرف واحد !
جراح بقهر من كلام أمه وباعتذار: الي ما يعرف الصقر يشويه...تراها ما تعرفك ..اعطيها فرصة تتعرف عليك صدقيني رح تحبك ...انت ثقي فيني رونق انا
قاطعته بصوت مخنوق والدموع تلمع بعيونها: رح نشوف اخريتها!
دخلت بهدوء ...اقتربت من ام ناصر :جدتي
ام ناصر اشرت بيدها بالرفض: ما أبغى ما أبغى!
ناظرتها رونق وما علقت ..توجهت لأم جواد ...ردت ام جواد باعتذار: والله يا ابنتي دوبني شربت وما أقدر الحين
هزت رأسها بتفهم...وتوجهت لأم راكان وبهدوء نطقت: خالتي!
ام راكان صدت عنها وما عبرتها ولا كأنها واقفه أمامها!
جراح يناظر الموقف وبداخله يغلي من تصرفات اهله !
اقترب من رونق الي مدت بالضيافة لام لؤي ورفضت !
سرعان ما سحب منها الضيافة ووضعها على الطاولة : ارتاحي إلي يبغى يأخذ بنفسه!
ناظرته بملامح هادية ..وجلست بهدوء !
ام جواد باستفسار : كيف الحمل يا رونق؟!
رونق ناظرت مباشرة لجراح باستنكار ...وقبل ما تنطق حرف واحد نطق جراح: الحمد لله وضعها تمام!
وقفت لما انطرق الباب وكان زياد!
غادرت وهي تفكر بكذبة جراح!
كيف يقول إنها حامل!
إلا الحمل ما فيه كذب !
تنتظره يدخل بفارغ الصبر !
واخيرا دخل بملامح معكره..اقتربت منه وباستنكار: انت كيف تقول اني
قاطعها بجمود: وين المشكلة؟!
رونق رح تنجن من بروده : إلا الحمل ما فيه كذب !
شهر شهرين أربع شهور وبعدها وش اقول للناس!
جراح جلس بلامبالاه : شهر زمان ونقول إنك اجهضتي الجنين!
رفعت نظرها للسقف محاولة حتى تمسك أعصابها: جراح انت تتكلم من عقلك!
زفر بضجر : وبعدين معك !
تكلمت بقهر: وليه تكذب من الأصل!
رد وهو ينهض ويتوجه للغرفة: حتى اجبرهم يقبلوا بزواجنا!
*
**
**
**
ام لؤي باستنكار: ما شفتيها كيف ناظرته لما سألت خالتي ام جواد عن حملها ...الظاهر ما تبغانا نعرف !
ام راكان بحقد: جعله ما يتم هالحمل !
حتى حفيدنا م تبغانا نعرف بوجوده!
أنا ما يقهرني إلا هالجراح وكأنه بالغرفة ما في احد غيرها يتابعها بنظراته وكأنه مسحور فيها !
رنت هالكلمة بعقلها ....وسرعان ما ناظرت راكان برجاء: راكان اعمل شيء ...أخوكم ما هو طبيعي !
لو تشوفه إلا تبصم بالعشرة إنه مسحور!
راكان بضيق : وش يطلع بيدي يا يمه!
بعد زواج زياد انا رح اتصرف !
**
•*
**
روعة بتفكير: ما اتوقع إنه بابا يرفض رح اعطيه كرتونة الجهاز ويبلغ عنه بمركز الشرطة !
رونق بامتنان: مشكورة يا قلبي ....غلبتكم معي ...بس أنا ما أشوف احد يقدر يساعدني من الي حولي!
لأني ما اضمن رد فعلهم !
روعة بتفهم: صحيح كلامك !
بس بصراحة فياض ما توقعت يعمل فيك كذا !
رونق بحزن : أنا كذا حظي الي اثق فيهم واحمل لهم مشاعر حلوة ...اتفاجئ بطعنه منهم غير متوقعة!
للحين مقهورة يا روعة المفروض مسحت فيها الارض بس ما رح يطول سكوتي!
روعة بقلة حيلة: قالت لك أمي انفصلي عنه بس انت عنيدة ورأسك يابس
رونق تكتفت وهي تناظر حولها: انفصل!!!
قولي لزوم استقل في بيت لوحدي بعيد عن الي حولنا!
روعة بابتسامة: والحين كيف ترجعين للبيت وما معك جوال
قاطعتها رونق بلامبالاه: هذه محلوله جوالي خلص شحنه واضطريت ارجع للبيت مواصلات!
روعة هزت رأسها : وكل ما تداومين نفس الكذبة !
رونق : لا تخافين رح أدبرها!
روعة طلعت جوالها بابتسامة: خليني اتفقد جوالك
اتصلت على رقم رونق ...لحظات وجحظت عيونهاوهي تسمع صوت : الو
رونق تناظر روعة واعصابها تلفت مين هالرجال الي جوالها معه!
روعة باستنكار: بابا
رونق سحبت الجوال من يدها وناظرت الاسم ...وسرعان ما ضربتها بالكتاب على رأسها بقهر : غبية!
روعة وهي تشوف اسم ابوها خربطت بدل ما تضغط على اسم رونق ضغطت على اسم أبوها ...وبتبرير نطقت : اسفه بابا بالغلط ...لا لا ما في شيء....ان شاء الله سلام!
روعة باعتذار رافقه ابتسامه عبيطه: ضغطت وما انتبهت على الاسم !!!
رونق أعصابها تلفانه من كل شيء حولها وقفت: انا طالعه الحين ما لي خلق لأي شيء!
روعة مسكت يدها : انتظري!
راجعه للبيت !
رونق عفست ملامحها بانزعاج من هالبيت: اكيد لا ...ما اعرف وين رح اروح!
انت لا تشيلين همي !
تركت روعة وتوجهت لخارج الجامعة....من الأمور الصعبة إنك ما تعرف وش تبغى تعمل!؟
جراح بكفه وأهله وفياض وجدها وعبود وزوجة أبوها بكفه!
معقول تقدر تتحمل علشان جراح!
وبنفس الوقت ما تبغى تكون السبب في خراب علاقةجراح باهله!
بعد وقت وقفت امام البيت ...ترددت بس شجعت نفسها وضغطت على جرس الباب!
جدها وليد رح تستشيره بالأمر يمكن تلقى عنده حل!
فتح أحد الأطفال الباب.....دخلت بانحراج ما هي متعودة. عليهم!
وقف وليد اول ما دخلت رونق الصالة: رونق!
اقتربت بهدوء وسلمت : كيفك يا جدي !
وليد بهدوء: ربي يسلمك!
اليوم اتصلت فيك بس جوالك مقفل أبغاك بسالفة!
رفعت نظرها رونق لجدتها لما تقدمت وسلمت بملامح عابسه!
رونق رجعت خطوة للخلف لما وسيم اقترب منها والشر بملامحه: كله بسببك انت!
خربتي حياتنا..الله يأخذك انت وأختك ..من لما طلعتوا بحياتنا ما شفنا خير ... أنا أكرهك يا كلبه
سكت لما استقرت يد رونق على وجهه وبحده: انكتم!
ما بقى إلا البزران يتكلموا!
وجوالي الي سرقته رح تدفع الثمن على فعلتك... أبوك جالس ينتقد الناس وما هو شايف ولده الضايع!
خليه يربيك بالأول وبعدها
قطعت كلامها ورجعت للخلف لما هجم عليها وسيم حتى يضربها ...وقبل ما يلمسها مسكه وليد وبغضب: وسيم!
انت ما تستحي على وجهك تمد يدك على أختك الكبيرة!
وسيم بقهر: ما عندي أخوات!
حياتنا تدمرت بسببها!
حنين تناظر الموقف بصمت ....
وليد دف وسيم لبعيد ...واقترب من رونق تعالي نجلس
قاطعته حنين : رونق يا ليت تسمعي وتنفذين الكلام الي رح يقوله جدك !
ناظرتها رونق وهي معقده حواجبها ..وكأنه قلبها حس بالموضوع قبل ما يتكلموا!
اجلسها وليد برفق ...جلست مثل الدمية يحركونها ..رفعت نظرها لوليد لما تكلم بهدوء: رونق يا ابنتي انت الحين متزوجة وعندك زوج وباكر إن شاء الله يصير عندك عيال ويكون عندك اسرة... واكيد تعرفين اهمية شمل العائلة يعني انت تعرفين إذا تطلقت الام يتشتت البيت والاولاد يكونون ضحية... أمك يعني!،
سكت للحظات وبعدها تابع: لو تبعدي عنها وخاصة بالفترة الحالية!
أنا أبو وما أقبل ابنتي يخرب بيتها وأنا جالس أناظر!
يعني إخوانك الصغار وش ذنبهم يتشتتون؟!
الجازي تركت فياض وجاءت زعلانه هنا!
رونق لا تكوني سبب بخراب بيت أمك!
حنين تكلمت بانفعال: أمك من لما تزوجت ابوك ما شافت خير!
ما صدقنا إنه بعد زواجها من فياض استقر وضعهاوصارت الأمور تمام ...برجوعك يا رونق عفست حياة أمك وخربت حياتها ...وكأنه الجازي ينقصها!
اذا فعلا تحبين أمك اتركيها بحالها
وليد وهو يناظر زوجته بلوم: حنين !
حنين بلامبالاة: خلينا واقعيين عشتي طول حياتك بدون الجازي وهذا انت متزوجة وما رح تكوني بحاجتها الحين بهذا العمر..تقدرين تكملين حياتك بدونها....خلاص اتركوا ابنتي بحالها!
وليد زفر بضيق وناظر رونق بهدوء: بيتي مفتوح لك اي وقت بس الجازي وخاصة بهذه الفترة ابعدي عنها!
اتفقنا!،
مطت شفتها بألم ....وبصعوبه حاولت تسيطر على ملامحها وهي تتكلم: هذه أوامر السيد فياض!
وقفت وهي تتابع كلامها : قدر هنا ؟!
وليد وقف وهي يشوف ملامحها مهما كابرت واضح فيها الانكسار:رونق ا
قاطعته وهي تنادي على قدر: قدر قدر!
حنين بهدوء: الحين اناديها
وليد: وش تبغين بقدر اتركيها
رونق والغصه بحلقها ..ودمعة غصب عنها نزلت ..مسحتها بسرعة : مشكور ما قصرت ...تدري وش المشكلة؟!
المشكلة إنك خربطت بالكلام وقلت ابعدي عن أمك !
أول مره أشوف أحد يطلب من الثاني يبعد عن أمه !
الأم الي طلب رب العباد بوصلها ...وانت بكل برود تقول اقطعيها علشان بيتها واسرتها !
علشان أولادها!
علشان زوجها !
ترى أنا ابنتها قبل ما يتزوجها السيد فياض!
انا ابنتها قبل وسيم!
ليه ذول أولادها لهم حق فيها .... وأنا ما لي حق فيها !
مطت شفتها بحسرة: ايه صحيح نسيت اني البنت القروية الضايعة الصايعة المتخلفة الي ما لها وجود بينكم !
وانتم عيال الأصل والشرف!
انتم فووووق وأنا تحت ما أسوى نعال أحدكم !
ليه تهتمون بمشاعري واحاسيسي ..وحاجتي لأم فقدتها سنوات طويله !
عشت 18 سنة على أساس اني يتيمة وأقدر أكمل حياتي بهذا اليتم ماعادت تفرق!
وبغصه كررت : ما عادت تفرق!
ناظرت قدر لي واقفه جنب حنين ويسمعون كلامها!
اقتربت من قدر وسحبتها وما تركت لها مجال تعترض ....
خرجت من الباب بعد ما لبست النقاب بإهمال ...رفعت نظرها وهي تشوف فارس واقف قريب من الباب ويسمع حديثهم!
ناظرته بكره وتوجهت للخارج بخطوات سريعة...تبغى تبعد عن هالمكان الي يخنقها!
بعد وقت جلست بالحديقة على الارض وانفجرت بالبكاء ...بداخلها تراكمات ما تقدر تكتمها أكثر من كذا! قدر اقتربت منها: ماما
رونق ما ردت عليها وهي مستمره بالبكاء ولسان حالها يردد
«
اريد ان اطير بعيدا............عن سواد القلوب
بعيدا عن سوء الظنون...
بعيدا عن الكذب.....
بعيدا عن النفاق...
بعيدا عن البشر الذين يرتدون ألف قناع ....
*منقول
**
**
**
جالسه بالصالة والهدوء مخيم عليها ..وكأنها بعالم لوحدها.... موجوعة حد الصميم!
نقزت من صوت جراح خلفها: مساء الاناناس لأحلى ناس!
ناظرته وهو يبتسم وبيده ورده حمراء لها!
ما لها نفس بشيء ...وبروح ميته أخذتها بدون أي تعليق!
حاولت تجامله وتبتسم بس ما قدرت!
جلس باستغراب وهو يشوف الحزن والصمت مخيم عليها: وش فيك ؟ !
احد زعلك بشيء هنا!
هزت رأسها بالنفي: لا
جراح رفع حاجب : يعني اليوم اتصل فيك جوالك مغلق ورجعت للبيت قبل ما يخلص دوامك وقدر معك !
صار شيء بينك وبين فياض!
ردت بصوت مبحوح من كثر ما بكت بالحديقة: ما صارشيء
بس أنا مزكمة!
وقف باهتمام الحين اعمل لك
قاطعته وهي تمسك يده : ما ابغى شيء ..انت ارتاح !
رن جواله .....رد بهدوء: هلا يمة....ان شاء الله ...جاي الحين!
ناظرها بعد ماقفل الخط : أنا طالع لأمي ما رح أتأخر!
هزت رأسها بهدوء!
وقفت بهدوء تتفقد قدر نامت وهي تبكي تبغى ديما !!
**
**
*
جالس مع أهله يخططون لعرس زياد وكلما بغى ينزل عند رونق تعترض أمه ويضطر يجلس!
راكان بقهر وهو يشوف أخوه وكأنه جالس على جمر يبغى الفرصة حتى ينزل عند رونق !
وضعه ما هو طبيعي ابدا !
متأكد انه مسحور!
ما في رجال يعمل كذا يحارب الدنيا حتى يتزوج بنت ما يعرفها !
لحظة بعد ما راحت رونق عند جدته صفية طلع جراح بسالفة الزواج!
شد على قبضة يده بقهر وهو يردد هالمشعوذة وش عملت حتى لعبت بعقله!
ناظر اخوه وهو يتكلم مع زياد ويبتسم.....مقهور على أخوه لأنه ما هو بوعيه!
جراح صاحب القلب الطيب ما يستاهل هالحشرة هذه!
بعد زواج زياد رح يتحرك وما رح يسمح لهذه المهزلة ابدا!
ام راكان وقفت بابتسامة لما دخلت صفية: هلا والله نور البيت!
سلمت صفية بفرح على ابنتها وعيالها ...مسكت يد جراح وهي تناظره بمحبه: كيف حالك يا ولدي!
جلس جنبها بعد ما قبل يدها : بخير يا جدتي انت كيفك!
مطت شفتها بزعل: لو يهمك حالي كان سألت عني!
من بعد الزواج قطعتني يا ولدي وما عدت تزورني!
ام راكان بكلام مبطن: ما وقفت عليك يا يمه تراه باعنا كلنا !
الله يسامحك يا جراح الي صرنا حنا أغراب وما لنا علاقة بحياتك !
هذه الحياة تدور الدنيا وولدك الي تعبتي بتربيته وبذلتي جهدك حتى يكون أحسن الناس يبعيك بالرخص
قاطعها جراح بعد ما تكدر خاطره: يمه!
انا وش قصرت معك !
ام راكان بعصبية: وش قصرت !
انت ما تشوف حالك من اول ما جلست وكل شوي تتحجج حتى تنزل عند الزفت الي تحت !
ما عادت تعجبك جلستنا!
صفية تهدي الوضع: ام راكان علامك معصبة كذا!
ترى عندنا فرح وما في مكان للنكد والزعل !
ما نبغى ننكد على العريس ...ناظرت زياد وابتسمت!
زياد بابتسامة: ربي يسعدك ي جدتي ويطول بعمرك!
**
**
**
**
قفلت الكتاب وناظرت ساعة الحائط الساعة وحدة و للحين ما رجع !
طلعت من الغرفة ...وناظرت باب غرفة جدتها ....توجهت لها اليوم كله ما دخلت عليها ...حست بحركة بالغرفة ...توقعت يكون جراح فتحت الباب ...ناظرت المكان ما في احد ...وام ناصر تغط بالنوم !
تنهدت وقفلت الباب وقررت تنام تريح رأسها من هموم الدنيا!
في اليوم الثاني صحيت مفزوعة فاتتها صلاة الفجر ...استغفرت ربها وقامت بسرعة ...ناظرت المكان جراح ما هو موجود !
استغربت معقول طلع !
صلت الفجر قضاء ...وجلست على السرير تفكر ...قدر مين يهتم فيها وقت دوامها !
ما تثق بأهل جراح تخاف يؤذونها!
او يجرحوها بالكلام!
طلعت من الغرفة البيت فاضي ....شكله جراح طلع على دوامه!
قررت تجهز قدر واليوم تأخذها على الجامعة !
جهزت أمورها وطلعت من البيت .....وقفت وناظرت بيت أبوها ....ما لهانفس تشوف أمها أو أبوها كرهت الحياة بسببهم !
ضياعها وتشتتها كله بسببهم !
وقفت لما ناداها نايف !
عفست ملامحها واقتربت منه وبهدوء نطقت: نعم
نايف بحدة: انت كيف تأخذين البنت
قاطعته رونق: وانت وش دخلك
رد بقهر منها: أنا أبوها
مطت شفتها بسخريه: يا حظها بهذا الأب!
نايف بمزاج سيء : رونق لا تخليني
قاطعته رونق بروح ميته: انتم ما عندكم شيء الا التهديد بس التهديد!،
نايف زفر بضيق: اسمعيني البنت ترجعينها عند فياض وإلا قسم بالله اسحبها منك واخلي سعاد تربيها وانت تعرفين عاد سعاد تحبها كثير!
أو اخفيها من الوجود وما أخليك تلمحين ظلها!
ناظرته بخذلان: على اساس دقيت على صدرك مستحيل اخليهم يلووون ذراعك بقدر وما رح احرمك منها ....كلكم كذابين ...منافقين!
نايف مسك يد قدر: أنا رح ارجعها عند فياض متى ما تخرجتي يصير خير .. الحين البنت وين تجلس وانت حضرتك بالدوام!!!
يا ليت تستخدمين عقلك هذا !
ناظر قدر وتكلم : الحين رح نروح عند ديما!
قدر ناظرت رونق: ماما أنا أبغى اروح مع بابا عند ديما...ما أبغى اجلس هنا !
رونق عقدت حواجبها باستنكار: بابا !
من متى هالمعرفة!
نايف ناظرها: ترى أنا أبوها إذا ناسيه!
تركها وغادر وقدر مستانسة .... رونق تناظر زولهم بعدم تصديق الحين هذه قدر!
قدر الي كانت ما تفارق ظلها ...الحين ما عادت تسأل عنها استبدلتها بعالم اخر !
وضعت يدها على قلبها ...قلبها يوجعها ما هي قادرة تستوعب الحياة!
رجعت ادراجها حتى تروح للجامعة ...وقفت بالشارع وهي تشوف سيارة جراح موجوده ..مباشرة ناظرت لجهة البيت لثواني وبعدها نزلت راسها بانتكاسه ...اكيد عند اهله جالس!
تنهدت وغادرت بهدوء!
**
**
**
ما حب يصحيها وهو يشوفها مستغرقه بالنوم ومع اتصال صفية وإصرارها يفطر معهم ...اضطر يطلع يفطر وبعدها ينزل !
ام راكان عجبتها اللعبة وهي تسحب جراح من رونق خطوة خطوة ...اكيد الحين مقهورة وميته بقهرها !
وقف جراح وهو يناظر ساعته : اسمحوا لي
صفية باعتراض: وين
قاطعها بتبرير: رونق عندها دوام اخاف تروح عليها نومه
ام راكان : لا تخاف ما رح يروح عليها نومة ومتى ما جهزت أكيد رح تتصل فيك ...انت اشرب كوب الشاهي وما عليك،!
جلس على مضض وعقله وتفكيره عند رونق !
رفع نظره لمريم وهي تضع صحن على الطاولة وهي تتكلم مع أمه : ان شاء الله خالتي!
كتم ضيقه وش ينقصها رونق لوتعايشت مع اهله مثل مريم !
وأمه وش يضرها لو تعاملت معها مثل مريم ! وش يفرقون عن بعض !
صفية بابتسامة تناظر راكان: ياحظك بزوجتك ما شاء الله عليها!
مريم بابتسامة : تسلمي يا جدتي!
راكان بنغزه: أنا أعرف اختار الزوجة الصح !
الزوجة الي تحترم اهلي وتقدرهم تكون فعلا تحبني وتقدرني لأنه احترامي من احترام اهلي!
هز جراح رأسه بضجر من هالسالفة ...وبنغزه: وكمان احترام أهلي لمريم احترام لك !
يعني لو ما احترموا أهلي مريم وقدروها أنا اعتبره قلة احترام لك يا راكان !
ام راكان رفعت حاجب : وش رأيك أنزل ابوس رجل زوجتك حتى ترضى !
انت بالأول شف زوجتك على حقيقتها وبعدها تعال قول هالكلام!
وش اكثر من إنها تطرد أمك عن الكوشة ؟!!!!
ااااااه منك يا جراح !
جراح بتبرير: يا يمه اقولك ما كانت تعرفك
صفية مطت شفتها: حتى لو ما تعرفها كيف تطرد حرمه كبيرة بهذه الطريقة!-
هذا يدل على قلة أدبها
قاطعها جراح : الانسان يرتكب اكبر المعاصي ويستغفر ربه وربنا يقبل توبته!
وحنا ما نسامح ولا ننسى!
راكان قاطعه : نشوف نهاية قلبك الطيب!
لكن لا تيجي بعد فترة ندمان!،ترى ما ينفع الندم بعد ما حملت زوجتك الموقرة!،
ناظره جراح : رجاء أنا احترم مريم ولا عمري غلطت عليها بحرف مثل ما أنا احترم زوجاتكم يا ليت تحترمون زوجتي لا
قاطعته ام راكان بقوة: مريم محترمه غصب عنك تحترمها ولا عمرها غلطت على الي اكبر منها ما هي مثل زوجتك لا تحترم لا كبير ولا صغير!
اخوانك راكان وزياد تراددهم بالكلام وتردح لهم وكأنهم بزران !
فياض بعمر ابوها لا احترام وبسببها امها الحين زعلانه في بيت وليد!
فتح عيونه بعدم تصديق ما عنده خبر بهذه السالفة!
راكان مط شفته بسخرية: نسينا نخبرك البارحه !
غريبة ما خبرتك زوجتك !
جراح عبس ملامحه وغادر المكان بدون ما ينطق حرف واحد!
الجازي زعلانه في بيت وليد!
رونق ما خبرته!
دخل البيت وتوجه لغرفة النوم ....ما لها اثر!
توجه لغرفة قدر ..المكان فاضي!
بسرعة توجه لغرفةجدته طرق الباب ودخل...رجع قفل الباب بهدوء وهو يشوف جدته نائمة!
مسك جواله واتصل فيها ...عقد حواجبه ..جوالهامغلق!
ليه جوالها دوم مغلق !
اكيد طلعت للدوام!
بس قدر وين ؟!!!
**
**
**
الجازي ناظرت أبوها بقهر: ما يحق لكم تمنعوني من
قاطعتها حنين بقوة: خلاص ترى قلبي طق من الغباء الي معشش برأسك !
تخربين بيتك علشان رونق
ترى ما وصلنا من هالتوأم إلا وجع الرأس!
وليد بهدوء: فكري بعقلك لو مرة وحده !
ناظري عيالك بعدهم أطفال ليه يتشتتون!
رونق كبيرة ومتزوجه
قاطعته وهي تبكي بحرقه تحس رونق جالسه تعيش حياة النبذ الي مرت فيها أيام زواجها من جواد : رونق يبه بالذات تختلف عن الكل ... أحسها جسد إمرأة لكن داخلها طفلة ...فياض قسى عليها بالكلام وجرحها وأنا أكثر من كذا ما اتحمل!
تراها إنسانه ليه يجرحها بالكلام!
انت ما سمعت وش قال لها لما جاءت بيتنا!
وليد بهدوء: يا جازي كمان رونق غلطت بالكلام!
ردت بدفاع: ما غلطت يا يبه والله ما غلطت أنا واقفه !
والكلام الي قالته تكلمت فيه بعد ما كلامه!
وليد بنرفزه: طيب يعني الحين تبغين الطلاق !
ولنفرض تطلقتي وش استفدتي؟!
البنت متزوجه وعايشه حياتها!
وانت؟
وعيالك وش مصيرهم؟!
حنين وهي تشوف عناد الجازي تكلمت حتى تنهي السالفة: ترى رونق البارحه كانت هنا!
الجازي مسحت دموعها وناظرتها بدون تصديق: رونق كانت هنا!
ليه ما احد خبرني
حنين بكذب: رفضت تشوفك!
جاءت وتكلمت وهي تتمسخر على عقلك الصغير...تقول الجازي زعلانه علشاني وأنا إذا موجوده ما أدري عنها!
الجازي صدمها الكلام وبعدم تصديق نطقت: مستحيل رونق تقول كذا
حنين رفعت حاجب : وليه ما تقول!!!
تقول عشت حياتي بدونها وما يهمني وجودها الحين..وجودها عدمه واحد ...ولما كانت تزورك كانت تزورك حتى تقهر جواد ومريم!
يعني كنت أداة غبية للانتقام !
وهذا أبوك كان موجود اسأليه!
الجازي صدمها الكلام ...ما توقعت رونق تقول هالكلام عنها !-
غمض عيونها للحظات بألم من الطعنات الي تلقتها من التوأم!
خلااااااص كافي ...عاشت حياتها على أمل تجتمع معهم!
لكن صدقوا لما قالوا الي ينكسر عمره مايتصلح!
وليد أعطى نظرات حادة لحنين على كذبتها!
حنين بلامبالاه بنظرها مصلحة الجازي أولى وما لها إلا هالحل!
تحركت الجازي بخطوات تائهة لإحدى الغرف ...وبداخلها وجع من قساوة التوأم!
**
**
*
**
جالسه بالقاعةتستمع للمحاضرة وبصعوبة قادرة تستحضر ذهنها!
انتهت المحاضرة وهي للحين جالسة بهدوء ..تفكر بحياتها ...كلما تزين حياتها تطلع لها سالفه جديده ...زمت شفتها باختناق وهي تحس جراح بدأ ينسحب من حياتها .. أهله ما رح يتركونها تكمل معه...يحاولون بكل جهدهم جراح يطلقها ...وضعت يدها على قلبها وهي تحس بوجع من الطلاق ..ما تتخيل تنفصل عن جراح ...
رفعت رأسها على دخول وعد ..تقدمت وعد بابتسامة نحوها: يا قاطعه وينك زمان ما شفتك!
رونق بهدوء سلمت وما جاوبت على سؤالها..ما لها خلق لأحد..
وعد ابعدت كتاب رونق وجلست مكانه: ايه وش أخبارك ؟!
رونق بملل: بخير !
وعد خزتها: وش فيك كذا زعلانه!
تعالي نجلس والله مشتاقه لك زمان ما جلست معك!
رونق بنفس الهدوء ..وقلبها يوجعها من كل شيء :وعد ممكن تخليها مرة ثانية!
ما لي خلق سوالف!
وقفت رونق وهي تجمع أغراضها : أشوفك مرة ثانية!
وعد وهي تمشي معها: رح أوصلك للمكتبة اكيد رايحه هناك!
سكتت رونق وما علقت!
وعد متعمدة تقهر زياد ..تكلمت بصوت يوصل لسمع زياد وهي تشوفه واقف ومعه شخص ثاني : الحين أعطيك عصيرك المفضل ورح تنسي العالم كله!
وختمت كلامها بضحكة رنانه!
ناظرتها رونق بعدم فهم ...وما انتبهت على وجود زياد وجراح ...مطت شفتها باستغراب متأكدة هالبنت عقلها ضارب!
من وين طلعت لها هالنشبة!
**
**
**
**

جراح كان واقف مع زياد جاي يبحث عن رونق بما إنه جوالها مغلق....ناظر زياد الي يتكلم بقهر: شفت بعيونك صديقة زوجتك!
شفت الأشكال الي مصادقيتهم!
وسمعت الكلام!
اذا ما تعرف ترى هذه البنت أبوها وأخوها مروجين مخد رات ...الله أعلم وش العصير المفضل لزوجتك!
جراح من الصدمة انلجم لسانه...وبدون ما ينطق حرف واحد توجه خلف رونق!!
وعد بحماس: وش رأيك اليوم تيجي معي صديقتي ليلى عامله حفلة بمناسبة خطوبتها
رونق تكلمت وهي مستمره بالمشي: وعد اطلعي من رأسي !
وعد بضحكه: يا اختي انت ليه كذا نكدية وحامله هموم الدنيا فوق رأسك!
تعالي وصدقيني رح تنسي كل همومك وما رح تندمي!
رونق هزت رأسها بأسف ما رح تتغير وعد وكل مره تلتقي فيها تلقاها غرقانه بالوحل اكثر !
وعد بصوت عفوي مرتفع: شوفي ولد خالتك فارس!
ناظرت رونق تلقائيا للجهة الي أشرت عليها ...وبعدها ناظرت أمامها بضجر!
وعد باستغراب: وش فيك كذا!
وبصوت هامس:مو على اساس تحبون بعض وأنا كنت المرسال بينكم وش صار حتى تزوجت غيره!
رونق وقفت بغضب وناظرتها: انت من وين تجيبين هالكذب والكلام !
وقف جراح لما شافهم وقفوا واستغرب وش همست لها !
وليه رونق انفعلت !
وعد بانحراح: تعرفين أحب أبهر السالفة يعني توقعت إنك بادلتيه نفس المشاعر ...بس لا تنكرين ترى فارس يحبك وخطبك وهو أرسلني حتى أخبرك وإلا ناسية!
بس نفسي أعرف ليه أهله رفضوك
عقد حواجبه بعد ما سمع بعض الكلام فارس خطب رونق وأهله رفضوا الخطوبة!
رونق ناظرتها بحده وهي تمشي: تدرين إنك وقحه
قاطعتها وعد بلامبالاه: براحتك لا تتكلمين ليه اهله رفضوا يخطبوك ...رح ييج يوم وأعرف..تدرين كان ودي أوصلك للمكتبة بس صديقي ينتظرني ... أشرت على الجهة المقابلة وما تركت لها مجال تتكلم وغادرت بسرعة وهي تشوف رونق الشرار يطلع من عيونها !
رونق زفرت بضيق من هذه الإنسانة كم مره قالت لها تبعد عنها لكن ما عندها كرامة !
تابعت خطواتها بملامح منزعجة من وعد وثرثرتها!
الحين سمية رفضتها وما تبغاها لولدها!
مطت شفتها بقرف يقال ميته عليها وعلى ولدها!
يمشي خلفها وألف علامة استفهام فوق رأسه من الكلام الي سمعه!
فارس خطب رونق!
واهله رفضوا!
يحس فيه حلقة ناقصة تخص رونق!
ليه الكل نابذها ورافضها!
ليه ما يشوفها بالنظرة الدونية الي يشوفها الباقي!
دخل خلفها للمكتبة..ونفس المكان المعتاد جلست ...قبل ما يقترب منها رن جواله...عقد حواجبه من المتصل...ابتعد كم خطوة ورد بهدوء: الو ...هلا..... أنا بمكتبة الجامعة ..ليه....مسروق! ....ما عندي علم !
طيب أنا انتظرك!
قفل الخط وزادت علامات الاستفهام فوق رأسه ....كتم قهره من تصرفات رونق!
توجه لجهتها ..سحب كرسي وجلس وهو عابس ملامحه ووعد نرفزته بقوة من كلامها وزاد قهره سالفة الجوال!
رونق تفاجأت من وجوده نطقت بخفوت: جراح!
جراح وهو يقفل الكتاب من أمامها وبنبره قهر نطق: ليت جراح يموت ويخلص من مشاكلك!
عقدت حواجبها باستنكار من كلامه.. يرحم أيام الخطوبه لما كان يجلس معها هنا وكلامه المعسول ..الحين تحسه يبغى يأكلها من الغيض وباين إنه ما هو طايقها ...نطقت بخفوت والكآبه تخيم فوقها : وش صاير!
جراح زفر وسأل بهدوء: وين جوالك اتصل فيك مغلق!
رونق بأسلوب ملتوي تغير السالفة...ما لها خلق لمشكله جديده : وليه متصل فيني؟ صاير شيء؟!
جراح تكتف وأسند ظهره على الكرسي: أبد سلامتك اتصلت اتعرف عليك!
تقدم بجسده للطاوله وهو ينطق بحده : رونق لا تجلطيني!
كم صار لي اتصل على جوالك وهو مغلق!
ليه جوالك مغلق!
وين جوالك؟
رونق تنهدت  ما تدري  وش فيه معلق على سالفه الجوال ...وببرود قهره نطقت : ما هو معي
قاطعها وهو ينطق بغيض من تكتمها : انسرق!
انخطفت ملامحها وهي تناظره للحظات....بعدها صدت عنه وبهدوء نطقت: إذا جاي تتشاجر ترى هنا ما هو مكان للشجار تقدر تؤجل هالشجار للبيت حتى تأخذ راحتك بالصراخ
وقف وهو يمسكها من يدها بهدوء ظاهري: تعالي معي!
أبعدت يده عنها بطول بال: اتركني ما رح أهرب!
ناظرها بحده وتابع خطواته لخارج المكتبة...وهو ماسك يدها ....
**
**
**
جالسة بالسيارة
تناظره بعد ما قفل جواله ....تنهد وتكلم بهدوء: رونق وين جوالك
قاطعته حتى تخلص من هالسالفة: ما أدري هو ضاع وإلا انسرق!،
وما أعرف وين فقدته!
وغير كذا ما أعرف!
مط شفته من برودها: يا برودك!
طيب متى فقدتيه
ردت بنفس البرود : لما طلعنا مع فياض آخر مرة من وقتها ما أدري عنه!
رفع نظره للاعلى يمسك نفسه من تصرفاتها الغبية: ولا ناويه تتكلمين!
والزفت فارس وش سالفته!،
وهذه البنت الي كنت ماشية معها من وين تعرفينها! عقدت حواجبها باستغراب...وش عرفه بذي السوالف!
تكلم بنرفزه: جاوبيني !
ليه ساكته!
ليه ما تكلمت عن الجوال؟!
رونق تحس بالضيق يخنقها ..ردت بهدوء ما تبغى تفتعل مشكلة جديده مع جراح .. يكفي الأوضاع المتكهربه بينهم : لأني ما أضمن وش رح تكون رد فعلك عن السالفة!
صفر بتعجب: ما شاء الله كل هذا خوووووف!
رونق تراك
سكت ما يبغى يتكلم ويجرحها بالكلام ما تهون عليه!
هز رأسه: طيب وش قصة فارس
قاطعته بحاجب مرفوع: انت وش عرفك
رد بنبرة ساخرة: ما شاء الله الي جنبك صوتها مثل سماعة المسجد !
كتمت ضيقها من وعد وثرثرتها ...ونطقت بتوجس: كنت خلفنا !
هز رأسه بدون ما ينطق بحرف ينتظر منها تتكلم!
تكلمت ببرود: ما في قصة ولا شيء خطبني مرة وما صار نصيب
سأل بحاحب مرفوع : وليه رفضوا أهله الزواج؟!!
رونق تحس نفسها تحسست من كلمة الرفض.....كل الي حولها رافضينها .....نطقت بجمود: روح اسألهم ليه رفضوا!
وبعدين انت جاي تفتح لي تحقيق مين خطبني ومين
قاطعها بتحذير: هذه البنت إذا شفتك واقفه معها ما رح يصير خير فاهمة!
زفرت بضجر مين أرسله لها حتى يجلس فوق رأسها يعطي دروس وكأنه ناقصها هالكلام..وفاتح معها تحقيق ..ما هي طايقه نفسها ..وما هي حليمه حتى تمسك نفسها ...نطقت بتسليك : إن شاء الله!
تنهد لما سمع جوابها توقع إنها تعاند ...وبنبره حانيه مغايره لكلامه من قبل : رونق لا تزعلين مني أنا أبغى مصلحتك هذه البنت انا مو مرتاح لها
تحس ما عادت تتحمل منه أي كلمه ...خلاص ما بقى شيء على انفجارها ...قاطعته بضجر:خلاااااص  قلتلك ما رح اكلمها!
رفع حاجب من ردها ....تجاهل نبرة كلامها وتكلم وهو يناظر فياض نزل من سيارته وتوجه لهم : هذا فياض ما أبغى مشاكل معه
ردت بقهر من فياض دوم طالع بوجهها : ما أبغى أشوفه ولا أكلمه رجعني للبيت الحين
جراح زفر بضجر: فصبر جميل!
نزل من السيارة ووقف يسلم على فياض...فياض ملامحه ما تتفسر ...وبغضب مكبوت داخله تكلم : أنا لو أذبحها ما أحد يلومني!
جوالك مسروق وانت منكتمه ولا عبالك تتكلمين!
جراح ناظره : كل شيء ينحل ما له داع لهذا الكلام رجاء!
فياض نزل رأسه وناظرها وهو يسألها : جوالك فيه صور؟!
ناظرته رونق وهو منفعل ...مطت شفتها بسخرية من هالسؤال وما ردت لأنها ما تبغى تكلم هالانسان لأنه أذاها وجرحها كثير ...ما توقعت بيوم من الأيام فياض يعمل كذ ا!
فياض وهو يشوف إنها متجاهلة  وجوده وكأنه جدار ...ناظر جراح: شايف بعينك!
جراح بهدوء:اتركها أنا أحل الموضوع!
فياض بضيق من تصرفها : بلغ عن الجوال بالمركز!
جراح هز رأسه: هذا الي رح يصير!
فياض رجع ناظرها: ممكن تتكرمين علينا وتقولين وين فقدتيه ومتى؟!
جراح مسك كتف فياض لأنه متأكد رونق ما رح ترد عليه ....وبهدوء نطق: تعال نجلس هناك!
حضنت نفسها بانكسار ...وكل حياتها تمر أمام عيونها!
طول عمرها من بسطه لبسطه حتى تأكل اللقمة ... انسانه ما لها وجود بين الناس ...عاشت وإلا ماتت مين رح يسأل أو يهتم لها !
منبوذه من الكل!
النظرة الدونية وكأنها حشرة !
هم وين وهي وين !
ليه أقحمت نفسها بينهم المفروض انسحبت من البداية!
الكل رافض وجودها .. إلا ثلاثه
جواد
الجازي
الواجب يحتم عليهم يتقبلون وجودها!
جراح!
اه من جراح لغز ما هي قادرة تفهمه!
ما هي قادرة تتصور إنه فعلاً يحبها !
احد يعشق ويحب من العيون!
ويرمي كلام أهله خلف ظهره !
مسحت دموعها بخفة ...ورجعت تكورت على نفسها وهي تحس نفسها ضايعة بهذه الدنيا!
عند جراح الي يكلم فياض: رجاء لا تكلمها كذا!
فياض هز رأسه بقلة حيلة: طول عمري امسك أعصابي وبالي طويل .. إلا هذه البنت ما أدري تطلعني عن طوري وأعصب بسرعة !
يعني وين الجوال رح يكون أحد سرقه!
جراح بتفكير: الي أخذ الجوال هو الي نزل الصور !
فياض صك على أسنانه بقهر: ألف مرة قلت لها لا تصورين بجوالك
جراح تنهد  : المشكلة جوالها كله صور وما عليه قفل
فياض بغيض سأل: والجازي لها صور!
جراح بتردد هز رأسه: شفت لها اكثر من صورة
قاطعه فياض بغضب: يا ربي صبرني على ذي المخلوقه!
انا لو اذبحها احد يلومني !
جراح باستفسار: للحين زعلانه خالتي الجازي؟!
فياض بضيق : رجعت لكن الأوضاع ما هي مستقرة .... المشكلة انها الجازي تنفعل وتفكر بقلبها ما تفكر بعقلها !
الكل يقولها أولادك الصغار أهم من هالرونق لكن عقلها ما هو مستوعب !
ما ادي وش قالت لها زوجة خالي واقنعتها وحتى فارس كان هناك وكلمها
رن اسم فارس بإذنه ...سأل بهدوء:-فارس متزوج!
فياض هز رأسه بالنفي: لا للحين ما تزوج خليه بالأول يتخرج
جراح يسحب الكلام: غريب كونه الكبير عادة الأهل
قاطعه فياض بغموض : هو كان يبغى بنت بس اهله رفضوا
جراح وصل لمربط الفرس: غريب وليه رفضوا!
فياض هز كتوفه: ما يشوفون بينهم تناسب!
واهل البنت علاقتها مع ابو فارس مو ذاك الزود!
جراح معقد حواجبه: طيب البنت كانت موافقه عليه!!،
فياض ناظره بشك من اسئلته: ما ادري عنها واصلا ما صار شيء فارس قال لأهله عنها ورفضوا وما كلموا اهل البنت ...الحين اتركني من فارس و رونق!
جراح رفع حاجب: رونق وش دخلها!
فياض بتورط: خربطت ...ترى زوجتك ما تركت فيني عقل!
الحين انت روح وبلغ عن الجوال لعل وعسى نلقى حل !
جراح هز رأسه وتكلم برجاء: لي طلب عندك!
هز رأسه فياض: تفضل!
جراح بهدوء: رونق لا تكلمها بذي الطريقة!
لا تكسر خاطرها
قاطعه فياض بضيق: اقسم بالله إني اعتبرها مثل ابنتي بس هي مستفزة بشكل ما هو طبيعي!
تظن الناس تمشي على مزاجها!
يا عمي في عادات وتقاليد لزوم نحترمها!
جراح هز رأسه بتفهم: بس أنا متأكد إنها رونق ما نزلت المقاطع
فياض وللحين قلبه يغلي منها : كان بإمكانها من البداية تقول ترى جوالي ضاع او انسرق حتى نتصرف ...يعني فوق غلطها متكتمه على السالفة ومتهمه وسيم إنه الي سرقه!
ما أدري كيف تفكر ...لنفرض وسيم أخذه من عقلك وسيم ما هو صغير حتى ينزل مقطع فيه صورة أمه!
تراه بالمتوسط ما هو طفل صغير!
جراح زم شفته بحيرة: والله شيء يحير
وقف فياض وتوجه لجهة رونق...فتح باب السيارة من جهتها وبهدوء نطق: رونق
رونق صدت عنه وبنبره مخذوله وفيها حزن عميق: لا تقول أي شيء لأني خلاص اكتفيت منكم ومن نظراتكم ومن اتهاماتكم!
أنا آسفه إن غلطت بحقك ... أنا قفلت صفحة الماضي للأبد ولا كأني عرفتكم من قبل ولا أبغى أعرفكم!
أنا فتحت صفحة جديدة ما فيها إلا جراح وقدر ...وحتى جواد اعتبره ولد عم زوجي ...وغير كذا ما أبغى أعرف!
خلاص انتهى كل شيء!
والجازي لك وعد مني ما رح اقترب من صوبها ...وربي يسعدكم وانتهينا!
فياض يناظرها بصدمة من كلامها ..وقبل ما يتكلم وضع جراح يده على كتفه وبنبره راجية: ابو وسيم!
ناظره فياض للحظات وبعدها هز رأسه بتفهم: إن شاء الله!
بعد وقت قصير غادر فياض المكان..توجه جراح للسيارة ...حرك وهو يناظر رونق: الحين نرجع للبيت نأخذ كرتونة الجهاز حتى نبلغ عنها
قاطعته بروح خاويه وعيونها للأمام : ما له داعي انا بلغت عن الجهاز!
فتح عيونه باستنكار: بلغتي!
رونق عقلك ضارب ؟! انا وين حتى
قاطعته بصوت هادئ حزين وهي تبرر له: قلت لك ما كنت أعرف وش رح تكون رد فعلك علشان كذا أعطيتها لصديقتي وهي أعطتها لأبوها وبلغ عنه!
مط شفته بقهر: يعني وش رح تكون رد فعلي!
جوال انسرق وش رح اعمل؟!
احيانا تفكرين بطريقة غريبة جدا!
عم الهدوء المكان كل واحد غارق بأفكاره....بعد وقت وقف ونزل من السيارة...نزلت النقاب وهي تحاول تجمع أكبر قدر من الأكسجين ....تحس وكأنها تتنفس من خرم الابرة!
غطت وجهها لما اقترب من السيارة....دخل السيارة ومعه كيس صغير!
فتح الكيس وهي تناظره باستغراب معه جوال جديد ...ركب عليه خط جديد!
بعد لحظات مد لها الجوال وبتنبيه: ما أبغى عليه ولا صورة لك لو انسرق او ضاع بقلعته فهمتي!
تناظره ويده ممدودة بالجوال..وش تبغى بالجوال ...ما في احد تتواصل معه من حولها ..حتى جراح متأكدة فتره وينتهي كل شيء بينهم ...وبغصه نطقت: ما أبغى جوال
قاطعها بحده: رونق ترى
زفرت بضجر بعد ما أخذته: كل شيء بالغصب!
ناظرها بحده: ايه كل شيء بالغصب!
تنهد وبابتسامه متعبه نطق: يعني كيف تبغين أتواصل مع نصفي الثاني!
يعني انت بالجامعة لما ينتهي دوامك كيف أقدر أمرك!
وانا بالدوام كيف اطمئن إنك بخير!
ناظرته وانرسمت على وجهها شبح ابتسامه ...لو تلف كل الكون ما تلقى مثل جراح ...
**
**
**
يوم زواج زياد
تكلمت بضيق: قلت لك ما أبغى أحضر!
خلاص ترى
جراح بعناد : رح تحضرين وخلي كل الناس تشوف زوجة الدكتور جراح!
مطت شفتها بقلب ميت: ما لي مزاج احضروعندي دراسة
قاطعها بحزم :معك ساعتين وتكونين جاهزة!
ناظرته باستنكار : ساعتين!
ناظرها بحاجب مرفوع: ما تكفي! كم ساعة تبغين؟!
ردت بابتسامة ميته : خمس دقائق
فتح عيونه باستنكار: خمس دقائق!
اسمعيني الحين أخذك لأي صالون تزينك تبغين تحضرين بالعباية بأحلامك!
ردت بملل: خلاص بعد ساعتين اكون جاهزة ما له داعي للكوافيرة
ناظرها بتأكيد: متأكدة؟!
هزت رأسها بابتسامة باهته : متأكدة!
تنهدت بعد خروجه .. بدأت المويه ترجع لمجاريها مع جراح ...بس أهله مثل الشوك بينهم ..ما تدري اذا تقدر تتحمل علشانه وتكمل معه وإلا رح ترفع رايه الاستسلام وتطلع من حياته؟؟
**
**
**
ام راكان جلست بعناد: إذا الحرباية الي تحت رح تحضر الزواج أنا ما رح احضر!
صفيه بانتقاد: وليه إن شاء الله!
ترى كل العالم تعرف إنها كنتك !
تبغين تنشرين غسيلنا قدام العالم !
مريم تنتظر دورها حتى تجهز نفسها: اخاف تصير مشكلة بوجودها
صفية بهدوء  : لا تخافين ما رح تعمل شيء ... أنا موجودة أقص لسانها إذا
ام راكان زمت شفتها بقهر: تراك ما تعرفينها اكيد مخططه لشيء!
وإلا وحده بعقلها أهل زوجها كلهم مقاطعينها ترز وجهها عندهم ليه!
اكيد ناوية على شيء!
يمكن مخططة تخرب الزواج
ام لؤي وهي تعلك : خليها تعمل شيء وقسم بالله إلا نمسح فيها القاعة!
اتركيها تحضر ما نبغى مشاكل!
ومثل ما قالت جدتي ما نبغى العالم يعرفون قصة حياتنا!
وأكيد الناس رح تسألك وين زوجة جراح!
ام راكان وافقت على مضض ..لكن بداخلها متوعدة فيها ان عملت حركة من هنا او من هنا إلا تعجنها بين يدينها !
**
**
••
**
**
مر الوقت واقترب موعد الحفلة ..ناظرت جوالها يرن ..ما فيه إلا رقم جراح....ردت بهدوء الو ....الحين جاي..انتظر خمس دقائق واكون جاهزة....بس....طيب طيب!
قفلت الخط وناظرت كتبها ...مر الوقت بسرعة وانشغلت بالبحث....عندها دراسه وما هي فاضيه لخرابيط جراح وكأنها ميته حتى تشوف أهله ..ما تدري كيف يفكر .....وقفت بملل ناظرت نفسها بالمراية...وجهها شاحب ...ما يمداها تجهز الحين ...سمعت صوت السيارة ....لبست العباية وغطت وجهها بسرعة ...توجهت للخزانة اخذت كم غرض ....وتوجهت للميك اب وضعت بالشنطة الأمور الي تحتاجها!
وطلعت من الغرفة بسرعة....وقفت برعب لما شافت جراح بوجهها : اوففففف اوقعت قلبي!
جراح ضحك بخفة : قلت اناديك لأني مستعجل
هزت رأسها بهدوء: يلا
وقفهابابتسامه: لحظة خليني اشوف وش عجبتي على وجهك!
بلعت ريقها وبسرعه نطقت: مو الحين تاخرت
وما أعطته فرصه وبسرعة توجهت للخارج!
في الطريق جراح برجاء: رونق أتمنى يمر الزواج بسلام بدون مشاكل!
يعني حاولي تكبرين عقلك وما
قاطعته بانزعاج: هذا الكلام المفروض تقوله لأمك وأخواتك لأني ما أتدخل بأحد لكن أمك
قاطعها بانزعاج: أمك؟!
تراها ام زوجك يعني خالتك يا رونق
قاطعته بلامبالاه: خليها بالأول تعترف فيني اني زوجة ولدها وبعدها يصير خير!
مط شفته بسخرية: كيف تعترف وانت معتزلة وما تخالطين أحد!
يا رونق قلت لك بالبداية رح تكون صعبة لكن مع الأيام رح يكتشفون إنك
قاطعته بعدم اقتناع: أمك أقصد خالتي لو ابني لها قصر ما حبتني ولا رح تتقبلني!
نطق بنرفزة: وانت كذا تحكمي!
جربتي؟!
نطقت بقهر : أمك مجرد سلام ما رضيت تحط يدها بيدي تبغاني أبوس رجولها
قاطعها بقهر: خلاص غلطنا ومنك السماح انتبهي تتنازلي وخليك كذا مثل ما انت ..معتزله العالم!!
قاطعته تحاول توصل له وجهة نظرها: يا جراح أنا ما حقدت على أهلك بس هم كارهيني كله بسبب راكان
قاطعها بضجر: الحين دخلتي راكان!،
يا رونق افهميني صدقيني المعاملة الحلوة مع الناس مع الوقت تشيل الأحقاد والبغض بين الناس...يعني لو طلعتي عند أمي وأخذني معك هدية وابتسمت بوجهها وتكلمتي معها بأسلوب طيب مرة على مرة القلوب تتصاف
قاطعته بتفهم: انا فاهمة عليك ...بس صدقني خالتي ام راكان مستحيل تتقبلني
قاطعها بضجر من عنادها: شفتي انك ما تبغين
ردت بمقاطعة :طيب مثل ما تبغى رح امشي مثل ما تقول ونشوف آخر السالفة
ابتسم وهو يناظرها: ايوه كذا!
اسمعيني الحين بالحفلة أبغاك سنعة والناس كلها تقول يا حظ ام راكان بهذه الكنة ...كوني لأمي مثل ظلها وابتسمي بوجهها من قلبك لعل وعسى تنصلح الأمور!
هزت رأسها بتسليك : رح أكون مثل ظلها ورح ابتسم بوجهها ورح اخلي كل الحريم تقول يا حظها بهذه الكنة!
كذا تبغى!
هز رأسه بابتسامة بعد ما غزى قلبه أمل إنه الأمور تتصلح ويعيشون بسعادة!،
**
***
**
ام راكان منشغلة باستقبال الناس ....همست لها ام لؤي : زوجة جراح وينها ؟! الحريم تسألني عنها ؟!،
ام راكان عفست ملامحها: الله لا يجيبها!
صفية اقتربت بانتقاد: رورق وين ؟!
ام راكان مطت شفتها : ما ادري !
اصلا متأكد ما رح تحضر حتى تفشلنا قدام الناس !
ام لؤي رفعت حاجب: يعني مريم تعبانه بالمستشفى وحضرتها وين !
معقول ولا كنة يحضرون الزواج؟!
والله الناس تنتقد وتتكلم!
ام راكان زمت شفتها بقهر: اي أحد يسالك قولي جدتي تعبانه وما رضيت تتركها!
ام لؤي أشرت على إحدى الطاولات: يمه وش فيك جدتي ام ناصر جالسه هناك!
ام راكان ضربت جبهتها: عقلي ضارب!
خلاص قولي مندفسه مع أختها بالمستشفى!
ام لؤي اشرت بعيونها: يمه شوفي الجازي هنا مع ام فياض!
كيف قالوا إنها زعلانه!
صفية: لا تصدقين كلام الناس!
اروح أسلم على أم فياض!
ام لؤي: اتصل على جراح اشوف
قاطعتها ام راكان بتحذير: يا ويلك الحين تظن ميتين عليها! بقلعتها!
**
**
**
**
جالسه بإحدى الغرف بضجر ...نسيت أغراضها والحقيبة مع جراح حتى الجوال بالحقيبة!
وما تقدر تدخل كذا اكيد رح يفسرون الموضوع إنها قاصدة تفشلهم!،
نعسانة بقوة بس ما هو وقت النوم الحين ....اعطت جراح كلمة إنها تشارك أهله بالحفلة وتحاول تصلح الأوضاع ...بس بهذا الحال ما ينفع !
لزوم تلقى حل لهذه المشكلة!
رفعت نظرها للسقف وهي تفكر بالحل!
*
**
**
الجازي جالسة وبعيونها تبحث عن رونق...بس ما لها أي أثر ... حتى مريم ما هي موجوده !
غريبة ليه ما حضروا الزواج!
نغزها قلبها ...رونق يمكن ما حضرت لأنه العلاقة بينها وبين بيت حماها زفت ..بس مريم علاقتهم حلوة!
بالرغم إنها كثير تعاهد نفسها إنها ما رح تسأل عن التوأم الي اوجعوا قلبها ..لكن قلب الأم يحن بسرعة: عمتي ما أشوف التوأم
ام فياض مطت شفتها: انت للحين تراكضين خلف التوأم !،
الجازي عفست ملامحها من رد عمتها: يا عمتي تراني ام!
ام فياض هزت رأسها بتفهم: لحظة !
شافت صفية مقبلة عليهم .....وقفت وسلمت عليها بحرارة...بعد ما جلست والسؤال عن الحال والأحوال تكلمت ام فياض: غريبة ما أشوف زوجات عيال ام راكان!،
المفروض يكونوا بالحفلة
قاطعتها صفيه بهدوء: مريم تعبت شوي والصبح دخلت المستشفى
الجازي بخوف ما قدرت تخفيه: وش فيها!
صفية : لا تخافين يقولون سقطت الجنين!
الجازي عفست ملامحها: نزل الجنين!-
ام فياض بتأثر: ما نعرف انها حامل
صفية: ما خبرت احد ...مسكينة كلما تحمل يموت الجنين!
ام فياض: إن شاء الله ربنا يعوضها !
صفية هزت رأسها: آمين !
الجازي تأثرت لحال مريم وقررت تزورها بعد الحفلة حتى لو كانت مريم هاجريتها قلبها ما يطاوعها تقسى عليهم!
لأنها الي اكتشفته مريم شخصيتها ضعيفة وكلمة تأخذها وكلمة ترجعها!
رفعت نظرها لما سألت ام فياض عن رونق: وزوجة جراح وين ؟!
صفية هزت راسها بأسف: هذه البنت ما منها فائدة!
ما كلفت نفسها تحضر الزواج!
تخيلي من لما سكنت عند جدتها ولا مرة طلعت على ام راكان !
ولا تتصل معها ولا تتفقدها ولا تحترمها!
وجراح تارك لها الحبل!
لا تزعلين مني يا أم وسيم بس هالبنت أطباعها غريبة ولا كأنها من هذه العائلة!
حتى أطباع أهل أمها ما أخذتها!
اطباعها ما ادري كيف!
الحين وش يضرها لو حضرت هالزواج؟!
ام فياض مطت شفتها: الله يصلحها هالبنت رافعة خشومها للسماء!
وناظرت الجازي: لا تناظريني كذا!
إذا انت أمها ما احترمتك وقالت عنك كلام ثقيل لحنين!
الجازي مقهورة من رونق تتكلم عليها كذا ...وعلشانها كانت رح تفقد استقرار أسرتها ويتشتت عيالها بسببها وبالأخير ما قدرت تضحيتها!
خلاص وصلت لحد عدم المبالاة من تصرفات التوأم كل وحده فيهم صار لها حياة وانتهى زمن التضحيات!
رح تكمل حياتها بسعادة مع فياض وعيالها ...دام انهم التوام بخير ما عاد شيء يقلق حياتها!،
ام فياض ابتسمت براحة جلوس فياض ووليد مع الجازي لمدة ساعة قلبوا عقلها ورجعت لوعيها !
**
*•
**
**
ام جواد تحوس بالقاعة وتبحث عن رونق .....ما تبغى تكون منبوذة من أهل جراح ...لزوم يتقبلوها ...وبنبره هامسة مقهورة نطقت لنغم: هذه البنت غبية بدل ما تصلح أمورها مع أهل زوجها تقوم تعمل كذا !
أغلب الحريم تسأل وين زوجة جراح !
نغم هزت كتوفها: والله يا خالتي الزمن يعيد نفسه مثل ما نبذتم أمها رجع الزمن وابنتكم
قاطعتها بقهر: بس رونق منا وفينا وما يصير ام راكان تعمل كذا !
يعني تبغى تطلقها والناس تأكل وجهنا يقولون ولد عمها طلقها!،
لكن بأحلامها والله طول ما أنا عايشة رح يعترفون فيها غصب عنهم ....
نغم : طيب اتصلي بجراح وشوفي ليه ما حضر
قاطعتها : صادقة الحين اشوفه!
طلعت مع نغم خارج القاعة واتصلت فيه لكن ما فيه إجابة: هذا ما يرد على الاتصال!
انا رح أموت بسبب هالبنت ما هي عارفة تضبط أمورها!
لا حول ولا قوة إلا بالله!
أنا ما قاهرني إلا ام ربيع جالسه تحوم حول الكلام تخيلي تقولي « وين زوجةجراح يقولون انهم رح ينفصلون »
نغم فتحت عيونها: وهذه من وين لها الأخبار؟!
ام جواد بقهر: تقول سمعت من الحريم هالكلام يبغى يطلقها لأنها جوكر ويبغى يتزوج وحده يتصبح بوجهها تكون مثل القمر ما هي مثل رونق إن شافها ظنها الشغالة !
قهرتني بكلامها!
ومتأكدة هالكلام منها هي ...ولدها الزفت لما جاء وشافها يقول ظنيتها الشغالة !
والحين تلاقينها بين الحريم تبث سمومها !
نغم ناظرت حماتها والظاهر ضغطها مرتفع: تعالي يا خالتي اجلسي بهذه الغرفة ارتاحي
ام جواد برفض مسكت الجوال واتصلت على ابنها!
•*
***
**
**
جواد بملل من تصرفات رونق: يعني يا يمه وش اعمل؟!
هذه البنت خلاص أنا مليت من تصرفاتها!
تخيلي إذا أنا ابوها ما تسأل عني إذا ما مريت عليها وشفتها ما تسأل ولا تقول عندي أب أزوره ما يفصلها عني غير باب...تبغينها الحين تراعي بيت ابو راكان انا أبوها وما احترمتني ...خليني ساكت احسن ترى داخلي قهر منها ما يعلمه إلا الله!
ام جواد بضيق : بس
جواد بقرف: وقسم بالله احيانا افكر اروح اعتذر بنفسي للجازي عن الماضي لعل وعسى اخلص من مشاكل رونق ...وكأنها حوبة الجازي ...تخيلي جوالها مسروق !
وحضرتها ما خبرت احد ....والي سرق الجوال هو الي نشر المقاطع لأنه جوالها ما عليه قفل!
أنا طق قلبي من تصرفاتها ما أدري وين تبغى توصل ما أعرف !
ما اقول إلا الله يعين جراح على ما ابتلاه لأنه
قاطعته ام جواد : بعدها جاهلة وما تعرف العادات والتقاليد هنا .... يعني يرضيك ترجع لك مطلقه!
لزوم تتصرف وتضع حد لهذه المهزلة انت أبوها!-
جواد عفس ملامحه: طيب إن شاء الله بكره يصير خير !-
*
*
*
*

رفعت نظرها باستغراب وهي تشوف وحده داخله الغرفةتلقائيا وقفت !
البنت ناظرتها باحراج: ظنيت ما في احد هنا!
رونق هزت رأسها وما علقت!
البنت بضجر: خنقني هالفستان ضيق مب قادرة اتحرك فيه
ابتسمت رونق على ملامح البنت وهي عافسه وجهها!
البنت باستغراب،:انت ليه جالسه هنا!
رونق هزت كتوفها: اغراضي نسيتهم بالسيارةمع زوجي وما ينفع ادخل كذا !
اكيد حماتي رح تعمل لي قصة!،
وإلا أنا مو فارقه معي ادخل بثوب الصلاة!
انت وش تقربي للعروس
قاطعتها بضحكة: العروس تكون صاحبة بنت خالتي!
وما أعرفها بس انا في كل عرس لزوم احشر نفسي وأحضر
وانت وش القرابة بينكم!
رونق بغت ترد بس سكتت وهي تشوف جدتها داخله الغرفة وبفجعة نطقت: رونق انت هنا!
رونق هزت رأسها بملل : لا هناك!
نغم خزتها: رونق
أم جواد بهجوم: انت وش تعملين هنا!
وليه ما جهزتي نفسك؟ !
رونق بهدوء جلست: نسيت أغراضي بالسيارة مع جراح!
وجوالي معه بالسيارة
ام جواد بقهر من برودها: وليه ما جهزتي نفسك بالبيت
رونق ببرود: انشغلت بالبحث وما بقى عندي وقت
ام جواد بقهر: يا بروووووووودك!
رح تصيبني جلطة من هالبرود!
يا اختي أنا نفسي أدخل عقلك واعرف كيف تفكرين ... أحد يحضر الحفلة كذا!
قالوا لك فتحوا جناح خاص هنا لك علشان تتزينين!
كل الحريم تدخل وهي متعدله وانت طالعه من بيتك وكأنك رايحه لعزاء!
حسبي الله رفعتي ضغطي!
والحين وش الحل!
ناظرتهم البنت: معي فستان ثاني جبته احتياط خفت يتقطع الفستان من كثر الضيق
ناظرتها نغم وفعلا الفستان بأنفاسه الأخيرة!
ام جواد : الحفلة دوبها بدأت في وقت اعطيني اشوفه
لحظات ومدت لها بالفستان...رونق برفض: لا جدة انت من عقلك تتكلمين
ام جواد بغضب: لاعي ...اقول تحركي جربي الفستان
وتتدلل بعد!
يا شين السرج على البقر !
نغم بنصيحة: رونق جربي ما رح تخسرين شيء!
ما هي حلوة قدام جراح إنك ما حضرت الزواج!
مطت شفتها بقهر من كلام جدتها : وليه قالوا لك عني بهيمة ما يطلع لي اتدلل!
ام جواد بغيض من تصرفاتها: ايه وترادد بعد!
اقول تحركي أنا أراكض حتى اصلح الأوضاع وإنت ولا على بالك!
تنهدت بحيرة ...أعطت جراح كلمة إنها تحاول تصلح الامور!!!
وازنت الأمور براسها ونطقت: أعطيني الجوال أكلم جراح
أم جواد تنرفزت من عنادها: الحين تلاقينه عند الرجال ما هو فاضي....تحركي اففففف من هالعناد الي برأسك!
تحركيييييي!
البنت بضحكة: الحين ربع ساعة اطلعها باربي !
كيف مكياجي انا مسويته بنفسي!
نغم ناظرتها وابتسمت مكياجها ناعم وحلو : وش رايك تعدليلي مكياجي احس
قاطعتها ام جواد بنرفزة: خلينا بالأول نخلص من ام المصائب وبعدها يصير خير!
**
**
**
جالسة الجازي تتكلم مع أم فياض باندماج ...قطعت كلامها وهي تشوف أم جواد داخله وماسكه بيد رونق بتملك ..أوجعها هالمنظر لما تشوف الناس أقرب لبناتها منها!
ام فياض رفعت حاجب بتأمل: أول مرة أشوفها كاشخه كذا!
تدرين تشبه أبوها كثير!
رونق الي كانت تسحبها أم جواد للقاعة غصب عنها ما انتبهت لوجود الجازي وأصلا ما توقعت حضورها ..رونق بخجل: يا جدتي ما يصير كذا!
ام جواد بحزم: إنت ما ينفع معك الطيب ...يلا أشوف كوني سنعة وتصرفي بعقلانية
رونق وجهها ألوان من الخجل أول مرة تلبس كذا بحفلة!
نغم مبتسمه على شكل رونق المنحرجة ما توقعت إنها خجوله كذا !
بالرغم إنه فستانها ما هو بذاك العري يعني ساتر !
لكن الظاهر أول مرة تلبس كذا بحفلات!،
ام جواد وهي ماسكه يدها وبهمس: الحين تسلمي على ام راكان بابتسامة وتباركين
قاطعتها رونق بضجر: إن شاء الله ترى والله حفظت الدرس...خلاص اتركيني يا جدة ترى والله مارح انحاش!
تقدمت نحو ام راكان الي معطيتها ظهرها ومندمجة مع الحريم ...التفتت رونق للخلف وناظرت جدتها الي تشجعها تتقدم ..
ارجعت خصله من شعرها خلف اذنها بتوتر وهي تحس كل الحريم تناظرها!
تقدمت وهي تناظر حولها المكان ما تعرف كيف تبدأ ..وقفت لما وصلت لها ...وما انتبهت إنها داست على طرف ثوب ام راكان كان موديله طويل على الأرض ...ام راكان تحركت ما هي منتبه لوجود رونق أصلا...خلال ثواني كان المكان حوسه !
رونق بصدمة وهي تشوف أم راكان طايحة على الأرض بعد ما داست رونق على ثوبها ....
ام لؤي وهي تحاول تساند أمها ناظرت رونق بغضب: عمياء ما تشوفين!
رونق الصدمة ألجمتها وما نطقت بحرف واحد!
بعض الحريم ساعدت ام راكان على الوقوف ...وما خلى الموقف من همسات الحريم والضحك على الموقف
ام راكان متفشلة بدون ما تناظر رونق همست: رح تندمين متعمده تعمل كذا!
ام جواد هزت رأسها بأسف بدل ما تكحلها رونق عمتها!
مسكت رونق من كتفها وبلوم: كذا
قاطعتها رونق وهي تفك يدها بهدوء: جدتي ترى ما هو قصدي!
وتقدمت من ام راكان ساندتها: آسفه خالتي ما هو قصدي!
تعالي اجلسي ارتاحي
ام راكان دفت يدها بكره وللحين متفشلة وهي تشوف ضحك بعض الحريم
سعاد تقدمت وهي ناوية تمسح بشعر رونق الأرض...مسكتها صفية بتحذير : يا ويلك اذا تكلمت
قاطعتها سعاد بقهر : ما شفتيهاكيف تعمدت
صفية اعطتها نظره قوية: خلي هالزواج يمر على خير وبعدها يصير التفاهم!
رونق صدت بغرور عن سعاد الي تناظرها وتبغى تطحنها تحت أسنانها!
ام جواد بنبرة منخفضة لأم راكان الي جلست على احد الكراسي: ترى ما هو قصدها ما انتبهت لفساتنك وانت الله يسامحك لابسه هالثوب يجر على الارض وكأنك ساندريلا
قاطعتها ام راكان بتوعد : وقسم بالله لتطلع هالحركة من عيونها ...تراك ما تعرفينها تعمدت تفشلني!
رونق ناظرت جدتها الي تتهامس مع ام راكان. ...ام جواد أشرت لها تقترب!
اقتربت رونق بابتسامة مزيفة ...نطقت مجاملة: سلامتك خالتي ...عين وصكتك
ام راكان بهمس: يا جعل القرد
قاطعتها ام جواد بهمس: الناس تناظر وخاصة ام ربيع شفيها عيونها طالعه شبرين وهي تناظر!
ام راكان هزت رأسها بتفهم وبعدها ناظرت رونق: تعالي اسنديني أبغى أجلس عند العروس!
هزت رأسها رونق بهدوء...توجهت معها للكوشة وأم راكان تبث سمومها بهمس: ورب الكعبة الا تندمين على حركتك
رونق بنفس الهمس: قلت لك ما هو قصدي
قاطعتها بعناد: إلا قصدك والله لتندمين
قاطعتها رونق بلامبالاة: الي ما تطولينه بيدك طوليه برجلك!
فتحت ام راكان عيونها باستنكار: وقحة!
الوعد بعد ما ينتهي الزواج اذا ما قلبت حياتك جحيم قولي ام راكان
قاطعتها رونق بهدوء ظاهري: كل شيء مقدر ومكتوب أكون مظلومة ولا أكون ظالمة!
ام راكان زمت شفتها بقهر من وقاحة رونق،لكن يصير خير رح تخليها تندم على هذه الحركة!
بعد ما جلست ام راكان ...اقتربت رونق من منار وبابتسامه مزيفة نطقت: مبارك يا عروس!
منار هزت رأسها بابتسامة: الله يبارك فيك!
تقدمت وسلمت على ام العروس بهدوء...ام منار بابتسامة: هذه
قاطعتها ام راكان وهي عافسه ملامحها: زوجة جراح!
هزت رأسها ام منار: ما شاء الله ....الشبه بينها وبين مريم كبير
ام راكان بنفس العبوس: الشبه بس في الملامح اما التصرفات ولا في اي تشابه بينهم!
لجين بخبث اقتربت من رونق: تعالي نرقص
رونق برفض:ما أعرف
ام راكان فهمت حركة لجين: ما يصير زواج أخو زوجك لزوم ترقصين
سحبتها لجين معها: تعالي
رونق فاهمة حركتهم يظنون إنها حامل ويبغون يطيحون الجنين!
ام جواد مسكتها من يدها : مجنونة تبغين ترقصين!
ناسيه إنك حامل!
رونق عقدت حواجبها باستنكار علامها ام جواد ناشبه لها بكل مكان!
رونق بهدوء نطقت: ما رح يصير شيء!
ام جواد انقهرت من عنادها وجلست وهي تناظرها ترقص بجنون همست لنغم: هذه الي كانت مستحية تدخل القاعة!
نغم بابتسامة: كل البنات كذا أول ما يدخلون يا أرض انشقي وابلعيني من الخجل بس ربع ساعة وتلاقينهم يناقزون
ام جواد هزت رأسها بقلة حيلة: والله ما هي صاحية هالبنت ..وش هالرقص الجنوني!
نغم هزت رأسها: ما توقعتها تكون بهذه النعومة...وماتوقعت إنها تعرف ترقص .... شوفي ام ربيع عيونها على رونق!
ام جواد هزت رأسها : عمرها رونق ما رح تتهنى من هذه الحية ام ربيع...تخيلي للحين تحوم تبغاها لولدها قال دكتورة وراتبها يخلي ولدها عايش مرتاح
نغم فتحت عيونها باستنكار: صدق!
انت مين خبرك!
ام جواد عفست ملامحها:هذه الحية وين ما تروح تنثر سمومها والحريم خبروني بكلامها!
نغم حكت جبهتها : ما ظنيت تدوم عند جراح ...شوفي نظرات ام راكان وبناتها كأنها رونق سارقه حلالهم
قاطعتها ام جواد: بس جراح يحبها بجنون ما رح يتخلى عنها
ناظري كيف لفتت نظر الحريم لها ...فما بالك بجراح شوفيه وقف بوجه أهله واصر عليها !
نغم هزت رأسها : صحيح فيها جاذبية اكثر من مريم الله يهديها ويوفقها بحياتها!

**
*
**
**
أعلنوا دخول العريس ..رونق واقفة تناظر دخول العريس....ام ناصر تكلم وحده من الحريم: تقدري تساعديني أبغى أبارك للعرسان
أشرت الحرمة على رونق: هذه حفيدتك خليها تساعدك والله كتفي يوجعني ما اقدر!
رونق ما تبغى تقترب من الكوشة وتتواجه مع زياد ...لكن احرجتها الحرمة: خذي جدتك عند الكوشة
ام ناصر ما تبغى رونق لكنها اضطرت تسكت وتروح مع رونق!
توجهت رونق نحو الكوشةوهي تجر ام ناصر بالعرباية نحو الكوشة!
ام ناصر بفرحة لحفيدها: مبارك يا ولدي
زياد اقترب منها ونزل لمستوى جدته سلم عليها وقبل رأسها بفرح: الله يبارك بعمرك يا جدتي...كيفك اليوم؟!
رفع نظره وهو يسمع إجابتها .....وناظر لرونق واقفه خلف العرباية تناظر جهة العروس!
ما يلوم جراح يوم ركض خلفها بعد ما شاف هالعيون...فعلا عيونها فتنة مع الكحل و العدسات ...التقت عينها بعيونه..ناظرته بكره وصدت لجهة العروس مره ثانية!
مط شفته بسخرية حتى لو فتنت جراح بعيونها في الأخير رح يكتشف حقيقتها المزيفة!
مين يصدق شكلها البريء خلفه حية !
وقف وناظر منار بابتسامة لما تقدمت وسلمت على ام ناصر والفرح يشع من عيونها!
رجعت ادراجها رونق وجلست بهدوء عند نغم وام جواد!
ام جواد ناظرتها: صدق إنك مطفوقه كل هالرقص ما تخافين يطيح
رونق هزت رأسها بلامبالاه: الي مكتوب له رزق بهذه الدنيا رح يعيش
قاطعتها ام جواد بحزم: اقول غطي على عيونك كاشفة والكحل والعدسات ونص وجهك طالع!
لو يشوفك جراح إلا
قاطعتها رونق وهي تعدل النقاب:نسيت اني وضعت مكياج... اذا نزلت طرحة على وجهي اختنق ...وانا جايه كنت مغطيه كامل اختنقت
نغم : بس انت عيونك ما شاء الله جميلات وخاصة مع العدسات
قاطعتهم سعاد: خالتي
وقفت رونق بانزعاج من هالمخلوقة ما تطيقها ...هي السبب في بعد قدر عنها ما تقدر تعاند وتسحبها من عند فياض لأنها ما تثق بسعاد تعمل شيء للبنت بغيابها!
انسحبت من المكان قبل ما تنشب النار بينهم!
الجازي همت بالخروج ما تقدر تجلس تناظر ابنتها من بعيد وما تقدر تسلم عليها او تسألها عن أخبارها ...
وقفت رونق وهي تشوف الجازي واقفه ..ما تنكر انه احساس جميل حست فيه بوجودها...ما تعرف كيف تتصرف؟!
تروح لها او لا؟!
دق قلبها لما تحركت الجازي ...معقول رمت كلام فياض بالأرض؟!
رح تعلن للكل إنها ابنتها وما في قوة تبعدهم عن بعض!
هي ابنتها الي طول السنوات الماضية تبكي من ألم فراقها ....سنوات وهي تجلس بالمكان إلي انخطفت فيه لعل وعسى تلمح طيفها !
هذه الحين واققة قدامها أكيد رح تمسك بيدها وتثبت لها إنها ما رح تتخلى عنها!
لكن سرعان ما ألجمتها الصدمة لما مرت الجازي من أمامها ولا كأنها تعرفها!
تجاهلت وجودها وكأنها غير مرئية لها !
تأكدت رونق إنه كل هالمشاعر الي كانت تتغنى فيها الجازي مزيفة!
والمشاعر الكذابة الي كانت تتغنى فيها كانت رد فعل للإحساس بالذنب إنها السبب في موتها!
وبما إنها على قيد الحياة بانت المشاعر المزيفة على حقيقتها!
التفتت للخلف وهي تناظر زول الجازي.. تحس اشياء بداخلها تكسرت ...رجعت ناظرت ام فياض الي وقفت قدامها وباينه ابتسامتها من عيونها ونظرة الانتصار بعيونها وهي تتكلم: تراها كانت تشفق عليك لما أعطتك وجه لكن مع الأيام خلاص ما عادت تقدر تتحمل تصرفاتك وتتحمل وجودك وتجاملك اكثر من كذا!
عاد تدرين كسرتي خاطري!
رونق ساكته تناظرها وهي تتكلم وتغايضها بالكلام ....احيانا نتكلم وننسى هالنقطة المهمة« اذا لم تكن تجيد جبر الخواطر فلا تكسرها»
تركتها ام فياض بعد ما حست بالراحة شوي فشت غلها وقهرها برونق شوي!
رونق بلعت ريقها وهي تحس بخنجر وسط حلقها!
جلست على طاولة فاضية والسكون يخيم عليها وشيء واحد يتردد في ذهنها«تستاهلين هذا الي جنتيه يوم خربتي علاقتك بأهلك وبأهل جراح علشانها وبالأخير باعتك بالرخيص ....صدق المثل يا داخل بين البصلة وقشرتها ما ينولك غير ريحتها»
اخذت نفس عميق ليه تكدر خاطرها علشان شخص باعها ..الجازي مسكت بفياض وتركتها...وهي رح تمسك بجراح ما رح تفرط فيه ...
ورح تكمل حياتها خلاص ملت من المشاكل والقيل والقال...نفسها تختفي من هالعالم وتعيش بهدوء وسكون!
تشتاق للقرية وأيامها تتمنى إنها ما طلعت القرية . ..احيانا نتطلع لحياة غير واحلام غير عن محيطنا لكن ما نعرف انه هالحياة الي بذلنا جهدنا حتى نوصل لها هي سبب تعاستنا وهمومنا وكدرنا!
بهذه الدنيا نحتاج فقط الرضا بأقدار الله ...
**
**
*
**
ام راكان بعد ما غادر العرسان تكلمت وهي متمسكة بأم لؤي:ابغى ارجع مع جراح!
جراح تقدم منها وبابتسامه: يا هلا ومرحبا اليوم تتبارك سيارتي بركوبك يالغالية!
بس غريبة وش فيك تعرجين
لجين وهي تعلك: إسأل زوجتك
ام راكان تبالغ بإظهار وجعها: حسبي الله ونعم الوكيل
اسودت ملامح جراح مثل ما توقع رونق جابت العيد..وبنبرة ضعيفة نطق : وش صاير
ام راكان استغلت الفرصه: دفتني على الأرض وربك ستر
قاطعها : طيب رونق وين؟!
صفية وهي تتحرك تبغى تركب مع ولدها: ترى بالغلط داست رونق على ثوب امك ووقعت ما هو قصدها
ام راكان بحنق: إلا قصدها.....انت ما شفتيها كيف كاتمة ضحكتها علي وأنا طايح بالأرض
جراح اعتراه الضيق .. والأمل  بأنه تتخسن الاوضاع طار ..نطق بهدوء: يمه ترانا مو بالبيت خلاص نتكلم بعدين تعالي ارتاحي
بعد ما ركبت امه ...مسك الجوال واتصل برونق ..ناظر سيارته وهو يسمع صوت الجوال بالسيارة..حضرتها ناسية الجوال هنا ..كيف يوصل لها : لجين وين رونق
لجين وهي تتوجه خلف أمها : شفتها راحت مع جدتها ام جواد!
جراح عفس ملامحه المفروض ردت له خبر إنها رجعت مع غيره!
توجه للسيارة وحرك بهدوء...ام راكان ناظرته: خذني للمستشفى يا ولدي رجلي ما أقدر
قاطعها: ولا يهمك الحين طالعين هناك!
بدأت ام راكان بنبرة حزينة تشتكي من رونق وتصرفاتها!
***
**
**
تنهدت لما وقف نايف جنبها ونطق بهدوء:وضعها الحين الحمدلله !،
انخفض عندها السكري ووضعها الحين مستقر ..صار شيءحتى صار كذا!
هزت رأسها بالنفي والهدوء مخيم عليها: ما اعرف شفتها طلعت برا القاعة طلعت خلفها أبغى الجوال حتى أكلم جراح ....لقيتها طايحه على الأرض وللصدفة انت كنت متصل على جوالها
نايف بهدوء: ما أحد يعرف اكيد الحين فاقدينها شوفي جوالي كم مكالمة !
هزت رأسها وبتذكر: جراح ماخبرته إني هنا!
أعطيني الجوال
قاطعها: بالأول أخبر أبوي وإخواني وبعدها اعطيك
عفست ملامحها وتحركت تمشي بملل في الطوارئ!
جلست بمقاعد الانتظار ....
نايف التقى بجراح ....ناظر ام راكان : سلامات حماتي
ام راكان بهدوء: الله يسلمك يا ولدي
نايف: وش صاير اكيد من كثر الرقص التوت رجلك
ام راكان ردت بدون نفس:قالوا لك مطفوقة مثل بنت اخوك !
ابتسم: كلمتك ملغومة يا خالتي!
جراح بهدوء:ما نبغى نتأخر تراها مب قادرة توقف على رجلها!
نايف بتذكر: صحيح زوجتك بالطوارئ
ام راكان بفرح نسيت نفسها ووقفت ولا كأنه فيه شيء: اللهم لك الحمد هذه خطيئتي قعدت لها
نايف بعدم فهم لكلامها ..ناظر جرح الي يسأله بخوف: وش فيها؟!
ام راكان انقهرت وهي تشوف لهفة جراح بالسؤال عن رونق ولا كأنها طول الطريق تشكي له عنها!
أي سحر سحرته فيه حتى صار كذا!
نايف بابتسامة: ما فيها شيء امي تعبت وما لقيت غير رونق بوجهي سحبتهامعي!
ام راكان بقهر رجعت تمسكت بجراح وباهتمام نطقت: وش فيها ام جواد كانت بالحفلة ما فيها شيء!
نايف: الظاهر نزل عندها السكري وفقدت الوعي!
ام راكان هزت رأسها: سلامتها ما تشوف شر يلا يا جراح
ابتعد نايف عنهم وهو يتكلم بالجوال!
جراح : لحظة اشوف رونق خليها تي
قاطعته بقهر: أنا ناقصني غثاء تراها واقفه لي هنا مب قادرة أبلعها!
ليه انت ما تراعي مشاعري وإلا ما تخاف على أمك!
يرتفع ضغطي من لما اشوفها وانت تبغاني اموت بقهري
جراح بضيق : يا يمة لمتى هالحال؟!
ترى أنا مليت من الحياة أهلي بكفة ورونق بكفة وش اعمل
قاطعته بكره: ما أحبها تفهم وش يعني ما أحبها !!!
والا الحب عندك بالغصب
جراح بملامح معفوسه: يا يمة لا تحبينها بس على الأقل احترميها بس ما نبغى إلا احترامها
مطت شفتها وهي تتحرك: خليها بالأول تحترمنا وبعدها يصير خير!
زفر بضيق وهو يتحرك وساند أمه ...وبداخله علاقة رونق بأهله مستحيل تنصلح دام أمه معنده كذا !
واقفة قريب منهم ..تسمع كلام ام راكان ما تعرف ليه لذي الدرجة كارهيتها !
وكأنها سارقه حلالها!
رجعت ادراجها للمكان الي كانت جالسة فيه ...ليه ترمي نفسها على ناس كارهينها ؟!
جلست بمقاعد الإنتظار..والدموع تلمع بعيونها ....بداخلها قهر ...نفسها تمسح بأم راكان الأرض وتعلمها قدرها ...لكنها ماسكة نفسها بصعوبة لأنها بكل بساطة أم زوجها وأي زوج ما يقبل أمه تنهان او أحد يقلل احترامها!،
تكتفت بضيق ونزلت رأسها وهي تفكر كيف تقدر تعدل الوضع ....
رفعت رأسها بضجر ...وهي تناظر للبعيد وعقلها سارح بحياتها ...مجرد جسد عقلها كله يفكر بحياتها...اكثر من كذا ما تتحمل ...ما تبغى تكون قليلة ادب وتتعامل مع اهل جراح بالمعاملة الي يستحقونها !
هذه الحياة ما تقدر تكمل فيها ...اليوم رح تكلمه بالرحيل...ما رح تعيش بذاك البيت ابدا!
ورح تسحب قدر من عند فياض ...هذه ابنتها ومن حقها تعيش بين عيونها ...ما رح تسكت عن هالوضع ابدا!
هي إنسانه مثلها مثلهم لها احترامها...ليه يكرهونها ؟!
ليه ينبذوها؟!
الكل يكرها حتى الجازي تكرهها ....موقفها اليوم اكبر دليل على مشاعرها المزيفة....تجاهلت وجودها وكأنها نكرة!
نكرة!
صدق هي نكرة بينهم ....يناظرونها بهذه النظرة لأنها تزوجت نايف!
نايف عمها !
حست شيء كتم على صدرها من هذه الحقيقة الي مهما حاولت تنساها ترجع تخنقها!
ابو جواد وهو يتكلم مع نايف: وليه ما خبرتنا!
نايف بهدوء: الوقت ما سمح لي اكلم أحد
توجه ابو جواد مباشرة لمكان ام جواد ومعه بدر!،
جواد ناظر رونق جالسة تناظرهم بهدوء ولا كلفت نفسها تقوم تسلم عليه!
لذي الدرجة وصلت فيها!
وش قلة الأدب الي فيها!
هو أبوها ليه ما تحترمه وتقدره؟!
تختلف عن مريم كثير ...مريم أول ما تلمح زوله تركض له مباشرة والفرح يشع بعيونها لما تشوفه!
أما رونق ولا كأنه أبوها !
اقترب منها وللحين على نفس الوضعية...رفع حاجب حتى ما كلفت نفسها تناظره او تعبرة!
نطق بغضب من تصرفاتها: لمتى أنا أتحمل تصرفاتك الي ما تنطاق!
انقهر من تطنيشها ولا كأنه يكلمها ...وضع يده على كتفها وبقهر: وش قلة الأدب هذه ؟!
انا ابوك
حست بأحد وضع يده على كتفها سرعان ما نقزت على حيلها ......تنفست الصعداء وهي تشوف جواد ...نطقت بضيق: انا
سكتت ما فيه شيء تقوله
جواد رفع حاجب حضرتها سرحانه...وش الي شاغل عقلها حتى ما حست بمن حولها !
رونق باستدراك مدت يدها تسلم ...امنيتها ترمي نفسها بحضن ابوها.. وتتخلص من كل همومها ...
جواد بزعل منها كتف يدينه: الحين تذكرتي تسلمين على ابوك!
ما تخافين ربك باب يفصلنا ما تقولين ازور أبوي!
مريم كل يوم عندي وإذا ما جاءت تتصل تطمئن علي!،
وانت؟!
صار فياض أبوك طول وقتك معه!
نزلت يدها بصمت  وهي تحس بداخلها شيء انكسر بعد ما رفض يسلم عليها .... للحين ما تخلصت من موقف أمها بالحفله ..حتى ييجي أبوها يكمل عليها ....جلست بهدوء ظاهري....ما نطقت بحرف واحد !...والحزن والانكسار يخيم عليها !!
جواد اوجعه قلبه عليها ما يحب يشوفها كذا منكسره لكنها تقهره بتصرفاتها ....
جلس جنبها بهدوء ونطق بنبره حانية: رونق!
ناظرته بهدوء ....رفع حاجب وهو ينتبه للعدسات والكحلة بعيونها وبحزم: وش الزفت الي لابسيته ومتكحلة وكاشفة عن عيونك
قاطعته بتبرير والغصة بحلقها: والله مسحته ما فيه ...بس الكحل يبقى اثر خفيف
قطعت كلامها  لما خنقتها العبرة....عقد حواجبه باستنكار وهو يشوفها تبكي بصمت: وش صاير؟!
احد زعلك...رونق جاوبيني
هزت رأسها بالنفي: ما في شيء!
سأل باستغراب: طيب ليه تبكين؟!
اخذت نفس وهي تمسح دموعها بكم العباية: ما في شيء
قاطعهم جراح : رونق
رفعت عيونها الغرقانه بالدموع: وش صاير
جواد ناظره : ما في شيء!
جراح بانبهار:بسم الله ما شاء الله شوف يا عمي عيون الغزال
قاطعه جواد بغضب: انت ما عندك دم ... بدل ما تقول لها غطي على عيونك
قاطعه بابتسامة: الحين فهمت انت زعلتها...يا عمي ترى ما هو كذا الأسلوب
قاطعه جواد بقهر من بروده: نسيت أتعلم عندك كورسات بفن التعامل
جراح ابتسم وغمز له : بس الكورسات عندي غاليه يا ولد العم!
مد يده لرونق ...وسحبها برفق ....مد يده يعدل نقابها: شوفي بسبب البكاء صار نقابك حوسه
كش عليه جواد وهو عابس ملامحه!
ضحك جراح على ملامح جواد: يا أخي انت ما يعجبك العجب
رونق ابعدت يد جراح عن نقابها وعدلته بنفسها بصمت!
جواد وهو يكلم جراح بهدوء : والله كل شيء ما هو عاجبني!
جراح هز كتوفه بقلة حيلة: ربك كريم!
يلا يا رونق امي تنتظر
جواد بتذكر:-سلامات
قاطعه جراح: الله يسلمك....يلا رونق
وقفت تنطق ما تبغى تروح معه وتكون السبب بغضب امه عليه ...امه معنده ما رح يطيح الحطب إلي برأسها الا بطلاق رونق ...لكن لطفه وتعامله يجبرها تسكت وتكمل هالحياة ..لعل وعسى يأتي الفرج!
تحركت بهدوء والصمت مخيم عليها ...تكلم بهدوء: كيف الحفلة كانت؟!
رونق ما لها نفس تتكلم تحس شيء كاتم على صدرها: عادي
رفع حاجب من سكونها: بس عادي!
ما شاف منهاإجابة ..سكت وتوجه لأمه....ام راكان لما شافتها عفست ملامحها: ما ترتاح إلا لما تغثني
ناظر أمه بقهر وأشر لها بعيونه تسكت!
ام راكان بقهر: ارتحتي يوم كسرتي رجلي؟!!!
جراح بضيق ظهر عل ملامحه: يا يمه ما فيها شيء رجلك!
ناظر رونق وأشر لها حتى تتحمد لها بالسلامة....رونق تنهدت ونطقت بهدوء: سلامتك خالتي ما تشوفين شر!
ام راكان بعبوس : تقتلين القتيل وتمشين في جنازته!-
اقترب جراح من أمه وبملامحه معفوسه:يلا خلينا نرجع
ام راكان : ابغى ازور مريم وبعدها ام جواد
هز راسه والتفت للرونق: مشينا!
وقفت رونق قريب من الغرفة ونطقت بهدوء: انا انتظرك هنا!
جراح باعتراض : وليه!
ادخلي مع أمي وتحمدي لأختك بالسلامة!
ام راكان تناظرها باستعلاء: هذه البنت ما تعرف بالأصول قلبها حقود وأسود الله يعافينا
تنرفزت رونق منها تدعي المثاليه وهي ابعد عنها : تركت القلب الأبيض لكم!
تراه ولدك طلع من المستشفى وما كلفت نفسك تزورينه وفوق هذا قاطعتيه !
قاطعها جراح بحده: رونق انتهينا
ام راكان قلبها مليان على رونق ما رح تترك هالفرصة ..فرصتها إنها تستفز رونق وتخليها تفقد أعصابها وتطلع حقيقتها قدام جراح وبنبرة احتقار: قاطعته لعل وعسى يصحى من الكابوس الي عايشة ويشوف الحشرة الي متزوجها!
جراح بقهر منهم : يمه خلاااص!
ام راكان بانفعال : قل ما تبغى تسمع وتعرف حقيقة زوجتك ..لو فيك عقل ما تزوجت وحدة تزوجتك بدون علم أهلها...اي أم لاولادك اخترت!،
وحده ما عندها لا ضمير ولا اخلاق وش ترتجي منها ومبسوط يوم تقول إنها حامل!
كيف تتزوج وحده ما نعرف أصلها من فصلها وما نعرف من أي مزبلة انتشلها نايف وجابها لنا!،
وتبغوني اسكت على هذه المهزلة!
تكلمت رونق وهي تحس بخنجر بوسط حلقها ...وبهدوء ظاهري نطقت : كلامك مردود عليك ....فما رح انزل لمستواك وأرد عليك ....في رب يأخذ حقي من كل إلي ظلمني!
جراح بقهر من مشاكلهم: قلت خلااااص
قاطعها وهو يتقدم منهم وبنبرة ظهر فيهاالانزعاج وهو يتكلم: بس ما قلتي لنا وش مستواك حتى نعرف نتعامل معك
جراح بغضب مكتوم: وبعدين
قاطعه راكان وهو يناظر المكان فاضي: انا محترم المكان الموجود فيه ..علشان كذا ما انتهى الموضوع ولنا كلام ثاني في البيت!
جراح بعبوس: يمه ادخلي عند مريم وأنا انتظرك هنا!
بغت تتكلم ام راكان لكن قاطعها راكان: بالبيت يا يمة !
هزت رأسها وتوجهت مع راكان لغرفة مريم،
جراح زفر بغضب ...بعدها ناظر رونق: انا وش قلت لك !
الف مرةقلتلك تجاهلي!،
تجاهلي يا رونق تراها عندها فكره غلط عنك ..تجاهلي خليها تشوف الجانب الحلو منك وتكتشف إنها اخذت عنك فكرة غلط...بس ما ترتاحين إلا إذا عاندتي وراددتي!،
ناظرته بقهر..يظن إنها جماد ..يبغاها ينمسح فيها الارض وتنذل وهي منكتمه ...وبنبره مقهوره : انت ما سمعت كلام امك ؟!،
قاطعها بضجر من مشاكلهم الي ما تخلص: طنشي
قوست شفتها وهي تهز رأسها بقهر: ايه صح نسيت!
تدري اني نسيت اهم نقطة والمفروض إني ما أنساها...نسيت إني بنظركم بدون احساس ومشاعر وكرامة....لزوم تسمعين اهانتك وتتشكريهم
قاطعها بقهر : رونق بلا كلام فاضي
جلست على احد المقاعد والتزمت الصمت...ما تبغى تشتبك معه ..
زفر جراح بضيق وتوجه للشباك...وقف يناظر للخارج ...لعدة دقائق!
تنهد وهو يناظرها على نفس الوضعية والسكون مخيم عليها....اقترب منها وجلس جنبها ....مسك يدها وبنبره حانية : رونق ..ادري كلام امي ثقيل بس لزوم نتحمل حتى نوصل لهدفنا!
لا تظنين إني أسكت عن اهانتك وأعرف انه أمي الغلطانه عليك..بس هذه أمي ما أقدر أتعامل معها بأي أسلوب...علشان كذا اقولك طنشي خلينا نسايرها لعل وعسى ينصلح الحال..خلينا نجرب وامسكي أعصابك حتى
سكت وهو يشوف امه طالعه ومعها راكان!،
وقف بهدوء: مشينا
ام راكان بعبوس: أبغى أزور ام جواد
راكان بهدوء: قبل شوي خرجوها!
ام راكان  رفعت حاجب: طيب نرجع للبيت بس ما أركب أنا وهذه بنفس السيارة لا أنا لا هي ؟!
جراح يحاول يمسك اعصابه: يمه تعوذي من الشيطان واترك اليوم يمر على خير !
ام راكان بانفعال: هذه الشيطان بذاته قلت ما رح اركب معها بنفس السيارة !
جراح زم شفته بقهر: والله!
تكلم يا أستاذ راكان...عاجبك كلام امي!
راكان ببرود: والله ما أقدر أترك مريم الحين وإلا كان ارجعت أمي بنفسي بس الدكتورة دقائق ورح تمر ولزوم أجلس معها !
خلاص ارجع امي وبعدها تعال خذ زوجتك !
انقهر جراح من رده:-هذا الي طلع معك !
شايفني سواق رايح راجع!
رجع ناظر أمه برجاء: يمه ربي يسعدك
قاطعته بحدة: ما اجتمع معها بنفس السيارة
رد بغضب : خلاص خليكم هنا ...انا رايح وجعلني أموت و ما ارجع للبيت علشان ارتاح من مشاكلكم!
وتحرك بغضب تارك أمه و رونق لعل وعسى يطيح هالحطب الي برأسهم!
ام راكان بتراجع وقلبها يدق طبول خافت عليه : جراح
خلاص تعال والله اغضب عليك
اختفى عن انظارهم.... ام راكان ناظرت رونق بغضب : عجبك الحين يا سوسة
رونق تحركت بهدوء وما نطقت بحرف واحد ...مسكتها ام راكان من كتفها : وين رايحه!
رونق فكت يدها بهدوء: زوجي وما رح اتخلى عنه مهما عملتي!
تحركت حتى تلحق على جراح ..ما رح تسمح لها تدمر حياتها وهي واقفة تناظر !
ما بقى لها إلا جراح ما رح تسمح لها تدمر حياتهم !
ام راكان ناظرت راكان: شفت
راكان عفس ملامحه بلوم : يا يمه قلت لك امسكي أعصابك و اعملي مثل ما أقول لك بس
قاطعته وهي تتحرك خلف رونق : ما اقدر أمسك أعصابي!
ضغطت رونق على المصعد متجاهله أم راكان الي اقتربت منها وهي تتكلم بقهر: وقفي وقفي
زفرت بضجر من هالمصعد لزوم تغادر قبل ما توصل ام راكان !
قبل ما يفتح دفتها أم راكان : اقولك ابعدي عن ولدي ما رح اسمح لك تلحقينه
رونق رفعت حاجب: أشوفك تراكضين هنا بالممر مثل الحصان على.... اساس مب قادرة توقفين!!!
قاطعها راكان بحزم :رونق لا تكثرين كلام أفضل لك !
صدقيني رح نحط حد لك
سكت لما فتح المصعد ودخلت رونق المصعد لكن سرعان ما وقفتها ام راكان: ما رح تلحقينه!
راكان أدخل امه للمصعد وبحزم: خلاص كافي مهزلة ترى حنا مو بالبيت!
ام ركان بقهر: خليها تبعد عن ولدي
رونق استغفرت بصوت مسموع!
راكان رفع يده بتحذير:رونق امي خط احمر !
حتى لو كانت غلطانه ما يطلع لك تتجاوزين حدودك!
سمعتي خط احمر
رونق لما انفتح المصعد ..خرجت وهي تتكلم بسخرية: خط زين
راكان مسك أعصابه ما يطحنها وقحه ...فرق بينها وبين مريم ....مريم ما ترد له الكلمة!
وهذه قاعدة تتمسخر عليه!
هز رأسه بتوعد وخرج خلفها مع أمه الي تحاول تسبق رونق!-
جراح الي غادر المكان من دقائق حتى يضغط على امه ورونق ..وناوي يرجع بعد ربع ساعة...يعني قرصة لهم يمكن يتغيروا!
ام راكان اكتساها الهم وهي تناظر مافي أثر لسيارة جراح!
بسرعة مسكت الجوال واتصلت عليه تخاف يصير له شيء!
ناظرت راكان والقلق بدأ يتزايد:راكان ما يرد
راكان هز رأسه بضجر حركة أمه ما لها داعي: طيب تعالوا الحين ارجعكم
أم راكان بحدة: ما اركب معها!
راكان مط شفته بضجر: يعني وش الحل عندك؟!
وين اروح فيها؟!
تحمليها !
مطت شفتها رونق بسخرية الحين يقال ميتة حتى ترجع معهم ..اصلا لو تموت ما رجعت معه !
رجعت أدراجها للمستشفى ...قاطعها راكان: وين راجعه
قاطعته بحده:ما يخصكم!
كان يبغى يرد عليها لكن قاطعه جواله ... كان المتصل جراح !
فتح خط ورد بهدوء: الو
سرعان ما فتح عيونه بصدمه .......