رواية بسملة وسامر الفصل الرابع 4 - بقلم أمل محمد

شدها سامر من هدومها. - لا وحياة أمك! أجيب لك رقمه بالمرة. بصت لإيده اللي ماسكة هدومها. - لأ لأ لأ لاااا، كدا أزعل. سابها وقال. - لا ملكيش حق الصراحة، أنا اللي غلطان. هزت راسها. - يا قاسي. اتنفس بضيق وراح قعد على الكرسي. - وهنهبب إيه في المصيبة دي! أنت مشوفتيش وشه مثلًا! لمحتي أي حاجة لابسها! ضيقت عينها وقربت منه. - كان لابس حتة كوتش أبيض، مقولش جامد. زعق. - بسملة أنا بتكلم بجد. اتخضت ورجعت لورا. - بتزعق لي دلوقتي يا كائن البطاطس أنت! راح وقف ورا الباب وحط ودنه بيحاول يسمع أي حاجة. قعدت هي على الكرسي. - لا متربي جامد، بتتصنت على الناس، هه. ضغط على سنانه. - بت أنت بقرة! إحنا مخطوفين أنتِ مستوعبة يا بسملة! رفعت صابعها وقطعت كلامه. - بوسي لو سمحت، بوسي مش بسملة بعدين متغلطش. اتفتح الباب فجأة ودخل منه راجل كبير وزعق. - إي العلاقة القذرة دي، إي قلة الأدب اللي إنتوا فيها دي! دخل راجل كبير في نفس سنه أو أكبر وكمّل. - نعمل فيكوا أي تاني عشان تتلموا! قولنا هتعقلوا بعد الجواز برضو مفيش فايدة في دماغكوا الزبالة! فتحت عينها وزعقت بصدمة. - بابا... حطت ايدها على قلبها. - أنا مصدومة مصدومة مصدومة آآآه. بصلها باباها وحماها بصدمة مش مصدقين رد فعلها! بينما سامر ابتسم على رد فعلها وبص لباباه ورفع إزازة الماية قدام وشه وقال بمكر. - إزازة الماية دي غريبة جدًا!