رواية بيان الفصل الأول 1 - بقلم حسناء رمضان

اوب اوب، شوف الجمل اللي داخل علينا دا يلا. لف وشه عشان يشوف مين. بصلها وقلع النضارة. كرم: اوووف، مين دي يلا. أحمد: مش عارف، أول مرة أشوفها. كرم: إزاي عدت من تحت إيدي دي، دي صاروخ. أحمد: استنى أسأل جمال، جمال، ولا يا جمال. جمال لف وشه وجالهم. جمال: إيه يا معلم في إيه. أحمد: مين القمر دي. جمال: أنهي واحدة. أحمد: أم جاكيت أسود دي. جمال: آه، دي بيان. كرم: إيه ده، مين برضه، مشوفتهاش في الجامعة قبل كده.

جمال: عشان هي مش بتيجي كتير، يعني بتيجي تحضر وتمشي بسرعة غريبة. أحمد: ليه. جمال: معرفش، بس دي بنت مريبة بجد. كرم: لا احكيلنا بقى.

جمال: بص يا سيدي، دي لسه في سنة أولى، بس بنت غريبة قوي، بتحضر كل المحاضرات، وتشوفها في المحاضرة تقول دي هتطلع عالمة من كتر تركيزها مع الدكتور، المحاضرة تخلص من هنا ودي تختفي من هنا، بتمشي بسرعة جدا وكأن في حد بيجري وراها، في الأول محدش كان واخد باله قوي يعني بس دلوقتي الكل عنده فضول غريب يعرف هي بتعمل إيه. أحمد: إيه الغريب في إنها تطلع مستعجلة.

جمال: يا ابني بتيجي تحضر محاضرتين مثلاً وفي الوقت الفاضي تطلع من الجامعة جري، وقبل المحاضرة التانية بدقيقة واحدة بتكون هناك. كرم: ما يهمناش كل ده، يهمني حاجة واحدة بس، إن البنت دي... جمال: لا حاسب، دي بالذات لأ، لأ يعني لأ. كرم: ليه يعني. جمال: مقفولة قوي يعني، كان غيرك أشطر. كرم: غيري؟ ، أنت مجنون؟ ، أنت مش عارف أنا مين ولا إيه. جمال: أنا عارف، لكن هي متعرفش. رد عليه وهو بيبصلها بطريقة خبيثة وهو بيجيبها من فوق لتحت.

كرم: وماله، تعرف. كانت قاعدة بتذاكر ومندمجة جداً لحد ما المحاضرة تبدأ. كرم كان واقف هو وأحمد وسط شلة شباب معروفة بالفساد والانحطاط الأخلاقي. رد عليه صاحبه. محمود: كرم، متحاولش. كرم: ولو وقعت. أحمد: بلاش الغرور ده، هيبقى شكلك وحش لو رفضتك. كرم: كرم المنيوي ميترفضش، وأعتقد إنكم شفتوا، هل في واحدة في الجامعة كلها قالتلي لأ. محمود: طب يلا ورينا شطارتك يا خفيف. سابهم ومشي راح لها. كرم: احم احم.

سمعت صوته رفعت وشها بهدوء وبرود. استناها ترد بس فضلت بصاله مستنياه يتكلم. كرم: أنتِ مش عارفاني ولا إيه. بيان: لأ، مين حضرتك. كرم: آه، كرم المنيوي، ابن صاحب الجامعة اللي حضرتك قاعدة فيها دي. بيان بصتله بنفس البرود من فوق لتحت بتتفرج على شكله وعلى السلسلة الدهب اللي لابسها في رقبته، والوشم اللي في دراعه ورقته، وبنطلونه المقطع اللي مسقطه. مدتوش أي اهتمام ولا حتى سلمت عليه ورجعت مسكت القلم تاني.

بص على صحابه لقاهم قاعدين يضحكوا عليه وده غاظه جداً. كمل وهو بيقعد قدامها على الكرسي. كرم: بيان، اسمك بيان صح. بيان بنبرة حادة: أنت مين سمحلك تقعد. كرم: نعم. بيان: قوم من مكانك، مين سمحلك تقعد معايا. قامت وقفت وهو وقف قدامها.

كرم: اسمعي بس، بلاش الشويتين دول، قابلت من نوعك كتير كانوا عاملين فيها كاريزما وأولاد ناس ومحترمين، بس الحقيقة، مفيش بنت محترمة، وعشان كده أنا هاجي معاكي دغري عشان معنديش وقت أضيعه، شايفه البنات اللي قدامك دول كلهم! ، محدش فيهم قالي لأ، كلهم رهن إشارة واحدة مني. بيان: امم، ومين قالك إني عايزة أعرف إنجازاتك العظيمة دي. كرم: لأ عايزه، بلاش الشغل ده، هعرض عليكي عرض كويس، عرض مفيش بنت ترفضه. أحمد: شكله عملها ولا إيه.

محمود: عملها إيه يا عم، أنت مش شايف هي بصاله إزاي، دي ناقص ترجع في وشهم. معتصم: آه، بس استنى يمكن يعرف. ميل عليها شوية ووطى صوته. كرم: عندي حفلة صغيرة كده في الفيلا عندي، صحابنا هيكونوا موجودين، ولو مش عايزة حد مفيش مشكلة، ممكن أكنسلهم وتيجي لوحدك، ومتقلقيش، هتنبسطي على الآخر، ولو انبساطك ده مش كفاية فأنا هقدر العيون الحلوة دي، وهديكي اللي انتي عايزاه، امسكي، دي ورقة فيها العنوان، هستناكي يا حلوة.

أحمد: أوعى، خدت منه الورقة، شكلها غمزت فعلاً. محمود: أمال عملالنا فيها ليه ست الحسن والجمال الشريفة، ماهي جت في خمس دقايق أهي. بيان مسكت الورقة بصت فيها ورجعت بصتله. بيان: آه، أنت من بتوع مامي وبابي، وأهلك مسافرين والبيت فاضي. كرم: إيه ده عرفتي منين، بس اطمني يعني، هتاخدي اللي انتي عايزاه. ولو مش عايزاني أقول لحد معنديش مشكلة. بيان: امم، معندكش مشكلة. حطت الورقة على جنب ورزعته كف ثلاثي الأبعاد على وشه.

صوت القلم فرقع والكل بص عليهم. أحمد: يا دين أمي. محمود: شكلها غمزت غمزت يعني. جمال: شوفتوا، قولتلكوا بلاش دي. بيان بصريخ: بيت مين يا حيو*ان يا وسخ، أنت فاكر نفسك مين يا بتاع أنت. كرم بعصبية: أنتِ بتضربيني أنا؟ ، أنتِ مش عارفة أنا مين. بيان: عرفت، عيل لسه بابي ومامي بيصرفوا عليه، دانت حتى لسه مبقتش راجل، اسمع يلا، أنت تبعد عني أحسن لك، وإلا والله العظيم هخلي اللي ما يشتري يتفرج عليك. لسه ماشية راح مسك دراعها.

كرم: رايحة فين تعالي هنا أنت. لسه مكملش ولقى كف على خده التاني. بيان: ابعد إيدك يا حيو*ان، إنسان نجس. سابته ومشت برا الجامعة وهو بص لقى الكل بيبصوا عليه وأغلبهم بيضحكوا. الدم غلي في عروقه واتغاظ من جرأتها معاه. طلع وراها بسرعة وصحابه طلعوا وراه. كرم: تعالي هنا بقولك، إيه، فاكرة إيه، هتمدي إيدك عليا وأسيبك تمشي كده عادي؟ ، دانتي ليلة أبوكي سودا. بيان: ابعد عني، سيبني بقولك أنت مبتفهمش.

كرم: أقولك، مش هرد لك القلم، أنا هعمل حاجة أجد. قرب منها بالعافية وهما على الطريق وحاول يبوسها قدام الكل وكل الناس بتتفرج ومصدومين. بيان: بتعمل إيه يا حيو*ااان ابعد عني. زقته بكل قوتها بعيد عنها وطلعت تجري عدت الطريق بسرعة وهو طلع يجري وراها وهو مش شايف قدامه غير كرامته اللي اتبهدلت في الأرض دي، طلع مطو*اه من جيبه ومشي عليها.

كل طلاب الجامعة كانوا برا بيتفرجوا عليهم وكلهم برّقوا لما لقوه طلع المطو*اه وساد التوتر والخوف بين الكل. وفي اللحظة اللي بيعدي فيها الطريق وقبل ما يوصلها بيبص الناحية التانية لقى عربية جاية بأقصى سرعتها قدامه. بيان: حااااااسب.