رواية بين الماضي والحاضر الفصل الرابع 4 - بقلم ياسمينا

عبير قربت من علي السرير ورفعت الملاية وبصت تحت السرير. ولقت عمر. عمر بابتسامة: هالوو. عبير بصدمة: جيبالي رجالة ف البيت؟ يقمر. قمر بتوتر: لا دا راجل واحد والله. عمر طلع من تحت السرير وقال بذكاء: انتي متعرفنيش. عبير بغضب: وأنا أعرفك منين؟ قمر بصدمة: ماما ده بابا عمر. عبير بضيق: قمر انتي اتهبلتي؟ ده مش أبوكي. وبعدين أبوكي إيه ده قدك. قمر فتحت كراسة الرسم وقالت: ده مش بابا.

عبير بصت على الرسمة وقالت: آه ده عمر صاحب فريدة، وده رسم فريدة. عمر اختفى في سنة 1997. أنا عمري ما شفته الصراحة، بس فريدة متأثرة أوي بغيابه. قمر بصت لعمر... وعمر بص لها بحزن. كان واثق إنها مش بنته. قمر بدموع: اومال أنا بنت مين؟ عبير بتوتر: إنتي هتخديني بصوت ولا إيه؟ مين ده؟ عمر بسرعة: أنا حازم ابن عمر، وأنا شبهه. عبير بغضب: وإيه اللي جابك بيتي؟ عبير اتفاجأت بسؤال قمر: هو أنا بنت حرام؟ عبير مردتش عليها.

قمر بصوت عالي: ردي. عبير بغضب: بس اسكتي خلاص. قمر بتهديد: أنا كدا كدا هعرف، بس أقسم بالله يا ماما لو طلعت بنت حرام... عمر قطعها وقال: بس خلاص. عبير مقدرتش تستحمل كلام بنتها وطلعت برا الأوضة. قمر بدموع: لو طلعت بنت حرام هغير الماضي وهنتقم منهم كلهم. عمر بحزن: أهدي، إحنا لازم نرجع لزمننا. قمر: تعال ننزل من هنا. عمر: طب مامتك. قمر بصت له بضيق وطلعت من الأوضة. وعمر مسك كراسة الرسم وخدها معاه وطلع وراها. وطلعوا من الشقة.

عمر بضيق: أي كان مامتك عملت إيه، مكنش ينفع تكلميها كدا. قمر بصت له بغضب وقالت: انت جاي تعلمني ولا إيه؟ لا روح علم نفسك، إنت حبيت مرات صاحبك بجد؟ مش عارفة إيه القرف ده، لا وكمان جاي تعلمني الأدب. قمر دخلت الأسانسير بغضب. وبصت لعمر وقالت بضيق: ادخل. عمر مسك باب الأسانسير وقال بكل هدوء: شفتي معاملتي معاها كانت عاملة إزاي؟ شفتي فريدة جرحتني إزاي؟

بس أنا فضلت معاها مش عشان بحبها والله، لا عشان أنا من أول يوم اتجوزت فيه سليم شفتها أختي. وأنا مبسبش أختي واقعة في مصيبة. طيب شفتي فريدة كانت معيشة أسر في كدبة وإنها هي وأبوه كويسين مع بعض وبيحبوا بعض؟ مسألتيش نفسك ليه؟ قمر بصت له ودموع في عينيها وقالت: ليه؟ عمر: عشان متخليش نفسيته وحشة. فريدة وسليم كل دقيقة بيتخانقوا، أكيد هي بعدت أسر عن الخناق عشان نفسيته وشخصيته متطلعش زي أبوه. شفتي بقا الفرق بينا وبينكم؟

أسر لما عرف إن أمه بتحبني زعقلها. وإنتي جيتي تزعقيلي. بجد المستقبل ده شكله فيه مصايب كتير وناس مبتحترمش حد، وقلة الأدب هتبقى طبع فيهم. قمر حطت إيدها على وشها وبدأت تعيط بحزن. وعمر دخل الأسانسير وحضنها بحنان وقال: أنا آسف إني كلمتك كدا، بس لازم تفهمي إن دي أمك مهما عملت. قمر حضنته جامد وقالت: الماضي ده طلع وحش أوي. أنا كنت بحسب إن كل مشكلتي اسمي بس. عمر بيضحك: أنا مش عارف عقلي كان فين لما سميتك الاسم ده.

قمر ابتسمت وقالت: كنت شارب حاجة شكلك. فجأة سمعوا شخص بيقول: استغفر الله العظيم. قمر خرجت من حضن عمر وبصت قدامها. لقت راجل كبير واقف قدام الأسانسير. قمر بستغراب: مالك ياحج؟ الشخص بقرف: استغفر الله. البنات مبقاش عندها حياء. قمر بصت لعمر وقالت: هو قصدو إيه الراجل الخرفان ده؟ الشخص وهو بيمشي قدامهم: بقوا يحضنوا ويبوسوا بعض كدا قدام الناس. بجد بنات آخر زمن. قمر بغضب: استنى ياراجل يا كداب إنت! إحنا بوسنا إمتى؟

عمر مسك إيدها وقال: اتهدي بقا وحركي أما الأسانسير ده. قمر: طيب. *** أسر وصل القصر بتاعه بس دخل من البوابة الخلفية. محبش مامته تشوف عربيته كدا وتخاف عليه. ودخل من باب المطبخ الخلفي. وبعدين جاي يخرج من المطبخ بس شاف أبوه بيزعق لفريدة. سليم بغضب: إنتي عايزة مني إيه؟ فريدة بدموع: وطي صوتك لاسر يجي ويسمعك. سليم بغضب: مايسمع، خليه ييجي يشوف أمه. فريدة بغضب: ارحم بقا، إنت كل يوم مع ست. اتقي الله بقا. سليم بخبث: إيه؟

غيرانة عليا؟ فريدة بصت له بقرف وقالت: ابداً، بس أنا مش عايزة أخلف لإسر تاني. سليم بسخرية: ولا تاني ولا تالت. وبعدين إنتي قلبك أسود أوي. إنتي لسه فاكرة اللي حصل من 23 سنة؟ فريدة بدموع: يوم 28/10/1997. التاريخ ده لسه محفور في قلبي وفي عقلي. مستحيل أنساه. سليم بخبث: قولتلك سبيني. فريدة: عشان تاخد مني أسر؟ عارف لو مكنتش بتهددني بيه كنت مشيت وسبتك. أسر كان سامع كل ده بصدمة. وبعدين جاله رسالة من قمر.

فتح التليفون وشاف الرسالة: (إحنا قدام القصر اطلع) أسر قفل التليفون وبعدين طلع من القصر. قمر بحزن: أسر أنا طلعت بنت حرام. أسر بص لها بحزن وقال: وبابا طلع بتاع ستات وماما عارفة وساكتة. عمر بضيق: أكيد عشانك. أسر مردش عليه وكان باصص في الأرض بحزن. عمر قرب منه وقال بهمس: على أساس إنك مش طالع لابوك، دانت ياشيخ كنت عايز تعرفني على بنات. أسر ابتسم غصب عنه وقال: تعرف وبس والله مش حاجة تانية. عمر: لا ياحبيبي، وأنا أضمن منين؟

قمر بضيق: بنات إيه؟ عمر بيضحك: لا متخديش في بالك. قمر: طب هنعرف الحقيقة إزاي؟ عمر بتفكير: نرجع للماضي. أسر: نرجع لتاريخ 28/10/1997. عمر بستغراب: 28/10 عيد ميلادي. أسر: أنا معرفش، بس ماما قالت إن ده أوحش يوم في حياتها. قمر طلعت المنبه وعمر خده منها وقال: هاتي أظبطه. قمر: تمام. قمر مسكت إيد أسر وعمر ظبط الوقت. وبعدين مسك إيد قمر. وفجأة اختفوا. *** *في زمن 1997* قدام قصر أسر. عمر فتح عينه

بهدوء وبص حواليه وقال: طيب إحنا كدا رجعنا. وفجأة سمعوا صوت رعد وقالت: شكلها هتمطر. تعالوا ندخل من البوابة الخلفية. عمر: طيب. عمر وأسر وقمر دخلوا من البوابة. وبعدين راحوا المطبخ. وبصوا على الصالون لقوا فريدة واقفة قدام ترابيزة وحاطة على ترابيزة تورته وحاطة فوقها شمع على شكل 24. وحاطة جنب تورته صورة عمر. فريدة بحزن: أنا مش عارفة روحت فين ولا اختفيت ليه، بس أنا دايماً هفضل أحتفل بعيد ميلادك. قمر بغيرة: أمك دي مستفزة.

أسر بضيق: اتلمي. عمر بهمس: هششش. فجأة دخل عليهم خالد وقال بغضب: جوزك فين؟ فريدة: مش عارفة. خالد بغضب: عبير مختفية من الصبح ومش لاقيها. فريدة بقلق: وسليم مجاش؟ خالد: دايماً جوزك بيبص على اللي في إيد غيره. فريدة بدموع: مش ذنبييي. خالد بزعيق: هلاقيه وساعتها أقسم بالله ما هرحمه. عمر طلع عليهم وقال: إيه؟ قمر بهمس: عمر. أسر حط إيده على بوق قمر واستخبوا في المطبخ.

أسر: اهدي. شكل ده اللي حصل اليوم ده ولازم عمر ياخد دوره عشان نعرف حصل إيه بالظبط. فريدة بصت لعمر بصدمة وقالت: عمر إنت جيت؟ كنت فين؟ عمر بتوتر: مش مهم. قولي في إيه. خالد بسخرية: أخيراً جيت؟ دانت من شهر 2 مختفي ومنعرفش عنك حاجة. عمر بضيق: فين عبير خطيبتك؟ خالد بغضب: معرفش مختفية. فريدة: عمر رد عليا، كنت فين وإيه اللبس الغريب ده؟ عمر بص لها وقال: تعرفي سليم فين دلوقتي؟

فريدة بتفكير: مش عارفة، بس لما بنبقى متخانقين بيروح لي البرج بتاعه. هو شطب شقة واحدة في البرج ده. عمر افتكر البرج اللي عايشة فيه قمر وقال: تمام. أنا رايح أشوفه. خالد: أنا جاي معاك. فريدة بضيق: وأنا؟ عمر مشي وهما مشيوا وراه. وعمر ركب عربية فريدة وتحرك. فريدة: عمر براحة. عمر تجاهلها ومردش عليها. أما في شنطة العربية... كانت قمر وأسر فيها. قمر: همووووووت. يخربيت دي فكرة. أسر بضيق: كنا لازم نروح معاهم.

قمر بغضب: مش عارفة أتنفس. أسر بهمس: كان يوم أسود لما شوفت وشك النحس. قمر بحزن: تخيل كدا مين أبويا. أسر: معرفش، بس إيه علاقة بابا بـ ماما؟ قمر: ماهي باينة. شكله كان بيضايقها. أسر سكت لما لقى العربية بتقف. وعمر نزل من العربية هو وفريدة وخالد وطلعوا البرج. أما قمر طلعت من شنطتها حديدة حجمها صغير وحاولت تفتح الشنطة. وفتحتها وطلعت هي وأسر. أسر: يلا بسرعة. قمر: مش عارفين أنهي شقة. أسر بتفكير: تعالي نشوف يمكن الدور الأول.

قمر وأسر دخلوا العمارة. قمر بضيق: عمر راح فين؟ أسر: أكيد طلعوا الدور التاني. فجأة سمعوا صوت ضرب نار جاي من الدور الثاني. قمر بخوف: عمر. أسر وقمر طلعوا الدور الثاني ولقوا باب الشقة مفتوح. دخلو بسرعة لقوا الصالة متبهدلة وكل حاجة فيها متكسرة. أسر بهمس: شكلهم في الأوضة. أسر وقمر دخلوا الأوضة. وقمر صرخت وقالت: مستحيلللللل.