رواية بين يدي الغامض الفصل الخامس عشر 15 - بقلم رقية

بعد دقائق، رجعت الأنوار. لاقيت جسمه في النص وهدومه غرقانة في دمه. ناديت بصريخ وصوتٌ عالي: = جواااااااد! جريت بسرعة ليه. اتلم الناس حواليا. حطيته على رجلي. حاولت افوقه: _جواد يا جواد انت كويس؟ بصلي وقال بهمس: = نادي مازن معاك. رديت بدموع: _طب ماشي. ماتقلقش والله، خليك معايا ماتسبنيش. وصل مازن صاحبه. واخده مني. جريت وراه: = تعالي انتي يا إسراء جمبه هنا وأنا هسوق. _حاضرك.

كان قاعد جمبي وراسه على كتفي. وايدي محطوطه على صدره مكان الإصابة. وقف بينا في كوخ وسط الغابة. كان عبارة عن كوخ قديم مليان تراب. *** = أنا عملت اللي اتفقنا عليه. مستنيه جميلك انت بقي. ضحك معاها: = طب استني ضرغام يصلب طوله. مش كله مرة واحدة كده. = على مهلك. أنا مستنيه مكالمتك ليا إنه حصل. = عيني ياست البنات. ضحكت بمياعة: = مستنيه يا باشا. *** دخلت الكوخ وحطيته على السرير الموجود. جه الدكتور بتاعه وخيطله مكان الإصابة.

كان الدكتور بيتكلم معايا وهو بيخيطله: = جواد برضه مصمم ومش عايز يهدى. بصيت باستغراب: = مش فاهمه. مش عايز يهدي من إيه؟ ابتسم وقال: = هو مقالكيش؟ _لا للأسف. = متقلقيش متقلقيش. هيحكيلك لو ارتاحلك. _ليه هو مش بيحكي لأي حد؟ = تعرفي أنا أعرف جواد من امتى؟ _من امتى؟ = لما أهله سابوه شاب لسه بيتعرف على الدنيا. _هما أهله سابوه!! = للأسف آها. خدني فضولي: _ليه؟

= لا دي حكايته حكايه. لما يفوق يبقي يحكهالك. بصي انا خيطت الجرح وطلعت الرصاصه. الحمدلله إن الرصاصه مدخلتش للقلب. لأنها بينها وبين القلب حاجات بسيطة. بينه وبين ربنا عمار الراجل ده. ابتسمت: = ربنا بيحبه علشان طيب. = جدًا والله. بس مش بيبين ده. عموماً هكتبلك علاج. لو تعرفي تبعتي حد يجيبه وتديهوله. واهم حاجه ياخد العلاج بعد الأكل على طول. ممنوع على معدة فاضيه. _حاضر. ***

= دي هيا بنتي والله. والراجل اللي جمبها ده باين عليه جوزها. ربنا يفرح قلبك يابنتي. بصي يا نسمه الابتسامه مفارقتش وشها ازاي. _آه يا ماما باينه طيب معاها. ربنا يهنيها ويسعدها. بص كده يا بابا إسراء. رد بجحود: = مش عايزة أشوفها ولا أسمع حاجة عنها. وأنا قولت قبل كده لا هي بنتي ولا اعرفها. من ساعة ما مشيت من البيت. اقفلوا على السيرة دي. وقومي ياولية انتي حطيلنا الغدا علشان ناكل اللقمه ونتخمد. جريت بسرعة: _حاضر حاضر ياحاج.

كانت بتتهامس هيا وأمها في المطبخ: = ماشاءالله يا ماما. جوزها باين عليه معروف ده. بصي الناس كلها بتقول عليه إيه في الكومنتات. كله بيشكر فيه. _يا حبيبتي يا بنتي ربنا عوضك على صبرك. = بيقولوا صاحب شركات الغُمري للتسويق والمبيعات. اتكلمت الأم وكأنها خبيرة على النت: = أيوه يابت عرفاها دي مشهورة أوي. وصاحبها ابصر اسمه إيه المجهول ده. = والنبي ياما ما عرف هو مين ولا اسمه. _استني استني هجيبه. سمعت زعيق جوزها من برا:

= يالا ياوليه. _اهو جااايه. خبطت نسمه بإيديها: = يالا أبوكي هيطلقني يخربيتك. *** عدى 3 ساعات وهو نايم متخدر. كنت قاعدة جمبه مستنياه يفوق. ايدي كانت على دقنه وشعر راسه الكثيف. بعد مدة فاق على لمسات ايديها على شعره: = إيه اللي حصل في الحفلة؟ قامت تسند ضهره بمخدة: _حمدلله على سلامتك يا جواد. قلقتني عليك. ابتسم بغرابة: = اخس عليا. أقلق القمر ده. ابتسمت ببلاهة: _حتى وانت بتفرفر لازم تزاولني. اتكلم بصوت مرهق:

= ماقدرش أفوت الفرصة. _ماشي ياعم هعديهالك علشان انت تعبان بس. هقوم أجهزلك حاجة تاكلها وتاخد علاجك. سيبته ودخلت للمطبخ اللي كان منظره بيطل على الغابة. وكان تصميمه من خشب تقيل من البني الغامق. كان بيسند ضهره وفي ايديه الموبايل بيتكلم مع شخص ما: = يعني هو بيعصي أوامري فبعتلي حد يغدر بيا. هو اللي بدأ يبقى يستحمل. ضرغام لما بيقلب هو فتح نار جهنم بإيده. = استهدي بالله يا ضرغام. يمكن مش هو.

= عامل حفلة هبلة زي دي وبيعزمني فيها؟ وجايبلي قناص؟ وتقولي مش هو؟ اقفل ياعم اقفل. دقائق ورد اللي بيتصل بيه: = اسمع بكره الصبح تروح مخازن الديب وتحرقهالي كلها. ماتسيبش قشايه. وتحطله ورقة مكتوب فيها "الضرغام بيقولك ده أقل حاجة. لسه التقيل مجاش". = عيني يا ضرغام باشا. انت تؤمر. تحب اعمل اللي اتفقنا عليه؟ ابتسم بشر: = لا خليها في الآخر. نبقي نحلي بيها. دخلت عليه أثناء ما هو بيتكلم. انتهى من مكالمته. بصلي. قلت بغيره بنات:

= مين دي اللي هتحلي بيها؟ انت بتجيب ستات البيت يا جواد؟ ضحك بعلو صوته: = يابت انتي تفكيرك دايماً شمال كده. قعدت جمبه. حطيت الصينية اللي فيها العشا على السرير: = والله مانت اللي كلامك مش مظبوط. إيه اللي خلاها في الآخر نحلي بيها دي؟ وضع ايده على رقبتي من ورا وقربني ليه: = والله ما هحلي بعد الأكل ده غير بيكي. بعدت ايده عني: = أوعي ايديك بس كده. وبعدين يعني إيه هتحلي بيا؟ هو أنا كنافة؟ ضحك: = لا بسبوسة بتنقط عسل يا عسل.

استغربت من تغير حاله بعد الإصابة. بقي رومانسي عن الأول. كنت بأكله شوية وشوية. هو ياكلني من الأكل. قومت اجيب علاجه: = بص دي الدكتور قالي بعد الغدا. ودي بعد الفطار. وده مرهم للجروح. وده شاش وقطن. اغير الإصابة. قال علشان يزاولني: = هتعرفي تغيري على الجرح ولا نجيب ممرضة أحسن؟ رديت بغيره قاتلة: = ومين قالك إني هسمحلك تجيب ممرضة؟ إيه الهبل ده؟ وهيا تشوف جسمك ليه إن شاء الله وأنا واقفة؟ كيس جوافة في النص يعني.

= اومال هتتعلمي عليا؟ ولا إيه؟ بصيت وأنا متعصبة: = آه هتعلم. امسك إشرب. أدّيته الدوا. وبعدين دخل ياخد دش دافي. *** = اسمعني يا ديب. ماتمشيش ورا كلام النسوان علشان هتروح في داهية. اسمع مني. = الست اللي بتتريقوا عليها دي برقبة واحد منكم. = ماتنساش فضل ضرغام عليك. هو اللي كبرك وعلمك الشغلانه. = وأنا كبرت ومابقيتش صغير علشان يوديني ويجبني. = صدقني إحنا من غير الباشا هنضيع. وصدقني زعله وحش. = ههه. إنت جبت ورا ليه يالا؟

خايف منه ولا إيه؟ = مش موضوع خوف بس. ده مش جزاه اللي ساعدنا لغاية ما وقفنا على رجلينا. = يالا انت مفكرنا بنبيع سبح ولا مصاحف؟ فوق يالا. إحنا بنبيع سلاح!!