رواية بئر كندراش الفصل العاشر 10 - بقلم نورهان اسلام

بص الملك وهو شايف الاضواء الخافته في الأرض منورة دليل على إن سكان الأرض نايمين. عمل بإيده سحر بينور فترة في الأرض كتحية من الملك لسكان الأرض. كان فيه بعض من السكان اللي لسه مستيقظين، واللي منهم ادم. بصوا للضوء اللي صادر، واللي هو لون مميز للملك، لون بنفسجي. بدأت الأشخاص اللي مستيقظة تقدم التحية للملك بألوانهم المميزة.

بص الملك للألوان اللي ملت السما وهو سعيد بتحية أهل الأرض المميزة، واللي منهم رسم باللون بتاعه "إمبراطور راناش ملك أرض كندراش". الوزير بص للملك وهو بيأكد على كلامه: كل ذلك يا مولاي دليل على محبة الشعب لك. أطمئن مولاي. الملك بصله وهو مبتسم. *** ادم كان بيبص للنور اللي بيظهر في السما والعبارة اللي اتكتبت، وهو بيفتكر كلام نجمة وبيبتسم بإستهزاء. *** في القرية تحديداً عند منزل نجمه.

كانت الساعة ٩ الصبح لما الباب خبط أكتر من مرة وبإستمرار. قام أسر فتح وعينه باين عليها النوم وهو بيقول: أيوا هفتح اهو! أول ما فتح الباب ظهر قدامه اللواء رأفت وهو لابس اللبس العسكري بتاعه. رفع القبعه من على دماغه وهو بيقول: مش هتخليني أدخل ولا إيه يا مقدم؟ بصله أسر وهو بيشاور بإيده علشان يدخل وقال: اتفضل يا فندم. قفل الباب بعد ما اللواء دخل. اتكلم معاه وقال: البيت بيتك يا فندم. هغير هدومي وأجي. نادى عليه

اللواء رأفت وهو بيقول: اقعد يا أسر. أنا مش غريب ومش فارق معايا اللبس. كان لابس قميص داخلي وشورت. قعد أسر قدام اللواء وهو مستني منه يتكلم. بدأ اللواء كلامه بعد ما بص بعينه على الصالة وقال: أومال أختك نجمة فين؟ ضحك بإستهزاء وهو بيقول: اختفت. جيت مالقيتهاش. أهل القرية قالوا إنها نطت في البئر. وده من صغري كل اللي بينزل فيه مش بيطلع تاني.

اللواء بأسف اتكلم وقال: كل ده قضاء وقدر. أهم حاجة تتخطى اللي حصل ده يا بني وتستمر في شغلك. وقف أسر وهو بيقول: مع احترامي لحضرتك، بس أتخطى إيه بالظبط؟ أمي وأختي اللي قضيت معاهم عمري كله. ده لو كلب هو اللي مات بيتزعل عليه فترة أطول من كدا. وقف اللواء وهو بيلبس القبعه بتاعته وقال: عموماً، هستنى الفترة دي تعدي. وعارف إن الظروف مش أحسن حاجة. ولولا إن ليك معزة خاصة عندي مكنتش جيتلك. سلام يا مقدم أسر.

خرج اللواء من البيت وهو بيبص على القرية وبيركب العربية. بص على بيت أسر نظرة سريعة قبل ما يمشي وقال للسواق: اطلع يا ابني. *** الملك بعد ما خلص كلامه مع الوزير طلع على المكتبة. مسك كتاب "مذاكرات الساحر كندراش". وهو بيقرأ أول صفحة اتفتحت. "معادها تتحدث بحماقة ولا تتكلم بشجاعة. كن كما أنت حتى لا يظنك الآخرين أبله. في بعض الأحيان يكون الصمت هو الحل الأمثل". "مذاكرات الساحر كندراش".

سكت شوية وهو بيفكر في الكلام اللي قرأه ومش لاقي تفسير ليه. قفل الكتاب وهو بيتجه للجناح بتاعه. *** الشمس طلعت وصحيت نجمه على شعاع من ضوء الشمس داعب عينيها. صحت وهي بتستعد لليوم الجديد. عينيها دارت في المكان وهي بتبص على ادم. اتفاجئت إن هو مش في الكوخ، رغم إن الوقت لسه بدرى. عدى خمس دقايق وكان ادم دخل الكوخ وهو في ايده أكل. اتكلمت نجمه بإستغراب وقالت: مش لسه بدري على الفطار؟ قعد على مقعد صنعه بإيده

من خشب مميز عندهم وقال: الأكل ده بيجي بس في الوقت ده. مسكت نجمه الأكل وهي بتتفحصه. كان فول وطعمية وبابا غنوج وسلطة. بصت بإستغراب للأكل وهي بتقول: الأكل ده بيتعمل هنا؟ ده بجد؟ ادم: في الوقت ده بس. حد من أهل القرية اللي هنا اتعلم يعملهم. وبدأ يبيعهم بالطريقة بتاعت الأرض. بس في الوقت ده بس ولمدة ساعة كمان. ابتسمت نجمه وهي بتفتح الأكل وقالت: تعالي ناكل بقى. دي الطعمية سخنة. *** في جناح قمر.

الحارس اتكلم وهو بينبه إن الملك داخل. قعدت قمر على السرير. دخل الملك وقعد على كرسي قدامها وهو بيقول بأمر: أخبريني، كيف جاءت نجمة إلى هنا؟ اتكلمت بإستفزاز للملك: كما جئنا وجاء الناس، من البئر؟ اتكلم الملك وهو واقف وقال: هل سقطت كما يسقط الأطفال؟ قمر: شيء كهذا. ولكن لِما تشغل عقلك بها لهذه الدرجة؟ إنها كأي شخص دخل الأرض. بصلها الملك نظرة أخيرة واتجه ناحية الباب وخرج. *** نجمه

وهي بتقوم من على الأكل: الحمد لله. ياااه. الواحد مأكلش الأكلة دي بقاله فترة. شكراً. بصلها وهو بيساعدها في لم الأطباق: على إيه يا نجمه. شكراً ليكي انتِ. إنك مونسانيني. ابتسمتله ولسه هتتكلم. الباب خبط وكانوا ماندريانا. فتح ادم الباب وهو بيقول: أهلاً. جاية بعد ما الأكل خلص. نجمه: لا أنا كنت شيلت شوية تقدرى تأكليهم. ماندريانا أخدت بالها إن الأكل ده مش الأكل بتاعهم. اتكلمت بإستغراب: هو ده الأكل بتاعكم. صح!!!

هزت نجمه رأسها وهي بتحط الأكل قدامها وقالت: أيوا. دوقي بقى وقوليلي رأيك!!! *** خلصت ماندريانا الأكل وبعدين قعدوا يتكلموا. بدأت نجمه الكلام وقالت: عايزة أبدأ أكسب السحر من دلوقتي. ماندريانا: ابدأي بالسحر البسيط اللي تقدري تكسبيه بسرعة. ادم: أنا رأيي من رأي ماندريانا. هيكون أسهل ليكي وهتقدري تكسب السحر بطريقة أسرع. *** بدأت نجمه تحاول تكسب السحر.

بدأت تعمل كل حاجة بنفسها حتى لو كانت شايفة إن الموضوع صعب شوية ولكنها كانت بتحاول. شافت طائر واقع على الأرض. بصتله وهي مشفقة على حالته. مسكت ورقة شجر وهي بتلفها على رجله اللي مصابة وصنعت ليه بيت صغير. فضلت تهتم بيه أسبوع. وفي آخر يوم كان العصفور بدأ يطير. شافت العصفور قدامها وهو طائر وابتسمت بسعادة. لمعت إيدها كدليل إنها كسبت سحر جديد. تقدر تعالج الجروح بكل سهولة. ابتسمت وهي بتحاول تعد السحر اللي كسبته خلال الأسبوع.

اقدر أزرع الأرض بسهولة، واقدر أشفي الجروح، أعرف أحرك الأشياء، اقدر أرفع أي شيء من مكانه. فضلت تعد اللي السحر اللي قدرت تكسبه خلال فترة قصيرة جداً. رجعت الكوخ علشان تقول لأدم على السحر الجديد اللي قدرت تتمكن منه. كان ماسك إيده وهو بيتألم من أثر جرح وهو بيحتطب. مسكت إيده وهي بتستخدم سحرها. بدأت تحاول تعالج الجرح لحد ما إيده رجعت زي ما كانت. بصله وهو بيبتسم: سحر العلاج. نجمه بسعادة

وهي شايفة إيده سليمة: لسه مكتسبة السحر ده النهارده. وانت أول واحد أعالجه بيه. صنع بإيده تاج وهو بيحطه على رأسها وقال: كدا نكون خالصين. علشان أقدر أكسب سحر أنا كمان. ابتسمت وهي بتبص على التاج بسعادة وقالت: شكراً. الهدية دي حلوة أوي. ادم وهو سرحان في عيونها الزيتوني اللي ابتسمت بفرحة: مش أجمل منك يا نجمه. *** كانت واقفة نجمه عند سور القصر ومعاها قمر وعبد الرحمن (والدها)

الأب حضنها وهو بيقول: وحشتيني يا بنتي. أخبارك وأخبار ادم!؟ افتكرت وهو بيمدح فيها الصبح. وابتسمت لوالدها وهي بتقول: كويس يا بابا والحمد لله. وبيعاملني كويس وبيعلّمني إزاي أقدر أكسب السحر بسهولة. المهم انتوا عاملين إيه؟ راميان وحشني أوي!! بصوا. عملت سحر بإيدها وهي بتكتب في السما وبتحرك بإيدها زي قمر وبترفعه بشكل حلو. ضحكت قمر وهي شايفة أختها اتعلمت حاجات كتير في فترة قصيرة. *** في الشركة اللي كانت نجمه شغالة فيها.

قعدت هنا على مكتب صديقتها نجمة وهي بتدور على صورة ليها تحتفظ بيها. قعدت تفتح في الأدراج بتاعتها وهي بتدور لحد ما وقفها صوت مدير الشركة وهو بيقول: بتعملي إيه؟ رفعت رأسها وهي بتبص له وقالت: ها.. يعني.. كنت بدور على صورة لنجمة صحبتي يعني.. علشان تكون ذكرى ليا يعني. بص المدير عليها وهو بيقول: طيب روحي كملي شغلك واعملي اللي انتي عايزاه ده بعدين. مشت وهي بتتجه لمكتبها. وهو فضل مراقب خطواتها لحد ما اختفت عن عينه.

آخر درج فتحته لمح فيه صورة لنجمة. أخدها وهو بيبتسم وبيتكلم في نفسه: وحشتيني ♡. *** "لا تتهاون بتلك القدرة، ذلك السحر الذي سُخر لها ليس من الهين الاستهانة به. لا تتهاون بالتعامل مع سحر الخدمات التي حصلت عليه فإذا انقلب العداء ضدك لن تستطع إيقاف المقذوفات". من مذاكرات الساحر كندراش.