رواية بئر كندراش الفصل التاسع 9 - بقلم نورهان اسلام

_بسم الله الرحمن الرحيم .. انت انس ولا جن! كل اللي واقفين ضحكوا على كلمتها وبصوا للشخص اللي كان واقف. واحد منهم اتكلم بسؤال: حضرتك مين! وفين نجمة؟ اتكلم أسر وهو بيقول: أنا أسر أخو نجمة. كلهم بصوا لبعض بإستغراب. رد واحد منهم تاني وقال: بس لمؤاخذة إحنا حضرنا العزاء بتاعك من حوالي 3 أسابيع!!! ابتسم أسر بحزن وهو بيقول: كانت مأمورية تبع الشغل للأسف وكان لازم يذيعوا خبر وفاتي.

لاحظ إنهم واقفين لسه على الباب. بعد شوية وهو بيعزم عليهم بالدخول، قعدوا كلهم وكانت هنا صاحبة نجمة بتبصله بخوف وإستغراب في نفس الوقت. واحد منهم خد باله من نظرات هنا فقال: معلش بس هي كانت قريبة من نجمة في الشغل وتلاقي نجمة ورتها صورة ليك. المهم فين نجمة... كنا عايزين نسلم عليها. بقالها كتير مجتش. ظهر على ملامحه الحزن وهو بيقول: لما رجعت كانت اختفت. أهل القرية قالوا إنها غالبًا نطت في البير.

بصوا لبعض وهما بيرددوا: لا حول ولا قوة إلا بالله. *** آدم كان قاعد في الكوخ وجنبه ماندريانا وقاعد قصادهم نجمة. بدأوا يتكلموا عن سحر الخدمات. بدأت ماندريانا كلامها وقالت: هنا السحر درجات، لإن على حسب العقل تقدر تمتلك السحر. سحر الخدمات خمس درجات. سحر سكان الأرض.

كمل آدم الكلام وهو بيقول: وده السحر اللي سكان الأرض بيستخدموه مع بعض. وده عبارة إنك بتتعامل بنظام زي المقايضة في الأرض عندنا. مثلاً، واحد بسحره يقدر يصنع كوخ سرير تقدر تاخد منه الحاجات دي مقابل سحر هو ميقدرش يعمله. بس انتي تقدري زي مثلاً ماندريانا تقدر تعمل الثلج. في فصول السنة بتم عملية المقايضة بالنار والثلج. أنا بعرف أخلع جذور الأشجار وأحتطب بيها وأقدمها كسحر الخدمات وكمان أقدر أزرع الأرض.

كملت ماندريانا وقالت: وصديق لينا اسمه كريم بيحرث الأرض مقابل بعض الثمار اللي من الأرض. نجمة كانت نظرتها غريبة ليهم. بصت ببلاهة وقالت: أيوه وإمتلك السحر إزاي!! آدم اتكلم: لازم تقدري تعملي الشي بنفسك الأول من غير سحر. ولما تحصلي عليه بدون تدخل حد السحر بيجيلك بنفسه. عشان تعملي الشئ ده تاني، لكن بسهولة. ماندريانا: السحر هنا هو اللي بيختار اللي هيملكه. وحتى المالك ميقدرش يتحكم فيه. نجمة: ممكن حد يقدم السحر بدون مقابل؟

ماندريانا هزت رأسها وقالت: السحر دايماً بيتعمل بـ مقابل. لو المقابل مش موجود مش هتقدري تكسبى سحر تاني. افتكرت نجمة الملك وهو بيعالج جروح قمر وبيصلح الأثاث اللي اتكسر. نجمة وهي بتفكر: طب واستخدام السحر بيترتب عليه إيه!!

آدم: لو عملتي السحر بمقابل في نفس الوقت بيكون زي نظام المقايضة. لكن لو ماخدتيش مقابل السحر بيبدأ يقل وممكن يتلاشى. والشخص التاني مش هيقدر يكسب سحر غير لما يقدم سحر. عشان كده لازم تبدأي بنفسك تكسبى سحر الخدمات. *** كانت نجمة واقفة عند سور قصر الملك وبتتكلم مع قمر. قمر بدأت كلامها وقالت: هتقعدي مع آدم!! هزت نجمة رأسها وهي بتقول: آه. قمر: رميان كل شوية يسأل عنك.

نجمة ردت بحب: حبيته رغم الفترة البسيطة اللي قعدتها معاه. أنا جاية علشان أقولك حاجة. من ضمن الحاجات اللي عرفتها واللي أكيد تعرفيها إن اللي بيقدم سحر بدون ما ياخد مقابل بيضعف والطرف التاني مش بيقدر يكسب سحر جديد. حاولي تحافظي على سحرك، علشان ممكن نحتاجه. الملك بيحاول يخليكي متكسبيش سحر تاني. الملك بيحاول يأذيكي.

هزت رأسها بنفي وقالت بحزن: بيحاول يخليني مأكسبش سحر تاني عشان محاولش أهرب من القصر. إنتي عارفة أنا حاولت أهرب قد إيه يا نجمة. نزلت رأسها على الأرض وهي بتفتكر محاولتها اللي بائت بالفشل. وبعدين اتكلمت وهي بتوجه كلامها لـ نجمة: المهم تكوني إنتي بخير. هستناكي تيجي تزوريني تاني. ***

كانت نجمة في طريقها لـ كوخ آدم. لفت نظرها تاني "قصر أرواح كندراش". نزلت عند القصر ده وهي بتقرب منه. كان فيه لوحة معلقة ومكتوب بـ "لغة أراسي" مكتوب في نص اللوحة "قصر أرواح كندراش". "في هذا الوادي تتجمع أرواح بلا جسد. في أرض كندراش لتكن عبرة لكل من حاول الأخذ من ماء الأرض" "هنا حيث لا تلتقي الأجساد والأرواح معاً. هنا أرواح فقط وأجسادهم في أرضهم"

وهي بتقرا الكلام استوعبت إن القصر ده فيه أرواح الأشخاص اللي شربوا ماية من البير وفضلوا جسد بلا روح. حاولت تفتح الباب لكن ظهرت رسالة مكتوب عليها: "لا يفتح الباب إلا لإستقبال روح جديدة". رجعت خطوة وهي بتبص على المكان نظرة أخيرة وبتطير ناحية كوخ آدم. *** كان ماسك صورة ليها أخدها من على مكتبها. كانت صورة ليها مع أسر. بص ليها وهو بيفتكر الكلام اللي زمايله كانوا بيقولوه لبعض. _شكلها مش هترجع تاني.

= بيقولوا اللي بيوقع في البير ده مش بيرجع خالص. _فعلاً. سمعت حوادث عن البير ده كتير. محدش نزل فيه ورجع تاني. • ده فيه ناس بتقول عليه مقبرة جثث من كثر الأشخاص اللي راحوا هناك ومرجعوش. _خلاص يا جماعة قفلوا على السيرة دي وكملوا شغل. ربنا يحفظنا منه ومن شره. الكل سكت وكمل شغله وهو كان مصدوم من كلامهم. يعني فعلاً هي مش هترجع تاني. بص على ضحكتها في الصورة وهو بيبتسم بحزن. *** رجعت الكوخ وكان عقلها شارد في القصر. قعدت

جنب آدم وهي بتسأل آدم: محدش قبل كده حاول يفتح قصر الأرواح!!! هز آدم رأسه وقال: القصر مش بيفتح لجسد حد. وبعدين القصر ده فيه أرواح كتيرة جداً لا حصر لها. محدش يقدر يتحكم فيها. كل سنة بتيجي رسايل كتير كل أمانيها إن روح من الأرواح المحبوسة تتحرر. لكن الإمبراطور بيرفض. بصتله وهي بتقول: ليه!! ليه بيرفض يحرر روح واحدة حتى!!! آدم: محدش يعرف أسباب الملك. لكن اللي يخليه يأمر بقتل أبوه في الساحة، يخليه يعمل أي حاجة.

نزلت نجمة رأسها تاني وهي حزينة على أختها. اتكلمت بسخرية: ولسه. بتفكر تكون تحت حكم واحد طاغي وظالم حتى على أقرب الناس ليه!! آدم: إحنا بنتعلم يا نجمة. ومن ضمن اللي اتعلمناه إن إحنا مندخلش في حديث مع الملك!! قامت نجمة وهي بتمشي للمكان اللي هتنام فيه وقالت: علشان كده فضلت هنا طول الفترة دي ومخرجتش يا آدم. لإنك ببساطة محاولتش! غمضت عينها وهي بتنام. وهو فضل قاعد بيفكر في كلامها. ***

كان الملك والوزير بيتمشوا في حديقة القصر. اتكلم الملك بلغة أراسي وهو بيقول: دائمًا ما تواجه الأرض كوارث نستطيع السيطرة عليها. ولكن لا أعلم إذا كانت الكوارث القادمة سأكون قادرًا على مواجهتها! الوزير وهو بيحاول يطمن الملك لإنه مخلص ليه: انظر من نافذتك الخاصة يا مولاي. ستجد الأرض تنعم بسلام في ظل حكمك.

بص الملك وهو شايف الأضواء الخافتة في الأرض منورة دليل على إن سكان الأرض نايمين. عمل بإيده سحر بينور فترة في الأرض كـ تحية من الملك لسكان الأرض.