رواية بئر كندراش الفصل الثالث عشر 13 - بقلم نورهان اسلام

مسك أسر كتاب كان على الأرض ومرسوم عليه عبارة "مذاكرات نجمة". فتح الكتاب وهو بيقرأ الصفحات الأولى. 13/7/2018 اخيراً اتخرجت من الجامعه اول مره اشوف نفسي حره بالشكل ده، لولا أسر وماما وكونهم معايا مكنتش هوصل للي انا فيه دلوقتي. "شكراً ليكم" كانت حاطة صورة ليهم هما التلاتة في آخر الصفحة. قلب الصفحة وهو بيقرأ تاريخ جديد. 22/6/2019

اه لو لعبت يا زهر.. شكل الدنيا هتلعب معاكي يا نجمة وهتقبضي بالدولار، اشتغلت في شركة كبيرة وبالنسبة لي دي البداية ليا، بتمنى ربنا يوفقني في اختياراتي كلها اللي جاية. كان فيه صورة ليها وهي متصورة قدام الشركة وبتبص عليها. ابتسم وهو بيقلب في الصفحات لحد ما جه قدامه تاريخ تاني. 6/7/2020 استاذ أسر اللي تاعبني معاه وسايبني في ملل لوحدي، فيه حد يقعد 3 شهور مياخدش اجازة، ده انت بتحب الشغل أوي يا أخي.

كانت حاطة صورة ليه ورسمة على وشه بشكل مضحك. ضحك على الشكل اللي هي راسماه بيه. 30/11/2020 صديقة العمر والطفولة "هنا" واخيراً هتشتغل معايا في نفس الشركة، مش مصدقة نفسي من الفرحة، مرحباً بقدومك يا صديقتي العزيزة. وتحتها صورة ليها هي وهنا. كان عايز يشوف آخر حاجة كتبتها. جاب آخر صفحة وهو بيقرأ. 22/8/2022

النهاردة أسوأ يوم عدى عليا، أنا النهاردة في البيت من غيرهم "ماما وأسر"، محدش معايا كلهم راحوا وسابوني هنا لوحدي، للدرجة دي مكنتش فارقة معاهم علشان يسيبوني، حتى قمر وبابا سابوني، بس أنا هروح لهم. نزلت دمعة من عيونه على الورقة وهو بيتخيل اللي كانت فيه. هو دلوقتي حاسس بنفس إحساسها. *** كانت قمر قاعدة في مكتبة القصر وهي بتقرأ الكتاب. دخل عليها الملك وقعد قصادها. اتحول نظرها من الكتاب ليه وهي مستنية منه يتكلم.

الملك: لأول مرة أراكِ تجلسين في المكتبة وتقرائين! قمر: وددت معرفة ما آخر الأخبار عن الأرض الذي تشك بإنهاء ستدمر. قفلت الكتاب وهي بتقوم وخرجت من المكتبة تحت أنظار الملك اللي فضل مراقب حركتها لحد ما باب المكتبة اتقفل وراه. الكتاب اتنقل قدامه بالسحر وهو بيفتحه ويقرأ. "هنا بدأ خراب الأرض، تدميرها للأرض لن يكون بإحداث الفوضى أو تحريض الشعب ولكنها تتبع طرق فريدة.. وها قد يتسلسل إليها السحر رويداً رويداً."

قفل الكتاب والخوف بدأ يظهر على ملامحه خصوصاً بعد ما قمر كانت بتقرأ في الكتاب. *** * عند كوخ آدم الباب اتفتح وهي بتدخل منه وتتكلم بسعادة: كسبت السحر يا آدم، كسبته. سكتت ولأول مرة تشوف حد غير ماندريانا قاعد معاه، كان شخص تاني من سكان الأرض الأصليين اللي وقف. ولحسن حظها إنها كانت لابسة القناع اللي بيخفي ملامحها. بصلها آدم وصديقه اللي كان جنبه واللي اسمه آبيل.

كان آبيل مش فاهم اللغة اللي تكلمت بيها. نجمة كانت بتبص لآدم وهي مستنياه يرد عليها. آدم رد بلغة أراسي عشان آبيل يفهم: هذه نجمة، صديقة لي من الأرض الذي جئت منها. آبيل: إذا وماذا كانت تقول حين دخلت؟ كان بيتكلم بلغة أراسي. آدم: هاه، إنها لغة أرضنا اللي جئنا منها وهي تتكلم معي بها.. إذا ماذا كنا نقول!! آبيل بتذكر: كنا.. كنا نتحدث عن ماذا سنفعل في احتفال الأرض القريب. آدم: احتفال الأماني... سنحقق أمنية لكل أرضي هناك.

آبيل اتكلم بيأس: إذا وافق الملك. *** * كانت قمر في جناح والدها. كانت بتتمشى في الجناح بتوتر وهي بتتكلم مع والدها: خايفة إنه يكون شك فيا، الموضوع بدأ يقلق ونجمة لسه معملتش حاجة غير إنها بتحاول بس!! عبد الرحمن اتكلم وهو بيحاول يهديها: الملك مش هيشك عشان دخلتي تقرئي، انتي قولتي إن هو دخلك قبل كده عشان تقرأي بنفسك صح! هزت نجمة رأسها بموافقة وهي لسه قلقانة.

عبد الرحمن: خلاص.. يبقى تهدي.. وتواصلي مع نجمة وشوفي آخر حاجة وصلت ليها إيه! *** * عند كوخ ماندريانا دخلت نجمة وآدم الكوخ وكانت ماندريانا قاعدة بتحاول تكسب سحر جديد لكن مش عارفة. اتكلمت وهي بتقول بلغة أراسي: أمر صعب. اتكلمت نجمة: حاولي مرة ثانية. آدم: لأول مرة متجيش الكوخ بتاعي النهارده. اتنهدت ماندريانا وقالت: بحاول أكسب سحر جديد ومش عارفة، بحاول هنا من الصبح.

آدم لنجمة وهو بيقول بفرحة: نجمة قدرت تكسب سحر جديد، الذاكرة الفولاذية. عيون ماندريانا لمعت وهي بتقول: إيه.. بجد، إزاي!؟ السحر ده صعب حد يكسبه في فترة قصيرة وبالسهولة دي. ابتسمت نجمة وهي بترفع كتفها وقالت: قدرات. ضحك آدم ونجمة كملت ضحك، لكن ماندريانا فضلت قاعدة بتحاول تتصنع ابتسامة بسيطة. *** * داخل قصر الملك

كانت نجمة واقفة ومعاها قمر وكانت قمر بتنقلها الكتاب بالسحر بتاعها اللي كسبته نجمة في وجود عبد الرحمن اللي كان بيراقب الطريق. الكتاب كله اتنقل لعقل نجمة. نجمة صنعت تاج من الفضة لقمر عشان تقدر تكسب سحر جديد، وعشان قمر متتعبش من السحر اللي استخدمته. قمر: هتغمضي عينك وتفكري في الكتاب.. هيفتح قدامك وهتقدري تتنقلِ بين الصفحات بعقلك، أهم حاجة تاخدي بالك إنك متستخدميش الذاكرة دي أكتر من مرتين في اليوم.

هزت نجمة رأسها وهي بتودع والدها قمر وبتطير ناحية كوخ آدم. *** * الساعة 2 ظهراً داخل الشركة كانت هنا قاعدة بتشتغل على مكتبها زي كل يوم. دخل عليها واحد من الأمن وهو بيقول: في واحد تحت عايز حضرتك يا أستاذة هنا. بصتله هنا بإستغراب وقالت: واحد مين!؟ _هو قال لما تشوفيه هتعرفيه. نزلت هنا وهي بتبص حواليها. لمحت أسر أخو نجمة وهو واقف ساند على الحائط.

كانت ماشية باتجاهه وهي بتبصله بتركيز. أخد باله فاتعدل في وقفته. قربت منه وهي مستنياه يتكلم. *** "لقد اقترب الطريق لتحقيق آمالها" كانت دي العبارة اللي قرأها الملك. ورغم صغرها، إلا إن الملك بسببها الخوف سيطر عليه. اتجه ناحية جناح قمر وهو بيتوعد بالشر لنجمة. فتح باب الجناح وملامح الشر كانت باينة على وشه. بصتله قمر وهي مش فاهمة تعابير وشه. ***

= من عادتي إني مش بحب أبرر لحد أنا عملت كدا ليه، بس بردو مش بحب حد ياخد عني فكرة وحشة. قالها أسر وهو واقف قدام هنا وكان بيتكلم بإرتباك.

كمل كلامه وهو بيقول: لما اللواء عندي قالي على المهمة دي وافقت عليها، وقالي إنه هيبعت مرسال لأهلي إني شهيد عشان كان عارف إني هكون مراقب من الناس. الخطه بتاعته نجحت وقدرت إني أقبض على العصابة وأخدت ترقية، بس الحاجة الوحيدة اللي مكنتش أعرفها هي إني خسرت أعز اتنين على قلبي. لما سمعتك امبارح وإنتي بتتكلمي مع صاحبتك، عرفت قد إيه أنا كنت مغفل لما وافقت على العملية دي.

اتنهد وهو بيقول: جاي أشكرك إنك كنتي الجزء الحلو في حياة نجمة وإنك في يوم قدرت تعوضيها عن غيابي. طلع المذكرات بتاعت نجمة وهو بيمدها بإيده لهنا وقال: دي كمان ذكرى من نجمة ليكي. ابتسم ليها وهي بتاخدها من إيده. قال: لقيت ليكي ذكريات كتير ليكي، وعرفت إنك كنتي أقرب صديقة ليها. كانت هنا مش مصدقة الكلام اللي بيقوله.

مسكت المذكرات وقالت: عموماً، أياً كان اللي حصل فده قضاء ربنا وقدره ومش من حق عباده يعترضوا. ركز في حياتك وادعيلهم بالرحمة.. عن إذنك. سابته ومشيت وهو فضل واقف مراقبها لحد ما اختفت عن نظره. *** قمر بغضب: لقد زاد الأمر سوء، ليس هذه أول مرة التي تقتحم على غرفتي.

مسك إيدها وهو بيتوجه للمكتبة. مسك الكتاب قدام عيون قمر وهي بتقرأ العبارة. كانت مصدومة وهي بتقراها. العبارة دي مكنتش موجودة وهي بتحفظ الكتاب في ذاكرتها.. وده معناه شي واحد إن الكتاب مكتوب بسحر خفي بيظهر لما المكتوب يتحقق على أرض الواقع.