رواية بئر كندراش الفصل الثاني عشر 12 - بقلم نورهان اسلام

ماذا لو انتهت أرض كندراش العظيمة؟ وانتهت معالم التهجين؟ وأصبح الإنسان هو الشخص السائد في الكرة الأرضية؟ اتكلمت نجمة عن العبارة اللي قرأتها في مذكرات الساحر وقالت: هل ممكن يكون الموضوع ده السبب؟ هل هو خايف إن الأرض تنتهي؟ آدم ركز مع كلامها وقال: انتي متأكدة من اللي قرأتيه ده؟ هزت نجمة رأسها وهي بتتمشى في الأوضة وقالت: بس ده إيه علاقته بيا أنا؟ آدم: انتي قرأتي من الكتاب ده قد إيه؟ نجمة: حوالي صفحة. آدم:

حاولي تقرأي من الكتاب ده تاني. شوفي الأرض هتنتهي إزاي؟ وإيه سبب خوف الملك من انتهاء الأرض؟ سرحت نجمة وهي بتفكر إزاي هتقدر تجيب الكتاب من غير الملك ما يشك فيها. *** عند بيت نجمة. أسر بص لهم بإستغراب وقال: انتوا مين؟ أنا فاكر إني شوفتكم قبل كده. قال الكلام ده وهو بيشاور على هنا. كانت هنا مدت إيدها وهي بتقول له: ازيك؟ رجعت إيدها مكانها وهي بتقول بتوتر: كنا عايزين صورة لـ نجمة تفضل معانا. اتكلمت دعاء:

ذكرى يعني. علشان ملقتش صورة ليها في المكتب بتاعها في الشركة. هز أسر رأسه بتفهم. دخل أوضة نجمة اللي تقريباً مدخلهاش غير مرة واحدة من ساعة ما جه. مسك صورة ليها كانت متعلقة على الحائط. وسرح في تفاصيل الأوضة وهو بيفتكر وهو بيرتبها هو ونجمة. *** هو اتأخر كده ليه؟ قالتها دعاء وهي واقفة. ردت هنا عليها وقالت: ممكن يكون بيدور على صورة كويسة ولا حاجة. هزت دعاء رأسها بتفهم. واتكلمت هنا وهي بتقول:

تعرفي.. وحشني قوي قعدتي مع نجمة. أوقات بحس إن السبب في كل اللي حصلها هي والدتها أخوها. نزلت رأسها واتكلمت: وقت العزاء المزيف بتاع أخوها قالت لي إن هو الوحيد اللي كان بيهون عليها أي حاجة تزعلها. تخيلي بقى إن يكون هو اللي مزعلها. دمعة نزلت منها. مسحتها قبل ما دعاء تاخد بالها. خرج أسر وهو ماسك صورة لـ نجمة. والصورة كمان كانت بتضم هنا صاحبتها. بصت للصورة وضحكت وهي بتقول:

صورة ليا أنا وهي كمان. شكراً جداً يا أستاذ أسر. يلا يا دعاء. مسكت إيد دعاء وهي بتحط الصورة في شنطتها وبتمشي. قفل أسر الباب وهو بيفتكر الكلام اللي سمعه من هنا. كان حزين على نفسه وعلى اللي عمله في أهله. دخل الأوضة بتاعته وهو بيبص على كل الشارات اللي أخدها وهو بيخدم. حاسس إن دلوقتي ملهاش قيمة قصاد الوحدة اللي هو عايش فيها. مسك الشارات بتاعته وهو بيرميها على الأرض بحزن. *** وقفت نجمة عند سور القصر وهي بتكلم قمر.

قمر اتكلمت بخوف على نجمة: أي حاجة عايزة تعمليها حوالى محدش يعرفها غيرك. الملك قلقان على عرشه. افتكرت إمبارح وهو بيتوعدها إن لو شكه اتأكد هيقطع رقبتها. لاحظت نجمة إنها سرحت. فاتكلمت وقالت: متخافيش. أنا بحاول بقدر الإمكان محدش يشوفني. بس أنا عايزة أطلب منك طلب. بصت لها قمر وهي مستنية تقول الطلب. اتنهدت نجمة وقالت: عايزة كتاب مذكرات الساحر كندراش. *** في جناح عبد الرحمن. قعد رميان وهو بيتكلم مع جده وقال: هي نجمة فين؟

بقالي كتير مشوفتهاش. مسك الجد خدوده وهو بيتكلم بإبتسامة: خارج القصر. بس آخر مرة قابلتها قالت لي أقولك إنها بتحبك أوي ونفسها تشوفك. ابتسم راميان ابتسامة طفولية وقال: وهي كمان وحشتني أوي يا جدو. حضنه عبد الرحمن وهو بيقول في نفسه: ربنا يعدي الأمور اللي جايه على خير. *** كان أسر قاعد بيأس على أرض الأوضة بتاعته وماسك آخر صورة اتصورها مع نجمة ووالدته. وحالة من اليأس مسيطرة عليه. بص في الصورة مرة ثانية وهو بيقول بصوت مخذول:

سامحوني. أنا دلوقتي حاسس بالشعور اللي انتي كنتِ حاسة بيه. حاسس بالوحدة من غيركم. *** قمر اتكلمت بصدمة من كلام نجمة: صعب يا نجمة. الملك كل يوم بيدخل المكتبة يقرأ من الكتاب ده. إمبارح دخلني وخلاني أقرأ من الكتاب معاه. وحكت لنجمة على اللي حصل. فضلت نجمة تفكر. وبعدين اتكلمت وقالت: هحاول أفكر في طريقة ناخد بيها الكتاب من غير الملك ما ياخد باله. قمر: ماشي. نجمة مشيت قبل ما حد يشوفها. *** في كوخ آدم. يعني الأرض ممكن تختفي؟

قالتها ماندريانا وعلامات الصدمة كانت مسيطرة عليها. هز آدم رأسه وقال: آه. ده اللي نجمة قرأته في الكتاب. ماندريانا بتساؤل: طيب وسكان الأرض الأصليين؟ هيكونوا فين؟ آدم: هل ممكن شكلكم يتحول لشكل سكان الأرض وتكونوا معانا؟ بصت ماندريانا على جناحها وهي بتحركه وقالت: مش هنعرف نطير! آدم: ده اللي فارق معاكي. انتي أغلب الوقت بتكوني ماشية أصلاً. فتحت نجمة الباب ودخلت. خلعت القناع اللي كانت مركباة على وشها علشان يخفي ملامحها.

أول ما دخلت ماندريانا سألتها بجدية: بجد الأرض ممكن تختفي يا نجمة؟ بصت نجمة لـ آدم وماندريانا اللي عيونهم عليها ومستنين منها إجابة بتوتر وهي بتقول: معرفش. آدم بإستغراب: متعرفيش إزاي؟ قعدت نجمة بتوتر وقالت: معرفش الأرض هتنتهي إزاي وامتى. معرفش حاجة. أنا كل اللي قرأتها من الكتاب صفحة. معرفش أكتر من كده. *** انت مبقتش كائن طبيعي. انت إزاي قابل إنك تعيش كده؟ ها؟ فهمني يا أخويا. رد عليها بتكبر وهو بيقعد

على السرير وبيولع سيجارة: مش لما تبقي بتفهمي يا ريم. وبعدين عايز أفهم انتي إزاي طايقة نفسك أصلاً. اتكلمت ريم بسخرية وقالت: طايفه نفسي!! انت عايز اللي يعيش معاك يكون عامل إزاي؟ ده لو مشربش من أنانيتك وقحاتك يبقى مش طبيعي. قام من مكانه وهو بيخرج من الأوضة وقال: أنا مبقتش طايق العيشة معاكي. انتي مبقتيش طبيعية.

خرج من الأوضة وسابها وهي فضلت واقفة مكانها. دخل مكتبه وقعد وهو بيحط إيده على رأسه "مصدع". فتح الدرج وهو بياخد دواء. وقعت عينه على صورة نجمة اللي أخدها من المكتب. *** في جناح عبد الرحمن. كانت قاعدة قمر مع والدها وبتتكلم عن نجمة وطلبها لكتاب الساحر. اتكلم عبد الرحمن وهو بيقول فكرته: تقدري تحفظي الكتاب في عقلك؟ قمر فكرت بأن القدرة دي عندها فعلاً وإنها تقدر تعمل كده. بس نجمة معندهاش القدرة دي. قمر:

بس نجمة مقدرش أنقلها المعلومات اللي هاخدها من الكتاب. لازم هي يمكن تكسب السحر ده. عبد الرحمن: اتكلمي معاها وهي هتحاول تكسب السحر ده بأي طريقة. طالما عندها إرادة هتقدر تعمل أي حاجة. بصت قمر قدامها وهي مش لاقية أي حل غير ده. *** كانت نجمة قاعدة بتتكلم مع آدم بعد ما ماندريانا مشيت على الكتاب. رد آدم: بس انتي كده هتعرضي أختك للخطر. الملك لو عرف ممكن يأمر بقطع رأسها. سكتت نجمة وهي بتفتكر الحلم اللي حلمته. نجمة

وهي بتحاول توجد أي حل: مفيش طريقة أقدر آخد بيها الكتاب أو مثلاً أتصوره. أعمل أي حاجة. هز آدم رأسه بالنفس وقال: لأ. مفيش عندنا إمكانية التصوير غير بالعقل. *** في جناح قمر. كانت قاعدة وهي بتحاول تتواصل مع نجمة. نطقت اسمها ثلاث مرات وهي بتفكر فيها. وصل لـ نجمة إشارات قمر. فغمضت عيونها وهي بتكلمها في عقلها. قمر: مفيش غير طريقة واحدة علشان تاخدي الكتاب. نجمة: إيه هي؟ قمر:

الذاكرة الفولاذية. عبارة إنك بتقدري تحفظي أو تفهمي أي حاجة وتخزنيها في عقلك لمدة طويلة. أنا قدرت أكسب السحر ده من زمان. نجمة: هحاول أكسب السحر ده. قمر: وأنا هقرأ الكتاب وهخليه في عقلي لحد ما تقدري تكسبِ السحر. فتحت نجمة عيونها وكان آدم مركز معاها وفاهم إن فيه حد بيتواصل معاها. فضل ساكت لحد ما قالت نجمة: الذاكرة الفولاذية. آدم: لكن النوع ده من السحر صعب حد يكسبه بسهولة. نجمة بعدم يأس من كلامه: أنا هحاول. ***

كانت نجمة بتقرأ من الكتب اللي موجودة عند آدم وبتزور قمر من وقت للتاني. تقرأ كتاب من مكتبة القصر بدون علم الملك. ومنهم كتاب الساحر. عدى شهر وهي بتحاول تكسب السحر ده. كانت قاعدة في مكان مخصص في الأرض لقراءة الكتب مقابل السحر. وهي بتقرأ الكتاب لمعت إيدها. وده دليل إنها كسبت سحر جديد. ابتسمت بسعادة وهي بتسيب الكتاب وبتروح لـ آدم علشان تقوله على الخبر ده. ***

كانت قمر قاعدة في مكتبة القصر وهي بتقرأ الكتاب. دخل عليها الملك وقعد قصادها. اتحول نظرها من الكتاب ليه وهي مستنية منه يتكلم.