رواية بيت العيله الفصل الثامن 8 - بقلم حور حمدان

هيا مين دي اللي متربتش؟ قربت منها وضربتها بالقلم وقالت: أنا بنتي متربية عنك، لو فيه حد ناقص تربية هنا فهو إنتِ. اعتماد بزعيق وهيا بتبعد ميادة عنها: يوسف خد مراتك واطلع على شقتك. وبصت على مروان اللي كان واقف على جنب خايف من سلمى: خد مراتك يا مروان وادخل الأوضة، أنتم عرسان. مروان وهوا بيقرب على روان وبيمسك إيدها. اعتماد بزعيق: مش روان يا مروان، سلمى يا أخويا، إيه هتسيب البت يوم فرحها؟ الناس تقول علينا إيه؟

مروان بزعيق: وأنا مش هكون معاها بشكلها ده، أنا خايف أبص على وشها حتى. أنا هفضل مع روان لحد ما الكائن الغريب ده يرجع لطبيعته، ولحد الوقت ده مش هلمسها. وأخد روان وطلعوا على شقتهم، وطول الوقت ده روان كانت ساكتة. عند فريدة، لقيت رقم بيقولها: بحبك ومش هتكوني لغيري. فريدة: إنت إنت مين وعاوز إيه؟ مجهول: عاوزك إنتِ. فريدة: إنت عبيط ولا واقع على دماغك؟ وعملت له بلوك.

بس فضلت تفكر في اللي حصل وقررت تاني يوم الصبح تتصل تعتذر من حور. في صباح يوم جديد، كان الوضع متوتر جداً في البيت. نزلت ريم وحور وروان وميادة، ودخلت نور تساعدهم. أما سلمى كانت قاعدة في الأوضة مكسوفة تخرج بشكلها ده. حور وهيا واقفة بتتكلم معاهم، جالها اتصال. بصت على الفون لقيت رقم غريب. بصت لميادة وقالت: مادو، أنا خايفة أرد. ميادة: ردي يا بنتي، مش تخافي، ردي وفتحي مكبر الصوت. حور: تمام. وفتحت. فريدة بتوتر: أحور معايا؟

حور باستغراب: أيوه، مين حضرتك؟ فريدة: أنا فريدة، قبل ما تقفلي حبيت أقولك حقك عليا، أنا آسفة، أتمنى مش تزعلي مني. حور بابتسامة: ولا يهمك يا ديدا، أنا هقفل بس عشان ورايا هم ميتلم. فريدة بضحك: ربنا معاكي. وقفل. كلهم بصوا لبعض. قالت نور: سبحان مغير الأحوال من حال إلى حال. في الوقت ده، رن فون نور. نور باستغراب: هوا فيه إيه؟ كل شوية فون حد يرن. بس ردت. منه صاحبتها: إزيك يا نوارة، أخبارك إيه؟ نور بدهشة: منه، إزيك؟

أخبارك إيه؟ وأخبار مريم إيه؟ منه بفرحة: وحشتيني، أنا الحمد لله بخير دامك بخير. المهم أنا دورت على رقمك كتير لحد ما لقيته، وحبيت أعزمك على فرح مريم، هوا الشهر الجاي. نور بفرحة: مبارك إن شاء الله، هاجي. منه: أشطا، مستنياكي. وقفل. دخلت عليهم اعتماد وقالت: وحياة أمك يا أختي إنتِ وهيا، إيه مفيش زريبة عاوزة تتنضف؟ مفيش طبيخ؟ مفيش فطار؟ وقبل ما تكمل كلام، سمعوا صوت حاجة بتقع. بصوا على ناحية الصوت لقوها روان. وااا...