رواية داليدا الفصل الثالث 3 - بقلم حبيبة ابراهيم

فجأة النور بيقطع وبيرجع في وقتها والعروسة بتختفي وتكون برة المطبخ. أم أسيل: إيه يا قمر رميتي العروسة ليه؟ قمر: يا ماما أنا مرميتهاش. أم أسيل بتبص ل داليدا وأسيل. داليدا: قمر يعني إيه مرميتهاش؟ قمر: هي مشيت من إيدي. أم أسيل بصوت عالي: داليدا مين اللي جابلك العروسة؟ داليدا: ريم يا ماما. أم أسيل: العروسة دي مش هتقعد في بيتي دقيقة كمان. داليدا: حاضر، البسي يا أسيل وأنا هتصل ب ريم.

داليدا: إيه يا ريم، البسي بسرعة عشان نروح نرجع العروسة. ريم: فيه إيه يا داليدا؟ داليدا: لما أشوفك هقولك، البسي وقابليني عند بيتي. ريم: طب أنا بيتي بعيد، هتأخر شوية. داليدا: منا عارفة يا ريم، عقبال ما نلبس، انتي كده كده بتلبسي بسرعة. ريم: ماشي ماشي، يلا سلام. بعد ساعة. داليدا: إيه يا ريم، انتي فين؟ ريم: أنا أهو، دقيقة وهبقى عندك. داليدا: ماشي، أنا مستنياكي أنا وأسيل قدام البيت. ريم: أنا شوفتكوا أهو.

داليدا: إيه يا ريم كل ده؟ ريم: معلش يا داليدا، ما انتي عارفة إن بيتي بعيد، ده كمان كده الطريق كان فاضي، في إيه عاوزة ترجعي العروسة ليه بس؟ داليدا: العروسة ملبوسة يا ريم. ريم: يعني إيه؟ إزاي؟ داليدا: هحكيلك في الطريق. بعد نص ساعة. ريم: ده المحل. داليدا: ماشي، يلا يا أسيل. داليدا: السلام عليكم. البائعة: وعليكم السلام.

داليدا: زميلتي كانت مشترية العروسة من هنا وهي طلعت ملبوسة، أنا عاوزة أفهم إزاي بتبيعوا حاجة زي كده للناس، أنا هبلغ عنكم البوليس. ريم: استني بس يا داليدا، مش البنت دي اللي باعتلي العروسة؟ البائعة: اهدي بس حضرتك، فعلاً كان فيه بنت هنا غيري وصاحب المحل مشاها عشان كذا واحدة اشتكت من المشكلة اللي حضرتك بتتكلمي عنها. ريم: أيوه يا داليدا، مش هي اللي باعتلي العروسة. داليدا: تمام. داليدا لأسيل وريم: طب هنعمل إيه دلوقتي؟

أسيل: إحنا ممكن نرميها في أي مكان مقطوع، معتقدش حد هياخدها. داليدا: شكلها حلو أوي يا أسيل، أي طفلة صغيرة هتاخدها. أسيل: بس المكان هيكون مقطوع. داليدا: وارد أي حاجة. ريم: طب بصي، إحنا ممكن نقطعها ونرميها في النيل. داليدا: تمام، نعمل كده. بعد 20 دقيقة. أسيل: يلا نروح. داليدا: ريم أوصلك؟ ريم: لا، انتي عقبال ما توصُليني وترجعوا تكون الساعة اتنين بليل، يلا روحوا انتوا. داليدا: ماشي، ابقي طمنيني لما توصلي.

ريم: إن شاء الله. أم أسيل: إيه يا بنات عملتوا إيه؟ أسيل: لقينا الست اللي باعت العروسة لريم، صاحب المحل مشاها لأنها هي اللي كانت بتجيب العرايس دي وتبيعها، معرفش ليه عملت كده أساساً، بس خدنا العروسة ورميناها في النيل بعد ما قطعناها. أم أسيل: مش مشكلة، المهم إنها مشيت من البيت، يلا غيروا هدومكوا عشان ناكل. اليوم التالي. داليدا: صباح الفل ينور عيني. أم أسيل: ها، قولي. داليدا: إيه يا ماما؟ أكيد مش هعوز منك مصلحة يعني.

أم أسيل: منا عارفة، قولي. داليدا: ماما، هو بابا مكلمكيش وقالك هو هيرجع إمتى؟ أم أسيل: ما إحنا بنكلمه كل يوم ومبيتكلمش في موضوع رجوعه. داليدا: ماما، الولد اللي كلمك وقالك إنه عاوز يخطبني مكلمكيش تاني؟ أم أسيل: كلمني، بس انتي عارفة إن أبوكي لازم يكون موجود. داليدا: يا ماما، منا علشان كده بقولك بابا مقالكيش هيرجع إمتى؟ أم أسيل: هكلمه النهاردة وأشوف هيعمل إيه. داليدا: كلميه دلوقتي، أنا واقفة معاكي أهو.

أم أسيل: ماشي، استني. أم أسيل: إيه يا حبيبي، عامل إيه النهارده؟ = أنا الحمد لله بخير يا حبيبتي، الولاد عاملين إيه؟ أم أسيل: الحمد لله كويسين وبيسلموا عليك. داليدا: هاتيه، هاتيه. داليدا: بابا، وحشتني أوي بجد. = وانتي كمان يا حبيبتي وحشتيني، أومال فين أسيل والقمر الصغير؟ داليدا: نزلوا يجيبوا حاجات وأسيل خدت قمر تجيبلها حاجات حلوة.

= داليدا، أنا عارف إنك عاوزة تتكلمي في موضوع الخطوبة، أمك قالتلي على الولد وقالتلي إنه بيكلمها هي عشان انتي مبتكلميهوش، وهو خد رقم تليفونها عشان يكلمها ويأكد إنه عاوز يخطبك بجد. داليدا: أيوه يا بابا، بس إحنا لسه مقابلناهمش، وبعدين أنا مش هعمل خطوبة من غيرك. = يا حبيبتي، طب قابلوهم، ومامتك قايلاله إني مسافر، وبالمرة تكوني كمان فكرتي في الموضوع. داليدا: حتى لو يا بابا، أنا مش هعمل خطوبة من غيرك.

= يا داليدا، فرحتك من فرحتي، انتي عارفة إن صعب أوي إني أنزل دلوقتي من قبل ما أسافر. داليدا: يا بابا، بس أنا مش هعرف أفرح من غيرك. = طب يا داليدا يا حبيبتي، معلش هكلمك تاني عشان مش هعرف أكلمك دلوقتي، يلا سلام. داليدا: سلام. (صوت جرس الباب) أم أسيل: افتحي يا داليدا. داليدا: حاضر. أسيل: إيه يا داليدا، مالك زعلانة كده ليه؟ داليدا مبتردش وبتخش أوضتها. أسيل: إيه يا ماما، في إيه؟ إنتوا اتخانقتوا؟

أم أسيل: لأ يا حبيبتي، متخانقناش، هي بس زعلت عشان أبوها ممكن ميعرفش يحضر خطوبتها. أسيل: انتوا كلمتوا بابا؟ أم أسيل: أه، كلمناه. أسيل: إمتى؟ أم أسيل: وانتي تحت. أسيل: أه. أسيل: بس يا ماما، إحنا مش هينفع نعمل خطوبة وبابا مش موجود، حتى لو هو وافق على كده، إحنا مش هنفرح من غيره.

أم أسيل: أسيل، اسمعيني، الولد ده محترم واختك بتحبه، وأديتله رقمي من غير ما تكلمه عشان يكلمني ويقولي إنه بيحبها وعاوز يخطبها، وكمان إحنا متفقناش على وقت نتقابل فيه، يعني ممكن يطفش، لازم نحاول نقنع اختك إننا نقابله، وأنا هخلي أبوكي يقنعها، وانتي كمان أقنعيها معايا، أنا عارفة إنك زعلانة زيها، بس معلش اقفي جمبي وجمب اختك. أسيل: حاضر، أنا هخش أكلمها. أسيل: إيه يا دودو، في إيه؟ داليدا (بزعل) : أكيد ماما حكتلك.

أسيل: أه، حكتلي، بصي يا داليدا، إحنا عارفين إن بابا مسافر ومنعرفش هيرجع إمتى، ف لازم نحاول نتقابل. داليدا: بس أنا… أسيل: مفيش بس، أنا زعلانة زيك، بس معلش يا داليدا، بابا هيكون زعلان أساساً لو انتي متخطبتيش، أنا هكلم ماما أخليها تكلم طنط وييجوا ينوروا. داليدا: لأ. أسيل: مفيش لأ، أنا هقوم أقولها، وفرفشي كده واضحكي. أم أسيل: الو، إيه يا حبيبي؟

بص، داليدا لسه زعلانة ومكانتش موافقة إن الولد ييجي هو ومامته يتقدموا عشان انت مش موجود. أنا خليت أختها تقنعها، وانت اتصل بيها قولها إنك هتكون متابعها بالتليفون اليوم ده. = حاضر، هكلمها. بعد شهر. أم أسيل: يلا يا بنات بسرعة اجهزوا ورتبوا كده الشقة، عندنا خطوبة بعد كام ساعة. أسيل: أنا روقت كل حاجة، فاضل بس أكنس. داليدا: وأنا هروح أجهز. أم أسيل: ماشي، أنا هلبس وهلبس قمر، تكوني انتي كنستي يا أسيل واختك جهزت. أسيل: ماشي.

بعد 3 ساعات. (دق على الباب) أم العريس: السلام عليكم. أم أسيل: وعليكم السلام، اتفضلوا، اتفضلوا، نورتونا. أسيل: إزي حضرتك يا طنط؟ أم العريس: بخير يا حبيبتي. أم العريس: أومال فين عروستنا؟ أم أسيل: هي بتجهز. أم أسيل: خشي يا أسيل اندهي اختك. داليدا (ماسكة العصير) : إزي حضرتك يا طنط؟ أم العريس: بخير يا حبيبتي، إيه الجمال ده كله؟ داليدا: ده من زوق حضرتك يا طنط.

أم العريس: طبعًا، إحنا يشرفنا إننا نطلب إيد عروستنا القمر دي، ومحمد قابلكوا قبل كده، هو طول الوقت بيحكيلي قد إيه داليدا محترمة، وأنا يشرفني أناسب عيلة محترمة زيكم. أم أسيل: حضرتك مش عارفة أقولك إيه على الكلام الحلو ده، وإحنا نتشرف بيكم وبمحمد طبعًا. أم العريس: نقول مبارك؟ أم أسيل: نقول مبارك. أم أسيل لأم العريس: يلا نلبسهم الدبل. ريم: مبارك يا دودتي. داليدا: الله يبارك فيكي يا أجمل صاحبة.

تاليا: مبارك يا داليدا، فرحنالك أوي بجد. داليدا: الله يبارك فيكي، وعقبال ما أشوفك وانتي عروسة انتي وخطيبك. تاليا: حبيبتي يا دودو. (صوت جرس الباب) أم أسيل: أسيل، قومي افتحي. أسيل (بصوت واطي ودموع) : بابا، وحشتني أوي أوي يا بابا. = وانتي كمان يا حبيبة بابا. أسيل: بص، خش براحة عشان داليدا تتفاجئ. داليدا بعد ما بتلاقي كلهم بصوا بإتجاه الباب. داليدا: بابا! وبتجري تحضن باباها هي وقمر وتعيط.

داليدا: أنا مش مصدقة نفسي، انت مش كنت قايلي مش هعرف أجي؟ = أنا فعلاً مكنتش هعرف أجي، ولكن صاحب الشغل قالي سافر، لازم تكون مع بنتك في اليوم ده، وقالي هيديلي شهر إجازة عشان أقعد معاكو شوية، وحجزت وجيت. داليدا: ماما، انتي وأسيل كنتوا عارفين؟ أم أسيل: أه، ومحمد كمان، قولتله وقالي نعملهالك مفاجأة. داليدا: أنا بحبكوا أوي. = إزيك يا محمد؟ أم أسيل: حكيتلي عنك كتير. محمد: اتشرفت بمعرفتك يا عمي.

ريم وتاليا: طب يا داليدا، هنروح إحنا عشان الوقت. داليدا: ماشي، ابقوا طمنوني لما توصلوا. ريم وتاليا: حاضر، إن شاء الله. داليدا: سلام. ريم وتاليا: سلام. –في اليوم التالي.

داليدا: إزيكم يا فانزاتي، طبعًا كان لازم أقولكوا خبر حلو زي ده، أنا اتخطبت امبارح الحمد لله، طبعًا فيه مفاجأة حصلتلي امبارح أنا متوقعتهاش، بابا حبيبي جه من السفر وهيقعد معايا شهر، أنا حقيقي مكنتش مصدقة نفسي لما شوفته، أنا قولتلكوا قبل كده إن دي أكتر حاجة مزعلاني إن بابا مش هيحضر خطوبتي، بس الحمد لله جه امبارح، أنا بحبكوا أوي يا أجمل ناس في الدنيا، والله يبارك فيكوا كلكوا، هطلع لايف تاني وأحكيلكوا فيه عن ترتيباتي للخطوبة، بس بعد الإمتحانات إن شاء الله عشان أخيراً هخلص مسيرتي التعليمية، بحبكوا أوي.. سلام.

أسيل: داليدا! بصي جيبت إيه. داليدا: واو، إيه الشنطة التحفة، دي بتاعتي أنا صح؟ أسيل: لا يا حبيبتي، دي بتاعتي أنا بس. داليدا: طب ماشي، انتي حرة، شوفي مين هيسلفك الكوتش بتاعه. أسيل: اختي حبيبتي، داليدا عمرها ما هتبخل عليا بحاجة، بس الشنطة جديدة، أمرمطها شوية وبعدين خديه. داليدا: أيوه كده. أم أسيل: يا بنات، أبوكوا بيقولكوا البسوا عشان نتفسح.

داليدا: لأ يا ماما، بابا لسه جاي امبارح وتعبان من السفر، خليه يرتاح النهاردة وبكرة إن شاء الله نتفسح. أم أسيل: خلاص يا حبيبتي، هقول. داليدا: ماشي يا قلبي. أسيل: داليدا، ما تيجي نجيب لبابا حاجة بيحبها. داليدا: حلو، نجيبله إيه مثلاً؟ أسيل: بصي، كده كده إحنا مأكلناش والوقت مش متأخر أوي، يعني وبابا بيحب الشاورما. داليدا: منين هنجيب شاورما دلوقتي الساعة تمانية. أسيل: يابنتي، فيه محل بيننا وبينه تلت ساعة، قومي بس البسي.

داليدا: مش لما نقول لماما؟ أسيل: ماشي، هقولها. أسيل: ماما، بصي، إحنا هننزل أنا وداليدا نجيبلكوا شاورما عزومة وكده، وعشان بابا بيحبها، ماشي؟ أم أسيل: ماشي، بس متتأخروش. أسيل: من عيوني، إن شاء الله مش هنتأخر. (في الشارع) يرن تليفون داليدا. أسيل: مين؟ داليدا: ده محمد. داليدا: الو. محمد: إيه يا داليدا، عاملة إيه؟ داليدا: الحمد لله بخير، وانت عامل إيه؟ محمد: الحمد لله بخير. محمد: إيه، انتي في الشارع ولا إيه؟

داليدا: أه، عازمين بابا وماما على شاورما عشان بابا بيحبها. محمد: أه، بالهنا. محمد: بقولك، اسألي باباكِ كده لو ينفع نخرج بكرة إن شاء الله. داليدا: ماشي، هقوله، بس لازم أسيل تيجي معانا. محمد: أكيد، مفيش مشكلة. أسيل (بصوت واطي وضحك) : قوليله، هتودّينا فينة؟ داليدا بتغمزها في دراعها: إيه يا محمد، المهم، هقول لبابا كده وأكلمك. محمد: ماشي، لما تروحي كلميني. داليدا: حاضر. أسيل: إيه إيه؟ قالك هنروح فينة؟

داليدا: انتي يبت حشرية كده ليه؟ امشي وانتي ساكتة. أسيل: يوهه، اسكتي يلا عشان نلحق نروح. بعد نصف ساعة. داليدا: بابا، بص، أنا وأسيل جبنالك إيه. الأب: يااااه، ده أنا بقالي كتير مكالتهاش. أسيل (بغمزة) : أي رأيك يا عم، مظبطينك أهو. الأب: أنا فرحتي كلها هي قعدتنا مع بعض وإني أشوفكوا مبسوطين، انتوا حبايبي من غير أي حاجة، ربنا يحفظكوا يا حبايبي. أم أسيل: ربنا ميحرمناش منك يا حبيبي. قمر وأسيل وداليدا بيحضنوا باباهم.

أم أسيل: يلا يبنات عشان ناكل. أسيل بتضرب داليدا بكتفها. داليدا: إيههه! الأب: إيه، في إيه؟ أسيل: أصل داليدا عاوزة تقولك حاجة. داليدا: أنا؟ الأب: ما تقولوا فيه إيه. داليدا: بابا، محمد كان عاوز ياخدني أنا وأسيل نخرج وكده، بس يعني لازم أقولك طبعًا. الأب: أه، إمتى؟ داليدا: بكرة كده، بس أنا مسألتوش إمتى قبل ما أقول لحضرتك طبعًا. الأب: ماشي، كلميه شوفي هتروحوا فين وامتى. داليدا: موافق؟ الأب: أه يا حبيبتي، ومتتأخروش.

أسيل: هيهههه! الأب (بضحك) : يا بنتي، انتي فرحانة أكتر منها ليه؟ أسيل (بضحك) : مش عارفة. اليوم التالي. داليدا: أسيل، إحتي حبيبتي. أسيل: اممم، مصلحة. داليدا: أنا؟ لا لا طبعًا. أسيل: أنا عارفة إن عنيكي على الشنطة، حاجة مقابل حاجة؟ داليدا: طلعتي مادية أوي يستي، ماشي، قولي عاوزة إيه. أسيل: عاوزة الكوتش بتاعك. داليدا: أوكيه، اتفقنا. داليدا: محمد بيرن، خلصتي؟ أسيل: أه، تمام. داليدا: ماشي، يلا بينا.

محمد: ها، تحبوا تروحوا فينة؟ داليدا: أكيد، اللي انت عاوزه. محمد: تعالوا ناكل ونجيب قهوة ونتمشى، ولا تحبوا تقعدوا في حتة؟ داليدا: لأ، نتمشى أحسن، إيه رأيك يا أسيل؟ أسيل: أه، نتمشى. بعد ما كلوا وجابوا قهوة. أسيل: أنا همشي وراكوا. داليدا: ماشي. محمد: قولي أي حاجة. داليدا: معرفش أقول إيه. داليدا: إيه رأيك نتكلم عن حياتنا مثلاً؟ محمد: حلو، إحنا تقريباً منعرفش حاجة عن بعض. داليدا: إبدأ انت.