رواية ضحية عنيد الجزء الثالث الفصل الأول 1 - بقلم ماهي أحمد

الكل في صوت واحد: هييييييييييه داوود: يلا يايونس طفي الشمع يونس جه ينفخ في الشمع عشان يطفيه جميله: استني اتمني أمنية قبل ما تطفي الشمع الأول يونس غمض عينيه واتمنى أمنية، وبعدها طفى الشمع، وبعدها الأنوار اشتغلت داوود: كل سنة وانت طيب يايونس يونس: وانت طيب يابابا ❤️ جميله: كل سنة وانت طيب يايونس يونس: كل سنة وانتي طيبة ياماما جميله ❤️ جميله: أخدته في حضنها وأديته الهدية بتاعته وقالت له: ياروح ماما جميله من جوه

(وباسته من خده) من بعيد جدّه جه بالكرسي المتحرك وجايب معاه هدية ليونس في إيده وبيبتسم جد داوود: كل سنة وانت طيب يايونس يونس جرى على جده وحضنه وقاله: جدووووو جد داوود: حبيب جدو وقلب جدو من جوه ☺️ بثينة: كل سنة وانت طيب ياحبيب عمتو يونس: وانتي طيبة ياعمتو

داوود بص كده والكل كان متجمع وموجود في عيد ميلاد ابنه، وداليدا مش معاهم. الحسرة وقلة الحيلة كانت باينة جداً في عيون داوود، مهما أفضل أوصف في إحساس داوود ومشاعره اللحظة دي مش هقدر. داوود سحب نفسه وطلع بره في الجنينة طلع سيجارته وبقي ينفخ فيها جميله: إيه ياداوود سيبتنا ومشيت ليه؟ داوود: أنا مش عارف أقولك إيه ياجميله ومش عارف أرد جميلك إزاي، لولا وقفتك معايا مكنتش عرفت أربي يونس لوحدي

جميله: ماتقولش كده ياداوود، إنت ماتعرفش إنت غالي عندي قد إيه، إنت ويونس، أنا متهيألي لو كنت متجوزة ومعايا ابن مش هحبه زي ما بحب يونس داوود: متشكر أوي ياداليدا جميله: أنا مش داليدا ياداوود، أنا جميله داوود (بتوتر) : أنا آسف، مكانش قصدي جميله: انساها بقي ياداوود، داليدا خلاص ماتت، مش هترجع تاني داوود (بنرفزة) : ماتقوليش عليها كده ياجميله، داليدا ما ماتتش، داليدا عايشة (ومسكها من دراعها جامد وقال لها) داوود: انتي فاهمه؟

جميله: داوود دراعي، إنت بتوجعني داوود رجع لوعيه في لحظة وسابها ومشي، طلع أوضته فوق جميله طلعت وراه بسرعة وفتحت عليه الأوضة، لاقيتُه بيغير هدومه وقالع قميصه اللي من فوق جميله أول ما شافته سرحت في جمال جسمه وعضلاته المتقسمة، داوود أصلاً كل حاجة فيه برفكت، مافيهوش غلطة واحدة داوود أول ما شاف جميله فاتحة الباب وماسكة الأوكرة ومابتتكلمش قال لها: داوود: إيه اللي مطلعك ورايا لحد هنا ياجميله؟

(جميله فاقت لنفسها بسرعة وقالت له) جميله: عشان أسألك سؤال ياداوود ولازم تجاوب عليا داوود: مهما كان سؤالك ده ما يديكيش الحق إنك تطلعي أوضتي وتفتحي الباب من غير حتى ما تخبطي ياجميله جميله: (اتجاهلت كلام داوود وكملت كلامها وقالت له) ولما هي عايشة هي فين ياداوود؟ هااا أنطق رد عليا داوود شد الجاكيت الأسود بتاعه من على السرير بنرفزة وبقي يلبسه وهو نازل على السلم وجميله نزلت وراه داوود مكانش بيرد على جميله

جميله: ماترد عليا ياداوود، مابترديش ليه؟ داوود: معرفش.. معرفش (جميله وهي ماشية وراه) جميله: ما هو مافيش أي تفسير تاني أن واحدة تكون متغيبة بقالها سنتين محدش يعرف عنها حاجة غير إنها ماتت، فوق بقي ياداوود وشوف مستقبلك وحياتك وأبدأ حياة جديدة، كفاية تدور عليها أكتر من كده داوود: وهو راكب على الموتوسيكل بتاعه وبيحط المفتاح في الموتوسيكل عشان يشغله قال لها داوود: (بعصبية) انتي شاغلة دماغك بيها ليه ياجميله؟

ليه دايماً طول الوقت بتحاولي تقنعيني إنها ماتت ومش هترجع؟ جميله: بتقول في نفسها وهي بتبص في عيون داوود الرمادي اللي تهبل دي: (عشان بحبك ومش قادرة أشيلك من قلبي ونفسي، نفسي انت كمان تحبني ربع الحب اللي بحبهولك) داوود: إيه ساكتة ليه ماتنطقي؟ جميله فاقت من سراحنها وقالت له: جميله: عشان دي الحقيقة ياداوود اللي انت مش عايز تاخد بالك منها وموقف حياتك كلها عليها داوود: (مسك إيد جميله بنرفزة وحطها على مناخيره وقال لها)

شايفه النفس اللي داخل وخارج مني ده ياجميله؟ طول ما أنا فيا نفس وعايش يبقى داليدا كمان فيها نفس وعايشة. أنا عمري ما هقتنع بحوار إنها انتحرت دي أبداً، انتي فاهمه؟ (داوود زق جميله على جنب ومشي) بثينة: (جت لجميله) وقالت لها: ماتحاوليش مع داوود ياجميله، داوود عمره ما هينسى داليدا مهما حصل، ماتزعليش منه، هو بس مش متقبل فكرة إن داليدا ماتت أبداً وهيفضل فاكرها طول ما هو عايش ويدور عليها

جميله: وبعدين إيه اللي يخليه ينساها ويعيش حياته بقي يابثينة ويبص لابنه وكمان يبص؟ ولسه هتكمل بثينة قطعتها في الكلام وقالت لها: يبص لإيه؟ كملي قصدك يبصلك جميله: أنا مقصدتش، أنا بس قصدت بثينة: أنا فاهمة قصدك كويس يابثينة، أنا مش عبيطة، أنا عارفة إنك بتحبي داوود جميله: أيوه بحبه أوي يابثينة 🥲😞

بثينة: بس داوود طول ما داليدا مختفية عمره ما هيفكر في حد تاني، عارفة لو كانت موجودة قدامه وسابته مثلاً وبقت مع حد تاني ممكن وقتها يكرهها، لكن داليدا لا يمكن تعمل كده أبداً، داليدا لداوود وداوود لداليدا، ومهما غابت أنا متأكدة إن ليها ألف عذر جميله: كنتي بتحبيها أوي كده يابثينة؟ بثينة: داليدا دي السبب بعد ربنا ياجميله في إني أخف، عمري ما شوفت منها حاجة وحشة، وهي كمان كانت بتعاملني زي أختها وأكتر زيك كده

جميله: طيب والعمل يابثينة؟ داوود هيفضل مش شايفني كده على طول؟ بثينة: ماتزعليش نفسك، تعالي.. تعالي ندخل جوه مع يونس وجدي وفرفشي كده، وبكرة الأيام بتنسي كل حاجة (في نفس الوقت) داوود راكب الموتوسيكل بتاعه ومشي، طلع على الطريق وساق بأقصى سرعة وبقي يقول في نفسه: داوود: (ليه عملتي كده ياداليدا؟ عملت فيكي إيه عشان تعملي فيا كده؟ وكل ما يفتكر اللي حصل وهو سايق الموتوسيكل يتعصب أكتر ويدوس بنزين أكتر ويزود السرعة أكتر

Flash back من سنتين داوود أخيراً خلص من أبو فراج وقتله في الغابة في تركيا، واتجمعوا أخيراً كلهم في بيت أهل داليدا وبثينة، وكلهم بقوا مبسوطين جداً إن أخيراً خلصوا من الكابوس ده وداوود أخد داليدا أستراليا وعاشوا هناك أجمل لحظات حياتهم هي ويونس وداوود، ورجعوا مصر وأهل داليدا كمان رجعوا مصر وعاشوا حياتهم حلوة أوي، وكل حاجة كانت ماشية برفيكت لحد ما حصل اللي محدش يتوقعه 🙂😳 داليدا: دي أحلى رحلة في حياتي ياداوود

داوود: أوعدك ياداليدا إن كل أما أكون فاضي هاخدك انتي ويونس ونروح نقضي أسبوع لوحدنا في مكان مختلف، وكل مكان هيبقي أحلى من اللي قبله داليدا: ربنا يخليك ليا ياحبيبي ❤️ داوود: ويخليكي ليا يانصي التاني 💛 داوود: طيب أي مش هننام بقي؟ داليدا: آه ياحبيبي أنا خلاص جايه أهوه 😊 داوود: داليدا اعملي حسابك إن بكرة خطوبة ابن اللواء بتاعي ولازم نكون حاضرين، أوعي تنسي داليدا: ماتقلقش، بكرة الساعة 8 بالدقيقة هتلاقيني جاهزة

داليدا راحت هي وداوود الحفلة وكانت زي القمر وقتها، وبقت تتصور هي وداوود ويونس. عيشتهم كانت هادية وافتكروا إنهم ممكن يعيشوا حياة طبيعية زي أي اتنين متجوزين طبيعي (وهما راجعين من الحفلة في العربية وداوود بيسوق وداليدا جنبه ويونس قاعد ورا) داليدا: بس العروسة كانت زي القمر ما شاء الله عليها داوود: بس تعرفي إنك كنتي أحلى منها النهارده داليدا: إيه ده إيه المجاملة دي بقي 😂😂 أكيد وراها حاجة

داوود: وليه ما تقوليش إن عيوني مابقتش تشوف أحلى منك ياداليدا داليدا: ربنا ما يحرمني من حنيتك عليا أبدا ياداوود داوود: طيب بقولك إيه داليدا: (بدلع وابتسامة) عارفة هتقول إيه 😍🤭 داوود: يعني هتيجي عشان نجيب مليجي ولا إيه 😂😉 داليدا: ضربت داوود على إيده وهو سايق وحاطط إيده على الدريكسيون وقالت له: داليدا: داوود بطل قلة أدب 😁 داوود وقتها كان بيبص لداليدا وبيضحك داليدا: (بصدمة وخوف) داوود حاسب خللي بالك، داوود بص قدامك

داوود بص قدامه وقتها لقي في الأرض زي حبل من حديد والحديد مسنون، وفي أشواك على الطريق والكوتشات بتاعت العربية فرقعت وداوود دخل في شجرة كبيرة ومحسش بنفسه وقتها وصحى تاني يوم لقي نفسه في أوضته ونايم على سريره قام مخضوض وبيبص في المراية لقي نفسه مغير هدومه ومافيهوش خدشة واحدة من الحادثة طلع يجري من الأوضة بسرعة وبقي ينادي في الفيلا كلها: داوود: دااااليدااا.. يووونس لحد ما الشغالة طلعت تجري عليه وقالت له:

الخدامة: في حاجة ياداوود بيه؟ داوود: فين يونس؟ الخدامة: نايم في أوضته ياداوود بيه، الساعة أربعة الفجر هيبقي فين غير كده داوود جري بسرعة على أوضة يونس لقاه فعلاً في أوضته ونايم على سريره، صحاه بسرعة وأخده في حضنه والخدامة واقفة على باب الأوضة وقالت لداوود: الخدامة: في حاجة أقدر أجيبهالك؟ داوود: فين داليدا؟ الخدامة: معرفش ياداوود بيه، كل اللي أعرفه إن بعد ما اتخانقتوا امبارح ست داليدا سابت البيت ومشيت

وهي مضايقة من حضرتك داوود: أنا وداليدا اتخانقنا امبارح؟ إنتي بتقولي إيه يامجنونة إنتي؟ الخدامة: اللي حصل والله العظيم الشريف ياداوود بيه داوود ما اخدش على كلامها وطلع عشان يتصل بداليدا ويشوفها فين لقي فونها مقفول ولقي رسالة داليدا كاتباها بخط إيدها مكتوب فيها:

داليدا: أنا خلاص ياداوود مش متحملة أعيش معاك أكتر من كده، مش متحملة أعيش أنا وانت في دنيا واحدة بعد اللي حصل منك امبارح، خناقتنا امبارح مكانتش خناقة عادية، إنت حطمتني وكسرتني ورميت عليا يمين الطلاق، عشان كده أنا قررت الانتحار، وأوعدك إنك هتخلص مني خالص المرة دي ومش هتعبك تاني في حياتك، بس ليا طلب أخير، خللي بالك من يونس ابننا، ده آخر طلب ليا عندك، وابقي ادعيلي بالرحمة كل ما تفتكرني داوود تني الورقة ورماها وقال:

داوود: أنا مش فاهم حاجة، هو إيه اللي بيحصل ده؟ داوود مبقاش فاهم حاجة وقتها، هو إيه اللي بيحصل ده. أخد الورقة من على الأرض وطلع يجري زي المجنون عشان يدور على داليدا وبيجيب الموتوسيكل بتاعه عشان عربيته هو خبطها امبارح بالليل وعملوا حادثة، بيبص في الجراج لقي عربيته سليمة مافيهاش خدشة 😳