رواية ضحية عشق الفصل الخامس عشر 15 - بقلم مريم احمد

قالت نغم بعياط: خلاص يا خالو أنا مش عايزة البيت، أنا مش عايزة أي حاجة غير إني أطلق. وبسهولة شيرين كانت جابت آخرها، راحت لها وهي بتقولها بغضب: هتسيبى حقك يا نغم؟ صرخت نغم في وشها بقهر وهي بتقول: مش عايزة لا البيت ولا أي حاجة. صباح: مهدي يا شيرين، ولا أنتي كمان طمعانة في القصر؟ كانت لسه هيام هترد على صباح، بس سبقتها شيرين لما قالت بقوة وسخرية:

لا معلش يا عمتوا، الطمع دا فيكوا أنتوا. روحي ربي بنتك وخليها تشيل السواد من قلبها أحسن ما تاكلي مال يتيمة. اتعصبت صباح جداً وراحت لها وهي ناويه تضربها، وبالفعل لسه هتنزل بإيديها على وش شيرين، بس يونس مسك إيدها بسرعة. صباح بعصبية: سيبني يا يونس أربي البت دي. يونس: ليه؟ شايفه أبوها مات؟ بصت له صباح بذهول وقالت: بقيت ضد أمك يا يونس عشان خالك؟ يونس:

لما تبقى أمي مش مع الحق وعايزة تاخد بيت بنت اختها الوحيدة، يبقى آه يا أمي. وشيري مقالتش حاجة غلط، سجده فعلاً بتحقد على نغم لدرجة انتي متتخيليهاش وبتكرهها. اتصدم لما لقى أمه ضربته بالقلم قدام الكل بغضب كبير. صباح: إياك تقول على اختك إنها حقودة تاني، سامعة؟ اتكلمت نغم بغضب وحزن وهي بتقول: أيه يا خالو؟ الحقيقة بتزعل أوي كدا؟ صباح بعصبية: اخرسي يا بت انتي. نغم: مش هسكت!

بنتك فعلاً بتحقد عليا وأنا أصلاً معملتلهاش حاجة، دي لسه من دقايق كانت بتقولي لحسن كلام أنا مقولتهوش أصلاً عنك عشان تخليه يضربني. صباح: وأنا بنتي متعملش كدا أبداً! كان لسه خالد هيتكلم، بس سمعوا صوت سجده وهي بتقول بتأكيد: أيوه يا مامي، أنا مكذبش، أنتي أصلاً مربتنيش على كدب. بصت لنغم وقالت:

وبالنسبة للكلام اللي قولته لحسن، فأنا ممكن أثبتلكوا دلوقتي حالا حقيقتها وإنها بنى أدمة مريضة نفسياً عشان تدعي على خالتها اللي ربتها. بصت لها نغم بقوة لأنها عارفة إنها عمرها ما دعت على خالتها أي دعوة تأذيها أبداً. بس اتصدمت هي والكل لما شغلت سجده التسجيل وسمعوا كلهم صوت نغم وهي بتقول: "متتخيليش يا هدى أنا نفسي آخد القصر ده إزاي، وكل يوم بفضل أدعي على خالتي صباح هي وعيالها عشان أورث القصر ده."

نظراتهم كلها اتحولت لصدمة كبيرة، إزاي تقول كدا على خالتها اللي ربتها!!! اتكلمت نغم والدموع في عينيها وقالت: أنا مقولتش كدا، مقولتش كدا! ابتسمت سجده بسخرية وقالت لها: حبيبتي، أنتي بتنكري إيه؟ التسجيل أهو. بصت لها نغم وهي بتعيط وبتقول: بس أنا فعلاً مقولتش كدا، أنا أصلاً معرفش مين هدى دي! بصت لخالها وقالت له كأنها بتترجاه إنه يصدقها: مقولتش كدا يا خالو. اتنهد خالد بحزن وهو مش عارف يعمل إيه. قالت سجده

بصوت عالي عشان الكل يسمع: أنا هعيد التسجيل تاني عشان الكل يسمع كويس ويعرف حقيقتها وإنها واحدة خبيثة وحقودة. ورجعت أعادت التسجيل تاني وهي بتبص لنغم بشماتة. بس نظراتها كلها اتحولت لتوتر وخوف لما سمعت صوت يونس وهو بيقول: لحظة واحدة.. إزاي صوت نغم قريب أوي كدا وكأنك كنتي قاعدة في نفس الأوضة؟ بلعت سجده ريقها بتوتر وقالت: يعني إيه؟ كان لسه يونس هيتكلم، بس شيرين قالت:

يعني أنتي اللي عملتي التسجيل ده وغيرتي صوتك لصوت نغم يا سجده. رمت سجده التليفون على الأرض وقالت بغلس: آه.. أنا اللي عملت التسجيل ده عشان مش طايقاها تقعد في بيتنا ثانية واحدة. في ثواني كان حسن ضربها بالقلم على وشها. زعقت صباح بغضب وهي بتقول: حسن!!! حسن: إيه؟ مش شايفاها بتنيل إيه؟ خليتني أضرب مراتي عشانها، وفالأخر نغم تكون مظلومة! كمل وهو بيبص لسجده بذهول وقرف: أنتي إيه؟ السواد اللي في قلبك دا؟

معداش دقايق ولاقت رسايل جاتلها على الواتس. فتحت الصور وهي بتبتسم بانتصار وبتوريهم التليفون. سجده: الصور اللي بتثبت إن ده بيت أمي أهيه ومن المحامية نفسها. زغردت صباح بفرحة وبصت لنغم بانتصار. صباح: يلا يا بت انتي اطلعي برا بيتي. خالد: نغم مش هتطلع من هنا يا صباح. صباح بزعيق: بس ده بيتي! وأنا اللي أقول مين يقعد ومين يغور في ستين داهية. خالد: وأنا اللي بقولك أهو، نغم مش هتمشي من بيت أمها يا صباح. صباح: خلاص تقعد؟

دي تنور؟ يا سلام! ودا أنا أفرح لما بنت اختي تبقى قاعدة معايا. خافت نغم جداً ومسكت إيد خالها بخوف وتوتر. هز خالد راسه وقال خالد بصوت عالي: كل واحد يروح على أوضته، مش عايز أشوف حد هنا خالص. طلعوا كلهم على أوضتهم. بس هي فضلت واقفة مكانها بخوف. بص لها خالد وقال بحده: اسمعي.. كلمة "مش عايز البيت" دي مش عايز أسمعها تاني، سمعتي؟ ده حقك انتي وأمك، متسيبيهوش. هزت نغم راسها: حاضر يا خالو. ابتسم خالد وقال لها:

إحنا هنفضل هنا لحد ما أثبت إن ده بيتك يا حبيبتي. ابتسمت نغم: شكراً يا خالو. خالد: العفو يا حبيبة خالو. طلعوا........................... كانت نغم قاعدة في أوضتها القديمة بتفكر في اللي حصل وهي خايفة من اللي جاي. قطع تفكيرها صوت خبط على الباب. نغم: اتفضل. فتحت الباب ودخلت شيرين. قعدت قدام نغم وهي بتقول: انتي عبيطة يا بت انتي ولا حماره؟ اتنهدت نغم بحزن وقالت لها:

ما أنتي شوفتي يا شيري اللي عملوه عشان بس خالو قال إن القصر ده بتاعي، كنتي عايزاني أعمل إيه يعني؟ شيرين: برضه متسيبيش حقك. نغم: أنا مش عايزة أي حاجة غير إن حسن يطلقني. ابتسمت لها شيرين وقالت لها: متقلقيش، هيطلقك. هزت نغم راسها وقالت بدموع: كنت قايلاله على كل اللي خالته وسجده بيعملوه يا شيري، وهو برضه كان بيصدقهم وبيضربني. شيرين:

معلش يا حبيبتي، صدقيني هو غبي وأكبر عقاب ليه إنه هيطلقك، لأنه استحالة يلاقي واحدة طيبة وكويسة زيك كدا يا نغم. دا أنتي بتسيبي بيتك وحقك ليهم عشان ميحصلش مشاكل، هو في كدا!!! مسحت نغم دموعها وقالت: يلا حصل خير. تاني يوم كانت غدير واقفه في أوضة سجده، الي كانت بتقولها بغلس: حالا تنزلي تجيبي إزازة مية نار. خافت غدير وقالت لها: ليه يا هانم؟ صرخت سجده في وشها وقالت: من غير ليه، أنتي تسمعي الكلام وخلاص، فهمتي؟

هزت غدير راسها بخوف. كملت سجده وقالت لها: هتاخدي الإزازة وتطلعي على أوضة نغم وترميها في وشها، فهمتي؟ هزت غدير راسها بخوف. كملت سجده بتهديد: إياكي يا غدير حد يعرف حاجة. دمعت عيون غدير برعب وهزت راسها. سجده: يلا غوري من وشي. خرجت غدير من الأوضة بسرعة، وسجده قالت بحقد: وريني بقى يا نغم هانم هتفضلي أجمل مني إزاي................. نزلت غدير وجابت إزازة مية النار فعلاً وطلعت أوضة نغم.

خبطت على الباب وهي إيديها بتترعش بخوف وحزن على نغم. سمعت صوتها وهي بتقول: اتفضل. دخلت غدير وهي في إيديها الإزازة وراحت ناحية نغم. ابتسمتلها نغم وقالت لها: إزيك يا غدير؟ مردتش غدير عليها. نغم استغربت وقالت لها: مالك يا هدير؟ أنتي كويسة؟ طب زعلانة مني في حاجة؟ كملت باستغراب: إيه الإزازة اللي في إيدك دي؟ خلصت جملتها من هنا ولاقت غدير حدفت في وشها الإزازة.

حست إن وشها بيتكـ ـوي، معرفتش تعمل إيه غير إنها تصرخ من كمية الألم اللي في وشها. خرجت غدير بسرعة وهي دموعها بتنزل على خدها بندم على اللي عملته وسابت نغم المسكينة في أوضتها. صوت صريخها مالي القصر كله ووووو