رواية ضرتي الفصل الثالث عشر 13 - بقلم مني محمد

الدكتور: لازم تهتم بتغذية مراتك أكتر، وكمان واضح إنها متوترة، وده مش كويس عشان الجنين. زياد بصدمة: جنين!؟ الدكتور بابتسامة: أيوه. مشي زياد من غير ما يقول ولا كلمة، ميعرفش زعل عشان أميرة حامل من نادر، ولا إنه استعجل لما جوّز رنا من الأول، ولو كان صبر عليها كان ربنا هيرزقهم بعيال ومكنش خسر حب حياته. فاقت أميرة وبصت، كانت حماتها موجودة جمبها وفرحانة. أميرة: ماما أنا إيه اللي حصلي؟

حماتها: اغمي عليكي يا حبيبتي، وزياد قالي أجيلك، بس أنا زعلانة منك يا أميرة، إزاي تخبي عني حاجة زي دي. أميرة باستغراب: أخبي عنك إيه؟ أنا مش فاهمة حاجة. حماتها بلوم: مش كنتي تقوليلي يا بنتي عشان آخد بالي منك، ولا خوفتي من الحسد؟ ده أنا أكتر واحدة هتفرحلك، وياترى بقى نادر عارف إنك حامل ولا مقولتلهوش هو كمان؟ أميرة بصدمة: حامل!؟ حماتها: أيوه يا حبيبتي، ألف مبروك، ربنا يتمملك على خير ويرزقك بالذرية الصالحة.

أميرة بحزن: بس أنا مش حامل، انتي نسيتي يا ماما إني مش بخلف. حماتها بفرحة: ربنا اللي بيرزق يا حبيبتي، وبعدين الدكتور هو اللي قال كده. ندهت حماتها للدكتور وأكد لاميرة إنها حامل. أميرة مكنتش مصدقة، ومن الفرحة فضلت تعيط وتشكر ربنا كتير. أميرة بفرحة وعيونها كلها دموع: الحمد الحمد لله، أنا مش مصدقة، ربنا هيرزقني بطفل بعد كل السنين دي، أنا حاسة إن قلبي هيقف من الفرحة، ومسكت إيد حماتها: ماما أنا هبقى أم بجد، أنا مش بحلم صح؟

حماتها بفرحة: أيوه يا قلب ماما. قامت أميرة وصّلت ركعتين شكر لله، وبعدها راحت لنادر وقالته. نادر كمان انبسط جداً، خصوصًا لما شاف قد إيه كانت فرحانة. صحة نادر بدأت تتحسن وراح بيته، على الرغم إن مامته أصرت عليه يرجع يعيش معاها، لكن هو رفض. ملك: بابا أنا عايزة فلوس الدروس، المدرسين بيطالبوني. فؤاد: مانا اديت لامك يابنتي، هي مدتكيش؟ ملك: لا يابابا، مدتنيش حاجة. فؤاد بزعيق: انتي يا ولية انتي يا وليييية.

سها: إيه يا راجل بتشخط ليه؟ فؤاد: هو أنا مش اديتك فلوس الدروس بتاع ملك؟ مدتنيش البت الفلوس ليه؟ سها: ماهو أنا جبت شوية بضاعة للمحل ياخويا. فؤاد: معلش يا بنتي، حقك عليا، بعد كده هديكي الفلوس في إيدك ومتخافيش، الفلوس اللي أمك صرفتها هتصرفلك فيها. سها: صرفت إيه يا سب*عي؟ هو أنا كنت حطيتها في جيبي؟

ده كله بضاعة للمحل اللي عايشين منه. ماتروح ياراجل تستلف من اختك فلوس بدل الديون اللي علينا دي، ده جوزها محامي قد الدنيا ومعاهم فلوس على قلبهم. فؤاد: ياساتر يارب يا ولية، سيبى اختي بئا في حالها، وبعدين ماله حالنا، قولي الحمد لله، طول مانتي بتدعي الفقر ربنا هيفقرنا أكتر، جاتك القرف. وسابها ومشي. سها: عجبك كده يا قلة الأدب؟ ملك: وأنا مالي يا ماما؟ أنا عملت حاجة؟ سها: ماعلينا، المهم أم عمر عايزة تاخدك لابنها عمرو.

ملك: وأنا مش موافقة، أنا عايزة أكمل تعليمي، مش هعمل زي أختي، وبعدين عمرو ده لو آخر واحد في الدنيا مش هوافق عليه. سها: وماله عمرو ياختي؟ ده جزار قد الدنيا. ملك: عايزاني أجوز واحد جزار عشان أول خناقة لينا يروح دابحني؟ أوعى كده ياماما، سبيني في حالي، عايزة أكمل تعليمي. ربنا يهديكي. سها: روحي يا أبو شكلك يام ملحق*ين، أبقى قابليني لو نفعتي يابت، طالعة خايبة لابوكي وعمتك، تعليم إيه ده ياختي، ده إيه قلة الأدب دي.

كان زياد بيفكر في أميرة وبيفتكر ذكرياتهم مع بعض. أميرة: انت رايح فين يازياد وانت بالوضع ده؟ زياد: رايح الشغل ياحبيبتي. أميرة بقلق: انت تعبان، هتروح الشغل إزاي؟ خد اجازة النهارده. زياد: مش هينفع ياقلبي، أنا بقالي يومين واخد اجازة، أنا بقيت كويس والله. أميرة بابتسامة: طب خلي بالك من نفسك، بحبك. وافتكر زياد ذكرى تانية. أميرة بحزن: زياد، انت لازم تجوز مرة تانية، أنا مش بخلف وكل العلاج اللي باخده مش جايب نتيجة.

زياد: انتي بتقولي إيه ياااميرة؟ أنا مستحيل أجوز عليكي، حتى لو مش مكتوبلنا نجيب عيال، انتي أهم حاجة عندي، مش عايز أي حاجة من الدنيا دي غيرك. أميرة: بس أنا شوفتلك واحدة كويسة، رنا صاحبة نور اللي بتيجي هنا، غلبانة ومتحرمة.

افتكر زياد لما كان بيسيب أميرة بالأيام ويفضل مع رنا، وأميرة كانت مستحملة ده كله ومكنتش بتتكلم عشان متخسرش زياد، ولما كانت رنا دايما بتذل أميرة إنها مش بتخلف، وهو على الرغم من عشقه ليها بس مكنش بيدافع عنها، كان خايف على رنا تزعل وهي حامل، ولما حمزة اتولد معتش شايف في الدنيا غيره، ندم إنه جوّز رنا وطلق أميرة، بس بعد إيه. قاطعه تفكيره رنا كانت شايلة حمزة. رنا: انت معتش مهتم بيا أنا وحمزة زي الأول.

زياد: حقك عليا يارنا، أنا عارف إني مقصر معاكم. رنا بحزن: زياد، هو انت ممكن في يوم من الأيام تسيبني؟ زياد بهدوء وهو بيبص في عينها: معدليش حد غيرك انتي وحمزة، ومستحيل أسيبك، كفاية اللي ضيعته من إيدي. زياد: بس أكتر حاجة في حياتي بكرهها الكدب، فلو مخبية عني حاجة عرفيني بيه. رنا بتوتر: لا، وأنا هخبى عنك إيه؟

خرجت رنا بضيق وكانت خايفة، مش عارفة مفروض تعترف لزياد إنها ساعدت نور في كل خططها، لما حاولت تقتل نادر، وبعتت ناس لاميرة عشان يغتصب*ها. كانت ماشية ومش شايفة العربية اللي جاية في طريقها، كانت العربية هتخبطها بس حد شدها. أميرة: حاسبي، العربية كانت هتخبطك. رنا بصت بصدمة وفضلت تعيط وحضنتها. صعبت جداً على أميرة. رنا ببكاء وندم: ليه أنقذتيني رغم اللي عملته معاكي؟ أنا دمرتلك حياتك، ليه أنقذتيني؟ ليه سبتيني أموت؟

سرقت منك حب حياتك وكنت السبب إنك تطلقي، انتي إزاي كده؟ لو أنا مكانك كنت سبتك تموتي، ليه أنقذتيني؟ أميرة بزعل على حالتها: إنسي يارنا، أنا نسيت كل اللي فات، أتمنى نبدأ صفحة جديدة، أنا مسامحاكي من قلبي. رنا وهي بتمسح دموعها: صدقيني يا أميرة لو جتلي فرصة إني أصلح كل اللي عملته، حتى لو هضحي بحياتي عشانك، مش هتتردد لحظة واحدة، ده وعدي ليكي ويشهد عليه ربنا. ابتسمت أميرة وحضنوا بعض تاني.

أميرة: أنا كنت جاية لماما عشان عيد ميلاد جنة، عايزين نعملها عيد ميلاد عشان متحسش بغياب مامتها. رنا: أيوه معاكي حق. في واحد جاي عشان يشوفك. نور: واحد مين؟ راحت نور معاه، وأول ما شافته ابتسمت. نور وهي بتحضنه: كنت عارفة إنك مش هتسبني وهتخرجني من هنا، بيفتكروا عليا، أنا معملتش أي حاجة يا حبيبي. نادر وهو بيبعدها: بس أنا مش جاي أخرجك. نور: تقصد إيه؟ نادر: انتي طالق يانور، طالق طالق. نور: انت بتقول إيه؟ انت طلقتني أنا؟

انت بتتكلم بجد؟ بتطلقني أنا عشان خاطر الزبا*لة اللي انت مجوزها؟ نادر: أيوه طلقتك عشانها، عشان بحبها هي، ومش عايز أشوف وشك مرة تانية في حياتي، مكنتش أعرف إنك قذرة للدرجادى. نور: انت شكلك نسيت أنا أبقى مين وبنت مين. نادر: ودي حاجة تتنسى؟ بنت أكبر تاجر مخدرات في البلد، وقريب أبوكي هيحصلك.

ضحكت نور بخبث: وانت واخوك هتندموا إنكم سجنِتوني، وقريب أوي هخرج منها، بابا مش هيخليني، بس لما أخرج وقتها مش هيبقى فيه أميرة ونادر، افتكر كلامي كويس. رنا: انتي طلبتي تشوفيني، عايزة إيه؟ نور: انتي نسيتي ياحبيبتي إنك شريكتي في كل اللي عملته؟ رنا: أنا خلاص ندمت ومستحيل أساعدك في خططك الوس*خة مرة تانية. نور: مش تسمعي الأول، أنا عايزك ليه؟

رنا: مش عايزة أسمعك، انتي اللي خليتيني أعمل ده كله، كنت دايما ماشية وراكي، أنا بكرهك يانور. أنا جيت عشان أقولك ابعدي عن عيلتي أحسنلك. جت تمشي بس وقفت لما بصدمة. نور: لو معاملتيش اللي هقولك عليه، هعترف عليكي، ووقتها هتخسري زياد وابنك، وكمان هتتسجني. رنا بجمود: عايزة إيه يانور؟ نور: أنا هاجي عيد ميلاد جنة وهتدخليني من غير ما حد يعرف. رنا: هتيجي إزاي وإنتي محبوسة؟

نور بخبث: أنا لو عايزة أطلع النهاردة ودلوقتي هخرج، بس أنا مستنية الوقت المناسب عشان مياخدوش احتياطياتهم. رنا: ولو قولتلك إني مش هساعدك؟ نور: مش هتعملي كدة، لأنك شبهي وأنانية، مش بتفكري غير في نفسك، وأكيد مش هتخسري زياد عشان خاطر أميرة. رنا: انتي ناوية تعملي إيه؟ نور: انتي متسأليش على حاجة، نفذي اللي بقولك عليه وبس. رنا: بكرة، ماشي، ودي آخر مرة هشوف وشك فيها. رنا في نفسها: سامحيني يا أميرة.

نور بخبث: هيا فعلاً هتبقى آخر مرة.