رواية فعلتها لأجل أبي الفصل السابع عشر 17 - بقلم هدير عبدالعليم

مدنيا بتتخض وبسرعة: ماله!؟ هو كويس؟ آلاء بضحك: لا يا ستي عمر كويس جدا. دنيا: أكيد خطب حد من دفعتك. آلاء بابتسامة: لسه بتحبيه؟! دنيا: مش عايزة اتكلم في الموضوع ده. آلاء: عمر بقى أشطر مدرس رياضة في المدينة. دنيا بدهشة: عمر!؟! بس إزاي ده هو مهندس. آلاء: مش عارفة ونفسي أعرف أوي. دنيا: متأكدة أنه عمر ابن خالتك؟ آلاء: آه متأكدة لأن ده اسمه كامل.

دنيا: آه ربنا يكرمه، مستغربة أنه دخل طريق غير الهندسة وخصوصًا التدريس لأنه مكنش بيحب يشرح لحد. آلاء: محدش عارف أي السبب!! ماما دخلت: انتوا لسه صاحيين؟ آلاء بتسأل: ماما بقولك عمر ابن خالتي عامل إيه؟ ماما: كويس جداً. آلاء: هو شغال فين؟ ماما: تصدقي نسيت أقولك بيدي دروس رياضة لثانوي في المدينة. آلاء: تعرفي يا ماما أنه بقى أشطر مدرس رياضة في المدينة. ماما بفخر: مش ابن أختي لازم يكون شاطر، بصراحة عمر مجتهد ربنا يوفقه.

دنيا: يارب، يلا ننام بقى. *** بعد أسبوع آلاء: يا دنيا بقولك فيه بنت صحبتي كانت عايزة تيجي تتكلم معاكِ بس أنا مش عارفة هي عايزة إيه. دنيا: صحبتك؟ وعايزة تتكلم معايا أنا ليه؟ آلاء: والله فعلاً مش عارفة هي لما عرفت أن عمر ابن خالتي مصممة تيجي تتكلم معاكِ. دنيا: ياربي لحسن يكون قالها حاجة، مش عارفة أعمل أي مضايقة أوي ومش عارفة أقولها إيه لو كان قالها حاجة. آلاء: يعني تيجي ولا متجيش؟

دنيا: يعني هو ينفع أقولها لأ، خليها تيجي وخلاص. *** تاني يوم آلاء: سندس صحبتي بره. دنيا بعصبية: يعني هتخليها واقفة بره؟ دخليها. آلاء: تعالي يا سندس. سندس: السلام عليكم ورحمة الله وبركاته، أنتِ دنيا؟ دنيا بابتسامة: وعليكم السلام ورحمة الله وبركاته، آه يا حبيبتي تعالي. سندس: عاملة إيه. دنيا: الحمد لله بخير، أنتِ عاملة إيه. سندس: الحمد لله. دنيا: تعالوا ندخل جوة. آلاء: أنا هدخل أعمل العصير. ***

سندس: ياها كأن نفسي أتعرف عليكِ من زمان. دنيا بضحك: ياها للدرجة دي ولا إيه. سندس: بصراحة آه، لأنك أثرتِ في حياتي جداً. دنيا بدون فهم: إزاي؟ دا أنا أول مرة أشوفك. سندس: حياتي اتغيرت، هحكيلك الحكاية. دنيا بضحك: هي فيها حكاية كمان. سندس: بصي يا دنيا أنا كنت هطلع من التعليم كنت هتجوز، المهم كلمت مستر عمر وقولتله إن بابا عايزني أتجوز وكده وإني خلاص هطلع من التعليم الكلام ده كان من فترة، مستر عمر أصلاً يقرب لبابا.

دنيا: والله! سندس: آه يقرب لبابا من بعيد، المهم يا ستي اتفاجئت إن مستر عمر جه كلم بابا في البيت. دنيا بحماس: قاله إيه؟ *** فلاش باك عمر: يا عمي دلوقتي سلاح البنت تعليمها، بنت خالتي اتجوزت بس مكملتش واتطلقت علشان العريس وأهله وحشين، وأنا اتجوزت واتطلقت علشان مخترتش حد مناسب، يا عمي بلاش تغصب على سندس في الجواز. عمي: بس أنا عايز أطمن عليها، دي بنت واحدة.

عمر: علشان بنت واحدة لازم تخليها تكمل تعليم علشان تقدر تتسند على حاجة بعد كده، هقولك حاجة بيني وبينك يا عمي. عمي: اتفضل. عمر: عارف أنا كنت بحب بنت خالتي اللي اتطلقت، وبابا اللي وقف في طريقي ومنع إني اتجوزها، عارف يا عمي أنا لحد دلوقتي حاسس إن علاقتي بـ بابا مش زي الأول لأنه منعني آخد أبسط حقوقي رفض أتزوج بنت حبيتها، بلاش تقف في طريق بنتك وترفض إنها تكمل تعليم لأن مش كل الفرص بتكون متاحة معظم الوقت. عمي: ..

عمر: عارف أنا اشتغلت مدرس ليه؟ عمي: ليه؟ عمر: علشان ده المكان اللي ممكن أساعد ناس كتير إنها تحقق أحلامها، عارفة دنيا اتطلقت وبدأت تدرس تاني بس هي رافضة نتجوز دلوقتي، بس أنا وعدت نفسي إني هفضل مستني لحد ما تخلص تعليم. عمي: يعني أنت هتفضل مستنيها لحد ما تخلص تعليم؟

عمر: ما هو إحنا هنعيش مرة واحدة وهنلاقي حد شبهنا مرة واحدة هنحس إنه زينا، نحس معاه بالأمان وكأنه اتخلق علشان نكمل رحلتنا مع بعض، مينفعش الحياة تمشي من غير وجودنا مع بعض وقتها هنحس إننا مطمئنين بعد عناء وتعب مستمر من الحياة. عمي: ربنا يسعدكم يا ابني. عمر: ها اقتنعت ولا لأ؟ عمي: بس …