رواية فعلتها لأجل أبي الفصل السادس عشر 16 - بقلم هدير عبدالعليم

الدكتور بدهشة: مالك!!؟ معاذ: اه مالك أخويا فين؟ الدكتور: هو أخوك شبهك أوي؟ أنا اتخضيت بجد. معاذ: ما إحنا توأم. الدكتور بابتسامة: أنا قولت إزاى اتحرك على رجله دا أنا لسه مجبس جوا. معاذ بابتسامة: إحنا شبه بعض فعلاً. الدكتور بابتسامة: هو جوا جاي أهو. معاذ شاف مالك جرئ بسرعة: مالك عامل إيه!؟ مالك بابتسامة: علشان نلعب كورة تاني. معاذ بضحك: ما أنا قولتلك خلي بالك أنت إللي صممت تلعب بضمير. مالك: هعمل إيه؟!

بابا: أكيد خير إن شاء الله. آلاء: شكراً يا دكتور. بعد فترة طويلة آلاء: أنا مش قادرة أكمل ثانوي. بابا: يعني إيه؟ آلاء: يعني هاجل السنة. بابا بيكتم غيظه: لو كل واحد منا مقدرش يتحمل الضغط وقرر إنه مش هيكمل محدش فينا هيوصل لحلمه، لازم نحارب لتحقيق ما نريد. الناس لازم تكمل حتى وهم في أسوأ حالاتهم النفسية علشان يوصلوا لهدفهم إللي مؤمنين بيه. آلاء بدموع: بس أنا مش قادرة صدقني الموضوع صعب.

بابا بحضن: مش صعب على بنوتي الجميلة، أنا بقولك اسعى بس حتى لو جبتي معهد أنا مش هزعل، بس أهم حاجة تكوني عملتي إللي عليكي. ماما: مش هينفع تأجلي، سنة من عمرك هتضيع. بابا: بعيد عن سنة هتضيع ولا لا، بس إللي بيخاف من التجربة لأول مرة بيفضل خائف من التجربة طول حياته، مش عايزكِ تخافي من حاجة طول ما أنا معاكِ. آلاء بدأت أبتسم، وحقيقي إللي بيهون الدنيا الناس إللي حوالينا. دنيا داخلة من بره: سلام عليكم يا أهل البيت، عاملين إيه؟

ماما: أهي دنيا جت، إيه رأيك في إللي آلاء عايزاه؟ دنيا بدون فهم: عايزة إيه؟! ماما: عايزة تأجل. دنيا بضحك: اخص عليكِ اخص، دا أنا بقول البت هتجيب طب وتفرحنا. آلاء: والله غصب عني. دنيا: كله ده علشان اتخنقنا مع بعض الصبح، يا ستي حقك عليا. آلاء: … دنيا: هو حد ليه غير أخته، دا أنا بكون مسنودة بيكِ و ليكِ. آلاء:.. دنيا بابتسامة: لسه زعلانه؟! خلاص يا ستي يلا نخرج بكرة وعلى حسابي. معاذ: من غيري أنا ومالك ولا إيه؟

بابا بضحك: البيت ده مفيش فيه أي خصوصية، أنتوا بتطلعوا منين يا مالك أنت و معاذ. مالك: وصلنا لما دنيا قالت إن فيه خروجة. ماما بضحك: آه من غيركم ومش عايزة أسمع صوت، كفاية فلوس الرحلة بتاع الأسبوع إللي فات. معاذ: احمم، أنا بقول هدخل أنام بقى. ماما: يلا والقلب داعيلك. مالك بضحك: يلا نمشي بكرامتنا. دنيا: وإحنا كمان هندخل ننام، بعد إذنكم. بابا: اتفضلوا. دنيا: زعلتي مني؟ آلاء: عايزة أنام.

دنيا: مينفعش نزعل ونبعد لأننا أخوات، نتعاتب وصوتنا يعلى ونعمل كل حاجة، بس لازم قبل ما ننام نكون مصفيين كل حاجة بينا، لا العمر مضمون ولا العمر طويل علشان نبعد عن بعض، دا العمر بيعدي علشان إحنا مع بعض. آلاء بسرعة وبحضن لدنيا: وأنا مليش غيرك، بحبك أوي، ربنا يجعل يومي قبل يومك. دنيا بضحك: بعد الشر علينا إحنا الاتنين. آلاء: نسيت أقولك حاجة مهمة حصلت النهاردة. دنيا: إيه؟! آلاء: عارفة أصحابي كانوا بيتكلموا على مين النهاردة.

دنيا: على مين؟! آلاء: على عمر ابن خالتك. دنيا: ليه ماله؟! آلاء: …