رواية فعلتها لأجل أبي الفصل الثالث عشر 13 - بقلم هدير عبدالعليم

أبو عمر: بس ده ظلم. دنيا بقهرة: ظلم؟!!! ياها دا حضرتك عارف الظلم أهو، مكنش ظلم لما رافضت من الأول ولا أي؟ أكتر حاجة صعبة ممكن تعملها لابنك إنك تخيره بينك وبين بنت بيحبها. بابتسامة ساذجة، وأنت عملت كده. أبو عمر: لا دا شكلك اتعلمتي كتير أوي يا دنيا.

دنيا بابتسامة وثقة: اه اتعلمت جدا، بس أنا مش بقول لعمر اقعد لحد ما أخلص تعليم، على فكرة، هو حابب يتجوز عادي يتجوز زي ما حصل قبل كده، لكن أنا هعيش مرة واحدة ليه أعيش أدور على شخص يكون هو محور الكون!؟ ليه أفضل مستنية حد ييجي يخلي لحياتي قيمة، أنا اللي لازم أخلي لحياتي قيمة وهكمل تعليم. أبو عمر: إللي هو شايفه بقا، حابب يستنى هو حر. ↓ بعد فترة طويلة ↓ آلاء: بابا أنا هنزل أشتغل. بابا بدهشة: ليه يا آلاء؟

أنا مش مقصر معاكِ في حاجة. آلاء: لا بس صدقني عايزة أشوف الناس وأتعامل معاهم أكتر. بابا: كل الناس من بعيد جميلة، لكن لما نقرب بنتخض، خليكِ بعيد أحسن، أنا خايف عليكِ، وخصوصاً إنك داخلة تالتة ثانوي السنة الجاية، مش عايزكِ تضغطي نفسك. آلاء: بس الشغل مهم و.. بابا بسرعة: أنا مش بقول إنه مش مهم، بس أنتِ في فترة محتاجة ترتاحي. آلاء: ..

بابا: أوعى تكوني فاكرة أني بصرف عليكِ كده وخلاص، دا فرض عليا يا بنتي، أنتِ مسؤولة مني، وبعدها بتكوني مسؤولة من جوزك، يعني أوعى تكوني فاكرة علشان بيصرف عليكِ تكوني كده بتتذلي له، لا يا بنتي، ما أنتِ بتربي عياله وبتشوفي هو عايز إيه وبتعمليه. الدنيا صعبة فلازم كلنا نشيل بعض علشان الدنيا تمشي. آلاء بضحك: والله يا بابا أنت كبرت الموضوع أوي، مكنش في بالي غير إني عايزة أنزل وأشوف الدنيا فيها إيه.

دنيا داخلة من بره: سلام عليكم. ودخلت على أوضته. آلاء: هي دنيا مالها؟ بابا: مش عارف. آلاء: هدخل أشوفها زعلانة ليه. بابا كان سبقني على الأوضة: في إيه مالك يا دنيا؟ دنيا بدموع مكتومة: مفيش. بابا: لا فيه؟ أنتِ بنتي وأنا عارفك وعارف أمتي تكوني زعلانة وأمتي لأ. دنيا بدموع: تمريض مش نصيبي، مش متخيلة إنها فرقت معايا على درجة واحدة بس. بابا: يااها درجة. دنيا: والله درجة، أنا جايبة 259 وهي قبلت 260.

بابا بهدوء وحكمة: عارفة يا دنيا، ممكن ندخل طريق بنحبه أوي ونكتشف إنه في النهاية مش طريقنا، وممكن ندخل طريق تاني مش عايزينه وزعلانين أوي إننا دخلنا الطريق ده علشان نكتشف إن الطريق ده هو سبب خير كتير أوي لينا بعدين. متزعليش على أي حاجة حصلت، كله خير. {عَسَىٰ أَن تَكْرَهُوا شَيْئًا وَهُوَ خَيْرٌ لَّكُمْ ۖ وَعَسَىٰ أَن تُحِبُّوا شَيْئًا وَهُوَ شَرٌّ لَّكُمْ ۗ وَاللَّهُ يَعْلَمُ وَأَنتُمْ لَا تَعْلَمُونَ}

دنيا بدأت تمسح دموعها: تصدق فعلاً كلامك جميل أوي. بابا: أنا راضي بكل حاجة هتعملوها طالما أنتوا بتحاولوا، يبقى خلاص أكيد ربنا شايف إنكم بتحاولوا مش هيضيع تعبكم. دنيا: حقيقي. معاذ: وبعدين التمريض وحش. دنيا: وحش ليه؟ معاذ: علشان بيفضلوا في المستشفى طول الليل، وأنا مش عايزكِ تبعدي عني. دنيا بحضن: يا عمري، وأنا هفضل معاكم طول العمر. مالك: يعني مش هتتجوزي عمر؟ دنيا بضحك: دا أنتوا بجد محصلتوش، مش إحنا اتفقنا هكمل تعليم.

بابا: بنت أبوها الجميلة إللي هتكمل تعليم. آلاء: ربنا يكرمها وتكون أشطر دكتورة أو ممرضة من ثانوي. دنيا: يارب يا لولتي. ^^ بعد شهر ^^ آلاء: بابا يا حبيبي أعملك شاي؟ بابا بابتسامة: قولي يا آلاء، عايزة إيه؟ طالما فيها يا حبيبي يبقى أكيد فيها حاجة عايزها دلوقتي. آلاء بكسوف: …..