رواية فعلتها لأجل أبي الفصل الرابع عشر 14 - بقلم هدير عبدالعليم

بابا بابتسامة خفيفة: قولي يا آلاء عايزة إيه؟ آلاء: بحبك وأنت فاهمني. بابا بضحك: يعني غير كده مش بتحبيني؟! آلاء: لا طبعاً، هو أنا ليا غيرك يا أجمل أب في الدنيا. بابا بضحك: عايزة إيه قولي؟! آلاء: بصراحة عايزة تليفون. بابا بدهشة: هتعملي بيه إيه؟ آلاء: محتاجة في الدروس والمذاكرة. بابا: بس أنتِ بتاخدي الدروس كله عند المدرسين. آلاء: التليفون دلوقتي مهم. بابا: لما تحتاجي التليفون خدي بتاعي.

آلاء بتكشيرة: لا يا بابا، أنا عايزة تليفون علشان عايزة واتس و... بابا بسرعة: بس ده مش سن التليفون يا آلاء وإحنا اتفقنا على كده وقولتلك لو دخلتي طب هجبلك واحد. آلاء: بس أصحابي كلهم عندهم تليفونات. بابا بعصبية: من امتى وإحنا بنقارن نفسنا بحد؟! المقارنة مش بييجي من وراها غير التعب النفسي. متخيلة إنك كل ما تجيبى حاجة تلاقي غيرك جايب أغلى وأعلى وأحلى منها؟!

فتكوني عايزها أو عايزة أغلى منها، متخيلة هتفضلي تقارني نفسك قد إيه؟! لو اتعودتي على المقارنة هتتعبي يا بنتي صدقيني. آلاء بتصميم: مليش دعوة. بابا بعصبية وصوت عالي: آلاء مش هجيب تليفون ومش عايز الموضوع ده يتفتح تاني. ماما: خلاص يا آلاء سيبي بابا وادخلي جوا دلوقتي. آلاء بزعل: ماشي يا ماما أنا داخلة. ماما بهدوء: آلاء طلعت بره أهي، مش عايز تجبلها تليفون ليه؟ هو أنت مش معاك فلوس تجبلها تليفون؟

أنا هتصرف ونجيب واحد علشان تكون زي أصحابها. بابا بزعل على ماما: لا معايا الفلوس، بس فيه حاجات أنا كأب شايف إنها غلط يبقى مينفعش نتناقش فيها، لازم تكون عارفة إني بحبهم وبخاف عليهم أكتر من نفسي. بابا: وبعدين إيه اللي معاكِ الفلوس وهتتصرفي؟ إزاي أقول قرار وأنا متأكد منه وأنتِ تقولي غيره؟! ماما: مش عايزها بس تكون أقل من أصحابها. بابا بعصبية: هي ليه تقارن نفسها أصلاً؟!

كل واحد حر في حياته والطريقة اللي بيربي بيها عياله، بس مش كل واحد حر لما يكون متأكد إن عياله بيعملوا أو هيعملوا حاجة غلط ويسكت. بابا: مش كل حاجة ينفع نعملها بحنان الأم، بابتسامة أنا عارف إن حنان الأم ممكن يخليكِ تعملي أي حاجة علشان بس تشوفي عيالك مبسوطين، لكن خليكِ عارفة إنك المصحح الوحيد في معظم طرق الحياة. أنا عارف إن الكلام مش مفهوم بس هيكون مفهوم لما أموت وتكون...

ماما بدموع: صدقني مقدرش أعيش من غيرك، مش هقدر أربي عيالنا لوحدي. أنا من أول يوم جواز وأنا مطمنة بوجودك جنبي، أنت الأمان اللي بيحميني من الدنيا كلها، بعد كله ده عايز تسيبني وتمشي؟ ربنا يجعل يومي قبل يومك، هما كمان بيحبوك أوي وعارفين إنك بتعمل كل حاجة صح علشانهم.

بابا: بحبهم جداً دول عيالي، بس لازم أكون أنا الأب والمربي والمعلم والصاحب، لازم أكون كله ده مع بعض. لو كنت واحد منهم بس عيالي يضيعوا. وأنا بخاف عليهم جداً بخاف عليهم أكتر من خوفي على نفسي، فاهمني؟ ماما: دايماً فاهمك والله، هطلع أكلم آلاء بقا و... بابا بهدوء: لا متطلعيش دلوقتي. ماما: ليه؟! بابا: علشان هي لسه مقتنعة بقرارها وصعب نغيره دلوقتي، خليها تفكر مع نفسها الأول وبعدين هي هتيجي تقول إنها اقتنعت.

ماما بابتسامة: آلاء!!! ده العند كله فيها. بابا: هي بتصمم لو هي صح، لكن لما بتحس إنها غلطت بتتراجع ودي أحسن حاجة فيها. ماما بابتسامة: ما هو مش عيب إننا نرجع، خاصةً لو غيرنا وجهة نظرنا للصح، كلنا اتعلم ده منك وأنا كمان اتعلمت ده آخر فترة. معاذ جاي بسرعة: بااابا بابا بابا