رواية في قبضة الفهد الفصل الرابع والخمسون 54 - بقلم جنات

صباح يوم جديد كله سعادة وفرح على قصر الفهد. الكل متجمعين ومتحمسين للتحضيرات للفرح. فهد: عملتوا إيه في موضوع الجناح؟ زين: لسه جنة هتشوف الجناح لو حابة تغير فيه حاجة. جنة: لا، هو عجبني ومش عايزة أغيره. شروق: وانتي يا جميلة هتغيري حاجة فيه؟ جميلة: لا مش هغير. ريان: انتي شوفتيه أصلاً؟ جميلة: أكيد هيكون حلو لأنه اختيار شوشو صح. شروق ضحكت: صح. تمارا: تفتكروا هنلحق نخلص كل حاجة في أسبوع؟

حسن: ظبطتوا انتوا قوائم كل حاجة وسبوها علينا. الماميز: تمام. مروة: طب الفساتين والبدل هتعملوا فيها إيه؟ أسيل: نعمل فيها إيه مش فاهمة. مريم: هتجيبوها جاهزة ولا تفصيل يعني؟ جنة: مش هنلحق نفصل في أسبوع. زين: لو حابين تفصلوا اختاروا الشكل وسبوها عليا أنا والشباب. زينة بفرحة: بجد؟ أسر: بجد طبعاً. تمارا: خلاص كل واحدة تقعد مع جوزها وتقوله عايزة فستانها إزاي. جميلة: واحنا ناقصنا حاجات كتير لازم ننزل نشتريها.

تمارا: خلاص تبقي تنزلوا سوا وتجيبوا اللي عايزينه، تمام كدا؟ البنات: تمام أوي. كنان: وتاخدوا إجازة الأسبوع ده، مافيش نزول شغل. البنات: حاضر. أسر قام وقف وقرب من زينة ومسك إيدها، وهي استغربت. أسر بص للكل: هاخد مراتي عشان تقول لي على شكل الفستان اللي هي عايزاه. تمارا ضحكت: خدها يا حبيبي. زين: هو إيه اللي خدها يا حبيبي؟ ريان: صح كدا، ياخدها فين يعني؟

أسر: لا بقولكم انتوا الاتنين، كل واحد فيكم مقضيها خروجات وكلام مع مراته وأنا ما صدقت إنها اتكلمت، فمحدش ليه دعوة بيا، فاهمين؟ كلهم ضحكوا. أسر شد زينة وطلع على فوق. كنان بص للشباب: وانتوا إيه مش عايزين تعرفوا شكل الفستان؟ ريان: ودي فيها كلام؟ عايز أعرف طبعاً. يلا يا جميلة. جميلة قامت معاها: يلا. زين مسك إيد جنة: يلا. جنة قامت وكلهم طلعوا. شروق بصت للماميز: واحنا هنلبس إيه بقى؟

مروة بصت للرجالة: أكيد انتوا بدل سودة، مافيش كلام. تمارا: ده أكيد يعني، خلينا فينا، هنلبس إيه؟ مريم: تعالوا نعمل كل واحدة فنجان قهوة ونقعد سوا نتفرج على الفساتين. الماميز: يلا. فهد: يلا، إحنا على الشركة، لازم نخلص كل حاجة قبل معاد الفرح. راكان: ناس هايصة وناس لايصة. حسن ضحك: طب يلا يا فالح. كلهم خرجوا. وفضلت أسيل لوحدها: يعني هفضل أنا حزينة كدا لوحدي؟ لما أكلم دومي.

أسيل مسكت فونها ورنت على أدهم اللي رد عليها، وقالت له على موضوع الفساتين وهو قال لها هيجيلها عشان يعرف هي عايزاه إزاي. *** في جناح أسر، دخل وهو ماسك إيد زينة. زينة: ليه جينا هنا يا أسر؟ خلينا نطلع على السطح. أسر: مش واثقة فيا ولا إيه؟ زينة: انت بتقول إيه يا أسر؟ واثقة فيك جداً كمان. أسر: طب تعالي اقعدي يلا وقوليلي نفسك فستان فرحك يبقى شكله إيه. زينة: تعالَ أقولك.

زينة فضلت تتكلم وتشرح لأسر نفسها الفستان يكون عامل إزاي، وهو مستمتع جداً بكل حركة بتعملها. زينة: بس كدا فهمتني؟ أسر: فهمتك جداً طبعاً. زينة: هتتفق مع مصمم مين؟ أسر: متقلقيش، هنظبط الموضوع أنا والشباب. زينة: أوكي. زينة بصت لأسر أوي. أسر: عايزة تقولي إيه يا زينة؟ زينة: عايزة أسألك على حاجة وترد عليا بصراحة. أسر: اتفضلي يا حبيبتي. زينة: انت سمعت كلامي أنا وجنة امبارح صح؟ أسر: كلام إيه؟ زينة: أســـــــــــر.

أسر ضحك: عيون أسر. زينة: سمعتنا عشان كدا روحت السجن وضربت فريد صح؟ أسر بحده: زينة مش عايزة أسمع اسمه على لسانك، ماشي؟ زينة: حاضر، مش هنطق اسمه ولا اسم غيره، بس رد عليا. أسر: آه يا زينة، سمعتكم... أنا أصلاً كنت ماسك نفسي بالعافية من إني أقتله، بس لما سمعتكم مقدرتش أسكت. زينة: طب افرض كان مات؟ أسر: ما يموت ولا يولع يا زينة، شاغلة نفسك بيه ليه؟

زينة مسكت إيده: أنا مش شاغلة نفسي بيه على فكرة، أنا شاغلة نفسي بجوزي حبيبي، لأنه لو كان مات أو حصله حاجة كانوا هيحبسوك يا أسر. أسر ابتسم: لا متخافيش، أنا كنت بضربه، عارف إنه مش هيجراله حاجة. زينة: هنزل أشوف البنات عشان نروح نجيب الحاجات اللي ناقصانا. أسر: لا، مانتوا هتنزلوا معانا. زينة: معاكم إزاي يعني؟ أسر: كل واحدة هتنزل مع جوزها يا حبيبتي. زينة: ومين اللي قال بقى؟ أسر: أنا والشباب، عندك اعتراض؟

زينة: وأنا أقدر برضه، طب هروح أجهز. أسر: حاضر. على السطح زين قاعد على السور وجنى جنبه. جنى: مش عارفة يعني، قصر طويل عريض ومصمم نقعد هنا ليه. زين ضحك: بحب القعدة هنا وبحبها أكتر وإنتي معايا يا جنتي. جنى بصتله: ماشي يا زين. زين: هااا، بقى نفسك الفستان يكون شكله إيه؟ جنى: تصدق مش عارفة. زين: إزاي يعني يا جنى؟ في بنت متبقاش عارفة عايزة فستان فرحها إزاي؟ جنى: طب أقولك حاجة يا زين. زين: قولي يا قلب زين.

جنى: أنا هقولك نفسي أكون إزاي وإنت اللي تختارلي الفستان، إيه رأيك؟ زين: جنى، ده فستان فرحك وبتختاريه مرة واحدة في العمر، وعايزاني أنا اللي اختاره؟ جنى: آه، عايزك إنت اللي تختاره ليا، وبعدين أنا واثقة إن اختيارك هيكون روعة. زين: طيب يا ستي، نفسك تكوني إزاي؟ جنى: نفسي أكون برنسيس، يعني فستان واسع بديل وتاج زي الأميرات. زين ابتسم: هتكوني أحلى عروسة يا جنتي. جنى: طبعاً، وهيكون جنبي أحلى عريس.

زين ضحك: طب يلا اجهزي عشان تنزلوا معانا. جنى: ننزل فين؟ زين: المول، مش عايزين تشتروا حاجات؟ جنى: مانا هنزل مع البنات. زين: لا، كل واحد هينزل مع مراته، يلا. جنى: أوكي. في جناح ريان. جميلة: والله الجناح حلو جداً ومش عايزة أغير فيه حاجة يا ريان. ريان: طيب، سيبك من الجناح، فستان فرحك عايزاه إزاي؟ جميلة: لا، ده عايز قاعدة طويلة، لأنه يطول شرحه. ريان: ليه يا جميلة؟ هتلبسي ١٠ فساتين؟ ده هو فستان واحد.

جميلة: فستان واحد بس، بيتلبس مرة واحدة في العمر يا ريان باشا. ريان: طب قولي يا قلب ريان باشا. جميلة فضلت تتكلم كتير وتشرح نفسها فستانها يكون شكله إيه، وريان زهق. ريان: بقالك نص ساعة بتشرحي يا جميلة، أنا زهقت. جميلة: مش مهم، الأهم فهمت بقى عايزاه إزاي؟ ريان: فهمت يا أختي، روحي البسي يلا عشان نروح المول. جميلة: ليه؟ ريان: عشان تجيبي الحاجات اللي ناقصاكي، ولو اتكلمتي كلمة زيادة هحلف مانتي راحة في حتة.

جميلة: ده أنا هجهز في ثانية إلا ثانية. أسيل قاعدة في الجنينة، دخل أدهم القصر ونزل من عربيته وقرب منها: الجميل سرحان في إيه؟ أسيل: في حبيبي طبعاً. أدهم قعد جنبها: يا بخته حبيبه يا قمر إنت. أسيل ضحكت: اتأخرت ليه؟ أدهم: خلصت شوية حاجات في القسم عشان أخدت الإجازة. أسيل: إجازة من وقت. أدهم: مش عريس يا جدعان. أسيل: أحلى عريس يا ناس. أدهم: هااا، يا ستي، أي موضوع الفستان ده بقى؟

أسيل: الشباب قالوا إننا البنات نقول لكم على شكل الفستان وإنتوا هتتصرفوا مع المصمم. أدهم: وإيه الفستان اللي العروسة عايزاه؟ أسيل: نفسي في فستان يكون وااااو يا أدهم، اللي يشوفه يتهبل من جماله. أدهم: هما هيتهبلوا أه، بس مش من جمال الفستان، من جمال العروسة. أسيل: طب تعالى أقولك نفسي يكون عامل إزاي. أدهم: أنا كلي أذان صاغية. أسيل غمضت عينيها: نفسي أكون شبه عروسة البحر يا أدهم، الله.

أدهم: وابقي دوريلي على قرون تليق على الساك اللي الهانم عايزة تلبسه، أصلك متجوزة مديحة. أسيل ضحكت: فشر، ده أنا جوزي سيد الرجالة كلها. أدهم: بتثبتيني يعني؟ أسيل: حاجة زي كده، تعالى بقى أقولك عايزاه الساك. أدهم: بس تنسي موضوع الساك ده. أسيل هزت راسها وفضلت تشرح له الشكل اللي هي عايزاه، وخلصت. أدهم: كل ده يا أسيل؟ ده الموضوع طلع صعب قوي. أسيل: ده يوم في العمر يا أدهم.

أدهم مسك إيدها وباسها: وهيكون أحلى يوم يا روح وقلب أدهم. الشباب والبنات خرجوا من القصر سواً. أدهم: على فين العزم إن شاء الله؟ زين: البنات ناقصهم شوية حاجات عشان الفرح، فكل واحد زي الشاطر كده هياخد مراته عشان تشتري الحاجات دي. أدهم: ومحدش قالي يعني؟ ولا أنا مش عريس زيكم ولا إيه؟ أسيل: أنا معرفش إنهم هينزلوا معانا أصلاً. أسر: أدي عرفت، واسيل جاهزة، يلا نخرج بقى عشان نخلص ونروح نتعشى سواً. البنات: قشطااا أوي.

ريان: طب يلا عشان منتأخرش. كل واحد ركب عربيته مع مراته واتحركوا. بعد شويا كلهم وصلوا قدام المول ونزلوا. زينة: يلا يا بنات. أسر: يلا على فين؟ جميلة: هنروح نشتري الحاجات اللي ناقصانا. ريان: رجلنا على رجلكوا يا قمر. أسيل: لا طبعاً، إحنا هنروح سوا وإنتوا استنونا في الكافتيريا. أدهم: انسوا. جنى: يوووه بقى، إحنا هنشتري حاجات كتير وعايزين نكون سوا. زين: برضه انسوا، يلا. كل واحد مسك إيد مراته ومشوا.

بعد وقت طويل البنات اشتروا حاجات كتير واتقابلوا كلهم سواً، البنات وقفوا جنب بعض. أسيل بهمس: جبتوا الحاجات اللي تمارا قالت عليها؟ جنى: مستحيل أجيبها مع زين. جميلة: ونبي، كل واحدة فينا أمها هتنفخها لو رجعنا من غيرهم. زينة: طب نعمل إيه؟ زين: بتتهامسوا في إيه؟ جنى: ولا حاجة. أسر: طب يلا هاتوا الشنط دي نحطها في العربية عشان نكمل. زينة: نكمل إيه؟ أدهم: لسه حاجات كتير هنجيبها.

ريان: وبعدين، هو إنتوا هتجيبوا وإحنا لا ولا إيه؟ الشباب أخدوا الشنط ونزلوا يحطوها في العربية. أسيل: تيجوا ندخل المحل نجيب بسرعة. زينة: لا طبعاً، هييجوا وهيشوفونا. جنى: أنا من رأيي نمشي معاهم ونيجي مرة تانية. جميلة: أنا شايفة كده برضه. الشباب رجعوا بعد شويا: يلا. الشباب اشتروا حاجاتهم وخلصوا وراحوا اتعشوا سواً ورجعوا على القصر. البنات دخلوا وكانوا تعبانين وقعدوا على كنبة جنب بعض. الماميز خرجوا من المطبخ.

مروة: الشباب فين؟ جنى: راحوا يشوفوا المصمم. تمارا: اشتريتوا كل الحاجة؟ زينة بتوتر: آه يا توتا. مروة: كل حاجة، كل حاجة؟ أسيل: بصراحة يعني. مريم: أيوه، إحنا عايزين الصراحة. جميلة: معرفتش أشتري الحاجة وإحنا معانا. شروق: أنا عارفة والله. جنى: نعمل إيه يعني؟ اتحرجنا. تمارا: اتحرجتوا. مروة ضحكت: طب اطلعوا ارتاحوا، شكلكوا تعبانين. البنات طلعوا كل واحدة على أوضتها، أخدوا شاور وناموا.