رواية غلطة في الحلال الفصل الأول 1 - بقلم منى

الصدمة ألجمتنا عن الكلام، كل واحد فينا ملامح وجهه إنكمشت دليل على صدمته من اعتراف الثاني. حاولت أنظم أنفاسي اللي اتبعتثرت وقلت عشان أداري إحراجي بمزاح: _كأخويا يا أدهم. الله! اتوتر: _اه اه طبعًا طبعًا هيكون إيه؟ حاولت أتصرف عادي تفاديًا للشك: _طب يا واد يا أدهم هكلم أبويا وياخد لك معاد. _لا، أخدته مسبقًا، وأختك والعيلة عارفين، أنا بس قابلتك عشان أقولك إني مش عايز نكون قراب جدًا، إحنا ولاد عم وبس، تمام يا نورا؟

كلامه كان عبارة عن صدمات. يعني أختي دي هي اللي عارفة إني بعشق تفاصيله، لأ وكمان عايزنا نبقا ولاد عم بس! _انتي رحتي فين يابنتي؟ فقت من سرحاني: _معلش، كنا فين؟ ضحكت بسخرية مخفية: _آه طبعًا يا أدهم، وإحنا كنا إيه غير ولاد عم؟ تنهد: _أنا مش عايزك تزعلي مني، بس أنا هتجوز، ومستحيل أزعل نور يا نورا. حاولت أنفد بما تبقى من قلبي اللي اتكسر ودموعي اللي قربت تنزل زي الشلالات، وبداري فيها: _طب وأنا قلت إيه؟ يلا، معلش أنا اتأخرت.

_أوصلك؟ _لا، نور هتزعل يا أدهم، وأنا ميرضينيش حد يزعل بسببي. سلام. خرجت من الكافيه بسرعة وأنا دمعتي على خدي. أنا بحارب عشان متقعش، بس غدرتني. قعدت في جنب وبدأت أبكي بوجع من اللي عرفته. ساعة كاملة وأنا بعيط. شوية وتلفوني رن، من كتر ما بشوفش قدامي فتحت المكالمة بدون ما أعرف مين. _ألو. _انتي فين ياقلبي؟ استجمعت كل ذرة فيا عشان أرد عليه بسخرية: _أنا في الطريق يا قلب اختك. _طب تعالي بسرعة، العيلة اتجمعت وناقص انتي بس.

_خمسة وهتلاقوني. قمت وأنا ببتسم لسخرية القدر مني. أشرت على أول تاكسي، ركبت وسرحت في كل الذكريات اللي بتجمعني بـ أدهم! فقت من سرحاني وأنا قدام بيت العيلة. عدلت مكياجي وشعري ودخلت بقوتي المعهودة. قعدت في كنبة جنب جدو: _بونجور، إيه سبب الاجتماع الطارئ ده؟ تكلم بابا وهو بيبص على أدهم: _أدهم عاوز يخطب نور.