رواية غرام الاكابر الفصل الأول 1 - بقلم منال عباس

بعد مرور 15 عام. غرام: ماما حبيبتي، وحشاني أوي. اقعدي معايا شوية. والدتها: مش هينفع يا غرام، أنا جيت أطمئن عليكي وأرجع بسرعة علشان أبوكي... غرام: طب ليه أبويا مش بيجي يزورني زيك يا ماما؟ نفسي أشوفه... والدتها: غصب عنه يا بنتي، كان زعلان من حسن أخوه، بس هو دلوقتي خلاص مسامحه. المهم يا غرام، خلي بالك من نفسك، وخلي بالك تقعي في البئر. غرام: بئر إيه يا ماما؟ لتذهب والدتها.

ويشتد ظلام الليل، لتجد غرام نفسها بالقرب من البئر وكادت أن تقع. لتستيقظ وهي تصرخ: الحقيني يا ماما، الحقيني يا عاصم! يضيء عاصم نور الأباجورة. عاصم: مالك يا غرامي؟ فيكي إيه يا حبيبتي؟ غرام وهي تبكي: كنت هقع في البئر، والدنيا كانت ضلمة أوي. عاصم: أهدي يا حبيبتي، دا كابوس. ويعطيه كوبًا من الماء. تشربه غرام دفعة واحدة. غرام: الحلم دا، حلمت زيه من كام سنة. ربنا يستر يا عاصم. يجدها عاصم ترتجف، يأخذها بحضنه لتهدئتها.

عاصم: أهدي يا غرام، انتي أقوى من كدا. تسمع صوت أذان الفجر. تقوم لإيقاظ أبنائها أدهم وأسد. ليتوضأ الجميع ويصلي بهم جماعة الفجر. بعد انتهاء الصلاة. أدهم: استاذنك يا بابي، عايز أروح الرحلة المدرسية أنا وأسد. أدهم يبلغ من العمر 15 عام، بالصف الأول الثانوي، يشبه عاصم في كل شيء، حتى طباعه. أسد يبلغ من العمر 13 عام، بالصف الثاني الإعدادي. عاصم: مفيش مشكلة يا حبايبي، موافق. غرام: يا سلام، ومامي ملهاش رأي؟

أدهم: ما حضرتك بترفضي ديما. غرام: بخاف عليكم يا حبايبي. عاصم: سيبيهم يا غرام، هما كبروا دلوقتي. غرام: ربنا يحفظكم. يقبل أسد وأدهم رأس والدتهم، فهم يحبونها ويفتخرون بها. ثم يذهب كل منهم إلى حجرته. عاصم بغمزة: الرحلة هتطلع كمان يومين. غرام: ربنا يحفظهم، مع إني مش مطمنة. عاصم: انتي ديما كدا. المهم، أخيرًا هكون مع القمر لوحدنا. غرام بضحكة: انت فعلاً قليل الأدب.

عاصم: أموت أنا من الخدود التفاح دي، بعد كل السنين دي ولسه بتتكسفي. غرام: جدتي الله يرحمها. عاصم: الله يرحمها. كانت ديما تقول إنك كنزي الحقيقي. وانتي فعلاً يا غرامي كنزي. تحتضنه غرام بحب. غرام: وانت كل اللي ليا يا عصومي. ويلا ننام، الساعتين دول عندي عملية بكرة. عاصم: ربنا يوفقك يا قلبي. عند لؤي وسما. تستيقظ سما وتقوم بإيقاظ لؤي. سما: لؤي، اصحى يا حبيبي. لؤي: سيبيني، حرام عليكي، عايز أناااااام.

سما: لوجي كلمتني امبارح ونسيت أعرفك. بتستأذنك عايزة تروح الرحلة المدرسية. لؤي: كلمي رغد وغرام، لو الأولاد كلهم هيروحوا خلاص، تروح معاهم. سما: تمام. المهم ما عندكش مانع. وتتركه ليكمل نومه. لوجي بالصف، تبلغ من العمر 13 عام، تشبه سما في ملامحها وخفة دم والدها، بالصف الثاني الإعدادي. عند مراد، أخو حكيم والد عاصم. مراد وهو يحدث شمس، ابنته. مراد: كويس يا شمس إنك صحيتي بدري.

شمس: أيوا يا بابي، هروح النادي النهاردة والشلة كلها هناك من بدري. مراد بضيق: شلة إيه ونادي إيه بس، النهاردة رامز هيخرج من السجن ولازم نروح نستقبله. شمس: وأنا هعمله إيه يعني؟ مراد: مش كفاية إنك ما كنتيش بتزوريه، كمان مش عايزة تروحي معايا؟ شمس: وهو اللي عمله دا، مش كان ع*ا*ر علينا. مش كفاية كان كل ما حد يتقدملي ويعرف حكايته يبعد عني، وفي الآخر أخدت لقب عانس بسببه. مراد: يا بنتي، والدتك لو كانت عايشة كانت زمانها معايا.

شمس: آسفة يا بابي. واستأذنك علشان أصحابي وصلوا. وتركته وغادرت. عند رغد. تستيقظ رغد لتجد بناتها نوري ونورين في انتظار ردها عن الرحلة. رغد: خلاص يا قمرات مامى، بابي وافق. علشان أولاد خالو هيكونوا معاكوا وكمان بنت عمكم. المهم تكونوا مع بعض وتخلوا بالكم من بعض. تقبل الفتيات والدتهم. رغد: يلا علشان باص المدرسة وصل. لتغادر الفتيات. نوري ونورين توأمان بالصف الأول الثانوي، باقي شهر ويكملوا الـ 15 عام.

ينزل يوسف لأسفل ليجد رغد جالسة. يوسف: صباح الخير يا حبيبتي. رغد: صباح الخير يا يويوي. يوسف: الجميل كان سرحان في إيه؟ رغد: أونكل مراد كلمني امبارح قبل ما أنام، وعرفني أن رامز هيخرج النهاردة من السجن، وعايزني أتوسط له مع عاصم وبابا وغرام علشان يسامحوه. يوسف: تفتكري بعد اللي عمله دا ممكن عاصم يسامحه؟ رغد: ما أفتكرش. دا سامح سما بالعذاب، لكن أظن موضوع رامز أصعب. يوسف: ربنا يقدم اللي فيه الخير. عند عاصم.

يقوم عاصم بإيصال غرام إلى المستشفى ويذهب إلى شركته. غرام: أيوا، دقائق وأكون جاهزة. عقموا كل شيء وجهزوا ليا حجرة العمليات. الطبيب المساعد: بس العملية دي خطيرة يا دكتور غرام. الأفضل نعتذر عنها علشان سمعتنا وسمعة المستشفى. غرام: إزاي يا دكتور؟ تبقى عارف إن في أمل حتى ولو بسيط وترفض العمل؟ دا مهما كان إنسان، وبين الحياة والموت، ومقدرش أشوفه كدا وأرفض. وتأمر الجميع بالاستعداد.

تدخل غرام حجرة العمليات. تبتسم للمريض قبل أن يأخذ البنج. غرام: خليك واثق في قدرة ربنا، وإن شاء الله هتخف وتكون كويس. وتبدأ في الجراحة لأكبر عملية بالمخ.