رواية غزل الفصل السابع 7 - بقلم هايدي احمد

كانت غزل قاعدة مع حماها في الجنينة بيتكلموا وبيضحكوا سوى. –يا خبر ده انتي دمك خفيف أوي يا غزل. = تسلملي يا بابا، والله انت اللي دمك زي السكر. قربت واتكلمت بهمس: بصراحة عكس ابنك خالص، أنا مش عارفة ابنك ده طالع لمين. –ههه، في دي معاكي حق. جاسر مبيهزرش ولا بيضحك خالص، ماشي جد، ضبط ربط التزام ههه. = ليه، إحنا في الجيش؟ ده ناقص يعملنا الطابور الصباحي. والله أنا خايفة يأثر على داوود الصغير ويطلع زيه.

–ده بقى اللي أنا خايفة منه فعلاً، الولد لأنه مبيشوفش غيري أنا وباباه بدأ يتعقد وهو لسه يدوب خمس سنين. = بصراحة معاك حق، أنا مشوفتوش بيجري ويلعب زي الأطفال ولا بيتنطط. ده أنا خاله يجي لست عيال من أعمامي وخالاتي وباقي العيلة، بيجنونوني لما بيجوا عندنا لغاية اللي في سن ١٢ و١٤ سنة، ده غير إن داوود لبسه كله بدل، طفل يلبس بدل. –اااه، أنا كنت لواء سابق في الداخلية وطلعت على المعاش من فترة مش كبيرة.

اتاجأت غزل ووقفت وهي بتحييه زي العساكر. = تمام يا فندم.

–ههه، اقعدي يا بنتي. بتعملي إيه بس، أنا خلاص طلعت على المعاش. جاسر واخد طبعه شوية مني لما كان صغير، كنت بعامله بطريقة ناشفة عشان يطلع راجل وناشف كده، بس كان وقت الجد جد، ووقت الهزار أقعد أنا ومامته معاه كعيلة ونقعد نهزر ونضحك سوي، بس من وقت ما مامته اتوفت مبقيناش نقعد سوي خالص. كنت بطحن نفسي في الشغل عشان مروحش البيت وأقلب على نفسي المواجع، ويمكن ده اللي أثر في جاسر أكتر، بس لما جيت أصلح غلطتي كان الآوان فات. عشان كده بقولك انتي اللي هتقدري، بس أول بدايتك لازم تبدأ من عند داوود الأول وبعد كده جاسر.

= فعلاً يا بابا، معاك حق. أنا لو بدأت بجاسر طاقتي هتخلص واحتمال بعدها أكره الدنيا ومش بعيد أسيبلكم البيت وأهج ههه. قاطع كلامهم دخول حارس الأمن اللي برا ومعاه أهل غزل. غزل أول ما شافتهم قامت بسرعة وجريت عليهم وحضنتهم جامد وهي مبسوطة. = وحشتوني، وحشتوني أوي. –يا بنتي ده إحنا لسه سايبينك إمبارح. = ولو برضه وحشتوني ومش هتمشوا النهارده. ضحكوا عليها وأخذتهم وراحوا سلموا على حماها وهو بيرحب بيهم ترحيب حار.

–أهلاً أهلاً وسهلاً بيكم، نورتونا. اتفضلوا، خديهم يا غزل على لما أتصل بجاسر. –هو العريس مش هنا في يوم صباحيته؟ غزل حاولت تداري توترها: لا يا ماما، ده بس راح يوصل داوود الصغير الحضانه، يعني متعود على كده. وبرضه عشان داوود ميزعلش، وبعدين هنقعد نتحبس في البيت نعمل إيه ها؟ يلا يا ست الكل، تعالي أما أفرجك على البيت. –ادخلي يا بنتي انتي ومامتك، وأنا هقعد هنا مع والدك شوية على لما جاسر يجي وناكل كلنا سوي.

= لا والله ملوش لزوم، أكل إيه بس، إحنا جايين نشوف العرسان ونباركلهم ونمشي. –لا، بتقول إيه يا أبو غزل، يعني أول مرة تشرفنا انتي والمدام وتمشوا من غير ضيافة، ده حتى تبقى قلة ذوق مننا. يرضيك؟ يرضيكي انتي يا غزل؟ اتصرفي مع أبوكِ بقى. = أيوه يا بابا، ليه تمشوا دلوقتي؟ انتوا مش جايين تشوفوني يعني؟ مش هتمشوا من هنا إلا لما أشبع منكم ها. –شكلها هتحبسكم ومش هتطلعكم النهارده، خد بالك ههه.

ضحكوا كلهم سوي، وبعدين غزل أخذت مامتها ودخلت، ووالدها قعد مع حماها يدردشوا شوية. دخلت غزل المطبخ تقول للشغالين على الأكل اللي هيعملوه وباركولها على الجواز وبدأوا يعملوا الأكل. –ما شاء الله، دول كلهم هيعملوا الأكل. = لا، تقريباً كل واحد مسؤول عن حاجة، والأكل اتنين بس. –اتنين بس هيملوا السفرة دي كلها؟ لا أخش أساعدهم. = تساعدي بس يا ماما، انتي جاية هنا يتعملك كل اللي انتي عايزاه زي الملكات بالضبط، وأنا اللي هدلعك.

–سبحان الله، الرزق بيجي للعبد من حيث لا يحتسب، الحمدلله يا بنتي، أنا مبسوطالك أوي. = أهو سوفتي عشان تبقي تسمعي كلامي لما كنت بقولك أنا هجيب خدامين يعملولي كل حاجة. –ههه، آآه ياني، شوفي الحظ يا فاشلة. المهم يا بنتي طمنيني، عاملة إيه مع جوزك؟ كله تمام؟ = طبعاً يا ماما، كويسين مع بعض، متقلقيش انتي. –متأكدة يا غزل، ولا بتضحكي عليا عشان ترضيني؟ قولي الحقيقة، أنا عارفاكي كويس.

= يا ماما والله ما في حاجة من اللي في بالك، قولتلك متقلقيش بقى، وبعدين ده أنا غزل بنتك، يعني مش تخافي. –آه، ده اللي مخوفني منك. طب تعالي كده أحكيلي. = أحكيلك إيه ها؟ –تطمنيني ها، سبع ولا ضبع؟ = إيه يا ماما الكلام ده، عيب، دي حاجة خاصة بيا. –النبي شكله قرع، تعالي تعالي. ****** بعد شوية. –أيوه يا جاسر، انت فين؟ = أنا عديت على الشغل وبعدين هجيب داوود وأجي. –شغل؟ لا، ده انت اتجننت، انت مش واخد إجازة؟

= أيوه، إجازة يومين بس. –لا، ده انت اتجننت رسمي. تجيب داوود وتكون في البيت حالا، سامع؟ حماك هنا، تيجي فوراً ومش هعيد كلامي. خلص والده المكالمة وحاول يبان عادي عشان أهل غزل ميحسوش بحاجة. –جاسر جاي في الطريق أهو، مش هيتأخر. على لما يحطوا الأكل هيكون وصل. اتفضلوا. = ها يا جماعة، خلصتوا؟ –مدام غزل… أيوه حضرتك، خلصنا. عملنا كل الأكل اللي طلبتيه. تقدري تعملي عليه تشيك؟

= لا، ده كفاية. ريحوا، الأكل بيتكلم مش محتاجة. المهم اجهزوا يلا، ربع ساعة وحطوا الأكل. بعد شوية جه جاسر وداوود الصغير، دخلوا عليهم. جاسر سلم على أهل غزل وباركولهم وقعدوا عشان ياكلوا. راحت غزل قعدت جمب جاسر وتغرفله الأكل قدامه وهي بتعامله بحب قدام أهلها عشان يطمنوا عليه. بصلها جاسر بسخرية وقرب منها. –مش لازم تعملي التمثيلية اللي ملهاش لازمة دي. = بصتله غزل بصدمة وبعدين بصت قدامها بغيظ.

وبعدها جاسر عمل صوت تحت السفرة وكلهم بصوله وهو بص لغزل بغضب. وغزل بصتله بإنتصار لإنها دست على رجله بجزمتها جامد وقالت ببراءة وهي بترمش بعينها. = إيه مالك يا جاسر، فيه حاجة وجعاك؟ *ولسه دي البداية يا جاسر بيه*