رواية جميلة الفصل السادس عشر 16 - بقلم ليل ادم

دخلت المحل والمحل ده في وش باب البيت اللي ساكن فيه. طلبت منه الحاجات اللي جميلة كانت عايزها. لقيته سألني: صاحب المحل: مش حضرتك ياسين بيه بتاع محلات الأكلياسين: اه في حاجه. صاحب المحل: أصل بصراحة امبارح كنت شايف حكومة وكده. سألت عرفت اللي حصل مع المدام بتاعت حضرتك. فتحت كاميرات المحل اللي فوق راس حضرتك دي لقيت واحد شكله غريب طالع البيت. قولت أقولك وانتا لوحدك علشان بيني وبينك بخاف من الحكومة والشغل ده.

ياسين: فين الفيديو اللي بتقول عليه ده. صاحب المحل: تعاله شوف بنفسك في الشاشة أهو. ياسين: دخلت معاه بلهفة. فتحت الفيديو وبقا عمال يرجع بالوقت لحد ما لقيت قصادي على الشاشة عربية محمد بس اللي نزل منها واحد شكله غريب عني أول مرة أشوفه. أصلا صورت الفيديو من تليفوني علشان أقدر أوصل للراجل ده. صاحب المحل طلب مني أن الموضوع يكون بينا بلاش يطلع بره. قولتله ماشي. خدت الحاجة وروحت. خدت جميلة وطلعت على البيت.

جميلة: انتا اتأخرت أوي ليه كده. ياسين: ادخلي بس وهقولك. جميلة: أول ما دخلت شقتي افتكرت كل حاجة حصلت. ياسين: في أي مالك. جميلة: مفيش. أنا أول ما دخلت البيت افتكرت كل حاجة حصلت. ياسين: أي بقا اللي حصل. جميلة: أنا رجعت من عندك دخلت خدت شاور وخرجت. عملت كوباية العصير وخارجة لقيت حد ضربني على راسي وفتح الباب وخرج. ياسين: طب شوفي كده الفيديو ده. جميلة: ماله. أه هوا ده الشخص اللي كان في البيت.

ياسين: طب رجعي الفيديو كده شوفي العربية اللي نازل منها. جميلة: مالها. ياسين: يعني مش عارفة دي عربية مين. جميلة: محمد. ياسين: علشان تبقي تقتنعي لما قولت إن مش مرتاح لمحمد الفترة دي. ياسين: طلع تليفونه. جميلة: بتعمل أي. ياسين: استني. محمد: ألو. ياسين: انتا فين يا محمد. محمد: انتا اللي فين. ياسين: في البيت. محمد: أوعى تتحرك من عندك علشان عايزك عشر دقائق وهكون قصادك سلام. ياسين: سلام. جميلة: أي ده في أي.

ياسين: مش عارف بيقولي عشر دقائق وهكون عندك عايزك ضروري. جميلة: في أي أنا خايفة. ياسين: أنا موجود متقلقيش من أي حاجة. جميلة: ربنا يستر. فعلاً ربع ساعة وكان محمد موجود على باب الشقة. ياسين: ادخل. محمد: كويس إنك هنا. حمد الله على سلامتك يا جميلة معلش جيت على غفلة. ياسين: في أي. محمد: عربيتي اتسرقت. جميلة: الحمد لله. محمد: يا جميلة انتي فرحانة على أي بقولك عربيتي اتسرقت. ياسين: امتى حصل ده يا محمد. محمد: معرفش.

أنا كنت سايب العربية عند الميكانيكي بقالي تلات أيام. روحت اخد منه العربية لقيت بيقولي اتسرقت. ياسين: فين الميكانيكي ده يا محمد. محمد: في ... ياسين: طب يلا نروح نشوف الموضوع ده عنده. محمد: مش هيعمل حاجة. اتكلمت معاه وهوا مصمم إنه ملوش دعوه. ياسين: يا عم تعالى معايا يلا يا جميلة. جميلة: خلاص بقا يا ياسين قالك الراجل قال مليش دعوه. ياسين: هتيجي معانا ولا لأ. جميلة: لا طبعًا جايه مش هقعد لوحدي في الشقة أخاف.

ياسين: يلا بينا. محمد: يلا. ياسين: خدت محمد وجميلة وروحت عند الراجل اللي محمد قال عليه. أول ما دخلت وشاف وشي لقيته قال: يوه تاني انتا. ياسين: متتكلم عدل ولا تحب أخليك تتكلم كويس. رضا صاحب الورشة: أه ياعم احب. ياسين: رفع تليفونه. ألو أحمد بيه إزاي حضرتك. أحمد بيه: الحمد لله يا مستر ياسين. ياسين: معلش يا أحمد بيه في عيل ميكانيكي سرق عربية أخويا وعامل راجل في منطقة أحمد بيه: انتا هناك الوقتي يا مستر ياسين.

ياسين: أنا واقف معاه. أحمد بيه: افتح الميكروفون ثواني كده. ياسين: تمام يا أحمد بيه. أحمد بيه: هوا فين الواد ده يا مستر ياسين. ياسين: واقف سامع أهو. رضا: علشان خاطر ربنا اقفل بس نتكلم مع بعض. ياسين: انتا مش عامل راجل خليك راجل لحد النهاية. رضا: حقك عليا أنا هعمل اللي تقول عليه بس اقفل. ياسين: خلاص معلش يا أحمد بيه خليك معايا على التليفون لو حصل جديد هتصل بيك.

أحمد بيه: أنا هعمل تليفون للقسم التابع الديرة اللي انتا فيها علشان لو أي حد بص لك بس يتسحل. ياسين: تسلم يا أحمد بيه سلام. أحمد بيه: سلام. ياسين: العربية فين ياض انت. رضا: العربية عند ناس جنبينا هنا بس الناس دي... ياسين: هشش. حل معاهم أنا قاعد في العربية هنا ربع ساعة وماشي انتا حر. عايز تمشي زعلان مفيش مانع. عايز تمشي وانت اللي مش زعلان برضوه بأيدك. رضا: لالالا تتحل يا ياسين بيه كل حاجة تتحل بعد اذنك ثواني.

ياسين: خدت محمد ودخلت قعدت في العربية لحد ما العربية تيجي. محمد: أي ده يا عم انتا رعبت الواد. لو شوفت كان بيتكلم معايا إزاي قبل ما تيجي مكنتش صدقت إنه يقلب كده قصادك. ياسين: وربع ساعة لو مكنش يظهر يبقى يومه أسود. جميلة: ياسين والله أنا بجد خايفة أوي. إيه اللي بيحصل ده. ياسين: متقلقيش يا جميلة اهدي بعد إذنك. أقل من ربع ساعة كانت عربية محمد جت. رضا: والله يا ياسين بيه دفعت مبلغ كبير علشان العربية ترجع.

ياسين: علشان تتعلم تبقى راجل وأد الأمانة. رضا: ماشي يا ياسين بيه شكراً على الغلط فيا. ياسين: ادخل شوف عربيتك تمام ولا في حاجة ناقصة فيها. محمد: ثواني. ياسين: محمد دخل العربية يشوف فيها إيه وأنا واقف مستني يقول تمام أو لأ علشان أعرف أتكلم مع أحمد بيه أقوله خلاص ولا لأ. وفجأة وأنا واقف لقيت شاب لبس أسود في أسود طالع من بيت قديم شكله مش غريب عني.

رفعت تليفوني فتحت الفيديو بتاع الولد اللي ضرب جميلة وبصيت للواد لقيته نفس الشخص. سبت محمد وجميلة وروحت ورا الشخص ده ماشي وراه من غير ما ياخد باله مني لحد ما دخل بيت قديم ومهجور. دخلت ورا البيت لسه بيقفل باب الشقة مسكت الباب ودخلت عنده. أول ما دخلت كأنه عارف أنا مين. مسكت في طلع من جيبه سلاح أبيض. وبدأت بينا مشاجرة. سيطرت على السلاح اللي كان في إيده وخدته منه وبدأت أربطه بسرعة قبل ما حد يجي.

اتصلت على جميلة قولتلها تاخد العربية بتاعتي من غير ما محمد ياخد باله وتيجي عندي مكان ما أنا موجود. وفعلاً جت خدت الولد ده في العربية وخدت جميلة وروحت البيت القديم. ياسين: ادخل. وذق الولد في الأرض. انتا ممكن تفضل هنا لحد يوم الدين وممكن تطلع من هنا كسبان لو سمعت كلامي. الولد: هقولك كل حاجة بس بشرط. ياسين: أي. الولد: توعدني إنك تسبني أمشي. ياسين: أوعدك بس تقول كل حاجة. الولد: والله هقولك كل حاجة حصلت.