رواية جرح الأيهم الفصل العشرون 20 - بقلم أيلان

مُلاذ: أيهم! أيهم: جرحه؟ ازدادت العقدة التي بين حواجبي أكثر. ضحك بعيونه وهو ينطق الكلمة بجدية. ابتعدت بخطواتي لورا. مُلاذ: أنت شتسوي هنا؟ هز رأسه برفض وأردف: أيهم: ما أسوي. مُلاذ: دكتور! ترا من شهور أنا حاسة اكو أحد وراي وتجاهلت. أنت هسه لقيتك أنت هذا الشخص. شتسوي هنا؟ شدلاك ببيتنا؟

ابتعد عني بهدوء، راح قعد على جهة بالشارع. سند روحه ع الحايط، طلع باكيت الجكاير من جيبه. ركزت نظري على الجكارة اللي بيده. رفعها حطها بين شفافيته، سحب دخانها حيل، نزلها، زفر الدخان من خشمه. تقدمت عليه ووقفت قدامه، گلت متسائلة: مُلاذ: دكتور احجي شتسوي هنا؟ منين تعرف بيتنا؟ رجع جر نفس من الجكارة، نزلها، مد ايده على ركبة رجله، زفر الدخان من خشمه مرة ثانية. أيهم: جيت أطمّن عليكِ. مُلاذ: ليش حتى تطمّن؟

رفع أصابعه الاثنين السبابة والوسطى، أشر على بطني بيهن. أيهم: علمود جرحكِ. مُلاذ: صار لي أكثر من ثلاث شهور من طلعت من المستشفى. برأيكِ رح يظل جرحي لسّا ما التئم؟ أيهم: بعض الجروح ما تلتئم لو يمر دهر، تبقى مفتوحة وتلجم الگلب. رفعت حواجبي، حنيت ظهري، صار وجهي كدام وجهه. مُلاذ: دكتور منين تعرف بيتنا؟ وليش تراقبني من شهور؟ زفر دخان الجكارة بوجهي. كشولت ملامحي وغمضت عيوني مزعوجة. رفعت نفسي و وخرت الدخان، أمسح بوجهي.

مُلاذ: شجااااااي تسوووي أنت؟ أيهم: صوتكِ لَذَه. مُلاذ: تدلع بكيفك وتراقب بكيفك وتأمر بكيفك، سلامااات؟ منو أنت؟ أيهم: متوهمة. مُلاذ: متوهمة وأنت تراقبني من شهور؟ أيهم: ليش أراقبكِ؟ مُلاذ: شي أنت أعلم بيه بعد! أيهم: متوهمة لَذَه. مُلاذ: ليش من صحت وراك هسة مشيت بسرعة وما التفتت؟ أيهم: أدري ردة فعلكِ هيج رح تكون. مُلاذ: تريدني أصدكك هسه؟ ليش دتراقبني؟ أيهم: ليش حتى أراقبكِ؟ مُلاذ: أنا أسألك عن السبب؟ أيهم: لأن أحبكِ.

عقدت حواجبي وتوسعت عيوني مصدومة. قبل لا أحجي كمل كلامه. أيهم: وأنه ما أحبكِ؟ بس اللي يحب يراقب، وأنه ما أحبكِ حتى أراقبكِ. زفرت نفس مرتاحة، درت وجهي عنه. وكفت أفرك صدري وأجر نفس. بلعت ريكي وگلت: مُلاذ: سالمين ترا إحنا ببغداد، خاف عبالك كاعدين بتركيا لو أمريكا. بعدين أنت كل مريض تروح لبيته تتطمن عليه؟ أيهم: أي، نعم. مُلاذ: شنو الي يثبت؟ أيهم: ليش حتى أثبت؟ مُلاذ: حتى أصدكك.

كام من مكانه، نزل الكلاو من راسه. طلع جكارة ثانية ورثها، بعد ما خلصت ذيج. اتقدم عليه صار كدامي، نزل راسه الي، قلص عيونه وبَعد الجكارة، گال بهدوء يوتر: أيهم: كلش حلوة أنتِ؟ گالها بطريقة تساؤل. حسب اللي فهمته يقصد بكلامه "هلكد أنتِ حلوة حتى الكل يراقبج ويحبج؟ نظرات القلق اتوضحت بعيوني. عدم الفهم والاستغراب. خزرته وگلت: مُلاذ: شارب شي أنت سكران؟ ابتسم بهدوء، مال راسه. أيهم: أي شارب. رفعت حاجبي متفاجئة، مبتسم ويحجي.

مُلاذ: ششارب؟ تقربت عليه أشم ريحته. قربت خشمي من قميصه، بلا إدراك وبيناتنا مسافة حيل قليلة. اشتميت ريحته وگلبي دك حيل. نفس ريحة أبوي وعطر أبوي. ما أكدر أنكر ولا أكدر أگول متوهمتها. قسم بكل شي نفس الريحة بالضبط! عطره اللي دورت عليه سنين بملابسي وملابسه، دورت عطره بين كل الناس ولا لكيتها. فزيت مبعدة راسي، لمن همس أيهم بأذني: أيهم: كاس الندم. دحگتله باستغراب. مُلاذ: شنو؟ أيهم: مو گلتِ ششارب؟ مُلاذ: أي؟

أيهم: أني جاوبتك كاس الندم! كشولت ملامحي، دفعته عني، درت وجهي أمشي. سمعته وراي يصيح بصوت مو كلش عالي. أيهم: بجامتك حلوة. نزلت راسي أدحك لبجامتي، مرسوم عليها ميكي ماوس. درت وجهي له، ظل ساكت ويدحگلي. نزل نظره على بجامتي، ابتسم خانك ضحكته. مُلاذ: همزين گلت لي حتى بعد ما ألبسها. درت وجهي للبيت، كرضت شفتي بأسنان معصبة. دفعت باب البيت، دخلت. اتقدمت على باب المطبخ وأنا أحجي بعصبية:

مُلاذ: حيوان، دكتور سافل، ما يستحي على نفسه شعليك بـ بجامتي!! لا و نوب يگول جاي أطمّن عليچ. رفعت راسي وقلدت عليهم. مُلاذ: كلش حلوة أنتِ؟ مُلاذ: مو حلوة، العب النفس، شعلييييك؟ دفعت باب المطبخ، مينفتح طلع مسدود. رجعت أدفع أريد يفتح، ميفتح. گت الباب: الوووو يمعودين. ملاك: منو؟ مُلاذ: الجيرررران، شكو قفلتوا الباب؟ اسمع ركضتها، اجت بسرعة فتحت الباب. ملاك: ما أدري بيج براو سديته معبالي.

نزعت حذائي اللي ما لابستها عدل، دخلت وأنا أحجي. مُلاذ: شلون بـ فيروز الثانية؟ ملاك: شبيج؟ مُلاذ: مابيه. ملاك: مُلاذ. وكفت مكاني والتفتت له. هانده اسمي بنبرة حيرة وحزن. عقدت حواجبي متسائلة عن سبب تكون هاي التعابير على ملامحها. مُلاذ: گولي؟ ملاك: رجعت أحلم. مُلاذ: مثل شنو رجعتي تحلمين؟ اتقدمت كعدت على القنفه، أشرت لها تجي يمي. اتقدمت كعدت يمي گالت بهدوء وهي صافنة بالفراغ.

ملاك: أحلم بالأطفال والناس اللي هناك. دائماً أسمع صوت الرصاص. أنا أخاف، أخاف من صوت الرصاص، أخاف منه. هنا خذوا أبوي، خذوا هواي ناس. رفعت راسها دحگتلي، عيونها مملية بالدموع والخوف. ملاك: أنا ما أحب صوت الرصاص. مُلاذ: لا تخافين، ما رح تسمعين هالصوت، ولا رح يصير شي. هسه أنتِ بأمان. ملاك: مُلاذ داتعذب والله، داتحمل شي فوگ طاقتي. ما أريد أشرح للدكاترة، ما أريد أسولف. أنا مو مريضة نفسياً والله، أنا مو مخبلة.

مُلاذ: ملااااك! كم مرة أعيد وأكرر، أنتِ مو مريضة نفسياً ولا مخبلة. مجرد تحتاجين لدكتور يساعدج تعدين هالفترة! ملاك: لمن حجيت لوحدة من صديقاتي گالت بس المخابيل يروحون للأطباء. رمشت بعيوني، غمضتهن بنفاذ صبر. هي فوراً طاحت دمعتها ورا كلماتها. شفايفها صارت ترجف وعبست ملامحها. مُلاذ: أنا كم مرة أگلج لا تشاركين حياتج وي صديقاتج ولا وي أحد!!! تريدين تسولفين شي؟ تعالي وسولفي إلي لو لأمي! ملاك: هي صديقتي...

قبل لا تكمل قاطعتها بعصبية، رافعة إصبعي، كازه على أسناني. مُلاذ: ماكو أي شخص أمان! افتهمتي؟ الصديقة اللي تگولين عنها هسه باجر رح تطلع عليج سوالف من جوة الكاع. السر اللي أمنتِ الها اليوم باجر تسمعي من الكل. الموضوع اللي خفتِ تشاركينه وي أحد، ثقيتي بيها وشاركتيها باجر رح تعيرج بيها. ملاك، الناس مو أمان، لا تنطين ثقتج لأي شخص كائن من يكون. هزت راسها بقبول وعيونها مدمعة. ملاك: بطلتي تحضنيني؟ رجعتي مثل قبل؟

مُلاذ: ملاك والله ما أكدر، ما أعرف! هذيج الفترة جنت لازم أضغط على روحي. جنه نحتاج لبعض وبعدنا نحتاج لبعض، بس مداعرف والله أنا ما أعرف أحضن دوم أو أكون عاطفية. أنا ما أكدر أحضن أحد. مسحت دمعتها وگالت بهدوء: ملاك: عادي. مُلاذ: يلا كومي نامي. ملاك: تصبحين على خير. مُلاذ: اجمعين.

دارت وجهها وراحت لغرفتها هي وأمي. دوم وبكل بيت لازم اكو غرفتين، وحدة منهم المفروض تكون خطار، بس نسويها غرفة نوم. ينامن بيها أمي ومشمش وأنا أنام وحدي. أمي رادت تخلينا بنفس الغرفة، بس دائماً أقترح عليها نكون كاعدين بالغرفتين الموجودات أفضل. تنهدت وگمت. بعدني توني أريد أدخل غرفتي، سمعت صيحة ملاك. ملاك: مُلااااذ. رحت بسرعة لغرفتها، دخلت. دحگت لأمي فازة من نومها، مخترعة. تدحك لملاك وتسأل شكو. مُلاذ: شكوووو؟

رفعت إصبعها تأشر بخوف وعيونها مدمعة وشفتها ترجف. ملاك: ابـ... أبو بريص. رفعت راسي أدحك لإصبعها وين يأشر. طلع أبو بريص (تكرمون) بالسگف. انداريت عليها وخزرتها. طن كلام صار بحلگي، سكتت. مُلاذ: امشي جيبي الماسحة والقاصر. ركضت جابت الماسحة والقاصر، اجت نطتنيياهن وراحت لبدت ورا أمي. مُلاذ: شمالج ما تگليلي؟ شني أسد خو ما أسد؟ ملاك: أخاف. مُلاذ: حسابج بعدين على هاي صرختچ. عبالي شو شصار.

درت وجهي وهفيت أبو بريص بالماسحة. ركض بسرعة وأنا أركض وراه وبأيدي القاصر. ملاك تصرخ وأنا أعيط بيها. أمي ما تكدر تكوم وهي تعت بـ هدوم أمي. ملاك: يمااااااا اجاني. مُلاذ: ويييين اجاج ويييين؟ أنت اوكف ابن الجلب منو گلك تطب للبيت؟ ونوب الدنيا شتا شتسوي هنا حيوان! فريت الغرفة وراه أنا وماسحتي وأغلط عليه وأسب. مُلاذ: أنت تسميك أيهم تركض مثله. لك أيهم اووووكف اشتعلوووو خل الزمكه.

فيته حيل ومات، ملاك جرت نفس مرتاحة. خلصت ونظفت مكانه، انداريت لملاك. مُلاذ: بالله العظيم إذا صرختي مرة ثانية علمود هيج سالفة أكتلج أنتِ مو الأبو بريص. ردت نامت بمكانها وأمي هم نامت. رحت غسلت، لعبانة نفسي. غسلت، رحت لغرفتي، دخلت. لميت شعري لفوك كباية، نزعت تشيرتي، كعدت ع الجرباية. حنيت ظهري، شابكة إيديه. عيوني ع الفراغ، صداع يحتل عقلي. أخذت جهازي، لگيت نور متصلة. رجعت اتصلت عليها. نور: الو مُلاذ. مُلاذ: ها نوره؟

نور: مُلاذ فدوه أريد أشوفه تعبت. مُلاذ: مدا يقبل. نور: أقنعيه، مُلاذ والله گلبي ديحتر. مُلاذ: تمام أحاجي ضرغام. نور: أقنعي الله يخليج. مُلاذ: إن شاء الله. نور: تمام، آسفة أزعجتج. مُلاذ: لو يمي أطكج دفره، أطلع معدتج من حلكج شني أزعجتني؟ أمشي ولي عني. ضحكت بخفة وسدت الاتصال. نزلت الجهاز، دحكت للتلفون أريد أتركها. جأتني مسج تتضمن "شلونج؟ " وجعت، اخذت التلفون وكتبت. مُلاذ: زينة. نور: أكيد؟ مُلاذ: أكيد.

نور: رح تكدرين تنامين اليوم؟ زفرت نفس، نزلت راسي، فركت كصتي بحيرة. بهاي الأثناء جاني اتصال. جاوبت، خليت التلفون ع أذني. مُلاذ: الو. جسار: صفنتي؟ مُلاذ: ما اعرف. جسار: رح تكدرين تنامين من دون كوابيس؟ مُلاذ: ربما. جسار: من كم يوم ما نايمة؟ مُلاذ: ما اعرف ما عديتهم. جسار: أبداً ما نمتي؟ مُلاذ: أغفى ساعة وأفز. جسار: لنفس السبب؟ مُلاذ: اممم. جسار: ليش ما تراجعين طبيب نفسي مثل أختج؟ مُلاذ: ما أريد. جسار: ليش؟

مُلاذ: عاجبتني نفسي بهذا الوضع. جسار: رح تتعبين أكثر بالأيام الجاية. مُلاذ: هذا مبتغاي. جسار: بس ما رح ينفع هيج؟ مُلاذ: جسار، روحي ما تغذت غير من التعب. جسار: بس هيج روحچ جاي تدمريها! مُلاذ: مو أكثر من ما جاي تدمر روحك. جسار: ما جاي أدمرها. مُلاذ: ما منتبه أنت. جسار: مثلچ أنا أتغذى من التعب. مُلاذ: يمكن هيج أفضل النا. جسار: صح، ما نعيش بغير طريقة. مُلاذ: اممم. جسار: نامي، حاولي. مُلاذ: إن شاء الله.

نزلت التلفون، سديت الاتصال. رجعت بظهري لورا، شمرت نفسي متمددة. شوكت رح أنتهي وأبدي؟ محد رح يعرف معنى هالكلمة غير. حاولت ما أنام، بقيت أفتر بالغرفة. رجعت اتمددت ع الجرباية، غمضت عيوني. گلت بهدوء، صوت شبه مختفي، أدندن. مُلاذ: طفاج القدر يا شمعتي، خلاني أجر بحسرتي. غمضت عيوني، انتقلت للظلام. تسلطت الأضواء ع الجثة المرمية بالوسط. صوت صدى يغني الأغنية. صدى: شلي بهالعمر يا دنيتي آاااهم، محسود على حظي وقسمتي.

ارتفع صوت إطلاق النار. ثم صوت الصراخ. الدم لون الأرض. استمر صوت صدى الأغنية بالارجاء. اندفع الباب، دخل الملثم. انصعق جسمي بالكهرباء. صرخت باسم ملاك، رفعت عيني أدحك لأبوي اللي واكف بعيد ومتجتف ويدحگلي. عيوني ما انزاحت عنه. انضربت بقوة على ظهري بشي قوي. شهكت، فزيت، فتحت عيوني. دحگت لسگف الغرفة، كعدت على حيلي. مسحت وجهي بكف إيدي، ضربت راسي. مُلاذ: غبية لا تناميين، لا تنامين.

گمت من مكاني، طلعت للصالة. ظليت كاعدة بالصالة للصبح. كعدت أمي، أخذت ملاك وديتها لدوامها. رجعت أنا يم أمي. فيروز: ليش ما رحتي لدوامج؟ مُلاذ: بعد شوي أروح. هزت راسها بقبول. مُلاذ: اليوم عندك جلسة علاج مو؟ فيروز: أي. مُلاذ: تمام تعاي خل نطبق كم تمرين أنا وياج هسه. فرشت لها فراش، مددتها على ظهرها. كعدت يمها بالكاع. مُلاذ: يلا رح نبدي.

هزت راسها بقبول، بلعت ريقها. رفعت رجلها بإيدي، بديت أسويلها تمارين. رجلها أرجعها لورا ناحية صدرها وأحركها. ظليت أكرر بالتمارين برجليها ثنينهم. كومتها سندتها عليه، جبت المشاية خليتها تلزم بيها وتحاول تمشي، وأنا أساعدها. گوه تخطي برجله. تعبت، صارت تلهث گد ما تعبت. فيروز: تعبت. مُلاذ: يلا هاي آخر شي. ابتعدت عنها مسافة، رفعت إيديه وأشرت لها. مُلاذ: يلا فيروز تعالي. فيروز: تعبت مُلاذ. مُلاذ: يلا هسه تعالي، هاي آخر مرة.

قدمت خطواتها بثقل وصعوبة، ومشيت لحد ما وصلت إلي. مُلاذ: عفييييييه. ابتسمت بتعب، اخذتها كعدتها ع القنفه. استراحت شوي، رحت بدلت ملابسي. لبست بنطرون كابوي وقميص أبيض وفوقهم كوت بيجي. أخذت قلادة رايدة البسها. اتلمست عنقي اللي طاحت منه قلادتي. ما لگيتها مرة ثانية، ما أعرف وين وكعت حتى. تنهدت، لبست قلادتي. فتحت شعري فردته، رشيت عطري. أخذت السويج، طلعت من الغرفة. اتقدمت كعدت بالباب، لبست كعب بيجي. أخذت جنطتي، اجتني أمي.

فيروز: مُلاذ انتبهي لنفسج. مُلاذ: من عيوني فوفو. هسه رح أجيب يمج جوجو. فيروز: عوفي. المرة مبتلية بيه؟ مُلاذ: لا فوفو حبايب أنتم. من أخابرك تحضري أخذج للدكتورة. فيروز: مُلاذ انتبهي، واختج... قاطعتها قبل لا تكمل. مُلاذ: لا تخافين ملاك سلطان يروح لها قبل خروجها بساعة وأنتِ تعرفينه. هزت راسها بقبول. فتحت الباب وطلعت. فيروز: بيباي. مشت كم خطوة الشارع بيها نزلة والسيارة موكفتها قريب. رفعت تلفوني اتصلت. مُلاذ: وينكم؟

أسد: هنا قريبين بالفرع اللي يصعد. مُلاذ: خل أشوفكم. دارت تدور بعيوني لحد ما شفتهم. رحت لهم. أسد: سلام. مُلاذ: هلو. رجعت شعري لورا، حطيت إيدي ع خصري وكملت كلامي. مُلاذ: انتبهوا لأمي وللبيت. أي شي تشكون بيه اتصلوا عليّ وتدخلوا. مراويتكُم الأشخاص اللي إحنا نعرفهم. غيرهم إذا دك بابنا وشفتوه يحاول يدخل تدخلوا، تمام؟ أسد، معتصم: تمام. مُلاذ: إذا تحتاجون شي، دكوا الباب واطلبوا مثل كل مرة أوصيكم.

هزوا راسهم بقبول مبتسمين. درت وجهي، رحت للسيارة، صعدت. اتوجهت لخالة جنات، اخذتها وديتها لبيتنا. رجعت رحت للكلية. خلصت دوام، طلعت بسرعة، صعدت السيارة. فتحت تلفوني دحگت أمي داكة عليّ. اتصلت عليها حطيت الهتفون بأذني وأنا أسوق. مُلاذ: ها يمه گولي. فيروز: ملاك لسا ما كوم. مُلاذ: سلطان ما جابها؟ فيروز: لا هي المفروض طالعة من زمان. مُلاذ: ها، لا تمام يمكن وداها تشتري وتاخروا، لا تخلين بالج. فيروز: شوفي وردي لي خبر.

مُلاذ: خوش. اتصلت ع سلطان. سلطان: هلا مُلاذ. مُلاذ: ها سلطان اگلك. سلطان: گولي. مُلاذ: أنت رحت لملاك مو؟ سلطان: أي بس طلعت من وكت. مُلاذ: ليش؟ صاير شي؟ سلطان: بالمدرسة صايرة مشكلة وياها. من الـ 9 أنا هنا اجيت للمدرسة انتظره. بعدين عرفت صايرة مشكلة وهي منهارة أعصابها ومغمي عليها. اخذتها للمستشفى. مُلاذ: صدددك تحجي؟ ليش ما خابرتني! سلطان: ما فضيت والله. مُلاذ: وين يا مستشفى؟ سلطان: نفسها الجنتوا بيها.

سديت الاتصال فريت الستيرن. رجعت من طريقي، اتوجهت للمستشفى. أول ما وصلت اتصلت ع سلطان. مُلاذ: وينك؟ سلطان: بالردهات إحنا. مُلاذ: تعال إلي بسرعة. سديت الاتصال. دقايق وشفته كدامي. اجاني وگلي "يلا أمشي". مشيت وياه. مُلاذ: شبيها شنو منهارة شكوو؟ سلطان: وحدة صرخت بالمدرسة على ملاك وگالت لها انتِ مخبلة وتروحين لدكتور نفسيي والبنات ظلن يسبسن عليها. منهارة أعصابها وقامت تصيح والمدرسات وحدة ضاربتها. وكفت مكاني موسعة عيوني.

مُلاذ: شنوووو! ضاربتها؟ سلطان: اعرف اعرف راجع لهم وعيونها إذا ما افرك حلگهن وحدة وحدة، بس أريدها تتحسن أنا أعلمهن ذني البرابيك. ضربت رجلي بالكاع معصبة. ما أكدر أروح لهم هسه بالي يم ملاك. رحت للردهات. وكفت بمكاني لمن دخلت. شفت ملاك نايمة ع السدية. أيهم واگف يمها ويسولف وياها. رحت ناحيتها وكفت يمه. مُلاذ: ملاك. أول ما شافتني بجت، وجهها صار أحمر. دنكت عليها خليت إيدي ع شعرها. مُلاذ: اشش اش أهدي أنا يمچ.

مسحت دموعها، دنكت بست گصتها. هي ترجف وعيونها تدمع. مسحت ع خدها. عيونها مطككة، وجهها أحمر دم، الغصة واضحة عليها. مُلاذ: شصار؟ بلعت ريقها، رجعت مسحت دموعها. حسيت ع صوت أيهم وراي. أيهم: اگعدي. التفتت له. لكيته مخلي لي كرسي. هزيت راسي: شكراً. أيهم: العفو. سحبت الكرسي، گعدت. لزمت إيدين ملاك بإيديه. مُلاذ: سولفي. بدت تسولف لي عن صديقتها. لمن جانت تريد ملاك تمشي وياها. صديقتها مانعتها وگالت لها "ما أمشي وي مخابيل".

ملاك: صارت تگول عني مخبلة وخلت كل البنات يعرفون ويحجون عني ويگولون عني مخبلة. صيحت عليها ودفتها. اجت المدرسة ضربتني، صرخت عليّ گلت لي تأدبي وغلطت عليّ گالت أنا ما متربية وما أعرف شصار وراها، ما أتذكر. هزيت راسي بقبول. أحس نار تطلع من أذاني. عيوني تريد تطلع من مكانها. التفتت لسلطان گلت بهدوء، متمالكة أعصابي. مُلاذ: أنت منين عرفت؟

سلطان: الحارس سامع الهوسة. دخل عليهم. من شايف ملاك يعرفني أنا أخذها. اجاني جنت كاعد يمه گلي البت اللي تاخذها متخربطة بالإدارة وتبجي رجل بالكاع ورجل بالإدارة. اخذتها وجبتها لهنا. هزيت راسي بقبول. رجعت انداريت لملاك. مُلاذ: اسم صديقتج والمدرسة اللي ضربتج؟ ملاك: ليش؟ مُلاذ: احجي استعجلي يللا. بلعت ريقها، دموعها مستمرة تنزل. ملاك: صديقتي اسمها هالة والمدرسة اسمها منور. مُلاذ: زين يلا امسحي دموعج ولا تبجين، محد يستاهل.

اندارت لسلطان، كملت كلامي. مُلاذ: سلطان، اخذها للبيت وقبلها وديها تشتري لها شتريد. أمي لا تخليها تعرف وأنا لحگتكم، عندي شغل هسه جايه وراكم. ملاك: وين رايحة؟ مُلاذ: عندي شغل. سلطان: انتظريني نحل هالشغل سويهم. مُلاذ: سوي اللي گلت لك عليه سلطان. سلطان: مُلاذ! مُلاذ: ما أعيد كلامي. اجا سلطان إلي، وكف كدامي. گال بصوت ناصي: سلطان: أنا أريد أعاقبهم! مُلاذ: وأنا أريد توصل ملاك للبيت. سلطان: مُلاذ نروح أنا وياج!

مُلاذ: انتهى النقاش. إذا ما توصلها گلي حتى هسه أنا أوصلها بدربي. سلطان: تمااام تمام أنا أوصلها. مُلاذ: مفهوم كلامي؟ سلطان: تمام. سحبت جنطتي وطلعت. مشيت بسرعة فتحت السيارة وصعدت. داشغل بالسيارة، فزيت ع فتحة الباب. دحگت لأيهم وهو يصعد السيارة وياي! مُلاذ: أنت شتسوي هنااا! أيهم: السلام عليكم. مُلاذ: وعليكم السلام. شكوو؟ أيهم: ماكو سلامتچ رايح وياچ. مُلاذ: أنت شتريدد من عندي؟ اندار عليه. دحگلي. أيهم: ما أريد.

مُلاذ: شتريددد شكو صاعد وياي؟ أيهم: ما أخليج ترحين وحدچ. مُلاذ: شعليك يا اخيييي شعليييييك؟ أيهم: عليّ زين؟ يلا حركي السيارة. مُلاذ: شتريد من عندي أنت؟ أعرفك تعرفني؟؟ منو أنت وشنو هالجرأة هااي؟ البارحة الكاك كدام بيتي واليوم بسيارتي. باجررر وين؟ أيهم: بـ بيتي. خزرته وعطت: انززززل من السيارة. أيهم: ما أنزل. مُلاذ: انززززل.

أيهم: لو تحجين منا لباچر لو مو تطرديني. سالفة أخلّيج وحدچ ترحين هاي أيسي من عدها قطنة وشيليها من أذانج. ضربت الستيرن حيل بإيديا وصحت فيه: شعليييك بييييه!!! رجع هو هم صيح بصوت أعلى. أيهم: علييييه مو أنا السنين أتلوّع عليج تالي أخليج هسه ترحين مرة ثااانية! سكنت بمكاني عاكده حواجبي، ما فاهمه كلامه، أدحك بعيونه. مُلاذ: شجاي تحجي؟ مسح وجهه حيل، طلع جكارة يدخن. رفع ساعته وگال. أيهم: إذا تأخرتي بعد مارح تلگيهم.

بلعت ريگي، درت وجهي. رجعت بظهري لورا، شغلت السيارة. اتجهت للمدرسة، الهدوء سيد المكان. أحس بي يدحگلي. اندار أدحگله، يدور وجهه. ظلينا على هالحال لحد ما وصلت. وكفت السيارة بـ باب المدرسة. نزلنا أنا وأيهم، مشينا يم بعض. دخلنا المدرسة سويه. أيهم: مو تكضيهم تكتليهم، ترا مالي خلك أفاككم. مُلاذ: محد گلك تجي أنت عزمت روحك. أيهم: عادي عاجبني. صار لي هواي ما شايف نسوان تتمالخ. أريد أشوف.

اندارت عليه، قلصت عيوني، أدحگله. ابتسم تك خد وهو يمشي يمي، أردف. أيهم: بس عيونچ المكحلة كافية تحرگهم. كملت مشي مبتسمة، دخلنا لمكتب المديرة. دحگت مو مديرتهم اللي موجودة. مديرة المدرسة الثانية اللي دوامهم ظهر. مُلاذ: السلام عليكم. المديرة: أهلاً. مُلاذ: تعرفين مديرة المدرسة اللي داوموا قبلكم؟ هزت راسها بقبول مترددة. المديرة: نعم أعرفها، تفضلي؟ مُلاذ: عندچ رقمها؟ ظلت ساكتة تدحگلنا بارتباك. التفتت ع أيهم لمن گال.

أيهم: نحتاج مكانها، لان بنتنا صايرة مشكلة وياها هنا ونريد نحاجي المديرة. دحگت له مستغربة، عاكده حواجبي. اجا طن كلام بحلگي بس سكتت. لمن شفت المديرة اقتنعت، انطتنا رقمها. سجلته يمي اتشكرتها وطلعت. أول ما طلعت انداريت لأيهم. مُلاذ: أنت شنو تگول لها بنتنا خيرر! أيهم: حتى تنطينا الرقم. قل أعوذ بالله. تخيلي عندي بت منچ ما أطب البيت، أروح أنام بالشارع أشرف لي.

مُلاذ: الحمدلله والشكر، لا أعرفك ولا تعرفني ولا تصير عندي بنية ولا ولد. وفر أحلامك لنفسك. أيهم: ما أحلم إنه، لأن أحلامي كدامي. انداريت عليه وخزرته: شتقصد أنت؟ أيهم: لا تصدكين روحچ حبيبها. قصد السيارة هايه. أنتِ كابوس ما أخليج. مو النوب حلم. اندارت ع السيارة، أشر عليه. دحگتلها صدك حلوة وفخمة. درت وجهي ورحت للسيارة، اجا وياي صعد. اتصلت ع المديرة، رن رن، جاوبت. مُلاذ: الو. المديرة: أهلاً، منو؟

مُلاذ: مديرة مدرسة #### وياي؟ المديرة: نعم اتفضلي منو؟ مُلاذ: أنا مُلاذ اخت ملاك إلياس. حسب ما عرفت صايرة مشكلة اليوم ووحدة من الطالبات مقللة الأدب بكلامها ووحدة من المدرسات رافعة إيدها ع اختي! المديرة: نعم صار هيج شي أنا جداً أعتذر... قاطعتها قبل لا تكمل. مُلاذ: اعتذارج مقبول، أريد عنوان الطالبة وعنوان المدرسة.

المديرة: ست مُلاذ أنا أعتذر منچ جداً بس من غير المسموح لي أنطي هيج معلومات. أنا رح أتصرف بهالموضوع والطالبات بيناتهم لا بد تصير مشاكل وكلام مو حلو، وأنا باجر رح استدعي أهل الطالبة الأخرى وما يصير خاطرج إلا طيب. مُلاذ: عزيزتي أتفهم كلامج وأشكرج بس أريد عنوانهم. اتركي عنوان الطالبة. أريد عنوان المدرسة. الموضوع اللي صار من غير الممكن السكوت عنه، نهاااائياً.

التفتت ع أيهم اللي كاعد يمي ويحرك لي إيديه بمعنى "عفية، عفية". خزرته ورجعت كملت. مُلاذ: أو يصير الحجي غير حجي وأنا غير مسؤولة عن اللي يصير بعدين. المديرة: ست مُلاذ... مُلاذ: ست رجاءاً أريد عنوان المدرسة أو رح أنجبر أروح أشتكي عليكم بالتربية. اختفى صوتها واستغرق ثواني حتى انطتني عنوان المدرسة. غلقت الاتصال. رحت ع العنوان وأنا أدور وأسأل لحد ما وصلت. نزلت من السيارة. نزل أيهم وصار وراي. اتقدمت أدك الباب.

أيهم: رح ينكسر. مُلاذ: معليك. اجاني صوت مرة: منووو؟ همس أيهم مجاوبها. أيهم: صگارتچ. وأنا أدحك بعيونه گلت بصوت عالي: مُلاذ: أنا. انفتح الباب ع النص. مدت راسها مرة من الباب، دحگت لي. گلت بهدوء وأنا رافعة حاجبي. مُلاذ: أنتِ منور؟ منور: نعم اتفضلي منو؟ مُلاذ: مُلاذ إلياس، اخت الطالبة ملاك إلياس اللي رفعتي إيدج عليها اليوم! منور: ما أعرف.

هيج عقدت حواجبي، دفعت باب البيت. أيهم دفر الباب برجله قبل لا تنفتح. گامت تصرخ وأنا دخلت عليها. منور: أنتِ بأي حق تدخليين لبيتي؟ قبل لا تحجي شي زايد، رفعت إيدي، صگتتها راشدي قوي. صرخت بصوت عالي وعلى أثر صوتها طلعوا اللي بالبيت وكانوا ولد جبير وبنية صغيرة كلش. ولد: منووو أنتِ؟ اتقدم عليّ ومنور تصرخ. منور: أنتِ بأي حق تضربيني؟ مُلاذ: وأنتِ بيا حق تضربين اختي!!!

تايهة الج هيّ، مخليها تدرس، ما مخليها حتى تضربينها ولا عبالج. لـ هنا وخلصت، رايحة أشتكي عليج يم التربية. الولد: شنوووو ضربتج!!! اتقدم عليّ لمن وصل إلي خزرته. بلحظتها جره أيهم من ياخته وهو وراه. همس بأذنه بصوت مسموع. أيهم: بلا تصرفات رجولية مالها داعي. افتهم الموضوع لو مسيت شعرة منها، إيديك أكسرهن وأكسرك فهمت؟ الولد: منوووو انتوا شنو طابين تتهددون علينا؟ أو الله أتصل بالشرطة هسه عليكم. مُلاذ: أتصل ع الشرطة تخوفني؟

وأنا رح أروح للتربية أشتكي على هاي الحيوانة. ظلت ساكتة وعيونها مدمعة. اتقدمت عليها لزمت فكها حيل. كزيت ع أسناني وگلت. مُلاذ: لا تنسين اسمي مُلاذ. احفري بعقلج حتى تعرفين على منو تماديتين. ترت وجهها من إيدي. أيهم دفع الولد بعيد. اجا عليه وگال بتساؤل. أيهم: نروح؟ هزيت راسي بقبول. طلعت من بيت منور وأنا أخزرها وما سمعت لها صوت. التفتت ع أيهم لمن گال مبتسم. أيهم: ارتاحيتي هسه؟

مسحت وجهي، ابتسمت. هزيت راسي بقبول. اتقدمت ع السيارة وأنا أحجي. مُلاذ: أنت هم طلعت مو قليل. أيهم: بلا شك. گالها وركب بالصدر. گلبوت بعيوني وأنا مبتسمة، صعدت بالسيارة. رفعت تلفوني واتصلت. مُلاذ: الو سنار. سنار: هلو مُلاذ گولي. مُلاذ: أنا ما أجي اليوم ع الشغل. سنار: تمام. سديت الاتصال نزعت الهتفون. اندارت لأيهم لمن گال. أيهم: شنو تشتغلين؟ مُلاذ: نادلة بمطعم. أيهم: اها يا مطعم؟ مُلاذ: ####. أيهم: عرفته، ليش تشتغلين؟

مُلاذ: ونسة ما متونسة گلت أتونس اشتغل بمطاعم. أيهم: مو جاي نسولف مثل الأوادم. مُلاذ: غير أجيب فلوس ليش أشتغل يعني؟ أيهم: أنتِ مو متخرجة وعندچ وظيفة؟ هزيت راسي برفض. مُلاذ: هاي آخر سنة لي. أيهم: اها. هزيت راسي بقبول. مُلاذ: وين أوصلك؟ أيهم: ماكو داعي نزليني اركب تكسي. مُلاذ: خل أوصلك بدربي. أيهم: لا عدي شغل أريد أروح لمكان. مُلاذ: تمام بـ راحتك.

وكفت السيارة وهو نزل. رحت ع أمي اخذتها للدكتورة لأن هي محدد مواعيدنا تكون قريب العصر. رجعت رحت لملاك اطمنت عليها نايمة ويمها خالة جنات باقية. رجعت طلعت ورحت اشتريت غراض. رحت اخذت أمي من يم الدكتورة ورجعت للبيت وعدا اليوم وأنا يم ملاك. ثاني يوم وديت ملاك ونزلت وياها. دخلت للمديرة گلت لها تستدعي الطالبة واتصلت ع أهل الطالبة واتصلت بهم. دخلت هالة وهي ما فاهمة شكو. اتبعها دخول أهلها. مُلاذ: بنتچ حاچيه ع اختي!

غالطة عليها ومتهمتها بالخبال. أهلها خزروها وهي بسرعة بجت. بقوا يتعذرون مني ويطمون فعل بنتهم وانتهى الموضوع بمحاولة أهلها بنقلها من المدرسة لمدرسة ثانية. مر أسبوع من بعد هاليوم والبنية انحولت. والمدرسة رحت عليها للتربية عرفت من ملاك إنو المديرة متعاركة وياها ومنور تركت المدرسة.

اتقدمت، لبست لبس الشغل استلمت المواعين. كل شوي يجيبون لي مواعين وأغسلهم. الصداع ياكل براسي أكل. اتصلت ع سلطان يروح ياخذ أمي. سديت الاتصال وخليت التلفون بجيبي. بقيت لليل أغسل المواعين. إيديه تجرحت گد ما غسلت. سلام عليكم. فزيت واندريت. دحگت لأيهم. مُلاذ: بسم الله الرحمن الرحيم. شتسوي هناااااا؟ دخل وراه أبو المطعم. دحگت له وهو يوصيني. صاحب المطعم: انتبهي عليه، لازم يغسلهم كلهم.

طلع وخلاني أنا وأيهم. نظرات الاستغراب والتساؤل تنقري بعيوني. مُلاذ: ولك شجاااابك!!! أيهم: شني اجيت آكل حرام؟ مُلاذ: شتسووووي هنا؟؟؟؟ شني هالصدرية شيريد أبو المطعم منك؟ أيهم: مو شنو هذاك هذا... مُلاذ: شنو هذاك هذا احجي عدل فهميني شكو؟ شجابك هنا! أيهم تراقبني؟ أيهم: اهوووو كل شي صاحت تراقبني. عمي أنا رجال اجيت آكل وبالغلط، طلبت نص المنيو وصار الحساب هو. وأنا ما عندي فلوس أنطيتهم حل أفضله هو أغسل المواعين.

ظليت موسعة عيوني عليه وهو يحجي بجدية، ابتسامة على وجهه. مُلاذ: تحجي صدك؟ أيهم: وداعة براطمج هاي. عضيت شفتي حيل بعصبية. دورت بعيوني لگيت سجينة. سحبتها وحطيتها بوجهه. مُلاذ: من تحجي وياي تادب. أيهم: هنة براطم قحط؟ مُلاذ: أبو بريص. أيهم: أم براطم. دفعني عن المغسل واتصرف. وكف يغسل المواعين وأنا صافنة. كل شوي يگلي "ها نظيف؟! " هز رأسي وب عقلي ألف سؤال. أيهم: مُلاذ مُلاذ عايلني.

دحگت له وهو صم مي بإيده شمره عليّ. شهكت وعطت. اخذت جفجير، أركض وراه. الطباخين والنوادل صافنين علينا. هو يضحك عليّ. رجعنا للمطبخ وكف مستسلم. أيهم: يلا خذ حقك. ما جذبت خبر رحت عليه هطرته بالجفجير. عاط وكام يفرك إيده. أيهم: فوصه، أم براطم. مُلاذ: أبو بريص. أيهم: انكتم. مُلاذ: انكتم أنت.

دحگ لي بطرف عين. رجع يغسل المواعين لحد ما خلص. ونوا من الجهة الثانية أنشفهم. فرغ المكان وكل الكل انتهى دوامهم. الدنيا ليل، طلعوا وأنا بقيت وهو هم. دخل صاحب المطعم. أيهم: خلصنا. صاحب المطعم: يلا رح أقفل المطعم. هزينا راسنا. نزعت الصدرية اللي ع ملابسي. خليت الأكل الباقي بسفريات. أيهم يخلي وياي ويعزل ومخلية أكل جديد هم. طلعت وهو لحقني بإيدينا الأكياس. گال متحمس. أيهم: شلون جان غسلي؟

لبست كوتي ودحگت له. منزعجة من اللي سواه. أنا أعرف وهو يعرف ما جا صدفه ولا ما عنده فلوس. مُلاذ: حلو. طلعت، تركته صاح وراي. أيهم: مُلاذ، مُلاذ. التفتت له واگفه مكاني. اجاني وكف كدامي. أيهم: شراح تسوين هسه؟ مُلاذ: عندي شغل. أيهم: اجي وياج؟ مُلاذ: بـ كيفك.

تركت سيارتي مكانها. اجاني اتصال أخذت تلفوني. دحگت لرقم أمي، تسأل عني لأن تأخرت. بلغتها رح أجي وغلق الاتصال. مشينا أنا وأيهم، لحد ما وصلنا لمكاني المعتاد. دحگت للأطفال اللي يلمون بغراضهم وعينهم ع الطريق ينتظرون جيتي، ابتسمت لهم. رفعت العلاقة اللي بإيدي، صحت عليهم. مُلاذ: منو منتظرني؟ ركضوا عليّ حاوطوني، وزعت عليهم الأكل وهم يضحكون، يتشكروني مبتسمين. مُلاذ: لمن تاكلون وتخلصون اقروا الفاتحة لألياس وترحموا له.

زهره: أنا دائماً أدعي له حتى من ما تجيبين النا أكل. ابتسمت مسحت ع شعرها. گلت مشجعتها. مُلاذ: عفيه. كل الأطفال اللي موجودين صاروا يساندوها بنفس الكلام ويگولون هي تذكرهم حتى يقرون الفاتحة. شوق: منو عمو؟ التفتت دحگت لأيهم اللي واگف وراي. على ثغره مرسومة ابتسامة يدحگلهم. مُلاذ: هذا... دحگت له وهو دحگ لي منتظرني أكمل، ما عرفت أوصف. مُلاذ: هذا العم دكتور. صاحوا الأطفال معجبين بمهنته: ياااا.

اتقدم يسلم عليهم ويسولف وياهم. ابتسمت أدحگلهم، گنبص والتموا عليه. دحگت لـ "حزن" كاعدة وحدها. اتقدمت عليها، حاضنة نفسها، تدحك للكاع الدموع مالية عينها. مُلاذ: حزن؟ اتقدمت كعدت يمها. رفعت راسها دحگت لي. نزلت دمعتها. مسحتها بإصبعي، ميلت راسي لها. مُلاذ: شصاير؟ گالت معبسة ملامحها، دموعها مستمرة بالنزول. حزن: ماما... مُلاذ: ما تحسنت؟ هزت راسها برفض. حزن: سمعتها تحجي هي وجيراننا گالت ماما هي رح تموت.

ردت أحجي قاطعني صوت أيهم. رفعت راسي دحگت له. أيهم: شبيها أمچ مريضة؟ رفعت راسها حزن، دحگت له. هزت راسها بقبول، دموعها مالية عينها. گنبص أيهم كعد گدامها يمسح دموعها. أيهم: شبيها؟ شنو مرضها؟ بجت، جسمها يهتز من البجي. تبجي بحرقة وتحجي. حزن: عدها دودة ببطنها ويكولون إذا تنفجر تتسمم وتموت. مُلاذ: زائدة دودية. أيهم: لا تبجين، إنه أعالجها. رفعت راسها من إيديها، دحگت له. حزن: شلون تعالجها؟

رجعت ضمت وجهها تبجي بصوت. وخرت إيديها ودحگتلنا لمن گال أيهم مجاوبها. أيهم: إنه دكتور. حزن اندارت إلي تتأكد، هزيت راسي بقبول. رجعت دحگت له وهو كمل. أيهم: إنه أعالج أمچ لا تخافين. حزن: بس ما عدنه فلوس. أيهم: بدون فلوس أعالجها.

حزن فززت عيونها ما مصدقة، مصدومة، مستغربة. الأطفال اللي يقضون طفولتهم بالشارع هم أكثر أطفال ما يثقون بأي شخص. لو قَدم لهم أحد مساعدة رح يفكرون هوا. رح يتسائلون هواي، رح يحاولون يطلعون غلط. يخافون من الثقة ويخافون من الكسرة. أحد الأطفال اللي يعرفون هذا الشعور، أنا. مُلاذ: لا تخافين حزن، هسه تكدرين تفرحين لأن عمو خوش دكتور وهو اللي سوا عمليتي.

ابتسم أيهم يدحگلها. رجع نظره لحزن اللي نظراتها تحولت للفرح. صارت تسأله إذا صدق يحجي، ما مصدقة. شفت نظرات الكسرة بعيون أيهم لمن سألته حزن. حزن: عادي أحضنك عمو؟ ابتسم يدحگلها: طبعاً عادي.

گامت حضنته حيل وهي تبجي وأنا كاعدة ع الرصيف أدحگلهم. التموا الأطفال يمنا. گلنا لحزن تلعب وياهم. هزت راسها الفرحة غامرتها، الهم انزاح عنها. راحت تلعب وياهم وتكمز فرحانة عكس قبل شوي. گمت تمشيت شوي، كعدت بالجهة المقابلة الهم أدحگلهم وهم يلعبون وراي سياج. سندت نفسي عليه أدحگلهم، اجا أيهم كعد يمي. أيهم: منين تعرفينهم؟ مُلاذ: دائماً أشوفهم. أيهم: محد رح يكدر يفهمهم. مُلاذ: وجعهم وقلة حيلتهم ما رح يفهمها بس اللي مجربها.

أيهم: أهلهم وين؟ مُلاذ: بعضهم متوفين. بعضهم ذابين جهالهم هيج. أيهم: شعورهم صعب. مُلاذ: ماكو شعور أصعب من شعور الموت. لمن تفقد شخص عزيز عليك. قلة الحيلة ما رح تكدر تصدق ولا تتقبل. رح تتمنى بس تكدر ترجع عزيزك للحياة. كثرة الفقدان رح تغيم بالبرود ع گلبك. أيهم: الأطفال ما يستاهلون هيج يصير بيهم. مُلاذ: محد يستاهل أطفال أو كبار. الحياة تجبرنا ع أشياء تخلينا ننضج ونكبر.

نزلت راسي، لعبت بأصابعي. أيهم منتظر أكمل كلامي، رفعت راسي دحگت للسما، تنهدت، أردفت مكملة. مُلاذ: أنا جنت وحدة من هذول الأطفال. نزلت عيني لأيهم اللي عاگد حواجبه مستغرب. أيهم: شلون يعني؟ هزيت راسي برفض. فضة أفكاري: انسى مو مهم. رديت أكوم راد يلزم إيدي. بَعد إيده بسرعة. أيهم: سولفي مُلاذ لا تخافين مني أو مو مني بس لا تخافين من الثقة بيه.

درت بعيوني دحگت له. رجعت سندت راسي. رغم أبداً ما أسولف اللي عشته بس اجتني رغبة أحجي. نظري يتراوح ع الأطفال اللي يلعبون. مُلاذ: بعمر عشر سنوات. نزلت نظري للكاع، رفعت إيدي مسحت وجهي. كملت كلامي بعد ما رجعت سندت راسي. مُلاذ: توفى والدي، مات بحضني ع رجلي مات وهو ينطق الشهادة. ما أعرف لحد هاللحظة كل ما أتذكرته كل ما أتذكرت طريقة موته ترجع لي نفس القشعريرة وهوسة عقلي. ابتسمت تك خد وأنا الذكريات محفوظة بذاكرتي، ذكرى، ذكرى.

مُلاذ: أمي دخلت بصدمة. ملاك صغيرة عمرها سنة أو سنتين ما أعرف، جانت طفلة يلزمها عناية، يلزمها الحب والاهتمام هواي أشياء. وصية أبوي قبل لا يموت: ملاكه وفيروزته بأمانتي وأصون الأمانة. انداريت دحگت له وضحكت گلت وأنا أضحك بهدوء.

مُلاذ: أتخيل طفلة بعمر عشر سنوات بعدها ابتدائي ما مكملة اكو أمانة برگبتها. ما جنت أعرف الوصية شنو ولا الأمانة شنو. كل اللي فهمته أنا اليوم مسؤولة عن أهلي. أنا رح أصير أب وسند واخت وبنت لهم. أمي بصدمتها ما تطلع من الفراش. كل الوقت نايمة وتبجي. عمي غزوان مات ورا أبوي حسب ما گالوا من قهره. گعدوا لگوه ميت. ورا كم يوم من وفاة أبوي بيبي دخلت غيبوبة من صدمتها وحزنها. الكل احتار بيهم، نسونا أنا وملاك. حتى عمتي اللي هي أحن

شخص احتارت نسيت الدنيا وظلت تركض وتواسي. ما جان النا أحد ولازم ندفع أيجار ولازم نتسوك ولازم ملاك عدها حليب وحفاظات لازم عدها ملابس تدفيها ومكان دافي. كل هذا خلاني أطلع يوم أبيع ورد، يوم أبيع كلنس، يوم أشتري بطالة مي وأفتر أبيعهم. شفت أنواع وأشكال من الشارع. صارت بيه مصايب، تجسرت. صرت ما أخلي أحد يحاول يتقرب لي. كرهت البشر وكل شي. أمي كل ظنها أتاخر بدوامي بس أنا جنت لا أطلع وأشتغل وأبيع وأخلي فلوس بجيبي وأأمن حليب

ملاك وأكل لأمي لمن أرجع للبيت. اشتغلت بالمحلات بكل مكان، اشتغلت قريب السنتين هذا وضعي. أنا ربيت ملاك ما أكلك أمي ما جانت تتحرك. لا طبعاً جانت تحاول بس ينتهي بها المطاف وهي نايمة بالفراش. حرت واحتاريت، أتجنن ولا أحد يحاول يقرب من عندي ويخليني أتكئ عليه مستحيل. گبرت ملاك على إيدي واعتنيت بأمي لحد ما يوم رجعت من المدرسة واشتغلت ورحت للبيت. دخلت لگيت الكل ملمومين وناس تصيح وناس ترفع وناس تكبس. شايفيني وأنا أشتغل، راحوا

يگولون لأمي إسكندر اللي شايفني. أمي اتجننت. شلون أشتغل وأ شلون أبيع كلنس. بـ يومها بجت بجي محد باجي. ساعات هي تنحب وتبجي. هددوهـا بينا إذا ما رجعت لوعيها ووقفت ع رجليها ياخذونا أنا وملاك منها. اتعاركت وياهم وطردتهم. أنا تعلمت لازم يكون عندي كلمة، لازم أحط حد لكل شخص. سنين محد يدري بينا، ولمن شافوني أبيع ما خافوا عليّ، خافوا غيرهم يشوفني ويحجون عليهم. استمريت أشتغل جنت مثل طلقة تايهة. كل يوم زارفت لي گلب شخص وبالأخص

أمي طايشة ما أعرف شسوي وين أروح. شلون أحتوي ملاك وشلون أكبرها. وصية أبوي رنت كل ليلة بأذني حتى عن أمي ابتعدت. جنت خايفة، خايفة أتعلق بيها أكثر وأخسرها. حسيت أبوي بسببي مات. ما گدرت أكون الابنة البارة ولا گدرت أكون الأخت السند. المهم عندي أعيشهم، المهم يعيشون. جنت وبعدني نار تحرق اللي ياذي أهلي. جانت ناري تلسع بيه لأن أكثر أذيتهم مني. دموع أمي تنزل عليّ ومني.

جانوا الكل يسألوني: مُلاذ أنتِ ليش هيج؟ مُلاذ ليش ما تحبين الناس؟ مُلاذ ليش هذا الطيش؟ مُلاذ شوكت تعقلين؟ محد شاف مُلاذ محد عرف شنو بيها مُلاذ. محد سمع لـ مُلاذ محد انتبه لحيرتها... دحگت بعيون أيهم اللي يستمع إلي بتركيز. وجهه أحمر وعيونه رجيج الدموع بيها. دار وجهه ومسح عيونه بسرعة. انزعجت من نفسي لأن حجيت له. لكن منظر الأطفال گدامي أخذني لعالم ثاني. ابتسمت ورجعت شعري گلت متغاضية. مُلاذ: سطرت راسك مو؟

ابتسم ودحگ لي. هز راسك برفض. أيهم: إذا السطرة منچ قابلة. مُلاذ: خوش رح تنسطر هواي بعد. ابتسم وأردف، تحت نظرات ما گدرت أوصفها. أيهم: كل الهلا. مُلاذ: تأخرت كلش. أيهم: الأطفال راحوا. مُلاذ: أي انتبهت. گمت من مكاني نكثت ملابسي، وهو گام وياي ينكث بهدومه. أيهم: رح ترحين بالسيارة غير؟ مُلاذ: أي. أيهم: وين موكفتها؟ مُلاذ: هناك. أشرت له. أيهم: نمشي لها؟ لو ها ما تقبلين؟ أخاف أطلع مراقبچ لو أريد أخطفچ. انداريت له وقلصت عيوني.

مُلاذ: بلا شك أنت مراقبني. أيهم: شلون بسندرلهم. مُلاذ: شنو؟ أيهم: سندرله. مُلاذ: خالي اسمها سندريلا شني سندرله؟ أيهم: نفس الشي ثنينهن حذائهن ضاعت. وكضها الأمير ويركض وراهن. ي سندرله دوگفي يـ أم المروة، سندرله مسوية روحها خفاش الليل تركض وذاك الأغم يركض وراها. دگضها وأشمرها بالحذاء. شمالك هي أثول. مُلاذ: شنو يشمرها بالحذاء؟ أنا بمكان سندريلا أنبت الحذاء برأسه.

أيهم: عمي أنتِ مرندلة مو سندرله. هم زين ما گضوج وحطوج أميرهم. مُلاذ: عوووع. قلد عليّ وهو يگول: عوووع. ابتسمت وضحكنا. أيهم: أختي دوم تتابع وتگضني. أيهم إلا تتابع وياي ما عندي حل. أكعد أتابع. مُلاذ: عندك أخت؟ أيهم: أي. مُلاذ: الله يحفظها. ابتسم ودحگ لي. أيهم: ويحفظچ.

هزيت راسي ساكتة. صعدت بالسيارة أريد أروح. الدكتور ما قبل أوصله. رجعت للبيت. مرت الأيام أيهم ما شفته بعد ولا تصادفنا أساساً. ما اهتميت. بيوم صار شي مو بالحسبان. اتصلت عليّ نور بالليل تبكي. نور: مُلاذ. گمت من مكاني بسرعة. خفت وتوترت: شكووو؟ نور: مُلاذ بيبي... مُلاذ: شبيها؟ شهگت تبكي. مُلاذ: احجي شبيهاااا نورررر! نور: ما أعرف ما أعرف. اتخربطت اخذوها للمستشفى. مُلاذ: شنوووو موته؟ لا تخبليني!!!

گامت تبجي أكثر، سديت الاتصال منها. أدك عليهم محد يجاوب. رحت أب بدل ملابسي بسرعة وأنا أحط غراضي بالجنطة. أمي وملاك اخترعوا ع صوتي. أجن إلي بسرعة. أمي اجتني تمشي بالمشاية خايفة، مخروعة وما فاهمة شكو. فيروز: شكووو؟ مُلاذ: بيبي متخربطة كلش رايحت لها. أخذت جنطتي وأنا أمشي. أمي صاحت وراي. فيروز: خل أروح ويااج مُلاذ. مُلاذ: ما الحگ يمه أنا أتصل عليچ.

اقفلن الباب وراي وأنا أتصل لا تتصلن عليّ. طلعت بسرعة وأمي توصيني. صعدت السيارة اتصلت بنور متجاوب. شغلت سيارتي وحركت بسرعة. وصلت للمستشفى وأنا دايسة للسيارة بس أريد أوصل. اتصلت ع الباقين لحد ما جاوبني جسار گال هو هم بالمستشفى. اجاني بسرعة وأخذني من باب المستشفى. مُلاذ: شصايررر! جسار: واقعة فد مرة، صار لها هواي تعبانة. الدكتور حجيه ما يبشر بخير. لسا ما طلعوها ولا طلعوا.

شفتهم كدامي اتصنمت مكاني، جسار راح عليهم. گوه أخطي الخطوة. ما أريد أوصل ليمهم. خوف اتوسط صدري. الكل نظرات الانتظار والخوف بعيونهم تشرح وتعبر عن مدى حبهم لها. وصلت ليمهم، انفتحت الباب. طلعوا الدكاترة والممرضين واحد ورا الثاني. درت وجهي ناحية الغرفة، أدحگ. بلعت ريگي وأنا أدحگلها ع السدية. إيديها مرمية ع الجوانب، مغمضة عيونها. الضو متسلط عليها. بلغنا الدكتور بوفاتها. توالت أصوات الصراخ الرنانة دالة ع لوعة گلوبهم. صفرت أذاني. رفعت إيدي بهدوء حطيتها ع صدري. أحاول أتنفس گلت بصوت مشحرج، مصدوم.

مُلاذ: بيبي!!!