رواية جرح الأيهم الفصل التاسع عشر 19 - بقلم أيلان

مُلاذ: شلون يعني؟ ضرغام: مستحيل يكون هو. منتحر. الاحتمال الأكبر رئيسهم رسل شخص يقتلهم. مُلاذ: زين شلون المن حاطينهم بالسجن! شلون يكدرون يدخلون موس وأشياء حادة! ضرغام: مُلاذ، سجون العراق لا شيء!

مجرد اسم. أنا ضابط وأگولج هالشي. مجرد بهاي السجون يمنعون المجرمين من الخروج، وإلا همَ مستمرين بـ إجرامهم. أساساً شرف بمحاكمته انحكم بالإعدام. وعرضنا عليه نخفف عقوبته إذا اعترف على رئيسهم. وأكذب عليج إذا أگلج الفكرة ما دخلت عقله، بس لگيناه ميت. مُلاذ: و الحل ضرغام؟ و الحل! محد يعترف على رئيسهم وتالي! الچتال هسه مكمل حياته بكل اريحية. ضرغام: نلقاه. لابد نحصل ثغرة. مُلاذ: زين والمكان اللي كنا فيه؟ الملثمين؟ شصار عليهم؟

ضرغام: أحد حراس شرف كان يشتغل بالمكان اللي أنتِ بيهم. مُلاذ: أي؟ ضرغام: هو دلانا وخففنا من عقوبته. وأمنا بـ زنزانة وحدة وصديقنا حارسه. هو اللي يجيب الأكل ويودي له. بس ما يعرف رئيسهم. مُلاذ: واللي بداخل المكان شصار عليهم؟ ضرغام: نقلناهم للمستشفى. وبعضهم ما تحملوا ولقيناهم ميتين. والبعض الآخر هسه عايشين. ورجعوا لـ أماكنهم. مُلاذ. مُلاذ: الحمدلله. ها؟ ضرغام: تدرين أنتِ أنقذتيهم؟ مُلاذ: ما أنقذت أحد. مجرد حالفني الحظ.

ضرغام: لا مُلاذ، لا. هواي قبلج شردوا. بس محد كدر ينقذ هذوله الناس. بخروجج أنتِ وملاحظاتج وكلامج ووصفج كدرنا نوصل الهم وكدرنا نقبض عليهم. تدرين شغله؟ صحيح الوضع اللي كنتي فيه صعب والله لا يعيدها، بس... مُلاذ: بس شنو؟ ضرغام: الناس اللي هناك يحمدون ربهم لأن كنتي وياهم وكدرتي تطلعينهم. ممكن رب العالمين أرسلج الهم. نجاة على هيئة بَشر. ابتسمت ساكتة. ما دام صمتي إلا لثواني ورجعت أروي فضولي. مُلاذ: اللي بالملهى؟

ضرغام: شبيهم؟ مُلاذ: اكو وحدة اسمها أسـاور. شصار عليها؟ ضرغام: ما خلينا واحد. كلهم ألقينا القبض عليهم. مُلاذ: ضرغام، أسـاور عدها أطفال. وهناك هي كانت فقط تمكيج. ضرغام: بس مجرمة وياهم مُلاذ! تعرف بـ سوالف شرف وسكتت عنها. مُلاذ: مالها ذنب والله خطية. هي باوع صحيح كان لازم تشك شرف. بس مالها ذنب؟ عدها أطفال. ضرغام: بالمحكمة يحددون مصيره. سكتت. نزل رأسه ضرغام. فرك وجهه. صفن ثواني وأردف. ضرغام: يلا أنا أروح.

مُلاذ: تمام. بس لا تنسى موضوع الدكتور وأركان. ضرغام: لا تخافين. سهلة إن شاء الله. هزيت رأسي وهو ودعني وطلع. نزلت نفسي متمددة. خليت راسي على المخدة. صفنت أفكر بـ كلام ضرغام. فعلاً ممكن أنا عشت أشياء صعبة وتأذيت هواي وتعذبت. بس ناس ثانية كدروا هسه يرتاحون ويرجعون لـ أماكنهم.

قاطع تفكيري دخول أمي واتبعوها خالة جنات وغادة وجسار. حذرتهم يدخلون إسكندر للغرفة وما أريد أشوفه. وهكذا مرت الأيام. المفروض يومين و٣ وأطلع من المستشفى. لكن بقيت أسبوع. وسوولي فحوصات وتحاليل. طلع عندي جرثومة بالمعدة والتهابات. من الملل خليتهم يكعدوني على الكرسي المتحرك اللي جابه لي الدكتور وعرضت على أمي نتسابق. خليتها تدك وتلطم. مُلاذ: يلا فيروز منا للباب. فيروز: ولج يمه مخبلة أنتِ؟ مُلاذ: فيروووز، هسه خل نتونس شبيج.

غادة: هههههه والله مو صاحية. جسار: خالة بيش توحمتي على هاي؟ انفتحت باب الغرفة. دخل عزيز بـ إيده أكل. صاح وهو بالباب: وينها ملكة الجنان؟ وهاجاني وراه صوت سلطان. سلطان: ملكة المخابيل. التلفزيون القديم. وأنا كاعدة على الكرسي. مشيت عجلات مالته بـ إيديه. أخذت مخدتي اللي على السرير. شمرتهم بيها وهم يضحكون. مُلاذ: انتوا عجبتكم سالفة المستشفى؟ سلطان: عزيز صارله شهر ينشر المغذي مالتج والناس تتحمدله بالسلامة.

مُلاذ: ياااا. عمي زين من ما نشرت روحك ع السدية. حك أرنبة خشمه سلطان وانفجر بالضحك وعزيز يدحگله بـ تك عين. مُلاذ: ها؟ بس لا نشرت هيج؟ خو إسكندر كل شي أتوقع منك. عزيز: انجب. سلطان: نشر روحه ع السدية. كاتب سوولي عملية قلب. كاتبته بالتعليقات: شو راوينا الخياط. يگلي ما أقدر. رجعت رديت عليه گلتله ليش سوو العملية بـ ط*** والناس يردون عليه بـ ضحكات. بندنا من الضحك على تعابير عزيز وسلطان يصنف عليه وعزيز معاجبهم.

مُلاذ: حييييل وياك. عزيز: ملكة الجنان. هاي حتى أنتِ هيج تكليلي. غادة: عزوز اذا نسيت أذكرك. عزيز: حتى أنتِ؟ ضحكت غادة وهي تغص بالضحك. انداريت لأمي. مُلاذ: فيرووووز خنستي و الله ما أعوفج. فيروز: ولج مُلاذ. سلطان: هاي شتريد التلفزيون القديم؟ مُلاذ: سلطااان ابو لحية مكناسة. سلطان: انجبي وعوفي لحيتي تسواج. مُلاذ: دولي جنها مكناسة. ركصت الهم حواجبي وگلت. مُلاذ: تصوووويت. جسار: دخيلك ربّي.

مُلاذ: منو يصوت نلعب أنا وأمي سباق بالكراسي منا للباب. اللي توصل أول تفوز. منو يريد نلعب يرفع إيده؟ كلياتهم رفعوا إيديهم عدا خالة جنات وهم يضحكون ويشجعون الفكرة. أمي تدحگلي بـ قلة حيلة. ركصتلها حواجب. مُلاذ: يلا فيرووز.

جبرتها. صارت كراسينا يم بعض وسلطان يعد لنا لحد ما گال "3". انطلقنا أنا وأمي للباب فحطانين من الضحك. عبرتها وفازت وهي تضحك. ابتسمت على ضحكتها وعدناها مرتين. مرة هي فازت مرة أنا. ويصيحون بـ حماس ويشجعون. بالمرة الثالثة واحنا نتسابق انفتح الباب وأنا قريبة عليه حيل. رفعت عيوني دحگت للدكتور. مُلاذ: دكتور؟ لابس كمامة ومدري شنو فوك راسه. بس عيونه مبينة. دحگ بالغرفة رجع دحگلي. أيهم: لازم نفتح الخياط.

انداريت دحگت لـ أهلي. رجعت درت وجهي اله. مُلاذ: تمام. أخذوني لغرفة يفتحون الخياط وأمي هم اجت وياي. الباقين بقوا بالغرفة. جسار وكف برا خارج الغرفة. أجاني الدكتور يريد يرفع تشيرتي ويفتح الخياط. جلبت بملابسي. جارتهن لـ جوا ما أخلي يرفعهن. أيهم: خل أفتح الخياط بسرعة! مُلاذ: دكتور لا دكتور شني تشوف بطنيييي! أيهم: يابه إنه اللي سويت العملية. مُلاذ: ماااااااا. فيروز: ولج يمه خل يفك الخياط. مُلاذ: مااااا.

أيهم: أسيل، عبير كضوهـا. رفعت راسي أدحك وأدور بوجهي. ما فاهمه. وجان يلزمني ممرضتين. وحدة من رجليه والثانية من إيديه. وأنا أحرك بـ نفسي ما أثبت. مُلاذ: دكتووور ولك عوف بطني. ولج يمااااااا تعالي حاچي. ثبتني وغمض عيونه ودار وجهه. غطى بطني بالغطى، خلا بس الخياطات ظاهرة. أيهم: اسكتي يلا كافي. مُلاذ: والخياط الثاااني شون تفتحه؟ أيهم: إنه أسوي ما عليج بس اهجد. ياجت أمي يمي تصبر بيه وتسكتني. يكعد الدكتور يفتح بالخياط.

مُلاذ: دكتوررر هسه شبيك ع كيفك؟ هي هيج يفتحون الخياط. أيهم: چا شلون يسوونه؟؟ مُلاذ: غير أنت الدكتور شمدرين؟ يرفع عينه دحگلي. أيهم: شلون بينا وي أم شعر؟ مُلاذ: وشبيها أم شعرر؟ دنك الي وهمس يم أذاني. أيهم: ما بيها. تم. رفعت عيوني أدحگله وأخوزر بي وهو لابس كمامة. عيونه صارت بـ عيوني كم لحظة ورجع يكمل شغله. مُلاذ: ليش لابس كمامة؟ أيهم: أفضل. مُلاذ: ليش أفضل؟ رفع عينه يدحك مثل اللي تذكر شيكول. تعابير وجهه بـ انزعاج.

أيهم: أفضل. ما اهتميت. درت وجهي عنه. فتح الخياط وراح ع الخياط الثاني. كشولت ملامحي متوجعة من فتح الخياط. درت وجهي اله لمن سأل. أيهم: شجنتي تسوين لمن دخلت الغرفة؟ مُلاذ: نلعب أنا وأمي سباق. مادام هي عدها كرسي وأنا عندي كرسي. وضحت عيونه ابتسامته. أمي ما تسمعنا لأن نحجي بصوت ناصي. أيهم: منو فاز؟ مُلاذ: أنا مرتين وأمي مرة. أيهم: عفيه. مُلاذ: عليك. فتح الخياطات. اتنهد گال بـ نبرة واضح بيها الحزن. أيهم: رح تطلعين باجر منا.

مُلاذ: اخيراً. هز رأسه ورفع عيونه يدحك للسكف. رجع دنك يمي گال بصوت شبه مخنوك. أيهم: لا تنسيني زين؟ عگدت حواجبي ما فاهمه. كام من يمي بسرعة گال وهو يمشي. أيهم: الحمدلله ع السلامة. فيروز: الله يسلمك. حتى ما استمع لـ جواب أمي عدل. ترك الغرفة وطلع وسد الباب. ظليت أدحك وراه. نظري يدور بـ أنحاء الغرفة. والاستغراب واضح على تعابير وجهي. گمت كعدت بـ خفة. غطيت بطني.

من بعد هذا اليوم طلعت من المستشفى. تركنا بيتنا القديم لأن ممكن يكون مراقب. دور النا جسار على بيت وبهالفترة بقينا احنا كاعدين بـ بيت غادة. بعد ما ارتحت كم يوم بديت أسمع أحجي من الأقارب، وبالأخص من أهل إسكندر. عن موضوع خطفنا وإنو احنا مغتصبينا. هالكلام دمر ملاك. لمن سألوها ودمر أعصابها. ورغم بعدني ما متشافة تماماً. لكن ما كدرت أسكت! عمامي ونسوانهم وعمتي عُلا كلهم كانوا مصرين على روحتنا للفحص! اتخبلت وتهسترت.

مُلاذ: انتوا شدتحجووووون !!!! من كل عقلكممم لو على كص ركبتي ما أروح. أنا وملاك نعرف كلش زين شنو عشنااا. أنا ما سمحت لـ أي شخص يتقرب النا! تجون هسه انتوا تحجون من كيفكم. محمد: يا عمي جفي شر المشاكل وامشن سون هالفحص. مُلاذ: لووووو أموت. الحجية: محمد راح أكوم أطيح حظك. هاي عود أنت الجبير. فيروز: بناتي ومسؤوليتهن عليّ. محد له حق يسوي هيج. أحمد: يابه واحد ياخذ حذره!! عليمن خايفة إذا ما صاير شيم؟

مُلاذ: ما خااايفه بس مو من حقكم. مو من حقكم تخلوني أنا وملاك هيج يصير بينااا. عُلا: مُلاذ بعدين وكت الصدك تظلين حايرة. فيروز: عُلااا! شتحجين أنتِ؟ منو تظل حايرة؟ يا حسافة والله إلياس جان مخليج بـ عينه أكثر من كل خواته. تالي تتهمين بنته بهالكلام!! منارس: البنات ما مسويلهم شي. ما دام هن ما قابلات ما يصير هالشي. إسكندر: خل نروح ونشووف. لو يخااااافون. مُلاذ: أنت صوتك لا يطلع. أنت اكطعععع حسك.

علياء: لو ما لاعبين بيج لعبة جان ما حجيتي هيج. هجمت عليها وعمتي لزمتني. مُلاذ: لج أنتِ شتخرطييييييين. الحجية: نعاللل علياء صمي حلگج. فيروز: انتوا بـ أي حق داخلين هنا وتفرضون رأيكم علينا وتتهمونا! محمد: مُلاذ اذا ما سويتوا الفحص نزوجكم لواحد من ولد العشيرة. وسعت عيوني عليه. مُلاذ: ما اسووووي الفحص. ولا أتزوج واحد لو تذبحوني هنا. محمد: بنتي مستحيل. ما مسوين الكم شي مستحييييييييل! مُلاذ: لا تگلي بنتي أولاً!

ثانياً مستحيل ما مسوين النا شي مو؟ محمد: أي مستحيل. وين رح تكدريلهم أنتِ! ألف زلمه هناااك ما معقول كلامج؟! سلطان: يابه كافي خريطي يرحم والديكم. صارلي ساعة صافن وساكت. أريد أشوفكم وين توصلون. طلعن من حلك الموت وما عولنا يطلعن. تجون تسفطون من يمكم!! مُلاذ: خلص راح أسوي الفحص. فيروز: مُلاذ! مُلاذ: يمه، اوكفي. كملت كلامي و أنا رافعة إصبعي أحذرهم.

مُلاذ: وجهكم بعد ما أشوفه ورا الفحص. لا الكم علاقة بينا ولا النا علاقة بيكم. بس أنا أسوي الفحص ملاك ما تدخلونه. محمد: تهددينا هسه أنتِ! مُلاذ: لا، بس ابعد من محيطنا. كلمن مابي خير حتى نعرف منو صاحبنا بـ وكت ضيگنا. محمد: هاهيه عمي بس... اذا الفحص يعاكس كلامج نزوجج من ولد العشيرة. إسكندر: أنا أتزوجهـا. درت راسي اله. دحگت هزت راسي بالموافقة. طردهم سلطان وغادة صفت وياه وطردتهم. غادة: مُلاذ، مُلاذ ما مجبورة تثبتين شيم.

مُلاذ: ما رح أثبت. راح أكسر عينهم. وبالأخص إسكندر راح أكسر راسهم. مرت الأيام. أمي ما راضية. بس حسمت قراري. راح أفكس عيونهم. وبالأخص إسكندر راح أكسر راسهم. أجا اليوم اللي رحت بيه للدكتورة. والكل متجمهر گدام الباب.

أبشع شعور ممكن الإنسان يعيشه. أهلك المنك وبـيك يشمروك برسط النار. لا لي ذنب ولا ارتكبت غلط. طلعت من حلك الموت گدام عينهم. بس ذبوني بـ موت سكتاوي. يسلب روحي بـ كل هدوء من دون حس. عيني ع السقف الأفكار تتجمد بـ عقلي. الدكتورة كشفت عليّ، عجزت أوصف شعوري. الموت جان أرحم الي من هاللحظة. بلعت ريكي وعيني ع السقف. گلبي نار تسعر بي. رفعت راسها بعد مدة الدكتورة. گمت گعدت على حيلي. الدكتورة: ما أكول غير الله يساعدج عليه.

معافتني وطلعت بلغتهم بـ أنو أنا بعدني "عذراء". طلعت وراها دحگت بوجههم. ما أكذب إذا گلت اكو نطفة فرح بوجههم. كانت تعابيرهم تصرخ بـ الخيبة. مُلاذ: وجهكم بعد ما أشوفه. عتبة الباب ما تتخطوها. شمرتوني بـ نار بس الله يعلم شلون تلسع الواحد وتلچم گلبه. إلياس لو شافكم اليوم بهالوضع جان گتل روحه. لـ هنا انتهى كل حجي بيني و بينكم. مواقفكم سولفت الي داخلكم. أنا طالعة منا. بس ما أبريكم الذمة. لا أنا ولا ملاك. منا لـ يوم الدين.

حجيتها وروحي محروگها. أجبر الكلمة تطلع من حلگي. سحبت كرسي أمي ومشيت بيها. اتبعني خطوات أهلي اللي كانوا واثقين مني. أما اللي جوا فـ هم لا شيء سوى "حثالة". رجعنا للبيت. رحت على الفراش. غطيت بـ وجعي وغصت بي. غركت بنص الوجع وبـ داخلي متحطمة. گمت من مكاني فركت صدري حيل. بطني توجعني دمرتني من الوجع. گمت طلعت للحديقة. إيدي على بطني وأمشي. گوه أجر النفس والقهر خانگني خنك.

رجعت دخلت للبيت. حاولت أنام. لمن غفيت الجثة ما فارقت منامي. الريس ما غادر من كوابيسي. الملهى، النظرات، الضحك، أصوات الرصاص. الزناجل والزنزانات، جدران مصخمة ضوء يرمش. أبوي ما غادروا كوابيسي. كل يوم وكل ليلة تراود بـ منامي. نفس الرعب ما گدرت أنسى. بالعكس. مخاوفي توسطت أحلامي. مانعتني من النسيان. كم لبثت وركضت بـ هذي الكوابيس. لمن فزيت منها كان العرق يتصبب من گصتي. فزيت من كابوس الجثة اللي أشوفها بكل مكان.

على صوت الصريخ العالي يصدر من ملاك. رحت لغرفتها دحگت الها تبجي. تضرب راسها بـ إيديها وتملخ شعرها. ركضت ناحيتها جريتها لـ حضني. أهدئها وألامها على صدري. رفعت إيدي على شعرها أمسح عليه. حاوطتها تك إيد. سويت مساج لـ صدرها. غادة وصافي والكل التم بالغرفة. مُلاذ: اشش اش اهدي. هاي أنا مُلاذ. ملاك. ملاك: خطفووونا. موت أطفال ماتت. مُلاذ: لا ما خطفونا. رجعنا. رجعنا هاي يم أمنا إحنا. بنات إلياس وفيروز. تگولين نسيتي؟ إحنا منو؟

ها ملاك؟ إحنا بنات منو؟ گالت بصوت يناشغ. تتغصغص الكلمة گوه تطلع من حلگها. ملاك: بنات إلياس. مُلاذ: ومنو؟ ملاك: وفيروز. مُلاذ: إحنا وين؟ دحگت بـ أطراف الغرفة. جاوبت نيابة عنها. مُلاذ: إحنا ببيت خالة جنات. مو صحيح؟ اتذكرتي؟ صفنت ثواني وهزت راسها بـ قبول. مُلاذ: هسه إحنا بـ أمان. محد يكدر يسوي النا شي بعد. اندارت الي. ملاك: أبد؟ مُلاذ: أبد. ملاك: ما يضربونج؟ مُلاذ: لا. ملاك: ما يبيعونا؟ مُلاذ: لا. ملاك: أمي يمنا؟

مُلاذ: أي يمنا. هزت راسها والمناشغ بـ صوتها. حضنتها لـ صدري أقوى. مُلاذ: نكوم ننام؟

ما جاوبت. رفعتها عن الكاع بصعوبة. نومتها على مكانها ونمت بـ صفها. ظليت يمها أمسح على شعرها. كل شوي تفز وأهديها وترد تنام. لحد ما غفت تماماً والكل متواجد. وأسمع صوت أمي من الصالة. تريد تجينا بس ما تكدر تكوم. ابتعدت من يم ملاك بـ هدوء. غطيتها زين وگمت رحت للصالة. گعدت على القنفة فركت وجهي. وخليت إيديه على محاجر عيوني. أمي تون لأن ما تكدر تكوم. فيروز: شبيكم؟؟ مُلاذ: ملاك مثل كل يوم.

ظلت ساكتة وإيدها على عيونها وتبجي. ضربت على رجليها حيل بـ إيديها. فيروز: ذني الما گدر أمشي عليهنننن. استمرت تضرب رجليها حيل. صحت معترضة على فعلها. مُلاذ: لااااا لا تضربين نفسج. جريت إيديها ثبتتهم بـ إيديه. مُلاذ: رح نبدي بالعلاج وترجعين تمشين. لا تخافين تمشين بعدين وأحسن من قبل. بقت تبجي حضنتها لـ صدري. أمسح على ظهرها لحد ما سكتت. فيروز: أريد أشوف ملاك. مُلاذ: نامت. فيروز: أي بس أريد أروح يمها.

هزيت راسي بـ قبول. كومناها كعدناها ع الكرسي. أخذتها خالة جنات للغرفة مال ملاك. دحگت لـ صافي اللي قاعدة وتدحگلي. صافيناز: مُلاذ. مُلاذ: گولي صافي. صافيناز: بعرف مو الوقت المناسب. بس أنا كثير اشتقت لـ أهلي. مابدي أحكيك بهالموضوع وانتِ بـ هيك وقت صعب. بس... قاطعتها. مُلاذ: ما ناسيتج أنا وطبعاً رح نشوف أهلچ. بس أول شي أريد أعرف كل شي صار من بعد ما أخذوج من يم ملاك.

هزت راسها بـ قبول. حطت إيديها على وجهها ضغطت على محاجر عيونها وبجت. غادة: أنا أعوفكم براحتكم. هزت راسها بـ نفي صافيناز. صافيناز: لا ابقي ابقي. يرجع كعدت غادة بـ هدوء. شبكت إيديه بـ بعضهم متتظرة صافي. صافيناز: من بعد ما أخذوني من جنبهم. يعني من المكان اللي حبسونا فيه. أخذني الملثم ورماني عند رجل واحد. ما عرفت شو بدهم مني. عطاهم مصاري كثير. بكيت واتجننت. ما بدي روح وخدروني وأخذوني. غصت بـ بجيها وكملت.

صافيناز: اغتصبني. ما كنت حتى أقدر أقوم. واهتموا انتظرت أخرج من هُنيك وما تركني. صار مجنون فيني. هو يقول هيك. بكل أوقاتي جنبي. ويحكي معي. ويجبرني على أشياء ما بدي اياها. كان يقول هو بـ يحبني. حاولت أهرب ما تركني. كنت أنام ولما أفيظ ألقاه جنبي. وبـ يحذر الحراس يلمسوني. بـ ياخذني للملاهي ويقعدني جنبو. وهو يتطلع بـ البنات اللي يرقصوا. لما يشوفني ما أغار ولا بحبو يجن. ولما نرجع يسوي كثير أشياء تأذيني. وباليوم اللي لقيتيني

فيه أخذني هو لـ ملهى وخلاني أجلس جنبو. وأتطلع هوَ بـ واحد كان يتطلع لي. قام ضربوا وأخذني لـ غرفة وهو سكران. رفع سلاحو وبدو يقتلني. كثير توسلت فيه يتركني بس ما تركني. وأطلق عَليّ وراح. وأنا متأكدة عم يدور عَليّ. لما رماني كان من دون وعي. لانو ما كان بدو يقتلني أبداً. كم مرة ضربني. قام خلا السيجارة بـ إيدو.

ظليت صافنة وهي تسولف ودموعها تصب. دحگت لـ غادة فاتحة حلكها وتدحگلنا. مُلاذ: تمام. انسي هذا. راح نحاول نلقا أهلج. بس حاجيني معقولة ما تذكرين مكانكم؟ أي شي؟ صافيناز: ما بعرف اسم المناطق هون. مُلاذ: رقمهم ما حافظته؟ صافيناز: بتذكر رقم ماما بس. مُلاذ: زين لعد نحاول نتصل بيهم. صافيناز: يلاا خلينا نتصل. مُلاذ: مو هسه الصبح. هزت راسها بـ قبول. غادة: يمه گلبي رح يطگ. شلون تحملتوا؟!!

مُلاذ: تتحملين مجبورة. أنتِ تتحملين. أنا لو ما إيدي والكفخة وأرافس وأعيط وشكو شي أحصله أضرب بي. جان هسه أنا هم مغتصبيني. صافيناز: بس أنا كثير حاولت أدفع. وما بعد عني ولا تركني. مُلاذ: يا تدفعينه بابا. إذا ما تدفرينه وتضربي ما يوخر منج. أنا روحي طلعت. شفت الموت بـ عيني. قويت نفسي ورفعت رجلي ضربت شرف. خليته يصرخ. ألف مرة ضربته. انتهت هالليلة وكلّمن قام لـ مكانه. بعد كم يوم اجاني ضرغام.

ضرغام: دورت الج على أركان. واللي عرفته أبو أركان ما ميت! مُلاذ: شنووو؟ فرك وجهه رفع راسه وكمل. ضرغام: أبو أركان مطعون بـ ظهره. ماكو أي دليل على موته. عرفت المستشفى اللي أخذوه الها. كان مطعون بـ ظهره بس ما مات. لمن صحى اشتكى على أركان. يعني اشتكى على ابنه. مُلاذ: شلوون عرفت؟؟ ضرغام: اتبعت الموضوع وسألت وأصدقائي اللي كان يحققون وياه. عرفت منهم وشفت أركان. واللي عرفته هم أبو أركان طالع من المستشفى ورايح للسجن.

لمن التقيت بـ أركان بـ صعوبة يلا رضى يحجيه. وگلي أبوه جاي للسجن مهدده بـ أمه. گائل اله: ما رح تلكى اثر عنهم. من ذاك اليوم لـ هذا اليوم أهل أركان وأبو أركان مختفيين. وسعت عيوني مصدومة. مُلاذ: يعني؟؟ ضرغام: يعني أبوهم ضيع أركان عنهم. ومن الممكن قنعهم يروحون يشوفون أركان. بس بالحقيقة وداهم لـ مكان ثاني. غرست إيدي بـ شعري. مُلاذ: زين شراح يصير على أركان؟؟ شگد انحكم؟

ضرغام: لأن أركان ما گايل سبب طعن أبوه. وصل حكمه لـ أكثر من خمس سنوات. لأن تعتبر جريمة عمداً. مُلاذ: زين وبهالحالة شلون تخفف عقوبته؟؟ ضرغام: لازم واحد من الشاهدين ع الجريمة يعترف ويحاول يساعد أركان ويكون اكو دليل. مُلاذ: وهذا الواحد نور. ضرغام: بالضبط. بس نور ذكرت. اكو شخص ثاني كان وي أركان. راح أدور عليه وأحاول أتواصل وياه ويشهد لصالح أركان حتى تخفف عقوبته. وطبعاً أنا هم راح أحاول بالعرف والناس.

مُلاذ: شكراً ضرغام. والله ما أدري شحجي. بس لازم أركان يطلع ولازم نلكا أهله. أركان ويانا من الطفولة ونعتبره باعتبار أخونه. هز رأسه بـ قبول. ضرغام: إن شاء الله رح أحاول. وإن شاء الله يطلع.

هزيت رأسي وبعد فترة ودعني وراح. مرت الأيام. لكينا بيت وشلنا اله. وطبعاً استمر الكلام من قبل الناس عن أنو أنا وملاك مستحيل ما اغتصبنا. رغم الدكتورة گالت الهم بعظمة لسانه. بس ما نفع. وگالوا اتفقت ويا الدكتورة. ردعتهم وكملت طريقي بلا اهتمام الهم. ملاك طول هالفترة ما تحسن وضعه. بالعكس انتكست أكثر. وأنا الكوابيس ما فارقتني.

صافيناز اتصلنا على رقم أمها. والصدمة كانت لمن عرفنا أمها ميتة. من قهرها اتمرضت وماتت. بس أبو صافيناز وحدة. اتحطمت صافيناز. بس مع ذلك كان عدها نتفة من الفرح. لأن لگت أبوها. اخذناها أنا وعزيز. سلمناها لـ أبوها. كان لقاء مليء بالمشاعر. والاثنين يبجون ومتلهفين ومشتاقين لـ بعض. طلعتهم من البيت اللي كانوا بيه. وأجروا بيت ثاني وكعدوا بي.

إسكندر حذرته ما أريد أشوف وجهه. لكن هم لكيته كل يوم بوجهي وين ما أطلع. ووين ما أروح. رجعت أكمل بالكُلية. ملاك عرضتها على دكتور نفسي. وأمي بدت بالعلاج الطبيعي. صرنا نروح أنا وياها الدكتورة اللي رحنا الها. كانت دكتورة زينة. وتدريجياً أمي بدت تتحسن. طبعاً مو من أول مرة. بس بالصبر والمحاولة. أنا جنت أساعدها بالبيت وأحاول أسويلها نفس الأشياء اللي تسويهن دكتورتها. تعبت هواي وتأذت. بس ما خليتها تترك العلاج وضغطت عليها.

واستمرت وياها علاج بالبيت وعلاج يم الدكتورة. ملاك استمرت على حالها. وعرضتها على دكتور ثاني ودكتور ثالث. لحد ما لقينا دكتورة طاحت على علتها. وبقت تتعالج يمها. أما أنا. مجرد رجعت للـ كلية ورجعت أدرس. أخذت سيارتي اللي بيبي چانت مخليتها بالگراج والسويج يمها. نظفتها وعبيتها بانزين ورجعت أسوق. بس ناسيه أشياء بالسياقة ورجعت أتعلم.

هكذا مرت فترة طويلة من حياتي. تعبر الـ ٥ أشهر. رجعت ملاك لـ مدرستها. وحاولت أكمل حياتنا ونمشيها من حيث ما توقفت. بس كوابيسي استمرت وأحياناً جنت ما أنام. بعد ما كعدنا بالبيت الجديد. جنت لمن أطلع أذب الزبل أو أداوم وأطلع لـ مكان أحس اكو شخص واكف ويراقبنا. ما اهتميت گلت يمكن غلطانة وأتوهم. بس هواي جنت أحس هيج. وحتى بالجامعة أو بـ أي مكان ثاني. على طول هاي الأشهر أنا جنت حاسة ومو مرتاحة.

بيوم بالليل طلعت أذب الزبل. حسيت اكو حركة قريبة. دحگت للبيت القدامنا تحت الشجرة. لمحت شخص انطاني ظهره ومشى. وعلى راسه كلاو القمصلة. دوم ألمحه بس ما أشوف شكله. ما تحملت أبقى مكاني ركضت ولحقته. مُلاذ: أنت، الوووو؟ منو أنت؟ دحك هَييسرع مشيه وأنا وراه أصيح. والدنيا ظلمة. مُلاذ: الووووو اطرش أنت؟ ترا شفتك أكثر من مرة گدام بيتنا وبدوامي وبكل مكان أروح اله! شتريد؟

اتوقف مكانه. مشيت بسرعة. صرت گدامه على راسه الكبوس. الضويات فوگ راسه شكله ما واضح. نظراتي ينقري بيها التساؤل. مُلاذ: منو أنت؟ رفع راسه أكثر. رجع كلاو القمصلة لـ ورا بس ما نزعه. إيديه بـ جيوب القمصلة. وسعت عيوني عليه أدحك بـ عيونه. همست مصدومة. مُلاذ: أيهم! أيهم: جَرحه؟ يتبع ...