رواية جرح الأيهم الفصل الأول 1 - بقلم أيلان

في بعض الأحيان تمتلئ الأرواح بالجروح، إن كنت زجاج فإما أن تخدش أو تُخدش، في أحيان أخرى يحدث كلاهما معاً، تُجرح وتُجرح لغاية أرادتها الحياة، تلك الغاية أن تأخذ درس، جيد أم سيء؟ الطريق واحد ونهايته أن "تتعلم". تُجرح الروح وليس لهذا الجرح طبيب يشفيه أو دواء يعالجه. بَـغداد عام 1993/9/4 في أحد المنازل الساعة 11:30 ليلاً صرخت صرخة وجع تنهش بجسمي. القابلة: ادفعي. عصرت نفسي وعصرت أعصابي وصرخت.

التفتت أضحك لعمتي التي تمسح على يدي، تحولت يدها على شعري تمسده. عمتي: يلا حبيبة، ادفعي الجاهل. كضبت الفراش وشددت أصابعي عليه. تتصبب قطرات العرق من كصتي وتسير على رگبتي، تختلط بدموعي. همست أناجي: -يا علي، يا علي، يا علي. يدي على الفراش عصرته عصر. شلت راسي من الوجع وركعت روحي بالمخدة، بحلگي خاولي ملفوف. استمرت القابلة تصيح علي بعصبية. وأنا روحي فارت: -إلياسسس وينننن!

عمتي: هسه يجي، هسه، بس يلا قوي روحچ، يلا بنيتي، يلا يمه. همست عمتي بآيات وأدعية فوق راسي. تسكن روحي دقائق من أدعيتها وأرجع أتألم. صرخت إلياس بصوت عالي كأنني أناجي. القابلة: راس المصكوع طلع. رخيت جسمي، حسيت روحي تتنفس الصعداء. رفعت نظري الذي يتشوش، غمضت، عصرت عيوني بوجع من الضوء. فتحت عيوني مرة ثانية. دحگت لعمتي، نظراتها تبث القلق. قامت من يمي، تقدمت على القابلة. رجعت أدحگ القابلة. ساكتة وبيدها الطفل تباوع له.

تصبب العرق من كصتي وأطرافي التي ترجف. بلعت ريكي أرطب بلعومي المشخط: -بنيه لو ولد؟ ليش ما يبجي؟ عمه؟ نطقت عمتي بملامح باهتة ووجهها شاحب. عمتي: بنيه. ابتسمت وضحكت، بس ليش ما فرحانين! القابلة تتهامس وي عمتي. عقدت حواجبي مستغربة. قلبت القابلة الطفلة على يدها ودكت على ظهرها. الطفلة مالها حس ولا صوت. ليش تدك على ظهرها وليش ما تبجي وليش هم خايفين. روحي رايحة: -شبيها؟ دحگتلي عمتي بعيون حمر. رجعت دحگت بالقابلة والطفلة.

-عمه بنتي ليش مدتبجيي!! أخذت عمتي الطفلة وضربت على ظهرها. وهي صغيرة حيللل بگد جف الإيد. القابلة رجعت اخذتها ونومتها على رجلها وتضغط على صدرها بإصبعها الإبهام. عيوني تراقبهم. التفتت الها عمتي وهزت القابلة رأسها بيأس. دمعت عيوني. -عمه بنتي شبيها؟ باوعتلي بنظرات حزن وقهر. على وشك أفقد وعيي بس مقاومة. ضمّتها لصدرها القابلة ولفّتها بمنشفة بيضة. -حاچوووني. أجر النفس بصعوبة وروحي مشتعلة نار. صار وجه عمتي أحمر وعيونها دمعت.

نطقت بحزن: -طير من طيور الجنة إن شاء الله. باوعتلها بصدمة: -شنوو! اجت ليمي تهدأني وتحاول تثبتني. وأنا تجننت أتوسل يخلّوها تبجي بس خل تعيش. فجأة وأنا أتوسل بيهم، رن، رن صوت صريخها وبجيها. فزّت دموعي بفرح. بجيت فرحانة متلهفة للصوت. رنات صريخها وعمرها اللي كم ثانية، أتخيل فرحة إلياس بيها. نسيت كل وجعي، نسيت كل شي واكتفيت بدموع الفرحة. هلهلت عمتي والقابلة فرحانات. انولدتي يا قرة عيني الأولى، يا لذة إلياس.

غمضت عيوني، عضيت شفتي على صوت بجيها وأضحك. سكنت روحي وهدأت. ابتسمت بتعب، يتردد بداخلي الحمد والشكر لرب العالمين. قربتها القابلة مني وعلت ثغرها ابتسامة: -تتربى بعزكم. ضحكت ورفعت إيديه أخذتها من القابلة. شفتها بخير والهم انزاح عني. خليتها على صدري، الهث وأضحك بخفوت. مع كامل الأسف.. مع كامل الأسف! ما جنت أعرف..

الطفلة اللي عمرها كم دقيقة الآن على صدري نايمتها ومحتضنتها بروحي، وعيوني اللي بكت بفرح لولادتها بسلامة، راح يجي يوم من الأيام وتشوف عذاب الدنيا، تنضج وتكبر بعمر مفروض تكون فيه طفلة وعيوني وقتها راح تبكي قهر وحزن عليها.. غمضت عيني باستسلام. وتفززت مسامعي على صوت مليان فرح وسعادة. همس بصوت مرتجف: إلياس: يا أول فزة گلب لإلياس وفيروزته.. بين زوايا تبث الدفو بجو بارد. جمد كل جزء بجسمك.

برودة الأجواء، نومة الشتا اللي تعجز تصحى منها. تداخل لمسامعي وخرب نومتي العميقة. اسمي اللي تكرر لمرات عديدة حتى أكعد. فتحت عيوني بثقل من النعاس، رمشت لثواني موضحة نظري اللي متشوش ورموشي متلاصقة. دفو محاوط كل جسمي ومحتل صدري. بهالأيام اللي يتجمد فيها الإنسان من البرد. باوعت لأمي مكمشة بأيديه. وتسحبني منهن، باقي تجيب كرين حتى تشلعني من الفراش. فيروز: بطة كومي تعبتيني، خامس مرة أكعدچ.

گلت متذمرة كلمة تنفهم مني وكلمة تصير طلاسم. -ماما لا تصيحين الي بطة. عبست شفتي ورجعت أريد أغض. فتحتها مرة ثانية لمن أمي عاطت: -بَـطه. -لا تصيحيلي بَطة. فيروز: لا عيني، انتِ بطتي. گلت بنبرة زعل: -ماما. فيروز: لمن تكومين من الفراش أبطل أصيح الج بطة. رفعت إيدي وأني فاتحة خمس أصابيعي: -بس أنام هلكد. فتحت أصابيعي وسديتهم. بمعنى العدد. هزت راسها رافضة. جرت بالكلمة وقالت:

-بَطـــه، يلا كومي حبيبتي، أبوچ منتظرنا خطية يريد يتريك، يكول ما ياكل إذا ما تاكلين وياه. قلصت عيوني: -تبطلين تصيحين الي بَطة إذا كمت؟ هزت براسها: -أحلفي؟ فيروز: والله. فتحت عيوني گوه أحسني حاطة أعواد ومثبتتهن. مثل توم لمن حط الأعواد بعيونه. شديت اللحاف تحت حنجي: -والجذاب؟ فيروز: هههههه، الله يذبه بالنار. -صحيح. فيروز: أم لسان كومي. ابتسمت ابتسامة ظاهرة سنوني. بعد ما طاحن ورجعن طلعن الي.

غسلت وفرشت واني أسوي حركات بوجهي. أمي واكفة بالباب صافنة علي. ضحكت على نظرتها. دخلت للمطبخ ركضت على أبوي اللي جان يصب الجاي وحضنت رجله. إلياس: ديربالج ديربالج لا يطيح الجاي عليج. وخرت عنه مبتعدة مسافة قليلة. صب الجاي. وأجاني بوس خدودي وشبگني. شبگته واني مبتسمة ابتسامة واسعة. وخرت عنه: -البارحة انتظرتك بس أمي نومتني گوه. دخلت أمي للمطبخ وكالت: -والجذاب؟ -هههههه، الله يذبه بالنار. فيروز: بس أبوچ تشبكي وتبوسي.

وأني ما إلي شبكة لو بوسة؟ إلياس: هاي أمچ تغار. انداريت عليه وهزيتله براسي: -أي. إلياس: خطية بوسيها لا تبجي. رحت عليها مبتسمة وهي متكتفة. وتباوعلي. حضنت بطنها. فيروز: لا ما عجبتني هاي الشبگه شو أحسها جذبيه. حضنتها أقوى ابتسمت ابتسامة حنونة. ونزلت باست راسي. فيروز: يلا بطة تعاي أكلي بسرعة راح الوكت. تخوصرت وخزرتها: -مو گلتِ بعد ما تكليلي بطة. فيروز: اعتذر، يلا تعاي ناكل. كعدنا نتريك، خلصت، غسلت.

رحت للغرفة أمي اجت وراي بدلتلي. طلعت لابسة جنطتي وأبويه شافني. إلياس: شهالظفاير الحلوة تعالي خل أبوسهن. رحت اله باس ظفايري حيل. لحظة مستحيل أنساها وهو يبوس ظفايري من كل داخله، بقلب حنين ورهيف. إلياس: مُلاذي بنتي الحلوة. ابتسمت بوسع، شعور لطيف يتدفق بداخلي. داهمت غرفة أمي وأبوي. أركض على مشمش أختي الصغيرة. أمي دخلت وراي تركض. فيروز: مُلاذ ولج تعالي لتكعدين أختج، ولج مُلاذ ما گدر أركض يا فوصة.

بست خدها بسرعة وأمي بس تريد تلحك تمسكني تخاف. مشمش تكعد متنحسه من وراي وتكوم تبجي. فيروز: -شلت مُلاذ من بطنها وطلعتها من الغرفة. وهي تضحك وتحرك برجليها. أضحك على ضحكتها. نزلتها يم إلياس وهو يغني لها ويصفق ع كيف. إلياس: -البنيات البنيات عشرة وأگول گليلات. رفعت إصبعها وفرته بوكاجه: -وحدة. إلياس: هههههه، دمشي دمشي، هي وحدة وهيج فارتنا لو عشرة شلون؟ مُلاذ: -أخذني أبوي للمدرسة. نزل نفسه الي انطاني يومية.

إلياس: مو تتعاركين زين بابا؟ -تمام. بست خده وهو رفع ايديه باسهن. ابتسم. ودخلت المدرسة... فيروز: -طلعوا مُلاذ وإلياس. أنا بقيت أنظف البيت. خلصت وسمعت صوت ملاك تبجي. رحت عليها دخلت الغرفة شلتها بين ايديه. فيروز: مشمش حبيبتي. دنكت بست راسها. طلعت من الغرفة شايلتها. شربتها حليب ونومتها على الجودلية وأنا أشاقيها. ظليت كاعدة شوي أحوك جاكيت لـ مُلاذ. خليته على الجودلية لمن شفت الساعة. حطيت ملاك بمكانها ورحت أسوي الغدا.

التفتت لمن اندكت الباب. طلعت وكفت ورا الباب. فيروز: منو؟ -أنا. فيروز: مُلاذ؟! فتحت الباب بسرعة أدحك لـ مُلاذ. دخلت مغندبة ومجتفة ايديها. وقميصها مخربط، قراصتها طايح. دخلت للبيت بلا ما تبوعلي وتحجي حرف. كاعدة گدامي وأنا واكفة. كل شوي ترفع عينها تدحگلي تشوفني أدحگلها. ترجع تدحگ للكاع بسرعة ومتجتفة. تسائلت بشك: -مُلاذ شمسوية؟ تعاركتي مو؟ حكت راسها عاگده حواجبها. ملاذ: ماما يعني هاي الادبس.. صحت بصوت عالي:

-اشش ولا كلمة، شنو هاي الألفاظ؟ أنا مو گلتلج بعد ما تتعاركين ولا تحجين هيج كلام؟؟ مُلاذ: والله من وراها. فيروز: مُلاذ بكل مرة تكولين هي التضوجني. نحاجي أهلها ويكولون البنية فقيرة. وهسه ما طول غلطتي عليها روحي للغرفة وعقاب ما تطلعين منها منا لحد ما يجي أبوچ. گامت وكفت خازرتني. مُلاذ: يعني ما أروح للحمام؟ أظل بالغرفة يعني ما يصير أدخل للحمام يعني.. غمضت عيوني بنفاذ صبر. تدري عادي تروح للحمام.

وكل مرة أعاقبها ما تطلع من الغرفة. تسألني هالسؤال حتى تعصبني أو تخليني أنقهر عليها. فيروز: مُلاذ. ضمت شفتها لداخل حلكها وسوت نفسها فقيرة. شالت جنطتها من الكاع. وراحت للغرفة. تمشي بكل هدوء وعلى كيفها. تنتظر أنقهر عليها وأصالحها. وصلت قريب الباب. وأنا ساكتة ما صحت لها. سرعت خطواتها، دخلت سدت الباب. أنداريت على باب غرفتها متخوصرها. أعرفها شرح تسوي ومنتظرتها. فتحت الباب مدت راسها باوعتلي. وصاحت تحجي بسرعة:

-سرى الادبسز كله من وراها الجلبه الحقيرة ال.. واكفة متخوصرة وصحت قبل لا تكمل: -مُلاذ. تحجي كلشي بگلبها بسرعة بسرعة. حتى تلحك قبل لا أعين. سدت الباب ودخلت. فتحت الباب مرة ثانية مدت راسها وصاحت: -سرى المطية، الحماره، ال.. ال.. نست الباقيات. خزرتها. وقدمت رجلي بمعنى جايتلها. سدت الباب بسرعة. أسمع صوت ركضتها بالغرفة. نزلت راسي ايدي على عيوني جسمي يهتز أضحك. ما تبقيها بقلبها. درت وجهي، رحت أشوف الغدا.

شوي وسمعت انفتحت باب البيت. دخل إلياس مبتسم بايده مسواك. أخذته من ايده. حطيته بالمطبخ. تقرب شال ظفيرتي بين ايديه وباسها. التفتت مبتسمة اله. كمش وجهي بين ايديه. وباس كصتي. إلياس: فيروزتي، وين مُلاذ؟ رحت لمدرستها گال الحارس طلعت. زفرت نفس سندت ايدي على الكاونتر. -هم تعاركت. إلياس: بالمدرسة؟ هزيت راسي بمعنى أي. فيروز: مُعاقبة بالغرفة كاعدة. إلياس: تمام، بس لو أعرفها ليش هلكد تتعارك. تنهدت واندريت صبيت أكل:

-ما أعرف، تعبتني. إلياس: رايح أصيحها. -تمام، إلياس فدوة حاجيها. هز راسه. راح إلياس صاحها واجت. كعدنا ناكل. إلياس: مُلاذ. مُلاذ: ها بابا. رفعت عيني دحگتلها وهي تدحكله. بارتباك من نبرة صوته. إلياس: سمعت متعاركة؟ التفتت وكالت بضوجة وتذمر. مُلاذ: مامااا ليش تگولين.. قاطعها إلياس قبل لا تكمل. إلياس: ملاذ عوفي أمج مو هي اللي گلتلي، العصافير شاورتني وگلتلي. نزلت راسها ساكتة. إلياس: دزوا علينا مو؟ هزت راسها بـ "أي".

إلياس: مُلاذ كم مرة حجينا؟ مُلاذ: أكدر أحجي؟ إلياس: أكلي أول بعدين تحجيلي. هزت راسها وأكلت. كملنا أكل غسلت الماعين. كعدنا وأني شايلة مشمش. أسمع الهم. إلياس: ليش تعاركتي؟ حكت كصتها وحجت: -شوف بابا أنا رحت اشتريت من الحانوت. إلياس: أي. مُلاذ: طلعت من الحانوت أريد أروح للصف، اجت سرى الحقيرة.. قاطعها إلياس:

-مُلاذ ما مسموح ألچ تنطقين هيج كلمات، إحنا شحاجين هالكلمات ينطقوها بس اللي ما متربين، انتِ بنية متربية، هالگلام عيب. رفعت راسها مُلاذ تهمس وي روحهابصوت ناصي حتى لا نسمعها: -الادبسز الحقيرة الحيوانه.. كملتهن بصوت أنصى. خزرها إلياس. إلياس: ترا جاي أسمع. نزلت راسها: -آسفة. إلياس: كملي شسوت سرى؟ مُلاذ: اجت طشرت جبسي ونستلتي طاحت، أخذتها وشردت. إلياس: حاجيتي المعلمات؟ هزت راسها. إلياس: شسون؟

ملاذ: كل شي ما سون وأنا رحت كتلتها. حط ايده على وجهه فرك وجهه. إلياس: هسه حتى المدرسة اللي أنا أدرس بيها مدرسة ولد ومتوسطة ما أقدر أنقلچ وياي. ملاذ: بابا سرى جلب.. خزرها وكال بنبرة غضب وصوت عالي: -مُلاذ. سكتت فلا تتوب لازم ترد تغلط. ما أعرف منين متعلمة الغلط هيج وإحنا حتى ما مخليها تخالط أطفال مو زينين ولا نغلط گدامها بس هي لسانها يمه يگطع الواحد ويثرمه ثرم خلال ثواني. دارت وجهها دحگتلي. اجت كعدت على رجليّه.

ظليت دايرة وجهي عنه. ما أحاجيها. هي تگرص بخدودي. تسد وتفتح بعيوني گوه حاصرة ضحكتي. أباوع لإلياس طابق شفايفه ويضحك بسكتة. طبگت شفتي حتى ما أضحك. مسح بنهاية خصلات كصايبها على خدي: -آسفة. مُلاذ: بعد ما أعيدها والله والله وداعت مشمش مو بابا؟ إلياس: لا گلتِ هيج من قبل وعدتيه. مُلاذ: بابا أنا ما عليه بيها هي تجيني والله. إلياس: مُلاذ لا أنا ولا أمچ نغلط گدامچ بس گليلي ليش هيج تسوين؟ منين متعلمة هالاشياء؟

نزلت عيونها تلعب بأصابعها: -والله ما متعلمة بس بابا أنا ما أتعارك هي تتعارك. إلياس: باجر أروح أحاجي أهلها بس أيالج بعد تتعاركين نتزاعل أنا وياچ زعال كلش قوي وبعد ما نتصاحب أبددد. هزت براسها وباعوتلي بنظرة توسل. ابتسمت وصالحتها. مُلاذ: -ثاني يوم أمي بدلتني وأبوي أخذني للمدرسة. كالعادة. وصاني ما أتعارك. ودخل يحاجي المديرة لأن استدعته. وأنا رحت لصفّي. أول ما دخلت باوعت على رحلتي سرى الزعطوطة گاعدة بمكاني. رحت وكفت يمها:

-وخري خل أكعد. ابتسمت بخبث. أباوع وجهها بي شخاط من البارحة خرمشتها. سرى: ما أكوم رحلتي هاي. خزرتها وتذكرت أبويه بعد ما يحاجيني إذا تعاركت. هزيت راسي ابتسمت بهدوء ورحت كعدت برحلتها. سرى: -كتلوج أمج وأبوچ ههههههههههه. گامن يصفكن هي واللي وياها. سرى: كتلوها، كتلوها، هيهههه هيه كتلوها. باوعتلها مبتسمة وساكتة. سكتن بسرعة لمن دخلت المعلمة قرتنا. خلص الدرس دگ الجرس وطلعن. طلعت سرى والزعطوطات اللي وياها.

گمت من مكاني ورحت لرحلتها أو بالاصح رحلتي. اللي هي گعدت بيها. ابتسمت بخباثة ونفذت خطتي. بعد ما خلصت الفرصة طبت سرى. وكعدت على رحلتها. طبت معلمة القراءة. فتشت الدفاتر على كتابة موضوع القراءة. فتحت دفتري راويتها. خلصت من سرانا اتجهت للسرة اللي گاعدة بيها سرى. حطيت إيدي تحت حنجي مبتسمة. أباوعلها طلعت دفترها للمعلمة. وانطته الها. گلبة المعلمة الدفتر ورجعت باوعتلها. المعلمة: وين الواجب؟ سرى: ست هذا.

أخذت الدفتر گلبت الأوراق ما لگته. ابتسمت بخباثة وعفست أوراقها مال واجب اللي شكيتهم بإيدي. المعلمة عصبت منها. لأن أكثر من مرة ما تكتب الواجب. گالت خازرتها: -كومي اوكفي قصاص! غركت عيون سرى بالدموع: -ست والله كتبته. صرخت عليها المعلمة: -كومي. الطلاب منهم خايفين ومنهم يضحكون عليها. وطبعاً أنا من ضمن اللي يضحكون. ظلت طول الدرس سرى تباوعلي بحقد. وأنا أضحك بالسر وأطلع لساني أعيب عليها. ركصت حواجبي لـ سرى.

صحيح طفلة بس عقلي يشتغل لمن واحد يخبث وياي. تمر الأيام والأشهر، مشمش تكبر گدام عيني صرت أخاف عليها أكثر من خوفي على روحي. بين أهلي اللي متعلقة بيهم والحرب اللي دمرتنا. حيل صغيرة بس عقلي يلقط كل شي ويفهم. لميت رجليّه وكعدت بالكاع. أمي تباوع على الأخبار وبأيدها مشمش. أبوي طالع جو سوادوي وكئيب يتخلل حياتنا ولحظاتنا وعمرنا وذاكرتنا. مع نغزات گلوبنا كل ما صدر صوت الغارة. اجت أمي ليمي وضمتني لصدرها.

مشمش تبجي جوعانة وإحنا ما عدنا حليب. گلبي طك عليها. ولا نگدر نطلع ونخطي. الصواريخ تتطاير فوگ روسنا. على الرغم من صغري بس جنت أفهم. وأفهم صعوبة الوضع اللي إحنا بيه. هالشي هو اللي خلاني أعرف. دائماً لازم أكون فِطنة ونبهة على كل شي يصير. صار صوت الصواريخ وإحنا گلوبنا ترجف. ركضت أمي علينا أخذتنا أنا ومشمش، رفعت الدواشك ودخلتنا جواهم وكعدت يمّنا. مشمش تبجي بصريخ وأمي لازمة گلبها وتبجي وأنا ساكتة حرف ما نطقت.

حاضنتنا لصدرها. الكهرباء مطفية، الوضع مرعب. مرت الساعات هدء الوضع. انفتحت الباب انتفضت أمي. دخل أبوي، ركضت شبگته وتحمد الله. وأنا طلعت وراها شفت جدتي وعماتي. وعمي وأطفاله كلهم جايين. إلياس: فيروزه لمي هدومكم على السريع. باوعتله أمي بنظرات الحيرة والتوسل ودموعها تلالي بعينها: -وأهلي؟ إلياس: سمعت راحوا لغير محافظة وآمنوا على رواحهم. فيروز: أكيد؟ إلياس: وداعة عيونچ الي دوهنتني. أمي شعرها يعبر خصرها لونه بني.

عيونها خضر من ذاك الصوب تشوف لونهن. لمن توگف بالشمس يصير لونهن يجنن، باختصار حقه أبوي من حبها. بيبي وجهها أصفر ومهدود حيلها من التعب. عمامي الباقين أغلبهم راحوا لغير محافظات. فيروز: ادخلوا عمه استريحوا. مسحت بيبي على راس أمي. ودنكت راسها أمي. بيبي: -رب العزة والجلال ويانا، القادر الخالق ويانا، لا تخافين حبيبة، إحنا بحفظ الرحمن. غمضت أمي عيونها مبتسمة وهزت راسها: -والنعم بالله. أخذت بيبي مشمش واجت ليمي.

مسحت شعري وبست كصتي. راحت كعدت على القنفة. دخل أبويه بهيبته وطوله. بياضه إلي ياخذ القلب. رموشه الكثيفات شعره الأسود فحم. شواربه سودة لحيته خفيفة. اتمعن بملامحه وجمالهن. وكلهم يشبهوني بيه. ابتسم يدور علي بعيونه. كاعدة يم الباب اللي دخل منه. نطق بصوته الحنين: -مُلاذي. مُلاذ: بابا. ابتسم والتفت إلي اجا. إلياس: ليش كاعدة بالكاع؟ رفعت أكتافي بعدم معرفة. إلياس: كومي باردة الكاع. شالني وحطني بحضنه وكعد هو بالكاع.

ظليت مخلية راسي على كتفه وصافنة. شوي وطلعت أمي بأيدها الجنط. أخذ أبوي كصيبتي باسها: -كومي حبيبتي. گمت من رجله وگام راح لأمي. طلعنا أبوي بذيج الليلة من البيت. لمن هدء الوضع. باردة برد يكص كص. وملاك تبجي بصريخ. بأيدين أمي أبوي من أجا جاب حليب. رغم شربتها أمي بس هي مبينة بردانه. رفعت نظري لأبوي لمن رفع قبوطه. وضم ملاك بداخله. إلياس: اش يـ بعد أبوج. يمسح بدموعها. التفت إلي حضن راسي لرجلهم. مسح بخفة على عضد إيدي: -بردانه؟

هزيت راسي بنفي. وصلنا ردنا نشرد نطلع من منطقتنا هاهيه. وأبوي گال بتساؤل: -حيدر وين؟ حيدر ابن عمتي الصغير. وعرفنا ناسينه عمتي گلبت الدنيا بالبواجي. ما گدر أبوي يجي ويانا. إلياس: رح أرد وآخذه والحگ. جدتي وأمي قطّعن رواحهن. لمن گال لازم يرجع ورفض يروحن ويا. الصواريخ والانفجارات منطقتنا. أكثر منطقة تطيح بيها الصواريخ. وأنا هم خفت وياهم وعدنا يجي. ورا فترة وهو يقنع بيهم ويهدئ بعمتي. قبلوا يشردون بس بشرط ما يتأخر.

علينا ويجي ورانا بسرعة. أخذنا عمي مهند وبذيج الليلة شردنا من مكاننا. وكعدنا يم بيت عمي الثاني محمد. صوت الساعة يطن بأذننا. والأخبار مفتوحة. وعينا على الباب. ننتظر أبوي. بيبي دمعتها بعينها وتسبح. أمي بيدها مشمش نايمة. وهي تهز بيها ودموعها تنزل. وأنا گلبي يرتج رج خايفة على أبوي. عمتي تنعي وعمامي وعماتي يهدون بيها. وهي تفرك رجلها بقهر وتون لايمة روحها شلون نست ابنها. فيروز: -أباوع لمُلاذ وأرد أباوع لمشمش.

وأرجع نظري للحجية. إلهي لا تختبرني بيهم. گلبي يدعي يردلنا إلياس بسلامة. ما گدرت أغير عناده وشجاعته وقوته گدام المواقف الصعبة. ما گدرت أغير لمن يذب روحه بالتهلكة. لأجل اللي يحبهم. همست وي نفسي ودمعتي على خدي: -بحفظ الرحمن إنتَ. رفعت مشمش بست راسها. گمت ومديتها على الجرباية نومتها. حاوطتها بالمخدات حتى لا توگع. طلعت من الغرفة. باوعت لمُلاذ گاعدة يم الصوبة والجهال يمها كلهم يسولفون ويلعبون بس هي مو يمهم أصلاً.

لامة رجليها وتدفي بأيدها. گعدت يمها بهدوء. وخرت كذلتها عن عيونها. فيروز: يلا كومي تنامين. -لا خل يجي بابا. فيروز: لا مُلاذ نامي حتى يجي بابا. عبست شفتها: -حبابة. التفتت للحجية ومنارس. الحجية: عوفيها خطية. منارس: أنا بعدين أقنعها تنام تعاي كعدي. منارس اخت إلياس. رجعت التفتت الها: -تريدين تجين يمي؟ مُلاذ: لا بردانه گاعدة يم الصوبة. هزيت راسي وگمت. عفتها وكعدت يم عُلا اللي نسينا ابنها. عيونها مورمة مسحت على ظهره.

دنكت حطت راسها على متني. عُلا: گلبي وجر نار، شلون لو صارلهم شي يَ خيه، الله ياخذ عقلي شلون نسيته وعفتها. هتز جسمها تبجي. غمضت عيوني بتعب ومسحت على ظهرها: -يرد يـ بعد عيني يرد، تدرين إلياس ما يعوفه ورح يجي ويجيبه وياه. عُلا: إن شاء الله ربي، هم بأمانك لا تحرك گلبي بأخوي ووليدي. مُلاذ: -گمت من يمهم. رحت أشرب مي دخلت للمطبخ. أريد ألوح الكاونتر وأفتحه ما ألوح. رحت أريد أسحب الكرسي وسمعت صوته يمي.

-ههههههه ما تلوحين الكاونتر؟ التفتت عليه ساكتة تخوصرت وظليت واكفة. اسكندر: تريدين گلاص؟ باوعتله هو أطول مني ويوصل للكاونتر. درت وجهي عنه بعدم تقبل وگره. هزيت راسي بمعنى أي من لا جارة. ابتسم وفتح الكاونتر اخذ كلاص مدلي. ردت أخذه ورفع ايده باعدة عني. نظرت اله باستغراب عاگده حواجبي: -انطيني. اسكندر: بشرط. خزرته وفوقها يتشرط وجهه الجريذي. نزل روحه اللي گعد گدامي قرب خده اليو نطق طالب مني بكل صلافة عين. اسكندر: بوسي خدي!

فتحت عيوني وسع ورجعت خزرته: -ما أبوس قروده. رفع حواجبه وأنا دفعته. أخذت الكرسي صعدت اخذت الكلاص. اسكندر: ادبسز طالع لسانچ. التفتت اله: -انجب والله أگول لبابا عليك. فك عيونه وعصر إيدي حيل: -ادبسز شنو تغلطين! أكو كلاص ستيل أخذته. وضربت بيه اسكندر على راسه. وهو صاح متأذي وابتعد عني. فزيت لمن أجا صوت أمي: -ولج مُلاذ. دخلت خازرتني: -شلون تضربين اسكندر! أكبر منچ شحجينا إحنا ليش تعصبينيي!! مُلاذ: ماما.. عاطت بيه.

فيروز: اشش ولا كلمة. هديت الكلاص ايدي ترجف. و اسكندر يدحگلي مبتسم، رافع حاجبه ومتجتف. تدنت أمي عليه ولتت أذاني. فيروز: بعد دربالچ تعيديها. ما خلتني أحجي وأنا نزلت من الكرسي حتى مي ما شربت وكفت بباب المطبخ ودمعت عيني مهضومة. مسحت دمعتي والتفتت لـ اسكندر. متحلفة بيه بگلبي: -أني أعلمك وجه القرد. طلعت گعدت بالغرفة اجت نور ليمي. بت عمتي أكبر مني بـ 3 سنين. مُلاذ: بابا يرجع مو؟

نور: أي أكيد يرجع، يلا أنتي نامي إن شاء الله من تكعدين تلكينه موجود. مُلاذ: الجلب أخوج تف عليه، أنا أعلمه. ضحكت نور تباوعلي: -ليش شبي؟ مُلاذ: القرد يگلي بوسيني بخدي. حطت نور إيدها على حلكها متفاجئة: -صدك والله؟ مُلاذ: والله. نور: اسكندر ترا يحبچ. مُلاذ: ما أحبه خل ينجح أول. نور: هههههه. مُلاذ: وأمي لوت أذاني ما خلتني أحجي. نور: أنا أحاجيها يلا نامي أنتي. مُلاذ: وبابا؟ نور: من يجي أكعدچ.

باوعتلها وظليت ساكتة حطيت راسي على المخده. نعست كلش وغفيت يم مشمش. نور: -نامت مُلاذ طلعت من الغرفة ورحت للصالة كعدت. اندگ باب البيت وهلعوا كلهم للباب وأنا وراهم. البجي والصياح صار أعلى. فتح الباب عمي. وأنا وراهم ما أشوف شي. عمتي عُلا گامت تضحك. ابتسمت عرفت أجا عمو إلياس وجاب حيدر. بس فجأة ارتفع صوت. بيبي وفيروز يصيحن بخوف. مُلاذ: -فتحت عيوني أباوع لسكف الغرفة. أندريت گيت جدة نايمة يم مشمش.

من الجهة الثانية التفتت گيت نور نايمة يمي. فركت وجهي وتذكرت أبوي. أول ما استذكرت فز جسمي. گعدت على حيلي بسرعة فركت عيوني بنعاس. گمت مشيت ع أطراف أصابعي، البيت أظلم والغرفة مملية بالنايمين. عماتي وأطفالهم وأطفال عمي وزوجته. ركزت كل قوتي من بين الظلام بيهم. أحاول أشوف وجه أمي. رحت لباب الغرفة فتحته. وفتحت ضوا الصالة گدام الغرفة. لمن طاح ضوء خفيف ع جهة الغرفة. توضحت وجوههم، من بينهم كلهم أمي ما موجودة.

طلعت من الغرفة ورحت أدور عليها. دخلت للمطبخ أمشي ع كيف. رجعت للممر اللي بين الغرف وكفت بحيرة، دايرة وجهي صافنة. فزيت مخترعة وجسمي جمد. لمن أجا صوت يخوف من وراي يهمس: -عليمن تدورين؟ درت وجهي باوعتله اسكندر. خزرته وضربته على صدره: -خرعتني. يضحك وتدنا الي وأنا خازرته. تراجعت لورا وهو مبتسم. أسكندر: عيونچ حلوات. عاگده حواجبي. وأدحگلها. أسكندر: ما نسيت من ضربتيني مساع نتصالح ببوسة.

دفعته وركضت على الشحاطة شلتها واندريت عليها. جا علي بخطوات سريعة ابتعدت وگلت: -وين ماما؟ ابتسم بخباثة. أسكندر: عافتچ هي وأبوچ وراحوا. غورگت عيوني بس أعرفه جذاب. هدّيت الشحاطة، عبست شفتي، الغصة حنكتني. -انجب جذاب، وين ماما؟ حجيت گوه مختنقة بغصتي شوي وأبجي. أسكندر: رح أكسر راسچ لا تغلطين. -ولي. رفع ايده ولوا أذاني حيل. وگال معصب: -منو يولي ولج؟ أدفع بـ ايده بس ما يوخرها حسيت أذاني انعصر الدم بيها:

-وخر إنت تولي عوفف أذنييي. ما ألوحه هو أطول مني. كمشت بايده ونبتت أظافيري بيها. اسكندر: لا تخرمشين حيوانة. مُلاذ: إنت حيوان. ابتعد بسرعة لمن انفتحت باب وحدة من الغرفة. كمشت أذاني تأذيني وعيوني تغركت دموع. رفعت نظري لأمي طلعت من الغرفة. رحت بخطوات سريعة عليها بداخلي شعور أبد مو حلو، حضنت بطنها. درت وجهي دحگت لإسكندر. وراسي على بطنها. فيروز: شتسوون هنا؟ ابتعدت: -ماما لوه أذني.

فكت عيونها وسع حطت ايدها على حنجي رفعت راسي الها. دارت وجهي بايدها باوعت لأذني. اسكندر: خالة خرمشتني. دحگت أنا لإسكندر وخازرته. گالت بنبرة تخوف، مملية بالعصبية. فيروز: وإنت شنو تمد ايدك عليها؟ إذا سوت شي تجي تگلي وأنا أعاقبها، ما تمد ايدك عليها! نزل راسه متفشل من أمي. فيروز: ديربالك بعد اسكندر، ديربالك تمد ايدك ع مُلاذ، إذا تكرر هالشي أگول لعمك هو يتصرف وياك. كمشت إيدي، دخلنا للغرفة. دحگتله مبتسمة بخباثة.

على منظره ظل ساكت لا ياخذ ولا ينطي. سدت الباب. أكو شمعة محطوطة على ماعون استكان على الميز ومضوية الغرفة ضوء خفيف. باوعت لأبوي متمدد وركضت عليه. بسرعة ابتسم وهمس: -مُلاذي بنتي الحلوة. -بابا حبيبي. بسته وهو كعدني على بطنه. رفع ايدي يبوس أصابيعي. إلياس: شوكت كعدتي؟ مُلاذ: هستوني گعدت. إلياس: خوش تعاي نامي بحضني. گمت من بطنه تمددت يمه وحطيت راسي ع كتفه. راحت أمي جابت مشمش. لأن سمعتها تبجي واجت يمنا.

إلياس: فيروزه حبيبتي تعالي منا. فيروز: لا رح أنام من جهة مُلاذ. إلياس: لا تعاي الإصابة بـ جف إيدي مو يمج تعالي. دحگتله مستغربة: -بابا إصابتيش؟؟ رفع ايده الي تحت ظهره. داعب خصلات شعري بأطراف أصابعه. وحك فروة راسي بحنان. باس كصتي وأنا راسي على كتفه. -ماكو شي حبيبتي نامي. التفت لأمي رجعت نظري على إيد بابا ملفوف جف ايده. أخذ مشمش من أمي، حطها على صدره نومها. أنا من جهة نايمة ع كتفه.

ومن الجهة الثانية أمي، مشمش نايمة على صدره. الكاع صبة فارشين جودليه خفيفة. نايمين عليها تلاثتنا. رغم برودة الجو. الوضع اللي إحنا بيه. وصوت الصواريخ والانفجارات اللي ميروح من بالي. بس الدفو جان بضلوع أبوي. لمن يلمنا بحضنه من بعدها تحس الدنيا أمان يمكم. مرت دقايق رجعت نعست ونمت. قاطعت نومتي العميقة أصوات خارجية. على الرغم من بعدني مغمضها. أسمع أصوات ناصية يمي. من ضمنها صوت أمي تهمس بخوف. فيروز: إلياس تريد تخبلني؟

گلي تريد تسودن؟ إلياس: لا تخافين ما يصير شي. فيروز: -الوضع خطر وإنت صاعد ع دبابة وتكبر والله ما يرحموك إذا لزموك، إنت ما تخاف؟ إلياس: فيروزه الخوف ما يتراهم وي گلبي، أنا ما أعرف أخلي گلبي يرجف مو بـ ايدي. فيروز: هذا اللي تعبني إلياس. إنت جاي تخاف ما أعرف شنو من گلب عندك. هذا أبو حنين رجال ما يعبر الباب من طوله وهيبته. وهسه ما ندري بيا سجن ودوه وكيف يعذبونه. إلياس والله أخاف عليك گلبي حاطته بشيشة. وإنت ما موجود.

اسمع أبوي گال بفصيح اللغة العربية. بنبرة حنينة مع بحة لطيفة بصوت شاعري: -وأن نافسك الموت وأخذني منكِ. اعلمي أن روحي تداخلت مع روحك. ولا يفرقهم سوى الكره المستحيل. أن يبدر من قلبك الرقيق نحوي، فيروزة قلبي. أمي بكت كعادتها. من خوفها على أبوي. فيروز: لا تگول هيج والله أموت أتدمر بلاك. إلياس: أمي إنتِ لا تخافين. ما صايرلي شي أنا أطلع من حلك الموت لأجلكم. إنتِ ومُلاذ ومشمش إنتوا نجاتي ونفسي. أنا روحي تحارب لأجل روحكم.

فتحت عيوني دحگت مشمش يمي. تحرك بأيديها بعشوائية ابتسمت. تدنيت بست خدها، ريحتها گد ما حلوة تخلي رئاتي ترفرف. گمت من يمها رحت لأمي وأبوي. أمي مسحت دموعها بسرعة. وابتعدت عن صدر أبوي. إلياس: صباح الخير مُلاذي. فيروز: صباح الخير ماما حبيبتي. فركت عيني وابتسمت: -صباح النور. گعدت بنصهم وهم يحضنون بيه ويبوسوني. إلياس: بليل شبعتيني رفسات خو أنا اجت وحدة بخشمي. ضحكت وضميت حلكي بايديه: -خشمك أزرق.

إلياس: لا صدك راح جمالي من وراج. تقرب عليه وهمس: -آكل رجليچ؟ أكلهنن؟ گمت أرافس بمكاني أضحك وهو ياخذ رجليّه بايده عود رح ياكلهن وأمي تضحك ويانا. سمعنا بيبي تصيح لأمي: -حسنة كومي تعاي ما گدر أطبن الغرفة. إلياس: ههههههههههه. فيروز: رح نطب السنة العاشرة وعمة تصيحلي حسنة.

إلياس: يعني بشرفچ من اجيت أخطبچ أگللها اسمچ فيروز تگلي نيروز، خفت لا تروح تگول گدامكم نريد نيروز وعبالهم نريد أختچ المتزوجة، سترت على روحي وگلتلها اسمچ حسنة. فيروز: يعني ما لگيت غير حسنة. راد يحجي أبوي وقاطعه صوت بيبي: -ولج حسننننه وينچ. فيروز: اجيت عمه. گامت أمي تحضر الريوك وي نسوان عمامي. وعماتي وبيبي. دحگلي أبوي. إلياس: يعني هسه شبي اسم حسنة لو مسميج حسنة مو أحسن؟ گشولت ملامح وجهي ما عاجبني. إلياس: مو حلو مو؟

هزيت راسي بمعنى "أي" وضحكت. إلياس: تعالي حسنة نامي على رجلي.. لا لا مو حلو تعالي مُلاذي نامي على رجلي أحلى. نمت على رجله وبابا يگرص خدودي لو خشمي بحيث حسيتهن صارن حمر. مُلاذ: لا بابا. قلد عليه: -لا بابا. مُلاذ: بابا. إلياس: ها حبيبتي. مُلاذ: رح تروح وتعوفنا؟ بابا حباب لا تعوفني. رفع حواجبه باستغراب. وأنا أتوسل بي، كلام أمي خوفني. شبگني واحتضنني لصدره. إلياس: لا بابا منو گال هيج. مُلاذ: هسه مو أمي گالت.

إلياس: لا بابا ماكو هيج شي تعاي. لا تبجين. مسح دموعي وباس كصتي حط ايده ع خدي وباعني باستغراب: -تعالي نطلع للحديقة؟ باوعتله وهزيت راسي بمعنى أي. طلعنا من الغرفة غسلت وجهي. ورحت اله طلعنا گعدنا بالحديقة. إلياس: لا تظلين تفكرين بهاي السوالف باباتي حبيبتي أنا موجود دوم يمكم. مُلاذ: چا ليش أمي تخاف وتبجي؟ ضحك ومسح على شعري: -أمچ خوافة معليچ بيها بس إنتِ قابل خوافة؟ هزيت راسي برفض. إلياس: شجاعة إنتِ گلبچ قوي مو؟

مُلاذ: شنو قوي؟ إلياس: يعني قوي. مُلاذ: أي مثلك بابا. إلياس: أروح نذر وفدوة للبابا. ظلينا شوي بره نكطف نبك. شالني أبوي حطني ع صبة عالية. وانطاني ظهره ضحكت بفرح. إلياس: يلا كمشي برگبتي. كمشت برقبته وحاوطت رجليّه بطنه. وشالني على ظهره. مُلاذ: حمال باشي حمال باشي. إلياس: صايرة ثگيلة ولج كبرانة بعد ما أشيلچ. مُلاذ: لا لا خفيفة. شايلني على متونه ويفتر بيه بالحديقة. ورا شوي نزلني حط النبك بجيوبي.

إلياس: تعالي خل نطب هسه أمچ تظل تدردم علينا. طبينا جوا ورجع شالني. باوعت بيبي النا واجت علينا بابتسامة ظاهرة أسنانها. بيبي: لا توكع البنت دربالك. إلياس: لا يمه ما أوگعها لا تخافين. مسحت بيبي على ظهري. بيبي: سبحان الخالق تتشابهون كثيرر. نزلني أبوي: -دام مُلاذ تشبهني أنا مأمن على جمالي. ضحكنا كلنا لمن أمي گالت: -شقصدك أنا مو حلوة؟ أبوي: لا فيروزة أنا ما الحگچ بالجمال. ابتسمت أمي بخجل.

وبيبي تدحگ لأبوي وأمي مكشولة ملامحه. بيبي: مدار الدنبك شني يمه بس مريتك حلوة. إلياس: هههههه حجية هسه حيرتوني بيمين أتغزل بس گصايبچ يرادلهن عشر سطور شعر. بيبي: تريدن تغشمرني امشي ولك امشيني. دگته ع جتفه وهو طلع يضحك من المطبخ. إلياس: بس لا إنتِ هم تريدين أرد أتغزل بيچ. مُلاذ: لا لا أنا حلوة أدري. قلدته: -دام أشبهك مأمنة على جمالي. ضحك بصوت عالي ونزل يبوس خدوده. رحنا گعدنا كلنا ع الكاع متجمعين بالصالة.

أنا گاعدة بحضن أبوي على رجله. وهو يمسح ع ظفيرتي ويحجون هو وعمامي. ما استذكر حوارهم بالضبط. لكن جان يخص أبوي. والدبابة اللي صاعد عليها ومأذن. باوعت طب اسكندر يصيحني: -مُلاذ تعالي جيبي وياي الغراض. خزرته ودرت وجهي. إلياس: كومي بابا شوفي ابن عمچ يمي. مُلاذ: ما أحبه خيولي يجيبهن وحدة. أبوي: لا عيب يلا كومي. صاح عمي على ابنه: -صفاء روح جيب الغراض وي اسكندر. إلياس: يلا بابا عيب كومي. كمنا أنا وصفاء واسكندر خزرني.

طلعنا برا لكينا گواني. طلع محمد ورا حسن وراهم سلطان. يشيلون الگواني ويانا. مُلاذ: شنو هاي؟ حسن: گواني طحين وشكر. تقدمت أريد أشيل وحدة وهي بطولي. اسكندر: لج شتشيلين هاي بوزنج. درت وجهي باوعتله. وكمشت بالگونيه أحاول أسحبها. ثبتت رجليّه وحاولت أجر الگونيه بس ما گدرت. يضحك حسن يباوعلي: -عوفيها حبيبتي، أنا أشيلها. ابتسمت اله وابتعدت. اسكندر خزر حسن. اسكندر: وخر ما عليك أنا أشيلها.

التفت عليه خزرني وشال كونيه الجنت رايدة أشيلها. حركلي بعيونه بمعنى طبي جوا. ما طبيت بقيت برا. حسن: وخري عيني خل أشيل الغراض. وكفت ع جهة وضميت إيديه لصدري. تجتفت أباوعلهم، ابتسمت ابتسامة واسعة. ميلت راسي وسندت خدي ع كتفي. دحگت لإسكندر أضحك عليه. دخلت جوا وهم دخلوا الگواني. دگت بيبي ع جتاف سلطان وضغطت ع زنوده. بيبي: عفيه وليدي ذني مو بس تخليهن حت تقلصهن گدام بت أم سارة وتسوي روحك عندك عضلات وهنه عضلات.

سلطان: حجيه شبيچ وياي هاي لأن ما عدچ منهن. ضحكت بيبي وگالت: -مدار الدنبك طب ولك. طفتهم ورحت أدور مشمش لكيتها بالغرفة وحدها إصبعها بحلكها ونايمة. ابتسمت على شكلها. انفتحت الباب درت وجهي لگيته اسكندر. دخل وسد الباب. أجا علي ولوى أذاني: -من أگلچ طبي ليش ما تطبين؟ كمشت ايده مثل البارحة وهم نبتت أظافيري بيه. مُلاذ: وخر حقير والله إلا أگول لبابا عليك. معليك. گدست على رجله وخرمشت ايده من الطول للطول.

هدني هو بسرعة وأنا طلعت ركض لأبوي. إلياس: لا توگعين بابا. انتبه لوجهي وكال خايف. إلياس: شبيج ليش تبجين؟ وأنا أناشغ أذاني توجعني. مُلاذ: بابا باع أذاني. شاف أذاني: -هايي شبيهااا هيج حمرررره؟؟ مُلاذ: بابا جاوبيني. مُلاذ: اسكندر البارحة لواها من گعدت أدور عليكم وهسه. لوى أذاني لأن گلي أطب من برا وما طبّيت. بسرعة عگد حواجبه وكال بعصبية: -وينه؟ مُلاذ: بالغرفة البيها مشمش. -روحي لأمج گعدي يمها يلا حبيبتي.

گام وعافني وأنا رحت لأمي. فيروز: شبيج تبجين يمه حبيبتي مُلاذ شكو؟؟ مُلاذ: اسكندر لوا أذاني وگلت لبابا. فكت عيونها: -وين أبوچ؟ مُلاذ: راح لـ اسكندر بالغرفة النايمة بيها مشمش. فيروز: هسه أجيك. غسلي وجهچ حبيبتي ماماتي وأكعدي هنا. گامت وعافتني هي هم وراحت. فيروز: -دخلت للغرفة. لكيت إلياس گدام اسكندر. ولاوي أذانه حيل عاصرها عصر بايده. وخد اسكندر أحمر مطبوعة أصابع إلياس عليه.

إلياس: إيدك إذا مديتها ع مُلاذ أطيح حظك افتهمتتت؟ فيروز: تمام إلياس كافي عوفه. رحت يمه وأريد يس أخلي يهد اسكندر. وذاك يعتذر والياس عيونه حمر شايط كل شي ولا أحد يلمس مُلاذ. اسكندر: عمي بتك وكحة أگللها طبي ما تطب. إلياس: ولك حلكك أشگ افتهمت لو لا؟؟ وكحة مو وكحة إنت ما عليك بيها اسكندر إذا شفتك يم مُلاذ بعد أشگ حلكك زين لو لا؟ اسكندر سكت ما نطق كلمة علط بوجهه. إلياس: افتهمت؟؟ هز راسه ساكت نتر إلياس ايده.

وطلع اسكندر من الغرفة. إلياس: حيوان يلوي أذانها وأنا أخاف أكمش إيدها. فيروز: فدوة أروحلك اهدأ البارحة حذرته عود. إلياس: وين مُلاذ؟ فيروز: بالمطبخ. عاط بيه: -ليش اجيتي وراي ما ظليتي يمها! فيروز: إلياس صوتك. إلياس: ما عاجبچج صوتي؟؟ البارحة لوا أذانها وإنتِ تدرين وما گلتلي. سكتت ودرت وجهي أريد أطلع كمش إيدي. إلياس: فيروز. فيروز: عوفني إلياس. وقت تهدأ وتعرف شلون تحاجيني عود تعال. إلياس: آسف فيروزة، ليش تضمين عليه؟

ليش ما تگليلي سوا فلان شي أنا عزيزتي محد ياذيها ويبجيها. فيروز: جنت تعبانة وأنا حاجيته وما ينعاد هالشي دام حذرتها. احتضنني وباس كصتي. رجع حضنني مرة ثانية مسح ع شعري. إلياس: آسف. مسحت ع ظهره: -عادي بس لا تعصب. طلعنا من الغرفة ورجعت لمُلاذ لگيتها گاعدة هي ونور يلعبن وي البزونة. عمتي: ولجن ما طلع ريوك لو مسوين باچه هم جان خلصتنه. منارس: خلصنا يمه بس نصب جاي. جابوا الريوك حاطين وي البيض طحين.

حتى تكبر البيضة أكثر وتكفينا. التمينا وكعدنا تريكنا. خلصنا غسلت لمُلاذ. واخذتها لبستها قميص أبيض. وفوگاه بنطلون حمالة، أحمر. أباوعلها وأسمي بگلبي عليها. شعرها أسود وعيونها سود بيضة مثل أبوه. رموشها كثيفات على أبوه. ميت شعرها سويتلها ذيل حصان. ونزلت غرتها القصيرة. مُلاذ: ماما اسكندر ادبسز. فيروز: ولج مُلاذ ولج گُتلة الوكاحة بطلي تغلطين عيب. مُلاذ: خيولي ما أحبه. فيروز: عيب ماما مثل أخوج حباب هو بس يحب يتشاقى وياچ.

مُلاذ: والله حسن وسلطان وجسار وكلهم حبابين إلا هو. كملتلها وكعدت گدامها: -معليچ بي من يضوجچ تعالي وگوليلي لا تغلطين ولا تحاجينه. گرصت خدودها وبستهن. فيروز: مو توخين ملابسچ. هزت راسها واجت نور وطلعت هي ونور. ظلينا بين الغدا والعشا. والتنظيف. طبيت هستوني للغرفة. بس أريد أكعد رجليّه راحت من الشغل. حطيت ملاك بحضني. رفعت راسي لمن سمعت صوت عالي. من برا وهموسة. همست: يا ربي استرنا. شلت ملاك نومتها على الفراش.

وطلعت بسرعة لـ برا. دحگت مستغربة. لـ أخو إلياس واقف گدام الباب. و إلياس گدامه. إلياس: وخر يا خويه ودّاعة عيونك منا أروح وأرد. غزوان: والله على جثتي تطلع إنت منا، يطلعون كل الوادم بس إنت تحرم أخليك تخطي من هالباب. إلياس: عندي شغل يمعود خل أكمل وأجي. تدخل أخو إلياس الثاني أحمد. أحمد: إلياس إنت تريد تجيب لنا المصيبة لين بابنا. التفت اله إلياس. أعرف نظرة هاي معناها عصب.

غزوان: أنا مو على المشاكل إلياس ما يجيب مصيبة بس يطيح الأذى بي بعدين أنا ما عندي گلب يتحمل أخسر أخوي. إلياس: -راجع بس عندي شغل. محمد: إلياس بويه هيد واكعد لخاطري أنا أخوك الجبير اسمع كلامي. بيبي: إلياس والله الذي لا إله إلا هوَ. رب السماوات والأرض، إذا طلعت منا يلساني من المستحيل يدورون على لسانك بعد، ولا أرضى عليك أغضب عليك ليوم الدين. نهت كلامها بنظرة باردة. ونبرة تحذيرية خلت إلياس يوكف:

-إذا إنت قابل، ما أرضى عليك ليوم الدين اخطي من هين للشارع. دگت صدرها گالت تنهي جملتها. مخلية إلياس بين اختيارين: -إذا طلعت لا أنا أمك ولا إنت ابني. دارت وجهها بعد ما گالت كلماتها الأخيرة. ودخلت جوا سانده روحها على عوجيتها. فرك وجهه وغمض عيونه. دخلوه گوه وهو يتطاير نار من عيونه. ظلوا مكعدينه يمهم بالصالة لحد الليل. گام راح للغرفة. نومت البنات وإلياس گاعد يشخبط بدفتر. طلعت ورجعت للغرفة. إلياس ما موجود.

رحت بسرعة ع باب الشارع. لكيتها مسدودة ومقفولة. رجعت أدور عليه ما لگيته. رحت للبيتونه لگيت باب السطح مفتوحة. همست وي نفسي: -لا إلياس لا شهالعناد!!! ركضت صعدت الباب مفتوحة. طلعت للسطح، دورت عليه ما لكيته. تقربت ع سياج السطح رفعت رجليه. دحگت لگفاه وهو يمشي بالشارع. نكث بملابسه، طفر من السطح. وشرد. تنهدت سحبت نفس عميق. درت وجهي ومشيت لباب السطح. بخطوات ثگيلة دخلت ورديت الباب. نزلت من السطح كلي خيبة شگد توسلت بي.

دخلت للغرفة نظري يتجول ع البنات. فركت إيدي برجلي بحيرة، وگلب ممرتاح. رجف صوتي وأنا أكتم بروحي. نزلت راسي حطيت ايديه ع وجهي. ومسحت دموعي اللي تدفقن ع خدي. ظليت عيني ع باب الغرفة. طر الفجر وعيني ما غمضت. انفتح باب الغرفة. وفز من شافني گاعدة. دار نفسه سد الباب. وأنا أباوعله ببرود. گلت بتساؤل وببرود. ع رغم البركان اللي بداخلي. -حققت مرادك؟ ظل ساكت يدحگلي. -صوبوك طعنوك ضربوك شسوولك هالمرة؟ أجا گعد گدامي:

-ما سوولي شي، حيٌ أُرزق گدام عينچ. فيروز: إلياس تعبت كافي إنت إذا ما تفكر بينا طلكني! فك عينه بصدمة: -شهالكلام! ديربالچ تعيدين هالكلمة! -خليني أرجع لأهلي وأگعد يمهم. أحافظ على بناتي وإنت روح اتصوب انضرب. انطعن، اتكاتل واجه الظلم والعدو. خلي روحك رخيصة لأن إنت مستثقل هالروح. على نفسك الرايح والجاي يكتلها. ما جاي تفكر بأهلك ولا بيه، عوفك من أهلك ومني. إلياس ما تفكر حتى ببناتك بعدهن أطفال، أطفال.

باچر عقبه يكبرن تجيهن قسمتهن للباب من منو يطلبوهن؟ باچر عقبه يكبرن، ويدورن ريحة أبوهن. راح تظل وياهن لذاك الوقت؟ أبويه ما انطاني الك. إلا لمن عيونك خضرت، ليش كل هالتعب. تريد تنهي برصاصة تايها لا سامح الله. ظل ساكت ومنزل راسه. حاضن ايد بإيد وحاطهن بحجره. رفعت ايديه وجفوفي ضغطتهن كل قوتي. ع محاجر عيوني حتى لا يدمعن. زفرت نفسي وبلعت ريكي. -هاهيه إلي تريده يجرا لك. رفعت راسي بصدمة: -تطلكني!؟؟

-بعد ما اطلع، ما أطلگچ أنا ما گدر بدونچ. -أوعدني بعد ما تطلع. -ما أگدر أوعدچ بس بالوقت الصعب أطلع. -وأنا أخاف من الوكت الصعب حتى لا تطلع!! -هاهيَ وعد ما أطلع بعد. نزلت گعدت گدامه على رگبي. كمشت إيده باثنين إيديهن. نزل راسه سنده ع گصتي ومسح ع خدي بإبهامه. إلياس: فيروزه وحق هو الحق أنا ما متجاهل وجودكم أنا أفكر بيكم كل لحظة بس ما أكدر أسكت وأتغاضى. رفعه ايديه ثنينهم وفتح قبضة ايده:

-بكفة إنتوا، وبالكفة الثانية الحق والوطن ضمن الكفة الثانية إنتوا موجودين أخاف عليكم ياذوكم وتروحون إنتوا بالرجلين. سندت گصتي ع گصته: -إلياس، دامنا وياك إحنا بأمان، إنت روح مُلاذ، وجناح ملاك، وگلب فيروزه.. ابتسم گال بصوته الحنين. إلياس: مُحاط بثلاثة مؤنسات، الفيروزة والمُلاذ والملك. علت أطراف شفتي ابتسامة. أخذ إيدي وگمنا نمنا. محتضنين البنات وبعضنا بأيدينا وگلوبنا. نور:

-متمددين أنا ومُلاذ نباوع النجوم تجنن الهوا بارد وحلوو. الحجية: ولكم نعنع ضلوعي البرد. رفع راسه سلطان. سلطان: حجية أنام يمج؟ أدفيچ وعلي. عاطوا كلهم بصوت عالي: -ولك سلطان. شالت الحجية وأبو سلطان نعالهم (تكرمون) وقبل ما يلحگ يشرد طاحن بظهره ثنينهم. فحطنا من الضحك لف روحه سلطان بالبطانية. طلع راسه سلطان من البطانية. سلطان: شني شبيكم همج خما همج ما لحگت أكمل حجايتي. اسكندر: ولك سلطان ضم راسك اجاك النعال الثالث.

قبل لا يكمل كلامة انشمر سلطان بكصته. وكلهم فحطانين من الضحك. نور: ههههههه. الحجية: خرنكعي تربية سز. سلطان: شبيج حجية شو نيتج شادتلها جنوحة ومحلّقة بالهواء الطلق. إلياس: ياهو الدرسك عربي؟ سلطان: ليش عمي شني تريد تدرس مُلاذ يمه. إلياس: لا أريد أشتكي عليه. سلطان: يا ريت عمي وعلي جواريبه ريحتها تعط. حسن: ولك سلطان التنكة لا تحلف بالإمام علي ع جواريب. سلطان: اسكت حسن كربلة. اسكندر: سلطان باع تشوف.

منا وأشر له بعيونه ع السياج. سلطان: هلووووووكمز. سلطان ع السياج ويباوع منهو يريدون ينزلونه ما يقبل ينزل. تالي طفر وكام يطك أصبعتين ويهز بالنص. سلطان: ياهو اقترح فكرة النومة بالسطح. الحجية: أنا. راح سلطان عليها باس گصتها حيل. وهي تسب وتلعن بي وتدفع بإيده وهو يضحك. سلطان: عمي شني من حجية عقلج مورد خنبوسه. الحجية: مدار الدنبك هذا كله لأن راح تشوف السليطة سارة. كل الولد كام يصيحون ها ها.