رواية جرح الأيهم الفصل الثاني 2 - بقلم أيلان

"منين نجيب مثلك حتئ ننساك؟ انجرت ايدي بسرعه. الصاروخ عبر بيتنا، التفتت لـ إلياس. إلياس: انزلوا بسررررعة. كل الي بالسطح ركضوا لجوا وهم يصيحون، محد صار يندل دربه. صار القصف والانفجارات واحنا بعدنا بالسطح. رجليه بعد ما تعينني. إلياس ركض على ملاذ شالها. انفجر بيت جيراننا الي بعد بيتين عن بيتنا.

قوس ظهره إلياس وبأيده مُلاذ، صاير سد الها. ركضت الهم. انفجر بعده البيت الاقرب النا. صرخت وبجيت بنفس اللحظة. بجسم يرجف ضامه مُلاذ ومشمش بحضني. إلياس صايرلنا سد ومحاوطنا. إلياس: فيروزة اركضييي. جر ايدي وشال مُلاذ بتك ايد وبأيدي ملاك. نزلنا نركض وين نحتمي وشلون ما ندري. خوفني هدوء مُلاذ ونظراتها المفجوعه.

نزلنا جوا وتاكدوا كلنا موجودين. اخذونا كلنا لـ سرداب. طبينا نلهث، روحنا رايحة من الخوف. كعدت بالكاع وبحضني مُلاذ وملاك. إلياس يمي. يتطمن علينا. كام واتطمن عليهم كلهم. أبو سلطان: سلطان؟ صاح بصوت عالي: سلطاننن؟ اسكندر: راحححح يشوف سارررره. صار الصريخ والهوسه وطلعوا يركضون يدورون على سلطان. الحجيه شكت زيجها. ام سلطان صرخت بروح رايحة. وكلنا نبجي حالنا حال. ونتحسب. القصف والصواريخ مستمرة.

الحجية: ولك يمه سلطاااان شلون تطلع. حيلها انهد وهي تبجي. يمر الوقت وروحنا باديت. كل الولد طلعوا وحذرونا نطلع. ندعي وجسمنا وارواحنا ترجف. على ساعة نموت. مُلاذ ما سمعت حسها ابد. انفتح الباب والحجيه وكفت بسرعة. دخلوا الزلم. دخل وراهم سلطان كل وجهه تراب. الحجيه تريد تركض وتوصل اله ما تكدر. ام سلطان حضنته وتبجي. طاحو ثنينهم بالكاع. وصلت يمه الحجيه. عتته من تشيرته وشبكته. واحنا اخيراً ارتاح گلبنا.

الحجية: السويقط شكو تطلع الادبسز. سلطان: ها ها خفتي عليه. مو انا خرنكعي حجيه شبيج تكابري. أبو سلطان يضحك وكلهم يضحكون عليه. طلع رايح لبيت ام سارة واول مصاير القصف طافر عليهم ومطلعهم من البيت ماخذهم لمكان بعيد وباقي وياهم. ومتدمر تراب. ظلينا ننتظر ينتهي القصف ونطلع منا بسلام. جا إلياس كعد يمي. إلياس: فيروزة خو ما متاذين انتِ والبنات؟ مُلاذ: دحگلها بسرعة وكال بخوف: شبيهااا؟

فيروزة: رجلها مجلوخه وما جاي تحجي اي شي. مانطقت بحرف من صار القصف. سارالها إلياس شالها بحضنه. إلياس: بابا مُلاذ دحگي. دحگتله. إلياس: شبيج؟ اكو شي يوجعج؟ تعورتي؟ رجلج تاذيج؟ كالت بنبرة هادئه: لا. إلياس: متأكده؟؟ مُلاذ: اي. إلياس: لا تخافين بابا. مُلاذ: ما خايفة انت يمي. حطت راسها ع صدره. مسح على شعرها. إلياس: اي اناا يمج ما اعوفج. لا تخافين. باس شعرها ونزل ايده كمش ايدي.

نور: بعد القصف يلي صار وواحد من الصواريخ وكع ببيت اركان واتدمرت. لمن عرفت اركان فقد رجله بعد ما طاح عليه سكف البيت وبقى تحت الانقاض. رجله جانت محصورة تحت السكف وقطعوها.

كل ليلة جنت ابجي. لمن اسمع سلطان يسولف لـ حسن وجسار عنه. على الرغم جنت احاول اهدء نفسي بفكرة "الحمدلله عايش اهم شي عايش". بس ما جنت اكدر اسيطر على روحي. لمن اسمع سلطان يگول هو معاني كلش هواي ومتاذي. هو الوحيد الجان يشتغل عدهمو يصرف على اهله. ابوه سكير وهو الولد الوحيد بين ٣ اخوات.

كم مره يكعدون بالباب هو وسلطان وانا ورا الباب اسمعم بروح ممروده. على الرغم صغيرة بس حبي اله ما جان حب طفولة ابد. اتعذب اتعذب من اشوفة متاذي وما بايدي شي اسوي. مُلاذ: مرت تقريباً سنه. رجع الوضع شوي احسن. قلت الاتفجارات والصواريخ واصوات الغارة (صفارات الانذار) الرنانة. تقدمت بـ ايدي كتابي. قدمته لـ ابوي يراجع. كاعدين ع المرجوحه. اخذ الكتاب وبدا يسئلني بالموضوع. واجاوبه. كل مره اجاوبه يصفگلي. مُلاذ: لوسي.

ضحك واهتز جسمه. إلياس: ولج شنو لوسي هذا اسم جلب ترام. مُلاذ: لا بابا لاا هذا دلعك و الله حلو لوسي يجنن. إلياس: دهر طرني ي بابا اذا اسمي صار لوسي. مُلاذ: ههههههه. التفتت ل امي لمن طلعت بـ ايدها صحن فواكه واجت باتجاهنا. ندهت الها: فوفو. إلياس: هههههههههههه فوفو. فيروز: لو تسمع صايرة شتصيحلي اشكال و الوان ونوب حتى مشمش تصيحلي مثلها. تقدمت امي كعدت يمي على المرجوحه وحطت صحن الفواكه بحضني.

إلياس: خلف الله ع فوفو انه تصيحلي لوسي تالي عمري صرت جلب مدري بزونه. ضحكت امي وانا شارگه حلگي الضحك. مشمش اجت هي ولعابتها و گرونها. وكفت كدام امي وهي تحرك لعابتها يمين يسار. مشمش: فوفووو. اخذت ماما لعابتها. امي: شبيها؟ ملاك: اوووو. امي: تعورت؟ باوعتلها مشمش ب وجهه حزين واخذت اللعابه و راحت. تفتر بالحديقة وتلعب بلعابتها. وكعدت بالكاع تدمرت تراب. فيروز: شوف هم دمرت روحها.

كامت امي من يمنا وراحت الها. رجعت دحگت لابوي وهو صافن. نمت على رجله. إلياس: لذة كومي اقري بابامُلاذ: شويه شويه و اقرا حباب. إلياس: شويه شويه؟ مُلاذ: اي. إلياس: اكيد؟ مُلاذ: امم. إلياس: خوش. ظل يمسح على شعري. مُلاذ: بابا. إلياس: ها حبيبتي. مُلاذ: شنو يعني حق؟ إلياس: ليش سئلتي بابا؟ مُلاذ: مو دائماً انت تكول انا اطلع ادافع عن حقنا حتى لا ينوكل. شنو يعني حق؟

إلياس: الحق اله هواي معاني. واحد من هاي المعاني هو الكلام الحقيقي او الفعل الحقيقي والصحيحيلي ما ننكره. مُلاذ: يعني شلون؟ إلياس: يعني مثلاً اليوم شخصين تعاركو وانت موجودة اثناء هذي العركه. واحد من ذولة الاشخاص تحبي كلش. الشخص يلي تحبيه ارتكب غلط بحق الشخص الثاني وانتِ موجودة. من يجون يسئلون ياهوه الغلطان شنو رح يكون جوابج؟ منو الغلط بيهم؟ مُلاذ: الشخص الاحبه. إلياس: يعني رح تعترفين انو هو غلطان حتى لو تحبيه؟

هزيت راسي بمعنى "اي". إلياس: عفيه بابا انتِ هيج وكفتي وي الحق. من وكفتي وي الشخص البريء و دافعتي عنه وعلى الطرف الثاني شخص تحبي بس هو غلطان معناها وكفتي وي الحق. وهذا هو الحق. افتهمتي؟ هزيت راسي مبتسمه بمعنى اي. مُلاذ: زينن اذا وكفت وي الشخص الاحبه و هو غلطان. إلياس: رح يكون شي غلط و حرام. مُلاذ: بس انا احبه؟

إلياس: المحبه مو كلشي بابا. حتى لو تحبيه هذا الشخص يبقى غلطان. دائماً اوكفي وي الحق اياً كان الشخص يلي كدامج. لا ترضين بالظلم ابداً. مو بس الظلم. لا ترضين بالكذب هم. كل فعل سيء لا ترضين بيه. هزيت راسي بقبول. إلياس: المعنى الثاني مثلاً عندج فلوس. هاي الفلوس حصلتيها بتعب. جا شخص و اخذهم من دون ما يسئلج. اذا تسمحين اله ياخذهم او لابهالحالة هو اخذ حقج وانتِ رح تطالبين بهالحق. وصلت؟ مُلاذ: ايي فهمت.

إلياس: يلا يلا خلصت الشويه. تذمرت وكمت: باباا. اقلد عليه: بابا. اخزرته وضحكت. مرت الايام والشهور والسنين. وعركاتنا اني وسرى ما خلصت. حاولوا ويانا بكل الطرق. وبكل مره انا ما احاجيه. بس هي تجي وتسويلها سالفة ونتعارك. لا اهلها يقبلون ينقلوها ولا اهلي يقبلون لان هاي اقرب مدرسة علينا. صرت خامس ابتدائي. وبيوم ابوي جان طالع وامي تسبح مشمش. انطرق الباب طرقات عديدة. طلعت اشوف منو. اتقدمت بخطواتي ورا الباب وصحت: منو؟

اتصادر لمسامعي صوت خشن: انا صديق ابوج. فتحت الباب دحگت لـ رجال متغطي نص وجهه. عيونه مو واضحات بسبب الظلام الدامس. خلفه سيارة جبيره سودة واضويتها مفتوحه. تكلم بصوت مبحوح يُكاد يختفي لانه يرتدي لفاف مغطي على فمه وانفه: بيت إلياس؟ هزيت راسي بمعنى اي: منو؟ -وين ابوج انا صديقة. -بابا ما موجود. اتلفت ثواني ونزل لـ مستواي. سلط ضوء الطرمة على عيونه وتوضح لونهم السمائي. طلع من جيبه الداخلي ظرف وحطه بـ ايدي.

-گليله هذا الظرف من الچتال على الموعد. طلع من جيبه نستله وقدمها الي: هاي الج يا حلوه هههههههه. عكدت حواجبي مفاهمه. ترك الظرف بـ ايدي والنستله وفوراً راح بسرعه اختفى ورا السيارة. دخلت مستغربة للبيت. ردت افتح الظرف وقاطعني صوت امي. امي: مُلاذ. عفت الظرف على الميز ورحت لـ امي: ها ماما؟ -جيبي المنشفه وراح انطيج مشمش لفيها بيها. -تمام.

رحت بسرعه للكنتور. ذبيت النستلة بداخل الكنتورو اخذت المنشفة. رجعت لـ امي. فتحت المنشفة وهي حطت مشمش بيه. لفيتها وهي تضحك وانا اضحك وياها. حطيتها على الجربايه يم الصوبة. وطلعت امي بدلت الها. بعد فترة اجا ابوي تعشينا. وكفت اغسل خلصت وطلعت من الحمام. وصلت يم الغرفة اسمع بابا يهمس بعصبيه. فجأه انفتح باب الغرفة وابوي صار بوجهي. مُلاذ: بابا؟ فيروز: مُلاذ اجا احد لهنا لمن جنت اسبح ملاك؟؟ صفنت وهزيت راسي: اي.

كنبص ابوي كدامي بسرعه. كمشني من اكتافي بس مو قوي. إلياس: منو؟ فيروز: إلياس ع كيفك وي الطفلة. إلياس: ما مسوي شي حاجيني مُلاذ بابا منو الي انطاج هذا الظرف؟ مُلاذ: واحد كال صديقك. إلياس: ما كال الج شنو اسمه؟ صفنت احاول اتذكر. مُلاذ: جلال، جلاد، ج.. جج اسم بـ حرف (ج) باوعلي بنظرات التخمين وكال: الچتال؟ مُلاذ: اييي ايي. ححظ عيونه بصدمه. ردة الفعل الي سببت لـ امي التوتر والي الخوف. مُلاذ: بابا؟ تدنى الي بملامح

ذبلانه باس كصتي وهمس: ماكو شي بابا ماكو لتخافين. ابتعد مسح على خدي. إلياس: بعد شنو كال؟ مُلاذ: كال گلي لابوج على الوعد. ظل لحظات يباوعلي بنظرات غريبة. هز راسه وكام بسرعه. إلياس: فيروزة اقفلي الباب وراي. باس راس امي. وراح على مشمش شمها حيل. رجع بوسني. امي تركض وراه مفاهمه الصاير تتوسل يفهمها بس تركها من دون اي جواب. عافنا وطلع. ظلت امي بـ حيرتها. تروح وترجع. بعدين دخلت الغرفة وانا افتر وراها: ماما يعني منو اسمه چتال؟

كشولت ملامح وجهي: ايع مو حلوو. هي تفتر وانا افتر وراها واحجي واعيب. اخير شي اندارت عليه. نظرات القلق تحتل عيونها الخضر: مُلاذ. نزلت لطولي: بعد گال شي هذا الرجال؟؟ هزيت راسي برفض. امي: اكيدد؟ هزيت راسي بمعنى "اي". سكتت وراحت كعدت تفرك بايديها. جنت ادري اكو شي خطأ بس ما اعرف شنو هذا الخطأ واتمنيت لو جنت اعرف.

صارت الساعة وحدة بالليل. امي على نفس الكعده. كل لحظة تمر تفلت شهكه من بين شفايفها. ظليت كاعده يمها بهدوء بلا ما انطق بشي. خوفها خوفني. بديت انعس وعيوني تنغلق. اتفززت مسامعي وعيوني على صوت باب البيت. باوعت لـ امي يلي ركضت بسرعه خارج الغرفة واتبعتها خطواتي. وكفت بباب الغرفة ادحگلها شلون محتضنه ابوي وتبجي بحرقة.

مرن ٣ ايام بعد هاليوم المخيف. وكانت ٣ ايام مليانه اسئلة من امي تتوجهه لـ ابوي وتبقى هذي الاسئلة بدون جواب. يصير بينهم عركه قوية وتنتهي لمن ابوي يحضن امي كل قوته وهي دموعها تتسابق على خدها بـ رُعب وخوف. دخل ابوي باس راس امي وباسني. اخذ مشمش من ايدي وحطها بحضنه. كعد وابتسامة علت اطراف شفته. وهالشي خلاني ابتسم ويا. نطق مع ابتسامة دافئة ظاهره اسنانه. إلياس: فيروزة قلبي، تكدرين تسويلي حلاوة يمكن اخر مره راح اضوكها.

عكدت امي حواجبها: إلياس! إلياس: اتشاقه بابا اتشاقه بس اريد حلاوة من ايديج. هزت امي راسها: من عيوني بس بطل هذا الشقها. استمع لحديثهم بس صافنه على ابتسامته. شكد جانت حلوه انحفظت بعقلي. إلياس: ابوسهم. ضحكت امي بخجل وانا ضحكت وياهم على الواهس. وسوت امي الحلاوة واكلها ابوي وكلنا وياه. ثاني يوم الصبح حضنني وطلع. عطره صار بملابسي. وامي كل شويه تسئلني "حاطه من عطر إلياس؟ " وجوابي يكون "لا".

ما يقارب الساعه السابعة و نصف او الثامنه مساءاً. ابوي طالع. انطفت الكهرباء. شعور ضيق حاوط گلبي وجعني ودمرني. كعدت بالكاع سندت ظهري على الحايط. انا صافنه. فز جسمي بـ رعب واهتزت مسامعي اثر صوت اطلاق ناري قوي. انرفع نظري على امي الي اجت تركض اتجاهي. هلع، خوف، قلق رجفة تملكت امي. جحظت عيوني على الصوت. سحبتني امي لـ حضنها. كعدنا بـ احد زوايا البيت.

اتردد صوت الرصاصه مرتين. الرصاصـة الأولى، الرصـاصة الثانية. لحد ما سمعنا صرخة من الشارع. على اثرها لم تهتز فقط مسامعنا وقلوبنا ايضاً. ضخت ونبضت بالخوف لا بالدم. لمن نُطقت حروف تعود الى اسم اعز شخص الي. إلياس. تكرر باذني الاسم: إلياس. ثم تكررت الحروف واحد تلو الاخر: إ ل ي ا س.

ايدين امي المحاوطتني انرفعت عني. رفعت نظري الها تركض باتجاه باب الطرمة. بقيت متصنمه مكاني ومتجمده. صرخة امي بـ اسم ابوي موتت كل حيل بيه. خطيت خطواتي للشارع حافية. وفكيت عيني بوسع. مع تجمد خطواتي والدم بـ راسي. واعتباراً من تلك اللحظة اتغير مجرى حياتي بـ اكمله. وانحفر بـذاكرتي المنظر يلي كدامي.

ابوي بالكاع ينزف. عيونه مفتوحه. يطلق انفاسه بصعوبه. رفعت عيني لـ عمي يصرخ باسم ابوي وكاعد يمهر. رجعت عيوني على امي المتصنمه بالباب. ركضت على ابوي ابجي واصرخ. طحت يمه. كال بنفس يلهث: مُلاذ، مُلاذي. حطيت راسه ع رجلي ابجي: بابااا باباا شبيك بابا. كمش ايدي باسها. ايلهث ويتصبب العرك من كصته. إلياس: مُلاذ.. اسمعيني. بلع ريكه ينطق كل كلمة بصعوبه بالغة. إلياس: مُلاذ انتِ من بعدي تفتهمين بابا؟

مُلاذ، ملاك و فيروزه بامانتج. وانا اعرف انتِ كد الامانه وتصونيها. فيروزة إلياس وملاكه بامانتج. لذة زين.. زين بابا؟ ضغط ع ايدي ودموعي تصب. ادحكله هزيت راسي اي. رجع يلهث ويجاهد: مُلاذ لا تبجين ابد عليه. ابد لا تبجين وصيتي هاي الج اوعديني تنفذيها. عل الرغم صراخهم بس جنت اسمعه بس هو. إلياس: مُلاذ ابد ما رح تبجين وتضعفين اوعديني. اتسللت دمعه من عينه وطاحت دمعتي على وجهه واختلط وي دمعته.

إلياس: اهلج يحتاجونج. اوعديني ما تضعفين ولا تبجين. يحجي ويلهث وانا عقلي متجمد. صارع بس حتى يوصل الي كم كلمة. هزيت راسي ودموعي تصب. مسحتها بسرعة. مُلاذ: وعد. ظل كامش بايدي. عمي بالكاع ويصرخ: خوييييه ااتنفس الياس ولك الاسعاف جاي. إلياس. ااعتلت صرخة امي بـ اسم ابوي وهي كاعده بباب البيت: إلياسسس لا تعوفنيين. نشفت دموعي على وجهي. إلياس: انت.. غمض عيونه جيل وعصرهم ورجع يحاول يكمل: انتبهوا من الچـ...

قبل لا يكمل قاطعة صوت عمي. عمي: إلياس تحملل عاينليي. اجو الاسعاف ولك والله اجو. إلياس: خويه. رفع نظرة للـ سما. وبنظرة ومexample: ملامح ثابته همس: اشهد ان لا اله.. انقطع صوته فجأه بوسط الشهاده. ظلت عيونه على السما. غادرت روح والدي من جسده بحضني وبين ايديه. بنفس اللحظة، غادرت بيها طفولتي مع روح والدي. يا اهل الخلك ابويه الراح. يا اهل الخلك بعد ما عندي جناح. النهاية يلي كانت بداية لـ مُلاذ ثانية وحياة ثانية.