رواية جرح الأيهم الفصل الخمسون 50 - بقلم أيلان

نزلت الهث ميته من التعب ولقينا ادهم ابن غادة يبكي وخاله جنات تسكت بيه لأن ادهم يبجي، راكان يبجي وياه بالواهس دخلت بـ وجهي، سبحت وطلعت بدلت ملابسي ريد أكوم بعد ما لي خلك رجليه موتتني من الوجع طلعت دحكت لسلطان واقف يم أمه يحاجيها رجعت عيني على أمي تحجي بالتلفون فيروز: يلا منتظرينكم تقدمت كعدت ع القنفة أسمع أم سلطان تحاجي سلطان أم سلطان: انت شبيك بينه، چنها درة تخبل انت ما قابله سلطان: يمه يعني وكتها عليج العباس؟

أم سلطان: خل يجي جسار وأحاجي، كافي راح أموت ولا انت ولا هو شفت جهالكم سلطان: اسم الله يمعودة، صلِ على محمد بس كولي يا الله، معلكة مرة بركبتي لا أعرفها ولا تعرفني، شبيج يمه لا تهججيني أم سلطان: بت خالتك وين، ما تعرفها والله إذا خطبها واحد غيرك أسود عيشتك لو انت لو جسار تخطبوها، ش ناقصها تخبل سلطان: خابري لـ جسار گليله هيج حتى يلوف ويرجع لـ الهند، يروح يتزوج هندية وما يتزوج درر، تريد يتسودن؟ أم سلطان: شبيها شو تخبل،

اسم على مسمى سلطان: يمه وينها ووين الدرر ذاك اليوم كاعدين يم أخوها، طبت عليه تصيح گله ها الخايس اشتريتلي نستله من شافتنا انخلست، بعد يا درر؟ أم سلطان: ليش انت من يدخل جسار البيت تگله تفضل اخي، شنو تحتاج لو كل واحد بيكم لسانه شطوله، هو يغلط وانت تغلط سلطان: هسه يمه فكيني، مو متت من هالموضوع زواج ما أتزوج، كاعد على گلبج عزابي، دياا عافها وطلع أنداريت لـ هتان كاعدة يمي سمعت أم سلطان يمي أم سلطان: هسه جسار يوافق عليها

عفتها وگمت ضجت من سمعتها تريد تخطب وحدة لسلطان دخلت المطبخ كعدت يم أمي لحد ما رن تلفون أمي ركضت عليه أخذته وجاوبت أجت النا تركض فرحانة وتگول أم سلطان: أجو گمنا كلنا نركض للباب وگفنا بباب الشارع ندحك لسيارتهم وسلطان وكف بالباب يصيح فرحان سلطان: هلا بيك هلا وبجيتك هلا صفت سيارتهم ونزلوا دحگت لمُلاذ وكبل بجيت أنا وأمي يمه شگد مشتاقين الها وهي وجهها مو مثل قبل، ضعفان وجهها أكثر بس بعدها حلوة راح سلطان حضن جسار وجسار يضحك

نزل هو ومناظره وشعره الدوم مزين ولحيته الكثيفة وأيهم اتقدم شال أبيل أجت مُلاذ ناحيتنا، فرفحت روحي شگد مشتاقتلها حضنتها أبجي وهي تهديني وتسكتني، تمسح على ظهري رفعت أيدها لأمي وحضنتنا ثنينا سويه مُلاذ: أتلكنني بالدموع، الله أكبر رجعوني لـ الهند، أروح أشتري ساري وأركص وياهم أحسن دارت وجهها وهي تحجي تريد تطلع ضحكنا بصوت وجريناها واحنا نضحك دخلت ويانا وسلموا الكل عليهم أتقدم أيهم يحضن بأهله ويبوسهم يسلم عليهم

لحد ما دخلنا جوا وهمَ كعدوا وأنا وأمي كعدنا كدام مُلاذ إيدينا على خدنا صافنين عليها وهي تشرب مي نزلت البطل، سدته دحگتلنا مُلاذ: شبيجن، والله اجيت أغص فيروز: مشتاقتلج يروح أمج مُلاذ: حبيبتي فيروز، أنا الأشوق گامت أمي يمها تبوس بشعرها وأيهم كل شوية يلتفت يحاجيها وهي تبتسم الهم مُلاذ: راح أموت أريد أسبح أيهم: أي والله، أنا هم جسار: أنا ما أسبح اليوم لو أموت أريد أروح أنام غادة: وين وين، صلوا على محمد

وخالة فيروز الكاربتنا من الصبح لحد هسه نور: والله مخد يخطي منا لهنا بلا أكل أريد أشوف المواعين ممسوحة جسار: إذا أحجي حجاية بعد ياكلني ويشربني مُلاذ: يلا كوم انسدحلك شوية وأنا أروح أسبح وأجيكم أكل وبدون سبح مستحيل عزيز: غير تكعد راحة السمجة مُلاذ: هاي انت هنا، ما شفتك عزيز: طبعاً غير زوجج يمج، وين تشوفيني مُلاذ: يغطيك خطية هههههه عزيز: هههههه الغسل، اشتاقيتلجن نور: احم دحگلناله ودحگلنا لأيهم

هو يحجي بفطاريه منطلق وأيهم خازرهم مُلاذ: أنا هم أشتاقيت لسوالفك التخزي لأصعد أسبح وأجي أتخزى بدالك عزيز: ديلا خوش دست مُلاذ أيهم وهو كاعد رفع عيونه دحگلها وشال أبيل وراحوا گمنا نحضر السفره دخلت الغرفة أخذ تلفوني لقيت هتان كاعدة بالغرفة وبإيدها التلفون ملاك: يا شتسوين هنا؟ هتان: انتوا اكلوا، أنا ما أشتهي ملاك: هتان؟ شبيج؟ تقدمت كعدت يمها هزت راسها برفض هتان: مابيه شي ملاك: شصاير، باجيه؟ هتان: لا

عگدت حواجبي مستغربة وهي عيونها حمر تقدمت أريد أمسح خدها، وخرت مني وكامت هتان: مابيه شي وكفت تمسح بوجهها وطلعت من الغرفة دحگت وراها صافنة، مدري شبيها كل ما أشوفها ألكاها هيج عيونها حمر من موت أيمن ما رجعت مثل قبل أبد أخذت تلفوني وطلعت من الغرفة رحت أكمل وياهم تحضيرات السفرة دخل سلطان للمطبخ أخذ من الطرشي ضربته أمي على أيده فيروز: بطلوا سالفة تاكلون قبل الأكل تشبعون سلطان: خالة فيروز، والله طالعة عينج عليه

شجاج وياي ها؟ لو تحبين جسار وما تحبيني فيروز: هههههه بطل هاي سوالفك وتعال شيل المواعين ويانا سلطان: أنا على التدريب، الأكلته يمج هالفترة كلها لو أتحول بنية أصير چنة معدلة من وراج فيروز: هههههه لا مو شرط، عود ساعد مرتك سلطان: أي، زوجيني ياها يلا وأساعدها فيروز: انت بس أشر وبعيني أندار يدور عليه بعيونه ومن شافني رفع أصبعه ناحيتي وأمي ما منتبهة ترتب بالأكل سلطان: هاي أريدها شردت بسرعة وكفت يم البراد وأمي أندارت

أندار سلطان يدحگلي رافع حاجبه حصرت ضحكتي أخذت المواعين وطلعت خليتهم ع السفره غادة: ملاك تعالي اكعدي يم أدهم خل أروح أنا أجيب المواعين وياهم ملاك: خو أنا أجيبهن غادة: لا أنا، وباوعي جاكيتج مفتوح سديه ملاك: ما ينسد، ما بي دكم غادة: هسه أجيب لج دنبوس وأسده ملاك: تمام كعدت يم أدهم لأن يدحك بالتلفون وتخاف يتحرك ويطيح من القنفة شلته خليته بحضني وهو يدحك بالتلفون شكله يخبل، بحلكه اللهاية وشعره مرتب

وهو أبيض يشبه أبو وعيونه كبار دحگت لسلطان لمن تقدم كعد يمي سند ظهره على تجوة القنفة وحجه سلطان: خوش تفلتين ملاك: لو باقية أمي تبيتني بالشارع اليوم سلطان: لا يمي تباتين ملاك: حتى تبات أنت بالشارع مو أنا مُلاذ تبيتك بالشارع سلطان: دنتظري شوية، ما بقى شي ملاك: لـ شنو؟ سلطان: أخطبج ملاك: مُلاذ ما رح تقبل سلطان: بكيفها؟ لعد المن الله مخليلج لسان ردت أحجي وابتسمت لمن أدهم وخر اللهاية وباس خدي أنداريت بست

خده أنا هم وهو مبتسم ملاك: ولك اكزكز على شكلك سلطان: انجبي وجيبي ملاك: شنو؟ يريد ياخذ أدهم مني، ما قبلت وأدهم يضحك عباله نلعب وياه أنا ضامته وسلطان يريد ياخذه من إيدي سلطان: جيبي ولج ملاك: لا لا أدهم مالي ضحك أدهم وأنا على ضحكته أضحك رفعت راسي من أجت غادة مبتسمة على ضحكة أدهم أنطتني الدنبوس، سديت الجاكيت رفعت عيني لأدهم يريد ينطيني اللهاية سلطان: شوف هذا شلون سربوت من الصغر ملاك: هههه لا أدهم خوش ولد

أتعدى سلطان باس خده وأدهم كشول ملامحه ضحكت من كل گلبي لأن شوارب سلطان تدغ خده سمعت أمي تصيحني، خليت أدهم بإيد سلطان وگمت سمعته يكول سلطان: مو عيب تبوسها ولك ضحكت ورحت يم أمي ظلت تصخرني وهتان وياي تروح وترجع بإيدها تلفونها وأجت إشعارات هواي وصوت الإشعارات ينسمع بعدين رن تلفونها التفتوا الكل مستغربين وهي سدت الصوت وطلعت من يمنا دخلوا مُلاذ وأيهم وأبيل ووراهم دخلت نور كملنا السفره أتلفّت أيهم يدور بالوجوه

أيهم: هتان وينها؟ باهر: هسه جانت هنا ملاك: هسه أصيحها غادة: امشينا أنا وياج گمنا أنا وغادة نصيحها دورنا عليها بالبيت ما لگيناها دگيت باب الحمام سمعتها تحجي هتان: ملاك: يلا صبينا غده هتان: هسه أجيه تقدمت غادة دگت الباب غادة: افتحي الباب أحاجيجه هتان: هسه أجي غادة: لا أدري بيج باجيه وما ترديهم يشوفونج افتحي الباب خلي أحاجيج فتحت الباب وطلعت بوجهنا عيونها حمر غادة: باع عيونها اسمعيني تسوين روحج جنتي بالمطبخ

وتگليلهم كصكصت بصل ورحت أغسل عيوني كامن يحرگني، زين؟ هزت راسها بقبول وطلعنا الكل رفعوا راسهم يدحگولها مستغربين دحگلها أيهم وكال أيهم: هتان تعالي يمي ابتسمت وتقدمت من بين الكاعدين كعدت يم أيهم وأنا كعدت يم مُلاذ باس أيهم شعرها ويحاجيها بهمس هزت راسها برفض گالت هتان: لا ما أبجي بس جنت أسوي البصل وي غادة وعيوني كامن يحرگني رحت أغسل أيهم: أكيد؟ هتان: امم أيهم: ليش هيج ضعفانة انتِ وأمي؟ باهر: ها شقصدك، أنا سمنان؟

أيهم: أي ولك، شنو ما توكلهن؟ باهر: أي بس يكعدن ع السفرة، نطردهن أنا وغادة ضحكنا وغادة تحجي غادة: خو أنا كمشتلك هتان من أنت ما كوصبح وليل أكتلها أيهم: چنه ظالمه غادة: لا وين، فقيرة أيهم: هسه هتان بيها مجال بس نخاف كاتلة باهر همين، شو حسه ما يطلع باهر: لا ما مرجيه منك أبو أبيل أنه الأكتلها مو هي تكتلني غادة: متأكد؟ باهر: لا حبيبتي مو عليج، أقصد هتان ههههههه سلطان: أي شلونها الهند؟ ما شفتولي كاترينا كيف؟

مُلاذ: شفتها گلتلها سلطان يموت عليج سلطان: يا بعد گلبي وشگالت؟ مُلاذ: گالت غدي ما لگيتو غيره يموت عليه سلطان: هو هذا اليحب يضم بگلبه سوده عليه حبتني بس تستحي مُلاذ: هههههه توب من سوالف العجايز سلطان: ما جبتولي هدية منا منا جسار: خمستالاف هواي عليكم مُلاذ: أنا جبتلك سلطان: شجبتيلي مُلاذ: مكينة تزين بيها لحيتك سلطان: وحق هذا الله ما تستحون ضحكوا كل ما يحجون ويتداهرون هيج يضحكونا جسار: لا يلا لا تبجون كلكم جبنالكم هدايا

سلطان: شگد أحبك أخوي الحنين أبو گلب الطيب، بس أكلك تعال شاورني هدية غالية لو رخيصة يعني إذا أبيعها بالسوك شگد تجيب ضحك جسار وهو ياكل دفع سلطان جسار: امشي ولي زفت، تبيعها بالسوك سلطان: هههههه أگللهم هاي من الهند الله وكيلك يبوگوهة ويخلوني هيج جسار: فوك بوكتها يكتلوك وأنا أكتلك وراهم ظلوا الكل يسولفون لحد مخلصنا أكل لمينا المواعين ولزگنا بمُلاذ تسولفلنا عن الهند شوي واتجمعنا كلنا بالصالة وانطونا هدايانا

ظلينا نسولف بعدين كل واحد أخذ له صفحة ونام بقينا بس إحنا البنات كاعدين رحنا كعدنا بغرفتي ونزعنا الشالات بقت بس مُلاذ لابسة شالها غادة: دنزعي الشال مُلاذ: لا عوفي غادة: لج انزعي، هو منو هنا؟ نور: أي صحيح، بس إحنا مُلاذ: نزلت عيني للكاع ساكتة وخرت الشال من شعري كلهم صاحوا مصدومين منزلة راسي، رفعت عيني لملاك المصدوم مسحت على شعري من ورا ساكتة غادة: لج هااي ليش هيج كاصة شعرج؟؟؟ رفعت نظري دحگتلها ورجعت عيني بالكاع

أتذكر يلي صار لمن جنا بالهند... بسبب العلاج الكيماوي بدأ شعري يوكع حجت بالمراية لأيهم اللي بإيده مكينة ودموعه تنزل على خده مُلاذ: لا تبجي عاد إذا اتعالج يطلع من جديد غص وحجه: كومي مُلاذ، كومي من كدام المراية ما راح أكدر أسوي شي وإنه أشوفج شلون تعاينين لروحج ولشعرج جهزت راسي بقبول ساكتة رفعت الكرسي، درته عن المراية وكعدت مُلاذ: يلا زين شعري حجيت وأنا أحس گلبي يتكسر بس لازم أبين له أنا ما مقهورة راح يستصعب يزين شعري

اشتغل صوت المكينة وأيهم يبجي بصوت ما يكدر يكتم صوته، سرت المكينة على راسي غمضت عيني وأنا أتذكر أيام الخطف نفس الصوت ونفس الشعور بس كان شعوري أسوأ من هيج هواي فتحت عيني على أثر خصلات شعري اللي تناثرت على الكاع أتذكرت بابا اللي كان يبوس ظفايري وييبوس شعري، دوم يحبه أكثر من كل شي حسيت نفسي لحظتها أفقد كل شي بابا كان يحبه ومخلي بـ روحه ومستعزة بي كل شي أحبه لأن بابا حبه يروح من إيدي

صفيت كـ مُلاذ الابنة اللي أبوها كان يعشقها أما كل شي جنت أملكه فـ فقدته رجفت شفتي، لزمت إيد بإيد ساكتة عضيت على شفتي مقهورة أيهم گلبه اتكطع يبجي بصوت منهار ما يكدر يسيطر على روحه، يموت على شعري وهسه جاي يزين شعري بإيده شمر المكينة بالكاع، دار الكرسي بسرعة إله حضنني وهو كاعد على ركبه بالكاع مسحت على راسه ساكتة أيهم: راح أموت مُلاذ، راح أموت مُلاذ: أش اسم الله عليك وخر وجهه من صدري مسحت دموعه اللي على خده

بست كصته، حجيت بهدوء مُلاذ: كل شي يتعوض، لا تخاف غطى وجه بإيده ونزل راسه على رجليه جسمه يهتز ويبجي محترك گلبه أيهم: ولج لا تسوين بيه هيج لا تسوين بيه هيج، لا تموتيني مُلاذ: زينت شعري كله لو بعد اكو؟ خلا إيده على راسي ودموعه على خده أيهم: أكوم مُلاذ: تمام، أنا أزينه، أنت عوفه أيهم: لا لا، أنه أسوي مُلاذ: أيهم أنا أسوي، ترا ما يهمني شعري قحط شعر دخيلي، أنا أزينه أيهم: لا لا، أنه أسوي

حجه ونزلت دموعه غطى وجهه ومسح وجه بإيده ما راح أكدر أنسى وكفته وياي لو شخص غيره جان ممكن، بس يعرف بيه سرطاني يعوفني ويتكتر على صفحة وما يهتم إلي بس هو بكل لحظة جان وياي الليل ما ينامه، أكعد ميتة من الوجع بس هو يخفف وجعي ويساعدني سد المكينة، درت وجهي دحگت لنفسي بالمراية ابتسمت وكسرتي واضحة بابتسامتي خليت إيدي على مكان شعري وأمسح عليه عبارة عن صلعة ولا شعراية براسي دحگت لأيهم الواكف وراي دمعته بعينه

التفتت إله، رفعت عيوني دحگت لوجهه وحجيته أحاول أخلي ما ينقهر مُلاذ: صرت مو حلوة، مو؟ شعري جان ساتر عليّ وضعفت هم ضحك ونزلت دمعته مسحتها وهو حجه أيهم: أطيح حظج لو كلتي هيج مرة ثانية أحلى بنية انتِ ورح تبقين أحلى بنية بدون شعر وبشعر، ضعيفة أو سمينة سمرة أو بيضة أو بأي شكل راح تبقين أحلى بنية بعيني وبعيون الكل يكفي إن تكونين مُلاذي ابتسمت، رفعت رجليه حاضنته حاوط ظهري وضَم راسه بركبتي محيت هالذكرى من كدام عيني

لمن گالت غادة غادة: لج حاجيني، ليش كاصة شعرج؟؟ مُلاذ: هيج تغيير غادة: امداج والله انقهرت، جنت أحب شعرچ مُلاذ: عادي يطول غادة: شوكت كصيتي؟ من جنت أخابرچ كاميرا شعرچ جان نفس طوله؟ مُلاذ: قبل لا نجي كصيته نور: بس لو أعرف أيهم شلون قبل؟ مُلاذ: بدون ما يدري كصيته نور: من شافه شگال؟ مُلاذ: عجبه، عادي غادة: هو صح انقهرت لأن كاصته بس كلش لايگلج، ولج أنتِ شنو؟ شو كل شي يلوگلج جابتسمت مُلاذ: وجهي يَرهم عليه كل شي

غادة: وحدج كصيتي لو بـ صالون؟ مُلاذ: وحدي غادة: والله خوش كاصته، حبيته نور: أي كلش حلوة كصتهم مُلاذ: ولا يهمكم، جيبولي المكص أبتر شعركم هسه ضحكن ثنينهن وگالن لا ما نريد رفعت عيني لملاك التمسح بعيونه ما يدرون بيه زينت شعري لأن دوم ألبس باروكة لمن أخابرهم حتى أمي وملاك استغربن شعري ما واكع بس ما سألني، أنا أعرفهم من نظراتهم شعري ولادي وشكلي صاير جنه ولدي غرتي قصيرة، بس بدأ يطول

لمن اتعالجت من السرطان جان اكو مترجم ويانا ومرة بنفس الفندق ويانا من شافتي لابسة شال استغربت وجت تحاجيني، المترجم يترجم إلي كلامها وأنا أجاوبها، مرة جت لـ السويت مالتنا وأنا ضيفتها، أيهم جان طالع هو وجسار وهذه المرة تجي يمي، أفتح تطبيق المترجم بـ جهازي وهي تحجي بالمايكروفون مال جهاز ويترجم كلامها، مدري شموازينا حاطين المترجم ويترجم الها كلامي ويترجم إلي كلامها حجيت الها عن الصار وياي والسرطان والعلاج

يكعدت تسولفلي على أشكال الزيوت مال شعر كل يومية تجيبلي زيت شكل، تگلي عدنا زيوت زينة وهي مرة جبيرة كلش حبيتها، حبابة لمن ردنا نرجع وهي عرفت، انقهرت خطية بسبب زيوتها شعري كام صدك يطول أخذت زيوت منها وأنا راجعة للعراق نور: أگللكم أنا نعست، خل أرجع أنام حتى راكان من اجينا لحد هسه بس يغفي غادة: أي والله، إحنا هم خل نكوم نرجع للبيت لأن تعبت كلش وأدهم كل شوية يبجي أصلاً هنا الكل نام مُلاذ: ظلوا شوية

غادة: لا خل نرجع، هو أصلاً البيت قريب هتان أمج نايمة تكعديها لو شنو؟ هتان: روحوا انتوا، أنا رح أضل شوية يم أيهم لحد ما تكعد أمي بعدين يجيبنا وراكم غادة: تمام صدك كاموا هي وباهر وابنها وراحوا نور أخذت عزيز وابنها وراحوا بقت عمه منى نايمين هي وأمي وأم أيهم وخالة أم جسار هم نايمة وجسار غافي كلهم غافيين بس أنا وهتان وملاك گمت طلعت من يمهن شفت أيهم متمدد بالكاع وجسار وسلطان ثنينهم غافيين ع القنفات

ابتسمت ورحت يم أيهم، أبيل غافي على إيده وهو كاعد وصافن مُلاذ: لك أيهم، حصرتني الضحكة والله أيهم: شنو ليش؟ تقدمت كعدت يمه مُلاذ: أمي حاطتلهم منوم لو شمسوية؟ شوف شلون كلهم نايمين وفاتحين حلوكهم إحنا الراجعين من السفر وتعبانين ما نمنا مثلهم ابتسم يدور وجه يدحكلهم ضحك بهدوء ودار وجه إلي، نحجي بهمس أيهم: ولج أمج موكلتهم تبن مخلية سلطان يطلع من السبعة يجيب سمج وكاربتهم بالشغل، سلطان سولفلي

تگلي كاعدات هي وأمك كل شوية وصاحن سلطااان بس أريد أكعد ع القنفة يصيحن مُلاذ: حتى أمك ذابة ميانة هههههه أيهم: أمي بدون شي تصخر ياهوه الكدامه أنوب أمج وياها، لا ربحنا أهتز جسمي أضحك مُلاذ: أريد أصعد أنام بس أگول عيب منهم مرتبين النا ومدري شنو وأصعد أنام أيهم: خيولون نامي حبيبتي، شحده اللي يحجي مُلاذ: لا عيب أحس أيهم: ولج جايين من السفر وعافونا وناموا، يا عيب هههه مُلاذ: شمدريني أيهم: تعالي تنامين بحضني؟

مُلاذ: لا أيهم، اكعد عني هسه أغفى وإذا كعدوا جسار وسلطان يسوونا مضحكة لأمة محمد أيهم: دخيولون، ذولة البرابيك يرحولج فدوة مُلاذ: برابيك هههههه، وين اكو زلم برابيك؟ أيهم: اكو، جسار وسلطان مُلاذ: كون يسمعوك هسه يخلوك تطلكني أيهم: على جثتي أطلكج ومن ورا ذولة البرابيك؟ لا مستحيل ابتسمت ساكتة دحگت لأبيل خطية شلون نايم تعبان بس ما كدرنا نعوفه هنا يظل يبجي على أبو وأساساً سفرتنا طولت، جان خبلهم لو باقي هنا شوية وغفى حتى أيهم

موتوني كلهم نايمين بطوا گلبي رحت نمت يم ملاك لگيتها غافية، نمت يمها هتان: دحكت لمُلاذ وملاك غافيات گمت بهدوء وطلعت من الغرفة دحگت لأيهم نايم بالكاع ابتسمت أدحگله، شگد مشتاقتله نزلت عيني للتلفون لمن جاني إشعار رفعت عيني أريد أمشي وثبتت خطواتي لمن صارت عيني على جساري اللي نايم ع القنفة، بلعت ريكي ساكتة هزيت راسي برفض "ما أحبه، أنا ما أفكر بي" قنعت نفسي بهالشي، على الرغم كل ما أشوفه لو أسمع اسمه يفز گلبي

قيدت روحي بسيف بس حتى أنسى وجوده حتى خاف أفكر بي، أذكر روحي بسيف درت وجهي ومشيت بهدوء فتحت الباب أريد أطلع، طلع صوتها وكفت أضرب رجليه بالكاع، انفضح فتحتها بسرعة وطلعت وسديتها فتحت باب الشارع، طلعت دحگت لسيارة سيف بالفرع القدام البيت، مشيت ناحيتها فتحت الباب وصعدت، التفتت دحگتله سيف: ليش ما تجاوب على اتصالاتي؟ هتان: تعرف السبب كلش زين! سيف: زعلانه مني؟ ترا بس بستك ما سويت شي هتان: دائماً تسوي نفس الشي!

تحضنني لو تدنى عليه، وأنه ألف مرة گلتلك ما أحب هيج وتجبرني نلتقي وإنه ما أريد نلتقي سيف: غير أشتاقلج؟ هتان: حتى لو ما أريد نلتقي أنا أيهم معلمني هالشي غلط ضحك باستهزاء سيف: أيهم مو جان يحب هاني؟ هتان: مو على الحب بس معلمني ما ألتقي بولد، وأنت جاي تجبرني سيف: إحنا شنو اتفقنا؟ نهايتنا زواج، فـ عادي نلتقي هتان: ما أتوقع نهايتنا زواج لأن أنت أصلاً ما تفكر بهالموضوع سيف: لا، ليش تحجين هيج! غير منتظر أجمع فلوس مهري

هتان: جيت وحاجيت إخواني؟ سألتهم إذا يوافقون حتى تعرف مهري شگد وعلى أساسه تجمع فلوس، مو؟ سيف: أي طبعاً، بس مو هسه تدرين بيه وبشغلي سكتت عنه، دايرة وجهي كل شوية يلتفت للباب ويحجي باستعجال سيف: يلا أردي، خل أروحه هتان: روح ردت أنزل، جر إيدي وباس خدي هتان: لا تسوي هالشي، لا تسووي أريد أدفعه ما يعوفني سيف: باجر التحق، ترضينها التحق وأموت وأنتِ زعلانه عليه؟ هتان: سيف، أحجي والحجي يدخل من هاي الأذن يطلع من الثانية!

گلتلك ما أريد تتقرب مني، ما أحب هالشي سيف: لا عادي، نهايتنا زواج سكتت وهو رجع باس خدي فتحت الباب ونزلت من السيارة أمسح بوجهي: تمام، رضيت. روح عافني وراح، أمسح بخدي ودموعي تنزل بـ شنو دخلت نفسي، ما أريده ولا أريد يخطبني بس أعرف بي ما راح يخطب، كلش أضوج من تصرفاته، أحسه بس يريد يلمسني نزلت دموعي من حيرتي وأنا أمسح بخدي رفعت عيني أريد أخطو وأروح للبيت تجمدت رجلي لمن لقيت جسار ببداية الفرع

ويدحك بوجهي، تعابيره ونظراته تقلق صفنت بي وأحس جسمي برد، اتجمد أتوسل بروحي ما أريد أرجع للصفر سويت نفسي ما مهتمة وأمشي بثقل بـ داخلي أدعي ما شافنا أنا وسيف وصلت يمه أريد أعبره وأكمل مشي سمعته وهو يگول متنرفز جسار: منو هذا؟ درت وجهي وأنا كاعدة عَكسه دحگتله، دار وجه دحگلي بلعت غصتي وحجيته هتان: منو؟ گز على أسنانه جسار: الجان بالسيارة! هتان: صديقتي جسار: وصديقتج شعرها مرفوع وكصير؟ وتبوسج؟ هتان: شقصدك أنت؟ جسار: هتاااان

هتان: لا تصيح بالشارع! جسار: منو هذا؟؟ هتان: شعليك، شلك علاقة؟ جسار: أنتِ صاعدتلج وياه واحد وأخوج جوا نايم وهو مأمن بأخته ما تسوي شي! بلعت ريكي ساكتة وعيوني مملية دموع هتان: ما يخصك هالشي ردت أمشي وهو استوقفني لمن گال جسار: شگد نزلتي من عيني ورخصتي نزلت دموعي ساكتة، عافني وراح دخل دخلت وراه، گعدت أمي بسرعة كلتلها أريد نرجع گوه حاصرة بجيتي، حرك روحي من گلي هيج حتى ما أكدر أدحك بوجهه وأمي گامت

راحت گعدت أيهم وحاجته، كام وصلنا قَبل لا ننزل انطانا فلوس وكال بعد شوية يجينا يتطمن علينا باس كصتي ونزلنا، كلام جسار يتردد بأذاني فعلاً كسرت ثقة إخواني، شگد كرهت روحي أول ما دخلت البيت ركضت لغرفتي وكعدت أبجي، ما أتحملت أسكت أكثر سيف يدزلي، غلقت تلفوني وضميت روحي بالغطى أبجي مقهورة مُلاذ: گعدوا الكل ودعناهم وصعدنا للشقة بدلت لأبيل وكعد يرسم، أبد ما ننطي تلفون نخاف يتعود عليه وبعد ما يعوفه لو يتابع تلفزيون

لو يرسم ويلعب، بس ما ننطي تلفون رحت للغرفة اتمددت، ظهري يوجعني كم دقيقة وانفتح الباب، الغرفة ظلمة دخل أيهم، كعد ع الفراش، فتحت التيبل لامبدحگتله كاعد، منطيني ظهره وبإيده جكارته يدخن ويزفر الدخان، سند كصته على إيده گمت على ركبي أتحرك وأنا على الفراش حضنت ظهره، رفع راسه خلا إيده فوك إيدي المحاوطة بطنه أيهم: عبالي نايم مُلاذ: لا جنت متمددة أيهم: تعالي أندار إالي حاوط خصري وبإيده الثانية الجكارة

أطفأها ورجع إيده الثانية لخصري نزلنا ع الفراش، اتمدد، خدي فوق أرنبة خشمه وهو يحركها على خدي من يوم عرف بيه أحب هالـحركة ظل دوم يسويه مُلاذ: تعبان؟ أيهم: يمج أنسى التعب مُلاذ: لا يمي يجيك التعب أنا أكثر وحدة تعبتك أيهم: أش لا تحجين هالكلام لا تخليني ألجأ لغير طرق بالعقاب مُلاذ: هههه دولي أيهم لا تضحكني ابتسم ساكت مُلاذ: تدري أمي لسا ما شافت شعري أيهم: عادي، حلو، راويه الها مُلاذ: من أنزل أراويها، ملاك گامت تبجي

أيهم: كلتلج لا تلبسين باروكة من تخابريهن حتى يعرفن وما ينصدمون بس أنتِ ما تسمعين الكلام مُلاذ: تدري جنت خايفة ما أتشافى أيهم: الحمد لله اتشافيتي وصرتي أحسن مُلاذ: والله أيهم ترا نسبة شفائي جانت قليلة أيهم: أنتِ قوية وكدرتي تساعدين روحج خليتي نفسيتج متزنة رغم إنه جنت أبجي يمج من خوفي عليج أيهم: بس أنتِ حافظتي على معنوياتج وإيمانج إنو تتشافين أغلب مرضى السرطان يموتون بسبب خوفهم وبسبب النفسية تتفاقم حالتهم

مرض جسدي يصير ونفسي بالتالي يموتون مُلاذ: تدري بشغلة أيهم أيهم: شنو؟ مُلاذ: رغم جنت مو واثقة تماماً إنو أتشافى جنت أظهر هالشي كدامك بس جان عندي إيمان تام إنو رب العالمين كل اللي يجي منه خير، لذلك ما خفت مُلاذ: تأذيت صح بس ما خفت من إنو أموت بسبب المرض لأن أول وتالي كلنا نموت، فـ جنت راضية بكل اللي يصير بيه، راضية أموت بالطريقة المقدرها إلي رب العالمين أيهم: مرة قرأت كلام جان مكتوب

"الله لا يعطي أصعب المعارك إلا لأقوى جنوده" وهذه العبارة تنطبق عليج، جرح كلش تنطبق مُلاذ: وأنت هم تنطبق عليك شوف شگد تأذيت بس صبرت وياي وساعدتني أيهم: جرح، أحبچ هواي مُلاذ: هو مو أكثر مني ضحك أيهم: أنا أكثر مُلاذ: دروح بكيفك سكت عني، أتعود يصيحلي "جرح" وأنا أتعودت على هذي التسمية غفينا شوية وكعدنا گمت غسلت وجهي أحاول أصحصح رحت كدام المراية أوخر بـ كذلتي عن عيني أنداريت لمن أيهم صاحني

أيهم: جَـرح، رايح أتسوك، تعالي اقفلي الباب مُلاذ: تمام، أجي رحت وراه وهو طلع، قفلت الباب رجعت يم أبيل بوسته وكعدنا نتابع تلفزيون شوية ونزلنا أنا وأبيل يم أمي انصدمت من شافت شعري وانقهرت گعدت سولفتلها كل الصار وعن فترة علاجي وهي تكلي أنا جنت ناذرة أطبخ وأوزع للعالم إذا صرتي زينة وتريد تسوي النذر بقيت يمها لـ الليل سوت عشا وكعدنا ننتظر أيهم يجي فيروز: باجر ترجعين لشغلج؟ مُلاذ: أي، الموكلين هواي والعالم منتظريني

فيروز: جان ارتاحيتي أسبوع ورجعتي مُلاذ: لا ما أگدر، بعد كلش تأخرت عليه مو أيهم هم جان ماخذ إجازة، باجر يرجع وأنا أحجي اندگت الباب راحت ملاك تفتحها، سمعت أيهم يحاجيها أيهم: جَـرح يمكم؟ ملاك: جَـرح؟ أيهم: مُلاذ أقصد گمت طلعت من المطبخ مُلاذ: أي يول، هنا أنا قابل أشرد أيهم: ولج ليش ما تگليلي، خبلتيني عبالي صار عليج شي مُلاذ: هههه لا ما بيه شي تعال، أمي مسوية عشا ومنتظرتك أيهم: أمج جانت بواحد صارت بـ 3 مُلاذ: شقصدك

فيروز: أبد أبد ما قصده شي ابتسمت والتفتت دحگتلها وهي تضحك كعدنا ناكل هتان: فتحت تلفوني دحگت لرسائل من سيف -أخوج رجعوا هو ومرته من الهند؟ -وينج؟ -ليش ما تجاوبين -باجر أنتظرج يم الكلية -وينج ليش ما تجاوبيني -جاوبي بنت الكلب وداز وراها هواي رسائل جاوبت على الرسالة اللي سابني بيها هتان: بطل تسب، بطلللل -ليش ما تجاوبين؟ -جنت نايمة -وهذي اللي تنام هلكد تنام؟ -أي -أخوج ومرته رجعوا لو لا؟ -شعليك بيهم -جاي أسألج -أي رجعوا

-اها -أي -باجر اريد أشوفج -ما أداوم -تداومين -ما أداوم، معليك أنت -تداومين ورجلج فوق راسج -أنت مو جنت رح تلتحق؟ -أي ألتحق بس أريد أشوفج تداومين وبلا كلام زايد سديت التلفون ما رديت عليه دخلت غادة للغرفة غادة: يلا صبينا، تعالي أكلي هتان: ما جاي أسوي أي شي وياج، أسفه غادة: خاب شو دنجبي واطلعي گدامي ضحكت وگمت غادة: وخاف عبالج ما منتبه، بعدين أكابلج وأعرف منو سعيد الحظ هتان: لا سعيد ولا تعيس، ما عندي شي

غادة: أي صح، أبيل كدامچ مو غادة ابتسمت ساكتة وطلعت من الغرفة ورا العشا أجتني غادة كعدت يمي غادة: أي ست هتان، سولفي هتان: شسولف؟ غادة: شگد عمره، من وين، شلون عرفتي؟ شنو اسمه؟ هتان: منا من بغداد، دزلي رسالة مكتوب "سلام" وأنا رديت كتبتله منو وظل يسولف وياي واتعرفنا، اسمه سيف غادة: حلو؟ شو راويني صورته ابتسمت: شكله عادي غادة: شو خل أشوفه هتان: ما عندي صور إله غادة: شنو تغارين ولج، دراويني مرة متزوجة أنا، أريد أشوف ذوقج

هتان: والله العظيم ما عندي أي صورة إله كل تصويرنا بجهازه وما ينشر صورة غادة: شنو كل تصويرنا ملتگية بي؟؟ سكتت كارضة شفتي غادة: عزة لج احجي هتان: يجيني ياخذني من الكلية أو ينتظرني هنا غادة: بس غلط تلتقين بيه هتان: أعرف، بس هو يلح عليّ غادة: ليش ما يجي يخطبج؟ هتان: يگول بعد أجمع لـ مهري غادة: هو شنو يشتغل؟ هتان: ضابط غادة: ضابط ويجمع لـ مهري؟ هتان: شمدريني، أنا هم استغربت غادة: خاف يضحك عليج؟ هتان: يسوي فضل لو يطلع

ما يحبني ويعوفني غادة: لحظة لعد إذا مو مهتمة هيج ليش مرتبطة بي؟ هتان: مادري غادة، مادري حرفياً غادة: شنو ما تدرين؟ لعد هسه أنتِ تگولين صورج يمه وهو ما يجي يخطب وما مهتم إذا عافج هتان: ما يسوي شي، قابل يبتزني؟ غادة: لج هتان، شهالعقل اللي عندج؟ هتان: والله قابل يبتزني ويطلب فلوس شو هو ضابط وعنده فلوس خير من الله غادة: چا إلا بتزاز بس بالفلوس؟؟ هتان: لعد؟ غادة: گلج دزيلي صورج وأنتِ بـ فلان شكل

بس ترفضين يجي لإخوانج يراويهم يا؟ هتان صدك تحجين أنتِ؟ هتان: ما يسويها، أنا أعرفه غادة: هي بكيفج، ما يسويها كل شي يسوون ترا! سكتت محتارة غادة: أنتِ تحبي؟ رفعت راسي دحگتلها ساكتة غادة: هتان؟ رفعت عيني لفوق، ماريد دموعي تنزل أنا بنفسي ما أعرف إذا أحبه صدك لو بس حتى أنسى جسار بيه أعرف غلط، بس هو دائماً يدزلي حتى لمن ردت أنفصل عنه وأعوفه توسل بيه حتى أبقى وياه ظل كل يومية يجي للكلية ويصعدني غصب وياه

يكعد ساعات يحجي إلي عن حبه إلي ومرات يبجي لأن أعوفه بقيت ويا وگمت أنطي كل شي يريده اجت فترة فعلاً صرت أهتم إله لأن أشوفه يحبني، أحاول أحبه وكل مرة أگله "أحبك" أحس روحي ما أحجيها صدك ورغم هذا استمريت، مرات أشوفه ما يهتم إلي بس أنا أنطي كل الاهتمام وليش أسوي بروحي هيج ما أعرف هتان: أنا رح أنام، نعست غادة: تمام، على راحتج بس انتبهي من هذا هزيت راسي بقبول وهي طلعت رفعت تلفوني دحگتله، أكرض بشفتي وإيديه ترجف، شرجعك؟

شجابك عليه؟ من لحظة دخلوا بيها للبيت وشفته انه ابتعدت عن المكان اللي هو موجود بي لمن گعدت وأكلت وياهم بس أريد أزيح عيني وأوخرها منه وهو يضحك ويسولف ولا هامه لحد ما صارت عينه بعيني وهو مبتسم، انمحت ابتسامته وأنا درت عيني وكملت أكلي گمت متغاضية وأنا أشوف روحي شلون تحترك فتحت تلفوني دخلت ع الصور طلعت بوجهي صورته خليت وجهي بالغطى واهتز جسمي أبجي شكد أكره حيرتي عليه وياه رفعت راسي لمن جاني إشعار منه

وسعت عيني مصدومة ودخلت ع المحادثة دحگت لرسالة دازلياها ع الواتساب مدري منين جاب رقمي! جسار: ما رح أحجي شي لأيهم ولا تظنين علمودج بس علمود ما أحرك گلب أخوج بس أگولج شغلة وحدة، هالدرب ما رح يفيدج ويمكن أكبر غلط أسوي من ما أحجي إله لأن أنتِ رح تستمرين جسار: بس حياتج ترجع الج، جا إذا تريدين تأذين نفسج ابقي بهالطريق وخلي يتقرب منج بالحرام، بس إذا تريدين تمشين بالطريق الصحيح فـ عوفينه رفعت عيني لحسابه لگيته حاضر

ياخذت رقمه واتصلت بي ع الخط جاوبني جسار: شتريدين؟ هتان: حجيت الي تريده وحظرتني؟ جسار: هتان: أعرف غلط بدون ما تعلمني أما سالفة ما تحجي لأيهم وعلى الرغم إن هالشي لخاطره بس شكراً جسار: هتان هتان اسمعيني سؤال واحد أسألج وجاوبيني عليه لا تجذبينه هتان: أسأل مسحت دمعتي اللي نزلت جسار: تسوين هيج بسببي؟ ليش سويتي هيج؟ حتى تنسيني لو ش... قاطعته قبل لا يكمل ونبرة صوتي ترجف بس أريد أخفيها وأسيطر على روحي

هتان: مو بسببك، أنا أحب سيف وأريده ورح يخطبني عن قريب سكتت أبلع غصتي سمعت صوت الاتصال يطوط، سده بـ وجهي نزلت التلفون أدحك للمكالمة اللي انغلقت بعدني أريد أسد التلفون خابرني سيف جاوبته وهو يحجي ويسب بـ مدري منو هتان: سيف شبيك؟ سيف: إلا أندمها هتان: منيه؟ سكت أسمع صوت أغاني يمه هتان: سيف أنت وين؟ سيف: تريدين عرك؟ زفرت نفس معصبه وسديت الاتصال بـ وجهه ألف مرة گلتله عوف الشرب وما يعوفه وكل ما يشرب يخابرني ساعات يحجي

يسب والف مرة يعيد كلمة "أندمها" من يصحى وأسأله منو يگلي "سكران جنت ما أذكر" غطيت وجهي وحاولت أنام لحد ما نمت صدك، بس خل ينتهي هاليوم مُلاذ: گعدت الصبح رحت لشغلي وأيهم هم راح لشغله وأبيل خلينا يم أمي رجعت ميتة تعب وأيهم گال اليوم يظل بشغله صعدت أبيل ودخلت سبحت وطلعت ذبيت روحي ونمت ميتة ميتة، الشغل متراكم عليّ مر يومين وأيهم بشغله أجن البنات اللي وكعدنا سولفنا نور: حددنا عرسنا أنا وأركان وعزيز وليان بنفس اليوم

مُلاذ: عزيز ما يشتغل غير بالتبديل أزوجك أختي تزوجني أختك شنو؟ نور: هههههه لو تشوفيهم هذا يگله راح آخذ أختك وهذا يرجع يگله أنا هم آخذ أختك وظالين هيج غادة: يمه شگد راح يتعايرون ملاك: أكيد هاي خلصانين منها كعدنا نسولف ونخطط لعرس نور وأركان وعزيز وليان ونور شلعت گلبي متريد زفة خلتني ألطم مُلاذ: لج هو العرس مرة وحدة بالحياة غادة: باع منو يحجي، تذكرين روحج حبيبتي؟ اجيتيني تگليلي أريد ألبس بنطرون بالعرس خزيتنا ولجن

غادة: چا شبيه أنا بعرسي؟ خليت أمي إلا شوية تطلع للمحكمة وتتبرى مني أشتريت فستان عرس ما أجرته حتى وخابرت باهر بنص الليل وهو نايم گلتله "اسمع ولك تسويلي زفة وتترسلي الشارع عالم لا أخزيك وأعزيك" غادة: خليت باهر يتراجع گلي ظلي يم أمج بعدين مشيت وياه ع الناعم وطلعتله وجهي الحقيقي ليلة العرس مُلاذ: باهر يشعر بالندم غادة: وين وين عيني، وين يلگاچ مثلي؟ جاي أسفط الكنتور وأسولف وياه وهنه كاعدات ملتمات بالغرفة گمت حلگي

وضحكت من شفت الساري غادة: شكو؟ طلعت الساري من الكنتور وأنا أضحك غادة: شنو هاي؟ مُلاذ: هههههه هاي جنت ضايجة أيهم ضوجني كل ما أنام يكعدني سويت روحي زعلانة منه وهو عود يراضيني گلي باجر أجيب الج هدية وأنا صدگت أجاني ثاني يوم جايبلي ساري ويكلي اركصي بي وتعلمت الرقص الهندي غادة: يا هههههه لج أنتِ شنو؟ گبل تربطين فيشهم مُلاذ: والله مليت هناك وصرت زينة وضعي اتحسن وأنا أضوج أكعد گمت تعلمت رقص هندي نور: شنو صرتي زينة؟

ليش أنتِ شبيج؟ غادة: نفس السؤال حكيت كصتي من أتذكرت جفصتي مُلاذ: يعني أقصد نفسيتي تحسنت وأنا وأيهم وجسار هواي نطلع بعدين ملينا من الطلعة ظلينا نكعد بالبيت منطلع غادة: يا أنا منج إذا ما أشبر الشوارع كلها ما أكعد ولا أركد مُلاذ: أنتِ طركاعة سودة لو ماخذيج تروحين تركصين وي الهنود بالشارع ضحكت وظلينا نسولف بعدين راحن ولـ الليل أجا أيهم جاي أسولف ويا وحجالي عن ممرضة گلي تدخل غرفته بلا ما تدگ الباب

وهي مو من مساعداته بس أسيل وعبير يساعدنه وهاي متعينة جديد وتساعده خلاني أعطب وأنا صافنة بوجهه مُلاذ: حلوة؟ أيهم: أي، عيونها خضر خزرته متنرفزة، مادري شسوي بعد ضربته راشدي بس مو قوي لأن نرفزني خزرني، گمت من يمه أريد أشرد جر إيدي لـ ورا، راسي صار على متنه، لزم فكي بتك إيد والإيد الثانية مقيد إيديه ثنينهم لـ ورا أيهم: أنتِ شنو نضربيني، أطيح حظج هسه؟ سويت روحي ما خايفة وحجيته مُلاذ: ما تخوفني غيرك، هيج هددوا وما سووا

أيهم: لا بالله، مثل ما گلتِ اللي ما سووا غيري مو أنا جر إيديه لـ ورا أكثر وسحبني وأنا أحاول أفلت روحي من عنده مُلاذ: وخررر، محد گلك تنرفزنييي شنو عيونها خضر أيهم، نوب يگلي حلووه! أيهم: انجبي چا ذيج المرة منيه تمدح جيرانهم الأشگر؟؟ أخذ تيب من المجر بسرعة وشد إيديه، لزمني شد إيديه مُلاذ: هاي كل قوتك أيهم: هههههههههه، ما شفتي شي... دحگت لأيهم وصحت بيم مُلاذ: لك أنت خببببل؟؟؟ أيهم: هههههههه هاي مو كل قوتك

لزگني بالحايط حرفياً بالمعنى الحرفي شالني خلاني على الحايط مرر التيب عليه ولزگني بالحايط والتيب على طولي طبقات وحدة فوك الثانية بحيث بس أتحرك أكوع على وجهي وأيهم متمدد بالكاع إيديه جوا راسه يدحگلي ويضحك وأنا أصيح مُلاذ: مخبببببل رفع ظهره عن الكاع سند روحه على عكسته وبعده رجليه ممدودة ع الكاع أيهم: امداني جنت أخلي صورج يمي وأكضج وأخطفج وهيج ألزمج بالحايط كدامچ جان هسه لا متزوج ولا بطيخ مُلاذ: ولك أيهم طركاعة الله

التافه المخبل الجذاب، افتح ذني عني أيهم: **** على روحج يمه خبلتني أخير شي گمت أعيط مُلاذ: أيهم المخبل الطكه و نص أيهم: اعتذري، فوصتي اعتذري مني أوخ ما أتحمل أشوفج هيج، اكو خيالات بالي أحلى مُلاذ: لو تطلع نخلة براسك ما أعتذر أيهم: لعد ظلي هيج بالـحايط كل شويه أجي أبوسج وأروح هههههه مُلاذ: هلو هلو، نوب مخطط أيهم: جا شعبالج، استغلال الفرص، لعبتي مُلاذ: أيهم والنبي إذا ما فكيتني أول ما تنزلني منا أطلقك

وبنفسي أقدم طلب الطلاق إذا يسألوني ليش أگللهم يلزگني بالحايط أيهم: الفوصة أم براطم، من يگلج القاضي بوية ليش لزگج هالمسكين بالحايط؟ عود گليله لأن ضربته و عبالي يسكت اللي مُلاذ: فد أكرهك دزلي بوسة بالهوا گال: فد أحبچ مُلاذ: أيهم افتح إيدي تعبت شبيك أيهم: گليلي اسفه أيهمي مُلاذ: أيهم شبيك ترا بعدني تعبانة من المرض أحجي وأسوي روحي دايخة ظل يدحگلي ساكت، سويت نفسي راح أتقيء وأحجي وأستعجل أيهم بالبداية ما صدگني

بعدين أجاني يركض كص التيب أول ما كص التيب ولزم بيه ينزلني عضيت متنه أيهم: أخخخخ ولج أخ، خرب أهل جهدي تعبت متنه وطلعت أركض من الغرفة والتيب ملزوك عليه وأركض أبيل شافني مات من الضحك دخلنا لغرفته وگلتله يقفل الباب أيهم: الفوصة البربوك أم براطم، أنا أعلمج گعدت ورا الباب ضحكت وأوخر بالتيب مني گعدت أبيل بحضني، بست شعره شوية ونومت أبيل وطلعت من الغرفة دورت ما لگيته بالصالة، فتحت باب الغرفة ومديت بس عيوني أدوره ما موجود

فزيت من لزم خصري وسد حلگي بإيده أيهم: ادخلي خل أنعل خير دخلني الغرفة وأنا أضحك بالكتمة درت نفسي من بين إيديه الشادة على خصري دحگت بوجهه مُلاذ: شهالنحاسة، تلزگني بالحايط عادي بس أعض متنج مو عادي؟ أيهم: عياله تعيلين وتشردين مُلاذ: يلا كافي نتصالح دحك لـ شفايفي، رفع حواجبه وقال أيهم: جؤ، لازم اكو عقاب مُلاذ: أيهم عوف هالنظرات المستهترة إلك فرصة وحدة تصالحني بيها، تصالح لو لا؟ دنك يبوسني ويمسح على شعري

اتمددنا وأنا نايمة على صدره، حجيت مُلاذ: أريد شعري يطول بسرعة أريد ترجع تظفره إلي أيهم: لو بعد عشر سنين يلا يطول بعد عشر سنين هم أظفره الج وبدون ما أمل ابتسمت ودحگتلهم مُلاذ: عود ليش شعرك مو طويل وأظفر لك؟ أيهم: يا بابا استري علينا وكعدي أنا أدري بسوالفج، شعري ما ينمو، عوفه بحالهم مُلاذ: لا دحك استخدم نفس الزيوت مالاتي هسه ينمو بسرعة، بس دحك من ينمو بسرعة نصوره ومن يطول كلش نظفره ونصوره أيهم: أي بابا وبعد؟

تظفرين شعرج وياي؟ مُلاذ: أي ونشوف منو أطول ظفيرة وظفائرتي طبعاً هي الأطول أيهم: ولج أكعدي ولج ولج، أكبري تعبتيني كافي سوالفج مال فوصات، تعبتني ابتسمت ورفعت نفسي گمت من يمه أحير شنو أسوي لمن أمل رحت كدام المراية أدحك لشعري مضوجني جريت الكرسي وكعدت مشتريه لاستيكات صغار ظليت أشد شعري بيهن وانترس شعري لاستيكات صارت كل خصلة مشدودة بلاستيكه وشعري مرفوع بيهن جني ذولة اللي بالكارتون لمن يتكهربون، متت من الضحك

أنداريت لأيهم، يريد يحاجيني وشاف شكلي ظل مصدوم وأنا متت من الضحك على نظراته أريد أسكت ما أكدر أيهم: ولج هاي شمسويهن؟ مُلاذ: ههههههه دحك عرفت سر شعر الكارتون من يتكهربون هههههه صفن عليه وأنا أدحك لوجهي بالمراية وأموت من الضحك، شكلي يضحكني أيهم: حتى السالفة اللي أريد أحجيها نسيتها ولج هسه ذني شيفتحهن من شعرج شلت اللاستيكات ورحت إله أيهم: لا جَـرح، لااا أعرف هالنظرات إني وخري خل أروح أنام يم أبيل

گمت حلگه بإيدي وكعدت فوك بطنهم مُلاذ: مساع منو لزگني بالحايط؟ أيهم: مو أنا، أبيل مُلاذ: أيهم ودّاعة أمي لو فكرت تتحرك وما تخليني أسوي شعرك ما أنام يمك بعد أيهم: ولج... رفعت إصبعي خليته على حلكي خزرته ونترت مُلاذ: أش ولا حس حجيتها وحاصرتني الضحكة وأيهم انطاني نظرات المُبتلى شديت شعره مثل شعري و ميته من الضحك وهو مرة يضحك على ضحكتي مرة يغندب أيهم: كافي جَـرح مُلاذ: هههههه تعال حباب تعال خل نصور

أيهم: لاااا، كافي خلص عقابج هاهيه لزگت بي نمت بحضنه وكعدت أصور وأنا ميته من الضحك على شكله عاقد حواجبه ومغندب وشعره مشدود وكل وحدة بصفحة كل ما أدحگه أضحك انفتحت الباب دخل أبيل يمسح بعينه دار وجهه يدورنا بعيونه لحد ما شافنا گام يبجي ويصيح وطلع يركض وأنا انهاريت ما أكدر، نمت على رجل أيهم أضحك خطية أجا خايف يريد ينام يمنا واختارع من عدنا أيهم صفن عليه يضحك دفعني من رجله وكام يوخر باللاستيكات

من شعره ويصيح لأبيل وأبيل يبجي بعلو صوته، أريد أسكت روحي هسه شبيه هيج صرت تافه بس ما أكدر واللاستيكات مطشرة بالكاع طلعت ورا أيهم لگيته حاضن أبيل يسكت بي شعره طاير ونص بي لاستيكات ونص مابيه وهو كتمت روحي ورحت للحمام دخلت أضحك وأوخر باللاستيكات عقدوا نور وأركان وعزيز وليان وقرب موعد عرسهم طلعنا اشترينا غراض حجزنا قاعة يصير بيها العرس جانت جبيرة صار العرس وكل شي مثالي نور وفستانها وشكلها مرتب وأنيق

وأركان اللي أجا لابس كله أسود وعزيز وليان يخبلون هم أول ما دخلوا الكل هلهل وطشوا جكليت عليهم بعدين اتقدموا كعدوا ع الكوشات وبدت فقرات العرس من رقص ومن أكل والتحيات بعدين طلعوا الزلم وكامت البنات يرقصن نور عيونها تدمع، أروح وأرجع أرزلها وشايلة راكان بإيدي أكله غم أمك نور: ولج لا تعلمي هيج مُلاذ: ما يفتهم، دشوفي من هسه زلم ما يغم أمي، عفيه وليدي عفيه، دحكي نور لو دمعتي بعد ما أگول عرسج أحطج وأملخجن

نور: هههه لا والله فرحانة مُلاذ: هاي العالم قبل لا يخترعون الفرح چانو يبجون من يفرحون هسه اكو شي اسمه ضحكة، ابتسامة، هلهولة، ركصة، صفكة، واحد من يفرح يسويهن مو يكعد يبجي، لا تفورين دمي گامت نور وتقدمت للنص تركص جريت ليان وشمرتها يم نور يرقصن ثنينه سلمت راكان بإيد عمتي وجريتها بهلهولة رحت سحبت المايك وحجيته مُلاذ: وأحلى هلهولة للعرسان نور وأركان النسوان ما عولن واحد يگللهن هلهلن جرنها بهلهولة طرشن أذاني

رفعت المايك ورجعت حجيت مُلاذ: هلهولة ثانية للعرسان عزيز وليان رجعن يهلهلن وكفت أحجي بالمايك مكيفة بي مُلاذ: جان صاحبها وخذاها، كللللوش أغني لكم؟ بس مو تعيبون على صوتي ضحكن النسوان ويهزن راسهن "أي" شوف ذني مصدگات أغني إلهن هزيت إيدي وشغلت صوت أيهم وهو يغني رفعت المايك وحجيته مُلاذ: نور وليان أغنية من أيهم خاصة الجن هاي هدية مني ابتسمن ويدزلي بوسات بالهوا دزيت لأيهم يدخلون أركان وعزيز وأشرت للنسوان يلبسن عبيهن

وهنه فعلاً لبسن وأنا لبست وكفت يم الدي جي وأول ما دخلوا شغلت أغنية "دروب السفر" مغنيها أيهم التفتت أركان مستغرب من الصوت لحد ما وكعت عينه عليه ابتسمت أشرت إله على نور، ابتسم ابتسامة واسعة اتقدم ناحيتها بخطوات ثگيلة وعيون متوهجة بيها ألفرحة النسوان يصفكن ويا الأغنية ويغنن وياها هسه دسكتن خل يطلع صوت رجلينور: كل جسمي يرجف أحس روحي راح أموت من الفرح بنفس الوقت خايفة يصير شي يخرب سعادتنا لزم أركان إيدي، غمضت عيوني

بـ داخلي تتسلل لهفة وفرحة لهاللحظات شگد اتخيلتها وشگد حلمت بيها غمضت عيوني متمنية هالشعور اللطيف اللي أتوسط گلبي واستقر بي يدوم للأبد اليوم أنا كدام حبيبي اللي من صغري أحبه إيده تحاوط خصري وعيونه تدحگلي يتخلل ذاكرتي أول لحظة شفته بيها قبل سنين: تقدمت ناحية اسكندر وهو واقف وي أركان من بعد ما صاحني اسكندر: امشي جيبي النا دولكة مي هزيت راسي بقبول ودخلت البيت رفعت عيني لأمي اللي دخلت المطبخ

وأنا هستوني دخلت من برا، صاحت بيه -وين طالعة أنتِ؟ صديق أخوج هنا صغيرة أضل أعلم بيج؟؟ نور: ماما... تقدمت عليه لوت أذاني حيل وأنا بچيت من شدة وجع أذاني -بعد ديربالج تطلعين هيجي نور: ماما والله اسكندر راد مي والله هدت أذاني وكالت بنتر -عبالي طلعتي من وحدج امشي خذي لأخوج مي يلاا شنو هاي الفهاوة عافتني وطلعت من المطبخ وعيوني مدمعة أخذت دولكة وترست مي، عيوني ماليتها الدموع أمسحهم وينزلن طلعت صحت لاسكندر ما جاوبني

مديت راسي من الباب وأنا صغيرة گوه شايلة الدولكة، أخاف أوقعها طلعت بهدوء، نزلت الدرجتين القدام الباب وعيني ع المي أخاف يوكع مني سمعت صوته يمي وهو يحجي بخوف أركان: ديربالج بابا لا توكعيها، ثگيلة عليچ رفعت عيني أدحگله وهو اجاني شال الدولكة من إيديه اللي لفتني كلمة "بابا" ونبرته لمن گاله دحگ بـ وجهي وأنا عيوني مدمعة مسحت دموعي وهو أردف مستغرب أركان: ليش تبچين؟ مسحت عيني وحجيت نور: ماما لوت أذاني رفع حواجبه مستغرب

خلا إيده متردد على أذاني يمسح عليها أركان: صارت حمرة دار بـ إيده مي ومسح عليها بالمي أركان: غسليها بمي بارد ظل مخليه على أذني وأنا أدحكله سحب إيده بتردد يدحك بعيوني وكتها حسيته مثل غيمة مطرت على گلبي اللي مشتعلة بي نار وهالمطر طفى النار ابتسمت أدحك بوجهه وهو يدحك لابتسامتي درت وجهي خطيت كم خطوة أريد أدخل جوا، استوقفني لمن گال وراي -أنتِ شنو اسمج؟ التفتت دحگلته، حجيت مترددة نور: أنا نور ابتسم وقال

أركان: شكراً ع المي نونه ابتسمت ابتسامة واسعة يمليها الفرح أول مرة شخص يشكرني على الرغم دوم يصخروني بيتنا بس ولا مرة شخص تشكرني لأن أجيب اله شي حتى بيبي وعمتي أو أي شخص ثاني من لحظتها وأنا حبيت أركان الآن: فتحت عيوني على أثر صوت أركان يهمس بأذني بهدوء وحب يردد كلمات الأغنية أركان: كبر حبنا واشتهر بـ عيونك حبيبي نبتدي دروب السفر رفعت راسي دحگتله مبتسمة لحنت وي الأغنية أكمل نور: على الجرف گعدنا ليالي

مر النهر والنخل عاليتغيرنا وكبرنا يا غالي ظل النهر والنخل عاليمثل نجمة والقمر كبر حبنا وازدهر خلا إيده على خدي غمضت عيوني مرتاحة بهالشعور دگات گلبي أحسها مسموعة أردف بهدوء ونظ