رواية جرح الأيهم الفصل التاسع والأربعون 49 - بقلم أيلان

مُلاذ : أيهم حتى أنا ما صدكت بالبداية كمم حلگي بـ ايده يسكتني نزلت دمعته، يهز راسه بـ رفض و يهمس أيهم : اشش وخرت ايده من حلگي مُلاذ : أيهم اسمعني الله يخليك اسمعني لا تصعبها عليه فوك ما هي صعبه أيهم : لا تسوين بيه هيج مُلاذ لا توجعين گلبي لا توجعين گلبي فوك وجعه لا تفجعي بيج مُلاذ : عدت التحليل ما صدكت و الله ما صدكت أيهم عدت التحليل بس التحليل صحيح أيهم الله يخليك اسمعني و افهمني مُلاذ : أنا صارلي فوك الشهر هيج

أنا صارلي فوك الشهر مريضة تعبت كلش تعبت لا انت و لا أهلي تدرون جسمي و كل شي بيه جاي ينهار كل لحظة رجع يكمم حلكي و دموعه تنزل ما يقبل يصدقني و يهز راسه بـ رفض سندت كصتي على كصته، لزمت ايديه اثبتهم أيهم : ما بيج شي انتِ مُلاذ : بيه هواي بيه أيهم لذتك تعبانه كلش و جسمها منهار استوعب الي حجيته الله يخليك و ساعدني مالي غيرك امي و ملاك رح ينهارن محد غيرك رح يكدر يسندني و يساعدني بجى مقهور و يحضنني كل قوته

أيهم : مُلاذ لا تجذبين عليه لا توجعين گلبي مُلاذ : أنا اخر وحده تريد توجع گلبك النظيف بس أيهم بعد ما أكدر أضم أكثر شدد لزمته عليه يبجي منهار و أنا ما اعرف شسوي بس أريده يستوعب و هو يكرر "انتِ مو مريضة ما بيج شي انتِ" أيهم : التحليل غلط ما بيج شي انتِ يحجيها و يبجي يريد يصدك و ما يريد مُلاذ : و الله صحيح عدتهن أيهم : لا لا لا مُلاذ : كوم نروح لـ المستشفى و نعيدهم؟ وخرت عنه أدحك بـ وجهه غمض عيونه و يبجي جسمه يهتز

هز راسه بـ رفض ما قابل، حَيرني أعرفه يخاف نروح نحلل و يشوف النتيجة كدام عينه، بالأخير وافق أيهم : أنه أعرف التحاليل غلط كام بسرعه يمسح بـ عيونه گلي أبَدل، ما طلع من الغرفة ظل يمي صافن عليه و دموعه متحجرة بـ عينه بدلت ملابسي بسرعه دكيت الباب على أمي بس طلعتلي انقبض گلبي شلون رح أگللها گلتلها تصعد يم أبيل و طلعنا أنا و أيهم طول الطريق ظل ساكت غصته تصعد و تنزل بـ بلعومه عيونه محصورة بيها الدموع و يدحك للـ طريق

خليت ايدي فوك ايده المخليها بـ نص رفع ايدي و باسها خلاها على خده نزلت دموعه فوگاها، مسحتهن بـ ايدي ساكته وصلنا لـ المستشفى و نزلنا سويت التحليل و أيهم يستعجلهم طلعت النتيجة نفسها، أيهم اتخبل ما قابل بـ كلامهم كوه هدأته و طلعته من المستشفى صعدته بـ السيارة و صعدت كلتله نروح منا ساق السيارة لـ مكان قريب، دخلنا بـ فرع و وكف على صفحة بـ بداية الفرع ما يكدر يكمل و دموعه مغوركة عينه نهار يبجي و يحضن بيه و يجذبهم

ما قابل على كلامهم و يهمس "انتِ ما تعوفيني" عصرني عصر بـ حضنه، يبوس بـ وجهي مُلاذ : أيهم حبيبي أيهم دحك رفعت راسه بـ ايديه أدحك بـ وجهه و هو منهار يبجي مثل الطفل ما يقبل يسمع اللي مُلاذ : دحك أنا لسا ما أعرف حالتي شنو انت مو گلت السرطان يتعالج يمكن اتعالج أيهم : أنه لييييش هيج يصير بيه ليش ليش دائماً محروك گلبي عليكم ليش الأفديهم بـ روحي يتأذون و يتأذووون كدام عيني و ما أكدر أسويلهم شي، ليش اتعاقب بيك

ليش مو أنا الي يصير بيه هيج حجاها و ضرب بـ ايديه حيل على وجهه أيهم : ليش دومي ملچوم گلب عليكم لزمت ايديه أهدئه خليتهم بين ايديه أبوسهم مُلاذ : اسم الله عليك لا تحجي هيج رفع راسه تجاه ع الكشن يبجي مخنوق ظليت هادئه و لازمه ثنين ايديه مرت العشر دقايق و هو على نفس البچيه خانك روحه بحيث صوته ما يطلع بس دموعه تنزل و جسمه يهتز كل شويه يدنك يبوس ايديه اتدمر دمار كدام عيني مُلاذ : انت مو تگول السرطان يتعالج؟

أيهم : تتأذين مُلاذ تتأذين روحج تطلع لـ سابع سما و ترجع لج بالعلاج ليش هيج يصير بيه مُلاذ ليش الله يعاقبني بيج و بـ أهلي؟ مُلاذ : حرام أيهم لا تگول هيج قدر هذا باع دحك أنا أتحمل الأذية عادي يمكن اذا اتعالجت ينجح العلاج اصير زينة ها؟ أيهم : شلون أشوفج تتأذين كدام عيني بعد و أتحمل مُلاذ لا تعوفيني لا تعوفيني جَرح مُلاذ : ما أعوفك بس حتى ما أعوفك كانت هم لازم تساعدني و تسندني بهالفترة أيهم : أنه مستعد أسندج العمر كله

بس لا يصير لج شي بس لا تعوفيني أموت بلاچ مالي وجود أموت حجاها و حضنني لـ صدرة حسيت ضلوعي تكسرن نوب اختنكت كل شويه اختنك گوه اجر النفس بعدين يرجع يعتدل تنفسي و ظاله هيج رفعت راسي دحگتله أمسح دموعه و هو متجي راسه ع الكشن يدحك بـ وجهي و دموعه تنزل على خده، شكد بجى عليه ما جذب من سماني "جَرح" أكثر شي جرَحه بـ هالدنيا و أذاه أنا أنا هم تجيت راسي ع الكشن و كعدت نفس وضعيته أدحگله و يدحگلي، لازمه ايده

انتظره شوكت يستوعب و يتقبل بعدين لمن أحجي ضميت شفتي ساكته نزل عينه دحك لـ شفتي لمن ضميتها رجع دحك بـ وجهي، اتقدم عليه من مكانه خلا ايده على خدي يمرر بـ ابهامه عليها قرب وجه أكثر، مَيل راسه يبوسني بـ هدوء خليت ايدي على خده أمسح بـ دموعه و أبادله ابتعدت أدحك بـ وجه، همس بـ صوت مبحوح أيهم : جَرح هزيت راسي بـ معنى "ها" أيهم : شلون أعالجج شلون أنقذج دكتور و أنقذ الكل بس ما جاي أكدر أنقذ الي أحبهم

مُلاذ : لا رح تنقذني أنا لمن عرفت بـ روحي مريضة ما شلت هَم لأن أعرف يمي دكتور كلش زين أخذت ايده طبگت أصابيعه بـ أيدي أعدد مُلاذ : رح يكدر يعالجني و يساعدني و يشافيني ضميت راسه لـ صدري و أمسح خده لحد ما هدء و حسيته استوعب گلتله نروح نحاجي اهلي سويه و رغم هالشي بقت الغصة محصورة بـ بلعومه و كل شويه تنزل دموعه و يمسحهم بـ ايد ترجف وصلنا لـ البيت نزلنا دخلت دحگت لـ شقة أهلي درت وجهي لـ أيهم يدحگلي و عيونه جمرات

تقربت منه مسحت وجه بـ اثنين ايديه مُلاذ : هسه صرت أحسن؟ بلع ويگه يدحك بـ وجهي هز راسه بـ قبول أعرف بعده ما متقبل استوعب بس ما متقبله و وضعه مو زين بس هز راسه حتى ما يحَيرني رجعت درت وجهي دحگت لـ شقة أهلي نزلت نظري لمن أيهم لزم ايدي و رفعها باسها بلع ريگه يكتم غصته، رفع عيونه يدحك لـ فوك حتى لا تنزل دموعه و يرجع يبجي عليه ظل لازم ايدي أتقدمت فتحت باب بيت أهلي بالمفتاح العندي، خابرت امي گلتلها تنزل

اتقدمت كعدت ع القنفه، صحت لـ ملاك تجي يمي أيهم كاعد و صافن، اجت بلا شال بس أيهم ما شافها، رجعت دخلت الغرفة تركض لبست شالها و اجت و امي دخلت البيت يدحگون بـ وجوهنا مستغربين أيهم يقوي لزمته لـ ايدي دحگتله هز راسه بـ معنى "أنا وياج" ابتسمت بـ هدوء ساكته ممُتنه لـ وجوده دحگت لـ أهلي و حجيت : اكعدوا أحاجيكم فيروز : شكو؟ مُلاذ : اكعدوا اتقدمت امي و ملاك كعدن ع القنفه الكدامي أتجول نظري بيناتهم و حجيت

مُلاذ : قبل أكثر من شهر... بلعت ريگي حكيت حاجبي و كملت مُلاذ : جنت نازلة من السيارة أشتري من المحلبس وقتها... اغمى عليه لمن كعدت لگيت نفسي بالمستشفى و يمي دكتور گلي لازم نسوي تحاليل دحكت بـ وجه امي انرسمت ابتسامة خفيفة على ثغرها أعرفتها بـ شنو فكرت، غمضت عيوني حيل و كملت مُلاذ : حللت و طلعت نتيجه التحليل... قاطعتني امي بـ ابتسامة ظاهره أسنانها و عيون ماليتها الفرحه و هي تگول بـ تخمين فيروز : حامل؟ مُلاذ : بيه سرطان

حجيتها و أنا تعابير وجهي بارده و أيهم زاد ضغطه على ايدي، دحگت لـ امي ابتسامتها المرسومة على ثغرها انمحت تدريجياً عيونها يلي جانت بيهم فرحه انطفت همست مصدومة : شـ .. شنو؟ درت عيني لـ ملاك المتصنمه بـ مكانه تدحك بـ وجهي بلا أي ردة فعل الصالة صارت تعم بـ الهدوء بس صوت نَفسنا اليرجف ينسمع مُلاذ : التحليل سويته 3 مرات و بـ كل مره يظهر بيه سرطان قبل لا تنطون ردة فعل تدمرني و تدمركم اسمعوني، اكو علاج و ان شاء الله ينجح

مُلاذ : بس اريدكم تستوعبون و تتقبلون هالشي معرضين اله كل الناس و أنا مو الوحيدة يلي اتمرضت و اكو احتمال چبير اتعالج حجيت و حجيت بس أعرف ما يفيد الحجي و صار يلي توقعته صدمات و صياح و بجيو هوسه صارت و أنا دايخة گوه أركز بيهم ساعات مرت على هالحال و أهلي رافضين كلامي عبالك أنا جبت المرض و خليته بـ روحي سكتت أدحگلهم گمت حضنتهم لـ صدري ما أعرف ليش أنا الأواسييهم على مرضي المفروض همَ يواسوني بس لأن أنا ما أبجي

همَ يظنون أنا ما مهتمه و عادي عندي هو مَرض شلون ما أهتم إله؟ مر هاليوم بـ أسوء ما يكون و أهلي گوه يستوعبون مني اتدمروا و أيهم صافن، انتظرتهم يهدئون ما هدئوا خليت أيهم يجيب الابر المهدئة لأن اتهستروا ما يقبلون يفهموني بس يبجون ثبتت ملاك و أيهم ضربها ابرة بـ زندها و امي هم رغم صيحن و ما قبلن بس انهارن احتاريت شنو أسوي وياهن انتظرتهن لحد ما نامن أخذناهن لـ مكانهن أيهم طلع من الغرفة، اتقدمت وخرت شال ملاك

بست شعرها و غطيتها، رحت لـ امي دحگتلها دنكت بست راسها، مسحت على شعرها گمت وكفت، سديت الضوء و طلعت من الغرفة صعدنا أنا و أيهم لـ الشقة دخلت تعبانه ذبيت شالي، دحگت لـ أيهم اتقدم حاضنني ساكت و أنا بادلته الحضن دحك لـ وجهي، يمرر بـ ابهامه على خدي لزمت ايده و اخذته لـ الغرفة، كعدت على الجرباية رفعت راسي دحگتله واكف كدامي و صافن عليه مُلاذ : اكعد اتقدم كعد بـ جهته سند ظهره على تاج الجرباية

دنيت روحي لـ يمه، خليت راسي على صدره حاوطتني ايده مخليها على زندي خلا خشمه بـ شعري، يبوس شعري ضغطت ايده على زندي، اهتز جسمه يبجي مُلاذ : أيهم حباب كافي تبجي و الله ندمتوني لان حجيت الكم اهتز جسمه يبجي أكثر حتى ما أكدر ألومه بعده وجعه على أخوه و اجيت أنا زدتها عليه و گلتله عن مرضي انتظرته يهدء و يسكت لحد ما فعلاً هدء بقيت نايمه على صدره و هو يلعب بـ شعري نزل ايده من شعري أطراف اصابعه تتحرك على رگبتي

أتحركت متدغدغه من هالحركه رفعت ايدي خليتها على رگبته من الجهه الثانيه و ضميت وجهي بيها، بستها بـ خفه و حجيت مُلاذ : دحك ولك كافي بچي بطيت أفادي گلتلك اصير زينة أن شاء الله جَزعتني رفعت راسي اله دحگتله أبتسم ضحكت و گلت : يول موتتوني و أنا عايشه مسح على شعري يدحك بـ وجهي مبتسم و بعده أثر دموعه على خده أيهم : اسم الله عليج لَـذه گمت كعدت على حيلي تربعت مُلاذ : اسمع أيهم نخلي شروط بهالفترة أيهم : امم بس تعاي

حجا و سحب ايدي بـ هدوء بـ معنى " نامي بـ حضني و سولفي" سحبت ايدي و گلت مُلاذ : لا أدري بسوالفك من أحضنك ما أشوف وجهك و أنا أسولف و انت تدمع فـ ماكو ما تدمع تدحك بـ وجهي يا ويلك لو بجيت سمعت يول؟ و الله أخليك تنام بـ الصالة ابتسم و هز راسه بـ قبول مُلاذ : أي عفيه اسمع ايهومي خل نسولف أيهم: سولفي مُلاذ : هسه أنا الحلوة الحبابة اتمرضت اشش بلا بجي خل اكمل هسه احنا مو تصير بينا فلاونزه من چنا صغار هاي هم فلاونزه

بس مال كبار مال عالم عدها هاي الفلاونزه مثل شربة المي أيهم : مال ابطال خارقين مثل لَـذه مُلاذ : ايييي عفيه بديت تفتهمني لَـذه البطلة شراح تسوي راح تتعالج و أيهم البطل شراح يسوي راح يساعدها بس قبلها نخلي شروط خوش؟ أيهم : خوش يحجي و يسايرني و الدموع محصورة بـ عينهم مُلاذ : اول شرط ممنوع منعاً باتاً البچي و الدموع، من أسئلك شنو يعني بجي تگلي منو هذا ما أعرفة، خوش؟ أيهم : خوش مُلاذ : شنو يعني بچي؟ أيهم : منو هذا ما أعرفه

مُلاذ : وردة ايهومه وردة، أي خل نكمل أيهم : كملي مُلاذ : ممنوع نحجي لـ أي أحد نسافر عود رايحين نتونس أروح أتعالج بـ مكان زين و نرجع أنا وياك مثل الوردة هز راسه ساكت مُلاذ : امي و ملاك نسولف وياهن و نقنعهن راح أصير زينة و انت چذب لك كم چذبة بما إن انت دكتور مو تعرف تچذب علي بس أنا چذب على العالم هم أيهم : زين مُلاذ : اذا ما اقتنعن ناخذهم ويانا خوش؟ أيهم : خوش مُلاذ : بعد اوكف خل أفكر صفنت أفكر بـ شروط

مُلاذ : ها و هناك مو تگلب عليه و تكعد تبجي و الله أعوفك و أهج خوش لو لا أيهم : خوش مُلاذ : و لا تسايرني عبالك زعطوطه كدامك أيهم : ميخالف مُلاذ : شوووف و الله جاي تسايرني مو أنا أعرفك و أعرف سوالفك أيهم : چا شگلج؟ مُلاذ : چذاب و الله اكبر چذاب الشروط يطبن من هاي الأذان يطلعن من الثانية أيهم : ميخالف أطبقهن مُلاذ : احلف گول و داعة لَـذه الحلوة أيهم : و داعة لَـذه الحلوة مُلاذ : شوف چذاااب گبل تنفذ كلامي

أيهم : خرررب ولج شتريدين؟ مُلاذ : أي هيج أريد أيهم الغثيث الما ينبلع أيهم : اشكرج اخلاقج هاي مُلاذ : تخبل مو؟ أيهم : كلش أحلى منها ماكو ابتسمت و اتقدمت حضنتهم مُلاذ : عفيه ايهومه عفيه حضن خصري ساكت و نَفسه يخرخش عود أحاول أنسيه و أضحكه بس لو أموت أدري بي رح يظل تعبان من هالسالفة مُلاذ : أيهم اسمع وخرت من حضنه دحگتله أيهم : هَام مُلاذ : وين نروح أنا وياك؟ أيهم : أشوف دولة بيها خوش دكاترة و هناك نروح

مُلاذ : اسمع اذا بيها حلوين أطلكك هناك و أتزوج واحد حلو انت صرت قديم و كبرت أيهم : أطيح حظج مُلاذ : دولي بكيفك بعدين اذا اشتقت لك ارجع أتزوجك أيهم: انجبي حبيبتي گمتي تجفصين مُلاذ : أيهم اسمع عيونك أفكسها أيهم : يا صلاة محمد شحاچي أنه؟ مُلاذ : خاف الك نيه تدحك لـ وحدة هناك و الله أفكس عيونك دير بالك أيهم : ماليه عيوني انتِ يا بعد عيوني كل الوجوه الا أشوفها وجهج مُلاذ : الله عجبتني الرجل الصالح

ابتسم يدحگلي و عيونه تلمع و أنا أتحرك بـ استمرار مدري شبيه قرب وجهه مني، أرنبة خشمه صارت على خدي ظل يحركها على خدي و أنا بين رجليه ايديه ثنينهم مطوقة خصري، ابتسمت و گلت مُلاذ : أحب هاي الحركه أيهم : يا حركه؟ درت وجهه بـ ايديه و حركت أرنبة خشمي على خده على ثغري ابتسامة ظاهره أسناني مُلاذ : هاي ابتسم و دحك بـ وجهي أيهم : نوب أسويلج ياها دوم مُلاذ : سويها رجعت خليت خدي على خشمه و رفعت روحي أكثر

صرت أنا أعلى منه و هو يسوي هالحركة مُلاذ : شكد جنت أكره أحد يلمسني أيهم : لَـذة الايهم انتِ ابتسمت و هو كمل يهمس بـ أذاني أيهم : محرمة ع الكل و حلالي وحدي مُلاذ : هي بكيفك أيهم : اممم نزل أرنبة خشمه يتحسس رگبتي بيه مُلاذ : لا ما أحبها هنا تخليني أقشعر رفع راسه عض خدي بـ خفه مُلاذ : لااا تعض يبين بـ وجهي ولك أيهم : اشش تعالي نزلني بـ هدوء من خصري و كعدني بين رجليه ظهري على صدره خليت راسي على كتفه

كف ايده تحت فكي يحرك أصابعه عليه مُلاذ : أيهم أيهم : امم مُلاذ : خل نسولف أيهم : سولفي بس اريد أشتت تفكيره گمت اطلع سوالف من جوا الگاع رغم نعسانهم مُلاذ : عود بالبداية من گلتلك تراقبني ليش جذبت و گلت لا؟ أيهم : ذكية و عرفتي أعرفج من زمان بس ما جنت أكدر أگلج أي رح ترتبكين و تفكريني أذيج ردت أكسبج الي و أسولفلج حتى تفهمين تصرفاتي و ليش راقبتج مُلاذ : و الله ذكي زين ليش جنت تخليني أصير عصبية؟ أيهم : أحب عصبيتج تصير طفلة

ما تعرفين شتسولفين تظلين تدردمين مُلاذ : و الله ما تستحي أنا أدردم؟ أيهم : امم مُلاذ : زين بعد شنو أسألك هااا اتذكرت هاي دوم ظلت بـ بالي أيهم : شنو هيه؟ مُلاذ : مرة من اجيت تفتح خياط بطني تتذكر؟ أيهم : امم؟ مُلاذ : ليش عود جنت لابس كمامة؟ أيهم : لا ختولي هاي السالفة مُلاذ : لا حباب احجي لا تصير نحس أيهم : تضوجين اذا عرفتي مُلاذ : ليش؟ ما أضوج ما أضوج جاي نسولف عادي و سألتك و جاوبتني يلا جاوب

أيهم : لا حبيبتي أسألي غير شي مُلاذ : و الله اذا ما جاوبت أزعللللل أيهم : لَـذه رح أطبع الخمسة ع وجهج انچبي و اسكتي غيري السؤا مُلاذ : و الله زعلت ها اها زعلت أيهم : خرب.... سكت متنرفز ردت اكو سحبني من خصري كعدني، نتر بيه أيهم : أيي يلااا أجاوب أنا هم حجيت بـ نفس نبرته مُلاذ : أي يلا جاوب لا تنتر عليه أيهم : لينا جانت تجي و أنا نايم تبوسني و وكتها اجت باستني من ردت أدفعها أتأور حلگي و جانت واضحة و لبست كمامة

مُلاذ : غدي گبور أي و الله و انت شبيك ما عندك لسان لو لسانك بس يمي؟ أيهم : انچبي لَـذه شسويلها أنام فوك الكنتور؟ نمت بـ غير غرفة و ما فاد باقي أقفل الباب على روحي و من يگلولي ليش أگوللهم لأن لينا تتحرش بيه اهتز جسمي أضحك مُلاذ : أتخيييل تجي امك الكتگلك ماما أيهم ليش قافل الباب تگللها ماما هاي لينا عينها زاغت تتحرش بيهههههههههههه ضحك جسمه يهتز أيهم : و الله عدج سوالف مُلاذ : و الله أيهم أنا منك أقفل الباب على روحي

نسوان هالوكت هواي يتحرشن و انت شاب حلو هههههههههه أيهم : انچبي لَـذه لا تضحكيني مُلاذ : مو هي الضحكة بـ فلوس يمعود اضحك اضحك ما دامها ببلاش لا تروح الضحكة هم تصير بـ فلوس و ما نلحك أحجي و ميته من الضحك مدري شبيه و هو على ضحكتي يضحك و صافن عليه أيهم : زين أنا أسألج؟ مُلاذ : لا نعست خل أنام أريد أشرد ادري بـ أسئلته شلونها أضحك و سحب ايدي أيهم : تعاي بربوك حجت التريده و راحت مُلاذ : انت البربوك أيهم : ادبسز مُلاذ :

مستهتر و الله أيهم : خل أسأل انچبي مُلاذ : اهو اسأل يلا أيهم : اوگفي لي خل أسمطج بـ اسئله أشعل جدج شعل بيه مُلاذ : ولك لا تغلط على جدي أيهم : و الله لو يعرف بـ فواصتج هاي مُلاذ : حبيبي بابا متوارث سوالف جدي و أنا توارثت سوالف بابا يعني عدنا وراثة بالفواصه أيهم : مو اگول مستحيل تكون سوالفج الفوصيه من الفطرة لازم تكتسبيها من أحد مُلاذ : نعست اسأل يلا رح أنام و أعوفك أيهم : هم حبيبتي هم حبيتي الج واحد قبلي؟ مُلاذ : لا

وين بس من جنت صغيرة أيهم : اهووووو يا كـ*** حبيتي؟ مُلاذ : ههههههه جان جيراننا و أشقراني أنا جان يعجبني شكله جنت أشوفه بالمحلب مره رحت يمه و هو يخاف مني لأن مرة كتلته أيهم : هههههاي حيل، ليش؟ مُلاذ : لگيته يحاجي بت أم فراس و رحت كتلته و أهله اتعاركوا ويا بابا أيهم : انجبي ولي نام دحگتله ضاج اهتز جسمي أضحك مُلاذ : دروح ابو النسوان هي مرة وحدة و جنت صغيرة كلش عمري سبع سنين بعدين شالو من يمنا

و أصلاً من شالو جنت جبيرة و هو كام ينطيني نظرات و أنا أرذل بي أيهم : تريد تكحلها عمتها شسمه هالكـ***ابو النظرات الاشگر الخايس؟ مُلاذ : إحسان أيهم : إحسان شنو؟ مُلاذ : وين أتذكر اسم أبوه أيهم : بيا منطقة چان؟ مُلاذ : و انت ليش تسأل أيهم : هيجم مُلاذ : بس لا تريد تروح تعارك الولد ترا جنا صغااار زعاطيط أيهم : انجبي مُلاذ : أيهم و الله أحترمك و ما أريد أغلط عليك أيهم : شحدج تغلطين مُلاذ : لا بالله

أيهم : ما تغلطين تخافين مني مُلاذ : متأكد؟ أيهم : أي مُلاذ : و الله أغلط أيهم : يلا بيج خير اغلطي مُلاذ : انجـ... بعدني أريد أكمل و هو گبل باسني ضربت چتفه مختنكه الخبيث يوگعني بـ نفس الفخ يتحداني و يدري بيه ما أخاف بس حتى من أغلط عود يعاقبني و يخليني أبطل وخر وجه يجر نفس و أنا عطت أدفع بي مُلاذ : دووووخر أختنكت أيهم : شو اغلطي بعد مُلاذ : ما أغلط لو تموت ضحك بـ استهزاء، تجى ظهره و هو يگول أيهم : جبانة تخافين مني

مُلاذ : أي يلا أخاف منك ما أسوي الي تريده لو تموت أيهم : جبانة وخرت من حضنه جريت المخده جوا راسي أنطيته ظهري خليت ايدي تحت المخده و أنا أحجي مُلاذ : امشي عني ابو النسوان لينا علمتك ع الاستهتار تبوسك و أنت نايم و أنت تبوسني بـ كل الحالات مستهتر أيهم : مستهتر و لا فوصه أرجع لـ لينا أحسن الي ع الأقل جانت مدللتني و تبوسني بدون ما أطلب أداريت دحگتله خازرته ضربت رجله مُلاذ : ارجع لها يلا أيهم : أي أرجع لها ليش لا

مُلاذ : يلا روح لها ما أريد ك ولي عدل كعدته و حجا متحلف أيهم : منو يولي؟ مُلاذ : أنا ابتسم و رجع كعد بـ مكانه أيهم : عبالي مُلاذ : روح يم لينا يلا حضن بطني و هو يحجي أيهم : ماريد لينا أريدج أنا نام وراي ابتسمت و گلت: لا روح لها أيهم : اشش لَـذه غمضت عيوني ساكته لمن خلا وجه بـ شعري و حاضن بطني خليت ايدي فوك ايده يلي محاوط بيها بطني صوت نَفسه يرجف أحس بي يبلع غصته و أعرفه أنا ما رح ينسى و لا رح يبطل يفكر

مهما أسوي و مهما أضحكه أنداريت اله خليت ايدي على خده احتضن جسمي دحگتله مغمض عيوني و دمعته تغرغر بـ طرف عينه لحد ما نزلت و وكعت على المخده نزلت وجهي كدام وجهه و أنا متمدده يمهم مررت ابهامي على خده، فتح عيونه يدحگلي حجيت بـ هدوء أدحك بـ عيونهم مُلاذ : محد حبني كدك بلع غصته حجا صوته يرجف أيهم : و لا رح يكدر أحد يحبج كد حبج قربت وجهي اكثر اله، اختلطت انفاسنا مُلاذ : لا تبجي احنا مو اتفقنا؟

أيهم : لَـذه أنا أعشقج ما جاي أتحمل أذيتج جرح أموت من النار المستقرة بـ گلبي خل أموت لَـذه بس لا يصيرلج شي مُلاذ : أيهم حباب بس اهدء بعد ما عرفنا شي عن مرضي أيهم : أذيتج و أنتِ مريضة قهرتج و كسرتج حبستج و جرحتج فوك تعبج زدتج تعب أنه شسوي بلاچ لَـذه أنه أموت بلاچ مُلاذ : عادي ما جنت تدري أيهم : من شوكت تعرفين؟ ليش ما حجيتي؟ سولفت اله من اللحظة العرفت بيها لحد هاللحظه بس اتخطيت لمن جنت أتعب و أتقيء و أكح دم

ما ردت أخوفه أكثر هو هم ما فوتها سألني إذا صارت عندي أي أعراض و صار لي شي مو زين بس گلتله لا و نكرت ما أريد أخوفه أكثر أيهم : كل يوم جاي تشوغ روحي على واحد بيكم طول عمري رح يظل گلبي ينلچم عليكم مُلاذ : قدر رب العالمين أيهم : عقاب رب العالمين الي مُلاذ : لا تفكر هيج هو انت شسويت حتى رب العالمين يعاقبك؟ أيهم : ظلمت و أنا مظلوم مُلاذ : شنو؟ ظلمت منو؟ هز راسه بـ رفض يهمس : انسي لَـذه مُلاذ : منو ظلمت؟ صفن يدحك بـ وجهي

نزل عينه من وجهي و رجع رفعها دحگلي عگدت حواجبي أدحگه مستغربة أيهم: ناس ظلمتهم مُلاذ : شسويت الهم؟ أيهم : ضميت عنهم الحقيقة مُلاذ : حقيقة شنو؟ أيهم : ابوهم مات و أنا أعرف بسبب منو مات بس ما حجيت الهم مُلاذ : لحظة شلوون يعني؟؟ صفن بـ وجهي ساكت هزيت راسي بـ معنى "شنو؟ أيهم : دكتور ويانا سوا عملية ابوهم و غلط بـ العملية و ابوهم مات بس ما گدرت أحجي و همَ فكروا ابوهم مات هيج مو بـ خطأ طبي

مُلاذ : و ليش ما گلتلهم ليش ضميت عنهم! أيهم : جنت أول مرة أدخل وياهم و شددوا علينا محد يحجي سكتت و هزيت راسي بـ قبول رجعت گلت بـ شك مُلاذ : بـ شنو ظلموك؟ أيهم : شنو؟ مُلاذ : مو گلت مظلوم و ظلمت؟ أيهم : صارت عندي عداوة وياهم و ظلموني بـ شغلين مُلاذ : ليش ما كلت لـ أهل المريض بعدين؟ أيهم : يلوموني لأن ما گلتلهم من البداية رفعت حواجبي و سكتت مُلاذ : بس مو ذنبك أيهم : لمت روحي لأن ضميته

مُلاذ : ما عندك حل ثاني و جنت جديد عليهم سكتت و هز راسه و أنا ما تحملت أظل كاعدة أكثر و غفيت ثاني يوم نزلت يم أهلي حاجيناهم بعدين رحنا لـ الدكتور شخصوني بـ سرطان الرئة من بعد عدة فحوصات و انتظار... غاده : -عفنا بيتنا أنا و باهر و اجينا كعدنا يم اهله جان أيهم مقرر يرجعون هو و مُلاذ و يكعدون بـ بيت اهله بس باهر اگله أنا ارجع و أكعد يم اهلي لأن ما راهمه يعوفون أهل مُلاذ وحدهم بـ شقتهم و يجون يكعدون يم أهل أيهم

حاولت أغير جو لـ هتان رغم دائماً هي مقهورة بس أنا و باهر سوينا كل شي حتى تصير أحسن لحد ما فعلاً بدت نفسيتها تتحسن بس ما تنسى موت اخوها اكيد و كل ليلة أصعد ألكاها تبجي عليه شكد هالشي صعب عليهم همَ و أُمهم أبد ما نسوا أيمن رغم مرت فترة طويلة ملامحهم دائماً ينقري بيها الحزن يلي قاهر باهر أكثر أبو يلي ما اجا حتى و لا شافهم و لا سأل عليهم و ما حضر فاتحة أيمن بس أول يوم بعدين مختفي، قهر باهر كلش باهر : طول عمره ما يهتملنا

بس مو حتى بـ هذا الموقف! حاولت أواسي و أنسيه و بـ مرور الايام صار ما يهتم لـ هالسالفة و أهم شي عنده أهله يكعد يحجي وياهم ساعات من يرجع من شغله حتى أيهم يجي يكعد و يسولفون و يحاولون يساندون هتان و امهم و واحد يسند الثاني بس واضح نظرات الكسرة الي بـ عيونهم امي رجعت لـ بيتها ما قبلت تظل يمي و أم أيهم وضعها تعبان و أيهم دوم يجي يشد الها مغذيات و يتعارك وياها لأن ما تاكل لحد ما صارت تاكل لگمتين بس أحسن من ماكو

باهر بس يرجع من شغله ياخذ هتان و يطلع هاي يظل يفر بيها، حاولنا نخليها تلتهي وي أدم تسكتة لمن يبجي او تسويله حليب او تنومه أي شي المهم تتلهى لحد ما تنام حتى ما تظل تبجي طول الليل و تصبح عيونها مورمه اجونا أيهم و مُلاذ و اهلها سوينا غده و تغدينا سويه و ام مُلاذ مدري شبيها لا هي ولا ملاك زينات وجههن تعبان و هنَ تعبانات سألت مُلاذ گالت هنَ هيج من زمان صعدنا كعدنا بـ غرفة هتان صفنت عليهن كل وحدة وجهها مضيم

ناقص يجيبون ملاية يحطونها بـ نصنا و تكمل خابرت لـ نور گلتلها تجي لأن ما أگدرلهن وحدي و نوب القهر صفنت على رقم صافيناز و تذكرت من مُلاذ اجت و گلتلنا صافيناز رجعت لـ سوريا يابه شكد انقهرت سديت تلفوني و صفنت وياهن لحد ما انفتحت الباب و دخلت نور نور : بعد جيبن ملاية و الطمن غاده : أنا هم گلت رفعت راسها مُلاذ تدحگلها گامت سلمت عليها و أنا ملاك و هتان هم سلمنا عليها، كعدت يمname غاده : خل نلعب فد لعب

مُلاذ : يا لعبه غاده زعاطيط احنا خزرتها و أشرت بـ عيوني على هتان دحگت لـ هتان رفعت حواجبها، هزت راسها بـ قبول مُلاذ : أي يلا نلعب هتان : أنا مالي خلگ مُلاذ : لا حبيبتي رح تلعبين ويانا و انتِ مثل الحبابه ابتسمت هتان ساكته مالها خلق تجادل مُلاذ : شنو نلعب؟ صفنت أفكر عندي ولد رح يصير بطولي و أنا العب العاب و ألعب الناس وياي غاده : نسأل عن شعور و انتوا تگولون منو الشخص الي عشتوا هالشعور ويا أو منو الشخص الي تفكرون بي

أول ما أسألكم عن شعور معين مُلاذ : كل شي ما فهمت غاده : يعني... قاطعتني نور نور : أنا فهمت مثلاً تگلج شعور الفرحه ف انتِ مثلاً تگولين الفرحة أمي يعني من أشوفها تفرحين أو شعور الاهتمام مثلاً من تسألج عن الاهتمام يجي ببالج الشخص التهتمين اله أو يهتم الج غاده : أي بالضبط مُلاذ : يلا خوش أبدأ غاده : بيمن نبدي؟ مُلاذ : أنا أخير شي غاده : اوكي نبدي بـ هتان ابتسمت هتان ساكته و احنا بدينا بيها حتى نغير جوها و نخليها

تسولف و تتفاعل ويانا غاده: اممم، شعور الاهتمام؟ هتان : أخواني غاده : النقاء يعني تحسين واحد نقي هتان : أبيل و أدهم غاده : الهَم؟ تحسين واحد مهموم هتان : امي غاده : التعب؟ هتان : أيهم غاده : الغموض هتان : أيمن سكتت و عيونها بدت تغرغر غيرت سؤالي بسرعه غاده : الفرح؟ هتان : باهر ابتسمت و كملت غاده : الحب؟ دحگت بـ وجهي ساكته حجت مُلاذ مقاطعتنا مُلاذ : يلا دور ملاك خزرت مُلاذ ردت لي الخزرة درينا لـ ملاك و ظلينا نسألها

غاده : الخوف؟ ملاك : أنا غاده : الاهتمام؟ ملاك : مُلاذ و امي غاده : القوة؟ ملاك : مُلاذ غاده : الاشتياق؟ ملاك : بابا رغم ما شايفته عبست شفتي و كملت غاده : الحب؟ مُلاذ : هيو بعدها صغيرة شبيج تركضين ورا الحب غاده: يا عمي أبصم بالعشرة ملاك رح تعنس من وراج يا أختي عوفي البنية خليها تتنفس مُلاذ : انچبي بعدها صغيرة غاده : الله يساعدج ملاك خل نكمل بـ نور نور : لا تسألني أسئلة سخيفة غاده : و الله ما تستحين مُلاذ : ديلا

اسألي لا تمسلتين غاده : و الله انتِ التمسلتين حيوانه جرتني مُلاذ من شعري عطت و جريت كذلتها و البنات گامن يضحكن كيفنا أنا وياها من ضحكن البنات و هتان هم مُلاذ : يلا ولي كافي ابدي اسألي لا أرفسج غاده : أعلمج أنا بعدين مُلاذ : ديلا يلا تعلمني أم الاحم غاده : ادبسز و الله ضحكت، جانت رح تگول أم الزلم الادبسز هالكلمة لاطشة بـ حلگها و شوكت ما تحاجيني تگلي هيج غاده : يلا نور أم دمعه نور : أحجي عاد غاده : الحب؟

مُلاذ : كلنا نعرف خل أجوب بدالها أركان غاده: حبيبتي انتِ عندج عداوة وي شعور الحب؟ لو تغارين عليهن لو شنو؟ كل ما أسأل وحدة عن الحب تجاوبين انتِ مُلاذ : و انتِ شبيج بـ كل شي تلطشين الحب ترا ما يوكل خبز حبيباتي لا تغريجن هاي غاده : عمي شنو من نقمة انتِ؟ عوفيهن يحبن سديتي قسمتهن لو ها ها بس أبو نقمة الله يحبج مُلاذ : شني؟ ضحكت و هي بعدين يلا فهمت و ضحكت أنداريت لـ نور غاده : الاشتياق نور : هم أركان غاده : التعب؟

نور : أنا أو مُلاذ مُلاذ : انتوا شبيكم مخليني الشعور السيء تراني و الله بشر مثلي مثلكم غاده : انچبي انتِ القوية مالتنا شنسوي نقتدي بيج ما عدنا غيرج شو أنا گلت هيج و ملاك طكتها بجيه ظلينا وحدة صافنة بـ وجه الثانية غاده : يا ولج ملاك شگلت؟؟ يا هاي صدك تحجي البنية مُلاذ : كملن هسه نجوع عگدت حواجبي أدحگله ناخذت مُلاذ ملاك و طلعت من الغرفة أنداريت لـ نور مستغربة غاده : شبيهم هذول؟ نور : مادري والله هتان : ملاك

ضايجة انتبهت الها غاده : حتى أنا انتبهت بس ما يحجون شبيهن نور : خاف علمود درجات لو شي تدرن بـ ملاك تنقهر من اقل شي رفعت أكتافي بـ عدم معرفة و رجعت أسألها شويه و اجن ملاك و مُلاذ كعدن يمname گلتلي مُلاذ نكمل، وصل دورها غاده : أيييي اجا دورج مُلاذ : اهو احجي خلصيني غاده : الحُــب؟ حجيتها و أنا اجرها و الكل ضحكو گالن البنات كلهن بـ صوت واحد قبل لا هي تجاوب : أيهم دحگتلهن تضحك مُلاذ : غلط غاده : هتان طلعت تضحك على اخوج

لعد منو اذا غلط؟ مُلاذ : بابا غاده : فهمت، الاهتمام؟ مُلاذ : أيهم غاده : الامان؟ مُلاذ : بابا، أيهم غاده : المسؤوليه؟ مُلاذ : ملاك ملاك : شلون؟ مُلاذ : أنا أحس نفسي مسؤولة عنج ابتسمت ملاك و مُلاذ مسحت على ظهرها و باست شعرها، كملت غاده : الصداقة؟ مُلاذ : انتن غاده : التعب؟ مُلاذ : امي و أيهم غاده : الفرح مُلاذ : أيهم غاده : شنو هاي كله أيهم؟؟؟ مُلاذ : أيهم محسسني بـ هواي مشاعر انتِ گلتلي الحب اول شي و أنا ما گلت أيهم

لأن أيهم منطيني شعور أحلى من الحب و أثمن منه غاده : خرب شرفج طلعتي تفتهمين مُلاذ : انچبي ادبسز غاده : هههههه زين الثقة؟ لان حضرة جنابج بيه ما تثقين خل نشوف بيمن مُلاذ : بـ أيهم غاده : أيهم بسبب كثرة اختيارات مُلاذ الهفاز ويانا بـ كلاص ستيل يصير بي المي بارد و طيب مُلاذ : شكد تافه و وين باهر خل اگله الله يساعده عليج ضحكنا و نزلنا جوه و همَ كاعدين گالو أيهم و مُلاذ رح يسافرون لـ الخارج فترة

و خالة فيروز و ملاك رح يبقن هنا هسه فهمت ليش ضايجين و مقهورين دمعت عيون خالة فيروز و مسحتهم گالوا باجر يروحون و رادوا يگولون النا مُلاذ : بس مو بـ شكل دائم يعني فترة و نرجع باهر : زين ليش خيركم؟ مُلاذ : تعبنا كلش بـ هالفترة و نريد نسافر بلكي تتحسن نفسيتنا و نصير أفضل باهر : زين تسوون اذا يفيدكم هالشي خوش تسوون أيهم : ما نطول أصلاً نرجع بسرعه مُلاذ : باهر : لا يابه اخذوا راحتكم أنا هنا يم اهلي و بيت خاله فيروز يمي

لا تخلون بالكم عليهم مُلاذ : ردت أخذهم وياي بس يخرب استقرارهم هناك رح نكعد بـ فندق و ما أدري شكد و نرجع و ملاك عدها دوام رح يظلون محيرين باهر: لا يابه شالسالفة يمي لا تخلين بالج مُلاذ : ما تقصر، أنا أصلاً وصيت سلطان عليهم هز باهر راسه بـ قبول شويه و گاموا طلعوا ملاك راحت تغسل لأن جانت تبجي و مُلاذ راحت وراها رحت وراهم أشوفهم سمعت ملاك تحاجي مُلاذ ملاك : لو مخليتنا نجي وياج أيهم شلون رح يگدر وحده؟

مُلاذ : لا ملاك يخرب نظامكم و انتِ عندج دراسة أنا و أيهم ندبر روحنا و يمكن جسار هم يجي ملاك : بس تنتبهين على روحج و تخابرينه هزت راسها مُلاذ بـ قبول و ملاك حضنتها تبجي بعدين طلعوا كلهم و راحوا و احنا ودعناهم و دخلنا ملاك: -صارت الدنيا صبح و أنا و امي ما نايمين و مُلاذ بقت يمنا الليل كله تهدي بينا حل الصبح و هي خابرت أيهم گلتله ينزل تريكنا سويه و بعدين صعدوا يبدلون و نزلوا همَ و أبيل اجو جسار و باهر و امه و سلطان

جسار و سلطان يعرفون بـ مرض مُلاذ بس الباقيين محد يعرف حتى ما يخافون و هم أيهم گال اذا عرفوا ينطون ردة فعل و رح نحتار نواسي بيهم و نقنع بيهم وكفنا نودعهم و أنا أوصي مُلاذ تدير بالها على نفسها و تبچي صعدوا بـ السيارة يودعونا أنا و امي فحطنا من البجي سلطان يمنا يهدي بينا، راحوا باهر و امه دخلنا البيت دموعنا على خدنا لـ الظهر راح سلطان يجيب غده من برا لأن تعبانين و امي مو بـ حال تسوي غده ابد

دك الباب، لبست شالي و گمت فتحته دخل سلطان يدحك بـ وجهي و عيوني مورمات سلطان: گولن يا الله ترا مو حاله هاي امج تبجي و انتِ تبجين حتى اختج اتاذت زايد ما هي متأذيه! ملاك : سهله اختي يصير بيها سرطان؟ سلطان : مو سهله بس گالولج اكو علاج و ممكن تتعالج و هسه رح تدخل بـ فترة علاج ادعي الها بدال ما تبجين وراها! سكتت كلام سلطان صح بس أبقى مقهورة عليها و أبجي امي ما قبلت تاكل بس سلطان خبلنا خابر لـ مُلاذ گاللها ما نقبل ناكل

خابرتنا مُلاذ لعبت بينا لعب و تلوم نفسها لأن گالت الناسكتنا و من لا چاره اكلنا، معدتي أحسها ما تتقبل شي شوية و امي دخلت نامت رحت دحگت لـ سلطان ايده جوا خده و غاف ردت أكعده بس ما گدرت، اخذت غطا و غطيته كعدت ع القنفه الكدامه و دمعتي تفتر بـ عيني ما أكدر أسكت روحي و لا أكدر أنسى كلش انقهر من أتذكرها لمن سولفت لنا و أحنا ولا شخص انتبه لـ حالتها و تدهورها گمت سبحت و بدلت و مشطت كعدت أدرس لـ المغرب امي و سلطان بعدهم نايمين

رفعت عيني لمن اجتني رسالة على تلفوني من سلطان دازلي -نايمه؟ -لا -ليش عفتيني نايم ما كعدتيني؟ -مبين تعبان ما كعدتك -لا تضوجين مني لأن حاجيتج الصبح هالشكل بس لازم تتعلمين تصيرين قوية و ما تبجين على كل شي. -حالتها جانت تتدهور كدامنا و محد انتبه الها -تعالي للصالة أحاجيج قبل لا أروح غلقت تلفوني گمت لبست شالي و طلعت لـ برا فتحت الباب، مديت راسي دحگتله اركان، دفع الباب و دخل وسدها نور: ما تتحمل للصبح تنتظر نفسخ

نزلت راسي أريد أنزع الحلقة ما تطلع من أصبعي، ناشغت ابجي و هو لزم ايدي نترها من فوك ايدي الي بيها الحلقة اركان : نزعيها حتى أكسر إصبعج الشلتي منها و ايدج الي نزعتي بها الحلقة حجاها و سحبني لـ حضنه مسح على شعري من فوك الشال و أنا ما تحملت بجيت مهضومة من كلامه كلش اركان: اشش كافي بجي نور : و لا أهمك أنا اركان : تهميني و اكثر من كل شي بس كلامج يزرف گلبي تخليني أحچي مو خوش حچي وياچ و بعدين تبجين تعيلين و تبجين

نور : ما حجيت شي غلط انت... كمم حلگي بـ ايده و هو حاضنني اركان : اسكتي لا تحرگين گلبي بـ كلامج مسحت دموعي و حضنت رگبته دقايق و ابتعدت أدحگله مسح دموعي بـ كفى ايده نور : وافق على عزيز اركان : خل يولي السگط يفشر عليه ألزمة أنعل والديه أشبعة نعل إذا شفته نور : اركان خطيه، يعني انت تجي بـ نص الليل تحضن اخته حلال و هو يجي يخطب اختك حرام اركان : بابا بعدهم صغار تفتهمين عليه؟ يعني أنا أزوج ليان هو يعرف ليان شنو؟

لا يغرج عمرها ذاك اليوم اظفرها مكسور لگيتها كاعدة بـ الزاوية تبجي مو مال مسؤولية و بيت بعدها صغيرة نور : تتعلم و هو هم يتعلم شنو شفت عزيز قابل متزوج من قبل؟ اركان : بابا عزيز شاف ضيم و ظلايم شايل مسؤوليتج و مسؤولية عمته جان بس ليان حساسة إذا يبزها تجيني تبجي نور : اگلك و انت شنو شايفني أطلع عمالة من الصبح؟ أنا هم اليبزني أبچي و ما جنت أشتغل بس من تعينت و ما شايلة مسؤولية أحد لا تدور حجج اركان وافق على خطوبة عزيز

اركان: أوافق عليه بس إذا اجتني بـ يوم ليان مقهورة من ورا أطيح حظه و حظ أبو خوش؟ نور : أي هسه وافق عليه اركان : امشي صيح طايح الحظ نور : لا تحاجي هيج اركان ترا چبير عيب تحاجي هيج! اركان : أي يلا صيحي نور : تمام مشيت اريد أصيحه وكفني اركان اركان : نور نور : اركان : شو تعالي؟ نور : شنو؟ اتدنيت لـ يمه مستغربة و هو جذب خصري بسرعه و باس خدي ضحكت و خليت ايدي على چتفه نور : اركان ترا بعدنا مخطوبين

اركان : اسكتي رح نتزوج طك گلبي و بعد لا تبجين أنعل خيرج إذا بجيتي ابتسمت و دفعته بـ خفه مستحيه نور : خل أصيح عزيز دخلت صحت لـ عزيز عصب شنو تخابرينه و شنو يجي لـ هنا طلعته دفع لـ اركان و مديت راسي أدحگلهم خشن صوته عزيز و راح يمشي لـ اركان طريقه تضحك عزيز : شتسوي هنا؟ مالك مرة يمنا جره اركان من اذانه اركان : مساع عليمن فشرت عزيز : عليك اركان : طايح الحظ شلون تريد أنطيك اختي و أنت بـ هاي تصرفاتك الخايسة؟ عزيز : تريدني

أبوس كصتك يعني اركان : باوع ولك تخطبها و تتزوجون بس ماكو إذا بجيتها أهل اهلك أشعلهم عزيز : و أنت بجي نور و تشوف اركان : امشي ولي منا يلا داره و ضربه جلاق أندار له عزيز شمره بلطوبة الصغيرة الي بـ ايده دائماً بـ ايده و ما يعوفها ابد كلش يحبها لزمها اركان اركان : بعد لو تموت ما أنطيها الكعافة و طلع ركض ورا عزيز طلع ورا ياخذ الطوبة ضحكت و دخلت جوا بالله ذوله كبار جنهم زعاطيط يتعاركون و يتضاربون

بس لأن صايرة بيناتهم ميانه هيج يسوون و أدري بيهم واحد ما يزعل من الثاني... مُلاذ : -على طول ما أنا بـ الطيارة عندي غثيان و دايخة من وصلنا و نزلنا من الطيارة رحنا لـ الفندق أخذنا سويت كامل النا و سويت لـ جسار أول ما دخلت گبل نمت فزيت و أنا مغمضه عيوني، مختنكة كلش رفعت راسي صداع ينهش دماغي دحگت بـ وجه أيهم الغافي يمي و أبيل بـ نصنا بعدني كاعدة و صار عندي غثيان قوي ركضت لـ الحمام و أيهم على صوت ركضتي فز

دخلت أتقيء دم حسيت روحي رح تطلع و أيهم يمي متخبل، روحي راحت دايخة و لازمه بـ ايد أيهم نزلت لـ الگاع مخنوكة و أيهم وراي بعدني هستوني أريد أكعد و رجعلي الغثيان ضربت ايد أيهم بـ ايدي اتشبت بيها أريد أوگف رفعهني بسرعه و رجعت أتقيأت دارني أيهم اله يغسل بـ وجهي و أنا ما أكدر أتحمل أكثر گبل أغمى عليه و صوت أيهم يصيح و جسار صحيت لگيت روحي بـ المستشفى و مشكليلي بطالة دم، نزلت عيني لـ أيهم

الي مخلي ايديه بين راسه و صافن بـ الگاع حسيت بلاعيمي مشحرجة ما اكدر أحجي حتى رفعت ايدي بـ صعوبه ندسته رفع عينه الي دحگلي عيونه حمر و مورمات، بسرعه صار يسألني عن وضعي أشرت اله ما أكدر أحجي و هو فهمني گلي رح نبدي العلاج و ما بقى شي و حاجا الدكاتره و اتفق وياهم، هزيت راسي بـ قبول همست بـ صعوبه مُلاذ : جسـ... ـار أيهم : لا تتعبين روحج راح يشتري لـ أبيل هسه نامي و ارتاحي نسبة دمج قليله كلش

و جاي نخليلج بطالة دم حتى تصيرين أحسن رفع ايديه يبوسهم و عيونه تدمع مسحت دمعته بـ صعوبه بـ اصابعي جسمي كلش تعبان گوه أتحرك و ايديه كلها مزرفة و كدمات زرك أيهم : امج خابرت گلتلها نايمه من تگدرين تحجين گليلي حتى ندزلها رساله هزيت راسي بـ قبول حركت ايدي اله بـ معنى "نام يمي" أيهم : ما أكدر أخاف أعورج هزيت راسي بـ رفض كام حول مكان تعلاكة المغذي الي بي دم و تمدد يمي، نام وراي، اخذت ايده حاوطت بيها بطني و غفيت لمن حضنني

هتان : -أتقدمت من الشارع أمشي ناحيته، مبتسمة هتان : حبيبي ابتسم بـ وسع و اتقدم حضنني -اشتاقيتلج هتان : أكثر .. بس لا تحضنني لا يشوفنا أحد -محد يشوفنا لا تخافين لو ما تريديني؟ هتان : سيف لا تضوجني -ما أضوج هالعيون الحلوة تعالي أصعدي حبيبتي فتح الي باب السيارة أتقدمت صعدت، دحگت اله مبتسمة هتان : وين رح نروح؟ -لـ بيتي؟ هتان : لا لـ مطعم سيف : تخافين مني انتِ؟ هزيت راسي بـ رفض هتان : لا بس ما أرتاح أساساً

لأن زعلت وافقت ع الطلعة اليوم ما جنت رايده اطلع سيف : أي صيري حبابة و لا تضوجيني منج شغل السياره و خلا ايده ع الگير خليت ايدي فوك ايده و رفعت عيني اله هتان: من زمان أريد أسألك ليش دائماً تلبس چفوف؟ صار حلمي أشوف ايدك بدون چف ابتسم و گال -شوفيها بس لا تخافين من تشوفيها هتان: ليش شبيها؟ أخذتها بـ فضول بين أيديه نزعتها الچف وسعت عيوني مصدومة عاينت لـ اصابعه ثنين مكطومات هتان : اصابيعك؟؟؟

رفعت عيني أدحگله و أرجع عيني لـ ايده ضحك بـ هدوء، سحبها مني لبس الچف الجلد الأسود بـ عيونه نظرات و على ثغره ابتسامة استغربتها ...