رواية جرح الأيهم الفصل السادس 6 - بقلم أيلان

واكفين انا وغاده. بعدت شعري من على كتفي لـ ورا. التفتت لـ غاده: ملل، لو ما جايه احسنت. تقربت غاده الي اكثر، شاورتني: -شوفي ذاك الواكف هناك، صارله ساعه يدحگلج و الجكاره منزلت من حلكه. ابتعدت ادحگلها بـ استغراب. حجيت بعصبية: -وينه خل ادحس الكعب و الجكاره بحلكه سوا. غاده: هههههههههههه. خزرتها: -وينه؟ اشرتلي بـ عيونها. التفتت للجهه الي اشرتلي بـ عيونها عليها. دحگت ماكو احد. -وين؟ دحگت غاده لنفس الاتجاهه.

-يا عزه هذا وينه؟ -و انا داسئلج وينه؟ -هستوه جان هنا شنو اتبخر و طار. كام تتلفت تدور بعيونها. ضربتها على زندها: -عوفي خيولي لا تدورين، بعد احسن، اذا اشوفه افكس عيونه. غاده: مُلاذ ليش تتعصبين من هالامور؟ بالعكس شي حلو شخص ينعجب بيج، هالشي دلاله على جاذبيتج و جمالج. -يا اعجاب، اتعقد من هسوالف. غاده: يا شلون بعدين ما تتزوجين؟

-ما احب هالسوالف ما اطيقها. صحيح كل شخص يحتاج فد مصدر حنان و اهتمام بحياته ويحبه، بس انا مكتفيه ما اعرف. انا هالسوالف ما ترسخ بعقلي و لا توالمني طبيعتي هيج. رفعت اكتافها غاده بـ عدم معرفة، ساكته. غاده: و الله فد جان يتاملج الولد و يجر حسرات. -انجبي شالكلام. ضحكت غاده، درت وجهي. رفعت عيوني دحگت لـ صاحب الديجي اكف كدامه شخص طويل. صاحب الديجي اكصر منه بـ شوية. دحگتله منطينا ظهره، ما اشوف شكله.

لابس اسود و رافع ردن لنص ايدها. خذ المايك، ظل داير وجهه. التفتت على غاده: -غاده وين نور؟ -ماعرف ما شفتها. -ها ذيج اجت. اجت نور وكفت يمي. تجمعوا كل الي واكفين صارو كدامي و يصيحون: حيووو حيوو. ما اكدر اشوف اي شي منهم و ادحك لـ ظهرهم بـ استغراب. -شكو؟ غاده: ما اعرف. رفعت حواجبي، ظليت ساكته و واكفه وراهم. غاده: شوفي ذاك الولد و الله حلو. -منو؟ غاده: ذاك الولد دحگي اسمه باهر. -ما اشوفه. غاده: يحبيبي شلون يضحك مُلاذ شوف.

-ما اشوووف من هذولة الكدامياذا انتِ زرقاء اليمامة ليزر مو عيون جد. دحگت لـ غاده. من عضت شفتها و گالت: -الك ونه اويلي باع الخلقة. ضربتها بالجنطه: -تأدبي، هسه يطلع جنه قرد. غاده: ماكو غيرج قرد والله. قاطع صوتها لمن بدت الموسيقى و فوراً سكتت. دك تلفوني، نزلت راسي دحگت. رقم اسكندر، رفضته. ما اهتميت وكفت الم غراضي الي مطشرتهن غاده على الطاوله. رفعت عيني لمن اتخلل لمسامعي صوت غنائي مُتناغم وي الموسيقى.

خشن مختلط بـ بعض البحه و الحنيه. -يالجمالك سومري. غنوا وراه كل يلي واكفين بـ انسجام. -يالجمالك سومري. -و نظرات عينك بابلية، نظرات عينك بابلية. فزيت لمن ندستني نور. نور: اسكندر اجه يلا امشي خل نروح. -هذا والله بومه. نور: ههههه. اخذت جنطتي، رحت على غاده. سديت اذاني، احجي بصوت عالي حتى غاده تسمعني: -تجين وياي؟ -وين؟ -اسكندر رح ياخذنا انا و نور. -لا روحوا انتم انا رح اظل شوية. -تعالي ويانا احسن. -لا، رح اظل شوي بعد.

-تمام، باي. -بيباي. طلعنا انا و نور، صعدنا وي اسكندر. جنت رايده اشوف بيبي لذالك رحت وياهم. دحگلي اسكندر بالمراية: -شنو هاللبس هذا؟ الصبح جنت مستعجل و ما حجيتمُلاذ: و انت شعليك؟ نور: حبابين لا تتعاركون. اسكندر: انتِ اسكتي لا افصم ظهرج. -احجي عدل وي نور. دحگلي بالمراية مطكك عيونه: -لا بالله. -و الله. نور: مُلاذ كافي حبابه. صف اسكندر السيارة. فتح الباب و نزل متجهه ناحيتي.

فتحت الباب انا هم، نزلت الهجر زندي و احنا بنص الشارع. اسكندر: مُلاذ اذا ما بطلتي تراددين و الله العظيم اطلعلج گلب ثاني. نزلت نور تحاول تفاككنا و تتوسل بينا نبتعد عن بعض. -بَطل تتدخل بيهانت مالك اي حق عليه زييين؟ دفعته عني: لو ما بيبي تريد تشوفني ما اخطي وياك منا لـ هنا، لا تحط لنفسك قيمة. عفتهم ردت اوكف تكسير. غم محاولات نور و اسكندر يرجعوني للسيارة بس ما قبلت. اتصلت عليه بيبي. -ها بيبي.

-ادبسز شني ها بيبي، دكولي هلو بيبي شلونج خرنكعيه. -هلو بيبي شلونج؟ -بخير يمه بخير. اكلج حبيبه تجين وي اسكندر و نويره مو؟ -لا بيبي ما رح اجي. -ليييش ؟ ولج و انا منتظرتج. دحگت لـ اسكندر خازرته: -اسئلي حفيدج و هو يگلج السبب. -حفيدي ؟ ياهو حفيديبس لا اسكندر الاغم ضوجج؟ -بيبي على غير مره انتِ تعالي النا. -ولج تعاليلي منتظرتج و الله ي مُلاذ اذا ما اجيتي ازعل عليجمعليج بهذا الخرنكعي الادبسز انا اجر اذانه.

-بيبي ما اريد و الله هسه بس اصعد ويا نرجع نتعارك و اركع راسه بالجامه. -دهر دهر شني من بنيه شمالج يمه حتى الزلم ما تسوي سواياتج. -انا مو زلمة يلا حجيه على غير يوم اجي. -انجبي و تجيني هسه لا انعنع ضلوعج بالعكازه شني ما تسمعين كلامي؟ -حجيه. -اش و لا كلمة، نص ساعه اشوفج كدامي انتِ و نويرة. رح اخابر هذا الخرنكعي ما يحاجيج. حكيت كصتي. ما اكدر اكللها لا اذا ما رحت، تزعل مني صدك. -تمام. سدت الاتصال مني. دحگت لـ اسكندر.

اسكندر: امشي اص. قبل ليكمل اجاله اتصال. فتح الاتصال يدحگلي خازرني. رجعت خزرته، لزمت ايدي نور. نور: يلا حبابه خل نصعد. غمضت عيوني بنفاذ صبر. رحت للسيارة صعدت. صعد نور يمي حطت ايدها على ايدي تهدأني: -انتِ ليش ما تردييين عليه؟؟ ليش تسكتين اله ما تشوفينه شايخ هيج لان تسكتون اله! نور: مُلاذ انتِ بعيدة عنه، انا كاعده وياه بالبيت ياذيني. ذاك اليوم دناكل و صاحني على الجاي لان تاخرت شمرني بالخاشوكه.

-مووو عاقل نور اخوج مريض و الله لازم يعالجونه. نور: عفيه اسكتي اجا لا تتعاركون. دحگتلها شلون خايفة، ايديها ترجف، عيونها مملية دموع. مسحت وجهي بحيرة. اكرهه اشوفها هيج، بس ما الومها. اسكندر مدمرها و مدمر نفسيتها. غير عن امها يلي تفضل اسكندر عليها و ابوها ما مهتم بيها. رحنا للبيت بيبي. نزلت فتحوا الباب. اصلاً اندل الطريق اخذت نور و دخلت. لكيت بيبي كاعدة بالصاله هي و عمة منار.

بيبي: هلا بحيباتي هلا بوليداتي، تعالن يـ ريحة الجنة خل ابوسجن. رحنا عليها مبتسمين انا و نور. رغم نور كاعدة يمها و بنفس البيت بس تحبها كلش، اذا داومت تشتاقلها و تظل منتظرتها، مداريتها و تحبها كلش. هي و عمة منار. تقدمنا انا و نور، دنكنا راسنا اله. باست راسنا الحجية مسحت على شعري. نور مُحجبة مسحت على راسها من فوك الشال. سلمنا على عمة منار هم. منارس: شلونكم عمه؟ اختج شلونها؟ شلون صارت؟ -الحمدلله بخير عمه، انتوا شلونكم؟

منارس: نسأل عليج يرويحتي. ابتسمت ساكته. بيبي: شبيج انتِ و اسكندر؟ -بيبي مو انا الشنو بيه، اسكندر يلي شبي! اجا صوت اسكندر: -شبيه؟ التفتت دحگتله: -انا هم اسئل شبيك؟ شاك هدومك و تركض وراي و حاير بسوالف الناس و ناسي سوالفك. عگد حواجبه يدحگلي. واكف بالباب، تقدم عليه بخطوات بطيئة. اسكندر: شنيه سوالفي؟ انداريت لـ بيبي يلي گالت باستغراب: -شني يمه يا سوالف؟ -ماكو شي بيبي. دحگتلي بـ شك: -اكيد؟ -اي.

اسكندر: لا شو بالله تعالي احجيلي، شنو سوالفي؟ ششايفة عليه؟ تجيت ظهري على القنفة. مسحت على رجلي دحگتله من فوك لجوا گلت بنبرة شكم: -و انت شبيك هيج خفت؟ اسكندر: اكسر سنونج بحلكج منو خايف؟ بيبي: اسكندررر! اسكندر: حجيه! ما تشوفين كلامها. بيبي: معليك بيهاا و هي ما تحجي. اسكندر: شفتيني حاجيتها من دخلت؟ بيبي: اسكندر. سكت يدحگلي و يخوزر. دحگتله مكشولة ملامحي. -خفى لهاي العيون. بيبي: تعاي بيبي نويرة وينج يمه تعالي.

طلعت نور من الغرفة لابسه بجامتها. نور: ها بيبي، جنت ابدل. بيبي: تعالي بيبي حبيبه اكعدي كدامي. اجت نور كعدت كدامها. اشوت بيبي لـ عمتي، هزت راسها عمتي بابتسامة. كامت من يمنا. اجت ورا شي انطت علاكة لـ بيبي. دحكنا بوجههم باستغراب. اخذ اسكندر كرسي، كعد كدامنا. اسكندر: شني هاي حجية؟ بيبي: هدايا للبنات. اسكندر: جا شني انا الضابط مو بعينج؟ بيبي: شتريد مو جبتلك سيارة و ذيج وياها مفصخها كل يومية بيها علة. اسكندر: حجية هي تعطل.

بيبي: انجب وصخ هي تعطل ما تكول انت تحركها حرك لمن تسوقهااحدث موديل اشتريتلك بس انت ادبسز. استلمتة الحجية حاصل فاصل سكت بعد ما حجا. تفوخ گلبي بي من تلعب بي لعب. طلعت من الجيس علب. عكدنا حواجبنا انا و نور ندحك للـ علب و لـ بعض. -بيبي شنو هاي؟ بيبي: افتحيها يمه و شوفي. فتحت العلبة، توسعت عيوني. رفعت راسي ادحك لـ بيبي مصدومة. -شنو هاي؟ بيبي: يمه شمالج شتشوفين؟ طلعت المفتاح يلي بالعلبة. بيبي: مفتاح سيارتج هذا.

رمشت ما مستوعبة. بيبي: السيارة تحتاجينها ما دامج دخلتي كُلية، اتعلمي سياقة و روحي و ارجعي بيها و هم تفيدج انتِ و امج و اختج. -بيبي بس كلش غاليييه! بيبي: ماكو شي اغلى منج يمه. اسكندر: حجيه وين اكو بنيه تسوق؟ خزرته بيبي، عاطت بي: -انجببببب. كام من الكرسي. دفرة برجلة، طلع. مرة عمي بـ باب الصالة تهز بايدها. بيبي: عابت لهاي الشكولات. دحگت بيبي لـ نور المبتسمة و فرحانه على هديتي، انا بعدني مستغربة.

د نكت بيبي باست خد نور مبتسمة. بيبي: بس انتِ بيج خير من كل اهلج. حضنتها نور: حبيبتي بيبي. رجعت بيبي دحگتلي: -حطيت بسيارتج بانزين و كسرت عليها بيضه و جاهزه كامله مكملة. ظليت صافنه ما اعرف احجي. انطت بيبي علبة نور، فتحتها. بيبي جايبه الها تلفون احدث اصدار. حطت بيبي ايدها على ايد نور. بيبي: انا جبتلج هدية من قبل لمن صرتي كُليه، هسه جبتلج تفلون. دحك لـ نور مبتسمة، عيونها غوركن. الابتسامة على ثغرها ارتجفت شفايفه.

د نكت راسها تبجي على رجل بيبي تتشكره. بيبي و منارس يمسحون على شعرها و يدحگن لبعض مبتسمات. نور تبجي و تضحك سوا، ضحكت وياها. بيبي: شبيج بيبي دمعتج بطرف عينج شوفي هاي بت عمج جبتلها سيارة و لسا صافنه. -بيبي و العباس مستغربة و مصدومة، السيارة غالية. بيبي: راح اكسرج بالعوجية گلنالج مو اغلى منج. ضحكت ادحكله. رفعت نفسي، بست راسها. نور فرحانه كلش. لمن شفتها هيج فرحت على فرحتها. فارقت الابتسامة شفايفها لمن امها گالت:

-شنو عمه ما تدرين اخوها و ابوها ما يقبلون يصير عدها تلفون. بيبي: انا الجبته الها، ابن امه و ابو اليحجيالي ما عاجبة يضرب راسه بسبع حيطان. مستثكله عله بتج الفرحة و الابتسامة. دهر صابج يَ علياء هم حاسبه روحج ام؟ تعلمي من فيروز صارلها سنين تركض وحدها عدها بنات ثنين ما فد يوم دكت بابنالو طلبت المساعدة من عدناربتهم و تعبت عليهم، انتِ فالحة بس تتفلحكين لهذاك الاغم. عابتلكم كون. طككن عيون مرة عمي.

بيبي مكشولة ملامحها تدحگلها. سكتت علياء، عيونها يريدن يطلعن من مكانهم. رجعت بيبي انطتني علبه بيها تلفون. بيبي: هذا هم الج يمه. -شكراً حجية يوم الاخدمج بعرس. جس جابت العوجيه ضربتني بيه. -ههههههه، شبيج حجية خجلتيكليلي اذا عاجبج واحد و بهاي الرگبهاذا ما جبته الج. بيبي: ولج منارس ما اكدر اكوم هاي صايرة ادبسز. رجعت ضربتني بالعوجية و انا كمزت مبتعده اضحك. -تسلمين بيبي. بيبي: ما سويت شي يمة حبيبه.

كعدت نور تفتح بالجهاز و تجربة طايرة من الفرح بيها. بيبي: مُلاذ. -ها بيبي؟ بيبي: ليش ما اجيتي الي من تمرضت ملاك. دحگتلها ساكته. رفعت ايدي حكيت حاجبي. تنهدت و گلت: -ما جنت رايده اجي لـ هنا و اطلب المساعدة من الناس يلي ما وكفوا وياناباصعب وقت النا لا تفهميني غلط تعرفين منو اقصد. قاطعتني مرة عمي: -خو فضيها و كولي تقصديمن! انداريت دحگتله: -اقصدج و اقصد عمي اكو مشكله؟ علياء: ما متربيه ما عليج عتب.

-لا عفية انتِ المتربيه، خليت التربيه الج. گالت بيبي بحده: -علياء كلمة وحده بعد، لسانج اكصه. مُلاذ جايه يمي و الي يحاجيها انعل والد والديه. علياء: عمه هو منو شيخها علينا غيرج؟ خزرتها بيبي. شالت عوجيتها تريد تضاربها. ما منعتها و لا سويت شي. اتمنى انا اضربها بدال بيبي. دخلوا الولد و شافوا بيبي هيج صاروا يصيحون، بيبي ملخت علياء. نور و منارس راحو يفاككوهم.

مصارت مشكلة، عمي دار عليه بدا يتهمني، انا فگر و ام مشاكل و مسمومه و ادبسز و ما مربايه الخ. كمت بسرعة. -انت منو و تحجي عليه هيييج؟ عمي: ادبسز انتِ ما متربيهم. -متربيه و غصباً على كل شارب خووش؟ ربي ابنك اول و تعال بعدين احجي بالتربية. عمي: امج وينها لو حايرة تفرفرررش. شطت للسما كلشي و لا امي. عطت بعلو صوتي: -تروح فدوة للتراب التمشي عليها امي، امي مو حراميه و لا عديمة مسؤولية مثلك. جانو يفاككون بيبي و علياء.

دارو عليه يحاولون يسكتوني. تقدم اسكندر من بينهم جر شعري. صرخت بيبي بـ فزع تحاول تبعده عني. رفعت ايدي و ضربته بكل قوتي على وجهه. ابتعد، مطبوعه اصابعي على وجهه. -قذرييين و الله لو ما بيبي ما اخطي خطوة لهالبيت مرتك العالت، مرتك السوت المشكله و ماكو فگر و مسموم غيركجنت تضم الفلوس جوا مخدتك ابو فليس. عمي: ادبسززززلا تتطاولين عليه لا افصم ضلوعج. -دروووووح يفصم ضلوعيفصم ضلوع ابنك ابو العرك. دحگلي اسكندر عيونه صارن بكصته.

الصالة عَمت بالهدوء. بيبي وكفت بيناتنا، تدفع بيهم عني. اسكندر عيونه حمر دمدمارات وجهه نطبخ. دحگت بـ عيونه بلا ما ارتجف ذرة. مو انا يلي تسكت عن حقهامو انا يلي الناس تمشي شرفيات براسه. -لووو مرتك السحارة كل دقيقتين تزركك بسحر و انت وراها تركض و ما ملحككاعدين تمشون شرفياتكم براسيو تذبون سمكم و تريدون اسكت الكم. دكيت صدري.

-انا مُلاذ، بنت إلياسلا تخبطون بيني وبين الباقين لان اخليلكم اثر مني بحياتكم و روح إلياس الماكو اعز منهما تنسون بعد منو انا. فريتهم فر. دفعت اسكندر الواكف كدامي. مشخص عيونه عليه بـ عصبية. صحت انا متجهه نحو الباب: -حجية بعد ما اخطي خطوة لهالبيت، تريدين تعاليلي انتِ. دفعت الباب، طلعت من البيت. لحكني عزوز يركض وراي. وكفني اعصابي فايره. عزيز: نسيتي سويج السيارة. -ما اعرف اسوق. عزيز: اوديج انا. -ماريد رح امشي.

عزيز: بس هدي اعصابج. ترا و العباس انا معليه. حاولت اهدء، هزيت راسي بقبول. عزوز صعد بسيارتي يوصلني للبيتو يعلمني سياقة. عزيز: دحگي مُلاذ النوب ياهو اليضوجج ادعم. -ههههه. عزيز: الف الحمد و الشكر الك ربيگلت هسه رح تلفني بـ علابي تنسيني زماني. -ليش؟ عزيز: شوف هاي نوب تسئل. هم صح اهلي بس شني و العباس خفتحتى ما كملت العركه طفرت لـ غرفتي. ابتسمت دحگت من الجامة. -اخوك اول واحد ادعمة. عزيز: بالله هذا حتى انا اتمنى ادعمه.

-عزوز اخوك خبل و الله مو صاحي. عزيز: ادري يمعودة ادري. -الظاهر انت هم معاني منه. عزيز: بس امانة الله هو يحبجو شكد محاجي امي و ابوي عليجمُلاذ: سد الموضوع. عزيز: فهميني شبيكم بس ممالخبوية كعدوا و اتفاهموا شسالفة. -عزيز !! متعرف اخوك انت؟ عزيز: اعرفه مُلاذ اعرفه. بس هذا كله لان ما تريدينه. -حتى يمكم فاضحني فضيحة. عزيز: مو قصة فاضحج، بس شوفي رح اسولفلج شغلة. -سولف. عزيز: بداعة ابوج لا تحجين. -عزوز؟ من شوكت انا احجي؟

عزيز: شوفي اسكندر يشرب. ظليت ادحگله بلا ردة فعل. -ما استغرب لان اسكندر هذا و منو مساع گال لـ اهلك ابنكم ابو العرك؟ عزيز: المهم هو كل يومية جاي النا يتطوطحاهلي ما يدرون انا ادخله للبيتهو يسب بهذا و ذاك، ف انا انصب عليهاكعد يمه اسولف ويا هو يكت الاول و التاليمُلاذ: ترا حرام يلي جاي يسويه! عزيز: اعرف، اعرف. بس گلتلج هو خبل. -مو خبل ساقط و ادبسز و مستهتر. عزيز: هاهيه مو خبل ساقط و ادبسز و مستهتر. -انت شجاي تسوي؟

عزيز: شني؟ -ماخذني على كد عقلي؟ عزيز: يمعوده شنو ما رايد روحيحتى اجادلج هسه اذا تگليلي الدنياء تمطر من الكاع مو من السما هم اگلج صح. -احسن. رجع عزوز يعلمني على السياقة و انا اتعلم بسرعة. صعدت مكانه، بديت اسوق. من بعد محاولات بديت اسوق تقريباً بطريقة صحيحة و وصلت انا بـ نفسي للبيت. عزيز: باجر اجيج هم اعلمج. -تمام. ودعنا بعض راح هو لـ بيته بـ تكسي. دخلت للبيت. من بعد هذا اليوماجت هواي ايام تكون مليئة بالمشاكل و التعب.

امي عرفت بـ عركتي وي عمي عصبت مني لان حجيت هيجبس ما اهتميت المهم ما خليتها بگلبينور صداقتنا انا وياهاما الها دخل بعوائلنا و المشاكل ابداً. مريت على كُليتهااخذتها وياي، رحنا انا وياها لـ مطعم. كعدنا ناكل، خلصنا اكل طلبنا گهوه. كمت من الميز لمن خلصت الكهوه. كامت نور وياي رحنا للحمامات. غسلنا، وكفت نور تعدل نفسها. انا غسلت ايديهمسحت على ركبتي بالمي لان حسيت روحي محتره رغم الدنيا باردة. -رح اطلع انا من تخلصين تعالي.

نور: تمام. عفتها، طلعت من الحمامات. رجعت للطاولة، شلت جنطتي لبستها. دحگت بـ استغراب لمن لكيت ورقة تحت الجنطة. سحبتها ادحگلها. عكدت حواجبي بـ استغراب، مكتوب. "و احسُد كاساتٍ تقبل ثغرها اذا وضعتها موضع اللثم في الفمِ". ظليت ادحك للورقة ما مفتهم. نزل نظري لجهة الورقة لـ جوا مكتوب ب خط صغير. "احتفظي بيها". يمها مرسوم ابتسامة. عفستها بـ ايدي بـ انزعاج. رفعت راسي اتلفت ادحك منو الي حطها. رحت سئلت الكاشير گال ما يعرف.

رجعت ادحك المكان فارغ. ماكو غير ولد و بنية و طفلة وياهم و الباقين نوادل. رجعت على الكاشير: -اكو كاميرات مراقبة؟ هز راسة الكاشير بـ رفض. غمضت عيوني متنرفزه. طلعت وكفت بالباب. نور صارلها هواي بالحمام. ظليت منتظره بباب المطعم. فزيت لمن اجالي ولد يركض. طاني ورقة اريد احجي. كمل ركض مبتعد عني. -ي ولدد. مشيت ورا خطوات بس هو حيل سريع بالركض. تراجعت بـ خطواتي، ادحك للورقة.

"لا تدورين ما تلگيني و لا تعفسين الورقه مو صارف عليها حبر". رفعت حواجبي فوكها يتأمر. رفعت راسي عيوني تايهه. بس احاول اعرف ياهوه و اشوفه. لزمت الورقة، ابتسمت بـ مُكر. حطيت اصابعي من الاطراف و مزكتها و انا مبتسمه ابتسامه واسعه. رافعه عيوني ادحك للفراغ. صارت نصين رجعت مزكتها. صارت قطع صغار. مشيت للـ زبالة (تكرمون) ملتفته و مبتسمه، شمرتها بالزبالة. درت وجهي، رجعت لـ مكاني، اتجتفت. مرت دقايق، اجاني الطفل نفسه يلهث و يركض.

حضرت روحي. شمر الورقة ب ايدي، راد يروح. انا لزمت جف ايده حيل جارته. -منو الي يدزك احجي. دحگلي و دحك لـ رجلي. التفت و دحك لجهة. دحگت ويا جانت فارغه. دار وجهه الي و گال: اسف. عكدت حواجبي داس على رجلي. عطت، هديت ايده راح يركض. -يا ابن المجلوب يا مطيكمت اشتم، نزلت لزمت رجلي احس داحترك من العصبية. رفعت الورقة اقراها. "هههههه فدوة الج حتى هاي مزكيها يلا". غمضت عيوني حيل.

المجلوب السافل يدري اسوي ب عنادة و يگلي هيج، اسوي هيج. عفستها، حطيتها ب جيبي و خازره الي يروح و يجي. رفعت نفسي وكفت. رجلي تاذيني كلش. گوه دايسه عليها، اشتعلت اعصابي. لمن تذكرت نور بعدها بالحمام. درت وجهي و عطت: نور. فزت واكفه كدامي: -يمه اسمالله شبيج هاي اجيت. -امشي كددددامي. -يا وجع شبيج؟ -انجبي و امشيي نور امشياذاناتي كامت تطلع نار. اخذت نور وصلتها لـ بيته. رحت انا لـ بيتي. فتحت الباب انادي امي: يمه. دحگت بالغرفة،

عيوني تدور عليها: يمه وينج. دورتها بالصالة ماكو. ولا بالمطبخ اتصلت على خالة جنات. گالت مو يمي، ملاك بالدوام ماهيه. البيت فارغ. تصادر لمسامعي صوت مي الحمام. رحت دكيت الباب. -يمه جاي تسبحين؟ ماكو صوت طرقتها عدة طرقات و اطرح سؤالي بس ماكو جواب. اتخلل بداخلي شعور الخوف. فتحت باب الحمام. توسعت عيوني بصدمة. تجمدت بمكاني. امي بالكاع، الدم يحاوطها من كل جهه. ياخذ المي مجراه، يختلط وي الدم.