رواية جرح الأيهم الفصل الثاني والثلاثون 32 - بقلم أيلان

مُلاذ : شلونك؟ أبيل : زين. بست خده، رجع باس خدي. ابتسمت و ضحكت على لطافته. تفتت لـ أيهم يلي متخصر و يدحگلنا. أيهم : تعال ولك. ضحك أبيل و راح لـ أيهم. أيهم : ادخلي لـ البيت اكعدي. تظلين واكفه هيج بـ الشارع؟ مُلاذ : لا شكراً. أيهم : ما رح اسويلج شي. اكعدي شويه و روحي. مُلاذ : لا بس اجيت اعرف شنو سبب هالتفستك هذا؟ كاعد هنا و عايف اهلك؟ أبيل : هباااااب ابقى. رفعت تلفوني لمن اتصلت امي.

جاوبت عليها و أبيل لازم بيه يريد ابقى. مُلاذ : ها امي. فيروز : وين صرتي؟ مُلاذ : هسه شويه و اجي. لا تخلين بالج. فيروز : من اتصل عليج جاوبيني بسرعة. مُلاذ : تمام. فيروز : يلا مو تتأخرين. مُلاذ : ماشي. نزلت تلفوني سديت الاتصال. ادحك لـ أيهم مكنبص كدام أبيل يسولف وياهم. مُلاذ : يلا انا رح اروح. اندار أبيل الي گام يصرخ و يبجي. يريدني ابقى و أيهم يسوي روحه يهدي. ادري بي هو وصاه يسوي هيج.

مُلاذ : حبيبي ماما منتظرتني. بعدين ارجعلك ها شتگول؟ أبيل : مااااااا. أيهم : ما يصير بابا دنيا ليل. أبيل : مااااااا. أيهم : خطيه ابقي علموده. خزرته، كزيت على سنوني. مُلاذ : ولك أييييهم. أيهم : شعليه انه. شوفي هو يريد. نزلت عيني لـ أبيل كام يبجي صدكو لازم بـ ايدي يتوسل ابقى ما يخليني اروح. رفعت عيني لـ أيهم المتجتف و مبتسم. اشرلي بـ عيونه على أبيل، خزرتهم. مُلاذ : انا اعلمك. أيهم : شعليه انه ابني مستهتر.

مُلاذ : منو يعلمه على الاستهتار؟ أيهم : من وحده يتعلم انه شعليه؟ مُلاذ : ولك أيهم قنع الجاهل اروح مثل ما قنعته يخليني ابقى يلا. أيهم : لا تصيرين نحسة. شوفي شلون جاي يبجي علي. باع حظج الاب و ابنه ثنينهم يبجون عليج. شلت جنطتي ضربته على زنده بيها و أبيل بعده يتوسل ابقى و يبجي. أيهم واكف ورانا و يضحك. شلت أبيل مشيت بي لـ البيت لمن سكت. أيهم يمشي ورانا بـ مسافه. حجيت و انا امشيه.

مُلاذ : عود يريد يبتعد. لو ما تريد تبتعد شلون؟ أيهم : اكعد بـ بابج. مُلاذ : على اساس ما سويتها. أيهم : حتى بـ غرفتج كعدت. مُلاذ : استخطيتك لو صايحه امي و مخليتها تشوفك تطفر من الشباك جان عرفت شلون تدخل غرفتي. أيهم : گبل اخطبج لمن تشوفني. دخلت لـ الحديقة. مُلاذ : مو هي بكيفك. دحگتله مكان حلو، الحديقة واسعة. مر من يمي دحگلي. وكفت يم باب البيت لـ جوا. التفت يحجي و هو يفتح الباب بـ المفتاح. أيهم : چا بكيفك؟

مُلاذ : جا ليش قافل الباب؟ أيهم : جنا طالعين انه و أبيل و قفلته. من اجيتي جنا هستونا فاتحين باب الشارع و نريد ندخل البيت. هزيت راسي بـ قبول. دخلت لـ داخل البيت. اشرلي أيهم ع القنفة، اتقدمت كعدت. أبيل كاعد يمي و يحرك بـ رجليه. ما تحملت جريت وجهه عضيت خدوده و هو يضحك. أيهم : شلووون؟ اخيط حلگج گليلي. مُلاذ : دروووح. أيهم : اي ست مُلاذ اجيتي هاده عليها. اصلاً الحجي الحجيته دخل من هاي الاذن طلع من الثانيه و لا غزر.

مُلاذ : خابر لـ اهلك طمنهم عليك. أيهم : بعد امر خدمه؟ مُلاذ : و ترجع يمهم. أيهم : سمعاً و طاعه. مُلاذ : يلا خابرهم. رفع تلفونه اتصل بـ امهم. مُلاذ : افتح حاكيه. أيهم : انطيجياها تحجين وياها؟ مُلاذ : لا شكراً. فتح الحاكيه رن كم ثانيها. اجانا صوت امه مفرفحه و تگول اسمه. سد الحاكيه خلا التلفون على اذنه يحاجيها. ظل يطمنها عليه و يگللها شويه و يروحله. اشر لـ أبيل يروح يمه انطاه التلفون يحاجي جدتها.

اخذ التلفون أبيل، خلاه على اذنه يسولف وياها. ضحكني، خلا ايده بـ جيبه و يحجي. حسيته متعلم هالحركه من أيهم. مال يخلي ايده بـ جيبه. أبيل : اي بيبي بابا وكح. أيهم : انه وكح؟ ابتسم و هز راسه. أبيل : تهاجين الهلوه؟ بابا يهبها يسولف وياها اجت يمنا عضت هدي هيل. (الترجمة : تحاجين الحلوه؟ بابا يحبها يسولف وياها اجت يمنا عضت خدي حيل) وسعت عيوني بـ صدمه. أيهم سد حلك أبيل بـ ايده. جر التلفون يحاجي امه. أيهم : ها يمه.

أبيل ظل يحوص جوه ايد ابوه يصيح الهلوه و أيهم ساد حلگه. أيهم : لا يمه يحجي وحده وين يا حلوه. ماكو حلوه، يمممه شقضيه شالسالفه. شايفتني كـ *** يمعوده جاهل يحجي وحده. فرك وجهه و اسمع امه تحجي بـ التلفون عصبيه من عنده و تدقق بـ كلام أبيل. أبيل يحوص جوا ايده، اشرلي اخذها. خذت أبيل من يمه، مشيته كدامي. ساده حلگه بـ ايدي لان يگلي الحلوه و يحجيها بـ صوت عالي يفضحنا فضيحه. درت وجهي دحگت لـ أيهم يحجي بـ التلفون.

امه اخذته حاصل فاصل، اشرلي على غرفة. فهمته قصده ادخل أبيل لـ الغرفة لان يظل يحجي ما يقبل يسكت. گوه ساده حلگه دخلنا انا وياه لـ الغرفة. مُلاذ : شلون تگول لـ بيبي عدنا حلوه. أبيل : انتِ الهلوه. مُلاذ : انا مو حلوه اسمي مُلاذ. أبيل : لا الهلوووه. گالها بـ صوت عالي. سمعت أيهم من الصاله. أيهم : ولك أبيل رح انعل الخلفوك. ضحك أبيل ضحكه شريره و كمز بـ مكانه. ضحكت على سوالفه يخبث على ابو.

لمن شافنا نسد حلگه افتهم ما يصير يحجي و گام يزيد ما ينقص، ضحكني. اجا لـ يمي حاجاني شي ما فهمته. يلي فهمته من عنده بس كلمة "بابا". حجيه مكسر گوه افهمه. ما فهمت شنو يريد بس هزيت راسي بـ قبول. جر ايدي گمنا انا وياه يجر بـ ايدي و يمشيه. مُلاذ : وين تريد؟ هد ايدي أبيل، راح صعد على الجربايه. يأشر الي و يسولف. أبيل : بابا هنا، انه هنا. ابتسمت و هو كمل يسولفلي. قصده ابوه ينام منا و هو من الجهه الثانية.

اجاني يجر بـ ايدي اخذني لـ الميز يم الجربايه. أبيل : العابي. فتح الميز، كعد يراويني سياراته. درت بـ عيوني ادحك بـ الغرفة. دحگت لـ ميز عليه كتب و صور. مبين مكتبة أيهم، اتجهت نحوه. أبيل يفتر وراي، يسولف و يراويني. اخذت كتاب من بين مجموعة كتب. دحگتله، ابتسمت "ديوان مظفر النواب". رجعته لـ مكانه. اجا أبيل فتح المجر مال ميز يراويني. طلع كراسات تلوين اتذكرت نفسها يلي لوننا بيها. شال محطوط بـ المجر، لابكوت مسفط.

شالهن كلهن أبيل يدحگلهن وياي و انا ادحك بـ استغراب. طاحت من كراسة التلوين اوراق هواي. نزلت لـ الگاع المهن انتبهت الهن "صور". عگدت حواجبي بـ استغراب. دحگت لـ وحده من الصور بـ الگاع مكشوفه. وسعت عيوني مصدومه، مديت ايدي اخذته. رفعت عيني على اثر صوت أيهم، دحگتله. وكف بـ مكانه، متصنم بـ الباب بـ ايده تلفون. راد يجي، رفعت ايدي وگفته بـ مكانه. دحگت لـ باقي الصور كشفتهن كلهن انا بيهن.

جريت الباقيات من الگاع صور اليو انا امشي و انا اكل، اصعد السياره، اشتري، ادحك بـ تلفوني، انتظر تكسي. قَبل لا اشوف الباقيات اتقدم أيهم يركض، يريد يجرهن من ايديه. جريتهن الي، گمت وكفت على حيلي. وهو بـ الگاع مكنبص يفر عيونه بـ حيره. رفع راسه دحگلي و انا ادحگله. رجعت عيني لـ أبيل. لمن دار صوره الي گال بـ حماس و هو يأشر عليه بـ الصوره. أبيل : هااي انتِ. أيهم : كوم بابا العب بـ العابك عوف الدنيا. اخذهن أيهم لمهن من الگاع.

أبيل گام بـ هدوء يلعب بـ العابهم. مُلاذ : شيسون صوري يمك أيهم! أيهم : مُلاذ... مُلاذ : شنو تبريرك؟؟ أيهم صوري صورري شوووفني هاي انا بـ الصور شيسووون يمك اصلاً شوكت ذني!! كعدت اگلب بيهن ادحگلهم. رفعت عيني ادحگله مشاعري مضطربة. شنو هالانسان الكدامي ما معروف امره! جريت جنطتي و الصور بـ ايدي. درت وجهي و طلعت، أيهم يصيح وراي. أيهم : اوووكفي مُلاذ خليني احاجيج. جا فهمممي من عندي مُلاذ. فتحت باب المطبخ امشي بسرعه.

شنو رح يبرر شنو رح يحجي هالمره؟ بطلت اصدك اي كلام يگوله. اسمع أيهم يصيح لـ أبيل. التفتت دحگتله اخذ أبيل و لحگني. وصلت لـ سيارتي و هو يصيح وراي. فتحت الباب اريد اصعد، سدها. التفتت اله خزرته ادحگله، عطت. مُلاذ : شترررريد؟ أيهم : تسمعيني. مُلاذ : شنو الاسمعه أيهم. واضحه مثل وضوح الشمس. حتى صور جنت تاخذ الي. هسه انت اعترفت الي و گلت تحبني. بس انا ما ادري اذا هذا حب لو هوس. حتى صوري يمك! مُلاذ : ليش ما اجيت و گلتلي وكتها؟

ليش ما حجيت ليش ضميت عني أيهم؟ ليش فضلت تكون مخفي طول هاي السنين؟ و بعدين فجأه تطلع كدامي و تصدمني بيك! أيهم : خليني افهمج. مُلاذ : يلا جاوبني على اسألتي. شنو غايتك من اخذت الي هاي الصور؟ ليش صورتني بدال ما تجي تحاجيني؟ ليش خفيت نفسك عني طول هالسنين؟ أيهم : ما عندي غايه مجرد... مجرد ردت اشوف شكلج كدام عيني دائماً. اشتاگلج و هواي، ايام ما اكدر اجيج. ما اكدر اشوف وجهج خليت صوره الج يمي و بـ مرور الوكت صرت اخذلج صور.

ما اقصد اراقبج و لا شي ثاني. ما اعرف مُلاذ. مُلاذ : و لييش ليش كل هذا التعقيد؟ انا الاعرفه لمن شخص يحب شخص يحبه لـ سبب، يرغب بي لـ سبب. انا حتى ما حاجيتك عدل وكتها. عطت و مشيت ما اتذكر شكلك عدل. حتى ما جنت تعرف تصرفاتي بـ شنو تعلقت و حبيتني! أيهم : لَـذه لا تسأليني. الاسباب مجهوله يمي بس رف الج گلبي. ظليت ساكته و ادحگله. هو هم سكت، يدحك بـ وجهي. مُلاذ : من الافضل اروح. اندارينا على أبيل يلي واكف يلعب و يضحك.

من شاف ابوه اجا اله يركض. شاله أيهم من الگاع، صعدت سيارتي. أبيل ضاج و گام يبجي، شاوره أيهم و باس خده يسكته بس استمر يبجي. رجعت نزلت من السياره، اخذته من أيهم. كعدته على سقف السياره بقى لازم بيهم. مُلاذ : لازم اروح ماما تنتظرني. باجر اجيك و اجيب العاب وياي. أبيل : مااا. أيهم : تعال أبيل. اخذه أيهم. أيهم : اصعدي يلا رح الحگك. مُلاذ : وين تلحگني؟ أيهم : لحد ما توصلين بيتج و اروح. مُلاذ : ليش تلحگني؟

أيهم : ترحين وحدج و الدنيا ليل؟ مُلاذ : عادي كل يوم ارجع هيج وكت و بدون ما احد يتبعني لو يأمن عليه. ضحك بـ استهزاء. عگدت حواجبي. مُلاذ : ها هم تلحكني كل يوميه لحد ما اوصل لـ البيت؟؟ أيهم : اذا مو كل يوميه بين يوم و يوم. عجز لساني عن الكلام. اخذ أبيل عافني، صعد بـ سيارته و شغلها. ظل كاعد بيها و يدحگلي، ينتظرني اصعد. درت وجهي صعدت سيارتي و انا احجي.

مُلاذ : رح اتخبل نهايتي اتخبل. مستحيل اظل صاحيه من بعد الناس العرفتهم. أيهم وحده راح يخبلني و يطكك فيوزاتي. طبيت باب السيارة. دحگت لـ الصور يلي بـ ايدي. مُلاذ : لو اعرف شعاجبك بـ هالخلقققهنوب بـ نص الدوام و التبهذل يصورني. باع خلقتي شلون نحسه و اخوزر بالعالم. شمرت الصور ع الكشن يلي يمي. شغلت السياره و طلعت لـ البيت. امي كل شويه تتصل عليه تتطمن. دحگت بـ المراية شفت أيهم يلحگني.

صداع اكل دماغي اكل و ما اركز بـ الطريقاتذكرت دكتورة ملاك. لمن حاجتني بـ وحده من المرات. -ممكن انتِ هم رح تحتاجين لـ العلاج. حسب ما ذكرت الي اختج انتِ هم ما عشتي اشياء سهله و شخصيتج صعبه نوعاً ما. اتذكرت كان جوابي اله. مُلاذ : معقده و ما ينفهم مبتغاي. رجعت هي جاوبتني. -اذا بـ يوم حبيتي تفسرين نفسج تكدرين تجيني و اساعدج ولو شويه على الاقل تفهمين نفسج و تفهمين يلي تريدين. رفعت تلفوني اتصلت بيها. رن لـ ثواني لمن ردت.

مُلاذ : السلام عليكم شلونج دكتوره. الدكتوره : اهلاً ست مُلاذ. الحمدلله انتِ شلونج؟ مُلاذ : بخير الحمدلله ردت احاجيج بـ شغله. الدكتوره : اتفضلي. مُلاذ : انا اريد اجيج شوكت اكدر اجي؟ الدكتوره : تجيبين ملاك؟ بس جلساتها مو بهالفتره و شبه انتهينا. شفت تطور واضح على ملاك و بدت تتحسن. مُلاذ : لا دكتوره مو ملاك انا اريد اجيج. الدكتوره : قررتي تتعالجين؟

اذا قررتي فـ اكدر احولج على صديقتي دكتوره لان مثل ما تعرفين اختصاصي لـ الاطفال اكثر شي. مُلاذ : اعرف دكتوره بس ما اريد اتعالج. لامره گلتيلي انتِ تكدرين تفهميني انا شنو اريد و تكدرين تخليني افسر الي اريده ما اعرف. اعذريني دكتوره و انسي الگلته. گالت بـ هدوء. الدكتوره : تعالي باجر حتى لو المغربرح انتظرج لان عندي هواي مراجعين. مُلاذ : بس انا مجرد اريد افهم نفسي دكتوره ما اعرف اعبر الج.

الدكتوره : فهمتج ست مُلاذ. لا تخافين فاهمتج كلش زين و حتى لو كنتي ما تريدين علاج رح اساعدج تفهمين نفسج و مبتغاج. مُلاذ : تمام، شكراً دكتوره. تشكرت من عدها. سديت الاتصال، دخلت بـ فرعنا. تناقضات جبيره بـ داخلي، فعلاً ما جاي اكدر افهم نفسي و لا شنو اريد. الگا روحي كدام اسئله صعبه تتوجهه الي. استصعب وجود شخص بـ تفكيري. صفيت سيارتي يم بيتنا. اخذت نفس عميق رفعت شعري. لميته بـ ايدي، تجيت راسي على الكشن.

انفاسي ترتفع و تنخفض، عقلي تعب. درت وجهي دحگت لـ أيهم. يلي دك جامة السياره، فتحت الباب و نزلت. أيهم : شبيج؟ مُلاذ : ما بيه. أيهم : وجهج احمر؟ مُلاذ : تعبانه. أيهم : تحتاجين مستشفى؟ مُلاذ : لا، يلا روح وصلت. أيهم : انطيني الصور. مُلاذ : يا صور؟ أيهم : صورچ. مُلاذ : و بعددك مُصررر؟؟؟

أيهم : مُلاذ ما جملت الج نفسياعتبريني مهووس اعتبريني مريض بس انه ما اذيتج بـ يوم ما فكرت اذيج. عشت كل شي بداخلي و ما اجيتج و لا صارحتج و لا سويت شي. أيهم : احبچ و حبيتچ حب طاهر و نقي ما يلوثچ. و اذا يلوثني بـ نظرچ ما يهمني. المهم ما لوثتچ بـ تفكير و لا بـ حرام. أيهم : بـ خيالي ما رسمتج و حاولت ما اتخيلج. دائماً جنت وياج على ارض الواقع و ما الطخچ لا بـ فكرة و لا بـ خيال.

أيهم : اما صورج شوگي الج طغى عليه. طغى على كل ذره مني نساني أيهم منو. أيهم : بـ يوم من كد ما مفتقد وجهج و وجودج و لان مر شهر ما شايفج بسبب شغلي ضغطي علك تگولين شهالمبالغه بس مو مبالغه. انه احبچ هيج حب مال مخابيل. يمر اليوم عليه مثل سم اتجرعه من ما اشوفج. امرض و اتعب و اتاذى بلاج. أيهم : من ابعد عنج على الرغم اعرف اليصير بيه بس ابتعد و اروح عسى ما اخر الدنيا و لا اقترب منج و اضايقج و اقلق راحتج.

أيهم : تماديت بـ كلامي وياج اعرف. حجيت اشياء ما تنحجي اعرف. لحيت عليج اعرف بس حتى ما اخسرچ. صدگيني كل كلمة تاذيج تطلع مني لان اعصابي محترگه و گلبي نار. أيهم : لذالك هسه انطيني صورج. خل اولي لـ اهلي و اخذ أبيل لان صارله ساعه يرافس بالسياره لحد ما غفى و نام و هو ضايج. رفعت تلفوني يلي اجاله اتصال من امي. ابتعدت و رحت طلعت الصور انطيتهن اله. أيهم : يلا ادخلي لـ بيتچ. تركته و دخلت لـ البيت. احس گلبي يدك بـ اذاني.

كلامه ما راح من بالي لحظه. حفظت كل حرف گاله من كد ما ركزت. شافتني امي اجت عليه تسألني وين تأخرت و ليش. جاوبتها و دخلت غرفتي. كعدت على جربايتي، صفنت. دخلت امي يمي، لمن شافت وجهي احمر خافت عليه. بـ نفسي ما اعرف شبيه من شنو هذا تعبي و استغرابي. فيروز : ليش وجهج هيج احمر؟ رفعت اكتافي بـ عدم معرفه. نزلت راسي تمددت بـ هدوء على رجل امي. استغربت امي مني، لحظات بدت تمسد شعري على ايدها الخفيفه يلي تمسح على شعري غفيت.

كعدت الصبح على صوت المنبه. فركت عيوني، فتحتهم دحگت لگيت مخده جوا راسي و متغطيه. گمت دحگت لـ امي و ملاك بعدهن نايمات. رحت اكعد ملاك و افرك عيني. مُلاذ : ملاك گومي. نفخت بـ ضجر ندستها مره ثانيه. مُلاذ : ولج ملاك اكعدي لا تشلعين گلبي. ظليت اكعد بيها امي كعدت و ملاك بقت نايمه اجت امي تكعدها وياي. ما تقبل تكعد، تفتح عيونها و ترجع تنام. گوه يلا سحلتها من الفراش لـ الحمام. غسلت و خلصت طلعت، وكفت اغسل وراها.

طلعت من الحمام، رحت ادور عليها. دخلت الغرفة اتخصرت و انا ادحگله. انايمه و تشخر. انداريت لـ امي يلي تدحگلها وياي. مُلاذ : رح اعيط عيطه افزز الموتى مو بس ملاك، يمه كعديها. راحت امي تكعدها، رحت انا ابدل. وكفت انتظر ملاك شوكت تخلص تبديل. خليت مكياج و بدلت و سريت شعري و حضرت جنطتي و غراضي و تريكت و هي بعده. مُلاذ : ملاااااك. طلعت تركض و بـ ايدها الجنطه. ملاك : هياتني اجيت و الله. ابتسمت و اتوسعت ابتسامتي اكثر.

مُلاذ : لابسه شال. رفعت راسها و هي تشد حذائها. گالت متحمسه و مبتسمه. ملاك : حلو؟ مُلاذ : يخبل. طلعت امي وراها على شفايفها ابتسامه. عاجبنا شكل ملاك بـ الشال لايگلها و الاكثر فرحانين لان اتحجبت. اخذت ملاك و طلعنا هستوني طلعت. اجاني سلطان يركض لمن شاف ملاك وكف. مُلاذ : ولك سلطان مو گلتلك لا تجي انا اخذها. ظل يدحگلها و هي منزله راسها. اتخصرت ادحگلهم هي خجلانه عود و هو صلف يدحگلها كدامي.

مُلاذ : استاذ سلطان انتهيت من التأمل بـ الطبيعه الخلابه؟ سلطان : ها؟ مُلاذ : صباح الخير. سلطان : صباح النور. مُلاذ : مو اتفقنا انا اخذها؟ سلطان : لا انتِ روحي لـ شغلچ. مُلاذ : حلو شنو احول اختي بـ نفوسك؟ سلطان : مُلاذ ما تجين شويه لـ هناك خل احاجيج. ما اكدر اطلع اخلاقي كدام اختچ. خزرته و مشيت. وكفنا بعيد مسافه عن ملاك. اجاني سلطان وكف كدامي يحاجيني. سلطان : انتِ شبلاچ واكفه بـ طريقي. عمي انا رجال يريد يأسس بيت عائلة.

مُلاذ : اختي شعليها؟ سلطان : مو هي اختج عمود العائلة. مُلاذ : خاف الطابوك. سلطان : اهو مُلاذ. بشرفج كل شي ما مسوي. اقوى شي عندي اشتريلها. هسه شايفه من اوديها و ارجعها هواي عليهم. مُلاذ : سلطان ملاك ما تفكر مجرد تفكير. تغلط وياها لو تاذيها بـ تصرف. سلطان : لا توصين حريص. و تر كل الفرق الي بيني و بينها هو عشر سنين مدري ١١ سنه شمالك. مُلاذ : ترا مو قليلات سلطان! و انت جبير ما تكدر تنكر هالشي.

سلطان : اعرف بس انا ما احبها حب مثل الحب الي ما تريدينه لـ ملاك. انا حبيتها على برائتها. ما ادري احسها انسانه نقيه. مُلاذ : امشي وديها. عرضتلي نشرة الصباح. هاي لو امك تريد خبز لو صمون جان ما رحت و بقيت كاعد بـ البيت. سلطان : نحسه، ملكة الجنان. مُلاذ : متأكد؟ سلطان : جذب انا النحس. ما تتحجين شلون ناس. ضحكت ورحنا بـ اتجاهه ملاك. صعدتها وي سلطان و رحت انا.

اتوجهت لـ خالة جنات اخذتها يم امي لان امي وحدها و هي وحدها يتونسن سويه. رحت لـ شغلي، بديت بـ يومي و روتيني. ملاك : -ظليت العب بـ اصابيعي بـ هدوء. التفتت على صوت سلطان يلي اتحمحر. رجعت نزلت راسي، ظليت ساكته. سلطان : لايگلج الشال. ابتسمت، رفعت راسي. ملاك : من زمان اشتريته. قررت من اليوم البسه و التزم بيه. سلطان : احب نقاوتج. حسيت وجهي بوخ صار احمر. ما اعرف شنو اجاوب ظليت ساكته. التفت سلطان دحگلي، ضحك.

سلطان : يابه شجاج صرتي حمرة. ملاك: ها؟ سلطان : ها؟ ابتسمت درت وجهي ادحك من الجامه. التفتت على صوت سلطان. دحگت ماد الي النستله يلي احبها. اخذتها و ابتسمت : شكراً. سلطان : العفو. وصلني لـ المدرسه. نزلت حركت اله ايدي بـ معنى "باي". سوالي نفس الحركه، دخلت المدرسة. نور : -خلصنا عشا گمت اغسل الماعين. صافنه و اغسلهم، فزيت لمن صدر صوت طيحة الكلاص من ايدي. انكسر بـ داخل المغسل، التفتت على صوت عمتي. منارس : شكو؟

نور : لا تخافين عمه. كسرت الكلاص بـ الغلط. اجا صوت امي من الصاله. امي : عميييه غيررر. رجعت عيني لـ عمتي يلي عصبت اشرتلها لا تضوج. درت وجهي الم قطع الكزاز و انا المهن اصبعي انجرح بـ كزاز. لزمت بـ اصبعي، مكشوله ملامحي بـ وجع. نور : اخخ اصبعي. منارس : شو تعورتي؟؟ خل اشوفها. اخذت ايدي بـ ايدها شافتها. راحت تجيب كلنس و لاصق جروح. منارس : شجاج يا عمه. نور : صار اصبعي على طرف يعور. منارس : عوفي انا المهن.

نور : لا انا هسه المه. منارس : ولج دوخري عوفي انا هسه المه و اغسل الماعين. نور : لا عمه عوفيهن. منارس : ولج نويره! سكتت، رحت كعدت. شديت اللاصق على اصبعي. عمتي وكفت تغسل الماعين ما تخليني اغسلهن و وكفت انا الم وياه. منارس : نور اخلص غسل الماعينو نطلع انا وياج و عزيز نتمشى لـ هاي الحديقة القريبة شتگولين؟ نور : تمام عمه بكيفي. جهزت راسها بـ قبول و فعلاً خلصت غسل الماعين. راحت تحاجي ابوي وافق على طلعة.

لابست عبايتي الاسلاميه و شالو عمتي هم راحت تلبس عباتها. صحتنا لـ عزيز اجا ويانا طلعنا نمشي. عزيز : كون الجو يظل هيج. نور : لاحگنا الحر. منارس : اصلاً الصيف يخبل. نور : عمه دخيلج. منارس : شمحلاها الشمس. عزيز : شمحلاها درجة الحراره بالاربعين و عزيز طالع يجيب صمون بـ الحر. يطلع من البيت عراقي يرجع سوداني. نور : هههههه. حجا عزيز و هو يضحك. عزيز : و الله منين الصيف حلو. يلسع الواحد لسع.

التفتت لمن وصلنا قريب الحديقه و اكو محل قريب عليها طلع من عنده اركان. اشر اله عزيز و صاح اله. عزيز : اركاان. رفع عينه دحگلنا. رحنا بـ اتجاهه سلموا عليه عمتي و عزيز. منارس : شلونك خاله. اركان : بخير انتوا شلونكم شلون الاهل؟ منارس : زينين اهلك وينهم؟ اركان : بـ البيت طلعت اشتري الهم. منارس : لو تجيبهم و تجون امك هم تغير جو هي و اخواتك. اركان : ما ادري و الله.

منارس : جيبهم و تعاله. اياتنا رح نكعد بـ هاي الحديقة و اذا ما تكدر بعد بـ كيفك خاله. اركان : لا بالعكس. انا اريد اطلعهم من البيت اصلاً. منارس : تمام لعد. احنا نكعد بـ هاي الحديقة ننتظركم. هز راسه بـ قبول، راح يجيبهم. رحنا احنا كعدنا بـ الحديقة على المسطبات. التفتت الي عمتي گالت بـ صوت ناصي. منارس : و الله خوش ولد الله يحفظه. يا حظها التاخذه بـ المستقبل. تحجي و تدحگلي. بقيت مبتسمه مثل المخبله. اجا عزيز كعد يمنا.

عزيز : اگلج يعني هسه راح يجيب كل اهله؟ نور : اي. عزيز : حتى اخواته؟ نور : اي، ليش؟ عزيز : هيج عبالي بس امه گلت خطيه اخواته يظلن بـ البيت وحدهن. نور : لا يجيبهن اكيد. هز راسه بـ قبول. راح اشترالنا من المحل عصاير و حب و شاميه. التفتنا على صوت ام اركان و هي تسلم على عمتي. گامت عمتي بوستها و تسولف وياها. اتقدمن اخوات اركان من وراها سلمنا عليهم. ليان : شلونج نوره. نور : زينه حبيبتي. انتن شلونجن؟ لالي : الحمدلله.

اتقدمنا كعدنا ع المسطبات. عزيز راح لـ يم اركان و ام اركان و عمه منارس كعدن يحجن. ليان : همزين اركان طلعنا. جنت راح انفجر بـ البيت من الملل. ليان : بالعكس انا احب البيت. نور : مثلچ. لالي شلون صار جرحج؟ لالي : زين بس اثر ما يوجعني. نور : الحمدلله. هزن راسهن بـ قبول. ليان : اكو هناك مراجيح. نور : اي. لالي : نور صاعده بـ مرجوحه؟ نور : اي بس من جنت صغيره.

ليان : احنا ما صاعدات انا و لالي. بس اختنا الله يرحمها اركان جان ياخذها. نور : الله يرحمها، اصعدن هسه. ليان : لا كل وحده شطولها ههههه. نور : عادي و اذ. لالي : و الله انا اصعد بس هسه مالي خلك. نور : ليش؟ خو ما بيج شي؟ لالي : لا بس صداع شويه. نور : اخذتي دوا؟ لالي : اي اخذت. دحگت لـ عزيز يلي يدحك لـ ليان. هزيت راسي بـ معنى " شكو؟ دحگلي و دار وجهه. لالي : ما اضيع الفرصه. خل اروح اصعد بـ المرجوحه. ليان : ولج تعالي عزه.

عافتنا لالي راحت لـ اركان تحاجي. ابتسم و هز راسه بـ قبول. اجت جرت ليان من يمي و هي ما تقبل تكوم. ضحكت عليهن اخذتها تجر بيها. صاحتني اصعد وياهم ما قبلت. راحن صعدن بـ المراجيح عزيز يدحك وراهن. منارس : عزيز تعال اشتريلنا من هالمحل. عزيز : شنو اجيبلكم؟ منارس : جيب من هذا العصير. هز راسه عزيز بـ قبول و راح. اجا اركان وكف يمي يدحك لـ البنات و انا كاعده على المسطبه بـ الطرف. البنات وراي يلعبن مراجيح، اركان يدحگلهن.

اركان : شبي اصبعج؟ نور : تعور بـ الكزاز. اركان : شلون تعور بـ الكزاز. نور : انكسر كلاص و لميته و تعورت. اركان : انتبهي، ليش ما كمتي وياهن؟ نور : ما اريد. اركان : و ليش كاعده وحدج؟ نور : بلا سبب. اركان : لبسج خفيف الدنيا بارده. نور : انا ما بردانه. اركان : اي صحيح من رجفتجو خشمج الصار احمر. لمست خشمي. رفعت عيني دحگت لـ اركان. نور : شوكت شفتني اصلاً. اركان : اشوفج بـ كل مكان. سكتت، جر حسره مسح وجهه. ذب نفس من جوف صدرة.

اركان : تعرفين انا اريدج. ماكو داعي نضم اكثر. بس ابوج ما ينطيج الي. بلعت ريگي، نزلت راسي. عبست شفتي الصارت ترجف. اركان : لا تبجين جاي اسولف وياچ. نور : ما جاي ابجي. رفعت راسي دحگتله و هو واكف. دار وجهه دحگلي. اركان : و هاي عيونج المغرغره. نور : ما مغرغره. مسحت عيوني. اركان : تبجين عليه ولج نويره؟ و انا امسح دموعي ضحكت. دحگتله ضحك وياي. درت وجهي لمن اجا عزيز جايب بـ ايده علاكتين. ضحكت عود عمتي وصته بس على عصير.

وكف يوزع عصاير و نساتل، اجاني انطانين. نور : ما اريد. حطهن بـ حضني. گال بـ صوت ناصي. عزيز : يمعوده خل انرزق اخذي لا تأخريني. عكدت حواجبي مفاهمه. انطا لـ اركان و راح لـ اخواته. رفعت حواجبي هسه يلا فهمت السالفه. اركان : كومي نروح يمهم. نور : لا ما اريد. اركان : ولج نور. نور : ها. اركان : كومي. نور : ليش؟ دحگتله يدحك لـ مكان درت وجهي ادحك وياه. اثنين ولد واكفين يدحگولي. لمن شافوني ادحگلهم دارو وجههم.

اركان : كومي لا تخبليني. نور : وين اروح؟ اركان : تعاي يمي. نور : هو انت واكف يمي. وين اروح بعد؟ اركان : بـ گلبي. وسعت عيوني، گمت امتمت بـ وجهي رحت يم البنات. كعدت على مرجوحه. اركان صاح لـ عزيز ظلت عيوني تراقبهم. راح عزيز يحاجي اركان كام يتلفت. عكد حواجبه عزيز راحوا هو و اركان. لالي : ذوله وين راحوا؟ كمت لحكتهم. لگيتهم يحاجون الولد الجانو واكفين و اركان عاگد حواجبه و يحجي بـ عصبية.

عزيز هم ما قاصر، دحگلي اركان منين شافني خاتله ورا شجره و ادحگلهم. رجع يتعارك وي الولد، خلوا و راحوا. اركان يدحك وراهم هو و عزيز، اجوني. بعد ما الحك اشرد بقيت بـ مكاني. نور : شكو؟ عزيز : يلا نرجع؟ نور : تمام حاجي عمتي. هز راسه بـ قبول. راح يحاجي عمتي انداريت اروح وراه. گال اركان بـ صوت مسموع. اركان : حسابج بعدين. انداريت دحگتله. نور : ها ليش؟ حسابيش؟ اركان : شتسوين اجيتي ورانا؟ نور : مو خفت تتعاركون.

اركان : لو ما امي و اخواتي و انتِ هنا جان حطيتهم كتلتهم بس بختهم بيكم. نور : هو شنو سوه؟ اركان : يباوعلج شسوه كل شي ما سوه بس عينه زايغه و ادبسز و ما متربين. نور : ما انتبهت اله. اركان : عوزج تنتبهين و هاي لفيها هاياشر على مال شال. نور: لافتها. اركان : لفيها عدل. نور : لافتها عدل. ظل ساكت يدحگلي عاكد حواجبه. كممت حلگي و ضحكت على تعابيرة. خزرني : ولج نور. نور : اسفه ههههه. ضحك على ضحكتي. التمو عزيز و عمتي و اهل اركان.

مشينا رجعنا لـ البيت. اركان مخلينا كلنا كدامه و يمشي. ما يقبل واحد يصير وراه، وصلنا لـ البيت. مُلاذ : -بـ الخمسه العصر طلعت لـ عيادة دكتورة ملاك. اتصلت بيها گلتلي تنتظرني. صفيت سيارتي كدام مكانها، دخلت العيادة. حاجيت السكرتيره گالت عدها مراجع هسه و هذا اخير واحد من بعده ادخل انا. هزيت راسي بـ قبول كعدت انتظر. اتصلت بيه امي تتطمن عليه و تگلي ما اتاخر. ظليت گاعده حوالي العشر دقايق و طلع المراجع.

گامت السكرتيره تحاجي الدكتوره. ثواني استغرق اشرت الي السكرتيره حتى ادخل. اخذت جنطتي دخلت لـ الدكتوره سلمنا على بعض. الدكتوره : شلونج ست مُلاذ؟ مُلاذ : زينه الحمدلله. بقينا نسولف شوي بـ البداية. مشغله موسيقى هادئه و الغرفة هادئه. عطرها طيب و نظيفه، دفو محاوط الغرفة. بدت الدكتوره تسألني اسئله تخصني. اتجاووت وياها لَكن بـ صعوبه. ما متعوده اشرح عن نفسي و احجي.

الدكتوره : يعني حسب يلي فهمته منچ لمن شخص يمدحچ او يحاول يتقرب منچ تنفرين من عنده او مو تنفرين و انما تبتعدين. مُلاذ : امم صحيح. الدكتوره : زين شنو تحسين يلي يمنعچ؟ يعني هل موقف اثر عليچ؟ او انتِ بطبيعتچ ما تستقبلين المديح و الغزل؟ مُلاذ : ما اعرف لمن جنت صغيره. ضحكت، حكيت ارنبة خشمي. كملت كلامي و انا اشرح.

مُلاذ : جان ابوي دائماً يتغزل بـ شكلي او يبوس ظفايري يعني جان حنين. ما اعرف بس ما احب احس بـ حنية احد غيره. جانت مختلفة و مميزه الي. الدكتوره : حلو، جانت علاقتكم حلوه يعني؟ هزيت راسي بـ قبول. ابتسمت و عيوني متحجره بيها الدموع. مُلاذ : جان يحبني. الدكتوره : زين تكدرين تشرحيلي السبب يلي خلاچ تحاولين تفسرين نفسچ. لعبت بـ اصابيعي. تنهدت، رفعت راسي دحگتلها.

الدكتوره : كوني صريحه وياي. لا تعتبريني موجوده عبري عن يلي بداخلچ كأنما انتِ وحدچ بـ هاي الغرفة و تحاجين نفسچ. جهزت راسي بـ قبول. من بعد محاولات بـ الكلام حجيت بـ صعوبة. مُلاذ : قبل فتره... ما اعرف سنهاكثر من سنه ما اعرف، دخل شخص لـ حياتي. دحگت لـ الدكتوره. هزت راسها بـ معنى "كملي". مُلاذ : أيهم الشخص يعني الي دخل حياتي. الدكتوره : فهمتج استمري كملي.

مُلاذ : لـ سبب مجهول لگيت نفسي بـ يوم كدام حنيته. انجوت ايدي لگيته يركض الي خايف. تمرضت لگيته كدامي و بـ ايده علاجات. اتعارك وياي شخص صار سد و حاول يحميني. انخطفت ضحى بـ نفسه و اجاني. احجي مرتبكه. عيوني اهربها من الدكتوره. رفعت راسي لـ الدكتوره. دحگتلها رفعت حاجبها. هزت راسها بـ معنى "كملي". مُلاذ : دكتوره بـ داخلي لخبطة. بـ داخلي تعقيد ما اعرف شلون احلها. استصعب محبة شخص الي.

مُلاذ : ما افهم نفسي ليش ما احب اشوف شخص يحبني. ما احب اشوف شخص ينطيني اهتمام. اكرهه يصير عندي نقطة شعور لـ شخص. مُلاذ : بـ العاده الناس يرغبون بـ محبة شخص الهم. بس انا لا اكرهه هالشي ما اريد اشوف استثناء. سكتت و هي سألت. الدكتوره : بعد ما تكدرين تعبرين؟ هزيت راسي بـ قبول. عرضت كدامي كلام بين اشخاص ثنين كانو حبيب او حبيبته او رجال و زوجته ما اعرف. لَكن كل الحسيت بي انزعاج من حديثهم الي بي غزل و مديح بـ شكل مستمر.

رفعت عيني ناحية الدكتورة لمن سألت. الدكتوره : شنو رأيج بـ حديثهم؟ مُلاذ : مزعج بي مبالغه ذاكرين الحبو الغزل هواي بي، ما اعرف. هزت راسها بـ قبول. الدكتوره : زين، شنو شعورج اتجاهه أيهم؟ مُلاذ : ما اعرف. الدكتوره : ترتاحين بـ الحديث وياه؟ مُلاذ : يمكن. قوست شفتي. حركت اكتافي بـ معنى "ما اعرف". الدكتوره : زين، اول شخص يفصح الج عن حبه؟ مُلاذ : لا، قبله ثنين. الدكتوره : و شنو جانت ردة فعلج؟

مُلاذ : واحد غثيث كلش و يجبرني على محبته. رفضته اكيد و هذا الشي من الصغر. الثاني ما اعترف اعتراف صريح لَكن فهمته. و لمن رفضت ما جبرني بالعكس بقى صديقي. و هذا الشي فرحني لان جنت اشوفه صديقي. الدكتوره : أيهم اعترف الج؟ مُلاذ : اي. الدكتوره : ردة فعلج شنو كانت؟ مُلاذ : ما اعرف بالبداية ما اعترف اعتراف واضح لَكن البارحه اعترف و گال بس ما اعرف. الدكتوره : يعني ردة فعلج تختلف عن الثانين. نكدر نگول اكو اشياء حسيتي بيها.

مُلاذ : ما اعرف. الدكتوره : تمام. مُلاذ : اي. تركت قلمها على الطاوله. الدكتوره : لمن تفكرين بـ محبة شخص شنو اول شي يخطر على بالج؟ يعني حبيتي شخص و ثقتي بي و اهتميتي اله و خفتي عليه شنو اول شي يخطر بـ بالج لمن تفكرين تحبي؟ مُلاذ : راح افقده مثل ما فقدت ابويه. هزت راسها بـ قبول. الدكتوره : اذا الموضوع تكدرين تسيطرين عليه و تحجين الي عن والدج و نفسج و شلون فقدتيه. اعرف القصة من اختج لَكن حابه استمع الها منچ.

جهزت راسي بـ قبول. رغم احس صعب اكدر اوصللها شنو جانت علاقتي بـ ابوي و شلون كان. مُلاذ : ابوي، إلياس... جان اقرب انسان الي. ما اعرف بس جنت متعلقه بي و اخاف عليه. احبه هواي و انتظره اذا يتأخر محد يفهمني غيره. محد جان حنين وياي بـ گده. دائماً شبهوني بيا. حرك ايديه، اشرح اله. متوتره مرتبكه من كلامي خاف اوصل فكرة غلط.

مُلاذ : علمني هواي اشياء و كانت كلها يوصيني بيه. لمن اكبر اتصرف بـ شكل صحيح بس ما اعرف. ما اعرف اذا هسه تصرفاتي صحيحه او غلط. يمكن لو جان موجود هسه جان رح يعلمني. الدكتوره : يعني ابوج قريب الج كلش؟ مُلاذ : اقرب الي حتى من روحي. الدكتوره : شلون توفى الله يرحمه؟ مُلاذ : طلقوا عليه رصاصتين كدام باب. لمن طلعت من البيت لگيت مدمى و بالگاع. خليت راسه على رجليه وصاني...

وصاني اكون مسؤوله عن امي و اختي. وصاني احافظ عليهن و ما يتاذن. وصاني احميهن من شخص. رفعت عيوني يلي دموعي متحجره بيه. مستحيل ينزلن اعرف، رح يبقن هيج. مُلاذ : وصاني ما ابجي. الدكتوره : تكدرين تحجين اليعن شعورج وقتها و اتجاهه الموقفو شنو حسيتي بـ وفاته‌. رجف صوتي و انا اتذكر الموقف. حجيت و لـ اول مره كدام شخص عن شعوري وقته.

مُلاذ : لمن شفته ع الگاع خفت. بجيت و احتاريت ما عرفت شنو اتصرف. لمن وصاني جنت استمع اله بـ تركيز. رغم الخوف يلي بـ گلبي و احسه يتكطع. لَكن لمن بـ وسط الشهاده مات. ما اعرف حسيت انسكب عليه ثلج. ما ادري حسيت روحي راحت وي روحه. ضمت شفتها هزت راسها. قدمت الي بطل مي اخذته من عدها. شربت هواي ما عطشانه بس اريد امرر الغصة التكونت بـ بلعومي. رجعت المي على الطاوله بـ ايدين ترتجف. گامت الدكتوره من مكانها، التفت من ورا.

تقدمت كعدت على الكرسي يلي گدامي. الدكتورة : عندچ خوف من الفقدان و من الحب. تشوفين نفسچ انسانه لازم تتجاهل حياتها حتى تكدرين تأدين وصاية والدچ بـ افضل شكل. تخافين تتكون عندچ مشاعر لـ شخص و تلتهين عن اهلچ. تنهدت كملت كلامها و هي ترجع ظهرها ع الكرسي منتجيه. الدكتورة : بـ نفس الوقت ترفضين مشاعر الحب و الارتباط. ممكن انتِ متكونه عندچ مشاعر لـ الشخص يلي ذكرتي، أيهم. بس خوفچ تفقدين شخص يمنعچ.

الدكتوره : جزء من ذاكرتچ مو ويانا هسه بـ الحاضر. لا جزء من ذاكرتچ بقى بـ لحظة وفاة والدچ. تتخيلين كل الاشخاص اذا حبيتيهم ممكن تخسريهم بـ نفس الطريقه او اخرى. الدكتوره : عندچ خوف من التعلق بـ شخص و فقدانه. كذالك ترفضين مشاعر الناس لان تحسين نفسج ما تحتاجين لـ الحب او غير مهتمه لـ المحبه. لَكن انتِ بالحقيقة مثل كل البشر تحتاجين حب. تحتاجين اهتمام و هذا الشي مو عيب او غلط.

الدكتوره : لَكن ذكرت الج انتِ تستصعبين محبة شخص الج. اكتفيتي بـ محبه و حنان والدچ الج يلي من سنين و بعدج تعيشين بـ ذكراها و تشبعين داخلج منها. الدكتوره : و اعتقد انتِ نفذتي وصية والدچ. ما بجيتي و لا شكيتي لـ شخص مما سبب الكتمان بحيث حتى اقل شعور عندچ اذا اعتلى ضجيجه بـ داخلج تكتمينه. تمنعين نفسج من الاحساس بي.

الدكتوره : اذا تريدين نصيحتي الج فـ اگول انطي فرصة لـ نفسچ. انتِ ما رح تقصرين بـ حق اهلچ. اذا شخص حبچ و انتِ بادلتي المشاعر. حري مشاعرج اتركي التقيد. الدكتوره : لا تجبرين نفسچ تتصرفين بـ جدية و صلابه على طول اليوم. هذا امر متعب، على الرغم الحالات الواجهتني لَكن حالتچ اول مره اشوفها. اتركِ الشخص يلي يحبچ يساعدچ و يمشي وياچ خطوة بـ خطوة.

الدكتوره : بعد اكو جوانب من شخصيتچ غامضه بـ نفسچ ما متعرفة عليها لازم تكشفين عنها. بس كل شي رح يكون بـ التدريج مثل ما گلتلچ. حري مشاعرج لان كبتها ممكن ياذيج كلشلـ درجة يسبب الج حتى امراض. الصحة الجسدية هي نصف من الصحه النفسية. مُلاذ : بس هيج الكل رح ياخذون راحته. ما اذا انطيت وجهه لـ شخص رح يصير يتصرف بـ راحته وياي.

الدكتوره : لا خلي حدود. اليوم شخص زعجچ بـ موضوع انتِ ما تحبين به. هي ما يتصرف وياچ هيج مره ثانية. انصفي بين الاشخاص يلي تريديهم قريبين و الاشخاص يلي تريديهم بعيدين. الدكتوره : كذالك ردت اگلچ شي. الشخص يلي جبرچ على محبته گلتيلي هذا الشي من الطفوله؟ مُلاذ : اي من عمري ٨ سنين و اقل لـ حد ما كبرت و لحد الان. الدكتوره : بسبب هذا الشخص انتِ صرتي تشوفين الحب اجبار.

مُلاذ : بس دكتوره امي جانت تحب ابوي و جانو يحبون بعض و كلش لمن اتوفى امي انطوت و اتقوقعت على نفسها. تاذت بـ فقدانه و تعبت هواي. الدكتوره : احد اسباب رفضج لـ الحب هم تفكرين اذا حبيتي شخص رح تعيشين شعور امچ شعور الطفله يلي فقدت والدها سوية.

الدكتوره : تشوفين الابتعاد عن المشاعر افضل من عيش هالشي و هذا الالم. لَكن لا تنسين الاقدار مكتوبة. ممكن ما تفقدين الشخص يلي حبيتي مثل والدچ. گلتلچ انا حاولي تغيرين تفكيرج عن الحب و تبدأين تتقبلينه شويه شويه و تستقبلي. هزيت راسي بـ قبول. بعد حديث طويل دار بيني و بينها ودعتها و گمت طلعت. حسيت نفسي ارتاحيت ولو شويه. هواي اشياء جنت مخليتها بـ داخلي حسيتها جانت حجر متكوم بـ صدري. و هم ما قبلت بـ هاي الراحه.

ندمت انو انا راويت شخص اذيتني. بـ نفس الوقت استوعبت تدريجياً و انا اسوق. هي هاي المشاعر يلي انا ارفضها. بين ما الناس يسعون لـ الراحه انا ادفعها بعيداً عني لان اشوف نفسي ما استحقها. جريت نفس عميق لـ داخلي. نزلت اشتريت بطل مي. شربت مي، رجعت صعدت بـ السيارة. وصلت لـ البيت، صفيت سيارتي. رفعت تلفوني شفت اتصالين من ضرغام. اخذت التلفون اتصلت عليه. نزلت من السيارة رن كم ثانيه جاوبني. مُلاذ : ضرغام؟ ضرغام : مُلاذ اخذي حذرچ.

مُلاذ : ليش؟؟ حجيتها و انا افتح باب البيت بـ المفتاح. دخلت، استمع لـ كلام ضرغام. ضرغام : ابو اركان و الملثم. شردوا من السجن اليوم الصبح. انتبهي منهم مُلاذ آمني على نفسج و عائلتج. هدفهم الاول انتِ لان دخلتيهم السجن انتبهي. اتصنمت بـ مكاني. مُلاذ : شنوووو شردوا ضرغاااام!!! ضرغام : شردوا شلون و منين ما اعرف! مُلاذ : الحررس الشرطه وين؟؟ ضرغام : ما اعرف هسه اجاني البلاغ. انتبهي مُلاذ و التلفون بقي يمج دائماً.

مُلاذ : ما يندلون مكاني! ضرغام : يطلعوه من جوه الگاع. رح ارسل حماية هسه لـ بيتكم. مُلاذ : تمام. سد الاتصال مني ضربت ايدي بـ راسي. شلون شردوا منين شردوا! ما خايفه منهم بس كدروا ينفذون من عقابهم. اتذكرت اركان رفعت تلفوني اتصل بي في حال راح الهم و حاول ياذيهم. اتصلت و رن هواي لَكن ماكو جواب. نور : -لابسه جبتي و شالي و واكفه اسقي الزرع و ارشه بـ الصونده.

ما اكدر اطلع لـ الحديقة بلا جبه و شال لان البيوت يلي يمنا عاليه و يشوفون حديقتنا. فزيت، طاحت الصوندة من ايدي لمن سمعت صوت صراخ من بيت اركان. استمر لـ ثواني التفتت لـ اهلي يلي طلعوا يركضون من البيت خلفهم اسكندر. اسكندر : شكووو؟ نور : مااا اعرف. صوت صراخ من بيت اركان! طلع عزيز يركض. الصراخ مو معقول، ابوي صاح وراهو طلع هو هم يركض. وصلنا صوت صياح اركان العالي. راح اسكندر يلبس تشيرته طلع بـ ايده سلاحه يركض ع البيت.

يحجي بـ التلفون و يصيح. اسكندر : ضرغاااام شنو شرد. شوكت انسجن هو اصلاً. بـ ربك تحجيييي صدك !!! اصوات صراخ متفاوته ما نعرف شكو بس الي فهمناه شخص يريد ياذيهم و صوت صراخهم و هم يتوسلون بي. يطلع اسكندر يركض و هو يصيح. اسكندر : تعااال بسرعة المركز قريب من بيتهم. غييير انا نعال مجمد اذا ارمي يسجنوني. طلعت ركض وراهم. عزيز طافر بيت اركان و فاتح الباب.

دخلنا انا و اسكندر اتصنمت بـ مكاني لمن دحگت لـ ابو اركان يلي واكف بـ الصاله. مخلي السجينه على رگبة لالي. اركان و عزيز ضامين ام اركان و ليان وراهم. يتوسلون بي يعوف لالي و هو يهددهم. دقايق من الصراخ. اسكندر موجهه سلاحه على ابو اركان و ابو اركان مخلي لالي كدامه بحيث اذا رمى اسكندر تطيح بيها مو بـ ابوها. اسكندر جرني ضمني وراه. لمن ابو اركان وجهه السجينه عليه و كام يشمر بيها كدامي حتى اوخر.

بجيت بـ خوف على لالي و من الموقف. طلعت عيوني من ورا اسكندر. دحگت لـ ابو اركان. لمن سمع صوت الدوريات شخط السجينه على رگبة لالي. قبل لا اكمل مشاهدة هذا المنظر صرخت غطيت عيوني بـ ايديه. بجيت بـ صوت عالي. مُلاذ : -طلعت امي شافتني صارت عصبية لان تاخرت. لحد هسه تعاركت وياي و انا همي خاف ابو اركان يروح الهم. اتصلت بـ نور و كل القريبين لـ فترة طويله محد يجاوب عليه.

بقيت اروح و ارجع بـ الغرفة. امي ما تخليني اطلع صارت عصبية لان خافت عليه و انا اتاخرت. اذا اگللها اروح لـ بيت اركان و اگللها ابوه شارد من السجن لو اموت بعد ما تطلعني لـ الباب. اتصلت بـ باهر لان اريد رقم أيمن بس هو يعرفهم. رن لـ كم ثانية و جاوبني. مُلاذ : الو باهر. باهر : مُلاذ. انصدمت لمن اجاني صوته يبجي! جمد كل شي بـ جسمي. مُلاذ : باهر؟ الو باهر. ليش تبجي شكووو؟ غاده صارلها شي؟ باهر جاوبني شكوو؟ انا احجي و هو يبجي.

سألته الف سؤال جسمي كام يرجف. مُلاذ : جااااوبني باااهر شكووو؟ غاده بيها شي صارلها شي؟ باهر : لا، أيهم. بجى اكثر و انا تصنمت بـ مكاني. كمل كلامي يبجي، گلت بخوف و صوت يرجف. مُلاذ : شبي أيهم ؟؟؟ باهر : أيهم سوا حادث. متفلشه بي السيارة صايره علجو هو بـ داخلها.