تحميل رواية «حارة البطل» PDF

تحديدا فى اوضه حنين .

الباب اتفتح ودخل عزت وعلى وشه ضحكه كلها شر انه قدر يدخل الاوضه .

قرب من السرير ورفع الغطا براحه بس وقف متسمر مكانه لما شاف حسن اللى نايم مكان حنين .

حسن ضربه برجله وقعه على الارض وقام من على السرير وفضل يضرب فيها بغل وبفتكر كلام رغد ليه .

••فلاش بااااااك••

رغد كانت بتكلم رهف وحكتلها الخطه اللى سمعتها من عزت واولفت .

رغد:لازم حسن يعرف يا رهف .

رهف:ده لو حسن او حمزة عرفو احتمال يقتلوه .

رغد:يستاهل بقاا ... اقفلى انا هروح اكلم حسن .

رهف:حاضر .

رغد قفلت مع رهف ورنت على حسن اللى رد عليها .

رغد:حسن انت فين؟

حسن:قاعد على القهوة شويا وهروح ... ليه فى حاجه ؟!

رغد:طب ممكن تجيلى البيت عايزاك فى حاجه مهمه اوى .

حسن:فى ايه يا رغد متقلقنيش ؟!

رغد:تعالى بس هلبس الاسدال وانزلك

حسن:حاضر .

رغد قفلت وقامت لبست الاسدال ونزلت كان حسن واقف على السلم .

حسن:خير يا رغد .

رغد:رهف كانت لسه بتكلمنى وسمعت مرات خالك كانت بتتكلم مع ابنها .

حسن:عزت هو رجع !

رغد:ايوا ورهف سمعتهم بيقولو انه جاى ينتقم عشان جوزتو حنين لواحد غيره .

حسن بغضب:ينتقم ازاى مش فاهم !!

رغد:بص هى رهف سمعتهم بيقولو ان مامته هتساعده يدخل الشقه وهيدخل اوضه حنين وانتو نايمين ووو

حسن:وايه يا رغد !

رغد:انت عارف يا حسن .... ولما يعمل كدا وقتها مؤمن يطلقها وانتو تبوسو ايده عشان يتجوزها .

حسن:يا ابن الـ🐶 .

رغد:حسن ابوس ايدك اهدى وفكر بعقل ماشى .

حسن:اطلعى انتى يا رغد .

رغد:طب قولى هتعمل ايه طيب ؟

حسن:هابقي اكلمك يا رغد اطلعى .

رغد:حاضر .

حسن راح شقته و كلم حمزة اللى كان فى شقته مع رهف وقاله يطلعله .

حمزة طلع لحسن اللى حكاله كل حاجه وكان هيتجنن واتفقو ان حنين هتطلع عند رهف وحسن هينام مكانها .

••باااك••

حسن كان بيضرب عزت بكل قوته .

الباب اتفتح ودخل حمزة ومحمود اللى حاول يبعدو حسن عن عزت .

محمود:خلاص يا بنى هيموت فى ايدك .

اولفت وعزت خرجو من اوضتهم على الصوت واتصدمو من منظر عزت .

اولفت جرت عليه وزقت حسن بعيد عنه:ابعد عن ابنى ايه اللى بتعمله ده .

هدى وحنين ورهف نزلو .

حسن:ابنك ده واحد واطى عشان بيعض الايد اللى بتتمدله .

هدى قربت من عزت وضربته بالقلم:لما حسن قالى على خطتك الزباله انا قولت لاااا اكيد رهف فهمت غلط .... بقي عايز تشوه سمعه بنتى يا واطى .... عايز جوزها يطلقها .... ليه كل ده ؟!

حمزة:انتى بتتكلمى مع مين يا مرات عمى ده واحد واطى .

اولفت بتتصنع الاستغراب:انا مش فاهمه حاجه .... انت دخلت اوضه حنين ليه يا واد انطق .

هدى:بقي ابنك عايز يدخل اوضه بنتى وياخد غرضه منها عشان يشوه سمعتها وجوزها يطلقها يا اولفت دى اخرت معروفنا معاكو .

اولفت ضربت على صدرها بقوة:يا مصيبتى بقي انت كنت هتعمل كدا يا واد .... قلبي وربي غضبانين عليك ليوم الدين يا ابن بطنى .

حسن:لا والله برافو يا مرات خالى ... لو مكناش عرفنا خطتكو سوا كنا صدقنا التمثليه اللى انتى عملاها دى .

اولفت:خطه ايه يا حسن انا معرفش حاجه !

هدى قربت منها:كفايه كدب بقي عايزة ايه اكتر من كدا ... مش كفايه مستحملين قرفك انتى وعيالك .... من اللحظه دى تلم هدومك وتغورى مش عايزة اشوف وشوشكو تانى .

محمود:الصباح رباح يا ام حسن يمشو لما النهار يطلع .

هدى:لا ياحاج انا لو كنت باقيه على العشرة فكان عشان خاطر اخويا الله يرحمه لكن خلاص فاض بيا ومش هستحمل تانى .

محمود:مهما كانو دول اهل يا حاجه واحنا مش وحشين زيهم ... لمى حاجاتك يا ام عزت واول ما يطلع النهار تتوكلو على الله .... وممنوع رجلك تخطى جوا عتمه بيت البطل مرة تانيه .

حنين:فى حاجه عايزة اقولها يا بابا .... عزت مش اول مرة يدخل اوضتى .... فاكرين اليوم اللى قولتلكو انى شوفت خيال حد معايا فى الاوضه .... كان هو يا بابا .

حسن:بس وقتها ملاقناش حد فى الاوضه يا حنين .

حنين فتحت الدولاب وجابت الحظاظه بتاعه عزت:انا لاقيت دى فى الاوضه بعدها وانا كنت بشوفه بيلبسها دايما يا حسن .

حسن:و ازاى تخبي حاجه زى دى يا حنين عننا ؟!

حنين:خوفت اقولك كنت وقتها اكيد هتقتله يا حسن .

حسن لسه هيقرب من عزت .

محمود:خلاص يا بنى بلاش توسخ ايدكى بدمه من النهارده احنا فى طريق وهما فى طريق .... يلا يا حاجه خدى حنين وادخلو نامو وانت يا حمزة خد مراتك واطلعو ... يلا يا حسن يا بنى اطلع شقتك .... وانتى يا ام عزت لمو حاجاتكو وانزلو نامو فى الشقه اللى تحت واول ما نهار يطلع تتوكلو على الله .

اولفت دخلت الاوضه وهى مسنده عزت ووراها عزة وبداو يلمو حاجاتهم .

( وبكدا يا حلوين نكون خلصنا من اولفت وعيالها )

ـــــــــــــــــــ★ـــــــــــــــــــ

فى شقه حسن اللى قاعد فى البلكونه وبيكلم رغد اللى واقفه قصاده فى البلكونه وبيحكيلها اللى حصل .

رغد:واو كان نفسي احضر حلقه الاكشن دى .

حسن ضحك:اكشن ايه يا رغد .

رغد:انا لو من حنين كنت مسكت اولفت وعزة دول قتلتهم من الضرب .

حسن:ما انا عارفك بتعزيهم اوى .

رغد:ست رخمه اوى هى وبنتها يا باااااى .

حسن:اهم راحو لحالهم ربنا يبعدهم عننا .

رغد:يارب ... صح يا حسن بكرة فرح مها صاحبتى وهروحلها ان شاء الله .

حسن:صح انتى كنتى قولتيلى ..... هاجى معاكى باذن الله .

رغد:لو عندك شغل بلاش تعطل نفسك يا حسن مؤمن كدا كدا هيكون معايا .

حسن:جاى معاكى يا رغد .

رغد:اوكى ... يلا روح نام بقي وانا كمان هدخل انام .

حسن:تصبحى على خير يا دكتورة .

رغد:وانت من اهل الخير يا بطل .

رغد وحسن قفلو وكل واحد فيهم دخل ينام .

ـــــــــــــــــــ★ـــــــــــــــــــ

تانى يوم .

رغد صحت من بدرى وراحت العياده .

ورجعت البيت بعد الضهر وبدات تجهز عشان تروح القاهرة تحضر فرح مها .

رغد لبست فستان بلون الاسود وطرحه بنفس اللون مع لمسات بسيطه من الميكب وكانت رقيقه فوق الوصف .

رغد نزلت كان حسن واقف ساند على العربيه مستنيها ولابس بنطلون اسود وقميص بنفس اللون .

حسن رفع عينه لما سمع خطواتها كانت جميله جداا وهمس:يخربيت جمالك يا رغد .

رغد قربت منه:معلش اتاخرت عليك يا ابو على .

حسن:لا ولا يهمك يا دكتورة ... اركبي يلا .

حسن فتحلها باب العربيه ورغد ركبت وحسن لف ركب مكانه.

رغد بصتله:الفستان غامق وواسع اهو يا حسن عندك اى اعتراض .

حسن ضحك:اه بصراحه عندى .

رغد باستغراب:على ايه بقي ان شاء الله .

حسن لف وقعد بالجمب وكان بيبصلها بعشق:عندى اعتراض على جمالك يا رغد ... وبصراحه نفسي اطلعك البيت ومتروحيش افراح وحد يشوف جمالك ده غيرى .

رغد ماكنتش مصدقه ان حسن اللى بيقولها الكلام ده اصلا.

رغد:حسن انت سخن ولا حاجه؟!

حسن ضحك من قلبه واتحرك بالعربيه .

رغد كانت فرحانه من قلبها بسبب كلام حسن .

رغد:ابو على .

حسن وعينه على الطريق:اممم .

رغد:بصراحه وانا بشترى الفستان شوفت حاجه عجبتنى واشتريتها ليك ويارب تعجبك .

حسن بصلها:حاجه ايه دى ؟!

رغد طلعت من شنطتها خاتم:ده يا حسن .... بصراحه حسيته شبههك اوى ... فقولت اجيبه ليك .

حسن اخد منها الخاتم وبص عليه .

حسن:هو جميل يا رغد .... بس مش فاهم شبههى ازاى بقي ؟!

رغد:يعنى شاب عايش فى حارة وبيحب الموتوسيكلات وبيتخانق وباد بوى بقي وكدا فلازم يلبس خاتم .

حسن ضحك:انتى شيفانى باد بوى يا دكتورة ؟

رغد ضحكت:بصراحه اه .

حسن بصلها وبص للخاتم ولبسه فى ايده الشمال .

رغد:ليه مش اليمين بقي ؟!

حسن غمزلها:عشان انا راجل متجوز يا دكتورة .

رغد:صح نسيت ..... بس انت لابس الدبله فى اليمين يا حسن .

حسن:لما نتجوز ابقي انقلها فى الشمال .

رغد بصلته:ما احنا متجوزين يا حسن !!

حسن:لما نعمل فرح يبقي اسمنا متجوزين يا دكتورة .

رغد:ليه انت ناوى تعمل فرح يا بطل ؟

حسن بصلها:انتى مش عايزة فرح ولا ايه يا دكتورة ؟

رغد بصت قدامها:والله سبنى افكر وارد عليك .

حسن:لا والله !

رغد:اه والله .

حسن:رغد هو انا ممكن اسالك سؤال معلش ؟

رغد:اكيد اتفضل .

حسن مسك القماشه اللى نازله من كتف الفستان:دى لازمتها ايه .... حتى فستان فرح رهف كنتى جايبه فستان بنفس الطريقه .

رغد ضحكت:انت مضايق منها ليه يا حسن !

حسن:انا اعرف الديل بيبقي على الوسط .... انتى بقي بتعمليه للكتف ليه مش فاهم .

رغد:مجرد شكل يا حسن بس .

حسن:ااااه شكل .... تمام .

ـــــــــــــــــــ★ـــــــــــــــــــ

فى بيت البطل .

حنين قاعده فى اوضتها وبتكلم مؤمن .

مؤمن:مش عارف ليه رفضتى تيجى الفرح مع رغد ؟!

حنين:عادى يا مؤمن وبعدين انا قاعده مع لولى .. ازاى اسيبها لوحدها .

مؤمن:لولى كانت هتفضل مع رهف مش حجه يا حنين .

حنين ضحكت:مانا ماعرفش حد فى الفرح يا مؤمن كنت هتحرج الصراحه .

مؤمن:اولا انتى عارفه مها العروسه مش كدا .

حنين:صح كانت هنا ايام فرح رهف واتكلمنا سوا .

مؤمن:ثانيا بقي انا موجود ولا انا مش عاجبك .

حنين:وده كلام يا مؤ ده انت وجودك عندى بالدنيا كلها .

مؤمن:يابوى على الكلام الحلو .

حنين ضحكت:اوعى تنسي هديه لولى بتاعه نجاحها عشان ماتزعلش منك .

مؤمن:تصدقى صح كنت ناسي خالص .

حنين:انا مش قولتلك هى نفسها فى عروسه باربي كبيرة يا مؤمن ازاى تنسي حاجه زى دى .

مؤمن:مش عارفه اقولك ايه يا حنين بجد .... ربنا يخليكى ليا ولـ لولى انتى عوضتيها غياب مامتها كتير جداا وكمان حليتى حياتى بوجودك .

حنين بنفس طريقه مؤمن:يابوى على الكلام الحلو .

الاتنين ضحكوو ومؤمن قفل معاها عشان يقوم يجهز عشان الفرح لانه يعرف مها من زمان .

ـــــــــــــــــــ★ـــــــــــــــــ

بليل وقفت عربيه حسن قدام القاعه اللى فيها الفرح .

رغد:الفرح بدأ يلا ندخل بسرعه .

حسن:يلا .

حسن نزل ولف فتحلها الباب ومد ايده ليها ورغد ابتسمت ومسكت ايده ونزلت من العربيه ودخلو القاعه سوا .

وقابلو مؤمن .

مؤمن سلم على حسن:اخبارك ايه يا بطل ؟

حسن:بخير يا ابو نسب .

مؤمن:عامله ايه يا رغد ؟

حسن:انا فل الفل يا مؤ .

مؤمن وحسن ضحكو .

رغد بصت على مها اللى بترقص مع اصحابها:انا هروح للعروسه .

مؤمن:تعالى ياحسن نشوف محمد فين نقعد معاه .

حسن:حاضر ... رغد متخرجيش من القاعه ابداا .

رغد:حاضر يا حسن متخافش .

رغد مشت وراحت لمها اللى فرحت لما شافتها ورغد باركت ليها ورقصو سوااا وكانو مبسوطين جدا .

ـــــــــــــــــــ★ـــــــــــــــــ

بعد وقت طويل .

حسن ومؤمن واقفين سوا وعينهم على رغد اللى فرحانه وبترقص مع صاحبتها .

قرب عليهم واحد من العاملين فى القاعه وبص لحسن:لو سمحت .

حسن بصله:نعم !

العامل:فى مشكله فى ركنه عربيه حضرتك ومحتاجين انك تحركها شويا لو سمحت .

حسن:تمام جاى معاك .

مؤمن:اجى معاك يا حسن؟

حسن:خليك هنا يا مؤمن .

مؤمن:تمام .

حسن خرج مع العامل وبدأ يحرك عربيته من مكانها .

جوا عند مؤمن .

قرب منه نفس العامل:لو سمحت يا فندم حسن البطل عايز حضرتك برا .

مؤمن:ليه فى مشكله ولا ايه ؟

العامل:تقريبا كدا .

مؤمن بص على رغد شافها واقفه فى وسط البنات مع مها:تمام هاجى معاك .

مؤمن خرج مع العامل .

وراح المكان اللى فيه حسن كان لسه بيركن عربيته .

حسن لما شاف مؤمن:فى ايه يا مؤمن خرجت ليه ؟!

مؤمن:مش انت اللى عايزنى يا بنى ؟!

حسن:انا !! .... لا مش عايزك مين قالك كدا ؟

مؤمن بيلف:العامل د..... راح فين ؟!

حسن:مين يا مؤمن ؟

مؤمن:الواد اللى جه قالك على المشكله جه قالى انك عايزنى برا .

حسن بصله والاتنين بصو على القاعه ودخلو على جوا بسرعه وبصو على المكان اللى متجمع فيه البنات ورغد ماكنتش فى وسطهم .

محمد قرب منهم:انتو كنتو فين ؟

حسن:ماشوفتش رغد يا محمد ؟

محمد:لا هى كانت مع مها .

مؤمن وهو بيبص على البنات:لا مش معاها .

محمد:طب اهدو يمكن راحت الحمام او اى مكان .

حسن اتحرك بسرعه وراح ناحيه مها اللى بصتله باستغراب .

حسن:مبروك يا مها .

مها:الله يبارك فيك .

حسن:هى رغد فين ؟

مها:فى واحد قالها انك انت ومؤمن هتمشو وهى خرجت معاه .

حسن:واحد مين تعرفيه .

مها:كان لابس لبس العمال اللى فى القاعه ولابس نضارة ... هو فى حاجه ياحسن ؟

حسن:لا لا ياعروسه .. هروح اشوفها .

مها:تمام .

حسن مشي وراح لمؤمن:الواد اللى قالنا نخرج راح لرغد وقالها انى عايزها برا .

محمد:تعالو نشوفها برا .

الشباب خرجو سوا ودورو على رغد ماكنتش موجوده .

حسن كان هيتجنن ودخل لواحد من العمال وسالهم على زميل ليهم لابس نضارة بس كان رد الشاب انه مافيش اى واحد من الشباب اللى هنا لابسين نضارات .

حسن طلب يشوف كاميرات المراقبه بس الشاب رفض .

مؤمن كلم مراد عشان يجى عشان يقدرو يشوفو كاميرات المراقبه .

بعد شويا وصل مراد ودخل لمدير المكان وقدم نفسه وطلب يشوف الكاميرات والمدير رحب جداا .

الشباب راحو مع المدير اوضه التحكم اللى فيها عدد كبير من الشاشات اللى بتظهر القاعه من كل مكان برا وجوا .

الشاب المسؤل عن الكاميرات بدا يرجع الكاميرات للوقت اللى حسن قاله عليه .

وشافو العامل اللى قرب منهم وقالهم يخرجو .

حسن:ايوا هو ده .

المدير:بس ده مش من عمال المكان .

حسن:اومال كان لابس زيهم ليه .

المدير:مش عارف بس انا عارف كل الشباب اللى معايا وده مش منهم .

مراد:طب مشي الكاميرا لما نشوف رغد .

الشاب بدا يمشي وشافو الشاب لما قرب من رغد وقالها تخرج وهى خرجت معاه بس من باب جانبي غير الباب الرئيسي اللى خرج منه حسن ومؤمن .

ولما خرجت وقفت تتكلم مع الشاب ده .

الشباب اتصدمو لما شافو عربيه قربت منهم وخرج منها رجلين جسمهم رياضي و واحد منهم كتم بوق رغد اللى كانت بتقاومهم بس مقاومتهم قلت واغمى عليها وسحبوها للعربيه والشاب ركب معاهم واتحركو

رواية حارة البطل بقلم جنات

فى ڤيلا مؤمن .

الشباب قاعدين بعد ما وصلو وجالهم محمد واشرف والدكتور محمد كمان .

مراد:انت متاكد يا اشرف ان اللى كان معاهم رفعت الدمنهورى ؟

اشرف:ايوا يا باشا انا متاكد مليون فى الميا .

مؤمن:وده مين يا مراد ؟

مراد:ده اكبر تاجر ممنوعات فى البلد .

حسن:يعنى ده دليل ضده ؟

مراد:النيابه مش هعترف بدليل ده .... لازم فؤاد يتكلم .

دكتور محمد:ودى هنعملها ازاى ماهو بقاله فترة كبيرة ومش بينطق .

مراد:اكيد فاروق مهدده زى ما رغد قالت .

مؤمن:واللى زى ده ممكن يهدده بايه .

دكتور محمد:بعيلته مثلا .... اللى اعرفه ان فؤاد متجوز مراته عن حب وعنده ولدين وعيلته عنده بالدنيا كلها .

حسن:يبقي نضمنله ان عيلته بخير ووقتها هيتكلم .

مراد:وانا هعرفه انه الحكم هيتخفف لو كان معاه شريك .

مؤمن:يبقي كدا حلو الكلام .

حسن:روح انت يا مراد وتابع موضوع فؤاد .... واحنا هنحاول ناخد الواد اللى اسمه مازن .... ده مش هيستحمل قلمين وهيتكلم .

مراد:تمام .... اشرف خليك معاهم .

اشرف:تمام يا باشا .

مراد خرج من الڤيلا وحسن والشباب بداو يخططو هيوصلو لمازن ازاى .

ــــــــــــــــ★ــــــــــــــــ

عربيه الشباب وقفت على مسافه من ڤيلا فاروق .

حسن:محمد واشرف هتعملو زى مااتفقنا .... وانت يا محمد انت ومؤمن معايا .

محمد واشرف قربو من الحرس وعملو نفسهم بيتخانقو والحرس فتحو البوابه و قربو منهم وحاولو يبعدوهم عن بعض .

حسن و الدكتور محمد جم من وراهم وبحركه بسيطه علمها محمد لحسن كانو مغمى عليهم وواقعين فى الارض ومؤمن ساعدهم وسحبوها فى مكان بعيد عشان محدش يشوفهم .

حسن بهمس:محمد ومحمد انتو خليكو هنا .... وانت يا اشرف معايا .

اشرف:تمام .

حسن بص لمؤمن:اوضته فى دور الكام ؟

مؤمن:الدور التانى اخر اوضه على ايدك الشمال .

حسن:تمام روح انت عطل الكاميرات .

مؤمن:حاضر .

حسن واشرف قربو من باب الڤيلا واشرف فتحه بكل مهارة باله حاده ودخلو براحه وطلعو السلم وقربو من الاوضه وفتحو الباب .

كان مازن نايم .

حسن قرب منه ورش حاجه فى وشه وخلال دقيقه كان متخدر .

حسن بهمس لاشرف:يلا شيل معايا .

حسن واشرف شالوه ونزلو براحه وخرجو من الڤيلا ومؤمن قفل الباب وخرجو بسرعه ركبو العربيات ورجعو على ڤيلا مؤمن .

ــــــــــــــــ★ــــــــــــــــ

صباح يوم جديد .

رهف صحت على صوت رنه الفون .

رهف قامت قعدت على السرير ومسكت الفون وكان رقم شهيرة .

رهف استغربت دى عايزة منها ايه .

حمزة صحى على صوت الفون وبص لرهف اللى بتبص للفون باستغراب .

حمزة قام قعد:مالك يارهف ... مين اللى بيرن عليك ؟

رهف:دى شهيرة مرات عمى فاروق .

حمزة:طب ماتردى عليها وافتحى اسبيكر .

رهف:حاضر .

رهف ردت بعد مافتحت الاسبيكر:الو .

شهيرة:ازيك يا رهف ؟

رهف:اكيد عارفه انى مش بخير لان رغد مش معايا وكله بسبب جوزك وابنك .

شهيرة:انا عارفه مكان رغد يا رهف .

رهف بصت لحمزة اللى مسك فونه ورن على حسن بسرعه .

حسن رد عليه لانه ما نمش طول الليل .

حسن رد وسمع صوت رهف .

رهف:اختى فين ؟

شهيرة:فاروق حابسها فى مخزن اللى فى الزراعى يا رهف ... انا سمعته امبارح بيقول كدا ومعرفش عملو فيها ايه لانه بيقول لازم تتعلم الادب ويكسرها .

رهف عيطت بخوف على اختها .

شهيرة:اهدى يا رهف وعرفى مؤمن هو ممكن يكون عارف طريق المخزن ده وانا لو عرفت اى جديد هعرفك .... بس خليه يتحرك بسرعه لان فاروق بيفكر ينقلها لمكان تانى .

رهف:حاضر وبجد شكراا ليكى .

شهيرة:المهم الوقتى تلاقى اختك يا رهف .

رهف:باذن الله .

رهف قفلت معاها .

حمزة:سمعت يا حسن .

حسن:ايوا يا حمزة سلام الوقت .

ـــــــــــــــ★ـــــــــــــــ

فى ڤيلا مؤمن .

حسن نزل على السلم بسرعه وهو بينادى على مؤمن واشرف ومحمد ومحمد اللى كل واحد فيهم نايم فى مكان من تعب اليوم .

كلهم صحو على صوته العالى .

مؤمن خرج من الاوضه:ايه يابنى مالك ؟

الدكتور محمد قام قعد على الكنبه:هو انا لحقت انام يا عالم .

اشرف:مالك يا بطل .

حسن:تعالو نروح نصبح على الحيوان اللى جوا ده .

حسن راح ناحيه الاوضه اللى فيها مازن .

ودخل وبصله وهو نايم .

حسن:محمد روح هات ميا متلجه .

محمد ضحك:عيونى يا بطل .

الدكتور محمد:ايه الشر ده يا جدع ؟

محمد جاب جردل فيه ميا وتلج وحسن اخده منه وكبه كله فوق مازن اللى شهق .

مازن:فى ايه؟!

مازن فتح عينه وشافهم كلهم واقفين قدامه .

مازن:انا فين وانتو عايزين منى ايه ؟!

مؤمن:مش تقول صباح الخير الاول ياميزو .

مازن:انتو رابطينى كدا ليه فكونى والله هندمكو على اللى بتعملوه .

حسن:وانا عايزك تندمنى يا روح امك .... رغد فين ؟

مازن:وانا هعرف منين مش بقت مراتك !

حسن بص لشباب:شكله هيتعبنا مش كدا .

حسن لف وضربه بوكس بكل قوته:اتكلم بذوق احسنلك .

مازن:معرفش هى فين.

مؤمن:فين المخزن اللى فى الزراعى ده يا مازن ؟!

مازن:اللعب بقا على المكشوف ولا ايه ؟

حسن:هتتكلم ولا لأ ؟

مازن:مش هقولكو على مكانها ... لانى مش هسمحلك تاخدها منى مرة تانيه .

حسن ضربه بوكس ورا التانى بغل والشباب شدوه بعيد عنه .

مازن وشه نزف من كل مكان .

مؤمن:انطق يا مازن المخزن فين .

اشرف:شكله مش هينطق بساهل يا بطل .

حسن شاور لاشرف بمعنى اه .

واشرف قرب من مازن وبحركه بسيطه كان كاسرله ايده ورجله ومازن كان بيصرخ بوجع .

اشرف:هااا هتتكلم ولا نكمل على الباقى .

مازن اتكلم بتعب:هتكلم ... المخزن عنوانه ....

مؤمن:انا عارف المكان ده كويس .

الشباب لسه هيخرجو بس حسن وقف لما سمع كلام مازن:روحلها بس مش هتلاقيها زى ماسبتها .... رغد اتدمرت .

حسن لف وبصله وقرب ومسكه من ياقه التيشيرت:عملتو فيها ايه يا كلب ؟

مازن همس جمب ودنه بحيث محدش يسمع كلامه غير حسن:الدكتورة رغد بقت ...

حسن بعد عنه بصدمه ومازن كان بيضحك ببرود .

مؤمن قرب منه:الحيوان ده قالك ايه يا حسن .

حسن اتعصب من صوت ضحكه وضربه بقوة على راسه لدرجه ان مازن اغمى عليه .

الدكتور محمد:قالك ايه يا حسن ؟

حسن خرج بسرعه وهو بيقول:يلا نتحرك بسرعه .

ـــــــــــــــ★ـــــــــــــــ

فى ڤيلا فاروق اللى صحى وعرف اللى حصل من الحرس وكان هيتجنن لما ملاقاش مازن فى اوضته وكمان الكاميرات متعطله .

شهيرة جت من وراه:كله بسبب عمايلك يا فاروق ... ابنك هيروح مننا بسبب خطفك لرغد .

فاروق بصلها بشر:انتى عرفتى منين ... انتى بتتصنتى علينا .

شهيرة:ايوا وعرفت رهف واكيد الوقت لحقو رغد وهتروح فى ستين داهيه يا فاروق .

فاروق قرب منها بشر ومسكها من رقبتها وخنقها:انتى ازاى تعملى كدا ..... انتى عقابك الموت ماينفعش كلبه زيك تعيش وسطنا .

شهيرة كانت بتقاومه لحد نفسها اتقطع ومقاومتها وقفت وايدها وقعت جمبها .

فاروق بعد عنها ونادى على الحرس يشيلوها ويخبو الجثه فى اى مكان وخرج بسرعه وراح على المكان اللى فيه رغد .

ـــــــــــــــ★ـــــــــــــــ

فى القسم عند مراد اللى بيحاول مع فؤاد عشان يتكلم وهو رافض ومصمم ان محدش كان بيساعده .

مراد امر العسكرى يرجعه الحبس تانى .

مراد كلم حسن عشان يعرف ان فؤاد رافض يتكلم .

وحسن قاله انهم عرفو مكان رغد .

مراد طلب منه ما يدخلش غير لما يوصله وخرج بسرعه من القسم واخد قوة معاه وراحو على العنوان .

ـــــــــــــــ★ـــــــــــــــ

فى المخزن اللى على الطريق الزراعى .

اللى كان قديم وكله كراتين قديمه وريحه التراب والرطوبه فى المكان كله .

وكان ضلمه ومافيش غير لمبه صغيرة جدا منورة جزء بسيط من المخزن .

رغد كانت نايمه على فرشه على الارض او بمعنى اصح كانت فى عالم تانى .

طرحتها واقعه على الارض وشعرها نازل على وشها وفستانها متبهدل من التراب ودراعاته متقطعه ووشها فى كدمات والدم اللى نازل من مناخيرها وبوقها ناشف وايدها كلها بقع بلون الازرق .

وايدها ورجليها مربوطه بحبل سميك والحبل مربوط فى عمود فى نص المخزن .

الباب اتفتح ودخل فاروق ومعاه راجلين .

فاروق بص لراجل من اللى معاه اللى راح ناحيه رغد وكب فوقها ميا .

رغد شهقت بقوة كان روحها بتروح والراجل شدها عشان تقوم تقعد .

فاروق:عامله ايه يا دكتورة؟ .... عرفت انك سالتى عليا كتير .... قالولى انك قولتى عليا جبان ومستخبي زى النسوان .

رغد كانت بتبصله بكره كبير .

فاروق بص لراجل التانى اللى معاه:الدكتوره فطرت النهارده ؟

الراجل:لا يا باشا لسه .

فاروق:وده كلام .... ادوها فطارها بسرعه .

الراجل طلع سرنجه من جيبه وقرب من رغد والراجل التانى مسك دراعها بقوة وفرده والراجل دخل السرنجه فى دراعها ورغد غمضت عينيها بوجع .

واول ما الرجل بعد بعدها رغد وقعت على الارض .

فاروق قرب منها:بقيتى مدمنه يا دكتورة .... مناخيرك اللى كنتى رفعاه فى سما نزلته سابع ارض .... شايفه انتى تحت رجلى ازاى .

رغد كانت بتحاول تقاوم الوجع اللى حاسه بيه مكان الدوا اللى دخل جسمها .

فاروق:حاسه بنار صح .... عايز اعرفك لو عدى يوم واحد من غير ماتاخدى الجرعه هتحسي بوجع هتتمنى الموت ولا انك تتوجعى كدا .

فاروق مسكها من شعرها ورفع راسها:لسه نظرة التحدى والقوة جوا عينيكى رغم اللى عملته فيكى يا رغد .... اخدتى نفس قوة ابوكى .... عارفه دى نفس النظرة اللى شوفتها فى عينيه وهو بيموت .

رغد نست الوجع وبصتله اوى .

فاروق:ايوا اللى جه فى دماغك ... انا اللى دبرت الحادثه لابوكى .... وقولت هيموت وهاخد كل حاجه بس طلع مأمن نفسه وكاتب كله حاجه ليكو ..... طول عمره بياخد كل حاجه منى .... اخد مريم الانسانه الوحيده اللى حبيتها بصدق .... اخد حب ابويا وامى .... اخد النجاح وانا الفشل ..... فقررت اخلص منه واتفقت مع السواق وقطع الفرامل وقولته ينط من العربيه بس انا كنت موجود مع رجالتى وخلصت عليه عشان مايفكرش ينطق او يتكلم .

ووقتها وقفت قدام ابوكى وشوفت فى عينيه نفس نظره القوة اللى فى عينيكى الوقت .... انتى الوقتى بقيتى مدمنه واختك هخلص عليها وبكدا كل الاملاك هتبقي باسمى انا وبس .

فاروق ساب شعر رغد وخبطها فى الارض بقوة لدرجه انها اغمى عليها .

مراد وصل مع القوة وقربو من المخزن وضربو الحرس اللى واقفين برا .

فاروق سمع دوشه برا .

راجل من اللى معاه بص من الفتحه الصغيرة الموجوده فى حيطه المخزن وشاف الشرطه وبص لفاروق:دول الشرطه يا باشا.

فاروق جرى وهرب بسرعه من الباب الخلفى للمخزن وركب عربيته اللى كانت مركونه قريبه من الباب الخلفى وساق باقصى سرعه وساب رجالته .

الكل دخلو المخزن بسرعه ومسكو الرجلين اللى كانو مع فاروق .

حسن اللى جرى على رغد واخدها فى حضنه بيداريها عن عيون اللى واقفين .

مؤمن جاب طرحتها وقرب من حسن وحطها على راس رغد وحاولو يدارو جسمها اللى باين .

مراد بص لرجاله فاروق:فاروق فين ؟

راجل منهم:منعرفش حد بالاسم ده يا باشا .

مراد:وانا هخليك تعرف يا روح امك ... خدوهم .

حسن شالها وضمها لحضنه بقوة وخرج من المخزن وركب العربيه وهى فى حضنه ومؤمن ساق العربيه بسرعه .

والكل ركبو العربيات ومشو .

ـــــــــــــــ★ـــــــــــــــ

حسن اخد رغد وراحو على اقرب مستشفى ودكتور محمد كلم مدير المستشفى بانه يكون مسؤل عن رغد والمدير رحب جدا لانه عارفه .

محمد خرج من اوضه اللى فيه رغد .

حسن قرب منه:عامله ايه يا محمد ؟

محمد:الواطى كان بيديها جرعات كبيرة من المخدرات بالحقن الوريدى .

مؤمن:يعنى رغد الوقت ...

محمد:تعالو نتكلم جوا .

حسن ومؤمن دخلو مع محمد الاوضه اللى فيها رغد .

حسن عينه عليها وهى نايمه فى عالم تانى .

مؤمن:فهمنا يا محمد اكتر .

محمد:المخـ★ــدرات اللى بتتاخد بالحقن يا حسن يعتبر اخطر انواع التعاطى تقريبا ..... وبيسبب مخاطر والمضاعفات صحيه لجسم المدمن .... لانه بينقل الماده المخدرة إلى مجرى الدم بسرعة كبيرة عشان كدا المدمن بيحس بمفعول المخدر فى وقت قليل جدا

.

حسن:وازاى تتعالج من ده كله يا محمد ؟

محمد:الحل الاحسن طبعا تروح مستشفى لعلاج الادمان .

مؤمن وحسن فى نفس النفس:مستحيل .

محمد:افهمو يا جماعه رغد لو جه عليها معاد الجرعه ومأخدتهاش هتحس بوجع صعب .

حسن:اكيد فى حل تانى .

محمد:حسن مستشفى علاج إدمان هما اللى هيقدرو يساعدوها وكمان بيستعملو بروتوكول مخصص عشان يتخلصو من السموم اللى فى جسمها .

حسن:رغد مش هتروح تتعالج فى مستشفيات يا محمد .

محمد:طيب هقولك على طريقه تانيه بس لازم تكون على تواصل مع دكتور متخصص عشان يساعدك اكتر .

حسن:موافق .

مؤمن:ايه هى الطريقه ؟

محمد:فى حاجه اسمها عمليه ازاله السموم او تطهير الجسم .... ودى بتكون عن طريق ادويه بياخدها المدمن بس طبعا مع اشراف طبيب متخصص ومتابعه على مدار ٢٤ ساعه .

حسن:تمام شوف دكتور كويس ويفهمنا كل حاجه وانا هتصرف .

محمد:ولازم البيئه اللى هتعيش فيها تكون بيئه ترفع من معنوياتها يا حسن عشان تقدر تتخطى المرحله دى بسهوله .

حسن:تمام .

مؤمن:ناوى على ايه ياحسن ؟

حسن:اول حاجه هناخدها ونروح الحارة عشان رهف تشوفها والكل يطمنو عليها وبعد كدا هاخدها لمكان كويس وهفضل معاها ثانيه بثانيه .

مؤمن:تمام .

حسن شال رغد ونزلو وركبو العربيه ومؤمن ساق بيهم وراحو على اسكندريه وتحديداا الحارة .

محمد بدا يتواصل مع دكتور كويس اللى فهمها نظام العلاج وقاله انه هيبعت معاهم ممرضه عشان تتابع الحاله .

ـــــــــــــــ★ـــــــــــــــ

فاروق رجع الڤيلا وكان هيموت من الرعب واتفاجأ بمازن ووشه كله كدمات .

فاروق:مين اللى عمل فيك كدا ؟

مازن:جوز رغد .... هى فين الوقت دول عرفو مكانها .

فاروق:وصلو المكان واخدوها .

مازن:واحنا هنعمل ايه ؟

فاروق:هنبلغ عنهم انهم اتهجمو علينا وكمان خاطفين بنت اخويا وهى مش هتقدر تفضل معاهم لانها هتحتاج الجرعه واكيد هتختار تيجى معانا .

مازن:صح ... هتكلم مدحت طبعااا .

فاروق:اكيد .... يلا عشان نروح اسكندريه .

مازن:اومال فين ماما ماشوفتهاش .

فاروق:خرجت من الصبح ولسه مرجعتش .

مازن:تمام هطلع اغير وانزل بسرعه .

فاروق:تمام .

ـــــــــــــــ★ـــــــــــــــ

تانى يوم فى الحارة.

رغد نايمه على السرير فى بيت البطل كأنها فى عالم تانى وطبعا ده اثر المنوم اللى محمد عطاه ليها عشان متفوقش الوقت .

ورهف قاعده جمبها وبتعيط على حاله اختها .

هدى وحنين اللى قلبهم وجعهم على حاله رغد .

محمود وحمزة اللى واقفين والحزن مسيطر على الكل .

هدى:يا قلبي يابنتى كان مستخبيلك فين كل ده .

محمود:ماتخليكو هنا فى وسطنا يا بنى .

حسن:لازم رغد تبعد عن هنا يا حاج عشان عمها مايقدرش يوصلها مرة تانيه .

مراد خبط على الباب ودخل:اشرف كلمنى وبيقول ان مدحت جاى مع فاروق على هنا .

الدكتور محمد:رغد لازم تتحرك الوقت .

حسن:انا هاخد رغد هوديها عند فرح زى ماتفقنا لحد ما يمشو .

محمد:تمام ... رهف بطلى عياط لازم نبان طبيعين وانتو عارفين هتقولو ايه .

الكل:ايوا

حسن شال رغد واخدها بسرعه عند فرح ورجع تانى .

عربيه فاروق وصلت الحارة ومعاه مازن ووراه عربيه الشرطه .

الناس اللى فى الحارة كلهم وقفو يشوفو هما رايحين فين .

فاروق دخل بيت الشهاوى وخبطو بقوة على الباب فتحلهم مؤمن:ايه ده فى ايه ؟!

فاروق:رغد فين يا مؤمن ؟

مؤمن:وانت عايز رغد ليه؟

مدحت:ياريت ترد على السؤال الدكتورة رغد فين ؟

مؤمن:مش هنا .

مدحت:احنا لازم نفتش المكان .

مؤمن:تفتشو ايه وليه اصلا ؟!!

مدحت طلع ورقه:ده امر بالتفتيش .

مدحت امر العساكر يفتشو البيت .

كلهم خرجو من الاوض:مافيش حد يافندم غير عيله صغيرة نايمه جوا .

مؤمن:قولتلك مش هنا مافيش غير لارا بنتى نايمه .

مازن:يبقي فى بيت البلطجى جوزها .

مؤمن:ولا حتى هناك رغد سافرت تحضر مؤتمر فى فرنسا بقالها اكتر شهر مسافرة.

فاروق:كلام ده كذب يلا ندور فى بيت جوزها .

فاروق نزل مع مدحت ومازن وراحو بيت البطل .

حسن فتحلهم الباب:خير ؟!

مدحت:عندنا امر بتفتيش البيت .

حسن:وده ليه ان شاء الله؟

مدحت:فاروق بيه متهمك انك خطفت الدكتورة رغد وانها موجوده عندك بدون ارادتها.

حسن:لا والله ... وايه دليلك على العبط ده ؟!

مدحت:انا اسف لازم نفتش .

حسن بعد من طريقهم:اتفضلو .

كلهم دخلت والعساكر بدات تفتش البيت كله وبردو مافيش حد .

حسن:يارب تكون اطمنت .

فاروق بص لرهف اللى واقفه جمب حمزة:اختك فين يا رهف ؟

رهف:اختى مش هنا يا عمو ... رهف بقالها اكتر من شهر مسافرة فرنسا عشان تحضر مؤتمر طبي .

مدحت:وايه دليلكو على كدا .

محمد قرب منهم فونه:دى دعوه الحضور وكمان دى صور التذاكر السفر بتاعه رغد .

مازن:وانت بتعمل ايه هنا يادكتور؟

محمد:انا اللى بتابع حاله الحاج محمود وكان تعبان شويا وجيت اطمن عليه ... عندك اعتراض !!

مدحت:زى ماحضرتك شوفت يا فاروق بيه الدكتورة مش هنا ..... احنا بنتاسف عن اذنكو ......

مدحت خرج من بيت البطل مع العساكر .

فاروق عينه على حسن بغيظ:عرفت تخبيها بس بردو هوصلها .

مازن:ووقتها هتندمو على كل اللى عملتوه معانا .... واولهم الدكتورة رغد .

فاروق:وياترى الدكتورة رغد المدمنه هتعالجوها فين ؟!

حمزة:انتو من وقت ما دخلتم وانتم بتغلطوا وتهددوا ..... فلو عايزين تخرجو بكرامتكو ... فا تتفضلوا تاخدوا بعضكم كدا وبالسلامة ومالكوش عندنا حاجة .

مازن:لا ما انتو ماتفرحوش بلمتكو دى .... ده احنا معانا رجاله برا تاكل الحديد .

مؤمن دخل من الباب:بقولك ايه يا فاروق خد ابنك وامشو لان احنا بنحاول نكون هادين معاكم بس انت كدا هتخلينا نتعامل معاكو بإسلوب مش هيعجبكو .

فاروق: انتم بتهددونا يعنى !! .... احنا ممكن نقلب الحارة كلها دم ولا هيفرق معانا .

حسن: تبقي غلطان لو فاكر اننا هنخاف من الكلام العبيط ده .... انت هنا في منطقه كلها رجالة مش خرفان .... واصغر واحد فينا مش هيسبكم تخرجوا على رجليكو لو فكرتو تأذو واحد من اهل الحارة ..... فمش هتعرفوا تعملولنا حاجه .

فاروق خاف من كلام حسن وبص لابنه وخرجو من البيت بغضب .

هدى:انا مش عارفة كان مستخبي لينا فين ده كله بس ياربي ..... بقي رغد اللى كانت ضحكتها بتملى المكان فرحه تبقي حالتها كدا بالشكل ده .... كنا فرحانين ومبسوطين منهم لله اللى حسدونا .... ناس تندب في عنيها رصاصة .. باصين لينا في كل حاجة ... يارب اشفيها وطمنا عليها يارب .

رهف عيطت وحمزة اخدها فى حضنه .

محمود:هتتحركو امته يا بنى ؟

حسن:بليل يا حاج ولما نتاكد ان فاروق مسابش حد من رجالته فى الحارة .

مراد:انا هسافر القاهرة وهحاول تانى مع فؤاد .

مؤمن:انا هاجى معاك عشان فى شغل واقف فى الشركه .... حسن ابقي طمنى عملت ايه .

حسن:تمام يا مؤمن .

محمد:وانا هسافر معاكو عشان اخد الممرضه اللى هتبقي مع رغد على العنوان اللى هتروحو عليه .

حسن:اول ما اتحرك هعرفك يامحمد .

محمد:خد بالك على نفسك وعليها وهى عمتا مش هتفوق غير بعد ٢٤ ساعه بسبب المنوم.

حسن:تمام .

مؤمن بص لحنين:لارا نايمه هناك يا حنين ... هروح اجيبها عشان تبقي معاكى هنا .

حنين:حاضر .

ـــــــــــــــــــ★ـــــــــــــــــ

عدى اليوم بسرعه وحسن ومحمد اتاكدو ان مافيش حد غريب فى الحارة .

حسن راح مع محمد على شقته واخد رغد ونيمها على الكرسي الخلفى فى العربيه .

ورهف اللى اصرت تشوفها قبل ما تسافر وراحت ودعتها وعيطت كتير وهى حضناها .

حسن اتحرك بالعربيه وكلم محمد عشان يوصل الممرضه اللى هيكون معاها العلاج الخاص برغد واللى هتابع حالتها .

حسن كان سايق وعينه كل شويا تيجى على رغد اللى نايمه ومش حاسه باى حاجه بتحصل حوليها وكمان عينه على الطريق خوفا من ان فاروق يكون حاطط عليهم رقابه .

بعد وقت طويل مع طلوع النهار حسن وصل الغردقه وقابله واحد معرفه وركب مع حسن .

ودله على العنوان المكان اللى هيعدو فيه .

حسن وقف بالعربيه ونزل شال رغد عشان البيت اللى هيعدو فيه مافيش عربيات بتوصل عنده .

ومشو مسافه مش قليله واخيرااا وصلو والمكان كان زى ما حسن طلب كان بيت بسيط بيطل على البحر وبعيد عن الناس .

والبيت كان فيه اوضه صغيرة فيها سرير بسيط ودولاب صغير وليها باب من الخشب واوضه تانيه صغيرة جدا مافيش فيها غير سرير صغير وباباها عبارة عن ستارة وصاله صغيرة فيها كنبه جحمها وسط واتنين صغيرين ومطبخ وحمام صغيرين .

حسن دخل رغد ونيمها على السرير وخرج لصاحبه حماده .

حسن:مش عارف اشكرك ازاى يا حماده .

حماده:مافيش شكر مابينا يا بطل المهم ربنا يطمنك عليها .

حسن:يارب .

حماده:لو محتاج اى طلبات عرفنى وانا اجبلك كل حاجه اكيد متعرفش حاجه هنا .

حسن:انا جايب معايا الحاجات اللى هنحتاجها واكيد لو احتاجت حاجه هعرفك تيجى معايا .... انا بس عايز اعمل باب للاوضه الصغيرة عشان فى ممرضه هتيجى عشان تتابع حالتها وطبعا ماينفعش الباب الستارة ده .

حماده:تمام بكرة هيكون عندك باب خشب يا بطل .

حسن:تسلم يا حماده .

حماده:تمام يا بطل اسيبك انا بقي .

حسن:تمام .

حماده قبل ما يمشي دخل اخد مقاس الباب وحسن دخل قعد جمب رغد ومسك ايدها وباسها .

ـــــــــــــــ★ـــــــــــــ

فى القسم عند مراد اللى قاعد وقدامه فؤاد اللى كان بيكلم عيلته .

مراد:انت كدا اتاكدت ان مراتك وولادك تحت حمايتى الوقت يا فؤاد هتتكلم بقي .

فؤاد:ايوا يا باشا .... فاروق ومازن معايا فى تجارة الاعـــ* ض *ــاء ومش بس كدا احنا بنتاجر فى كل حاجه تقريباا .

مراد:دى كانت اول مرة تعلمو عمليه زى دى فى المستشفى .

فؤاد:ايوا اول مرة ..... بس كنا بنعملها فى عياده قديمه فى القاهرة .

مراد:معاك حاجه تثبت ان فاروق وابنه كانو معاك عشان متلبسهاش لوحدك .

فؤاد:ايوا معايا كل الورق اللى بيثبت الكلام ده وورق لكل عمليه عملناها ومش بس كدا انا كنت بسجلهم كل اجتماع عشان ماكنتش بثق فيهم .

مراد:فين الورق والتسجيلات دى .

فؤاد:فى بيتى فى مخبأ سرى .

مراد نادى على واحد من رجالته وفؤاد قاله على المكان عشان يروح يجيبهم .

فؤاد:وكمان يا باشا فاروق الصاوى اللى امر بقتل اخوه جمال الصاوى ومراته مريم باتفاق مع السواق انه يقطع الفوامل وينط من العربيه .... ولما السواق نط وكان عايش فاروق كان موجود فى مكان الحادث عشان يتاكد بنفسه قتله عشان ميعترفش عليه .

مراد اتصدم من اعتراف فؤاد .

مراد:تمام يا فؤاد تقدر الوقت ترجع الحبس تانى .

فؤاد:وانا موقفى ايه الوقت يا باشا ؟

مراد:انا مش هكذب عليك انت قضيتك كبيرة واقل حاجه هتاخدها مؤبد يا فؤاد .

فؤاد قام وقف وهو مصدوم ومش مصدق اللى وصل ليه وخرج مع العسكرى وراح على حبسه .

مراد كلم حسن وقاله على اعتراف فؤاد وانهم هيجبو الادله ويقدموها لنيابه وبعد كاد هيتم القبض على فاروق وابنه .

ـــــــــــــــ★ـــــــــــــ

عند حسن ورغد

محمد وصل مع الممرضه اللى بدات ترتب الادويه عشان اول ما رغد تفوق هتبدا معاها .

حسن:هى المفروض هتفوق امته؟

محمد:خلاص ساعه اول اقل يا حسن ... ولازم تعرف انها لما تفوق الموضوع هيكون صعب ... لانها بقالها اكتر من ٢٤ ساعه من غير الجرعه وده هيكون مسببلها وجع وتعب رهيب .

حسن:والتعامل معاها هيكون ازاى ؟

الممرضه واسمها اسراء:فى ادويه هتاخدها اول ماتفوق .... المهم اننا نقدر نسيطر عليها ولو مقدرناش نهديها هنضطر نديها منوم تانى .

محمد:اسراء معاك يا حسن وهى ما شاء الله عليها ممتازه دكتور احمد بيشكر فيها جامد وان شاء الله رغد هتبقي بخير .

حسن بص لاسراء:فترة العلاج هتبقي كبيرة ؟

اسراء:على حسب قدرة وشجاعه المريض ... فى مريض بيبقي مستسلم وده علاجه ممكن ياخد اكتر من سنه .... لكن في مريض بيكون قوى وبيرفض يستسلم وده فترة علاجه بتكون قليله.

حسن:تمام .... فى اوضه صغيرة هى ملهاش بابا بس انا هتصرف وهحاول اعملك ليها باب عشان تكونى براحتك .

اسراء:شكراا .

اسراء دخلت الاوضه الصغيرة .

محمد ودع حسن ومشي .

حسن خرج يقعد على كرسي من الكراسي اللى برا البيت قدام البحر عشان اسراء تاخد راحتها والدنيا كانت ليليت وحسن نام مكانه من التعب .

ـــــــــــــــ★ـــــــــــــ

فى منتصف الليل

حسن قام مفزوع على صوت صريخ عالى ودخل بسرعه لما استنتج انه صوت رغد .

حسن دخل البيت وشاف اسراء خارجه من اوضتها وهى بتلف طرحه الاسدال ودخلو الاتنين عند رغد اللى كانت ضمه جسمها وبتصرخ بصوت عالى.

حسن قرب منها:رغد ... اهدى ياحبيبتى ... رغد انتى سمعانى .... رغد .

رغد ماكنتش سامعه اى حاجه ومش حاسه غير بالوجع اللى فى جسمها .

اسراء جهزت الابرة اللى هتاخدها:امسك دراعها جامد لو سمحت .

حسن ضم رغد اللى كانت بتتحرك بهستيريا وثبتها كويس واسراء اديتها الحقنه .

ورغد ماكنتش بتهدى ولا سامعه كلام حد فيهم واسراء اضطرت تعيطها منوم عشان تهدى .

بعد شويا رغد نامت فى حضن حسن اللى قلبه وجعه من منظرهاا .

ـــــــــــــــ★ـــــــــــــ

عدى اسبوعين .

رغد على نفس الحاله لما بتفوق تفضل تصرخ وتعيط بهستيريا وحسن واسراء بيحاولو يهدوها .

اسراء اللى بتديها علاجها فى مواعيده عشان ينضفو جسمها من السموم .

حسن اللى هيتجنن بسبب حالتها وحاسس انه عاجز ومش قادر يعملها اى حاجه .

مراد اللى قدم الادله للنيابه وامرت بالقبض على فاروق ومازن .... ولما فتشو الڤيلا لاقو جثه شهيرة مدفونه فى جنينه الخلفيه للڤيلا وحرس فاروق اعترفو ان هو اللى قتلها .

مراد عرف يوصل لشاب اللى دخل طقم المستشفى وكمان الشاب اللى كان فى فرح مها والاتنين اعترفو على فاروق انه هو اللى طلب منهم يعملو كدا.

فؤاد اللى حالته الصحيه ادهورت ودخل مستشفى السجن .

فاروق اللى كان هيتجنن بسبب اعتراف فؤاد ضده وكمان الادله اللى قدمها للنيابه .

ـــــــــــــــ★ـــــــــــــ

فى يوم حسن دخل اوضه رغد كانت صاحيه وباصه لسقف الاوضه .

حسن قعد جمبها وكان مستغرب هدؤها لانها لما بتصحى يا بتعيط يا بتصرخ .

حسن مسك ايدها:رغد انتى كويسه ؟

رغد بصتله وقامت عشان تقعد وحسن ساعدها وحطلها المخده ورا ضهرها .

حسن:طمنينى عليكى يا رغد نفسي اسمع صوتك بس .

رغد بتعب ظاهر:مش كويسه .

حسن مسك ايدها وباسها:لازم تبقي كويسه يا رغد .... رغد اللى اعرفها قويه ومافيش حد يقدر يهزمها او يكسرها ... انا متاكد انك هتعدى الفترة دى على خير وهترجعى احسن واقوى من الاول ميت مرة ..... كلنا خايفين عليكى يا رغد .

رغد بصلته .

حسن:انا ورهف وهدهد وحنين ومؤمن والحاج ولارا كلنا خايفين عليكى وبندعى ترجعلينا بالف سلامه .

رغد:باذن الله .

الباب خبط ودخلت اسراء:الجميل عامل ايه النهارده .

رغد:الحمدلله .

اسراء:طب يلا عشان ده معاد الدوا بتاعك .

حسن:يلا يا اسراء رغد جاهزة مش كدا؟

رغد هزت راسها باه .

واسراء جابت الحقنه وعطيتها لرغد:بالشفا ان شاء الله .

اسراء خرجت وحسن عينه على رغد .

حسن:تحبي تخرجى تشمى شويا هوا الجو برا جميل .

رغد هزت راسها بلا ونامت على السرير وضمت جسمها وغمضت عينيها ولان الدوا فيه نسبه منوم نامت على طول .

حسن مسح على شعرها الاسود اللى واصل لحد كتفها وباس راسها وخرج يقعد برا .

ـــــــــــــــ★ـــــــــــــ

بتمر الايام .

رغد حالتها اهدى كتير عن الاول مش بتصرخ ولا بتعيط ... بس دايما ساكته ومش بتتكلم .

حسن واسراء بيحاول معاها كتير انها تتكلم او تخرج من الاوضه بس هى بترفض وحتى الاكل مش بتاكل كويس .

حسن اللى معاها دايما .

الدكتور المخصص لعلاجها بيجيلها مرة فى الاسبوع عشان يتابع حالتها ويعملها التحاليل المطلوبه عشان يطمنو ان نسبه المخدر قل فى جسمها .... واللى فرح حسن واسراء ان العلاج جاب نتيجه سريعه مع رغد ونسبه المخدر قلت كتير فى جسمها .

بس الدكتور قالهم انها محتاجه راعيه وتغديه عشان جسمها لسه ضعيف .

ـــــــــــــــ★ـــــــــــــ

فى يوم بليل .

رغد فتحت عينيها بتعب وجسمها بدا يوجعها وبتحاول تقاوم الوجع .

رغد قامت من على السرير بتعب ظاهر وكانت بتسند على الحيطه .

خرجت من الاوضه ماكنش فى حد فخرجت من البيت كله فحست بنسمات الهوا اللى بتضرب فى وشها كأنها بترد روحها .

عنيها كانت بتدور على حسن لحد ما شافته نايم على المرجيحه اللى قدام البيت .

رغد مشت وهى بتتسند على الحيطه وحست بدوخه جامده نادت على حسن بصوت كله تعب:حسن .

حسن كان نايم على المرجيحه وباصص لسما واول ما سمع صوتها قام بسرعه وشافها واقفه وماسكه راسها وجرى عليها .

رغد وقعت فى حضنه وحسن شالها ونيمها على المرجيحه ومسك وشها بين ايده:ايه اللى قومك يا رغد ؟

رغد بتعب:زهقت من النومه .

حسن شايف ملامح وشها وكانت بتحاول تكتم وجعها:حاسه بايه يا حبيبتى ؟

رغد بصتله ودموعها نزلت:جسمى كله بيوجعنى يا حسن .

رغد عيطت جامد وحسن طلع نام جمبها واخدها فى حضنه وبقي يهديها بكلامه لحد ما نامت فى حضنه وهو كمان نام .

ـــــــــــــــ★ـــــــــــــ

صباح تانى يوم .

اسراء صحت ودخلت اوضه رغد واتخضت لما ماكنتش موجوده وخرجت بسرعه عشان تقول لحسن بس ابتسمت لما لاقيتهم نايمين فى حضن بعض على المرجيحه ودخلت البيت تانى .

رغد فتحت عينيها لما بدا وجع جسمها يزيد تانى ولاقت نفسها نايمه فى حضن حسن بصتله اوى وافتكرت كل اللى بيعمله معاها من وقت مافاقت وكلامه ليها عشان يشجعها تبقي قويه .... وانه متخلاش عنها ابداا بعد اللى حصلها وافتكرت فى كل مرة ياخدها فى حضنه و اد ايه حضنه كله دفا وحنيه وحب .

رغد ضمت نفسها اكتر جوا حضنه وكلبشت فى التيشيرت بتاعه كأنه هيهرب منها وعيطت .

حسن صحى على حركتها وصوت شهقاتها اللى بتحاول تكتمها جوا حضنه .

حسن:رغد ... انتى كويسه ؟

رغد عياطها زاد .

حسن قام من مكانه وقومها عشان تقعد جمبه وشدها لحضنه .

حسن:مالك يا رغد فهمينى بتعيطى ليه ؟!

رغد بصوت مخنوق:تعبانه اوى يا حسن ... جسمى كله بيوجعنى .... فاروق قدر يكسرنى ويذلنى .

حسن قام قعد على ركبته على الارض قدام رغد اللى كانت قاعده على المرجيحه ورجليها على الارض .

حسن مسك وشها بين ايديه وعينه فى عينيها:لا عاش ولا كان اللى يذل ويكسر الدكتورة رغد الصاوى ..... ده اختبار من ربنا يارغد وانتى قويه وهتعديه وهترجعى احسن من الاول مليون مرة صح .

رغد وعينيها فى عينيه هزت راسها باه .

حسن بمشاكسه:وبعدين انتى نسيتى ان عندنا مناسبه مهمه وانا اللى هختارلك الفستان ولا عايزة تهربي يا دكتورة .

رغد ابتسمت لما افتكرت كلامه انه هو اللى هيختارلها فستان فرحهم .

حسن مسك ايدها وباسها بحب:واللى متاكد منه انك هتكونى احلى واجمل عروسه .... وهتخطفى قلبي وعقلى من اول ما اشوفك ... زى ما ملكتى قلبي من اول نظرة يا رغد .

رغد ابتسمت:بقا البطل بنفسه بيقولى الكلام الحلو ده .

حسن قام وقف ورغد وقفت قدامه:انتى اجمل هديه جيتلى من ربنا يا رغد وبقيتى حياتى وقلبي وعقلى وروحى كمان .... انا بعشقك يا رغد .

رغد دخلت جوا حضنه:وانا بحبك اوى يا ابو على .

حسن ضمها لحضنه اكتر لدرجه انها مابقتيش لامسه الارض ولف بيها كتير .

وفاقو الاتنين على صوت اسراء:احم احم نحن هنا .

رغد بعدت عن حسن وبصو لاسراء اللى كانت حاطه ايدها على عينيها وضحكو .

اسراء نزلت ايدها:قدرو يا جماعه ان فى واحده سنجله معاكو ماينفعش كدا والله .

حسن ورغد ضحكو اكتر وحسن بص لرغد اللى وحشه ضحكتها .

اسراء:يلا يا رغد عشان تاكلى عشان علاجك .

حسن:يلا ناكل سوا .

رغد:يلا .

فطرو سوا ورغد اخدت علاجها .

حسن:ادخلى ارتاحى شويا يا رغد .

رغد:لا مش عايزة افضل فى الاوضه يا حسن زهقت .

حسن:طب عايزة تعملى ايه يا روح حسن .

رغد:تعالى نقعد برا شويا .

حسن مسك ايدها وخرجو قعدو على الكراسي اللى قدام البيت .

حسن:كلهم فى البيت نفسهم يكلموكى وخصوصا رهف .

رغد:طب تعالى نكلمهم .

حسن:استنى اجبلك طرحه .

حسن دخل جاب طرحه لرغد وطلع فونه ورن مكالمه فيديو على حمزة اللى كان فى البيت وقاعد مع محمود وهدى .

حسن:اخباركو ايه يا حمزة ؟

حمزة:بخير يا بطل ... طمنا على رغد عامله ايه ؟

حسن:فين ست الكل والحاج والكل ؟

حمزة حرك الكاميرا وجاب هدى ومحمود .

هدى:عاملين ايه يا حبيبي ورغد عامله ايه ؟

حسن حرك الفون ورغد ظهرت وهدى ومحمود فرحو لما شافوها .

هدى:يا حبيبتى يا بنتى عامله ايه ياروح قلبي ؟

رغد:الحمدلله يا هدهد .

محمود:يارب دايما يا بنتى تبقي بالف خير ويطمنا عليكى وترجعى وسطنا بسلامه .

رغد:يارب يا عمو انتو وحشتونى اوى .

هدى:الواد ده عامل معاكى ايه يا رغد اوعى يكون مش بيخلى باله منك دانا اقطعه .

رغد بصت لحسن ورجعت بصت لهدى:لولا وجود حسن جمبي يمكن ماكنتش هابقي بكلمكو الوقت يا هدهد .... وبشكرك من قلبي لانك جبتى حسن للحياه وبقي من نصيبى الحلو .

هدى:يا حبايبى ربنا يخليكو لبعض ونفرح بيكو واشوف خلفكو يارب .

حسن:قريب اوى يا ست الكل .

حنين نزلت وفرحت لما شافت رغد:دودو وحشتنى اوى اوى .

رغد:وانتى يانونه وحشتينى .... اومال فين لارا ورهف .

حنين:لارا نايمه ورهف فى شقتها

هدى:دى رهف هتفرح اوى لما تشوفك يا بنتى انتى متعرفيش حالتها عامله ازاى فى غيابك .

محمود:اطلع لمراتك يا حمزة خليها تكلم اختها .

حمزة:لحظه هطلع ليها .

حمزة طلع وطلب من رهف تلبس اسدال وعطاها الفون وكانت طايرة من الفرحه وهى شايفه نصها التانى لان من وقت سفرها وهما بيكلمو حسن بس .

رهف:وحشتينى اوى يا رغد ... طمنينى عليكى يا حبيبتى ؟

رغد:انا كويسه يا رهف ... بجد انتى وحشتينى فوق ما تتخيلى .

رهف:عدى الفترة دى وارجعى تانى لحضنى يا رغد .

رغد: ان شاء الله ياحبيبتى .

حمزة:ارجعى بسرعه يا دكتورة عشان فى ضيف هينور حياتنا .

رغد بصت لرهف:انا فهمت صح يا رهف ... انتى حامل .

رهف هزت راسها باه:فى الشهر التالت

رغد بفرحه:يا روح قلبي الف مبروك .... انا هابقي خالتو .

رهف:احلى خالتو يا قلبي .... انتى شيدى حيلك وارجعيلى عشان محتاجاكى جمبي يا رغد .

رغد:باذن الله يا روحى .

رغد ورهف فضلو يتكلمو كتير وده فرق مع رغد وكانت متحمسه ان حالتها تتحسن عشان ترجع وتبقي مع اختها فى احلى فترة فى حياتها .........

عدى اسبوع .

رغد حالتها بتتحسن كل يوم للاحسن .

فؤاد ومازن اللى اتحكم عليهم بمؤبد .... اما فاروق اتحكم عليه بتحويل اوراقه للمفتى عشان يتعدم .

ــــــــــــــــ★ــــــــــــــ

فى يوم بليل .

رغد وحسن كانو قاعدين على المرجيحه وبيبصو على البحر .

حسن:رغد .

رغد بصتله .

حسن:مراد كلمنى وقالى ان فؤاد ومازن اتحكم عليهم بمؤبد وفاروق بالاعدام .

رغد بصت على البحر تانى:هما اتقبض عليهم امته ؟

حسن بدأ يحكيلها من وقت ما جابو مازن فى ڤيلا مؤمن ومكالمه شهيرة لرهف وكل التفاصيل لحد ما اتقبض على فاروق وابنه والحكم عليهم ... بس ماقالهاش غير اعتراف فؤاد بان فاروق اللى امر بقتل جمال الصاوى .

رغد:يعنى هو قتل طنط شهيرة عشان قالت لرهف ؟!

حسن:تقريباا .

رغد:انت عارف ان فاروق اللى اتفق مع السواق عشان يقتل بابا وماما .

حسن بصلها:انتى عرفتى منين يا رغد ؟

رغد:هو اللى قالى بنفسه .

حسن:على فكرة فؤاد قال نفس الكلام ده لمراد .

رغد:يعنى فؤاد كمان كان عارف ؟!

حسن ضمها لحضنه:انسي كل ده يا رغد المهم ان انتى واختك بخير .

رغد:الحمدلله ....هو احنا هنرجع امته بقي يا حسن .

حسن:زهقتى منى ولا ايه ؟

رغد:لا ابدا ... انا نفسي افضل معاك طول حياتى بس كلهم وحشونى اوى يا حسن .

حسن:الدكتور قال انك بقيتى كويسه بس هتمشي على شويا علاج لفترة كمان عشان جسمك يتحسن .... ومن عيونى هنرجع فى اقرب وقت .... بس انا هسيبك يومين وهرجع الحارة عندى شويا شغل هخلصهم وارجعلك .

رغد:طب ما تاخدنى معاك يا حسن ؟

حسن:لسه شويا يا رغد الدكتور قال كمان اسبوع على الاقل .... ومش هتاخر عليكى والله هخلص بس شويا شغل وهجيلك واسراء معاكى هنا مش هتسيبك .

رغد:حاضر

ــــــــــــــــ★ــــــــــــــ

عدى ٤ ايام وحسن مرجعش ودايما بيكلم رغد وبيتحجج ان عنده شغل هيخلصه ويرجع .

رغد واسراء كانو قاعدين قدام البحر .

اسراء:طب انتى زعلانه ليه مش هو قالك انه هيجى بكرة ؟

رغد:هتصدقينى لو قولتلك بقيت بخاف وانا بعيده عنه.

اسراء:وااااو احساس الحب ده حلو اوى يا جدعان اوعدنا يارب .

رغد ضحكت:انتى رهيبه يا اسراء بجد .

اسراء:انا بجد حبيتك اوى يا رغد ونفسي نبقي اصحاب .

رغد:ده انا اللى اتمنى تكونى صاحبتى يا سووو.

اسراء حضنتها بحب:تعرفى مبسوطه انى اتعرفت عليكى وعلى رهف وحنين .

رغد:وانتى انضمينى لشلتنا ياستى .

اسراء:ده ايه اليوم الحلو ده يا جدعان .

اسراء ورغد قضو اليوم كله سوا هزار وضحك .

ــــــــــــــــ★ــــــــــــــ

تانى يوم .

رغد صحت على ايد على خدها ولما فتحت كان حسن .

رغد قامت بسرعه وحضنته:وحشتنى يا ابو على .

حسن:وانتى يا قلب ابو على .... اسف انى اتاخرت عليكى .... بس عندى ليكى مفاجاه حلوة .

رغد بعدت عنه:ايه هيااا .

حسن:وكدا تبقي مفاجأه بقاا .... انا عايزك تقومى كدا وتفوقى وتاكلى كويس وبعدها هقولك على اول مفاجأه .

رغد:موافقه .

رغد قامت دخلت الحمام وصلت فرضها وفطرت مع حسن واسراء .

بعد شويا حسن خرج ورجع ومعاه كافر كبير ومعاه بنت وقرب من رغد .

رغد:ايه ده يا حسن؟

حسن:انا عايزك تدخلى اوضتك ممنوع تخرجى منها غير لما انا اقولك يا رغد ... وتلبسي الفستان ده وامل جايه عشان تساعدك .

رغد:هى اسراء فين ؟

حسن:راحت تجيب حاجه وجايه .

رغد:طب فهمنى فى ايه يا حسن؟

حسن قرب منها:مفاجأه يا قلب حسن .... يلا ادخلى اجهزى وممنوع تفتحى شباك الاوضه حتى .

رغد:حاضر .

رغد وامل دخلو الاوضه وأمل قفلت الباب والشباك باحكام زى ما طلب منها حسن .

امل بدات تعمل الميكب لرغد اللى لسه ماشافتش الفستان لحد الان.

وبعد وقت طويل امل طلعت الفستان ورغد انبهرت بجماله .

رغد:ده فستان فرح !!

امل:يلا عشان تلبسي يا عروسه .

رغد بدات تلبس وامل ساعدتها تلف الطرحه وكانت جميله جدااا

الباب خبط وامل راحت تفتح ورغد فرحت لما شافت رهف وحنين قدامها وكانو لابسين فساتين شبه بعض بلون الموف وجرت عليهم وحضنو بعض بحب .

اسراء:خليكو دايما كدا نسينى يا قوم .

رغد:انت كمان لابسه زيهم شكلكو حلو اوى .

اسراء:والله يا اوختشي فكرتى.

حنين ضحكت:تعالى يا اخرة صبرنا تعالى .

اسراء حضنتهم وكانو فرحانين .

رغد:انتو جيتو امته ؟

حنين:وصلنا من شويا يا قمرايه .

رغد:فرحانه اوى انى شوفتكو كنتو وحشتنى موت .

اسراء:طبعا الكلام مش ليا لانى كنت فى وشك ٢٤ ساعه .

البنات ضحكو على جنان اسراء اللى بقت قريبه جدا منهم .

رهف:شكلك حلو اوى يا رغد اجمل عروسه بجد .

رغد حطت ايدها على بطنها:حبيب خالتو عامل ايه ؟

رهف:الحمدلله ياحبيبتى .

اسراء:صح دانا نسيت العريس واقف برا يا عروسه على ناااااار .

حنين:يعنى بقالك ساعه واقفه لسه فاكرة تقولى .... ابعدى لما افتحله لفى يا بت يا رغد خلينا نعمل الفريست لوك .

رغد ضحكت ولفت وبقي ضهرها للباب .

حنين فتحت الباب وكان حسن لابس بدله بلون الاسود وقميص بلون الابيض وبيبيون اسود وماسك بوكيه ابيض فى ايده .

حسن عينه جت على رغد اللى ضهرها ليه ودخل الاوضه وقرب منها ولف حوليها لحد مابقي قدامها .

رغد رفعت وشها وبصتله وابتسمت وهو تاه فى جمالها ورقتها .

حسن قرب منها وعطاها البوكيه وباس راسها:زى مااتوقعت عروسه زى القمر يا رغد وخطفتى قلبى وعقلي .

رغد:انت كمان شكلك حلو اوى يا ابو على .

حسن مسك ايدها وقربها من شفايفه وباسها:روح وقلب وعقل ابو على .... يلا عشان تشوفى باقى المفاجاه .

رغد:متحمسه جدااا .

لارا دخلت الاوضه وكانت لابسه فستان بلون موف زى البنات وجرت على رغد:دودو .

رغد حضنتها:روح قلب دودو وحشانى اوى ... ايه الحلاوة والجمال ده يا لولى .

لارا لفت بفستانها:نونا اللى اختارتو ليا .

رغد:قمر يا روحى .

حنين:يلا يا لولى نخرج عشان رغد وحسن يخرجو بعدنا .

البنات خرجو وحسن عينه على رغد اللى بصتله:يلا نخرج يا بطل .

حسن:يلا .

حسن مسك ايدها وخرجو ورغد اتفاجات بالمكان اللى قدام البيت كله متزين وكان فى ترابيزات وكل اللى تعرفهم موجودين .

الحاج محمود وهدى .... مؤمن ... مراد ونورة ومعاهم نور بنتهم .... محمد وفرح وام فرح .... دكتورة محمد ومراته .... رحمه وسارة وايه اللى كانو معاها فى العياده .... واشرف اللى ساعد الشباب يوصلو لرغد ... ومها وجوزها وناس كتير من اللى كانو بيشتغلو فى المستشفى .... ودادا سلمى اللى رغد فرحت كدا انها شافت .

وافتكرت لما كانت قاعده هى وحسن على البحر وبتحكيله على دادا سلمى واد ايه وحشتها.

رغد بصت لحسن بامتتان وكانت فرحانه جدااا:ربنا يخليك ليا يا حسن .

حسن وقف ولف بقي قدام رغد وطلع من جيبه ورده وفتحها كان جواها خاتم .

حسن اخد الخاتم ومسك ايد رغد ولبسها الخاتم وباس ايدها واخدها فى حضنه ولف بيها كتير وهى متعلقه فى رقبته بكل فرحه وكل اللى حوليهم بيسقفو ويصفرو .

هدى قربت منهم:ابعد كدا يا واد انت ماصدقت ولا ايه .

رغد ضحكت وحضنت هدى:وحشتينى اوى .

هدى:فرحتى وانا شيفاكى قدامى فرحانه ومبسوطه كدا عندى بالدنيا يا بنتى والله .

رغد:ربنا يخليكى ليا يا هدهد.

محمود قرب منهم وفتح دراعه لرغد اللى حضنته بحب .

محمود:احلى عروسه يا رغد ربنا يفرح قلبك يا بنتى .

رغد:ويخليك ليا انا ورهف يا احلى واحن بابا فى الدنيا .

محمود باس راسها ورجع هو وهدى قعدو مكانهم .

الكل بدأ يقرب منهم ويبارك ليهم بفرحه .

دادا سلمى:مبروك يا بنتى فرحانه ليكى من قلبي والله .

رغد حضنتها:انتى حبيبتى يا دادا عارفه انى قصرت معاكى جامد .

سلمى:متقوليش كدا يا بنتى كفايه اللى مريتى بيه ربنا يفرحك انتى واختك يارب .

رغد:يارب يا سوسو .

مؤمن قرب من رغد وشدها لحضنه:حمدلله على سلامتك يا قلب اخوكى .

رغد:الله يسلمك يا مؤ .

حسن شد رغد من حضن مؤمن:السلام من بعيد يا اخ .

مؤمن ورغد ضحكو .

حسن مسك ايد رغد ووقفو فى نص المكان اللى متزين واشتغلت اغنيه هاديه ورقصو سوا سلو ورغد كانت فرحانه من قلبها .

بعد رقصه السلو اشتغلت مهرجانات والكل رقصو وهيصو على الاخر .

اشرف قرب من مراد:مراد باشا .

مراد:مالك يا اشرف .

اشرف:بقولك ايه يا باشا انا الحمدلله مقتدر وعايز اكمل نص دينى يا باشا .

مراد:انت جاى تتقدم لنور بنتى ولا ايه يا اشرف ؟

اشرف:ليه هاخدها اربيها مثلا ... شايف اللى واقفه هناك دى .

مراد بيبص فى وسط البنات:قصدك على انهو فيهم ؟

اشرف:اللى لابسه موف يا باشا .

مراد:دول رهف اخت رغد ودى متجوزة حمزة وتانيه حنين اخت حسن وكمان متجوزة مؤمن .... اوعى يكون قصدك على اللى معاهم دى ؟!

اشرف:ايوا هيا يا باشا ... مين دى بقي اوعى تكون متجوزة هى كمان !

مراد:مش عارف دى مين استنى نسال اى حد ... دكتور محمد .

دكتور محمد قرب منهم:مالكو ؟

مراد:بقولك ايه مين اللى واقفه مع رهف وحنين ولابسه موف دى ؟!

محمد بص عليها:ليه عملت ايه ؟!

مراد:قول بس تعرفها ؟

محمد:ايوا دى الممرضه اللى كانت بتابع حاله رغد .

اشرف:متجوزة ولا ؟

محمد:لا مش متجوزة ولا مخطوبه .... انت ناوى تتجوز على مراتك ولا ايه يا مراد .

مراد:يا عم اتنيل ده اشرف عايز يكمل نص دينه .

محمد:ماشي يا معلم على العموم الف مبروك والله يعنيك لانها مجنونه على الاخر .

مراد ضحك:انا من رايي تهرب يا معلم .

اشرف:هى اهلها هنا اتقدملها ولا اعمل ايه انا ؟!

محمد ضحك:لا اهلها مش هنا .... اصبر لما نرجع القاهرة واتقدم براحتك يا معلم .

اشرف:لسه هستنى .

مراد:الواد ده مستعجل على ايه يا شيخ اتنيل .

اشرف ومحمد ضحكو .

مراد:تعالو نروح للبطل .

الشباب راحو لحسن وكلهم شالوه سوا وبقو يرفعوه لفوق .

ورغد رقصت مع البنات اللى بوجودهم كملت فرحتها.

بعد وقت طويل جداا تقريبا منتصف الليل الفرح خلص والكل ودعو رغد وحسن والكل ركبو عربياتهم ومشو .

وفضل حسن ورغد واقفين قدام البيت .

حسن ضمها لحضنه:ايه رايك فى مفاجأتى بقاا ؟

رغد:دى احلى مفاجأه واحلى يوم فى حياتى يا حسن .

حسن باسها من خدها:يارب كل ايامك تبقي حلوة يا روح حسن .

رغد ابتسمت بحب لحسن وشهقت من الخضه لما حسن شالها ودخل البيت .

رغد:الجو حلو يا ابو على خلينا شويا .

حسن نزلها جوا الاوضه ورغد اتفاجأت ان الاوضه متزينه كلها بورد الاحمر والشموع .

رغد:عملت كل ده امته يا حسن ؟

حسن حضنها من ضهرها:دى كانت مهمه اسراء وحنين وعملوها لما كنتى انتى مشغوله فى الفرح .

رغد:بجد حلوة اوى يا حسن ... وانا فرحانه من قلبي ... انت حققتلى كل اللى نفسي فيه .... فستان جميل وفرح على البحر وكل اللى بحبهم كانو معايا ودادا سلمى كمان حضرت بجد مبسوطه اوى .

حسن لفها ليه:انا لو اقدر اجيبلك حته من السما هعملها يا رغد بس المهم تفضلى جمبي وفى حضنى .

رغد ضحكت:مش مصدقه ان حسن البطل اللى كان بيشلنى ببروده هو نفسه ابو على اللى بيقولى الكلام الحلو ده .

حسن:مين فيهم احلى حسن البطل ولا ابو على ؟

رغد حاوطت رقبته:الاتنين بعشقهم .. البطل اللى شدنى بوسامته وهيبته وحاجه كدا كاريزما ... وابو على اللى بكلامه بيدخل قلبي طوالى .

حسن:طب يلا نغير ونصلى سوا عشان ربنا يباركلنا فى حياتنا مع بعض .

رغد:يلا .

حسن:هروح اغير فى الاوضه التانيه وانتى خدى راحتك .

رغد:حاضر .

رغد دخلت فتحت شنطه الهدوم اللى جابتها رهف وحنين وكان كلها هدوم بيت وهدوم لنوم .

رغد:الله يخربيتكو ايه الهدوم دى !!

رغد اخدت قميص بيتى بلون الابيض بحماله رفيعه ولحد الركبه ودخلت غسلت وشها وغيرت واتوضت وخرجت لبست الاسدال .

الباب خبط ورغد فتحت كان حسن لابس بنطلون قطن بلون الاسود وتيشيرت نص كم بلون الرمادى .

حسن:يلا .

رغد:يلا .

حسن وقف ورغد وقفت وراه وصلو سوااا وبعد ما خلصو حسن مسك ايد رغد وباسها:اوعدك يا رغد انك دايما هتكونى فى قلبي قبل عينى ... ويارب دايما اكون سبب سعادتك زى ما وجودك جمبي سبب سعادتى يا رغد .

رغد:انا بحبك اوى يا حسن وبتمنى نفضل سوا العمر كله .... ويكون لينا بيت كله دفا واسرة حلوة ويكون عندنا بيبهات صغيرين بنات وولاد .... اللى متاكده منه زى مانت احسن ابن واخ وصديق وحبيب وزوج .....هتكون احلى واحن اب فى الدنيا .

حسن شدها لحضنه وغمزلها:طب مش يلا بقااا ؟

رغد:يلا ايه يا حسن ؟

حسن ضحك:نجيب البيبهات يا قلب حسن .

رغد شهقت:ماكنتش اعرف انك قليل الادب كدا يا حسن .

حسن ضحك من قلبه:هروح اطفى النور اللى برا البيت وارجعلك نشوف موضوع قله الادب ده .

رغد ضحكت وقلعت الاسدال وظبطت شعرها وحسن دخل تاه فى جمالها لما شافها وقرب منها وشالها واخدها معاه لعالم خاص بعشق البطل لتصبح زوجه البطل قولا وفعلاااا .......

صباح يوم جديد فى الحارة .

رهف فتحت عينيها كان حمزة بيلبس عشان ينزل الورشه .

رهف قامت قعدت:صباح الخير .

حمزة قرب منها وباس راسها:صباح الجمال يا روحى .... صحيتى بدرى ليه نامى شويا احنا نايمين متاخر امبارح !

رهف:مش بابا قالك بلاش تنزل الورشه وريح نفسك النهارده يا حمزة .

حمزة:فى شغل لازم يتسلم يا رهف ... هخلص بدرى بدرى وارجع يا حبيبتى .

رهف:هقوم اجهزلك الفطار .

حمزة:زى مانتى نامى شويا .... انا هفطر مع الشباب فى الورشه .

حمزة قعد جمبها على السرير:اظن رغد بقت تمام والاوضاع كلها اتحسنت ... عايزك بقي تاخدى بالك من نفسك يا حبيبتى عشان صحتك وصحه الصغنن .

رهف:ان شاء الله .

حمزة:يلا نامى يا قلبي .

رهف نامت وحمزة باس راسها وخرج من الاوضه والشقه كلها .

ـــــــــــــــ★ــــــــــــــ

فى الورشه .

حمزة دخل الورشه كان الشباب كلهم قاعدين:صباح الخير يا شباب .

الشباب:صباح النور .

حمزة:اخبار الشغل اللى هيستلم النهارده ايه ؟

عبده:متقلقش يا معلم كله تمام وجاهز على التحميل .

حمزة:البطل غايب وعارف ان وراه رجاله تسلمو يا شباب .

محمد:اكلم العربيات يا حمزة؟

حمزة:لا انتو الاول تجيبو فطار وناكل لقمه سوا وبعد كدا نبدأ شغل .

الشباب:هو ده الكلام .

حمزة ضحك:يلا عايز فطار جامد .

محمد:هروح اكلم الواد رياض بتاع عربيه الفول يظبطلنا صنيه انما ايه .

حمزة:صح كدا يلا .... قوله يكتر الطحينه على الفول .

محمد:من عيونى .

محمد خرج وبعد شويا رجع وهو شايل صنيه كبيره مليانه بالاكل .

حمزة والشباب فطرو سوا وضحكو كتير ... وبعدها بداو يحملو الشغل .

ـــــــــــــــ★ــــــــــــــ

عند رغد اللى صحت من بدرى وقامت من جمب حسن وخرجت وقفت على شط البحر .

وبدات تفتكر كل حاجه حصلت معاهم من وقت وفاه باباها ومامتها .... لخطط فاروق ضدهم هى واختها .... لحرق الڤيلا وهروبها لحارة البطل .... لخطف فاروق لرهف .... لحرق المستشفى .

رغد ابتسمت لما افتكرت الجانب الحلو فى كل ده جوازها من حسن ... ورهف من حمزة وحملها... ومؤمن من حنين .

وابتسامتها اختفت من على وشها لما افتكرت خطف فاروق ليها وافتكرت اول ما فاقت .

•• فلاش بااااك ••

رغد اول ما فاقت لاقت نفسها فى مخزن قديم وقاعده على فرشه قديمه وايديها ورجليها متربطين وعينيها كانت مغششه .

فاروق:حمدلله على السلامه يا دكتورة .

رغد اتصدمت لما شافت فاروق ومازن واقفين قدامها وعلى وشهم ابتسامه كلها شر وخبث .

رغد:عايز منى ايه يا فاروق ؟

فاروق:كل خير يا دكتورة .... لو جيتى معانا وعملتى اللى احنا عايزينه كان بها هنسيبك ترجعى لحبيب القلب اللى هيتجنن عليكى ..... لكن لو نشفتى راسك وربي وما اعبد يا رغد هتشوفى منى اللى عمرك ما تتخيليه .

رغد:المفروض كدا اخاف يعنى .... تهديدك ده ولا يفرق معايا وخد النانوس بتاعك وغورو من وشى ... وحبيب القلب لو عرف باللى بتعمليه هتكون نهايتكو انتو الاتنين على ايده .

مازن بص لابوه:انا قولتلك نخلص على الواد ده انت مش عايز .

فاروق:لا لسه عايزينه ..... هتمضي على الورق ده وتتنازلى عن كل املاك ابوكى بالذوق ولا تحبي تيجى بالعافيه .

رغد:وحياتك اللى ملهاش اى تلاتين لازمه يا فاروق مش همضي لا بذوق ولا بالعافيه وبلاش تتعب نفسك معايا .

فاروق بص لواحد من الرجاله اللى واقفين:اعمل اللى اتفقنا عليه .

الشاب جاب شنطه وطلع منها حقنه ووقف قدام رغد .

فاروق:عارفه اللى فى الحقنه دى ايه يا دكتورة ؟

رغد عينيها على الحقنه وبصت لفاروق:متفكرش انك هتحاول تخوفنى يا فاروق .

فاروق:طب خلينى اعرفك يمكن تخافى بجد ..... دى نوع قوى من المخــــــ***ــدرات .... لو دخلت جسمك يا حلوة هتبقي الدكتورة رغد المدمنه ... تحبي بقي تمضي ولا تبقي مدمنه .

رغد:عمرى ما هنولك اللى فى راسك ....و اسلمك تعب ابويا كدا بساهل يا فاروق .

فاروق شاور لشاب يديها الحقنه .

واتنين من الشباب فكو ايد رغد وقطعو كم الفستان وثبتو ايدها ورغد كانت بتحاول بكل الطرق تقاومهم بس مش قادرة لحد ما حست بالحقنه بتدخل فى دراعها وبعد بثوانى حست بوجع كبير وخنقه وجسمها بدا يعرق بشكل مش طبيعى .

مازن:متقلقيش يا حبيبتى اول مرة بتبقي كدا .... لكن بعد كدا انتى اللى هتبوسى رجلنا عشان نديكى الجرعه .

فاروق:سلام الوقت يا حلوة نسيبك تستمتعى بقي .

فاروق ومازن والشباب خرجو ورغد طلعت صرخه كانت كتماها عشان متبانش ضعيفه قدامهم .... رمت جسمها على جنب فوقعت على الفرشه القديمه وبتغمض عينيها بوجع .

•• باااااااك ••

رغد دموعها نزلت وهى بتفتكر كل مرة بيدخل الشاب يديها الجرعه وفاروق ومازن مبقوش يجولها ابدااا .... وكان الشباب بيصورها دايما عشان فاروق يشوفها وكانت على اد ما تقدر تبان قويه قدامهم .

الشباب كانو بيضربوها عشان تترجاهم قدام فاروق بس هى كانت بترفض تبقي ضعيفه مهما كانت تعبانه .

رغد فاقت من ذكرياتها على ايد بضمها وابتسمت بحب .

حسن:صباح الجمال والحلاوة على اجمل عروسه .

رغد:صباح الخير يا ابو على .

حسن:الجميل صاحى من بدرى ليه ؟

رغد:صحيت وماحبيتش اصحيك وخرجت اشم شويا هواا .

حسن لفها ليها واتفاجأ بالدموع فى عينيها:مالك يا رغد انتى كويسه ؟

رغد:كويسه يا حسن والله .

حسن:اومال ايه الدموع اللى فى عينيكى دى ؟!

رغد حطت راسها على صدره وحسن ضمها ليها:مالك يا رغد ؟

رغد:بفكر لو ماكنتش طنط شهيرة كلمت رهف .. انت ماكنتش هتعرف مكانى وكنت هابقي عند فاروق الوقت والله اعلم كان هيحصل فيا ايه .

حسن:حتى لو ماكنتش هى كلمت رهف انا كنت هعرف يا رغد ... احنا خطفنا ابنه من اليوم اللى قبله وده واد مدلع ولما ياخدله علقه محترمه كان هيقر بكل حاجه .

رغد بعدت عنه وبصتله:خطفتوه ازاى يا حسن ؟

حسن بدا يحكيلها لما دخلو الڤيلا واخدو مازن على ڤيلا مؤمن .

رغد:ده ايه الجمدان ده .... ده انتو تشتغلو عصابه هتبقي ايه جامدين .

حسن ضحك وبص لرغد:رغد انا عايزك تنسي كل اللى حصل معاكى .... امسحيه من حياتك وابدائى من جديد ... صفحه جديده هتبقي كلها سعاده وفرحه فى وسط الناس وعيله بتحبك .

رغد:وكفايه حب ابو على لياا ده هينسينى كل الوحش اللى عيشته .

حسن:روح ابو على انتى .... يلا عشان نفطر .

رغد:نفطر !! .... امممم .... ابو على يا حبيبي لو عندك طموح انى اقف فى المطبخ واحضرلك الفطار ..... فاحب اقولك حضرتك بتحلم .... احتمال البيت يولع ومتفطرتش اصلا .

حسن ضحك:معنى كلامك انى هجوع من الاخر صح ؟

رغد هزت راسها باه .

حسن:طب الحمدلله ان هدهد كانت جايبه اكل كتير معاها يدوب يتسخن بس ... شكلها كانت حاسه ان ابنها هيجوع .

رغد ضحكت:لا ما هدهد عارفه اللى فيها وانى فاشله عشان كدا جابت الاكل .

حسن:طب يلا ندخل نفطر سوا .

رغد:يلا يا ابو على يا ....

حسن بصلها برفعه حاجب:يا ايه .

رغد حاوطت رقبته:امممم ابو على يا بطل .

حسن:لا والله .

رغد ضحكت اوى:اه والله .

حسن:اممم بتلعبي معايا يا دكتورة .

رغد:انا اقدر العب على البطل بردو عبيطه انا مثلا .

حسن شالها فجأه:انتى اللى جبيته لنفسك يا رغد .

حسن دخل بيها البحر وحدفها بقوة فى الميا وضحك عليها .

رغد طلعت وكانت بتاخد نفسها بصعوبه:هى بقت كدا يا بطل يعنى .

حسن:ايوا يا قلب البطل .

حسن رايح ناحيتها رغد عامت بسرعه بعيد عنه:مفكرنى هغرق ولا ايه يا بطل .... ده انا رغد الصاوى يعنى اعدى البحر كله عوم ولا يهمنى قروش ولا حيتان حتى .

حسن:وانا البطل يا رغد يا صاوى .

حسن عام بمهارة ورغد اتصدمت لما شافته وبدات تعوم هى كمان وفجأه حست بايد بتشدهاا وكان حسن .

حسن:القط اكل لسانك يا رغد يا صاوى .

رغد لفت ومسكت فى ضهر حسن:طب يلا يا بطل خرجنا من البحر .

حسن:مش كنتى بتعدى البحر عوم من شويا ايه اللى حصل .

رغد:لا مانا مش بعرف اعوم وانا جعانه يا حبيبي يلا اطلع بينا يا اسطى ونبي .

حسن ضحك وعام بيها لحد ما خرجو من البحر وشالها ودخلو البيت غيرو هدومهم المبلوله وجهزو الفطار مع بعض وفطرو سوا .

ـــــــــــــــ★ــــــــــــــ

فى الحارة .

وتحديدا ورشه البطل .

حمزة قاعد فى المكتب .

فونه رن وكان واحد يعرفه رد عليه:ازيك يا هاشم عاش من شافك يا جدع ..... فى ايه مالك؟؟ .... حصل امته ده ؟؟ .... لا حول ولا قوة الا بالله ربنا يرحمهم .... تمام يا صاحبي هقول للحاج والحاجه ونيجى ... سلام .

حمزة قفل وقام خرج من الورشه ورجع على البيت

ـــــــــــــــ★ــــــــــــــ

فى بيت البطل .

حنين ورهف ولارا قاعدين يهزرو ويضحكو .

محمود وهدى قاعدين معاهم .

محمود:اد ايه كانت وحشانى ضحككو يا بنات .... ربنا يديم سعادتكو يارب .

حنين:ويخليك لينا يا حودة يا قمر انت .

رهف:ربنا يباركلنا فى عمرك يا بابا يارب ... انت وهدهد بركه البيت .

حمزة دخل عليهم:السلام عليكم .

الكل:وعليكم السلام ورحمه الله وبركاته .

هدى:مالك يا واد يا حمزة وشك متغير ومخطوف كدا ليه ؟!

حمزة:هاشم صاحبي جار ام عزت فى حارتهم كلمنى من شويا .

محمود:خير يا بنى فى ايه ؟!

حمزة:بيت ام عزت ولع وهما نايمين وللاسف ماتو فى الحريق .

هدى:لا حول ولا قوة الا بالله .... ربنا يرحمك يا اولفت وانتى وولادك ويغفرلهم ويسامحهم .

محمود:اللهم امين .... قومى يا حاجه عشان نروح واجب العزا وانت يا حمزة اقف خد العزا هما مالهمش حد يا بنى .

حمزة:اكيد يا حاج ده الواجب .

محمود:وانتو يا بنات هتيجو معانا كمان .

حنين ورهف:اكيد يا بابا .

هدى:طب يلا نلبس .

الكل قامو يجهزو عشان يروحو العزا .

ـــــــــــــــ★ــــــــــــــ

بليل عند رغد وحسن .

قاعدين الاتنين قدام البحر .

رغد:ربنا يرحمهم رغم انها كانت بضايقنى بس زعلت عليهم موته صعب اوى .

حسن:ربنا يرحمهم يا حبيبتى .

رغد:مش المفروض كنا نرجع عشان العزا دى الاصول يا حسن .

حسن:انا قولت كدا للحاج والحاجه قالو لا خليكو وانهم قامو بالواجب وزياده .

رغد:احنا المفروض هنرجع امته ؟

حسن بصلها:زهقتى منى ولا ايه ؟!

رغد حطت راسها على كتفه:عمرى ما ازهق منك يا ابو على ... بصراحه المكان هنا تحفه ... ياريت نقدر نجيبهم ونعيش كلنا هنا سوا .

حسن:على العموم يا ستى انا كنت ناوى نقعد هنا اسبوعين ونرجع عشان مؤمن مجننى وعايز يتجوز .

رغد ضحكت:ليه حق الصراحه عمال يأجل كل شويا بسببنا .

حسن:صح على سيرة مؤمن ده كلمنى من شويا لما كنتى نايمه وقالى انه عايزك فى موضوع مهم .

رغد باستغراب:موضوع ايه !!

حسن:هو اللى يقولك .

رغد:يعنى انت عارف ؟

حسن:اممم ... ده اقتراحى اصلا .

رغد:طب كلمه لما نشوف اقتراحك يا بطل .

حسن طلع فونه من جيبه ورن على مؤمن اللى رد عليه:اخيرا الهانم صحت وعبرتونى .

رغد:عامل ايه يا مؤ؟

مؤمن:بخير يا حبيبتى ... انتو عاملين ايه .

حسن ورغد:الحمد لله .

مؤمن:طمنى عليك انت يا حسن لسه بخير ولا الدكتورة طيرت عقلك انا عارفها مجنونه .

حسن ضحك اوى ورغد بصتله بغيط:هى بقت كدا يعنى .

حسن:دى حبيبتى يا مؤمن .

مؤمن:اكيد الواد خايف على نفسه احتمال تغرقيه فى البحر .

حسن ورغد ضحكو .

رغد:حسن قالى انك عايزنى فى موضوع مهم وانه هو اللى اقترحو عليه ايه بقااا ؟!

حسن:بصراحه انا عايز اصفى الشغل فى القاهرة وننقله اسكندريه ... وبما انك هتعيشي فى بيت البطل انا هجهز الشقه اللى فى بيت الشهاوى واتجوز فيها ايه رايك ؟

رغد:تسلم دماغ اللى اقترح الموضوع ده الصراحه .

حسن:ده انا قولت هتعترضي تنقلى شغل باباكى !!

رغد:بصراحه انا حبيت اسكندريه اوى وبفكر كمان ابنى المستشفى فى اسكندريه .

مؤمن:طب تمام اسمعينى بقي .... من وقت ما اقترح حسن عليا الفكرة وانا بدور فى الموضوع ..... ولقيت شركه مكانها كويس جدا فى اسكندريه وقريبه من الحارة واصحابها عايزين يبعوها عشان هيسافرو .... انا اتكلمت معاهم وطلبت منهم يستنو منى الرد .... لكن المصنع هنسيبه فى مكانه فى القاهرة عادى ويبقو الادويه والمعدات تتشحن من القاهرة ايه رايك ؟

رغد:ايوا احسن بردو ... طب انت شوفت الشركه دى الاول ؟!

مؤمن:ايوا روحت شوفتها اكيد ... الشركه ممتازه وموقعها كمان حلو جداا والاحسن من ده كله انها جاهزة ومش هتحتاج شغل كتير .

رغد:صح .... تمام اتوكل على الله يا مؤ ... بس اكيد لسه هتدور على موظفين جداد .

مؤمن:انتى ناسيه ان فى اكتر من نص الموظفين من اسكندريه وكانو عايشين فى البيت اللى عمى جمال الله يرحمه كان مجهزه ليهم وبينزلو اجازات .

رغد:صح راحت عن بالى دى .... طب واللى من القاهرة .

مؤمن:اتكلمت معاهم وامنت ليهم شغل فى شركات تانيه عشان مبقاش قطعت عيشهم .

حسن:انت صح كدا يا مؤمن .... هتمشي فى الامور دى من الوقت ولا لما نرجع .

مؤمن:لا انتو هتيجو هتلاقو كل حاجه متظبطه يا بطل ... وكمان هبدأ اجهز فى شقه بيت الشهاوى .

رغد:عالبركه يا مؤ.

مؤمن:اسيبكو انا بقي سلام .

حسن ورغد:سلام .

حسن قفل وبص لرغد:شايفك مبسوطه ؟

رغد:جدا لانى كنت زعلانه ان مؤمن وحنين هيبقو بعيد عننا .

حسن:بالنسبه بقي لموضوع المستشفى ... انا عندى الارض .

رغد بصتله:ارض فين ؟؟

حسن:الارض الفاضيه اللى فى اخر الحارة .

رغد:هى ماشاء الله ارض كبيرة جدا ومساحتها حلوة اوى .... بس الارض دى تقريبا الحارة كلها بتعمل افراحها فيها يا حسن .... افرض صاحبها رفض يبيعها !!

حسن:صاحبها موافق جدااا ومعندوش اى اعتراض .

رغد:انت تعرفه يعنى ؟!

حسن:انا صاحب الارض يا رغد .

رغد:بتهزر !!

حسن:الارض دى كان منصور عايز ياخدها يبنى عليها العمارة والحاج كان مضايق من موضوع العمارة ده .. لانه هيدخل ناس غريبه الحارة ... فانا اتكلمت مع صاحب الارض واشتريت منه وده ضايق منصور جدااا ... وبعدها اشترى حته الارض اللى جمب بيت الشهاوى وحط عينه على البيت ... بس انا والحاج كنت عارفين ان اهل البيت مش موجودين ومنصور مش هيقدر يوصلهم ووقتها مش هيقدر يبنى العمارة ... فهمتى بقي ... وانا اللى اديت الاذن لاهل الحارة يعملو الافراح فى الارض دى .

رغد:يعنى هتبقي شريك معايا فى المستشفى ؟!

حسن:اول ما نرجع هكتب الارض باسمك وانتى بقي حرة التصرف فيها .

رغد قامت وقفت قدامه:لا طبعا هتفضل باسمك يا حسن ... وبعدين مش انا وانت واحد .

حسن قام وشدها لحضنه:اكيد .

رغد:يبقي الارض تفضل باسمك وانا لما نرجع باذن الله هكلم محمد عشان نبدأ فى كل حاجه .... متحمسه جدااا .

حسن شالها ودخل البيت وباسها من خدها:وحشتينى .

رغد:يا حسن خلينا شويا .

حسن:بقولك وحشتينى يا قلب حسن

عدى اسبوعين .

حسن ورغد اللى مبسوطين سوا وحياتهم مليانه رومانسيه وحب .

رهف اللى بقت فى الشهر الرابع وعرفت انها هتجيب ولد وده مزعل حمزة جدا لانه كان فى بنوته وتكون شبه رهف .

مؤمن اللى باع شركه القاهرة واشترى الشركه اللى فى اسكندريه ونقل شغله كله والشركه بدات تشتغل بنفس نجاح الشركه اللى كانت فى القاهرة ..... وبدأ يجهز بيت الشهاوى عشان يتجوز فيه وده فرح حنين جدا انها مش هتبعد عنهم .

ـــــــــــــــــ★ـــــــــــــــ

فى عربيه حسن اللى سايق ورغد راسها على كتفه وراجعين على حارة البطل .

حسن:متاكده يا رغد انك عايزة تروحى تشوفيه ؟!

رغد:ايوا يا حسن عايزة اشوفه .

حسن:انا بعمل اللى يريحك يا رغد .

رغد:ربنا يخليك ليا يا حبيبي .

حسن ساق بالعربيه لحد ما وصلو للقسم اللى مسجون فيه فاروق ونزلو من العربيه .

حسن مسك ايد رغد ودخلو كان مراد فى انتظارهم .

مراد:اهلا بالعرسان القسم نور والله .

رغد:منور بيكو يا خويا .

حسن ضحك .

رغد بصت لمراد:هو فين ؟

مراد:انا مش عارف انتى عايزة تشوفيه ليه يا رغد ؟

رغد:لو سمحت يا مراد مش هنتكلم كتير ... هو فين ؟

مراد:تعالى معايا .

رغد:لو سمحت خليك انت يا حسن .

حسن:انتى مجنونه هسيبك تدخلى ليه لوحدك !

رغد:طب تعال. بس متدخلش معايا ممكن ... لو حسيت باى قلق ابقي ادخل .... لو سمحت .

حسن:حاضر يا رغد .

حسن ورغد مشو ورا مراد اللى وصل عند زنزانه:افتح يا بنى الباب ده .

العسكرى فتح الباب .

رغد دخلت كان فاروق قاعد على الارض ولابس البدله الحمرا لانه قرار اعدامه هيتنفذ كمان اسبوع .

فاروق رفع عينه على الباب لما اتفتح وابتسم لما شاف:اهلا بالدكتورة المدمنه ..... شكلك بيقول انك اتعالجتى من الادمان .

رغد:ودى حاجه تزعلك يا عمى ؟!

فاروق:لا مش هتزعلنى وبس ...... دى تقهرنى يا دكتورة ..... كنت اتمنى تفضلى مدمنه طول عمرك لحد ما تموتى من الوجع .

رغد بصوت عالى:انت ايه يا بنى ادم !!!!

حسن ومراد دخلو لما صوت رغد بقي عالى .

رغد بعصبيه:حتى وانت على حافه الموت بتتمنى الشر لناس .... اللى زيك المفروض يستغل كل ثانيه باقيه فى عمره ويدعى ان ربنا يسامحك على البلاوى اللى انت عملتها .... ده انت أذيت وظلمت وقتلت ..... فيها ايه لو كنت عشنا من الاول عيله بتحب بعض مش غير خطط وخبث !!

فاروق:كنتى عايزانى اسيب ابوكى يعيش مرتاح ومبسوط لما خد كل حاجه منى ؟!

رغد:بابا عمره ما اخد حاجه منك ... كل حاجه عملها بمجهوده وتعبه .... ده انت لما كنت تطلب منه الفلوس يديك واقوله يا بابا ما هو بيضيعها على مشاريعه الفاشله هو ابنه .... عارف كان بيرد يقولى ايه .... ده اخويا ياخد منى احسن ما ياخد من الغريب ... ومهما عمل فيا لو طلب عمرى ادهوله .... ماكنش يعرف انك كلب ومش بس عينك على فلوسه لا عينك على مراته كمان ... وطعنته فى ضهره ولما قتلته هو ومراته ماسبتش بناته يعيشو مرتاحين .... ده انت يا شيخ عيشتنى ايام كلها رعب وخوف ومش عارفه الطعنه هتجيلى منك امته وازاى .... اهو ربنا انتقم منك على كل اللى عملته فينا .... بس بردو مش قادرة اشمت فيك .... وزعلانه عليك .

رغد لفت عشان تخرج واول ما شافت حسن واقف وراها دخلت فى حضنه وعيطت .

حسن اتحرك عشان يخرج من الزنزانه بس وقفو لما سمعو صوت فاروق:رغد .

رغد لفت وبصتله .

فاروق:سامحينى يا رغد وقولى لرهف تسامحنى على اللى عملته معاكو .

رغد عيطت:مسامحينك يا عمو .

رغد خرجت مع حسن وهى منهارة وركبو العربيه وراحو على الحارة .

ـــــــــــــــــ★ـــــــــــــــ

بليل فى حارة البطل .

الكل كانو فى انتظار حسن ورغد اللى اول ما العربيه وصلت الحارة سمعو صوت فرقه بطبل وتزمر .

حسن نزل ولف فتح الباب لرغد اللى نزلت وكانت فرحانه بفرحه اهل الحارة ليهم .

وكل اهل الحارة استقبلوهم بحب وباركو ليهم على الجواز .

حسن ورغد وصلو عن بيت البطل وكانت العيله كلها فى انتظارهم .

رغد جرت على حضن محمود اللى احتواه بحب:وحشتنى اوى يا بابا .

محمود باس راسها:وانتى يا قلب ابوكى .

رغد بعدت عن محمود وحضنت هدى:نورتى بيتك يا ست البنات .

رغد:منور بيكى يا قمرايه انتى .

رغد حضنت حنين ولارا وقربت من رهف وباست بطنها:قلب خالتو عامل ايه ؟

وحضنت رهف:وحشتينى يا نصي التانى .

رهف:وانتى اكتر يا قلبى .

حمزة:حمدلله على السلامه يا دكتورة .

رغد:الله يسلمك يا حمزة .

مؤمن:حمدلله على السلامه يا قلب اخوكى .

رغد حضنت مؤمن:حبيبي يا قلب اختك .

حسن قرب منهم وبعد رغد عن مؤمن:ما قولنا من بعيد يا اخ .

كلهم ضحكو عليه .

الكل دخلو البيت وكانت هدى والبنات محضرين الاكل وكلهم قعدو اكلو مع بعض فى جو عائلى جميل .

بعد ما خلصو اكل قضو وقت جميل سوا .

ومؤمن اتفق مع الحاج محمود ان الفرح يكون كمان اسبوعين وهيكون فى الارض الفاضيه قبل ما يبنو عليها المستشفى .

وبعدها مؤمن راح بيت الشهاوى وحمزة طلع شقته مع رهف وحسن اخد رغد عشان يطلعو شقتهم .

ـــــــــــــــــ★ـــــــــــــــ

فى شقه حسن .

رغد دخلت واتفاجأت بالشقه اللى اتغير كل حاجه فيها تقريبا .

رغد:انت غيرت كل ده امته يا حسن ؟

حسن:كل حاجه اتعملت واحنا مسافرين .

رغد:بس ازاى دى نفس التصاميم اللى كنا بنختارها سوا !

حسن:ماحنا كنا بنختار وانا ابعت لجمزة ينفذ .

رغد:حلوة اوى يا حسن .... تعالى نتفرج عليها كلها .

رغد وحسن كانو بيتفرجو سوا على الشقه ورغد كانت فرحانه جدا وحسن فرحان انه قدر يسعدها .

رغد:هدخل اخد شاور لانى هموت وانام .

حسن:وانا هغير فى الحمام التانى وننام .

رغد:اوكى.

رغد وحسن كل واحد فيهم غير فى حمام وبعدها نامو من تعب اليوم .

ـــــــــــــــــ★ـــــــــــــــ

بتمر الايام .

حسن نزل الورشه وكمان رغد رجعت لشغلها فى العياده .

مؤمن وحنين اللى وقتهم كله فى تجهيز شقتهم ولارا كانت فرحانه لانها كانت بتختار كل حاجه فى اوضتها زى ما هى عايزة .

ـــــــــــــــــ★ـــــــــــــــ

واخيرا جه يوم الحنه .

والبنات اتجمعو فى شقه الدور الارضى فى بيت البطل وحضر معاهم رحمه وايه وسارة وفرح واسراء .... وهيصو وفرحو من قلبهم .

رغد ورهف كانت فرحتهم كبيرة لفرحه اخوهم وكمان صاحبتهم .

والشباب قضو اليوم سوا ومحمد واشرف ومراد .

ـــــــــــــــــ★ـــــــــــــــ

البنات بعد ما خلصو تهيص ورقص

اتجمع اسراء ورهف ورغد وحنين فى اوضه حنين فى بيت البطل وكانو بيهزرو ويضحكو .

اسراء:ياختى بلا جواز بلا هم يعنى اللى اتجوز اخدو ايه ؟!

رغد:اخدو حب .

رهف:اخدو حنيه وسند .

حنين:يعنى هتفضلى كدا من غير جواز يعنى !

اسراء:والله على حسب .

رغد:والغلبان اللى ممرمطه امه معاكى من وقت ما اتقدملك .

اسراء ضحكت:والله ده صعبان عليا .

رهف:والله حرام عليكى يا بنتى .

اسراء:مانا لازم اتاكد من مشاعره الله بدل ما ادبس فى الجواز .

رغد:تدبسي فى ايه يا بقرة انتى .... الواد اتقدملك يجى ٤ مرات والبعيده ايه جبله مش بتفهم .

حنين:اقسم بالله خسارة اللى بيعملو عشانك ..

يلا يا بايرة.

اسراء:في ايه يا جدعان انتو جيتو عليا بالجامد كدا وانا قلبي قلب خسايه .

رهف:انا من رايي نقتل البت دى احسن .

رغد:دى رهف نطقت بسببك .

البنات ضحكوو

اسراء:يعنى انتو شايفين اوافق عليه .

البنات:يا لهوووووووى .

اسراء ضحكت والبنات شاركوها الضحك .

ـــــــــــــــــ★ـــــــــــــــ

صباح تانى يوم .

الكل صحو بنشاط وحماس .

البنات كانو بيجهزو فى بيت البطل فى الشقه اللى فى الدور التانى .

والشباب فى الشقه اللى فى الدور الارضي .

بعد وقت طويل البنات خلصو لبسو .

حنين بفستانها الابيض كانت احلى عروسه .

ولارا اللى كانت معاها ورافضه تسيبها او تبعد عنها ولبست فستان ابيض زى وكانت فرحانه جدااا .

اما رهف اللى لبست فستان واسع عشان يدارى بطنها وكانت جميله .

واسراء المجنونه لبست فستان بلون الاحمر .

انا رغد اللى لبست فستان رقيق ولونه هادى وكانت ارق بنوته .

ـــــــــــــــــ★ـــــــــــــــ

اما الشباب .

لبسو كلهم بدل بلون الاسود مع بعض الاختلافات .

مؤمن كان لابس القميص بلون الابيض وببيون .

حسن القميص كان بنفس لون البدله وفاتح او ٣ ازرار .

اما حمزة ومراد ومحمد فلبسو قميص ابيض .

وكانو جامدين اخر حاجه .

مؤمن خلص وطلع عشان ياخد عروسته عشان يتصورو ... وكانو مجهزين مكان لتصوير جوا الحارة .

مؤمن خبط على الباب فتحتله هدى:تعالى ياحبيبى الف مبروك ربنا يهنيكو ويسعدكو يارب .

مؤمن باس ايدها:الله يبارك فيكى يا ست الكل .

محمود قرب منه:مش هوصيك عليها لانى واثق فيك يا بنى .

مؤمن:حنين فى عينى وقلبي يا حاج .

هدى:ادخل يا حبيبى هى فى اوضه دى .

مؤمن قرب من باب الاوضه وخبط على الباب فتحتله رغد اللى ابتسمت بحب:احلى عريس ياخواتى .... مبروك يا مؤمن مش متخيل فرحتى بيك .

مؤمن:الله يبارك فيك يا احلى اخت فى الدنيا .... كان نفسي اخدك فى حضنى بس فى رقابه .

رغد بصت لحسن اللى واقف على باب الشقه وضحكت .

مؤمن دخل الاوضه .

رهف:مبروك يا مؤمن .

مؤمن:الله يبارك فيك يا رهف .

لارا جرت عليه:بابي شوفتنى وانا عروسه .

مؤمن شالها من على الارض وباس خدها:احلى عروسه يا قلب بابا .

لارا:بس نونا احلى منى حلوة اوى يا بابي .

مؤمن عينه جت على حنين اللى ضهرها ليه ونزل لارا وقرب منها وحط ايده على كتفها .

حنين اتنهدت ولفت والاتنين ابتسمو لما عينيهم اتقابلت .

مؤمن عطاها البوكيه وقرب باس راسها وباس ايدها:مبروك يا حنين .

حنين:الله يبارك فيك .

مؤمن مسك ايدها وخرجو من الاوضه وقربت من محمود وحضنته .

محمود:مبروك يا حبيبتى .

حنين:الله يبارك فيك يا حودة يا قمر.

حنين بعدت عنه وحضنت هدى:هتوحشينى يا هدهد .

هدى خبطتها بخفه على كتفها:هتروحى اخر العالم يا بت ده اللى بينا خطوتين .

حمزة قرب من حنين وباس راسها:مبروك يا نونا .

حنين:الله يبارك فيك يا زوما .

حنين شافت حسن واقف بعيد عنهم قربت منه وحضنته:هتوحشنى يا ابو على .

حسن باس راسها:وانتى كمان يا قلب ابو على .

مؤمن قرب منهم وبعد حنين عن حسن:من بعيد يا اخ ممنوع الاحضان .

حسن:الله بنعمله فى الناس هيطلع علينا ولا ايه !!

رغد:كما تدين تدان يا اخ .

كلهم ضحكو .

حسن بص لحنين بحب اخوى .

حنين:بص يا ابو على لو حسيت انى وحشتك صفر بس وانت واقف تحت البيت هتلاقينى طلعتلك من البلكونه هواا .

حسن:بطلى جنانك ده بقي .

حنين:انا وهو منقدرش نسيب بعض با بطل .

حسن:انتى ومين !!

حنين:الجنان يا ابو على ما تصحصح معايا كدا .

حمزة:خد المجنونه ودى وامشي يا مؤمن .

الكل الموجودين ضحكو.

ومؤمن مسك ايد حنين اللى مسكت ايد لارا ونزلو وحمزة وحسن كل واحد اخد مراته وراحو وراهم.

راحو المكان المخصص لتصوير واتصورو صور كتير مع بعض .

وبعدها راحو على الارض الفاضيه وسط اصوات الزفه الجميله .

حنين ومؤمن قعدو فى المكان المخصص ليهم والكل قعدو على الترابيزات .

وبعد شويا قامو عشان رقصه السلو والاتنين كانو فرحانين جداا .

خلصت الرقصه والبنات والشباب طلعو رقصو معاهم والفرح كان مولع على الاخر .

ـــــــــــــــــ★ـــــــــــــــ

اسراء ماشيه اتفاجأت بحد بيشدها من دراعها بعيد عن الناس وكان اشرف .

اسراء:نهارك مش فايت انت ازاى تعمل كدا ؟!

اشرف:ده انتى اللى نهارك مش فايت ..... ايه اللون اللى انتى لبساه ده ؟!

اسراء:وانت مالك حاجه ماتخصش حضرتك .

اسراء لسه هتمشي اشرف شدها تانى:بت اتعدلى احسنلك انا جايب اخرى منك اقسم بالله .

اسراء:هو انا كنت جيت جمبك !! .... ده ايه البلاوى اللى بتتحدف علينا دى ياربي .

اشرف:اسراء بجد انا تعبت من الجرى وراكى ... مش هوعدك انى هصبر كتير على الحال ده !

اسراء:ومين طلب منك تصبر يا خويا ؟!

اشرف:مانا اخر صبرى هخطفك واتجوزك غصبن عن عين ابوكى .

اسراء:قول بقي انك بتستغل مهنتك فى الشرطه وجاى تبلطج عليا .

اشرف:شرطه وابلطخ .... الصبر من عندك يارب ... امشي بام الاحمر اللى انتى لبساه ده احسنلك يلا .... انا بدات الحب بيكى وهكره الحب والجواز على ايدك .

اشرف سابها ومشي بيكلم نفسه واسراء ميته على نفسها من الضحك ورجعت تانى للبنات .

ـــــــــــــــــ★ـــــــــــــــ

عند رهف اللى حمزة اخدها من وسط البنات وراح على التربيزة اللى قاعده عليها هدى .

رهف:يا حمزة سيبنى معاهم شويا .

حمزة:لا كفايه عليكى كدا انا سيبك من بدرى انتى ناسيه انك حامل .

رهف:قول بقي انك خايف على ابنك مش عليا .

حمزة بص لهدى:ونبي اقولها ايه دى ؟!

هدى ضحكت:هرمونات حمل يا حبيبي متشغلش بالك انت .... روح لشباب يلا .

حمزة مشي وهدى ورهف بصو لبعض وضحكوو .

ـــــــــــــــــ★ـــــــــــــــ

بعد وقت طويل الفرح خلص .

والكل راحو على بيوتهم ولارا اللى راحت مع هدى بعد محاولات كتير من الاقناع انها تسيب حنين .

فى بيت الشهاوى .

مؤمن فتح الباب وبص لحنين:اتفضلى يا اجمل عروسه .

حنين ابتسمت ودخلت وعينها على الشقه اللى اتغيرت ١٨٠ درجه:بجد الشقه بقت حلوة اوى .

مؤمن مسك ايدها:مش احلى منك يا قمرى .

حنين:زعلت اوى اننا سيبنا لارا واكيد هتزعل منى ومنك ..... فيها ايه لو كنا جبناها معانا يا مؤمن .

مؤمن:فيها ان النهارده اول يوم لينا سوا يا روح قلب مؤمن .

حنين:بس مش معنى انك اتجوزت تنسي بنتك يا استاذ مؤمن .

مؤمن:انتى مفكرة انى ممكن انسي لارا .... مستحيل يا حنين دانا عايش من يوم ما اتولدت عشانها هى وعمرى ما فكرت فى نفسي .... كنت دايما بخاف ارتبط بواحده تضايقها او تعمل عليها مرات اب بقي ..... بس لما شوفتك حبيتك من قلبي وحبيت حبك لـ لارا وده اللى خلانى ارتبط بيكى يا حنين .

حنين:يعنى مش هتندم فى يوم انك ارتبطت بعد ماما لارا .

مؤمن ضمها لحضنه:عمرى ما اندم انك بقيتى حياتى يا حنين .... انتى مش متخيله فرحتى بيكى عامله ازاى .... يمكن تقولى ده عبيط ده ماهو اتجوز قبل كدا .... بس جوازى من تقى الله يرحمها كان برغبه من ابويا وعمتى الله يرحمهم ... يمكن كان بينا احترام كبير وكنت بشوف حبها ليا فى عينيها بس عمرى ماحسيت ناحيتها بالحب اللى حاسه ناحيتك يا حنين .... انتى ملكتى عقلى وقلبي وبقيتى كل حياتى .

حنين ابتسمت بفرحه:انا بحبك اوى يا مؤمن .

مؤمن باسها من راسها:وانا بعشقك يا قلب مؤمن ..... يلا نصلى .

حنين:اكيد .... هدخل اغير فى الاوضه .

مؤمن:خدى راحتك وانا هغير فى الاوضه التانيه .

حنين:حاضر

حنين ومؤمن غيرو وصلو سوا وحنين كانت مبسوطه ان مؤمن امامها فى الصلاه وبعد ماخلصو مؤمن دعى ربنا يديم عليهم سعادتهم .

حنين دخلت الاوضه وقلعت الاسدال كانت لابسه بجامه ستان بلون الوردى وفارده شعرها اللى واصل لنص ضهرها بلونه الاسود .

الباب خبط وحنين قلبها دق بقوة وراحت فتحت ومؤمن تنح من جمالها لان دى اول مرة يشوفها بشعرها وقرب منها لتسكت شهرزاد عن الكلام الغير مباااااح ولتصبح زوجته امام الله .........

رغد دخلت شقتها مع حسن .

وكل واحد فيهم دخل يغير عشان يرتاحو من تعب اليوم الطويل .

بعد شويا

رغد قاعده جمب حسن على السر*ير .

رغد ضمت دراع حسن وحطت راسها على كتفه:مؤمن وحنين شكلهم كان حلو اوى ... وفرحتهم حلوة .

حسن:ربنا يسعدهم سوا .

رغد:يارب ..... انا ماكنتش اتخيل ان مؤمن يتجوز تانى ... كان عايش حياته لـ لارا وبس .... بس فرحانه اوى عشانه .... عارف مؤمن اتجوز تقى الله يرحمها عشان دى كانت رغبه باباه الله يرحمه ووصيه عمته .... يمكن هو محبهاش بس عمره ما زعلها وكان بيحترمها جداا وهى كانت بتحبه ... وهو دايما كان زعلان من نفسه لانه ماكنش بيقدر يبادلها ولا حتى ربع حبها ليه .... بس الفرحه اللى شوفتها فى عيون مؤمن النهارده غير كأنه بيتجوز لاول مرة .

حسن:ربنا يهنيهم سوا .... مؤمن طيب ويستاهل كل خير .

رغد:ونونه بردو طيبه وحنينه جدااا .

حسن نام على السرير وشد رغد لحضنه:يلا عشان ننام بقااا .

رغد:يلا

ـــــــــــــــ★ــــــــــــــ

صباح تانى .

الكل متجمعين على سفرة بيت البطل بيفطرو .

هدى:متنسوش يا حاج هنروح لحنين بليل باذن الله .

محمود:ان شاء الله .

هدى:انا هاخد رغد معايا يا حسن نروح نجيب حلويات الصباحيه .

حسن:حاضر يا ست الكل .

هدى:لو ماكنتش رهف تعبانه كنت اخدتها معانا .

رهف:مينفعش نخرج كلنا ونسيب لولى لوحدها .... وكفايه اجى معاكو لنونا يا هدهد .

حمزة:رهف لو فضلتى تعبانه كدا كلمينى ونروح لدكتورة .

رهف:حاضر يا حمزة .

حسن:يلا هنروح احنا الورشه عشان نخلص بدرى شويا .

هدى:حاضر يا حبيبى .

الشباب خرجو ورغد وهدى جهزو عشان يخرجو ورهف راحت ترتاح شويا فى اوضتها ومعاها لارا .

ـــــــــــــــ★ــــــــــــــ

فى بيت الشهاوى .

مؤمن صحى ماكنتش حنين جمبه .

قام دخل الحمام وخرج سمع صوت فى المطبخ .

مؤمن دخل المطبخ شاف حنين واقفه بتحضر الفطار ... قرب منها وحضنها من ضهرها وهى اتخضت .

حنين:خضتينى يا مؤمن .

مؤمن:صباح الجمال يا عيون مؤمن .

حنين ابتسمت:صباح النور يا حبيبى .... يلا عشان نفطر سوا .

مؤمن:ريحه الفطار تجوع الصراحه .

حنين:طب يلا خرج معايا الاطباق على السفره .

مؤمن وحنين خرجو الاطباق وفطرو سوا .

حنين:كلهم هيجو بليل ان شاء الله .

مؤمن:ينورو فى اى وقت ده بيتك يا حنين وتستقبلى فيه اى حد وتعملى اللى يريحك يا حبيبتى .

حنين:ربنا يخليك ليا ... ولارا هتيجى معاها وانا مش ناويه اخليها ترجع معاهم .

مؤمن:قصدك تفضل هنا ؟!

حنين:ايوا ... مش عايزاها تحس انك اهملتها عشان اتجوزتنى ...لان وقتها هتكرهنى انا يا مؤمن وانا بصراحه بحبها جدا وهزعل لو بعدت عنى .

مؤمن مسك ايد حنين وباسها:ربنا يخليكى ليا ولـ لارا .

حنين:ويخليك لينا يا حبيبي .

ـــــــــــــــ★ــــــــــــــ

بليل الكل اتجمعو وراحو لمؤمن وحنين وقضو وقت جميل معاهم .

ولارا فرحت انها هتفضل معاهم .

وبعد وقت طويل قضوه فى الضحك والهزار

الكل رجعو على بيت البطل وسابو لارا مع حنين ومؤمن .

ـــــــــــــــ★ــــــــــــــ

مرت الايام و الشهور .

حسن ورغد اللى عايشين سوا حياه مليانه حب .... وحسن اللى متابع مع رغد موضوع بناء المستشفى وده مفرحها جداا .

حمزة ورهف اللى بقت فى الشهر التامن بيعدو الايام عشان يجى البطل الصغير وينور حياتهم .

حنين ومؤمن اللى حياتهم هاديه وجميله مع لارا اللى بتحب حنين جداا وده مفرح مؤمن وخصوصا انها بتناديها بماما .... وكمان فرحتهم زادت لما عرفو بحمل حنين اللى بقت فى الشهر التانى .

اشرف اللى اتقدم لاسراء للمرة العاشرة تقريبا واخيرا رضت عنه ووافقت ... واشرف اصر انهم هيعملو فرح علطول .

ـــــــــــــــ★ــــــــــــــ

يوم جديد فى الحارة .

هدى ورهف ورغد واقفين فى المطبخ بيجهزو الغدا عشان مؤمن وحنين جاين يتغدو معاهم .

هدى:يا رهف ارتاحى يا بنتى انتى تعبانه .

رهف:انا كويسه يا هدهد لو حسيت بتعب هابقي ارتاح شويا متقلقيش ... مش عايزة اسيبكو تجهزو الاكل لوحدكو .

رغد:وانا مش عاجبه حضرتك ولا ايه .... مش كفايه مروحتش العياده ولا المستشفى عشان اجهز معاكو .

هدى ضحكت:بصراحه كتر خيرك .

رغد:حساكى بتتريقى يا هدهد بس ماشي هعديها .

هدى ورهف ضحكو .

بعد وقت طويل خلصو الاكل والباب خبط ورغد راحت تفتح وكان مؤمن وحنين ولارا .

رغد وقفت على الباب وقفلته بايدها:لا والله حلوه اوى يا ست هانم جايه على الاكل علطول !

حنين ضحكت:طب دخلينى الاول طيب نرتاح من الطريق .

رغد مثلت الخضه:انت جايب البت مشي يا واد يا مؤمن .... مش كنت جبتلها طيارة اصل الطريق طويل اوى .

حنين ضحكت:اوى الصراحه .

ومؤمن بيحاول يكتم ضحكته .

رغد:بت بقولك ايه ده انا حماتك على فكرة .... انتى عايزة تفلسي ابننا ولا ايه .... انت يا واد قرشك فى جيبك مضيعوش يمين وشمال ومتسمعش كلام الوليه مراتك انا بقولكو اهو .

حسن وحمزة كانو جايين من الورشه وسمعو الكلام .

حسن:انتى قلبتى على حنين ولا ايه يا رغد ؟!

حنين:شايف مراتك بتقوى اخوها عليا يرضيك كدا يا ابو على .

حمزة:والله الله يكون فى عونك حاسس بيكى يا اختى .... اصل الدكتورة رغد بتتعامل معايا بنفس اسلوب الحما العقربه دى

حنين ومؤمن وحسن ضحكو .

رغد:عقربه فى عينك يا حمزة ... شايف اخوك يا حسن بيقول عليا ايه ؟!

حسن:مانتى مش سيباهم فى حالهم يا رغد .

هدى جت من ورا رغد:انتى موقفاهم كدا ليه يا رغد دخليهم يلا .

رغد:والله يا هدهد يا خسارة تعبنا فى تجهيز الاكل العيال دول ميستهلوش .

هدى ضحكت:انتى بتتكلمى على مين فين ؟!

رغد:ادخلى كدا يا لولى وانت يا ابو على .... انتو بقي خليكو كدا والله ما عطياكو صوباع محشي حتى .

حسن شد رغد من على الباب وهو بيضحك:اهدى يا حبيبتى .... يلا ادخلو عشان ناكل بقي .

الكل اتجمعو على السفره واكلو سوا وهزرو وضحكو كتير والقاعده طبعا ماخليتش من مشاكسه رغد للكل .

ـــــــــــــــ★ــــــــــــــ

يوم جديد على الكل .

البنات والشباب كانو بيجهزو عشان يسافرو القاهرة يحضرو فرح اسراء واشرف .

حسن نزل مع رغد كانت هدى ومحمود قاعدين .

حسن:مش عايزين تيجو معانا بردو ؟

هدى:روحو انتو اتبسطو يا ولاد .

محمود:وخدو بالكو من بعض .

حسن:سيبها على الله يا حاج .

حمزة ورهف نزلو وودعو هدى والحاج وخرجو وقابلو مؤمن وحنين ولارا والكل ركبو العربيات .

حمزة ورهف وحسن ورغد فى عربيه .... ومؤمن وحنين ولارا فى عربيه .

ـــــــــــــــ★ــــــــــــــ

الشباب والبنات وصلو ڤيلا مؤمن اللى فى القاهرة بليل .

الكل نزلو وكل واحد اخد مراته وراحو اوضه ينامو عشان يصحو يروحو الحنه .

تانى يوم .

الكل صحو وفطرو سوا وجهزو عشان البنات يروحو بيت اسراء والشباب يروحو لاشرف وكان معاهم محمد ومراد .

وقضو اليوم كله سوااا وهيصو وفرحوو من قلبهم .

وفى نهايه اليوم الكل رجعو على الڤيلا .

ـــــــــــــــ★ــــــــــــــ

صباح يوم جديد .

الكل صحو بنشاط وجهزو عشان يبقو مع اسراء واشرف .

وبعد شويا وصلو الفندق اللى هيجهزو فيه والفرح هيكون فى القاعه اللى فى الفندق .

البنات كانو مع اسراء اللى جهزت ولبست فستان بسيط جداا وكانت شبه سندريلا .

والبنات لبسو فساتين نفس الاستايل بس بالوان مختلفه .

ـــــــــــــــ★ــــــــــــــ

اما الشباب كانو مع اشرف لحد ما جهز وراح عشان ياخد عروسته .

اشرف اخد اسراء ونزلو عشان يتصورو والشباب كل واحد مع مراته .

وبعدها راحو على القاعه والفرح كان جميل واشرف واسراء كانو مجانين على الاخر .

ـــــــــــــــ★ــــــــــــــ

الشباب والبنات رجعو الڤيلا بعد الفرح ما خلص .

رغد:ايه رايكو نسهر شويا سوا ؟!

حنين:انا تعبانه وهموت وانام .

رهف:وانا نفسي اشوف السرير بس .

حمزة ضحك:طب يلا عشان تنامو .

حمزة ومؤمن كل واحد طلع مع مراته .

حسن بص لرغد:الجميل ايه رايه نسهر سوا .

رغد ضحكت:ياريت مش جيلى نوم الصراحه .

حسن:طب تعالى نغير الاول وبعد كدا ننزل نسهر فى الجنينه الجو حلو .

رغد:يلا بينا .

رغد وحسن غيرو ونزلو .

رغد دخلت المطبخ وجابت صنيه عليها تسالى وعصير وخرجو قعدو عند حمام السباحه ورجليهم فى الميا .

رغد:الجو حلو اوى النهارده .

حسن:جدا والاحلى انك معايا وفى حضنى .

رغد:بجد يا حسن انت احسن نعمه من ربنا عليا ... ربنا يخليك ليا وتفضل سندى وضهرى وحبيبى لاخر العمر .

حسن ضمها لحضنه:ويخليكى ليا يا مصدر سعادتى .

رغد:حسن كنت عايزة اطلب منك طلب ؟

حسن بصلها:اتفضلى يا رغد .

رغد:كنت عايزة اروح لدكتورة .

حسن:ليه يا حبيبتى انتى تعبانه ؟!

رغد:احنا متجوزين بقالنا فترة ومحصلش حمل وانا خايفه .

حسن:رغد يا حبيبتى احنا مكملناش سنه عشان تخافى .... وبعدين لما ربنا يأذن اكيد هيحصل .

رغد:انا نفسي اجيب عيال كتير اوى يا حسن بنات وولاد .

حسن:هنجيب يا روح حسن .

رغد بصتله:طب افرض طلعت مش بخلف هتروح تتجوز عليا .... والله اقتلك يا حسن .

حسن ضحك:يعنى جوزتينى وقتلتينى كمان يا قويه .... على العموم يا ستى انا لو هكون اب وليا اولاد هيكونو منك يا رغد مش من غيرك .... لان حياتى هتكون معاكى انتى وبس ... ولو فرضنا وربنا مكرمناش باولاد .... هعتبرك انتى بنتى اللى بعشقها ومقدرش اعيش دقيقه واحده من غيرها .

رغد حضنته بحب:انا بحبك اوى يا ابو على .

حسن:وانا بعشقك يا قلب ابو على .

رغد:تعرف نفسي انزل الميا اوى .

حسن:غالى والطلب رخيص .

حسن قام وقفت وشال رغد ونط بيها فى الميا .

رغد:يا مجنون .

حسن:ماينفعش يبقي نفسك فى حاجه وانا موجود ومانفذهاش يا قلبي .

رغد حاوطت رقبته وفضلو شويا فى الميا وبعد كدا طلعو غيرو ونامو .

ـــــــــــــــ★ــــــــــــــ

الشباب والبنات قضو اسبوع فى القاهرة .

خرجو واتفسحو وكانو مبسوطين جداا .

فى يوم بليل البنات والشباب سهرانين بيتفرجو على فيلم سوا .

رهف حست بوجع جامد فى بطنها:حمزة .

حمزة بصلها وشاف ملامحها كلها وجع:مالك يا حبيبتى؟

رهف بوجع:وجع صعب اوى يا حمزة شكلى بولد .

رغد قربت منها:اهدى يا حبيبتى انتى لسه فى الشهر التامن .

حنين:خلينا نكلم الدكتورة بتاعتها نسالها .

رهف صرخت بصوت عالى .

حسن:تعالو نوديها المستشفى بسرعه .

حمزة شال رهف والكل خرجو معاه وراحو على اقرب مستشفى .

ـــــــــــــــ★ــــــــــــــ

فى المستشفى .

الكل واقفين قدام اوضه العمليات بعد ما الدكتورة كشفت على رهف وقالت انها لازم تولد عشان الميا قلت على البيبي .

حمزة:هما اتاخرو ليه كدا ؟!

رغد:اهدى يا حمزة دى ولاده قيصيريه وطبيعى يتاخرو .

بعد شويا سمعو صوت البيبي وكلهم فرحو .

وباب الاوضه اتفتح وخرجت الممرضه وهى شايله الولد وقربت من حمزة:الف مبروك يتربي فى عزك .

حمزة:تسلمى ... رهف عامله ايه ؟

الممرضه:هى فى غرفه الاستفاقه شويا كدا وهتتنقل غرفه عاديه وتقدرو تشوفوها .

حمزة:شكرااا .

الممرضه:العفو .

حمزة بص على البيبي وكان جميل وصغير .

رغد قربت منه:أذن فى ودنه يا حمزة .

حمزة:حاضر .

حمزة بدأ يأذن فى ودنه .

حسن قرب منه:يتربي فى عزك يا صاحبي .

حمزة:تسلم يا بطل .

مؤمن:ماشاء الله ربنا يباركلك فيه يا حمزة .

حمزة:حبيبي يا مؤمن .

حنين:هاته اشيله شويا ده حلو اوى .

حنين اخدته من حمزة:يا روحى على الصغنن ... شايفه يا رغد حلو اوى .

رغد قربت منه وباست ايده:روح خالتو يا ناس ربنا يحميك يا حبيبي .

ـــــــــــــــ★ــــــــــــــ

بعد شويا رهف اتنقلت اوضه عاديه والكل كانو معاها .

حمزة:حمدلله على سلامتك يا حبيبتى .

رهف:الله يسلمك يا حمزة ... هو فين ؟

رغد قربت منها:مع خالتو حبيبته .

رهف ابتسمت ورغد نيمته فى حضنها:ربنا يباركلك فيه يا رهف ماشاء الله زى القمر .

رهف:حبيبتى يا رغد .

حنين:هاااا هتسمو ايه .

حمزة:دى مهمه رهف .

مؤمن:وليه بقااا .

حمزة:كنا متفقين لو بنوته انا اللى هسميها ولو ولد هى اللى هتسميه .

رغد:هااا يا رهف هتسمى ايه ؟

رهف:عايزة اسميه نوح .

حنين:حلو ومش منتشر اوى .... وهيكون اول نوح فى حاره البطل .

كلهم ضحكو وقضو اليوم فى المستشفى وتانى يوم استعدو عشان يرجعو على ڤيلا مؤمن .

وحسن كلم محمود وهدى اللى لما عرفو قررو يجو عشان يبقو مع رهف.

ـــــــــــــــ★ــــــــــــــ

صباح يوم جديد .

الشباب قاعدين فى صاله الڤيلا .

سمعو صوت عربيه دخلت الڤيلا عرفو ان محمود وهدى وصلو وقامو عشان يستقبلوهم .

حسن قرب من محمود وباس ايده:حمدلله على السلامه يا حاج .

محمود:الله يسلمك يا بنى .

حسن باس راس هدى:نورتى يا ست الكل .

هدى:تسلم يا بنى .

حمزة قرب وباس ايدهم .

محمود:حمدلله على سلامه حبايبك يا بنى ربنا يباركلك فيهم .

حمزة:تسلم يا حاج ويباركلنا فى عمرك يارب .

مؤمن:الڤيلا نورت والله يا حاج .

محمود:منورة باصحابها يا بنى .

هدى:فين يا رهف يا حبيبى .

حمزة:فوق يا ست الكل تعالو اوصلك ليها .

حمزة مسك ايد هدى وطلعو اوضه رهف .

ـــــــــــــــ★ــــــــــــــ

فى اوضه رهف .

البنات قاعدين معاهم .

رغد:روح خالتو غير وبقي زى القمر ويتاكل اكل يا ناس .

الباب خبط وحنين قامت تفتح وفرحت لما شافت هدى وحضنتها:حبيبتى يا هدهد وحشتينى .

هدى:حبيبتى وانتى كمان ... عامله ايه يا بنتى ؟

حنين:الحمدلله تعالى اتفضلى .

هدى دخلت ورغد حضنتها:قلبي يا هدهد .

هدى:قلب هدهد انتى .

هدى قعدت جمب رهف:حمدلله على سلامتك يا بنتى .

رهف:الله يسلمك يا هدهد ... فرحت اوى لما عرفت انك جايه عشان تكونى معايا .

هدى:هو انا اقدر اسيبكو يا ولاد ... ده انتو حبايبى .

هدى بصت على نوح:بسم الله ما شاء الله ربنا يحميك ويبارك فيك يا حبيب ستك .... ايه الحلاوة والجمال ده .

هدى طلعت دلايه دهب آيه الكرسي وعلقتها فى سلوبت نوح بدبوس صغير:ربنا يحفظك يا حبيبي .

الباب خبط ومحمود دخل :السلام عليكم .

الكل:وعليكم السلامه .

رغد وحنين حضنو محمود اللى باس راسهم وقرب من رهف وباس راسها:حمدلله على سلامتك يا بنتى .

رهف:الله يسلمك يا بابا .

هدى مدت ايدها بنوح:سمى يا حاج .

محمود اخده منها:بسم الله ماشاء الله ... ربنا يباركلك فيه ويحفظه من كل مكروه يا بنتى .

رهف:يارب يا بابا .

محمود طلع مصحف دهب صغير وعلقه على صدر نوح .

رهف:متحرمش منكو ابدا يا رب .

محمود:تسلمى يا بنتى .

هدى:هروح اغير وانزل احضرلك لقمه عشان تاكلى وتتغذى يا حبيبتى .

رغد:انا هاجى معاكى يا هدهد ... ونونا خليكى هنا مع رهف عشان لو احتاجت حاجه .

حنين:حاضر .

هدى غيرت ونزلت المطبخ مع رغد حضرو الاكل سوا .

بعد وقت طويل خلصو وهدى اخدت اكل رهف وطلعت عشان تاكلها .

رهف كانت فرحانه باهتمام هدى ليها ... كانت حاسه كأن مامتها اللى بتهتم بيها ......

عدى اسبوعين .

واخيرا الكل قررو يرجعو الحارة لما حاله رهف اتحسنت .

حمزة نازل من على السلم وماسك ايد رهف .

ورغد وراه وشايله نوح .

والكل متجمعين فى صاله الڤيلا .

حسن:يلا عشان نتحرك .

حمزة ورهف وهدى اللى شايله نوح ومحمود ركبو فى عربيه .

وحسن ورغد فى عربيه .

وحنين ومؤمن فى عربيه .

ــــــــــــ★ـــــــــــــ

الكل وصلو الحارة بليل وكل واحد راح على بيته عشان يرتاحو من طريق السفر .

ـــــــــــ★ــــــــــــ

صباح يوم جديد فى الحارة اللى الكل بيستعدو فيها استعداد كبير عشان سبوع نوح البطل اول حفيد لعيله البطل .

واليوم بدأ بالحاج محمود وحمزة وحسن ومؤمن اللى كانو بيدبحو الدبايح ووزعو على اهل الحارة كلها .

وكمان فى اللحمه اللى راحت على بيت البطل وهدى والبنات وستات الحارة طبخو ما الذ وطاب .

والشباب جهزو ترابيزات طويله فى شارع الحارة عشان اهل الحارة ياكلو سوا .

واليوم كان طويل ومتعب على الكل بس كمان فرحو من قلبهم بلمتهم سوا مع اهل الحارة اللى بيحبو بعض .

وانتهى اليوم .

ــــــــــــ★ـــــــــــــ

وبدا يوم جديد وكانو البنات وهدى بيجهزو اكياس اللى بتتوزع فى السبوع والتحف والعاب للاطفال .

وستات الحارة اتجمعو عندهم وغنو اغانى السبوع ..... ونزلو الشارع وهدى كانت شايله نوح .... وحنين بدق الهون .

حنين:اسمع كلام ابوك ما تسمعش كلام امك يا واد يا نوح ..... والاهم اسمع كلام عمتك واياك تسمع كلام خالتك رغد .

رغد قربت منهم واخدت الهون:وسعى كدا يا ماما .

رغد دقت الهون:بص يا نوح يا حبيبى انت سيبك من كل دول وخليك مع خالتو رغد حبيبتك .

حنين:الواد راح فى داهيه خلاص.

وقضو وقت كله هزار وضحك .

وهدى بخرت نوح ورهف .

ووزعو توزيعات السبوع على اهل الحارة كلهم والعاب وشموع على الاطفال اللى فرحو بيهم جداا .

وخلص سبوع نوح البطل مع نهايه اليوم .

ــــــــــــ★ـــــــــــــ

مرت شهور .

والكل عايشين بسعاده كبيرة و نوح الصغير اللى بقى عنده ٥ شهور اللى عطى لحياتهم طعم .... والكل فرحان بيه ودايما بيتخانقو مين اللى ياخده .

فى شقه حسن ورغد .

اللى قاعده وشايله نوح وبتلاعبه وهو بيضحك معاها .

دخل حسن وباس راسها:عامله ايه يا حبيبتى .

رغد ابتسمت:بخير يا حسن .

حسن قعد جمبها:البطل الصغير منور عندنا .

رغد:البطل الصغير تاعب مامته ومش بينام بليل ... فاخدته عشان تنام شويا .

حسن:شكلك هتبقي شقى وهطلع عينا يا ابن حمزة .

رغد باست ايد نوح:طالع لخالتو صح .

نوح ضحك .

حسن:ربنا يستر علينا .

رغد:روح يا نوح العب مع عمو شويا وانا هروح احضر الاكل .

حسن:شكلك كدا غدرتى بيا وكلتى من غيرى .

رغد:وانا اقدر يا حبيبي بردو ... انا قولت لهدهد ياكلو هما عشان انت هتتاخر واخدت اكلنا وطلعت .

حسن:تسلمى يا روح حبيبك .

حسن اخد نوح وفضل يلاعبه ونوح يضحك ورغد شيفاهم وهى بتحط الاكل على السفرة .

رغد:يلا يا حسن قوم غير يلا ... تعالى يا نوح .

حسن دخل يغير خرج كانت رغد نيمت نوح .

حسن:نام بسرعه دى .

رغد:انا افضل الاعبه لحد ما يتعب يقوم ينام .

حسن ضحك:لا خطه ذكيه جدا .

رغد:يلا يا حبيبي عشان تاكل .

حسن ورغد قعدو ياكلو سوا .

رغد عينها على حسن وابتسمت اوى .

حسن:بتبصيلى كدا ليه يا رغد !!

رغد:بفتكر الاوقات اللى بتقضيها مع نوح و اد ايه بتكون حنين جداا .... لما انت كدا مع ابن اخوك .... هتكون ازاى مع ابنك او بنتك ؟!

حسن:اكيد هحبها او احبه لانه هيكون حته من حبيبه قلبي .

رغد:وطبعا هدلعه وتحبه وهتبقي حنين جدا معاه صح ؟!

حسن:اكيد .

رغد:لا يا عم يفتح الله مش عايزة اجيب عيال .

حسن ضحك:وليه بقي ؟

رغد:عشان ياخدو الدلع والحب والحنيه كلها وانا ابقا على الرف يا سى حسن .

حسن ضحك اوى .

رغد:اضحك اضحك .

حسن مسك ايدها وباسها:انا لو جبت دسته عيال هتفضلى انتى حبيبتى وبنتى اللى مقدرش اكملت حياتى من غيرها .

رغد:كدا هتعود على الدلع يا ابو على وانت اللى هتندم واحتمال تزهق منى .

حسن شدها وقعدها فى حضنه:اتعودى براحتك يا قلب ابو على .... وبعدين انا عمرى ما ازهق منك يا رغد ... ده انتى حياتى ودونيتى كلها .

رغد باسته من خده:حبيبي يا ابو على .

حسن شال رغد ودخل اوضه النوم ولسه هيقرب من رغد سمعو نوح بيعيط .

حسن بغيظ:نزلى الواد ده عند ابوه يزهق فيه .

رغد ضحكت .

حسن خرج من الاوضه وراح الاوضه اللى فيها نوح .

رغد خرجت من الاوضه وشافت حسن شايل نوح من قفاه جرت عليه واخدته منه:حرام عليك يا حسن ... وانا اللى بقول عليك حنين ايه الشر ده ..... يا روحى والله ما تزعل عمو حسن ده وحش اوى ... خليك مع دودو حبيبتك .

حسن بغيظ:طب خليه ينفعك بقي .

حسن دخل الاوضه ورغد ضحكت بصوت عالى ونوح ضحك زيها .

حسن خرج من الاوضه وشافهم بيضحكو ضحك معاهم وقضو وقت مع نوح .

وبعد كدا رهف كلمت رغد عشان تاخد نوح منها .

ــــــــــــ★ـــــــــــــ

مرت شهور على الكل .

فى المستشفى .

الكل متجمعين فى الاوضه اللى اتنقلت عليها حنين بعد ما ولدت والكل باركو ليها هى ومؤمن واتمنو لابنها حياه سعيده .

رغد:بس ايه ده يا نوناا دانتى جايبه نسخه مصغرة من مؤمن .... دانتى شكلك بتموتى فيه ... يا بختك يا عم .

مؤمن باس ايد حنين:دى حبيبتى دى .

حنين ابتسمت ليه .

لارا قاعده جمب البيبي وفرحانه بيه جداا:يعنى ده بقا اخويا .

مؤمن:ايوا يا روحى اخوكى .

لارا:طب انا ممكن اشيله .

حنين:طبعا يا قلبي ... خليها تشيله يا مؤمن .

مؤمن شال النونو وحطه على ايد لارا اللى كانت فرحانه جدا بيه .

رهف:هتسمو ايه بقا .

حنين:انا ومؤمن اتفقنا نسمى سليم .

رغد:حلو اوى .

هدى:ربنا يباركلكو فيه يا حبايبى يارب ... ويبارك فى نوح حبيبي .... وعقبالك يا حسن انت ورغد يارب .

حسن شاف الحزن على وش رغد ضمها ليه:انا اجيب عيال ليه يا ست الكل ... مانا عندى بنوتى الشقيه .

هدى ومحمود ابتسمو على حب ابنهم لمراته وانه ما بيحبش يشوفها زعلانه .

رغد ضحكت وبصت لحسن:ربنا يخليك ليا يا بابا .

كلهم ضحكووو .

ــــــــــــ★ـــــــــــــ

مرت الايام وعملو سبوع سليم اللى الحاج محمود وهدى قررو يعملو فى بيت البطل زى سبوع نوح بالظبط واهل الحارة كلهم شاركو معاهم بفرحه .

ــــــــــــ★ـــــــــــــ

بتمر ايام وشهور .

رغد اللى وقتها كله فى المستشفى اللى خلاص باقى ليها القليل ويعملو الافتتاح فى الحارة .

مؤمن اللى كبر الشركه وبنى مصنع كمان فى اسكندريه .

رهف وحنين اللى وقتهم كله لنوح وسليم ولارا .

دكتور محمد اللى نقل من القاهرة لاسكندريه وهيكون مع رغد فى المستشفى وده فرحها جداا .

ــــــــــــ★ـــــــــــــ

فى يوم افتتاح المستشفى .

الكل متجمعين فى المستشفى واهل الحارة معاهم .

والكل بيبارك لرغد .

حسن اللى فرحان لفرحه رغد ودايما معاها ومش بيبعد عنها .

رغد قربت من حسن وهمست:حسن تعالى عايزاك .

حسن راح معاها على مكتبها .

رغد حاوطت رقبته:ربنا يخليك ليا يا احلى بابا .

حسن باس راسها:ويخليكى ليا يا بنوتى .

رغد:بس انا زعلانه .

حسن:ليه يا قلبي ؟!

رغد:عشان فى حد تانى هيقولك يا بابا غيرى .

حسن بصلها باستغراب وابتسم:رغد انتى ...

رغد ضحكت وهزت راسها باه .

حسن ضمها لحضنه بفرحه كبيرة .

رغد كانت فرحانه لفرحته .

حسن بعد عنها:مبروك يا قلب حسن .

رغد:الله يبارك فيك يا حبيبي .... فرحانه اوى عشان قدرت افرحك .

حسن:فرحتى بيكى اكبر يا رغد .... كنت دايما بشوفك زعلانه ونفسك تكونى زى حنين ورهف .... وربنا حققلنا امنيتنا وهيبقي عندنا احلى ثمرة حب .

رغد حضنته بحب:بحبك اوى يا حسن .

حسن:وانا بعشقك يا قلب حسن .

رغد:طب يلا نروح نفرحهم.

حسن ورغد قربو من العيله وباين عليهم الفرحه.

هدى:مالك يا حسن فرحان ليه ما تفرحونا معاكو .

حسن:رغد حامل يا ست الكل .

الكل فرحو لرغد وحسن وباركو ليهم والفرحه بقت فرحتين .

ــــــــــــ★ـــــــــــــ

يوم جديد على الكل .

حسن صحى عشان ينزل الورشه .

رغد كمان صحت:صباح الخير يا ابو على .

حسن باس راسها:صباح الجمال يا قلبي .

رغد:نازل الورشه .

حسن:ايوا يا حبيبتى .

رغد:طب استنانى ننزل سوا عشان اروح المستشفى .

حسن:رغد خليكى مرتاحه ومحمد هيتابع كل حاجه بلاش تتعبي نفسك .

رغد:حسن انا لسه فى الشهر التانى يا حبيبي لسه بدرى على التعب .... ولو حسيت نفسي مش قادرة اكيد هفضل فى البيت ومحمد هيتابع كل حاجه .

حسن:اللى يريحك يا حبيبتى ... يلا قومى عشان نفطر معاهم تحت قبل ما نخرج .

رغد:حاضر .

رغد وحسن نزلو والكل فطرو سوا وبعد كدا حسن وحمزة ورغد خرجو .

ــــــــــــ★ـــــــــــــ

فى يوم حسن كان واقف فى البلكونه شقته وعينه على منصور ومراته محروسه اللى فى الشارع .

رغد جت ووقفت جمبه:هما خلاص هيمشو من الحارة ؟

حسن:ايوا باعو البيت وهيمشو .

رغد:والله احسن ... الحارة كلها ناس طيبين الا دول .... ومين بقي اللى اشترى البيت ؟؟

حسن:عيله البطل .

رغد بصتله بصدمه:بجد !! ... وهو وافق يبيعلك ؟!

حسن:هو كان مستعجل على البيع ... وانا قولتله محدش غريب هيدخل الحارة وانى هشترى البيت ..وهو وافق .

رغد:وانت اشتريته ليه يا حسن .

حسن:الحاج فكر يشتريه عشان يبقي لنوح وسليم لما يكبرو ... ولاولادنا كمان .

رغد:بس احنا هنجيب بنات يا حسن .

حسن ضمها ليه:انتى مفكرة انى هخلى بناتى يبعدو عنى ... تؤ انا هجوزهم معايا فى الحارة .

رغد ضحكت:انت ناوى تجوزهم لنوح وسليم ولا ايه ؟!

حسن:والله ياريت .... اومال هما هيجو امته بقي ؟!

رغد:انا لسه فى الشهر الرابع يا حسن .

حسن:نفسي يجو وينورو حياتنا بقي .

رغد:ان شاء الله يا حبيبي .

ــــــــــــ★ـــــــــــــ

فى يوم رغد اللى بقت فى الشهر السابع قاعده لوحدها فى الشقه وحسن كان فى الورشه .

رغد:مانا هموت لو مأكلتهاش بقي .

رغد مسكت فونها ورنت على حسن اللى رد عليها:مالك يا حبيبتى انتى كويسه ؟!

رغد:لا مش كويسه يا حسن .

حسن بقلق:فى ايه مالك يا رغد اكلم الدكتورة تجيلك ؟!

رغد:لا انا مش تعبانه .

حسن:اومال مالك يا رغد متقلقنيش .

رغد:بصراحه نفسي فى حاجه .

حسن:نفسك فى ايه يا حبيبتى ؟

رغد:نفسي فى كابوريا يا حسن هموت واكلها .

حسن ضحك:رغد هو على حد علمى الوحم بيكون اول ٣ شهور بس ..... انتى بقا مستمر معاكى .

رغد:ايه هو ده يا حسن ... ماكنتش اعرف انك بخيل كدا .

حسن:يا حبيبتى مش بخل والله ... انا مستغربك اصلا .

رغد:معرفش بقا بس انا صاحيه نفسي اكلها اوى .

حسن:خلاص من عيونى بكرة هجبلك احلى كابوريا .... حلو كدا .

رغد:لا الوقت يا حسن .

حسن:الوقت ايه يا رغد .. الساعه ١٢ بليل يا حبيبتى .

رغد:نفسي فيها يا حسن الله .

حسن اتنهد:حاضر يا رغد هطلبلك واجى .

رغد:حبيبي يا ابو على .

ــــــــــــ★ـــــــــــــ

بعد ٣ شهور .

فى المستشفى .

الكل واقفين قدام اوضه العمليات بيستنو رغد اللى بتولد .

بعد شويا سمعو صوت البيبهات بتعيط .

حسن خرج وكان شايل البنوتين .

رهف:رغد عامله ايه يا حسن ؟

حسن:الحمدلله شويا وهتخرج .

حسن قرب من الحاج محمود:أذن ليهم يا حاج .

محمود اخد بنوته من حسن وباس راسها واذن ليها ورجع اخد التانيه وعملها زى الاولى .

ــــــــــــ★ـــــــــــــ

بعد شويا رغد اتنقلت لغرفه عاديه والكل كانو معاها .

حسن قاعد وماسك ايدها والبنات نايمين جمبها .

الكل باركو لحسن اللى كان فرحان ببناته ورغد .

مؤمن:انا حاسس انى شايف رهف ورغد وهما صغيرين .

رهف:صح يا رغد ... شبه صورنا اللى كنا بنتفرج عليها مع بابا وماما فاكرة.

رغد بصت لبناتها بحب:شبهنا اوى .

حمزة:كدا بقا عندنا نسخه تانيه من مؤمن ورهف ورغد .

الكل ضحكو .

هدى:هااا يا ولاد هتسمو البنات الحلوين دول ايه ؟!

حسن بص لرغد وضحك:رغد محتارة لحد الوقت ومش عارفه تسمى ايه .

حنين:يعنى مش استقريتو على اسم .

رغد:لا لسه .

مؤمن:هنسيب البنات من غير اسم كدا يعنى .

رغد:لا هفكر واقولكو .

حمزة:انتى سايبه الـ ٩ شهور يا رغد وجايه تفكرى الوقت .

رغد:الله محتارة مش عارفه اسمى ايه .

حسن ضحك:خلاص سبوها تفكر مع نفسها .

مؤمن:بس بسرعه يا رغد عشان نكتب البنات .

رغد:حاضر .

ــــــــــــ★ـــــــــــــ

الكل روحو وفضل حسن مع رغد فى المستشفى .

رغد اللى دماغها عماله تفكر فى اسماء للبنات وحشن شايف حيرتها .

حسن:مالك يا حبيبتى ؟

رغد:مش لاقيه اسماء حلوة يا حسن ... هتجنن .

حسن:يا حبيبتى فى الاسماء كتير وحلوة ليه محتارة كدا ؟!

رغد:طب ما تساعدنى يا حسن .

حسن:انا سايبك تختارى انتى يا حبيبتى .

رغد:طب قول اقتراحات .

حسن:فى اسمين انا بحبهم جدا ... بس هما مش شبه بعض .

رغد:ايه هما ؟

حسن:فيروز وداليدا .... بس انتى عايزة اسمين يكونو لايقين على بعض .

رغد:بس حلوين اوى يا حسن ... انا هسميهم خلاص .

حسن:بتهزرى يا رغد ... بقي طول الـ ٩ شهور بتدورى على اسمين لايقين على بعض وفى الاخر تختارى اتنين مختلفين .

رغد سندت راسها على كتفه:بس حلوين ... وكفايه ان حبيبي بيحبهم .

حسن ابتسم:يعنى مقتنعه .

رغد:جداااا .

حسن وهو بيبص على بناته:طب مين فيهم فيروز ومين داليدا .

رغد شاورت على واحده منهم:دى فيروز حساها هتكون هاديه زى رهف ... والتانيه داليدا .

حسن:تمام .

ــــــــــــ★ـــــــــــــ

تانى يوم رغد رجعت على البيت البطل .

وهدى اصرت انها تفضل معاهم فى الشقه عشان تاخد بالها من رغد والصغيرين .

ومرت الايام ورغد حالتها اتحسنت ... وبدأ الكل فى تحضير لسبوع بنات البطل .

وكالعاده الحاج دبح وراضي اهل الحارة كلهم .

ورغد كانت مخططه لسبوع كبير ورهيب وبالفعل حسن حققلها كل اللى نفسها فيه ... وسبوع بنات البطل الحارة كلها كانت بتحكى عنه وعن جماله .

ــــــــــــ★ـــــــــــــ

فى يوم .

رغد قاعده فى شقتها تلاعب القمرات الصغيرين اللى بقا عندهم سنه .

وداليدا اللى متفاعله مع رغد وبتتضحك وبتتحرك كتير ..... على عكس فيروز اللى هاديه جدااا .

رغد:ايه رايكو نكلم ابو على نجننه شويا .

داليدا هزت ايديها ورجليها بعفويه:با ... با

رغد ضحكت:هتطلعى شريرة لمامى يا قمرايتى .

رغد مسكت فونها ورنت على حسن اللى فى الورشه ورد عليها:فى حاجه يا رغد انتو كويسين ؟

رغد:لا مش كويسين يا حسن داليدا وفيروز تعبانين اوى .

حسن:مالهم يا رغد ؟

رغد:معرفش وخايفه عليهم اوى .

حسن:طب البسي ولبسيهم وانا هجيلك ونروح نكشفلهم .

رغد:حاضر يا حسن .

رغد قفلت وبصت للبنات وضحكت اوى:مانا لازم اجننه مش كفايه مش بنشوفه بسبب شغله .

بعد دقايق قليله الباب اتفتح وحسن دخل الشقه بخوف:رغد .

رغد خرجت من الاوضه وهى شايله فيروز وداليدا بتحبي جمبها وبيضحكو .

حسن اتنهد:طب وليه وقعه القلب دى ؟!

رغد قربت منه وباست خده:وحشتنا يا حسن ... مبقناش نشوفك كتير .

داليدا مسكت رجل حسن ووقفت جمبه وحسن شالها وباسها من خدها:اهلا اهلا بالشقيه .

رغد:طب وفيروز .

حسن باسها من خدها:دى البسكوتايه بتاعتى دى .

رغد:طب وام فيروز .

حسن بغمزة:لا دى قلبي وروحى .... انا عارف انى مقصر معاكو جامد يا رغد ... بس انتى عارفه انى مشغول عشان افتتاح المعرض الجديد .

رغد:عارفه والله يا حبيبي بس غصبن عننا بتوحشنا يا حسن .

حسن:بكرة الجمعه ويوم اللى بنتجمع فيه كلنا وهنقضيه كله سوا .

رغد:بجد احلى حاجه عملها بابا محمود انه بيجمعنا كلنا اليوم ده ... هترجع الورشه تانى ؟!

حسن:لا خلاص بقي حمزة يكمل هو .

رغد:طب خد فيروز عشان اروح اجهز العشا .

حسن اخد فيروز على ايد وداليدا على ايد:حياتى دول .

رغد بحده:لا والله هما حياتك وانا فين ان شاء الله ؟!

حسن:انتى قلبي وروحى يا رغد .

رغد:ايوا كدا .

حسن ضحك وفضل يلاعب البنات لحد ما رغد حضرت العشا واكلو سوا وبعدها نيمو البنات وراحو عشان ينامو .

ــــــــــــ★ـــــــــــــ

صباح تانى يوم .

يوم الجمعه اللى الحاج محمود امر انهم يتجمعو اليوم ده سوا.

فى مطبخ بيت البطل .

هدى ورغد ورهف بيحضرو الفطار .

هدى:كدا الفطار جهز ... حضرو السفره بقا على ما حنين ومؤمن يجو .

رهف:حاضر يا هدهد .

رغد ورهف بداو يخرجو الاكل على السفرة .

ــــــــــــ★ـــــــــــــ

برا فى الصاله كان الحاج محمود وحمزة وحسن قاعدين سوا .

ونوح قاعد بيلعب مع فيروز وداليدا جمبهم .

جرس الباب رن ونوح مشي ناحيه الباب عشان يفتح .

حنين:صباح الفل يا نوح يا قمر انت .

نوح حضن حنين وسلم على مؤمن وشد سليم ولارا من ايدهم ومشو سوا راحو لفيروز وداليدا .

مؤمن دخل:السلام عليكم يا اهل البيت .

الكل:وعليكم السلام .

مؤمن وحنين سلمو على الكل .

هدى باست سليم:ياحبيبي وحشتنى يا حبيب ستك .

سليم باسها من خدها .

حنين:سليم يلا سلم على جدو محمود وخالو حسن وخالو حمزة .... لولى تعالى سلمى على الكل يلا .

لارا سلمت على الكل بحب كبير .

وسليم عمل زى ما حنين قالتله وسلم على الكل .

رغد:يلا عشان نفطر جوعتونا على فكرة .

الكل اتجمعو حولين السفرة وفطرو سوا .

الشباب راحو مع محمود المسجد عشان يصلو صلاه الجمعه .

وهدى والبنات صلو الضهر وبعد كدا دخلو المطبخ عشان يجهزو الغدا .

ــــــــــــ★ـــــــــــــ

الشباب رجعو من الصلاه واتغدو كلهم سوا .... وقضو اليوم مع بعض فى جو عائلى جميل .

حسن بص لمحمود وهدى:انا والشباب والبنات محضرين ليكو مفاجأه .

هدى:خير يا حبيبي ؟

حسن:الحاج والحاجه عايزكو تجهزو نفسكو عشان تسافرو الاسبوع الجاى باذن الله .

محمود:هنسافر فين يا بنى؟

حسن:هتسافرو تعلمو عمرة باذن الله .... ووعد منى انا والشباب السنه الجايه هتطلعو الحج ان شاء الله .

هدى:يا حبايبى يا ولادى ربنا يباركلى فيكو ويحفظكو يارب .

محمود:مش عارف اقولكو ايه يا ولاد ...انا طلعت اكتر من مرة عمرة ومره حج ... بس دى عشانها جايه منكو بالنسبه ليا كبيرة اوى والله .

الشباب والبنات قامو باسو ايد محمود وهدى اللى كانو فخورين بولادهم .

رغد:هننزل ان شاء الله الاسبوع ده انا والبنات نشترى كل حاجه هتحتاجيها يا هدهد .

هدى:ربنا يخليكو ليا يارب .

قضو باقى اليوم سوا وفى نهايه اليوم كل واحد اخد مراته وراح على شقته .

ــــــــــــ★ـــــــــــــ

بعد اسبوع .

الكل متجمعين قدام بيت البطل بيودعو محمود وهدى اللى مسافرين العمرة .

هدى بصت لشباب:خدو بالكو من البنات اياكو تزعلوهم .

مؤمن:احنا نقدر بردو يا ست الكل .

محمود:ربنا يخليكو لبعض يارب .

هدى للبنات:وانتو بطلو هبل شويا واهدو كدا وخدو بالكو من العيال .

رهف ضحكت:اكيد الكلام مش ليا يا هدهد .

هدى:اه يا حبيبتى انتى العاقله اللى فيهم ... ربنا يكملك بعقلك .

حسن:يلا عشان متتاخروش على الطيارة ... مش عارف يا حاج مش عايزنى اوصلكو للمطار ليه .

محمود:ماهو محمد معانا يابنى ... خليكو هنا مع البنات ... يلا فى رعايه الله .

محمود وهدى ركبو العربيه اللى اتحرك وخرجت من الحارة .

والشباب والبنات دخلو البيت مع الاطفال .

حسن:سمعتو هدهد قالت ايه ... اهدو كدا ومش عازين جنان الله يستركو .

مؤمن:بدام رهف معاهم ... متقلقش هى مكان هدهد .

حمزة وقف جمب رهف:والله انا خايفه عليها من القاعده معاهم .

رغد:قصدك ايه يا استاذ حمزة .

حمزة:ولا اى حاجه يا حماتى متاخديش فى بالك .

حسن:بتفرمل لورا فى ثانيه .

حنين:هو حد فينا يقدر على المفتريه دى ... دى قادرة .

رغد خمست فى وشها:الله اكبر فى عينك ... شايف بيقولو عليا ايه يا حسن .

حسن:سيبك منهم يا حبيبتى .

حنين:يا خويا عليك انت وهى .... بتقف مع مراتك قدام اختك .

رغد حضنت حسن:عندك مانع يا ختى ... خلى زوجك يدافع عنك .

مؤمن شد حنين ليه:ولا يهمك يا حبيبتى محدش يقدر يكلمك وانا موجود .

حمزة ضم رهف:يعنى هى جت عليا .

الاطفال كل واحد جرى على مامته .

حمزة شال نوح .

مؤمن حضن لارا وحنين شالت سليم .

حسن شال فيروز ورغد شالت داليدا .

مؤمن:تصدقو شكلنا حلو اوى ... ماتيجو نتصور مع بعض .

رغد:بلبس البيت كدا .

حمزة:وفيها ايه صورة لذكرى .

حنين:صح هتبقي حلوة اوى .

مؤمن طلع فونه ورفع ايده وكلهم ضمو على بعض ومؤمن اخد الصوره وكانت جميله جداا .

صورة لعيله مترابطه بتجمعهم علاقه قويه كلها حب ودفا وامان .... وقدرو يواجهو كل الصعوبات سوا وايدهم فى ايدين بعض ......

بعد مرور اكتر من ٢٠ سنه على حارة البطل واهلها الطيبين .

يوم جديد فى حارة البطل .

تعالو نزور كل واحد من ابطالنا الجداد فى شغله ونتعرف عليهم اكتر .

اول حاجه هنروح لورشه البطل .

بس مش هنلاقى حسن وحمزة زى ما احنا متعودين .

لا هنلاقى نوح ابن حمزة ورهف واللى متولى امور الشغل فى الورشه .

نوح شخصيته نفس شخصيه عمه حسن جدااا .... بس مع بعض التغيرات ... عصبي جدا ... لسانه طويل ومش بيهمه اى حد ..... بيحب فيروز بنت خالته رغد وكتابين كتابهم .

دخل شاب فى العشرينات وخبط على باب مكتب نوح اللى سمحله يدخل .

نوح:تعالى يا على عملت ايه فى تسليم الشغل ؟!

( على ده ابن محمد وفرح وشغال مع نوح ودراعه اليمين )

على:كله تمام يا بطل ... وفى شحنه هتتسلم بليل باذن الله .

نوح:هتروح معاهم يا على لحد ما كل حاجه تتم .

على:اكيد طبعاا ... هروح اشوف الشغل برا .

نوح لسه هيرد عليه سمعو دوشه فى الورشه:ايه اللى بيحصل برا ؟!

على:مش عارف هروح اشوف .

نوح:استنى جاى معاك .

على ونوح خرجو كان اتنين من الشباب اللى بيشتغلو فى الورشه وبيتخانقو سوا .

نوح بصوت عالى خضهم كلهم:ايه التهريج ده ... مشغل عندى شويا عيال .

واحد من الشباب:يا بطل والله هو اللى غلطان ... انت امبارح سلمتنى الشغل ده وهو مصمم يعمله هو .

نوح بص لشاب التانى:هو مين اللى بيمشي الشغل هنا ... انا ولا جنابك ؟

الشاب التانى:انت يا بطل .

نوح بعصبيه:اومال ماشي بدماغ امك انت ليه .... انا سلمته الشغل دخل اهلك ايه فى الحوار .... كل واحد يروح على شغله ويعمل اللى اطلب منه ... ولو حصل شوفت المهزله دى تانى .... اقسم بربي همشيكو وفى ثانيه اجيب غيركو .... غورو من وشي .

الشباب انسحبو من قدامه لانهم عرفين عصبيه نوح البطل .

نوح:ده ايه البلاوى اللى بتتحدف علينا على الصبح دى ... روح يابنى اعملى فنجان قهوة يظبط اللى خربوه المقاطيع دول .

على ضحك:من عيونى يا بطل .

على مشي ونوح دخل مكتبه .

ــــــــــــ★ـــــــــــــ

نروح لشركه الصاوى اللى افتتحها مؤمن من سنين طويله اوى بعد نقل شغله اسكندريه واللى بقت اشهر من النار على العلم .

فى غرفه الاجتماعات قاعد مؤمن على راس التربيزة .

وعلى يمينه ابنه سليم اللى طالع نسخه من مؤمن ومتولى ادارة الشركه ... شخصيته هاديه جدا وبيحب شغله اوى ... كاتب كتابه على داليدا بنت رغد ... وبيحبها جدا رغم اختلاف شخصياتهم .

اما على شمال مؤمن قاعده بسكوتايه عيله البطل فيروز .... قمه فى الرقه والهدوء ... شخصيتها قريبه جدا من خالتها رهف اللى بتعشقها وكانت فرحانه جداا بجوازها من ابنها نوح .... فيروز بتشتغل فى الشركه مع مؤمن وسليم ومتوليه ادارة الحسابات .

كان الكل مركز بانتباه فى الاجتماع اللى استمر اكتر من ساعتين .

الاجتماع واخيرا خلص وكل الموظفين خرجو وفضل مؤمن وسليم وفيروز .

مؤمن:رايكو ايه فى العرض اللى قدمته الشركه دى ؟!

فيروز:بصراحه يا خالو هو عرض مغرى لاى شركه .... الا شركه الصاوى .

سليم ابتسم:نفس كلامى .... احنا ميفرقش معانا عروضهم اللى قدموها ... على قد ما يفرق معانا الجوده .

فيروز:بظبط كدا .... انا من رايى اننا نشوف عينه من شغلهم قبل ما نوقع الاتفاقيه .

سليم:وانا هشوف العينه بنفسي .

مؤمن بصلهم وابتسم:انتو الاتنين ماشاء الله عليكم تفكيركو واحد وبتحبو نفس الشغل وبتتميزو بنفس الهدوء ... وبرغم كل ده ... كل واحد فيكو اختار اللى عكس شخصيته .

سليم:النصيب بقي يا والدى .

مؤمن:ربنا يفرحكو يا ولادى يارب ... فيروز هترجعى مع سليم على الحارة لانى رايح امر على المصنع ؟!

فيروز:تمام يا خالو .

سليم:طب يلا بدام خلصنا شغلنا .

مؤمن:طب يلا بينا .

ــــــــــــ★ـــــــــــــ

نروح بقي لمستشفى النور فى حارة البطل .

المستشفى اللى اتبنت فى الارض الفاضيه اللى فى اخر الحارة .

واللى بتتولى ادارتها داليدا بنت رغد ... اللى حبت تكمل مسيرة مامتها بعد ما قررت تتفرغ للبيت .

داليدا نفس شخصيه مامتها قويه وشرسه جداا ولسانها طوله مترين زى ما بيقولها نوح دايما .

داليدا فى مكتبها وقدامها حاله من المرضي وكان راجل كبير فى السن .

داليدا ووشها فى الورق بتكتب اللى بيقوله المريض:اسم حضرتك ايه؟؟

الراجل:متولى .

داليدا:سن حضرتك ؟؟

متولى:٥٦ سنه .

داليدا:انت بتشتكى من ايه ؟؟

متولى بهيام:قلبي يا دكتورة .

داليدا رفعت راسها وبصتله وقلعت النضاره الطبيه:نعم !!!

متولى:قلبي اللى بيوجعنى .

داليدا سابت القلم:لا مش تخصصى ده يا حاج .. روح لدكتور قلب احسن .

متولى:الحل فى ايدك يا قمر انت.

داليدا خبطت بايدها على المكتب بكل قوتها:ما تتظبط يا راجل انت ... بقولك ايه انت من ساعه ما دخلت وانا مش مستريحالك .... امشي اخرج برا .

متولى:طب اسمعينى بس وانتى هتعرفى ان علاجى فى ايدك يادكتورة .

داليدا:سمعنا اتكلم وخلصنا.

متولى:انا جاى وطالب القرب منك .... وعايز اكمل نص دينى .

داليدا بصتله باستغراب:القرب من مين يا راجل يا معتوه انت .... انت جاى تكمل نص دينك على قفايا انا ... امشي اطلع برااااااا .

باب المكتب اتفتح ودخلت مريم بنت رهف وحمزة الصغيرة .

ودى بقي نسخه من مامتها فى الهدوء والرقه والجمال .... ورهف سميتها على اسم والدتها مريم .... ودى روح باباها حمزة اللى ما بيقدرش يزعلها ابداا .... وبتشتغل دكتورة اطفال فى المستشفى ..... وبتحب الرسم زى مامتها .... مخطوبه لزياد ابن الدكتور محمد .

مريم:فى ايه مالك يا داليدا متعصبه ليه ؟!

داليدا:نادى على الامن يرمو الراجل ده برا.

مريم:طب اهدى ... ممكن حضرتك تتفضل تمشي .

داليدا:مريم يا روحى ... الناس اللى زى دول ما ينفعش معاهم ذوق خالص يا ماما .

واحد من امن المستشفى جه:تامرينا بحاجه يا دكتورة داليدا .

داليدا:خدو الراجل ده خرجوه من المستشفى ومش عايزه اشوفه هنا مرة تانيه .

الامن:حاضر يا دكتورة ... قوم معانا بذوق يلا .

متولى خرج معاهم .

مريم:ممكن تهدى وتفهمينى عمل ايه عصبك كدا .

داليدا:الراجل فاضله يومين ويموت وجاى قال ايه بيقولى طالب القرب منك وعايز اكمل نصي دينى .... الراجل الاهبل شكله مفكر نفسه الحاج متولى وعايزة يتجوز الرابعه .

مريم ضحكت:ليكى حق تتعصبي والله .

داليدا:لو كان فضل دقيقه كمان قدامى كنت كسرت المكتب فوق نفوخه والله العظيم .

مريم:طب اهدى عشان تعرفى تكملى اليوم.

داليدا:يوم ايه يا بنتى ده الساعه ٣ .... وبعدين الراجل ده قفلى اليوم انا همشي .

مريم:طب والحالات اللى برا دول ؟!

داليدا بغمزة:خلى حبيب القلب يكمل مكانى .

مريم ابتسمت .

داليدا:روحى حولى كل الحالات على مكتبه يلا .

مريم:حاضر يا حضرت الدكتورة .

مريم خرجت وداليدا كمان خرجت عشان ترجع على بيت البطل .

ــــــــــــ★ـــــــــــــ

مريم خرجت من مكتب داليدا وراحت خبطت على مكتب دكتور زياد ابن الدكتور محمد واللى هو خطيبها .

زياد دكتور فى المستشفى وبيحب مهنته جداا ... وبيحب مريم وبيغير عليها بطريقه رهيبه حتى من اخوها وابوها ... وشخصيته قريبه من شخصيه نوح اللى يعتبر اقرب صديق ليه هو وسليم .

مريم دخلت لما زياد سمح ليها .

مريم:دكتور زياد ... دكتورة داليدا مشت وطلبت احول كل الحالات على حضرتك .

زياد بصلها وابتسم:مش عارف ليه بتتعاملى بالرسميه دى يا مريم ؟!

مريم ابتسمت:لاننا فى المستشفى .

زياد:الكلام ده لو قدام المرضي والممرضين ... لكن احنا هنا لوحدنا يا مريم .

مريم:مانا بحاول اعود نفسي عشان مغلطتش قدام حد .

زياد قام من على مكتبه وسند على المكتب قدامها:يا ستى اغلطى براحتك ... انا مسامح .

مريم ابتمست:طب ممكن ادخل الحالات بقاا ؟!

زياد:داليدا لما حد يعصبها تسيب الشغل عليا وتمشي .

مريم ضحكت:انت سمعت صوتها ولا ايه ؟!

زياد:صوتها جايب اخر المستشفى اصلا .

مريم:هى داليدا لما بتتعصب مش بتقدر تتحكم فى نفسها .

زياد:ولا فى لسانها وحياتك .. دانا شخصيا بخاف اعصبها .

مريم ضحكت اوى وزياد تاه فى جمالها وجمال ضحكتها .

زياد:بلاش الضحكه دى فى المستشفى عشان ماهدهاش على اللى فيه يا حبيبتى .

مريم:انت مش هتبطل غيرة ابدااا !

زياد بغمزة:ابدا يا روحى .

مريم وشها احمر من الكسوف وخرجت بسرعه:عن اذنك .

زياد ضحك عليها وبدأ يستقبل الحالات .

ــــــــــــ★ـــــــــــــ

اما بقا اكبر حفيده فيهم وهى لارا .

اللى عاشت قصه حب ... انتهت بالزواج من الدكتور عامر اللى كان دكتورها فى كليه الهندسه .

وخلفت ولد زى القمر اسمه يزن .

لارا اتجوزت وهى الوحيده اللى اتجوزت برا حارة البطل ... بس من شهرين وهى عايشه فى بيت الشهاوى لان جوزها المهندس عامر كان عنده مؤتمر كبير فى دبي وسافر عشان يحضره .

لارا كانت بتلعب مع ابنها يزن .

وحنين قاعدت جمبهم يزن حدفلها الكورة:نونا يلا نلعب .

حنين:يلا يا روح قلب نونا انت .

وفضلو يلعبو كتير سوا .

حنين:عامر مقالش هيجى امته يا لولى ؟

لارا:لسه اسبوع يا ماما .

حنين:يجى بسلامه يا قلبي .

لارا:يارب .. بجد وحشنا اوى ... انا مستحيل اسيبه يسافر مرة تانيه .

حنين ضحكت:يا بت اهمدى ... انتى واقعه فى حبه من الدور العاشر كدا ليه !!

لارا بغمزة:زى مانتى واقعه فى حب الحاج يا حاجه .

حنين:ماشي نشوف الحوار ده لما مؤمن وسليم يرجعو .

يزن قرب من حنين:جدو .

حنين:اه ياروحى جدو زمانه جاى ... قال هيمر على المصنع ويجى على البيت .... تيجى نلعب على ما يجى جدو وخالو .

يزن فرح وراح جاب الكورة وبدأ يلعب تاتى مع حنين .

ــــــــــــ★ـــــــــــــ

فى بيت البطل وتحديدا فى المطبخ فى الشقه اللى فى الدور الارضي .

رغد ورهف بيجهزو الاكل فى المطبخ .

رغد قعدت على الكرسي بتعب:ااااه يانى ياما ... انا كان مالى بشغل البيت ... كنت خليتنى فى المستشفى احسن .

رهف ضحكت:هو حد غصب عليكى انتى اللى صممتى .

رغد:على رايك .... تعالى نرتاح شويا بقاا على ما يجو من شغلهم .

رهف:تشربي قهوة معايا ؟

رغد:ياريت والله .... يالهوى .

رهف بصتلها:مالك ؟

رغد:ده بكرة الجمعه .... اليوم ده بيبقي متعب بشكل .

رهف ضحكت:بس كفايه لمتنا احنا والولاد بجد انت بستنى اليوم ده بفارغ الصبر .

رغد:ربنا يرحمهم بابا محمود وهدهد هما اللى كانو بيجمعونا كل جمعه.

رهف:يارب .... بجد وحشونى اوى .

رغد:ربنا يرحمهم ويرحم بابا وماما يا رهف .

رهف:يارب .

رغد:صح ... اسراء كلمتنى النهارده الصبح .

رهف:بجد ... وهى عامله ايه ؟

رغد:كويسه الحمدلله وفرحانه ان مرات ابنها حامل .

رهف:ربنا يكملها على خير ... مع انى مش مصدقه ان اسراء المجنونه هتبقي تيتا .... مش ناوين يرجعو بقا بجد وحشتينى .

رغد:هى ماصدقت تسافر انجلترا عشان تبقي مع ابنها ... واشرف كمان اسس شركه هناك ومعتقدش يرجعو غير زيارات .

رهف:ومراد مش ناوى ينقل شغله هنا تانى .

رغد:هو عبيط عشان يسيب شرم ويجى هنا بردو .

رهف ضحكت وجابت القهوة وقعدو يشربوها سوا .

ــــــــــــ★ـــــــــــــ

داليدا لسه هتدخل بيت البطل ... شافت حسن وحمزة داخلين المعرض .

(المعرض اللى حسن افتتحه فى بيت اللى اشتراه من المعلم منصور وبقي الدور الارضي والتانى معرض والدور التالت شقه نوح اللى هيتجوز فيها )

داليدا ابتسمت وراحت تشوفهم .

داليدا دخلت المعرض وخبطت على باب المكتب ودخلت لما سمعت صوت حسن بيأذن لها .

داليدا:مسا مسا عالناس الكويسه .

حسن وحمزة ابتسمو لانهم بيحبو جنان وشقاوة داليدا .

داليدا قربت من عمها حمزه وحضنته:عامل ايه يا عمو ؟

حمزة باس راسها:بخير يا قلب عمك .

داليدا قربت من حسن:قلب القلب اللى وحشنى موت موت .

حسن ابتسم على شقاوة داليدا اللى بتفكره برغد وكل حركاتها حسن حضنها وباس راسها:عامله ايه يا حبيبتى ؟

داليدا:انا فل الفل يا ابو على .... مش هنمشي بقي ولا ايه ... انا جعانه .

حمزة:ورانا شويا حاجات وهنرجع على البيت .

فى الوقت ده دخل سليم ومعاه فيروز .

سليم:السلام عليكم .

الكل:وعليكم السلام .

فيروز جرت على حسن وحضنته:عامل ايه يا حبيبي ؟

حسن:بخير يا بسكوتى .

حسن:اخبارك ايه يا سليم ؟

سليم:بخير يا خالو الحمدلله .

حمزة:اومال فين مؤمن ؟

سليم:راح يمر على المصنع وجاى .

حسن وحمزة انشغلو فى الكلام مع فيروز .

سليم قرب من داليدا:الجميل عامل ايه ؟

داليدا:انا ميت فل وعشرة يا سمسم .

سليم بصلها بغيظ:داليدا بلاش تضايقينى ايه سمسم دى !

داليدا:حاضر يا سليم باشا ... حلو كدا ؟

فيروز:يلا نرجع على البيت يا دودو .

داليدا:يلا يا روح دودو .

البنات خرجو وسليم فضل مع اخواله

ــــــــــــ★ـــــــــــــ

داليدا وفيروز راجعين على البيت سمعو صوت نوح متعصب .

داليدا:هو جوزك ده علطول متعصب كدا ؟!

فيروز ضحكت .

داليدا:تعالى نروحله .

فيروز:لا نروح فين انتى عبيطه بابا هيزعل مننا عشان دخلنا الورشه ... ونوح كمان هيضايق بلاش .

داليدا شدت فيروز من ايدها ومشت ناحيه الورشه:تعالى بس .

فيروز وقفت على باب الورشه:هو انت دايما نرفوز كدا يا عم الحاج .

(نوح وداليدا زى الاخوات وقريبين جدا من بعض )

نوح لف وشافهم واقفين على باب الورشه زعق لكل الشباب:كل واحد يروح يشوف شغله يلا ... وانتو تعالو على المكتب .

فيروز بصت لداليدا:قولتلك هيضايق .

داليدا:ياختى امشي بقي .

فيروز وداليدا دخلو المكتب ورا نوح اللى قعد على كرسي مكتبه:عايزة ايه يا اخرة صبرى ؟

داليدا:ولا اى حاجه يا خويا ... انا كنت ماشيه فى امان الله سمعتك بتزعق .... مين اللى مضايقك اوى كدا ؟

نوح:عالم مش بتفهم هنقول ايه بقي يا حضرت الدكتورة .

داليدا:طب هدى اعصابك يا باشا .

نوح ضحك:انتو راحين فين كدا ؟!

داليدا:راجعين على البيت يا معلم .

نوح عينه على فيروز اللى ساكته من وقت ما دخلت .

داليدا لاحظت نظراته:انا نسيت حاجه مهمه فى المستشفى هروح اجيبها وارجع البيت يا روزة .

فيروز:طب هاجى معاكى .

داليدا:لا خليكى وارجعى مع نوح ... يلا سلام

نوح ابتسم لانه فاهم داليدا وانها قاصده تمشي وتسيب فيروز معاه.

نوح بصلها اوى:فيروز مش انا قولتلك بلاش تيجى الورشه هنا .

فيروز:داليدا اللى اصرت وانت عارفها .

نوح:طب اقعدى يا فيروز ... الشباب تمشي وهنرجع على البيت سوا .

فيروز قعدت على الكرسي وبصتله:انت كويس؟

نوح:زى الفل بدام شايف حبيبه قلبي قدامى .

فيروز ابتسمت بكسوف .

نوح:فيروز انتى هتفضلى تتكسفى منى لحد امته يا حبيبتى ده فاضل شهر على فرحنا .

فيروز:ممكن نمشي بقي يا نوح .

نوح بعمزة:روح وقلب نوح من جوا .

فيروز ابتسمت .

نوح:ضحكت يبقي قلبها مال .

ــــــــــــ★ـــــــــــــ

بعد وقت طويل .

الكل رجعو على البيت ومتجمعين حولين السفرة .

رغد:واخبار المستشفى ايه يا داليدا ؟

داليدا وهى بتاكل:كله تمام يا دودو لا تقلقي .

نوح ضحك:يبقي لازم تقلقى بعد الجمله دى .

رغد:ونبي خفى وبلاش مشاكل يا داليدا .

داليدا:هو انا بتاعه مشاكل بردو يا ست الكل تعرفى عنى كدا !!

نوح:تعرف عنك ام كدا يا دودو .

داليدا بصتله بغيظ:شايفه ابنك يا خالتو .

رهف:بلاش تضايقها يا نوح .

حمزة:طب انتى سيبتى المستشفى النهارده بدرى ليه ؟

داليدا:ولا حاجه .... راجل معتوه رجله والقبر .... وجاى يقولى طالب القرب منك .

نوح:وطبعا انتى هبيتى فيه زى البابور.

مريم:هو بس كدا ... دى فرجت المستشفى كلها عليه وخليت الامن مشاه

داليدا:راجل رخم قفلى اليوم كله .

رغد ضحكت:جدعه يا بت يا داليدا خليكى زى مامتك مش بتسكت لحد .

حسن:لا والله .

رغد:اومال يعنى ترد عليه تقوله ايه ده يا حسن .

داليدا:يعنى انت يا ابو على لو شوفت واحد بيقول لبنتك قلبه بيوجعه والعلاج فى ايدها هتعمل فيه ايه ؟

حسن:كنت كسرت وشه.

داليدا:طب اهو انا اكتفيت برميه برا المستشفى .

رغد:وانتى يا مريومه اخبار كتاكيتك ايه؟

مريم:الحمدلله يا خالتو .

رهف:وحبيبه خالتها عامله ايه يا الشغل ؟

فيروز:الحمدلله يا خالتو ... والفضل يرجع لخالو وسليم هما اللى ماشيين معايا .

رهف:ربنا يوفقكو يا بنات يارب .

نوح:وانا سقطت منك يا ست الكل ولا ايه ؟

رغد ضحكت:انت حبيب خالتك محدش يدعيلك غيرى .

نوح:قلبى يا ناس .... طب حننى قلب ابو على بقي عايز اتجوز .

حسن بصلها برفعه حاجب:بتقول حاجه يا نوح .

نوح:بقول عايز اتجوز يا عمى .

حسن:ماحنا قولنا بعد شهر .

نوح:كتير يا عمى اوى الصراحه .

حمزة ضحك:طب اسكت بدل ما يضاعف الشهر .

حسن:اسمع من ابوك .

نوح:الطيب احسن .

كلهم اكلو سوا وبعدها كل واحد طلع شقته مع مراته وعياله .

ــــــــــــ★ـــــــــــــ

فى بيت الشهاوى .

مؤمن وعيلته قاعدين مع بعض بياكلو وبيتكلمو سوا .

سليم اللى بيلاعب يزن .

مؤمن:وعامر هيجى امته يا حبيبتى .

لارا:كمان اسبوع يا بابا .

مؤمن:يجى بسلامه يارب .

لارا:يارب بقا يا بابا .

سليم:شكلك زهقتى مننا ولا ايه يا لولا .

لارا:لا ابدا والله ... بس البيت وحشنى اوى مش متعوده ابعد عنه .

حنين بغمزة:البيت بردو ولا صاحب البيت .

لارا ضحكت وكلمو اكل .

مؤمن:طب يلا كله ينام عشان نصحى من بدرى نروح بيت البطل .

لارا:واخيرا يوم الجمعه اللى بستناه .

ــــــــــــ★ـــــــــــــ

تانى يوم .

الكل متجمعين فى بيت البطل ... الرجاله والشباب صلو صلاه الجمعه مع بعض فى المسجد ورجعو على بيت البطل .

البنات كلهم صلو فى البيت سوا .

رهف ورغد وحنين بيجهزو الاكل فى المطبخ .

البنات قاعدين يهزرو ويضحكو ويلاعبو يزن ابن لارا .

والشباب قاعدين سوا ومعاهم زياد خطيب مريم .

ــــــــــــ★ـــــــــــــ

عند البنات اللى كانو بيضحكو على داليدا واللى عملته فى الراجل العجوز .

لارا:عمرك ما هتتغيرى يا داليدا .

داليدا:طبعا يا بيبي .

فيروز:اوعى تعملى زيها يا مريم .... الاطفال هتخاف منك .

مريم:دانا شخصيا والله بخاف منها لما بشوفها بتتحول .

البنات ضحكو .

داليدا:شيفانى زومبي يا دكتورة مريم ... يلا يا شويا مقاطيع انا ماشيه .

لارا:استنى يابت راحه فين ؟

داليدا خرجت لحسن:يرضيك يا ابو على المقاطيع اللى جوا دول بيقولو عليا بتحول .

حسن بص على البنات اللى بيضحكو .

مؤمن:اكيد عملتى فيهم حاجه يا داليدا .

داليدا قعدت جمب مؤمن:وحيات عيونك الحلوين دول يا مؤ ماعملت فيهم حاجه ... انتو دايما كدا ظالمينى .

نوح:لا وانتى بريئه اوى يا بت .

حمزة بص للبنات:بتزعلو الشقيه بتاعتنا ليه ؟

مريم:والله بابا انا قولت الحق ... ماهى صحيح لما بتتعصب كأنها بتتحول وهتاكل المرضي .

زياد ضحك:والله معاها حق ... ده صوتها كان جايب اخر دور فى المستشفى امبارح .

كلهم ضحكو وداليدا اتغاظت منهم .

واتغدو كلهم سوا .

والبنات طلعو السطح مع الشباب .

ــــــــــــ★ـــــــــــــ

على السطح كل واحد من الشباب قاعد مع حبيبته فى ناحيه لوحدهم .

عند مريم وزياد .

زياد:واخيرا عمى وافق عشان نكتب الكتاب ... وفرحنا هيكون مع نوح وسليم .

مريم ابتسمت بخجل .

زياد مسك ايدها:واخيرا هتكونى حرم الدكتور زياد .

مريم:ربنا يخليك ليا يا زياد .

زياد:ويخليكى ليا يا روح زياد .

ــــــــــــ★ـــــــــــــ

عند سليم وداليدا .

سليم:يا داليدا يا حبيبتى انتى مديرة المستشفى ... المفروض تمنعى المشاكل مش تعمليهم .

داليدا:يوووه يا سليم الراجل عصبنى والله .

سليم:تقومى تفضحيه قدام المستشفى كلها يا حبيبتى .

داليدا:عشان يحرم يلعب معايا ... مفكر نفسه الحاج متولى وهيتجوزنى .

سليم ضحك:اقسم بالله بعشق جنانك ده .

داليدا:وانا بعشقك يا سليم .... وعارفه انك بتضايق لما بعمل مشاكل ... بس هما اللى بيعصبونى .

سليم:امته الشهر ده يعدى عشان تبقي معايا وفى بيتى .

داليدا:قرب يا حبيبي ان شاء الله .

ــــــــــــ★ـــــــــــــ

لارا كانت بتكلم عامر مكالمه فيديو هى ويزن .

لارا:طب ماهو المؤتمر خلص خلاص ... ماتيجى بقا يا عامر .

عامر:يا حبيبه قلب عامر فى شويا حاجات هخلصهم واجى ... وهفضل معاكى وهتزهقى منى .

لارا:عمرى ما ازهق منك يا حبيبي .

يزن:بابا .

عامر:روح بابا يا زيزو .... حبيبتى انا لازم اقفل وهكلمك وقت تانى .

لارا:حاضر يا حبيبي .

عامر:خدى بالك من نفسك ومن يزن .

لارا:حاضر يا عامر .

ــــــــــــ★ـــــــــــــ

عند نوح وفيروز .

نوح:يا فيروز طب قولى اى كلمه يا بنتى ... اومال لو ماكنتش ابن عمك ومع بعض فى نفس البيت من وقت ما اتولدتى يا فيروز .

فيروز:انا نازله يا نوح .

فيروز نزلت ونوح راح وراها ومسك ايدها وحجزها بينه وبين الحيطه:نازله فين يا روح نوح !

فيروز:عيب يا نوح ... ابعد ممكن اى حد يجى .

نوح:ما اللى يجى يجى يا قلب نوح ... دانتى مراتى .

فيروز:نوح عشان خاطرى ابعد بقي .

نوح:طب قوليها تانى.

فيروز:اقول ايه؟

نوح:بحبك ... مسمعتهاش منك غير مرة واحده يوم كتب الكتاب .

فيروز وشها احمر:يا نوح بقاا .

نوح:وحياه رهف امى وخالتك ما هابعد غير ما تقوليها .

فيروز:طب ابعد شويا وانا هقولها .

نوح:عبيط انا عشان تهربي منى زى المرة اللى فاتت .

فيروز بهمس خفيف:بحبك .

نوح:قولتى ايه ماسمعتش حاجه يا روح نوح .

فيروز:يا نوح بقااا .

نوح قرب ودنه منها:قولى يلا سامعك .

فيروز:بحبك يا نوح .

نوح بصلها وابتسم:وانا بعشقك يا روح نوح .

فيروز بعدت بسرعه عن نوح لما سمعو صوت حمزة:انت بتعمل ايه هنا ياض ؟!

نوح بصله:بذمتك ده وقته يا حاج .

حمزة:رد على سؤالى يا حيوان انت .

نوح:كنت هحضن مراتى يا حاج .

فيروز ضربته فى كتفه:عيب كدا .

حمزة:والله شكلى انا وامك قصرنا فى تربيتك ... ايه قله الادب دى ياض .

نوح:انت والحاجه عملتو اللى عليكو يا حاج وزياده ... اما قله ادبي دى ده مجهودى الشخصي .

حمزة:تعالى يا فيروز انزلى معايا وسيبى الحيوان ده واقف هنا .

فيروز ضحكت ونزلت مع حمزة .

نوح:اهربي يا روزة ليكى يوم يا قطه .

سليم:انت بتكلم نفسك يا نوح .

زياد:يخربيت الحب وسنينه يا عم .

نوح:لو ناوين تستلمونى .... افتكرو انى نوح البطل وهاخد حقى .

سليم بص لزياد:الواد ده ايده تقيله وهزاره رخم .

زياد:عندك حق والله يلا ننزل .

الشباب والبنات نزلو وقضو اليوم كله سوا فى جو جميل وضحكو وهزرو واليوم كان حلو جدا كالعاده .

ــــــــــــ★ـــــــــــــ

بعد اسبوع .

لارا واقفه فى البلكونه بتستنى عامر اللى هيوصل فى اى لحظه .

لارا شافت عربيته داخله الحارة وهو نازل منها وسلم على حسن وحمزة ونوح .

ودخل بيت الشهاوى .

لارا خرجت من الشقه بسرعه وجرت على عامر ودخلت جوا حضنه .

عامر حضنها بقوة لدرجه انها ماكنتش لامسه الارض .

عامر نزلها على الارض:عامله ايه يا حبيبتى ؟

لارا:اكيد مش كويسه وانت مش معايا يا عامر .

عامر باسها من راسها:قلب عامر من جوا ... اومال فين يزن ؟

لارا:فوق مع ماما.

عامر:طب تعالى نطلع نسلم عليها عشان نرجع بيتنا.

لارا:لا النهارده هنفضل هنا نتغدى معاهم وعشان تشوف بابا وسليم ونروح بليل .

عامر:حاضر يا حبيبتى .

لارا:طب تعالى نطلع يلا .

عامر طلع مع لارا وسلم على حنين ويزن لما شافه فرح جدااا .

وبعد وقت طويل مؤمن وسليم رجعو على البيت واتغدو كلهم سوا وبعدها لارا ويزن رجعت على بيتهم مع عامر .

ــــــــــــ★ـــــــــــــ

مرت الايام والاسابيع .

واخيرا جه يوم فرح الشباب والبنات .

اللى كان فى قاعه فى فندق فى اسكندريه .

البنات كانو قمرات فى فساتينهم البيضا .

ولارا لبست فستان بسيط وكانت جميله .

يزن وعامر كانو لابسين بدل بلون الرمادى وكانو حلوين اوى .

العرسان ببدلهم اللى بلون الاسود مع قميص ابيض وببيون اسود .

رغد ورهف وحنين اللى لبسو فساتين بلون الاسود زى حسن وحمزة ومؤمن اللى لبسو بدل بلون الاسود .

الفرح كان جميل والكل كان فرحان .

الشباب والبنات هيصو ورقصو واتجننو والفرح كان فرح على حق .

رغد كانت واقفه فى حضن حسن وعينهم على البنات والشباب اللى فرحانين من قلبهم .

رغد:مش مصدقه انهم كبرو والنهارده شيفاهم احلى عرايس .

حسن:ولا انا مصدق انهم هيبعدو عنى .

رغد:يبعدو ايه يا حسن الفرق بينا بينهم خطوات بسيطه .... داليدا فى بيت الشهاوى .... وفيروز فى البيت اللى قدامه يعنى جمبنا .

حسن:ودى احلى حاجه .

رغد:وبعدين مش كفايه انى معاك وفى حضنك يا بطل .

حسن باس راسها:ربنا يخليكى ليا يا قلب البطل .

رغد:ويخليك ليا يا ابو على ...