رواية حب عفوي الفصل السابع 7 - بقلم سامية احمد

(الباب خبط والخدامه فتحت) ناصر: تعالي يا حبيبتي، دي احنا مستانيينك. ريماس: أنا آسفة يا جدو، الطريق كان زحمة. صفاء: اقعدي يا بنتي، واقفة ليه؟ (قعدت ريماس) *بعد الفطار* ناصر بضحك: خلاص مش قادر، دي انتي طلعتي دمك خفيف بشكل. عصام: عندك حق والله يا بابا. ريماس بمرح: هو انتوا لسه شوفتوا حاجة. أدهم: طيب أنا ماشي على الشركة بقى، يا بابا عايز حاجة؟ ناصر: لأ مش عايز حاجة.

أميرة: طيب خدني في طريقك، هروح النادي لأني مش قادرة أستحمل الجو هنا خالص. (مشيت أميرة وأدهم) ريماس: طيب أستأذن أنا بقى عشان أروح أشوف ماما وأديها العلاج. صفاء: ابقي سلميلي عليها، دي إحنا خلاص بقينا أهل. ريماس بحرج: أكيد يا طنط. *عند نور* نور: آه آه براحة شوية، أنت إيه بتدي حيطة وش محارة. لؤي: لسانك هيفضل طول عمره طويل. نور: بس ياض. لؤي: ياض طيب خدي بقى كملي انتي. (أدى لؤي لنور المرهم ومشي وسابها)

نور بغباء: هو زعل ليه؟ *عند ريماس* ريماس: ماما. هناء: إيه يا آخرة صبري؟ ريماس: بحبك. هناء: عايزة إيه؟ مش عوايدك يعني. ريماس بحب وهي بتحضن أمها: إيه يا ماما، قريب هتجوز وهمشي من هنا، فهتوحشيني. هناء وهي تشدد على الحضن: وإنتي والله يا ماسة هتوحشيني قوي، وهيوهشني جنانك. ريماس بزعل مصطنع: بقي أنا مجنونة يا ست ماما؟ طيب شكراً قوي كده. (دخلت ريماس غرفتها)

هناء: يا بنت المجانين، الله يكون في عون العريس، دي أمه داعية عليه عشان يبتلي بيكي إنتي. *عند فارس* كان فارس في اجتماع والتليفون كان بيرن كتير، بس فارس ماكنش مديله اهتمام. مجهول: باين التليفون مهم، رد يا أستاذ فارس وبعدين نكمل شغل، وبالمرة ناخد راحة، إحنا بقالنا ساعتين على الحال ده. فارس: تمام. خد فارس التليفون وراح عند الشباك. فارس: الو، عايزة إيه؟ ريماس: تؤتؤ، في حد يكلم خطيبة كده واللي هتبقى قريب مراته؟

فارس: اخلصي، مش فاضيلك، عندي اجتماع مهم. ريماس ببراءة مصطنعة: حبيت أطمن عليك. فارس برفعة حاجب: بقي كده؟ ريماس: آه يا قوة عيني إنت. فارس: بصي بقولك إيه، أنا ماليش في الهبل ده. ريماس: بقي كده يا حبيبي. فارس: حبك برص يا زفتة إنتي، إنتي باين عليكي ماكنتيش لاقية حد يعبرك يا عانس إنتي. ريماس: بقي اسمع...

فارس بمقاطعة: اسمعي إنتي، أنا هتجوزك مش عشان خاطر سواد عيونك، أنا هتجوزك عشان إنتي خلاص دخلتي جحيم حفيد إبليس ولازم أربيكي عشان تتعلمي تتكلمي معايا تاني إزاي. (قفل فارس التليفون في وش ريماس) *عند أميرة وأدهم* أدهم: عندي خبر حلو قوي. أميرة: والنبي سيبني دلوقتي، أحسن مش طايقة نفسي. أدهم: ليه بس؟ أميرة: البت الجربوعة اللي جابها فارس دي هتاخد كل حاجة، خصوصاً إن زي ما بتقول أبوك عايز يكتب كل حاجة باسم فارس.

أدهم: ماهو دي الموضوع اللي عايزك فيه. أميرة: قول بقى. أدهم: …… أميرة: الله على دماغك يا دومي، إيه ده كله؟ أدهم: أمال. أميرة: ماتعرفش مرات ابنك اتأخرت في السفر كده ليه؟ أدهم: سيف قالي إنها هتيجي النهارده. أميرة: طيب. *عند لؤي* سوزي: يا لؤي كده كتير بجد. لؤي: طيب أنا أعمل إيه بس يا حبيبتي؟ سوزي: اتصرف، إحنا مرتبطين بقالنا سنتين، لازم إننا نتخطب بقى. لؤي: هانت يا روحي، كلها شوية وفارس يتجوز.

سوزي بزعل مصطنع: طيب فين الهدية بقى؟ لؤي بعدم فهم: هدية إيه؟ سوزي: بتاعت الفيلا الجديدة اللي نقلت فيها. لؤي: بكرة يا ست البنات هتوصلك على الفيلا الجديدة. سوزي: هستنى. لؤي: بحبك. سوزي بدلع: أكتر يا قلب سوزي. *في شركة فارس* في مكتب فارس. محمود: بحبها. فارس: بقولك إيه، قوم شوف شغلك وبطل المياعة دي. محمود: يا بني أنت ماعندكش إحساس خالص. فارس ببرود وتكبر: تؤ. محمود: يعني إنت عمرك ما حبيت؟

فارس: بص يا محمود عشان أكون خلصت ضميري، عايز أقولك يا بني إن الحب ضعف، وأصلاً الحب ده للناس التافهة اللي ماعندهاش حاجة تعملها. محمود: طيب وريماس؟ فارس: مالها؟ محمود: هتتجوزها ليه؟ فارس: أوعى أكون فاكر إني ممكن هتجوز ريماس عشان جمالها أو عشان حب أو كلام فاضي من ده. محمود بخبث: يعني ريماس جميلة؟ فارس بإندفاع: جداً. محمود بضحك: يخرب بيتك. فارس بعد ما فهم اللي قاله: قاصدي إنها عادية يعني. محمود: اممم، أومال اتجوزتها ليه؟

فارس: لسه هتجوزها، وليه بقى؟ فدي عشان أعلمها إزاي تتكلم مع حفيد إبليس. (موبايل فارس بعت رسايل كتير، مسك فارس الموبايل) فارس: إيه دي؟ محمود: في إيه يا بني؟ فارس: ها، لا مافيش حاجة، روح شوف شغلك إنت. محمود: في إيه يا فارس؟ فارس بصوت عالي: اخرج دلوقتي من وشي يا محمود. محمود: مش ممكن أسيبك في الحالة دي، في إيه في الموبايل؟ فارس وقد وصل إلى أعلى حد من العصبية: خلاص هغور أنا. *عند ريماس*

ريماس: نورت والله يا بني، مابتجيش ليه؟ ماجد (ابن خالة ريماس) : مشاغل والله يا ماسة. أومال فين طنط؟ من ساعة ما جيت وهي مش موجودة. ريماس: ماما نزلت تجيب شوية طلبات وزمانها جاية. ماجد: وإنتي عاملة إيه؟ ريماس: بخير والله يا مجاميجو. ماجد بضحك: إنتي لسه فاكرة الاسم ده؟ ريماس: طبعاً يا بني. ماجد: مافيش حاجة كده ولا كده؟ ريماس: بص هقولك على حاجة بس أوعى تجيب سيرة لماما. ماجد بقلق: وأنا من إمتى بقول حاجة لطنط؟ انطقي بقى.

ريماس: ... (ريماس حكت لماجد كل حاجة من أول ما قابلت فارس) ماجد: ليه كده يا ماسة؟ تعملي كده؟ ريماس: يعني كنت عايزني أعمل إيه؟ إنت لو بتشوف بيعامل أهله إزاي. ماجد: هو في حد كده؟ (الباب خبط وقامت ريماس تفتحه) ريماس بصدمة: فارس! فارس: مالك؟ ارتبكتي كده ليه؟ ريماس: لا، مافيش حاجة. فارس بشك: إنتي مش هتدخليني ولا إيه؟ ريماس: ها. (دخل فارس من غير ما يسمع ريماس) فارس بسخرية: حتى بيتك ما اعتقهوش.

ريماس بعدم فهم: قصدك إيه يا بني آدم إنت؟ وإيه أصلاً اللي جابك هنا؟ فارس بسخرية واستحقار: دي بدل ما تشكريني إني جيت عشان أحاسب على المشاريب. ماجد: عيب كده يا بني آدم إنت. فارس: وإنت بقى زبون قديم ولا مستجد؟ ريماس بصدمة: إنت بتقول إيه؟ إنت اتجننت؟ فارس: تعالي معايا. ريماس: إنت واحد مجنون، أنا مش ممكن أروح معاك في حتة. فارس: طيب ماتلومينيش بقى. (شال فارس ريماس ومشي بيها)

ماجد وهو بيجري وراه: إنت يا بني إنت. ولكن ملحقهوش لأن فارس مشي بالعربية. *في القصر* أميرة: أخيراً جيتي، ما كنتي خليكي شوية. ميادة (مرات سيف) : معلش يا طنط، بس الجو هناك كان تحفة. أميرة: طيب. ناصر: إيه يا ميادة بقالكم 3 سنين متجوزين مش ناوين تخلفوا بقى ولا إيه؟ سيف: قوليها يا جدو. ميادة: أنا لسه صغيرة وعايزة أعيش شبابي يا جدو. ناصر: يا بنتي هاتي العيال وإنتي صغيرة عشان يبقى فيكي حيل تربيهم.

ميادة: معلش يا جدو، سيبني على راحتي. ناصر: براحتك يا بنتي. نور: ميادة، ماتعرفيش اللي حصل؟ ميادة: لا، إيه اللي حصل؟ نور بفرح: فارس هيتجوز. ميادة بزعل ودموع مكتومة: مبروك يا طنط. صفاء: الله يبارك فيكي يا قمر. ميادة: طيب أنا هطلع أرتاح شوية بقى. (طلعت ميادة) ناصر: هو فين لؤي يا صفاء؟ صفاء: مش عارفة والله يا عم. لؤي: سامع حد بيجيب في سيرتي. نور: يا ريتنا جبنا سيرة مليون جنيه. لؤي وهو بيقرب

من نور وباصص في عينيها: بقي بزمتك أنا مش أحسن من المليون جنيه؟ نور: ها. ناصر بضحك: خلاص بقى يا لؤي، ابعد عنها. لؤي وهو بيبعد عن نور: حاضر يا جدو. نور: أنا طالعة أوضتي. صفاء: إنت مش هتبطل تضايق بنت عمك؟ لؤي: تؤ. ناصر: كنت فين من الصبح؟ لؤي: كنت عند حبيبتي سوزي. صفاء: حبك برص يا بعيد، مالها بنت عمك ماهي قمر أهي، أنا مش عارفة بس إيه اللي عجبك في الرفعة بتاعتك دي؟

لؤي: اسمها سوزي مش زفتة، وبعدين بنت عمي دي مش بنت أساساً، إنتي مش بتشوفي لبساها ولا النضارة الكعب كوباية. ناصر: اتريق اتريق يا فاشل، إنت أصلاً تطولها؟ لؤي: يا جدو أنا عمري ما شفتها لابسة فستان زي البنات. صفاء: مش كل البنات لازم تلبس فساتين. لؤي: إنتوا الاتنين بتحبوها ومش هتطلعوها وحشة، يبقى أمشي أنا بقى. صفاء: في داهية. *عند فارس في العربية* ريماس: في إيه؟ إنتي خاطفني مثلاً. ريماس: يا بني إنت رد عليا.

ريماس: طيب نزلني بقى بدل ما أرمي نفسي. فارس: اعمليها كده لو جدعة. ريماس: إحنا رايحين فين يعني؟ فارس ببرود: عند المأذون. ريماس بخوف: ليه؟ فارس بسخرية: عشان أحاسب على المشاريب. ريماس: أنا أصلاً استحالة أتجوزك. فارس: ما هو مش بمزاجك. ريماس: طيب ابقي شوف مين بقى اللي هيمضي على عقد الجواز بدالي عشان أنا مش همضي. فارس: أنا ماقلتلكيش. ريماس: لا تقولي إيه؟ فارس: ما هو لو متجوزتنيش ماما كده ممكن يحصلها حاجة، أقدر الله يعني.

ريماس بعياط: مالكش دعوة بماما، أنا بقولك أهو. فارس: يبقى ابقي شطورة وتسمعي الكلام كده. ريماس: أنا عملتلك إيه عشان أعمل معاك كده؟ فارس بسخرية: إنتي واحدة مش متربية خالص وأنا حطيتك في دماغي قوي. ريماس: أنا مجنونة، أنا عملتلك إيه عشان تقول عليا كده؟ فارس: اخرسي وما أسمعش صوتك لآخر الطريق. *عند أميرة* أميرة بضحك: بجد برافو عليك يا أدهم، بعد الصور اللي بعتهالو دي استحالة يفكر إنه يتجاوزها أو يبص في وشها حتى.

أدهم: ربنا يقدرنا على فعل الخير. أميرة: إنت إزاي أصلاً جبت الصور دي؟ أدهم: جبت واحد من الهكر، هكرلها موبايلها وخد من عليها صور شخصية ليها، وبعد كده خليت واحد بتاع فوتوشوب يركبهم لي بطريقة احترافية ومش باينة إنها متركبة. أميرة بتصفيق: بوابو بجد على دماغك دي. أميرة: تعرف يا أدهم إن مرات ابنك لسه بتحب فارس؟ أدهم: عرفتي إزاي؟ أميرة: أول ما عرفت إنه هيتجوز، طلعت على أوضتها وكانت زعلانة قوي وعنيها مدمعة.

أدهم: أوعى يعرف ابنك حاجة من دول. أميرة: استحالة أقوله حاجة، هو لو كان عارف إنها حتى بتحب فارس من زمان كان زمانه موتها. أدهم: طيب. *عند ميادة في الأوضة* ميادة بعياط: بقي كده يا فارس، أو تعرف قد إيه أنا بحبك وعمري ما حبيت سيف ولا حتى طيقته، دي أنا متجوزاه عشان أبقى قريبة منك. ميادة وهي بتمسح دموعها: بس والله ما ههنيها عليك ولا ههانيك. *عند هيام* هيام: لا إنت بجد واحد زبالة، بتخوني أنا يا كريم بعد كل اللي عملته عشانك؟

كريم: عملتي إيه؟ دي إنتي واحدة نكدية، كل ما أشوف وشي تكلميني في موضوع الشقة والفلوس. هيام بعياط: يعني أنا غلطانة إني كنت عايزة نتلم في بيت واحد وبشتغل وبساعد معاك من ورا أهلي، بس خلاص، أصلاً إنت زبالة. دي اللي بتكلمها عليا؟ كريم: مافيش زبالة غيرك. هيام: يا جبروتك يا شيخ، يعني أدخل عليك ألاقيك بتكلمها وكمان بتشتمني، إنت كده وصلت لآخرك معايا. (قلعت هيام الدبلة ورمتها في وش كريم ومشيت) كريم: يلا في داهية. *عند فارس*

فارس: امضي. ريماس بخوف وتردد: مش عايزة أتجوزك. فارس: خافي على مامتك وامضي. ريماس في نفسها: ماشي يا فارس، أما خليتك تدفع تمن كل كلمة قولتهالي وتمن خوفي على ماما. فارس: اخلصي. (مضت ريماس على عقد الجواز وأصبحت فعلياً زوجة فارس النشارتي) *في عربية فارس* ريماس: إنت رايح على فين؟ فارس ببرود: على بيتي. ريماس: طيب وماما. فارس بإستهزاء: اشمعنى دي اللي هتقوليلها عليها؟

ريماس: نعم، دي ماما ولازم تعرف عشان متقلقش عليا، وبعدين إنت اسكت خالص، دي مش بعيد إنها ترميني في الشارع وتخاصمني بسببك. فارس: مش مهم. (ظلت ريماس تبكي طوال الطريق) *عند نور* نور: فكك يا أمل، مش هروح حفلات. أمل: يا بنتي، يعني إنتي عاجبك إنك معزولة دايماً كده بكعب الكوباية بتاعتك دي. نور: ممكن ما تتريقيش؟ أمل: يا بنتي أنا قصدي مصلحتك. نور بشك: هو أنا وحشة؟ أمل: قطع لسان اللي يقول كده، دي إنتي زي القمر.

نور بزعل: أمال ليه لؤي بيقولي إن وحشة؟ أمل: فكك منه، وتعالي معايا نروح نعمل شعرنا ونجيب لبس جديد وكمان. نور: انطقي، وكمان إيه؟ أمل: بصي بقى بصراحة، كعب الكوباية بتاعتك دي لازم تقلعي. نور: كده؟ أنا مش هعرف أشوف. أمل: لا يا حبيبتي، هنحطلك لينسيس. نور: بس أنا خايفة أطلع مش حلوة. أمل: يا بنتي إنتي قمر والله، بس إنتي عايزة تتظبطي شوية. نور: هو أنا مكنة عشان تظبطيها؟

أمل: مش قصدي يا نور، قصدي إنك عايزة شوية حاجات بسيطة عشان تبقي جميلة أكتر. نور: إذا كان كده، يلا بينا. *في بيت ريماس* هناء: يعني يا ماجد يا بني، ماتعرفش مين الراجل اللي خدت ريماس ومشي ده؟ ماجد: والله أنا أول مرة أشوفه يا طنط. هناء: طيب ربنا يستر بقى. ماجد: متخافيش يا طنط، إن شاء الله خير. هناء: يسمع من بوقك ربنا يا بني. (الباب خبط) ماجد: خليكي إنتي يا طنط، هقوم أنا أفتح. (قام ماجد فتح) ماجد: ريماس؟

كنتي فين مع البني آدم ده؟ فارس: إيه يا عم، ماتخافش عليها طول ما هي مع جوزها. ماجد: إنت اتجننت؟ ريماس استحالة تتجوز من ورانا. هناء: إيه الكلام ده يا ريماس؟ ريماس بعياط: ما هو يا ماما... (قاطعت هناء كلامها) هناء: يعني إيه يا بنتي؟ ما تردي. فارس: ما هو أصل يا حماتي. هناء بصوت عالي: إنت تخرص خالص، أنا بكلم بنتي، ما تردي يا بت. (ريماس ساكتة وبتعيط) هناء: إنتي هتفضلي تعيطي كتير كده؟ ردي عليا.

ماجد: خلاص يا طنط، اهدى، وإنتي يا ريماس، امشي دلوقتي إنتي وجوزك وابقي تعالي لها أما تهدأ أحسن كده الضغط هيرفع عليها. ريماس بعياط: تمام. (مشيت ريماس وفارس) يتبع