رواية حب الصدفة الفصل الخامس 5 - بقلم ملك عتمان

ألين وصلت البيت خبطت على الباب. محمد فتح: "إيه يابنتي التأخير ده كله؟ ألين: "مفيش يابابا أنا هدخل أنام." محمد: "طب مش هتتعشي الأول؟ ألين: "لا يا بابا أنا تعبانة خالص تصبح على خير." محمد: "وإنتي من أهله يابنتي." عند عمر أول مروح طلع أوضته علطول مكنش عارف ينام وقاعد يتقلب على السرير بيفكر فيها وبكل تفصيلة فيها. عمر لنفسه: "إيه ياعمر فيه إيه مالك معقولة تكون وقعت ولا إيه لا لا مستحيل." وبعد شوية نام.

(عمر شاب عنده ٣٢ سنة دكتور جراحة من أكتر الدكاترة الشاطرة في البلد وبيشتغل مع باباه في الشركة بتاعته كمان عايش مع مامتها وباباه وليه أخ وأخت شعره ناعم بني عيونه عسلي وجسمه رياضي) تاني يوم ألين صحيت من النوم حضرت الإفطار وصحت باباها عشان يفطروا. ألين: "أمال كريم فين يا بابا؟ محمد:

"نايم يابنتي وتعبني معاه والله مش بيسمع كلامي ومش بيبطل لعب كورة وسايب مذاكرته وإنتي عارفة إنه في سنة مهمة ونفسي أشوفه مهندس ولا دكتور زيك كدا." ألين: "طيب يابابا أنا هدخله أشوفه." ألين دخلت عند أخوها. ألين: "كريم اصحى من النوم عايزة أكلمك معاك." ملقتش رد منه أصل لما بينام بيبقى في غيبوبة. ألين: "كريم يا كريم اصحى يا كريم يعني مش هتصحى ومش بترد طيب." ألين طلعت جابت حلة ماية ودخلت الأوضة وهوب مرة واحدة دلقتها عليه.

كريم قام إنتفض من فوق السرير: "إنتي يا متخلفة إزاي تعملي كدا في حد يصحى نايم بالطريقة دي؟ ألين بضحك: "منا صحيتك كتير مش بتقوم." كريم: "تقومي تعملي فيا كدا وربنا يردهالك." ألين: "طب أبقى إعملها كدا وتعالى بقى عشان عايزة أكلمك في موضوع." كريم: "موضوع إيه؟ ألين: "بابا قالي إنك مش بتسمع كلامه ومتعبه ومقضيها لعب كورة ومش بتذاكر وإنت في سنة مهمة لازم تجيب مجموع حلو نفسي أشوفك أحسن دكتور في الدنيا."

(كريم أخو ألين الأصغر منها عيونه خضرا وشعره أسود في تالتة ثانوي) كريم: "يوه أنا زهقت بقى قولتلكوا كام مرة إني عارف مصلحتي كويس ومش محتاج نصايح من حد." ألين مرة واحدة نزلت بأديها على وشه. ألين: "إنت من إمتى وإنت بترفع صوتك عليا وهتسمع الكلام غصب عنك ومفيش لعب كورة من هنا ورايح تركز في مذاكرتك وبابا لو جه اشتكالي منك تاني إنت عارف أنا هعمل إيه يا كريم." وقامت طلعت بره الأوضة.

كريم كان واقف مصدوم أول مرة ألين تضربه وبقلم كمان. ألين أول ما طلعت من الأوضة فضلت تعيط أول مرة تضربه ديما مدلعاه من صغره عشان هو أخوها الوحيد وملهاش غيره. ألين لنفسها: "بس كان لازم أعمل كدا عشان يفوق بقى ويركز في مذاكرته ومستقبله ويتحمل المسئولية شوية بقى معاها." ألين قامت لبست سويت شيرت وعليه بنطلون ونزلت شغلها. عند عمر صحي من النوم لبس ونزل عشان يفطر. عمر: "صباح الخير يابابا صباح الخير ياماما." ليلى ويوسف:

"صباح النور ياحبيبي." عمر: "أمال نوران وعلى فين؟ ليلى: "على نزل الكلية ونوران راحت الدرس ياحبيبي." وهما قاعدين يفطروا. يوسف: "عمر." عمر: "نعم يابابا." يوسف: "أنا مشغول النهاردة شوية ومش هعرف أروح اجتماع الصفقة اللي بينا وبين أحمد المحرقاوي عايزك تروح بدالي." عمر: "حاضر يابابا كدا كدا مكنتش هروح المستشفى النهاردة." يوسف: "تمم أنا همشي أنا بقى." عمر: "وانا كمان همشي يادوب فاضل ساعة على الاجتماع ألحق أروح." ليلى:

"مع السلامة." في شركة المحرقاوي. فارس اتصل بتليفون المكتب على ألين: "حضري ورق الصفقة وكل حاجة عشان الاجتماع دلوقتي." ألين: "حاضر يافارس بيه." ألين دخلت وحطت الورق على المكتب ولسه هتطلع. فارس: "استني إنتي هتحضري الاجتماع معايا." ألين: "أنا؟ فارس: "أيوة يلا بينا." ألين وفارس دخلوا أوضة الاجتماع ولسه هيقعدوا. في صوت واحد عمر: "إنتي." ألين: "إنت."